1 Korintotɔwo 9:1-27

9  Menye ablɔɖemee menye oa? Menye apostoloe menye oa? Ðe nyemekpɔ Yesu, mía Aƒetɔ la oa? Menye miawoe nye dɔ si mewɔ le Aƒetɔ la me oa?  Ne nyemenye apostolo na ame bubuwo o hã la, menyee na miawo ya, elabena miawoe nye nutrenu si le kpe ɖom nye apostolonyenye dzi le Aƒetɔ la me.  Nya siwo matsɔ aʋli ɖokuinye ta le ame siwo drɔ̃a ʋɔnum ŋuti lae nye esi:  Míekpɔ mɔ aɖu nu ahano nu, alo mele eme oa?  Míekpɔ mɔ aɖe nɔvinyɔnu aɖe ahakplɔe ɖe asi, abe ale si ko apostolo susɔeawo kple Aƒetɔ la nɔviwo kpakple Kefas hã wɔna ene, alo míekpɔ mɔ oa?  Alo mía kple Barnaba koe mekpɔ mɔ adzudzɔ ŋutilã me dɔ wɔwɔ oa?  Ame kae wɔa asrafodɔ tso gakpɔa ye ŋutɔ ɖokui dzi? Ame kae dea waingble, evɔ meɖua eme kutsetse o? Alo ame kae kplɔa lãha, evɔ menoa lãawo ƒe notsi ƒe ɖe o?  Amegbetɔ ƒe susu nue mele nya siawo gblɔm lea? Alo ɖe Se la hã megblɔ nya siawo ke oa?  Elabena woŋlɔ ɖe Mose ƒe se la me be: “Mele be nàbla nu na nyitsu ne ele nuku tugum o.” Nyitsuwo mee Mawu tsɔ ɖe lea? 10  Alo míawo ta koŋ ye wògblɔe ɖoa? Le nyateƒe me la, míawo tae woŋlɔe ɖi ɖo, elabena ele be ame si le agble ŋlɔm la naŋlɔe le mɔkpɔkpɔ me, eye ame si le nuku tugum la nawɔe kple mɔkpɔkpɔ be yeakpɔ eƒe ɖe. 11  Ne míeƒã gbɔgbɔmenuwo na mi la, ekema nu gãe wònye ne míeŋe ŋutilãmenuwo tso mia domea? 12  Ne ame bubuwo kpɔ mɔ le nu siawo ŋu le mia gbɔ la, ɖe míawo míekpɔ mɔ wu oa? Ke hã, míewɔ mɔnukpɔkpɔ sia ŋu dɔ o, ke boŋ míenɔa te ɖe nuwo katã nu, bene míagaxe mɔ na Kristo la ŋuti nya nyui la le mɔ aɖeke nu o. 13  Ðe mienyae be ame siwo wɔa dɔdeasi kɔkɔewo la ɖua gbedoxɔa me nuwo, eye ame siwo subɔna le vɔsamlekpuia ŋu ɣesiaɣi la kple vɔsamlekpuia siaa xɔa wo tɔ gome oa? 14  Nenema kee Aƒetɔ la gblɔ na ame siwo ɖea gbeƒã nya nyui la be, woanɔ agbe ɖe nya nyui la nu. 15  Gake nyemewɔ mɔnukpɔkpɔ siawo dometɔ ɖeka teti hã ŋu dɔ o. Ɛ̃, menye ɖe mele nu siawo ŋlɔm, be miawɔ nenema nam o, elabena enyo nam be maku wu esi . . . ame aɖeke mekpɔ mɔ ana susu si ta meƒoa adegbe ɖo la nazu dzodzro o! 16  Ke ne mele nya nyui la gblɔm hã la, menye susu si ta maƒo adegbe ɖo o, elabena ɖe woɖoe nam. Ɛ̃, ne nyemegblɔ nya nyui la o la, baba nam! 17  Ne mewɔ esia tso dzi me faa la, fetu li nam; gake ne nyemewɔe tso dzi me o hã la, wotsɔ aƒedzikpɔkpɔdɔ de asi nam. 18  Ekema nu kae nye nye fetua? Eyae nye be, ne mele nya nyui la gblɔm la, magblɔe fetu maxɔmaxɔe, bene magazã ŋusẽ si le asinye le nya nyui la me la ɖe mɔ madzemadze nu o. 19  Elabena togbɔ be mevo tso amewo katã si me hã la, mewɔ ɖokuinye amewo katã ƒe kluvi, bene asinye nasu ame geɖewo dzi. 20  Eya ta mezu abe Yudatɔ ene na Yudatɔwo, bene asinye nasu Yudatɔwo dzi; mezu abe ame si le se te ene na ame siwo le se te, evɔ nye ŋutɔ nyemele se te hafi o, bene asinye nasu ame siwo le se te la dzi. 21  Mezu abe semanɔsitɔ ene na semanɔsitɔwo, evɔ le Mawu gbɔ la, nyemenye semanɔsitɔ hafi o, ke boŋ mele Kristo ƒe se te, bene asinye nasu semanɔsitɔwo dzi. 22  Mezu gbɔdzɔgbɔdzɔtɔ na gbɔdzɔgbɔdzɔtɔwo, bene asinye nasu gbɔdzɔgbɔdzɔtɔwo dzi. Mezu nuwo katã na ame ƒomeviwo katã, bene maɖe wo dometɔ aɖewo godoo. 23  Gake nya nyui la tae mewɔa nuwo katã ɖo, bene nye hã makpɔ gome le eme kple ame bubuwo. 24  Ðe mienyae be duƒula siwo le ho ʋlim la katãe ƒua dua, gake ame ɖeka koe xɔa dziɖuɖufetu la oa? Miƒu du le mɔ si ana miaxɔe la nu. 25  Gawu la, ame sia ame si kpɔa gome le hoʋiʋli aɖe me la ɖua eɖokui dzi le nuwo katã me. Woawo la, wowɔnɛ bene woaxɔ dziɖuɖufiakuku si gblẽna, ke míawo ya hena esi megblẽna o. 26  Eya ta ale si mele dua ƒum lae nye esi: nyemele eƒum ɖewoɖewoe o; ale si mele nye kɔwo dam lae nye esi: be wòaganye be mele dadagbo dam o; 27  ke boŋ meƒoa nye ŋutilã kple kɔ vevie hewɔnɛ kluvii, bene esi meɖe gbeƒã na ame bubuwo vɔ la, le mɔ aɖe nu la, nye ŋutɔ nyemagazu ame si ŋu womekpɔ ŋudzedze ɖo o la o.

Etenuŋɔŋlɔ