2 Korintotɔwo 11:1-33

11  Madi be miado dzi ase nye nya siwo adze abe susu mele wo me o ene la gɔme nam. Le nyateƒe me la, miele dzia dom hã xoxo!  Elabena metsɔ mawumeŋuʋaʋã aɖe le ŋu ʋãm ɖe mia nu, elabena nye ŋutɔe do mia ɖeɖe ŋugbe na ŋutsu ɖeka, si nye Kristo la, bene matsɔ mi anae abe ɖetugbui dzadzɛ, si menya ŋutsu o ene.  Gake mele vɔvɔ̃m be le mɔ aɖe nu la, ale si da la tsɔ eƒe ayedzedze ble Xawa la, ɖewohĩ woagblẽ miaƒe susu tso anukwareɖiɖi kple agbe dzadzɛ nɔnɔ siwo Kristo la dze na la me.  Elabena ne ame aɖe va ɖe gbeƒã Yesu bubu aɖe, si to vovo na esi míeɖe gbeƒãe, alo miexɔ gbɔgbɔ bubu aɖe, si to vovo na esi miexɔ, alo nya nyui bubu aɖe, si to vovo na esi miexɔ la, miexɔa edzi sena bɔbɔe.  Elabena nyemesusu be miaƒe apostolo deŋgɔ mawo nyo wum le nu ɖeka teti hã me o.  Gake ne nyemebi le nuƒoƒo me o kura gɔ̃ hã la, nyemele nenema le sidzedze ya me o; ke boŋ míeɖee fia mi le mɔ sia mɔ nu le nuwo katã me.  Alo nu vɔ̃e wònye mewɔ be mebɔbɔ ɖokuinye, bene woado mi ɖe dzi, le esi megblɔ Mawu ŋuti nya nyui la na mi dzidzɔtɔe fetu maxɔmaxɔea?  Meha hame bubuwo esi melɔ̃ xɔ woƒe nunanawo, bene masubɔ mi;  evɔ esi menɔ mia gbɔ, eye nu hiãm la, nyemezu agba na mia dometɔ ɖeka pɛ hã o, elabena nɔvi siwo tso Makedonia va la na nu siwo hiãm la wòsɔ gbɔ. Ɛ̃, le mɔ sia mɔ nu la, meɖoe be nyemazu agba na mi o, eye meɖoe be mayi edzi nenema. 10  Zi ale si Kristo ƒe nyateƒea le menye la, nyemadzudzɔ adegbe sia ƒoƒo le Axaya nutoawo me o. 11  Le susu ka ta? Esi nyemelɔ̃ mi o taea? Mawu nya be melɔ̃ mi. 12  Ke nu si wɔm mele la, mayi edzi awɔe, bene mana mɔnukpɔkpɔ nu natsi na ame siwo le mɔnu dim, be amewo nakpɔ yewo be yewosɔ kpli mí le dɔ si ta wole adegbe ƒom ɖo la me. 13  Elabena ame siawo nye aʋatso apostolowo, dɔwɔla ameblelawo, eye wotrɔa wo ɖokuiwo wɔa Kristo ƒe apostolowo. 14  Eye esia mewɔ nuku o, elabena Satana ŋutɔ yia edzi trɔa eɖokui wɔa kekeli ƒe dɔla. 15  Eya ta menye nu gã aɖekee wònye, ne eƒe subɔlawo hã yia edzi trɔa wo ɖokuiwo dzɔdzɔenyenye ƒe subɔlawo o. Gake woƒe nuwuwu anɔ ɖe woƒe dɔwɔwɔwo nu. 16  Megale egblɔm ake be: Ame aɖeke negabu be susu mele nye nyawo me o. Ne miebui nenema ŋutɔŋutɔ hã la, mixɔm, ne megadze abe ame si ƒe nyawo me susu mele o ene hã, bene nye hã maƒo adegbe vi aɖe. 17  Nya si gblɔm mele la, nyemele egblɔm le kpɔɖeŋu si Aƒetɔ la ɖo la nu o, ke boŋ abe ame si si susu mele o ene, le kakaɖedzi sia si dzena le adegbeƒolawo ŋu me. 18  Esi ame geɖewo le adegbe ƒom le ŋutilã nu ta la, nye hã maƒo adegbe. 