1 Yohanes 3:1-24

3  Mikpɔ lɔlɔ̃ gã si gbegbe le Fofo la si na mí ɖa, be woayɔ mí be Mawu ƒe viwo; eye míenye viawo hã nyateƒe. Esia tae xexea menya mí o ɖo, elabena medze sii o.  Lɔlɔ̃tɔwo, azɔ la, míenye Mawu ƒe viwo, gake womeɖe nu si míava nye la fia mí haɖe o. Míenya nyuie be, ne wova ɖee ɖe go fia la, míanɔ abe eya ene, elabena míakpɔe abe ale si wòle ene.  Eye ame sia ame si si mɔkpɔkpɔ sia, si wotu ɖe eyama dzi le la, kɔa eɖokui ŋu abe ale si ame ma ŋutɔ hã le kɔkɔe ene.  Ame sia ame si yia edzi wɔa nu vɔ̃ la le se dzi dam hã, eya ta nu vɔ̃e nye sedzimawɔmawɔ.  Mienyae hã be, woɖe ame ma ɖe go fia, be wòaɖe míaƒe nu vɔ̃wo ɖa, eye nu vɔ̃ aɖeke mele eme o.  Ame sia ame si le ƒomedodo me kplii la meyia edzi nɔa nu vɔ̃ wɔm o; ame sia ame si yia edzi nɔa nu vɔ̃ wɔm la mekpɔe alo dze sii o.  Viwo, migana ame aɖeke nakplɔ mi atrae o; ame si yia edzi wɔa nu dzɔdzɔe la nye ame dzɔdzɔe, abe ale si ko ame ma hã nye ame dzɔdzɔe ene.  Ame si yia edzi wɔa nu vɔ̃ la tso Abosam me, elabena tso gɔmedzedzea me kee Abosam le nu vɔ̃ wɔwɔ dzi. Susu si ta woɖe Mawu ƒe Vi la ɖe go fiae nye be, wòagblẽ Abosam ƒe dɔwɔwɔwo me.  Ame sia ame si wodzi tso Mawu me la meyia edzi nɔa nu vɔ̃ wɔm o, elabena nuku si tso egbɔ la le ame sia me, eye mate ŋu ayi edzi anɔ nu vɔ̃ wɔm o, elabena wodzii tso Mawu me. 10  Mawu ƒe viwo kple Abosam ƒe viwo dze ƒãa le nya sia me: Ame sia ame si meyia edzi wɔa nu dzɔdzɔe o la metso Mawu me o, eye nenema kee nye ame si melɔ̃a nɔvia o hã. 11  Elabena esiae nye gbedeasi si miese tso gɔmedzedzea me be, ele be míalɔ̃ mía nɔewo; 12  menye abe Kain, ame si dzɔ tso vɔ̃ɖitɔ la me, eye wòwu nɔvia la ene o. Eye nu ka tae wòwui ɖo? Elabena ye ŋutɔ ƒe dɔwɔwɔwo vɔ̃ɖi, gake nɔvia tɔwo ya nɔ dzɔdzɔe. 13  Nɔviwo, negawɔ mo yaa na mi be xexea léa fu mi o. 14  Míenyae be míeto ku me yi agbe me, elabena míelɔ̃a nɔviawo. Ame si melɔ̃a ame o la tsia ku me. 15  Ame sia ame si léa fu nɔvia la, amewulae wònye, eye mienyae be agbe mavɔ menɔa amewula aɖeke me o. 16  Esia me míeva dze si lɔlɔ̃ la le, elabena ame ma tsɔ eƒe luʋɔ na ɖe mía ta; eye agba le mía dzi be míatsɔ míaƒe luʋɔ ana ɖe mía nɔviwo ta. 17  Gake ame sia ame si si xexe sia me nunɔamesiwo le, eye wòkpɔ nɔvia le hiã me, gake wògbe nublanuikpɔkpɔ nɛ la, mɔ ka nue Mawu ƒe lɔlɔ̃ nɔa eme le? 18  Vinye lɔlɔ̃awo, migana míatsɔ nya kple aɖe alɔ̃ ame o, ke boŋ míatsɔ nuwɔna kple nyateƒe alɔ̃ ame. 19  Esia mee míanyae le be míedzɔ tso nyateƒe la me, eye míana kakaɖedzi míaƒe dziwo le eŋkume, 20  le nu sia nu si me míaƒe dzi abu fɔ mí le la me, elabena Mawu nye gã wu míaƒe dziwo, eye wònya nuwo katã. 21  Lɔlɔ̃tɔwo, ne míaƒe dzi mebua fɔ mí o la, ekema míaƒo nu dzinɔameƒotɔe le Mawu ŋkume, 22  eye nu sia nu si míebiae la, míaxɔe tso egbɔ, elabena míele eƒe seawo dzi wɔm, eye míele nu siwo nyo le eŋkume la wɔm. 23  Nyateƒee, eƒe sedede lae nye esi: be míaxɔ Via Yesu Kristo ƒe ŋkɔ dzi ase, eye míanɔ mía nɔewo lɔ̃m, abe ale si wòde se na míi ene. 24  Hekpe ɖe eŋu la, ame si wɔa eƒe sewo dzi la nɔa ƒomedodo me kplii, eye eya hã nɔa ƒomedodo me kple ame ma; eye esia me míenyana le be, ekpɔtɔ le ƒomedodo me kpli mí, le gbɔgbɔ si wòna mí la ta.

Etenuŋɔŋlɔ