Dzo kpo yi emenuwo dzi

Dzo kpo yi emenuawo dzi

1 Korintotɔwo 15:1-58

15  Ke nɔviwo, mele ŋku ɖom nya nyui si megblɔ na mi, si hã miexɔ, si me miele tsitre hã ɖo, la dzi na mi;  esi dzi woto le mia ɖem hã, hekpe ɖe nya siwo megblɔ esime meɖe gbeƒã nya nyui la na mi ŋu, ne mielé eme ɖe asi sesĩe ko; ne menye nenema o la, ekema menye taɖodzinu aɖeke tae mieva zu xɔsetɔwo ɖo o.  Elabena le nu gbãtɔwo dome la, metsɔ nu siwo nye hã mexɔ la de asi na mi, be Kristo ku ɖe míaƒe nu vɔ̃wo ta le Ŋɔŋlɔawo nu;  eye be woɖii, ɛ̃, be wofɔe ɖe tsitre le ŋkeke etɔ̃agbe le Ŋɔŋlɔawo nu;  eye be eɖe eɖokui fia Kefas, emegbe la, ame wuieveawo.  Le ema megbe la, eɖe eɖokui fia nɔvi siwo wu alafa atɔ̃ zi ɖeka, ame siwo dometɔ akpa gãtɔ kpɔtɔ li va se ɖe fifia, gake wo dometɔ aɖewo dɔ alɔ̃ le ku me.  Le ema megbe la, eɖe eɖokui fia Yakobo, eye le emegbe la, apostoloawo katã;  gake mlɔeba la, eɖe eɖokui fia nye hã, abe ame si ƒe ŋkeke mede hafi wodzii o ene.  Elabena nyee nye suetɔ le apostoloawo dome, eye nyemedze be woayɔm be apostolo o, elabena meti Mawu ƒe hame la yome. 10  Gake le Mawu ƒe amenuveve me la, mezu nu si menye egbea. Eye amenuveve si wòɖe fiam la mezu dzodzro o, ke boŋ medze agbagba geɖe wu wo katã, ke hã, menye nyee o, ke boŋ Mawu ƒe amenuveve si li kplim lae. 11  Ke hã, eɖanye nyee o, eɖanye woawoe o, aleae míele gbeƒã ɖem, eye alea miexɔe se. 12  Ke ne wole gbeƒã ɖem Kristo be, wofɔe ɖe tsitre tso ame kukuwo dome ɖe, aleke wɔ mia dometɔ aɖewo le gbɔgblɔm be ame kukuwo ƒe tsitretsitsi aɖeke meli o? 13  Ne vavãe wònye be ame kukuwo ƒe tsitretsitsi aɖeke meli o la, ekema womefɔ Kristo hã ɖe tsitre o. 14  Eye ne womefɔ Kristo ɖe tsitre o la, ekema míaƒe gbeƒãɖeɖe la nye dzodzro nyateƒe, eye míaƒe xɔse hã nye dzodzro. 15  Gawu la, woakpɔ mí be míenye Mawu ƒe aʋatsoɖasefowo, elabena míeɖia ɖase ɖe Mawu ŋuti be, efɔ Kristo la ɖe tsitre, evɔ mefɔe ɖe tsitre hafi o ne vavãe wònye be womefɔa ame kukuwo ɖe tsitre o. 16  Elabena ne womafɔ ame kukuwo ɖe tsitre o la, ekema womefɔ Kristo hã ɖe tsitre o. 17  Gawu la, ne womefɔ Kristo ɖe tsitre o la, ekema viɖe aɖeke mele miaƒe xɔse ŋu o; miegakpɔtɔ le miaƒe nu vɔ̃wo me. 18  Ɛ̃, ekema ame siwo dɔ alɔ̃ le ku me le Kristo me hã nu yi tegbee. 