Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

2 Korintotɔwo 1:1-24

1  Paulo, Kristo Yesu ƒe apostolo to Mawu ƒe lɔlɔ̃nu me, kple mía nɔvi Timoteo, le esia ŋlɔm na Mawu ƒe hame si le Korinto, kpakple ame kɔkɔe siwo katã le Axaya blibo la katã:  Amenuveve kple ŋutifafa si tso Mawu mía Fofo kple Aƒetɔ Yesu Kristo gbɔ la, woana mi.  Woayra mía Aƒetɔ Yesu Kristo ƒe Mawu kple Fofo, ame si nye dɔmetɔtrɔwo ƒe Fofo kple akɔfafa katã ƒe Mawu,  ame si faa akɔ na mí le míaƒe xaxa blibo la katã me, bene míato akɔfafa si Mawu tsɔ le akɔ fam na mía ŋutɔwoe la dzi afa akɔ na ame siwo le xaxa ɖe sia ɖe ƒomevi me tom la.  Elabena ale si ko míaƒe fukpekpewo le Kristo la ta sɔ gbɔe la, nenema kee akɔfafa si míekpɔna to Kristo la dzi hã sɔ gbɔe.  Ke míele xaxa me tom o, miaƒe akɔfafa kple ɖeɖekpɔkpɔ tae; alo wole akɔ fam na mí o, miaƒe akɔfafa, si akpe ɖe mia ŋu miado dzi le fu siwo ke míawo hã míekpena me, la tae.  Ale mɔkpɔkpɔ si le mía si le mia gome la li ke sesĩe, esi míenyae be, ale si ko miekpɔa gome le fukpekpeawo me la, nenema kee miakpɔ gome le akɔfafa la hã me.  Elabena nɔviwo, le xaxa si va mía dzi le Asia nuto me ŋuti la, míedi be wòanɔ manyamanya na mi o, be womimi mí ɖo wòwu tsɔtsɔ na mí, ale gbegbe be míegaka ɖe míaƒe agbetsitsi kura gɔ̃ hã dzi o.  Le nyateƒe me la, míese le mía ɖokui me be wotso kufia na mí. Eva eme alea, bene míagaɖo ŋu ɖe mía ɖokuiwo ŋu o, ke boŋ ɖe Mawu, ame si fɔa ame kukuwo ɖe tsitre, la ŋu. 10  Eɖe mí tso nu gã sia gbegbe, si nye ku me, eye agaɖe mí; eye míele mɔ kpɔm nɛ be agaɖe mí geɖe wu. 11  Miawo hã miate ŋu akpe ɖe mía ŋu to kokoƒoƒo ɖe mía ta me, bene ame geɖewo nada akpe ɖe mía ta, le nu si wotsɔ na mí dɔmenyotɔe le ame geɖewo ƒe gbedodoɖa ta la ŋuti. 12  Elabena nu si ŋu míeƒoa adegbe ɖo lae nye esi, si ŋu míaƒe dzitsinya ɖia ɖase le: be míetsɔ kɔkɔenyenye kple anukwareɖiɖi si tso Mawu gbɔ la nɔ agbe le xexea me, vevietɔ le mia dome, eye menye to ŋutilã ƒe nunya me o, ke boŋ le Mawu ƒe amenuveve me. 13  Elabena le nyateƒe me la, míele nu bubu aɖeke ŋlɔm ɖo ɖe mi o, negbe nu siwo mienya nyuie alo nu siwo dzi mielɔ̃ ɖo la koe; eye mele mɔ kpɔm be mialɔ̃ ɖe wo dzi va se ɖe nuwuwu, 14  abe ale si ko mielɔ̃ ɖe edzi hã, le mɔ aɖe nu be, ele be yewoaƒo adegbe le mía ta, abe ale si ko míawo hã míaƒo adegbe le mia ta le mía Aƒetɔ Yesu ƒe ŋkeke la dzi ene. 15  Eya ta kakaɖedzi siae nɔ asinye esime meɖoe gbã be mava mia gbɔ, bene dzi nadzɔ mi zi evelia, 16  eye ne meva to mia gbɔ vɔ la, mayi Makedonia, eye be matrɔ tso Makedonia agava mia gbɔ, eye miaɖom ɖa vie ne mayi Yudea. 17  Esi meɖoe nenema tsã la, menye fefemee menɔ o ɖe, alo? Alo nu siwo meɖo ɖe tame la, ɖe meɖo wo le ŋutilã nu, si wɔe be nye nyawo nye “Ɛ̃, Ɛ̃,” gatrɔ zu “Ao, Ao” mahã? 18  Gake esi wònye woate ŋu aɖo ŋu ɖe Mawu ŋu ta la, nya si míegblɔ na mi la menye Ɛ̃ ganye Ao o. 19  Elabena Mawu ƒe Vi, Kristo Yesu, ame si woɖe gbeƒã le mia dome to mía kple Silvano kpakple Timoteo dzi, la menye Ɛ̃ ganye Ao o, ke boŋ Ɛ̃ zu Ɛ̃ le eyama gome. 20  Elabena aleke gbegbee Mawu ƒe ŋugbedodowo ɖasɔ gbɔe o, wo katã wozu Ɛ̃ to eyama dzi. Eya ta eya dzi kee wogblɔa “Amen” na Mawu le hena Mawu ƒe ŋutikɔkɔe to mía dzi. 21  Gake Mawue nye ame si ɖo kpe edzi be mía kple miawo míenye Kristo tɔ, eye eyae si ami na mí. 22  Etsɔ eƒe nutrenu ɖo mía ŋu hã, eye wòna nu si ava va la ƒe kpeɖodzi sue aɖe mí, si nye gbɔgbɔ la, le míaƒe dziwo me. 23  Azɔ mele Mawu yɔm, be wòanye ɖasefo ɖe nye ŋutɔ nye luʋɔ ŋu be, nublanui si mekpɔ na mi tae nyemeva Korinto haɖe o. 24  Menye be míeɖua aƒetɔ ɖe miaƒe xɔse dzi o, ke boŋ míenye hadɔwɔlawo hena miaƒe dzidzɔkpɔkpɔ, elabena miaƒe xɔsee na miele tsitre.

Etenuŋɔŋlɔ