1 Korintotɔwo 16:1-24

16  Ke le nudzɔdzɔ si woaɖo ɖe ame kɔkɔeawo ŋuti la, ale si meɖoe na Galatia hameawo la, mia ŋutɔwo hã miwɔe nenema ke.  Le kwasiɖa ɖe sia ɖe ƒe ŋkeke gbãtɔ dzi la, mia dometɔ ɖe sia ɖe nedzra nane ɖo ɖi le ye ŋutɔ ƒe aƒe me, le eƒe viɖekpɔkpɔ nu, be ne meva ɖo la, nudzɔdzɔ mayi edzi ɣemaɣi o.  Gake ne meva ɖo afi ma la, matsɔ miaƒe dɔmenyonunana la ade asi na ŋutsu siwo dzi miaŋlɔ agbalẽ ada asi ɖo la, be woatsɔe ayi Yerusalem.  Ke hã, ne esɔ be nye hã mayi afi ma la, ekema woayi kplim.  Gake ne metso Makedonia la, mava mia gbɔ, elabena mato Makedonia;  eye ɖewohĩ manɔ mia gbɔ vie, alo manɔ anyi kpli mi le vuvɔŋɔli la kura gɔ̃ hã, bene miaɖom ɖa vie ayi afi si mayi.  Elabena nyemedi be makpɔ mi fifia ne metso eme va yina o, elabena mele mɔ kpɔm be, ne Yehowa lɔ̃ la, manɔ mia gbɔ vie.  Gake manɔ Efeso va se ɖe Pentekoste ŋkekenyui la dzi;  elabena woʋu dɔwɔwɔ ƒe ʋɔtru gã aɖe nam, ke hã, tsitretsiɖeŋula geɖewo li. 10  Ke ne Timoteo va ɖo la, mikpɔ egbɔ be miagana wòanɔ vɔvɔ̃m le mia dome o, elabena Yehowa ƒe dɔ wɔmee wòle, abe nye ke ene. 11  Eya ta ame aɖeke nagado vloe o. Mikplɔe ɖo ɖa vie le ŋutifafa me, bene wòava gbɔnye afi sia, elabena mele elalam kple nɔviawo. 12  Ke le mía nɔvi Apolo ŋuti la, meɖe kuku nɛ vevie be woa kple nɔviawo nava mia gbɔ, ke hã, menye eƒe lɔlɔ̃nu kura be yeava mia gbɔ fifia o; gake ava ne ekpɔ asinu. 13  Minɔ ŋudzɔ, minɔ tsitre sesĩe le xɔse la me, miwɔ ŋutsu, misẽ ŋu. 14  Miwɔ nuwo katã le lɔlɔ̃ me. 15  Ke mele nu xlɔ̃m mi, nɔviwo: Mienyae be Stefana ƒe aƒe lae nye kutsetse gbãtɔ le Axaya, eye be wotsɔ wo ɖokui ɖo anyi hena ame kɔkɔewo subɔsubɔ. 16  Miawo hã miyi edzi miabɔbɔ mia ɖokui na ame siawo ƒomevi kple ame sia ame si le asi kpem ɖe dɔa ŋu aduadu, eye wòle kutri kum la. 17  Gake mekpɔ dzidzɔ le Stefana kple Fortunato kpakple Axaiko ƒe anyinɔnɔ ŋuti, elabena esi miele afi sia kplim o la, woxɔ ɖe mia teƒe. 18  Elabena wofa akɔ na nye gbɔgbɔ kple miawo hã mia tɔ. Eya ta mikpɔ ŋudzedze ɖe ame siawo tɔgbi ŋu. 19  Hame siwo le Asia la ɖo woƒe gbedonamewo ɖe mi. Akwila kple Priska kpakple hame si le woƒe aƒe me la, do gbe na mi vevie le Aƒetɔ la me. 20  Nɔviawo katã do gbe na mi. Mitsɔ nugbugbɔ kɔkɔe do gbe na mia nɔewo. 21  Nye Paulo ƒe gbedoname, si metsɔ nye ŋutɔ nye asi ŋlɔ, lae nye esi. 22  Ne ame aɖe melɔ̃a Aƒetɔ la o la, aɖi eŋu kpekpekpe. Oo, mía Aƒetɔ, va! 23  Mía Aƒetɔ Yesu ƒe amenuveve nanɔ anyi kpli mi. 24  Nye lɔlɔ̃ nanɔ anyi kpli mi katã le Kristo Yesu me.

Etenuŋɔŋlɔ