19  Ne agbe sia ɖeɖe me koe míekpɔa mɔ na Kristo le la, ekema míaƒe nue wɔ nublanui wu le amewo katã dome. 20  Ke hã, wofɔ Kristo, ame si nye gbãtɔ le ame siwo dɔ alɔ̃ le ku me dome la, ɖe tsitre tso ame kukuwo dome. 21  Elabena esi wònye ame aɖe dzie ku to va ta la, ame kukuwo ƒe tsitretsitsi la hã to ame aɖe dzi va. 22  Elabena ale si ko amewo katã le kukum le Adam me la, nenema kee woagbɔ agbe wo katã hã le Kristo la me. 23  Gake ame sia ame le eƒe ɖoɖo nu: Kristoe nye gbãtɔ, emegbe la, ame siwo nye Kristo la tɔ le eƒe anyinɔɣi la. 24  Azɔ, nuwuwua, esime wòatsɔ fiaɖuƒe la ade asi na Mawu, si nye Fofoa, ne eɖe dziɖuɖu katã kple amegãnyenye katã kpakple ŋusẽ ɖa vɔ. 25  Elabena ele be wòaɖu fia va se ɖe esime Mawu natsɔ futɔwo katã ade eƒe afɔ te. 26  Woaɖe ku, si nye futɔ mamlɛtɔ, la ɖa. 27  Elabena Mawu “tsɔ nuwo katã de eƒe afɔ te.” Gake esi wògblɔ be ‘wotsɔ nuwo katã de ete’ la, edze ƒãa be ame si tsɔ nuwo katã de ete ya mele eme o. 28  Gake ne wotsɔ nuwo katã de ete vɔ la, ekema Vi la ŋutɔ hã atsɔ eɖokui ade Ame si tsɔ nuwo katã de ete la te, bene Mawu nanye nuwo katã na ame sia ame. 29  Ne menye nenema o la, nu kae ame siwo nyrɔm wole bene woazu ame kukuwo la awɔ? Ne womafɔ ame kukuwo ɖe tsitre kura o la, ekema nu ka tae wole wo nyrɔm bene woanɔ alea? 30  Nu ka tae míele afɔku me le gaƒoƒo ɖe sia ɖe me hã ɖo? 31  Medzea ŋgɔ ku gbe sia gbe. Nɔviwo, aseye si metsona le mia ta le mía Aƒetɔ Kristo Yesu me lae metsɔ le kpe ɖom nya sia dzi. 32  Ne mewɔ avu kple lã wɔadãwo le Efeso abe ale si ame bubuwo wɔe ene ɖe, viɖe kae wònye nam? Ne womafɔ ame kukuwo ɖe tsitre o la, ekema “mina míaɖu nu, eye míano nu, elabena etsɔ míele kuku ge.” 33  Migana woakplɔ mi atrae o. Hadede vɔ̃wo gblẽa nɔnɔme nyuiwo. 34  Minyɔ, eye minɔ ŋute hena nu dzɔdzɔe wɔwɔ, eye miganɔ nu vɔ̃ wɔwɔ dzi o, elabena ame aɖewo menya Mawu o. Mele nya sia gblɔm be ŋu nakpe mi. 35  Ke hã, ame aɖe agblɔ be: “Aleke woafɔ ame kukuwo ɖe tsitre? Ɛ̃, ŋutilã ka ƒomevie wotsɔ gbɔna?” 36  Wò ame masenugɔme! Nu si nèƒãna la megbɔa agbe o, negbe ɖe wòku gbã; 37  eye nu si nèƒãna la, menye ŋutilã si le esi nɔ ge lae nèƒãna o, ke boŋ eƒe ku la ko, ate ŋu anye lu alo nuku bubuawo dometɔ aɖe ƒe ku; 38  gake Mawu naa ŋutilã si wòlɔ̃ lae, eye wònaa ŋutilã kuawo dometɔ ɖe sia ɖe ɖe ye ŋutɔ ƒe nɔnɔme nu. 39  Ŋutilãwo katã menye ŋutilã ɖeka ƒomevi o, ke boŋ amegbetɔwo tɔ li, eye