Dzo kpo yi emenuwo dzi

Dzo kpo yi emenuawo dzi

1 Yohanes 2:1-29

2  Vinye lɔlɔ̃awo, mele nu siawo ŋlɔm ɖo ɖe mi, bene miagawɔ nu vɔ̃ o. Ke hã, ne edzɔ be ame aɖe wɔ nu vɔ̃ aɖe la, kpeɖeŋutɔ le mía si le Fofo la gbɔ, si nye ame dzɔdzɔe Yesu Kristo.  Eye eyama nye avulévɔsa ɖe míaƒe nu vɔ̃wo ta, ke hã, menye ɖe mía tɔ ɖeɖe ko ta o, ke ɖe xexe blibo la hã tɔ ta.  Eye ne míeyi edzi wɔa eƒe sewo dzi la, emae nana míenyana be míeva dze sii.  Ame si gblɔna be: “Meva dze sii,” evɔ mele eƒe seawo dzi wɔm o la, aʋatsokala wònye, eye nyateƒe la mele ame sia me o.  Gake ame sia ame si wɔa eƒe nya dzi la, Mawu ƒe lɔlɔ̃ de blibo le ame sia me vavã. Esia me míenyana le be míele ƒomedodo me kplii.  Ame si gblɔna be yele ƒomedodo me kplii la, agba le edzi hã be wòayi edzi azɔ abe ale si ame ma zɔe ene.  Lɔlɔ̃tɔwo, menye se yeye ŋlɔm mele ɖo ɖe mi o, ke se xoxo, si le mia si tso gɔmedzedzea me ke la boŋ ye. Se xoxo siae nye nya si miese la.  Megale se yeye ŋlɔm na mi ake, nu si nye nyateƒe le eya kple miawo hã gome, elabena viviti la nu le yiyim, eye kekeli vavãtɔ la le keklẽm xoxo.  Ame si gblɔna be yele kekeli la me, evɔ wòléa fu nɔvia la, egale viviti la me va se ɖe fifia. 10  Ame si lɔ̃a nɔvia la yia edzi nɔa kekelia me, eye nukikli aɖeke mele eyama gome o. 11  Gake ame si léa fu nɔvia la le viviti me, eye wòle viviti me zɔm, eye menya afi si yim wòle o, elabena viviti la gbã eƒe ŋkuwo. 12  Mele nya sia ŋlɔm na mi, vinye lɔlɔ̃awo, elabena wotsɔ miaƒe nu vɔ̃wo ke mi le eƒe ŋkɔ la ta. 13  Mele eŋlɔm na mi, vifofowo, elabena mieva nya ame si li tso gɔmedzedzea me ke la. Mele eŋlɔm na mi, ɖekakpuiwo, elabena mieɖu vɔ̃ɖitɔ la dzi. Mele eŋlɔm na mi, vinye lɔlɔ̃awo, elabena mieva nya Fofo la. 14  Mele eŋlɔm na mi, vifofowo, elabena mieva nya ame si li tso gɔmedzedzea me ke la. Mele eŋlɔm na mi, ɖekakpuiwo, elabena ŋusẽ le mia ŋu, eye Mawu ƒe nya la le mia me, eye mieɖu vɔ̃ɖitɔ la dzi. 15  Miganɔ xexea alo nu siwo le xexea me la lɔ̃m o. Ne ame aɖe lɔ̃a xexea la, Fofo la ƒe lɔlɔ̃ mele eme o; 16  elabena nu sia nu si le xexea me—ŋutilã ƒe nudzodzro kple ŋkuwo ƒe nudzodzro kple ame ƒe nunɔamesiwo fiafia adegbeƒoƒotɔe be woakpɔ—la metso Fofo la gbɔ o, ke boŋ xexea me wotso. 17  Eye xexea nu va yina, nenema kee nye eƒe nudzodzro la hã, ke ame si wɔa Mawu ƒe lɔlɔ̃nu la nɔa anyi yi mavɔmavɔ me. 18  Vinye lɔlɔ̃awo, gaƒoƒo mamlɛtɔ lae nye esia, eye abe ale si miesee be Kristo ƒe futɔ la gbɔna ene la, fifia kura gɔ̃ hã la, Kristo ƒe futɔ geɖewo li; eye esia mee míenyae le be gaƒoƒo mamlɛtɔ lae nye esia. 19  Mía domee wodo tso, gake womele abe míawo ene o; elabena ne ɖe wole abe míawo ene la, anye ne woyi edzi nɔ mía dome. Gake wodo yi, bene wòadze nyuie be menye wo katãe le abe míawo ene o. 20  Eye kɔkɔetɔ la si ami na mi; sidzedze le mi katã si. 21  Mele nu siawo ŋlɔm ɖo ɖe mi, menye esi nyateƒea mele nyanya na mi o tae o, ke esi mienyae tae, eye esi aʋatsokaka aɖeke medzɔ tso nyateƒe la me o tae. 22  Ame kae nye aʋatsokala, ne menye ame si gbe be menye Yesu ye nye Kristo o lae oa? Ame siae nye Kristo ƒe futɔ la, eyae gbe nu le Fofo la kple Vi la gbɔ. 23  Ame sia ame si gbea nu le Vi la gbɔ la, Fofo la hã mele esi o. Ame si ʋua Vi la me la, Fofo la hã le esi. 24  Ke miawo la, mina nu si miese tso gɔmedzedzea me la nakpɔtɔ anɔ mia me. Ne nu si miese tso gɔmedzedzea me kpɔtɔ le mia me la, ekema mianɔ ƒomedodo me kple Vi la, eye mianɔ ƒomedodo me kple Fofo la. 25  Hekpe ɖe eŋu la, nu si ŋugbe eya ŋutɔ do na mí lae nye agbe mavɔ. 26  Nu siawo ŋlɔm mele na mi tso ame siwo le didim be yewoakplɔ mi atrae la ŋu. 27  Eye miawo la, amisisiname si miexɔ tso egbɔ la kpɔtɔ le mia me, eye mehiã be ame aɖeke nanɔ nu fiam mi o; gake esi amisisiname si tso egbɔ la le nuwo katã fiam mi, eye wònye nyateƒe ke menye aʋatso o, eye abe ale si wòfia mii ene la, miyi edzi mianɔ ƒomedodo me kplii. 28  Eya ta azɔ la, vinye lɔlɔ̃awo, miyi edzi mianɔ ƒomedodo me kplii, ale be ne wova ɖee fia la, míaƒo nu dzinɔameƒotɔe, eye womagado ŋukpe mí ahaɖe mí ɖa le eŋu le eƒe anyinɔɣi la o. 29  Ne mienya be dzɔdzɔetɔe wònye la, ke mienyae be ame sia ame si wɔa nu dzɔdzɔe la, eyama mee wodzii tso.

Etenuŋɔŋlɔ