Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

1 Yohanes 5:1-21

5  Ame sia ame si xɔna sena be Yesue nye Kristo la, Mawu mee wodzii tso, eye ame sia ame si lɔ̃a ame si na wodzi ame ma la, elɔ̃a ame si wodzi tso ame ma me.  Esia me míedzea sii le be míele Mawu ƒe viwo lɔ̃m, ne míele Mawu lɔ̃m hele eƒe seawo dzi wɔm.  Elabena nu si lɔlɔ̃ na Mawu fiae nye esi: be míawɔ eƒe seawo dzi; eye eƒe seawo menye agba o,  elabena nu sia nu si wodzi tso Mawu me la ɖua xexea dzi. Eye aʋadziɖuɖu si ɖua xexea dzi lae nye esi: míaƒe xɔse.  Ame kae nye ame si ɖua xexea dzi, ne menye ame si xɔe se be Yesue nye Mawu ƒe Vi la oa?  Eyae nye ame si va to tsi kple ʋu me, si nye Yesu Kristo; menye kple tsi ɖeɖe ko o, ke boŋ kple tsi kpakple ʋu. Eye gbɔgbɔ lae le ɖase ɖim, elabena gbɔgbɔ lae nye nyateƒe la.  Elabena ɖaseɖila etɔ̃e li,  gbɔgbɔ la, tsi la, kple ʋu la, eye nu etɔ̃ siawo le nusɔsɔe me.  Ne míexɔa amegbetɔwo ƒe ɖaseɖiɖi la, Mawu ƒe ɖaseɖiɖi la lolo wu, elabena esiae nye Mawu ƒe ɖaseɖiɖi, be eɖi ɖase tso Via ŋu. 10  Ame si xɔa Mawu ƒe Vi la dzi sena la kpɔ ɖaseɖiɖi na eɖokui. Ame si mexɔa Mawu dzi sena o la donɛ aʋatsokalae, elabena mexɔ ɖaseɖiɖi si Mawu, ame si nye ɖaseɖila la, na tso Via ŋu la dzi se o. 11  Eye ɖaseɖiɖi si wona lae nye esi: be Mawu na agbe mavɔ mí, eye agbe sia le Via me. 12  Ame si si Vi la le la, agbe sia le esi; ame si si Mawu ƒe Vi la mele o la, agbe sia mele esi o. 13  Mele nu siawo ŋlɔm na mi bene mianyae be agbe mavɔ le mia si, mi ame siwo xɔa Mawu ƒe Vi la ƒe ŋkɔa dzi sena. 14  Eye kakaɖedzi si le mía si ku ɖe eŋu lae nye esi: be nu sia nu si míabia wòawɔ ɖeka kple eƒe lɔlɔ̃nu la, aɖo to mí. 15  Azɔ hã, ne míenya be eɖoa to mí le nu sia nu si biam míele me la, ekema míenya be míakpɔ nu siwo míebiae la, elabena esie míebia wo le. 16  Ne ame aɖe kpɔ nɔvia wòle nu vɔ̃ aɖe si mekplɔa ame yia ku me o wɔm la, ado gbe ɖa, eye wòana agbee, ɛ̃, ana agbe ame siwo mele nu vɔ̃ si kplɔa ame yia ku me o wɔm la. Nu vɔ̃ aɖe li si kplɔa ame yia ku me. Nyemegblɔ nɛ be wòaɖe kuku ɖe nu vɔ̃ ma ya ta o. 17  Madzɔmadzɔnyenye ɖe sia ɖe nye nu vɔ̃; ke hã, nu vɔ̃ aɖe li, si mekplɔa ame yia ku me o. 18  Míenyae be ame sia ame si wodzi tso Mawu me la meyia edzi nɔa nu vɔ̃ wɔm o, gake Ame si wodzi tso Mawu me la léa ŋku ɖe eŋu, eye vɔ̃ɖitɔ la ƒe asi mekpea eyama dzi o. 19  Míenyae be Mawu me míetso, gake xexe blibo la katã le vɔ̃ɖitɔ la ƒe ŋusẽ te. 20  Gake míenyae be Mawu ƒe Vi la va, eye wòna míaƒe susuwo ʋu, ale be míadze si nyateƒetɔ la. Eye míele ƒomedodo me kple nyateƒetɔ la, to Via Yesu Kristo dzi. Eyae nye Mawu vavã la kple agbe mavɔ la. 21  Vinye lɔlɔ̃awo, mikpɔ mia ɖokui dzi le trɔ̃wo ŋu.

Etenuŋɔŋlɔ