2 Korintotɔwo 2:1-17

2  Elabena nu si nye ŋutɔ meɖo lae nye esi: be nyemagatsɔ nuxaxa ava mia gbɔ azɔ o.  Elabena ne mena miexa nu la, ekema ame kae ado dzidzɔ nam, ne menye ame si medo nuxaxa na lae oa?  Eya tae mele nya siawo tututu ŋlɔm ɖo ɖe mi, bene ne meva la, magaxa nu le ame siwo ta wòle be makpɔ dzidzɔ ɖo hafi la ŋuti o; elabena kakaɖedzi le asinye le mi katã gome be, nye dzidzɔe nye mi katã miaƒe dzidzɔ.  Elabena le xaxa kple dzi me vevesese geɖe me metsɔ aɖatsi geɖe ŋlɔ nu ɖo ɖe mi, menye be mana miaxa nu o, ke boŋ bene mianya lɔlɔ̃ geɖe si le asinye na mi la.  Ke ne ame aɖe na ame xa nu la, menye nyee wòdo nuxaxa na o, ke boŋ le mɔ aɖe nu la, mi katãe—nyemedi be nye nyagbɔgblɔ me nasẽ akpa o tae.  Mokaname sia si mia dometɔ akpa gãtɔ na ŋutsu sia la sɔ gbɔ nɛ,  eya ta azɔ la, ele be miatsɔe akee faa, eye miafa akɔ nɛ, bene nuxaxa akpa nagami ame sia le mɔ aɖe nu o.  Eya ta mele nu xlɔ̃m mi be, miaɖee afiae be mielɔ̃e.  Elabena esia ta hãe mele eŋlɔm na mi ɖo, be manya ne mieɖoa to le nuwo katã me. 10  Nu sia nu si miatsɔ ake ame aɖe faa la, nye hã metsɔe kee. Le nyateƒe me la, nu sia nu si metsɔ ke faa la, ne metsɔ nane ke faa la, mia tae metsɔe ke ɖo, le Kristo ŋkume; 11  bene Satana ƒe asi nagasu mía dzi o, elabena eƒe nugbeɖoɖowo mele manyamanya na mí o. 12  Ke esi meva ɖo Troa, be magblɔ nya nyui la tso Kristo la ŋu, eye woʋu ʋɔtru aɖe nam le Aƒetɔ la me la, 13  nyemevo le ɖokuinye me o, le esi nyemekpɔ nɔvinye Tito o ta, gake meklã wo, eye medze Makedonia mɔ. 14  Gake woada akpe na Mawu, ame si nɔa ŋgɔ na mí ɣesiaɣi le aʋadziɖuɖu ƒe gbɔlɔlɔ gã aɖe me ɖekae kple Kristo la, eye wònana wokpɔa eƒe sidzedze ƒe ʋeʋẽ la dzea sii toa mía dzi le afi sia afi! 15  Elabena mienye Kristo ƒe ʋeʋẽ lilili na Mawu le ame siwo ɖem wole kple ame siwo le tsɔtsrɔ̃m la dome; 16  míenye ʋeʋẽ si tsoa ku me yia ku me na ame mamlɛtɔ siawo, eye míenye ʋeʋẽ si tsoa agbe me yia agbe me na ame gbãtɔawo. Eye ame kae dze nyuie na nu siawo wɔwɔ? 17  Míawoe; elabena míetsɔa Mawu ƒe nya la tsaa asi abe ale si ame geɖewo wɔnɛ ene o, ke boŋ míegblɔnɛ le anukwareɖiɖi me, ɛ̃, abe ame siwo Mawu dɔ ene la, Mawu ŋkumee míele nu ƒom le le Kristo me.

Etenuŋɔŋlɔ