Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

1 Tesalonikatɔwo 2:1-20

2  Nyateƒee, nɔviwo, mia ŋutɔwo mienya ale si míaƒe mia gbɔ vava la mezu dzodzro o,  ke boŋ be esi míekpe fu, eye woɖi gbɔ mí gbã le Filipi (abe ale si mienyae ene) vɔ la, dzi ɖo mía ƒo to mía Mawu la dzi, be míagblɔ Mawu ƒe nya nyui la na mi le ʋiʋli geɖe me.  Elabena nuxlɔ̃ame si míenana la metso vodada alo makɔmakɔnyenye alo beble me o,  ke boŋ abe ale si ko Mawu do mí kpɔ hekpɔe be míedze be wòatsɔ nya nyui la ade asi na míi ene la, nenemae míeƒoa nui, menye be wòadze amegbetɔwo ŋu o, ke boŋ be wòadze Mawu, ame si dzroa míaƒe dziwo me kpɔ la ŋu.  Le nyateƒe me la, míetsɔ numevivinya aɖeke vae ɣeaɖekeɣi kpɔ o (abe ale si mienyae ene), eye míewɔ nu alakpatɔe le ŋubiabiã ta kpɔ o, Mawue nye eŋuti ɖasefo!  Eye míele ŋutikɔkɔe hã dim tso amegbetɔwo gbɔ o, ao, míele edim tso mi alo ame bubuwo gbɔ o, togbɔ be míate ŋu anye agba gã aɖe na mi, le Kristo ƒe apostolo siwo míenye ta hafi hã.  Ke boŋ míefa tu le mia dome, abe ale si vidada si le no nam ye ŋutɔ viawo la léa be na wo nyuie ene.  Eya ta esi míelɔ̃a nu le mia gbɔ o ŋuti la, edzɔ dzi na mí vevie be, menye Mawu ƒe nya nyui la ɖeɖe koe míatsɔ na mi o, ke mía ŋutɔwo ƒe luʋɔwo hãe, elabena mietrɔ zu míaƒe lɔlɔ̃tɔwo.  Nyateƒee, nɔviwo, míaƒe agbagbadzedze kple kutrikuku le susu me na mi. Esime míenɔ Mawu ƒe nya la gblɔm na mi la, zã kple keli ye míenɔ dɔ wɔm, bene míagazu agba gã aɖeke na mia dometɔ aɖeke o. 10  Miawoe nye ɖasefowo, eye Mawu hã nyee, be míenye nuteƒewɔlawo kple ame dzɔdzɔewo kpakple mokakamanɔŋutɔwo le mi xɔsetɔwo dome. 11  Eye ale mienyae be, abe ale si vifofo wɔna na viawo ene la, míeyi edzi xlɔ̃ nu mia dometɔ ɖe sia ɖe, eye míefa akɔ na mi hegbe nya na mi, 12  bene miayi edzi azɔ ale si dze Mawu si le mia yɔm va eƒe fiaɖuƒe kple ŋutikɔkɔe gbɔ la. 13  Ɛ̃, ema tae míawo hã míedaa akpe na Mawu madzudzɔmadzudzɔe, elabena esi miexɔ Mawu ƒe nya la, si miese tso mía gbɔ la, miexɔe abe amegbetɔwo ƒe nya ene o, ke boŋ abe Mawu ƒe nya ene, abe ale si wòle vavã hã ene, si le dɔ dzi le mi xɔsetɔwo hã me. 14  Elabena nɔviwo, miezu Mawu ƒe hame siwo le Yudea, siwo le ƒomedodo me kple Kristo Yesu la, srɔ̃lawo, elabena miawo hã miete fukpekpe le mia ŋutɔwo mia deviwo si me, le nu siwo tututu me woawo hã wole fu kpem le tso Yudatɔwo si me la me, 15  ame siwo wu Aƒetɔ Yesu kple nyagblɔɖilawo kura gɔ̃ hã, eye woti míawo hã yome. Gawu la, womele nu si dze Mawu ŋu la wɔm o, ke boŋ wotsi tsitre ɖe amewo katã ƒe nyonyo ŋu, 16  elabena wole didim be yewoaxe mɔ na mí be míagaƒo nu na dukɔwo me tɔwo, bene ame siawo nakpɔ ɖeɖe o, si na woyi edzi le nu vɔ̃ geɖe wɔm ɣesiaɣi. Gake eƒe dziku la va wo dzi mlɔeba. 17  Ke míawo la, nɔviwo, esi woɖe mí ɖa tso mia ŋu ɣeyiɣi kpui aɖe—le ŋutilã me, menye le dzi me o—la, míedze agbagba etɔxɛe, eye wòdzro mí vevie, be míakpɔ miaƒe ŋkume. 18  Esia tae míeɖoe be míava mia gbɔ ɖo, ɛ̃, nye Paulo, menye zi ɖeka o, ke boŋ zi eve sɔŋ, gake Satana va tso mɔ na mí. 19  Elabena nu kae nye míaƒe mɔkpɔkpɔ alo dzidzɔ alo aseyetsotso ƒe fiakuku le mía Aƒetɔ Yesu ŋkume le eƒe anyinɔɣi la?—ɛ̃, alo menye miawoe oa? 20  Ɛ̃, miawoe nye míaƒe kafukafu kple dzidzɔ.

Etenuŋɔŋlɔ