1 Korintotɔwo 4:1-21

4  Eya ta amewo nebu mí abe ame siwo le Kristo te kple aƒedzikpɔla siwo wotsɔ Mawu ƒe nya ɣaɣla kɔkɔewo de asi na la ene.  Gakpe ɖe eŋu la, nu si wodina tso aƒedzikpɔlawo sie nye be woakpɔ wo be wonye nyateƒetɔwo.  Ke nye ya la, nyemekpɔe be ehiã boo be miawo alo amegbetɔwo ƒe ʋɔnu aɖe nadzro nu me tso ŋunye o. Nye ŋutɔ kura nyemedzroa nu me tso ɖokuinye ŋu o.  Elabena nyemeɖo ŋkui be mewɔ nu gbegblẽ aɖeke ɖe ɖokuinye ŋu o. Ke hã, nyemele gbɔgblɔm be mele dzɔdzɔe o, gake ame si dzroa menye kpɔ lae nye Yehowa.  Eya ta migadrɔ̃ ʋɔnu le naneke ŋu hafi ɣeyiɣi la nade o, va se ɖe esime Aƒetɔ la nava, ame si ahe viviti me nu ɣaɣlawo ava kekeli nu, eye wòana dzimedaŋudedewo nadze ƒãa, eye ame sia ame ƒe kafukafu atso Mawu gbɔ ava nɛ.  Ke nɔviwo, metrɔ nya siawo be woaku ɖe mía kple Apolo ŋu le miaƒe nyonyo ta, bene miasrɔ̃ ɖoɖo si nu wòle be nuwo nanɔ la le mía gome, be: “Migagbɔ nu siwo woŋlɔ ɖi la ŋu o,” bene miagado mia ɖokui ɖe dzi, eye miabu ame aɖe be enye gã wu ame bubu o.  Elabena ame kae na nèto vovo tso ame bubu gbɔ? Ɛ̃, nu kae le asiwò, si menye ɖe nèxɔe o? Ke ne ɖe nèxɔe la, ekema nu ka tae nèle adegbe ƒom abe menye ɖe nèxɔe o ene?  Mieɖi ƒo xoxo, menye nenemae oa? Mienye kesinɔtɔwo xoxo, menye nenemae oa? Miete fiaɖuɖu xoxo míawo manɔmee, menye nenemae oa? Ɛ̃, ɖe madi ŋutɔŋutɔ be miate fiaɖuɖu xoxo, bene míawo hã míaɖu fia kpli mi hafi.  Elabena ewɔna nam be Mawu ɖe mí apostoloawo fia abe ame mamlɛ siwo woɖo ɖi na ku ene, elabena míezu abe nukpɔkpɔ le fefewɔƒe ene na xexea kple mawudɔlawo kpakple amewo. 10  Míenye bometsilawo le Kristo ta, gake miawo ya mienye aɖaŋudzelawo le Kristo me; míegbɔdzɔ, gake miawo ya miesẽ ŋu; ŋkɔ nyui le mia ŋu, gake míawo ya, bubu mele mía ŋu o. 11  Va se ɖe gaƒoƒo sia tututu dzi la, dɔ le mía wum, eye tsikɔ hã le mía wum, eye míekpɔ awu ado o, eye wole mía ƒoƒo dzi kple kɔ, eye nɔƒe mele mía si o, 12  eye míele kutrikuku dzi tsɔ míaƒe asiwo le dɔ wɔm. Ne wodzu mí la, míeyrana; ne woti mía yome la, míedoa dzi tsɔnɛ; 13  ne woɖi gbɔ mí la, míeɖea kuku vevie; míezu abe xexea ƒe aɖukpodzinu kple nuwo katã ƒe gbeɖuɖɔ ene, va se ɖe fifia. 14  Menye ɖe mele nya siawo ŋlɔm, be mado ŋukpe mi o, ke boŋ be maxlɔ̃ nu mi abe vinye lɔlɔ̃awo ene. 15  Elabena togbɔ be ɖewohĩ mɔfiala akpe ewo anya le mia si le Kristo me hã la, fofo geɖewo ya mele mia si o; elabena mezu mia fofo le Kristo Yesu me to nya nyui la dzi. 16  Eya ta mele kuku ɖem na mi vevie, mizu srɔ̃nyelawo. 17  Esia tae mele Timoteo ɖom ɖe mi, elabena enye vinye lɔlɔ̃a kple nyateƒetɔ le Aƒetɔ la me; eye aɖo ŋku mɔnu siwo mezãna le Kristo Yesu me, abe ale si mele nu fiam le hame ɖe sia ɖe me le afi sia afi ene, la dzi na mi. 18  Ame aɖewo doa wo ɖokuiwo ɖe dzi abe ɖe nyemegbɔna mia gbɔ o vavã ene. 19  Gake ne Yehowa lɔ̃ la, mava mia gbɔ kpuie, eye menye be mase ame siwo le wo ɖokuiwo dom ɖe dzi la ƒe nyawo o, ke boŋ be manya woƒe ŋusẽ. 20  Elabena Mawu fiaɖuƒe la mele nuƒoƒo me o, ke boŋ ŋusẽ mee wòle. 21  Nu ka dim miele? Matsɔ ati ava mia gbɔ loo, alo matsɔ lɔlɔ̃ kple gbɔgbɔ fatu avaa?

Etenuŋɔŋlɔ