lãwo ƒe ŋutilã li, eye xewo ƒe ŋutilã kple tɔmelãwo tɔ hã li. 40  Eye dziƒoŋutilãwo li, eye anyigba dzi ŋutilãwo hã li; gake dziƒoŋutilãwo ƒe ŋutikɔkɔe le vovo, anyigba dzi ŋutilãwo hã tɔ le vovo. 41  Ɣe ƒe ŋutikɔkɔe le vovo, eye ɣleti tɔ hã le vovo, eye ɣletiviwo ƒe ŋutikɔkɔe hã le vovo; le nyateƒe me la, ɣletivi ɖe sia ɖe ƒe ŋutikɔkɔe to vovo na nɔvia tɔ. 42  Nenema kee ame kukuwo ƒe tsitretsitsi la hã le. Woƒãnɛ le gbegblẽ me, wofɔnɛ ɖe tsitre le magblẽmagblẽ me. 43  Woƒãnɛ le bubumanɔameŋu me, wofɔnɛ ɖe tsitre le ŋutikɔkɔe me. Woƒãnɛ le gbɔdzɔgbɔdzɔ me, wofɔnɛ ɖe tsitre le ŋusẽ me. 44  Woƒãnɛ wònyea luʋɔŋutilã, wofɔnɛ wònyea gbɔgbɔŋutilã. Ne luʋɔŋutilã li la, ekema gbɔgbɔŋutilã hã li. 45  Woŋlɔ ɖi kura gɔ̃ hã be: “Ame gbãtɔ, Adam, zu luʋɔ gbagbe.” Adam mamlɛtɔ zu gbɔgbɔ si naa agbe. 46  Ke hã, menye gbɔgbɔ me tɔe gbãtɔ la nye o, ke boŋ ŋutilã me tɔe, emegbe gbɔgbɔ me tɔ la. 47  Ame gbãtɔ la tso anyigba me, eye anyi wotsɔ wɔe; ame evelia ya tso dziƒo. 48  Ale si ame si wotsɔ anyi wɔe la le la, nenema kee ame siwo wotsɔ anyi wɔe la hã le; ale si dziƒo tɔ la le la, nenema kee dziƒo tɔwo hã le. 49  Eye ale si ko ame si wotsɔ anyi wɔe la ƒe nɔnɔme le mía si la, nenema kee dziƒo tɔ la ƒe nɔnɔme hã anɔ mía si. 50  Ke hã, nɔvinyewo, esia gblɔm mele, be ŋutilã kple ʋu mate ŋu anyi Mawu fiaɖuƒe la dome o, eye gbegblẽ mate ŋu anyi magblẽmagblẽ dome o. 51  Kpɔ ɖa! Mele nya ɣaɣla kɔkɔe aɖe gblɔm na mi: Mí katã míele alɔ̃ dɔ ge le ku me o, ke boŋ woatrɔ mí katã míaƒe nɔnɔme, 52  enumake, le aɖabaƒoƒo ɖeka me, le kpẽkuku mamlɛa me. Elabena kpẽ la aɖi, eye woafɔ ame kukuwo ɖe tsitre magblẽmagblẽe, eye woatrɔ míaƒe nɔnɔme. 53  Elabena ele be nu sia, si gblẽna la, nado magblẽmagblẽ, eye ele be nu sia, si kuna la, nado makumakunyenye. 54  Gake ne nu sia, si gblẽna la, do magblẽmagblẽ, eye nu sia, si kuna la, do makumakunyenye la, ekema nya si woŋlɔ ɖi la ava eme, be: “Womi ku tegbee.” 55  “Ku, wò dziɖuɖu la ɖe? Ku, wò veve la ɖe?” 56  Veve si hea ku vanɛ lae nye nu vɔ̃, gake nu vɔ̃ ƒe ŋusẽe nye Se la. 57  Gake woada akpe na Mawu, be ena dziɖuɖu mí to mía Aƒetɔ Yesu Kristo dzi! 58  Eya ta nɔvinye lɔlɔ̃tɔwo, minɔ te sesĩe, maʋamaʋa, eye miwɔ geɖe le Aƒetɔ la ƒe dɔwɔwɔ la me ɣesiaɣi, esi mienyae be miaƒe agbagbadzedze menye dzodzro le Aƒetɔ la me o ta.

Etenuŋɔŋlɔ