Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

1 Korintotɔwo 14:1-40

14  Miti lɔlɔ̃ yome, ke hã, minɔ gbɔgbɔmenunanawo dim vevie, gake anyo wu be miagblɔ nya ɖi.  Elabena ame si doa gbegbɔgblɔ bubu aɖe la, menye amewoe wòƒoa nu na o, ke boŋ Mawue, elabena ame aɖeke mesenɛ o, ke boŋ egblɔa nya ɣaɣla kɔkɔewo to gbɔgbɔ la dzi.  Ke hã, ame si gblɔa nya ɖi la tua amewo ɖo, eye wòdea dzi ƒo na wo hefaa akɔ na wo to eƒe nuƒoƒo me.  Ame si doa gbegbɔgblɔ bubu aɖe la tua eya ŋutɔ ɖokui ɖo, gake ame si gblɔa nya ɖi la tua hame ɖo.  Ðe madi be mi katã miado gbegbɔgblɔ bubuwo hafi, gake medi be miagblɔ nya ɖi boŋ. Le nyateƒe me la, ame si gblɔa nya ɖi la de ŋgɔ wu ame si doa gbegbɔgblɔ bubuwo, negbe ɖe wòɖe egɔme, bene hamea naxɔ tutuɖo hafi.  Gake azɔ la, nɔviwo, ne ɖe wòanye be meva le gbegbɔgblɔ bubuwo dom na mi ɖe, vi kae wòaɖe na mi, ne menye be matsɔ nyaɖeɖefia alo sidzedze alo nyagbɔgblɔɖi alo nufiafia aƒo nu na mi boŋ oa?  Abe ale si mienyae ene la, nu siwo me agbe mele o la ƒe gbe ɖina, eɖanye dze alo kasaŋku o; ne vovototo aɖeke medze le gbeɖiɖiawo dome o ɖe, aleke woawɔ anya ha si wotsɔ dze alo kasaŋku la le ƒoƒom?  Elabena le nyateƒe me la, ne kpẽ ƒe ɖiɖime mekɔ nyuie o ɖe, ame kae adzra ɖo na aʋa?  Nenema kee miawo hã, ne mietsɔa aɖe gblɔa nya siwo gɔme nya sena bɔbɔe o ɖe, aleke woawɔ anya nya si gblɔm miele? Le nyateƒe me la, anye nuƒoƒo ɖe ya me. 10  Gbegbɔgblɔ ƒomevi geɖewo anya le xexea me, ke hã, wo dometɔ aɖeke meli, si ŋu gɔmesese mele o. 11  Eya ta ne nyemese nya si wogblɔ la gɔme o la, ekema manye amedzro na ame si le nu ƒom la, eye ame si le nu ƒom hã anye amedzro nam. 12  Eya ta miawo hã, esi wònye miele gbɔgbɔ la ƒe nunanawo dim vevie ta la, midze agbagba be woasɔ gbɔ na mi hena hame la tutuɖo. 13  Eya ta ame si doa gbegbɔgblɔ bubu la nedo gbe ɖa, bene yeate ŋu aɖe egɔme. 14  Elabena ne mele gbe dom ɖa le gbegbɔgblɔ bubu me la, gbɔgbɔ ƒe nunana si le asinye lae le gbea dom ɖa, gake nye susu ya mele vi ɖem o. 15  Ekema nu kae wòle be mawɔ? Matsɔ gbɔgbɔ ƒe nunana la ado gbe ɖa, gake matsɔ nye susu hã ado gbe ɖa. Matsɔ gbɔgbɔ ƒe nunana la adzi kafukafuha, gake matsɔ nye susu hã adzi kafukafuha. 16  Ne menye nenema o la, ne ètsɔa gbɔgbɔ ƒe nunana la gblɔa kafukafunyawo ɖe, aleke ame tsɛ ate ŋu agblɔ “Amen” ɖe wò akpedada dzi, esi wònye menya nya si gblɔm nèle o? 17  Nyateƒee, èdaa akpe le mɔ nyuitɔ nu, gake metua ame kemɛa ɖo o. 18  Medaa akpe na Mawu, be medoa gbegbɔgblɔ bubu geɖewo wu mia dometɔ ɖe sia ɖe. 19  Ke hã, madi be magblɔ nya atɔ̃, siwo tso nye susu me la le hame aɖe me, bene mafia nu ame bubuwo hã, wu be magblɔ nya akpe ewo le gbegbɔgblɔ bubu me. 20  Nɔviwo, migazu ɖevi suewo le nugɔmesese ƒe ŋutetewo gome o, gake minye vidzĩwo le nu vɔ̃ɖi wɔwɔ gome; ke hã, mizu ame siwo tsi bliboe le nugɔmesese ƒe ŋutetewo gome. 21  Woŋlɔ ɖe Se la me be: “‘Amedzrowo ƒe aɖewo kple du bubu me tɔwo ƒe nuyiwo matsɔ aƒo nu na dukɔ sia, ke hã, womaɖo tom o,’ Yehowa ye gblɔe.” 