Dzo kpo yi emenuwo dzi

Dzo kpo yi emenuawo dzi

2 Korintotɔwo 4:1-18

4  Esia tae esi subɔsubɔdɔ sia le mía si le nublanuikpɔkpɔ si woɖe fia mí ta la, míenaa ta o;  ke boŋ míegbe nu le bebemenu, siwo ta wòle be ŋu nakpe ame ɖo la gbɔ, eye míezɔna le ayemenuwɔwɔ me o, eye míetɔa tsi Mawu ƒe nya la o, ke boŋ míeɖea mía ɖokui fiaa amewo katã ƒe dzitsinya le Mawu ŋkume, esi míenana nyateƒea dzena.  Ke ne wotsyɔ nu nya nyui si gblɔm míele la dzi vavã la, ame siwo le tsɔtsrɔ̃m la domee wotsyɔ nu edzi le,  ame siwo dome nuɖoanyi sia ƒe mawu gbã ŋku na dzimaxɔsetɔwo ƒe tamesusu le, bene Kristo la, si nye Mawu ƒe nɔnɔme la, ŋuti ŋutikɔkɔe nya nyui la ƒe kekeli nagaklẽ ɖe wo me o.  Elabena míele gbeƒã ɖem mía ɖokui o, ke boŋ Kristo Yesu, be eyae nye Aƒetɔ la, kple mía ŋutɔwo, be míenye miaƒe kluviwo le Yesu ta.  Elabena Mawue nye ame si gblɔ be: “Kekeli neklẽ tso viviti me,” eye wòklẽ ɖe míaƒe dziwo dzi, bene wòatsɔ Mawu ŋuti sidzedze si ŋu ŋutikɔkɔe le la ato Kristo ƒe mo dzi aklẽ ɖe wo dzi.  Ke hã, nu xɔasi sia le mía si le anyigoewo me, bene ŋusẽ si gbɔ dzɔdzɔmetɔ ŋu la nanye Mawu tɔ, ke menye esi atso mía ŋutɔwo gbɔ o.  Womimi mí ɖo le mɔ sia mɔ nu, gake menye ale gbegbe be míedo kpo ʋaʋã o; míetɔtɔ, gake menye be míenya nu si míawɔ kura o;  wotia mía yome, gake womegblẽ mí ɖi o; woxlã mí ɖe anyi, gake wometsrɔ̃ mí o. 10  Afi sia afi si míeyina la, míetsɔa ale si wowɔ nu ɖe Yesu ŋu hewui la ɖe míaƒe ŋutilã me gbe sia gbe, bene Yesu ƒe agbe nadze le míaƒe ŋutilã hã me. 11  Elabena wotsɔ mí, ame siwo le agbe la, dzea ŋgɔ ku ɣesiaɣi le Yesu ta, bene Yesu ƒe agbe nadze le míaƒe ŋutilã, si kuna, la hã me. 12  Ale ku le dɔ dzi le mía me, gake agbe le dɔ dzi le miawo ya mia me. 13  Ke esi xɔse ƒe gbɔgbɔ si le mía si la sɔ kple esi ŋu woŋlɔ ɖi le be: “Meɖee fia be mexɔ edzi se, eya tae meƒo nu ɖo” ta la, míawo hã míeɖenɛ fiana be míexɔ edzi se, eya tae míeƒoa nu ɖo, 14  eye míenyae be ame si fɔ Yesu ɖe tsitre la afɔ míawo hã ɖe tsitre kpe ɖe Yesu ŋu, eye wòaɖe mía kpli miawo siaa afia. 15  Elabena wowɔ nuwo katã le mia ta, bene amenuveve, si dzi ɖe edzi la, nasɔ gbɔ ɖe edzi le ame geɖe wu ƒe akpedada ta, hena Mawu ƒe kafukafu. 16  Eya ta míenaa ta o; ke boŋ ne ame si míenye le gotagome le gbegblẽm hã la, kakaɖedzi li be, wole ame si míenye le ememe ya wɔm yeyee tso ŋkeke yi ŋkeke. 17  Elabena togbɔ be ɣeyiɣi vi aɖe ƒe xaxa si nu mesẽ o koe wònye hã la, ehea ŋutikɔkɔe gã mavɔ si ƒe kpekpeme ƒoa nu sia nu ta sãsãsã la vanɛ na mí; 18  esi míenana be, míaƒe ŋkuwo menɔa nu siwo wokpɔna la ŋu o, ke boŋ nu siwo womekpɔna o la ŋu. Elabena nu siwo wokpɔna la nɔa anyi ɣeyiɣi vi aɖe ko, gake nu siwo womekpɔna o ya nɔa anyi tegbee.

Etenuŋɔŋlɔ