Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

2 Korintotɔwo 12:1-21

12  Ele be maƒo adegbe. Viɖe aɖeke mele eŋu o; gake mele nu ƒo ge tso Aƒetɔ la ƒe ŋutega wɔnukuwo kple nyaɖeɖefiawo ŋu.  Menya ame aɖe si le ƒomedodo me kple Kristo, si wokɔ yi dziƒo etɔ̃lia le nɔnɔme ma me ƒe wuienee nye esia—ŋutilã mee wònɔ o, nyemenya o, alo meɖanɔ ŋutilã me o, nyemenya o; Mawue nya.  Ɛ̃, menya ame ma—ŋutilã mee wòɖanɔ alo meɖanɔ ŋutilã me o, nyemenya o; Mawue nya—  be wokɔe yi paradiso me, eye wòse nya siwo mele be woagblɔ o, siwo womeɖe mɔ na ame, be wòagblɔ o.  Maƒo adegbe le nenem me sia ŋu, gake nyemaƒo adegbe le ɖokuinye ŋu o, negbe le nye gbɔdzɔgbɔdzɔwo ŋu ko.  Elabena ne madi be maƒo adegbe la, nyemaƒo nu abe ame si si susu mele o ene o, elabena mato nyateƒe. Gake nyemewɔnɛ o, bene ame aɖeke nagakafum wu ale si wòkpɔam, alo le nya siwo wòsena le nunye la nu,  le nyaɖeɖefia gbogboawo ɖeɖe dzaa ko ta o. Eya ta bene magado ɖokuinye ɖe dzi akpa o la, wotsɔ ŋu aɖe de nye ŋutilã me, Satana ƒe dɔla aɖe, be wòanɔ ƒoyem, bene magado ɖokuinye ɖe dzi akpa o.  Meɖe kuku na Aƒetɔ la vevie zi etɔ̃ le esia ŋuti, be wòadzo le gbɔnye;  ke hã, egblɔ nam eme kɔ nyuie be: “Nye amenuveve sɔ gbɔ na wò; elabena nye ŋusẽ zua blibo le mewò le wò gbɔdzɔgbɔdzɔ me.” Eya ta malɔ̃ faa geɖe wu be, maƒo adegbe le nye gbɔdzɔgbɔdzɔwo ŋu boŋ, bene Kristo la ƒe ŋusẽ nanɔ dzinye abe agbadɔ ene. 10  Eya ta mekpɔa dzidzɔ le gbɔdzɔgbɔdzɔwo me, le dzudzuwo me, le hiãkamewo me, le yometitiwo kple xaxawo me, le Kristo ta. Elabena ne megbɔdzɔ la, ekema ŋusẽ ɖoa ŋunye. 11  Mezu ame masenugɔme. Miawoe zi dzinye, elabena miawoe wòle be miakafum hafi. Elabena ne nyemenye naneke o gɔ̃ hã la, miaƒe apostolo deŋgɔ mawo menyo wum le nu ɖeka teti hã me o. 12  Le nyateƒe me la, wowɔ apostolo ƒe dzesiwo le mia dome to dzidodo katã me, eye wowɔ wo to dzesiwo kple nukunuwo kpakple ŋusẽdɔwo me. 13  Elabena nu ka mee hame susɔeawo nyo wu mi le, ne menye be nyemezu agba na mi o koe oa? Mitsɔ vodada sia kem faa. 14  Kpɔ ɖa! Zi etɔ̃liae nye esia si medzra ɖo be mava mia gbɔ, ke hã, nyemazu agba na mi o. Elabena menye miaƒe nunɔamesiwo dimee mele o, ke boŋ mia ŋutɔwoe; elabena menye viwoe adzra domenyinu ɖo ɖi na wo dzilawo o, ke boŋ dzilawoe awɔe na wo viwo. 15  Le gonyeme la, adzɔ dzi nam be mazã nye nuwo katã, eye be woazãm bliboe, ɖe miaƒe luʋɔwo ta. Ne melɔ̃ mi geɖe wu la, ɖe wòle be miawo ya mialɔ̃m ʋɛe wua? 16  Gake aleke kee wòɖale o, nyemezu agba na mi o. Ke hã, miegblɔna be menye “ayetɔ,” eye be “meble” mia nu lé. 17  Nyemeto ame siwo medɔ ɖo ɖe mi la dometɔ aɖeke dzi di viɖe le mia ŋu o, alo mewɔea? 18  Mexlɔ̃ nu Tito, eye medɔ nɔvi la kpe ɖe eŋu. Tito medi viɖe aɖeke le mia ŋu o ɖe, alo ediia? Gbɔgbɔ ɖeka ma nue míezɔ le, menye nenemae oa? Afɔɖoƒe ɖekae míezɔ, menye nenemae oa? 19  Ðe miele susum le ɣeyiɣi sia katã me be, míele mía ɖokui ta ʋlim le mia ŋkumea? Mawu ŋkumee míele nu ƒom le le Kristo me. Gake lɔlɔ̃tɔwo, nuwo katã li hena mia tutuɖo. 20  Elabena mele vɔvɔ̃m be le mɔ aɖe nu la, ɖewohĩ ne meva la, nyemakpɔ mi abe ale si madi ene o, eye be nyemanɔ na mi abe ale si miadi ene o, ke boŋ be dzre, ŋuʋaʋã, dzikudodowo, nyahehewo, ameŋugbegblẽwo, sakplisasawo, ɖokuidodoɖedziwo, nyamanyamawɔwɔwo, anɔ anyi le mɔ aɖe nu. 21  Ðewohĩ ne megava la, nye Mawu abɔbɔm ɖe anyi le mia dome, eye maxa nu le ame siwo wɔ nu vɔ̃ tsã, evɔ wometrɔ dzi me le woƒe makɔmakɔnyenye kple agbe gbegblẽ nɔnɔ kpakple ŋukpenanuwɔwɔ si me wonɔ me o, la dometɔ geɖewo ta.

Etenuŋɔŋlɔ