Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

1 Tesalonikatɔwo 4:1-18

4  Mlɔeba la, nɔviwo, míele kuku ɖem na mi, eye míele nu xlɔ̃m mi to Aƒetɔ Yesu dzi, abe ale si ko miexɔ nufiame tso mía gbɔ le ale si wòdze be miazɔ, eye miadze Mawu ŋu, abe ale si ko miele zɔzɔm hã ene, be miayi edzi awɔe geɖe wu.  Elabena mienya se siwo míede na mi to Aƒetɔ Yesu dzi la.  Elabena esiae nye Mawu ƒe lɔlɔ̃nu: be miazu ame siwo ŋu wokɔ, be miatsri agbe gbegblẽ nɔnɔ;  be mia dome ame sia ame nanya ale si wòawɔ aɖu ye ŋutɔ ƒe ŋutilã dzi le kɔkɔenyenye kple bubu me,  menye le gbɔdɔdɔ ƒe dzodzro ƒe ŋubiabiã me hã, abe ale si dukɔ siwo menya Mawu o la wɔna ene o;  bene ame aɖeke nagawɔ nuvevi nɔvia, alo axɔ eƒe gomewo le esi le nya sia me o, elabena Yehowa ye nye ame si hea to na ame le nu siawo katã ŋu, abe ale si míegblɔe xoxo heɖi ɖase le eŋu hã tsitotsito na mi ene.  Elabena Mawu meyɔ mí hena mɔɖeɖe ɖe makɔmakɔnyenye ŋu o, ke boŋ le kɔkɔenyenye ŋuti.  Eya ta ame si ɖea vlododo fiana la, menye amegbetɔe wòle vlo dom o, ke Mawu, ame si tsɔ eƒe gbɔgbɔ kɔkɔe la de mia me la, boŋ ye.  Ke hã, le nɔvilɔlɔ̃ ŋuti la, mehiã mi be míaŋlɔ nu aɖo ɖe mi o, elabena Mawu fia mia ŋutɔwo be mialɔ̃ mia nɔewo; 10  eye le nyateƒe me la, miele ewɔm hã na nɔvi siwo katã le Makedonia blibo la katã. Gake míele nu xlɔ̃m mi, nɔviwo, be miayi edzi awɔe geɖe wu, 11  eye miaɖoe miaƒe taɖodzinu be yewoanɔ anyi kpoo, eye miakpɔ mia ŋutɔwo miaƒe nyawo gbɔ, ahatsɔ miaƒe asiwo awɔ dɔ, abe ale si míede se na mi ene; 12  bene miazɔ ale si dze le nuwɔwɔ kple ame siwo le egodo la me, eye naneke naganɔ mia hiãm o. 13  Gawu la, nɔviwo, míedi be mianɔ numanyamanya me le ame siwo le alɔ̃ dɔm le ku me la ŋu o; bene miagaxa nu abe ame bubu siwo si mɔkpɔkpɔ aɖeke mele o la ene o. 14  Elabena ne míexɔe se be Yesu ku, eye wògafɔ la, ekema Mawu akplɔ ame siwo dɔ alɔ̃ le ku me to Yesu dzi la ayi kpakplii. 15  Elabena nya si gblɔm míele na mi to Yehowa ƒe nya la dzi ye nye esi: be mí ame siwo le agbe fifia, siwo anɔ anyi va se ɖe Aƒetɔ la ƒe anyinɔɣi la, míado ŋgɔ na ame siwo dɔ alɔ̃ le ku me la le mɔ aɖeke nu o; 16  elabena Aƒetɔ la ŋutɔ atsɔ gbeɖeɖe sesẽ kple mawudɔlawo ƒe tatɔ ƒe gbe kpakple Mawu ƒe kpẽ aɖi tso dziƒo, eye ame siwo ku le Kristo me la atsi tsitre gbã. 17  Emegbe la, mí ame siwo susɔ le agbe la, woakɔ mí le alilikpowo me ayi aɖakpe Aƒetɔ la le ya me ahawɔ ɖeka kpli wo; eye ale míanɔ Aƒetɔ la gbɔ ɖaa. 18  Eya ta miyi edzi miatsɔ nya siawo anɔ akɔ fam na mia nɔewo.

Etenuŋɔŋlɔ