Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

1 Korintotɔwo 10:1-33

10  Ke nyemedi be nu sia nanɔ manyamanya na mi o, nɔviwo, be mía tɔgbuiwo katã nɔ alilikpo la te, eye wo katã woto ƒu la me,  eye woto alilikpo la kple ƒu la dzi nyrɔ wo katã ɖe Mose me;  eye wo katã woɖu gbɔgbɔmenuɖuɖu ma ke,  eye wo katã wono gbɔgbɔmenunono ma ke. Elabena wono tsi tso gbɔgbɔmekpe gbadza si dze wo yome la me, eye kpe gbadza ma tsi tsitre ɖi na Kristo la.  Ke hã, Mawu meɖe eƒe ŋudzedzekpɔkpɔ fia ɖe wo dometɔ akpa gãtɔ ŋu o, elabena woku le gbedadaƒo.  Ke nu siawo va zu kpɔɖeŋuwo na mí, be míaganye nu vɔ̃ɖi dzrolawo, abe ale si wòdzro wo ene o.  Eye migazu trɔ̃subɔlawo abe wo dometɔ aɖewo ene o; abe ale si woŋlɔe ɖi ene, be: “Ameawo bɔbɔ nɔ anyi ɖu nu heno nu, eye wotso, be yewoafe.”  Eye migana míanɔ agbe gbegblẽ nɔm, abe ale si wo dometɔ aɖewo nɔ agbe gbegblẽ, si na wodze anyi, ame akpe blaeve vɔ etɔ̃ le ŋkeke ɖeka dzi, la ene o.  Eye migana míate Yehowa kpɔ, abe ale si wo dometɔ aɖewo tee kpɔ, eye dawo tsrɔ̃ wo la ene o. 10  Eye migazu liʋiliʋililawo, abe ale si wo dometɔ aɖewo li liʋiliʋi, eye nutsrɔ̃la tsrɔ̃ wo la ene o. 11  Ke nu siawo dzɔ ɖe wo dzi abe kpɔɖeŋuwo ene, eye woŋlɔ wo ɖi be woanye nuxɔxlɔ̃ na mí ame siwo dzi nuɖoanyi siawo ƒe nuwuwuwo va ɖo la. 12  Eya ta ame si susu be yele tsitre la nakpɔ nyuie be wòagadze anyi o. 13  Tetekpɔ aɖeke mevaa mia dzi o, negbe esi tɔgbi vaa amegbetɔwo dzi la ko. Gake nyateƒetɔe Mawu nye, eye maɖe mɔ be woate mi kpɔ wu esi nu miate ŋu anɔ te ɖo o, ke hã, ne tetekpɔa va la, ana mɔ si dzi miato ado le eme la mi, bene miate ŋu ado dzi atsɔe. 14  Eya ta nye lɔlɔ̃tɔwo, misi le trɔ̃subɔsubɔ nu. 15  Mele nu ƒom na mi abe nugɔmeselawo ene; mia ŋutɔwo mida nya si gblɔm mele la kpɔ. 16  Yayrakplu si míeyrana la, ɖe menye gomekpɔkpɔ le Kristo la ƒe ʋu mee wònye oa? Abolo si míeŋena la, ɖe menye gomekpɔkpɔ le Kristo la ƒe ŋutilã mee wònye oa? 17  Elabena abolo ɖeka koe, togbɔ be míawo míesɔ gbɔ hã la, ŋutilã ɖekae míenye, elabena mí katã míele gome kpɔm le abolo ɖeka ma me. 18  Mikpɔ nu si Israel nye le ŋutilã nu la ɖa: Ðe ame siwo ɖua vɔsanuawo la mekpɔa gome le wo me kple vɔsamlekpui la oa? 19  Ekema nya kae wòle be magblɔ? Be nu si wotsɔ sa vɔ na trɔ̃ la nye nanea, alo be trɔ̃ nye nanea? 20  Ao; ke boŋ mele gbɔgblɔm be, nu siwo dukɔwo tsɔ saa vɔe la, gbɔgbɔ vɔ̃woe wotsɔa wo saa vɔe na, ke menye na Mawu o; eye nyemedi be miade ha kple gbɔgbɔ vɔ̃wo o. 21  Miate ŋu anɔ nu nom le Yehowa ