Dzo kpo yi emenuwo dzi

Dzo kpo yi emenuawo dzi

1 Petro 4:1-19

4  Eya ta esi Kristo kpe fu le ŋutilã me ta la, miawo hã mitsɔ tamesusu ƒe nɔnɔme ma ke bla akpae; elabena ame si kpea fu le ŋutilã me la dzudzɔa nu vɔ̃ wɔwɔ,  bene wòagazã ɣeyiɣi si susɔ be wòanɔ agbe le ŋutilã me la na amewo ƒe nudzodzrowo dzi wɔwɔ o, ke boŋ na Mawu ƒe lɔlɔ̃nu wɔwɔ.  Elabena ɣeyiɣi si va yi la sɔ gbɔ be miewɔ dukɔwo ƒe lɔlɔ̃nu, esi mieƒo mia ɖokui ɖe ŋukpenanuwɔwɔwo, dzodzro vɔ̃wo, wain tsu nonowo, aglotutu siwo gbɔ eme, hoʋiʋli le ahanono me, kple trɔ̃subɔsubɔ ŋunyɔtɔwo me.  Esi miegale du ƒum kpli wo le mɔ sia dzi yina agbe baɖa nɔnɔ ƒe ba ma ke me o ta la, ewɔa nuku na wo, eye wole nya manyomanyowo gbɔgblɔ dzi ɖe mia ŋu.  Ke hã, ame siawo abu akɔnta na ame si le klalo be yeadrɔ̃ ʋɔnu ame gbagbewo kple ame kukuwo.  Le nyateƒe me la, susu sia tae woɖe gbeƒã nya nyui la na ame kukuwo hã ɖo, be woadrɔ̃ ʋɔnu wo le ŋutilã me le amegbetɔwo ƒe susu nu, gake woanɔ agbe le gbɔgbɔ me le Mawu ƒe susu nu.  Ke nuwo katã ƒe nuwuwu ɖo vɔ. Eya ta minɔ ŋute, eye minɔ ŋudzɔ hena gbedodoɖa.  Vevietɔ wu la, miɖe lɔlɔ̃ deto fia mia nɔewo, elabena lɔlɔ̃ tsyɔa nu vɔ̃ geɖe dzi.  Miwɔ amedzro na mia nɔewo liʋiliʋilili manɔmee. 10  Mitsɔ nunana si ame sia ame xɔ la subɔ mia nɔewo, abe Mawu ƒe amenuveve si wòɖe fia le mɔ vovovowo nu la dzi kpɔla nyuiwo ene. 11  Ne ame aɖe le nya aɖe gblɔm la, negblɔe abe Mawu ƒe nya kɔkɔeawoe wonye ene; ne ame aɖe le subɔsubɔm la, netsɔ ŋusẽ si Mawu nana la subɔ; bene le nuwo katã me la, woado Mawu ɖe dzi to Yesu Kristo dzi. Eya tɔe nye ŋutikɔkɔe kple ŋusẽ gã tso mavɔ me yi mavɔ me. Amen. 12  Lɔlɔ̃tɔwo, migana dzo si le bibim le mia dome, si nye tetekpɔ si le mia dzi vam la, nawɔ nuku na mi, abe nu madzɔkpɔ aɖee le dzɔdzɔm ɖe mia dzi ene o. 13  Ke boŋ miyi edzi mianɔ dzidzɔ kpɔm, esi miekpɔa gome le Kristo la ƒe fukpekpewo me ta, ale be miakpɔ dzidzɔ, eye miatso aseye hã le eƒe ŋutikɔkɔe ƒe ɖeɖefiaɣi la. 14  Ne wole vlo dom mi le Kristo ta la, miekpɔa dzidzɔ, elabena ŋutikɔkɔe ƒe gbɔgbɔ, ɛ̃, Mawu ƒe gbɔgbɔ la, nɔa mia dzi. 15  Ke hã migana mia dometɔ aɖeke nakpe fu abe amewula alo fiafitɔ alo vɔ̃ wɔla alo ame si dea nu nya si metsɔ egbɔ o me ene o. 16  Gake ne ekpea fu le esi wònye Kristotɔ ta la, negakpe ŋu nɛ o, ke boŋ neyi edzi wòanɔ Mawu dom ɖe dzi be ŋkɔ sia le ye ŋu. 17  Elabena ɣeyiɣi ɖoɖi la de, be ʋɔnudɔdrɔ̃ la nadze egɔme tso Mawu ƒe aƒe la dzi. Ke ne edze egɔme tso mía dzi gbã ɖe, ekema aleke lanye ame siwo meɖoa to Mawu ƒe nya nyui la o ya ƒe nuwuwu? 18  “Eye ne bebli hafi woaxɔ ame dzɔdzɔe ɖe agbe ɖe, ke afi kae ame mavɔ̃mawu kple nu vɔ̃ wɔla ya adze le?” 19  Eya ta mina ame siwo le fu kpem le Mawu ƒe lɔlɔ̃nu ta la nayi edzi atsɔ woƒe luʋɔwo ade Wɔla nyateƒetɔ la si me, esi wole nu nyui wɔwɔ dzi.

Etenuŋɔŋlɔ