1 Yohanes 4:1-21

4  Lɔlɔ̃tɔwo, migaxɔ nya sia nya si tso gbɔgbɔ me la dzi se o, ke boŋ mido nya siwo tso gbɔgbɔ me la kpɔ, be Mawu gbɔe wotso hã, elabena aʋatsonyagblɔɖila geɖewo do go yi xexea me.  Mɔ si dzi miato anya nya si tso Mawu ƒe gbɔgbɔ me lae nye esi: Nya sia nya si tso gbɔgbɔ aɖe gbɔ, si ʋua eme be Yesu Kristo va le ŋutilã me la tso Mawu gbɔ,  gake nya sia nya si tso gbɔgbɔ aɖe gbɔ, si meʋua Yesu me o la metso Mawu gbɔ o. Gawu la, esiae nye nya si tso Kristo ƒe futɔ la gbɔ, si ŋkɔ miese be egbɔna, eye azɔ la, ele xexea me xoxo.  Vinye lɔlɔ̃awo, Mawu mee mietso, eye mieɖu ame mawo dzi, elabena ame si le ƒomedodo me kpli mi la lolo wu ame si le ƒomedodo me kple xexea.  Xexea mee wotso; esia tae wogblɔa nya siwo tso xexea me, eye xexea ɖoa to wo.  Mawu mee míetso. Ame si nya Mawu la ɖoa to mí; ame si metso Mawu me o la meɖoa to mí o. Aleae míewɔna nyaa nya si tso nyateƒegbɔgbɔ la gbɔ, kple esi tso aʋatsogbɔgbɔ la gbɔ.  Lɔlɔ̃tɔwo, mina míayi edzi alɔ̃ mía nɔewo, elabena lɔlɔ̃ la tso Mawu me, eye ame sia ame si lɔ̃a ame la, Mawu mee wodzii tso, eye wòdze si Mawu.  Ame si melɔ̃a ame o la medze si Mawu o, elabena Mawu nye lɔlɔ̃.  Esia me woɖe Mawu ƒe lɔlɔ̃ ɖe go fia le le mía gome, elabena Mawu dɔ eƒe Tenuvi la ɖo ɖe xexea me, be míakpɔ agbe to edzi. 10  Esia me lɔlɔ̃ la le, menye be míawo míelɔ̃ Mawu o, ke boŋ be eya lɔ̃ mí, eye wòdɔ Via be wòanye avulévɔsa ɖe míaƒe nu vɔ̃wo ta. 11  Lɔlɔ̃tɔwo, ne aleae Mawu lɔ̃ míi la, ekema agba le míawo hã mía dzi be míalɔ̃ mía nɔewo. 12  Ame aɖeke mekpɔ Mawu ɣeaɖekeɣi kpɔ o. Ne míeyi edzi lɔ̃a mía nɔewo la, ekema Mawu kpɔtɔ le mía me, eye eƒe lɔlɔ̃ la le blibo le mía me. 13  Esia me míenyana le be míekpɔtɔ le ƒomedodo me kplii, eye be eya hã kpɔtɔ le ƒomedodo me kpli mí, elabena ena eƒe gbɔgbɔ la mí. 14  Gawu la, mía ŋutɔwo míekpɔ, eye míele ɖase ɖim be Fofo la dɔ Via ɖa be wòanye xexea Ðela. 15  Ame sia ame si ʋua eme be Yesu Kristo ye nye Mawu ƒe Vi la, Mawu kpɔtɔ nɔa ƒomedodo me kplii, eye eya hã nɔa ƒomedodo me kple Mawu. 16  Eye mía ŋutɔwo míeva de dzesi lɔlɔ̃ si le Mawu si na mí la, eye míexɔa lɔlɔ̃ sia dzi sena. Mawu nye lɔlɔ̃, eye ame si yia edzi lɔ̃a ame la nɔa ƒomedodo me kple Mawu, eye Mawu hã nɔa ƒomedodo me kplii. 17  Aleae wona lɔlɔ̃ la le blibo le mía me, bene míaƒo nu dzinɔameƒotɔe le ʋɔnudrɔ̃gbe la, elabena ale si ame ma le la, nenema kee mía ŋutɔwo hã míele le xexe sia me. 18  Vɔvɔ̃ aɖeke mele lɔlɔ̃ me o, ke boŋ lɔlɔ̃ si de blibo la nyaa vɔvɔ̃ doa goe, elabena vɔvɔ̃ hea tohehe vanɛ. Le nyateƒe me la, ame si le vɔvɔ̃m la mede blibo le lɔlɔ̃ me o. 19  Ke míawo ya la, míelɔ̃a ame, elabena eyae lɔ̃ mí gbã. 20  Ne ame aɖe gblɔna be: “Melɔ̃a Mawu,” evɔ wòléa fu nɔvia la, aʋatsokalae wònye. Elabena ame si melɔ̃a nɔvia, si kpɔm wòle o la, mate ŋu alɔ̃ Mawu, ame si mekpɔna o, la o. 21  Eye míexɔ se sia tso egbɔ be, ele be ame si lɔ̃a Mawu la nalɔ̃ nɔvia hã.

Etenuŋɔŋlɔ