22  Eya ta gbegbɔgblɔ bubuwo dodo nye dzesi, menye na xɔsetɔwo o, ke boŋ na dzimaxɔsetɔwo, gake nyagbɔgblɔɖi la meli ɖe dzimaxɔsetɔwo ta o, ke boŋ ɖe xɔsetɔwo ta. 23  Eya ta ne hame blibo la katã va ƒo ƒu ɖe afi ɖeka, eye wo katã wole gbegbɔgblɔ bubuwo dom, gake ame tsɛwo alo dzimaxɔsetɔwo va afi ma la, ɖe womagblɔ be miedze aɖaʋa oa? 24  Gake ne mi katã miele nya gblɔm ɖi, eye dzimaxɔsetɔ aɖe alo ame tsɛ aɖe va afi ma la, miaƒe nyawo katã azu nyagbename nɛ, wo katã woana wòadzro eɖokui me; 25  eƒe dzimenya ɣaɣlawo adze, si ana wòatsyɔ mo anyi, eye wòade ta agu na Mawu agblɔ be: “Mawu le mia dome vavã.” 26  Ekema nɔviwo, nu kae wòle be miawɔ? Ne mieva ƒo ƒu la, psalmo aɖe nɔa nɔvi aɖe si, nufiafia aɖe nɔa ame bubu si, nyaɖeɖefia aɖe nɔa ame bubu si, gbegbɔgblɔ bubu dodo ƒe ŋutete nɔa ame bubu si, nyawo gɔme ɖeɖe ƒe ŋutete nɔa ame bubu si. Miwɔ nuwo katã hena tutuɖo. 27  Eye ne ame aɖe doa gbegbɔgblɔ bubu la, ne ede ƒãa la, woanye ame eve alo etɔ̃, eye ame ɖeka naƒo nu vɔ hafi nɔvia naƒo nu; eye ame aɖe neɖe egɔme. 28  Gake ne gbegɔmeɖela aɖeke meli o la, nezi ɖoɖoe le hame la me, eye wòaƒo nu na ye ŋutɔ ɖokui kple Mawu. 29  Gawu la, nyagblɔɖila eve alo etɔ̃ naƒo nu, eye ame bubuwo nadi egɔmesese. 30  Gake ne nyaɖeɖefia aɖe le ame bubu aɖe si nɔ anyi ɖe afi ma si la, ke ame gbãtɔ la nezi ɖoɖoe. 31  Elabena mi katã miate ŋu agblɔ nya ɖi ɖekaɖeka, bene ame sia ame nasrɔ̃ nane, eye wòade dzi ƒo nɛ. 32  Eye ele be nyagblɔɖilawo nalé wo ɖokuiwo ne gbɔgbɔ ƒe nyagbɔgblɔɖi ƒe nunana aɖe va na wo. 33  Elabena Mawu menye nyamanyamawɔwɔ ƒe Mawu o, ke ŋutifafa ƒe Mawu boŋ. Abe ale si wòle le ame kɔkɔewo ƒe hamewo katã me ene la, 34  nyɔnuwo nezi ɖoɖoe le hameawo me, elabena womeɖe mɔ na wo be woaƒo nu o, ke boŋ woabɔbɔ wo ɖokuiwo, abe ale si Se la gblɔe ene. 35  Ke ne wodi be yewoasrɔ̃ nane la, mina woabia woawo ŋutɔwo srɔ̃wo le aƒe me, elabena enye ŋukpenanu be nyɔnu naƒo nu le hamea me. 36  Miebe nu ka? Mia gbɔe Mawu ƒe nya la tso vaa, alo miawo ɖeɖe gbɔ koe wòɖoa? 37  Ne ame aɖe susu be yenye nyagblɔɖila alo be wona gbɔgbɔ la ye la, ekema nelɔ̃ ɖe nya siwo ŋlɔm mele ɖo ɖe mi la dzi, elabena Aƒetɔ la ƒe sededee wonye. 38  Gake ne ame aɖe gbe nya sia gɔme sese la, negbe faa. 39  Eya ta nɔvinyewo, miyi edzi mianɔ nyagbɔgblɔɖi ƒe nunana dim vevie, ke hã, migade se ɖe gbegbɔgblɔ bubuwo dodo nu o. 40  Gake mina nuwo katã nanɔ ɖoɖo nu ale si dze.

Etenuŋɔŋlɔ