19  Elabena esi mia ŋutɔwo mienye nugɔmeselawo ta la, miedoa dzi xɔa ame masenugɔmewo dzidzɔtɔe. 20  Ɛ̃, ne ame aɖe wɔ mi kluvii, ne ame aɖe ble mi ɖu, ne ame aɖe xɔ nu si le mia si akpasesẽe, ne ame aɖe do eɖokui ɖe dzi ɖe mia ŋu, ne ame aɖe ƒo mo na mi la, miedoa dzi tsɔnɛ. 21  Enye ŋukpe na mí be magblɔ nya sia, abe ɖe ŋusẽ megale mía ŋu o ene. Gake ne ame bubu aɖe wɔa nu dzinɔameƒotɔe le nane me la—mele nu ƒom abe ame si si susu mele o ene—nye hã mele nu wɔm dzinɔameƒotɔe nenema ke. 22  Hebritɔwoe wonyea? Wo dometɔ ɖekae nye hã menye. Israel viwoe wonyea? Wo dometɔ ɖekae nye hã menye. Abraham ƒe dzidzimee wonyea? Nye hã menyee. 23  Kristo ƒe subɔlawoe wonyea? Mele eŋu ɖom abe aɖaʋatɔ ene be, menyee wu wo: le agbagbadzedze geɖe wu me, le gaxɔmenɔnɔ geɖe wu me, le ƒoƒo geɖe akpa me, le kudonuɖoɖo zi geɖe me. 24  Mexɔ ƒoƒo blaene, ɖeka koe do le eme, zi atɔ̃ sɔŋ, le Yudatɔwo si me, 25  zi etɔ̃ woƒom kple ati, zi ɖeka woƒu kpem, menɔ tɔdziʋu me wògbã zi etɔ̃, menɔ ƒutsotsoewo nu zã blibo ɖeka kple ŋkeke blibo ɖeka; 26  mezɔ mɔ enuenu; meɖo afɔku me le tɔsisiwo dzi, meɖo afɔku me le adzodalawo dome, meɖo afɔku me le nye ŋutɔ nye dukɔmeviwo dome, meɖo afɔku me le dukɔwo dome, meɖo afɔku me le du me, meɖo afɔku me le gbedadaƒo, meɖo afɔku me le atsiaƒu dzi, meɖo afɔku me le aʋatsonɔviwo dome; 27  le agbagbadzedze kple kutrikuku me; le zãdomadɔlɔ̃e zi geɖe me, le dɔwuame kple tsikɔwuame me, le numaɖumaɖu zi geɖe me, le vuvɔ kple amamanɔnɔ me. 28  Hekpe ɖe nu siawo, siwo tso gota ŋu la, nane tena ɖe dzinye tso ŋkeke yi ŋkeke, dzimaɖitsitsi ɖe hameawo katã ŋu. 29  Ame kae gbɔdzɔ, eye nyemegbɔdzɔ o? Ame kae wozu nukikli na, eye meku dzi nam o? 30  Ne adegbeƒoƒo aɖe anɔ anyi la, ekema maƒo adegbe le nu siwo ku ɖe nye gbɔdzɔgbɔdzɔ ŋu la ŋuti. 31  Aƒetɔ Yesu ƒe Mawu, si nye Fofoa, Ame si wòle be woakafu yi mavɔmavɔ me la, nyae be nyemele aʋatso kam o. 32  Le Damasko la, nutomefia si le fia Areta te la nɔ Damaskotɔwo ƒe dua ŋu dzɔm, be yealém, 33  gake wotsɔm de kusi me heɖiɖim to fesre aɖe si le glia me la nu ɖe anyigba, eye mesi dzo le eƒe asi me.

Etenuŋɔŋlɔ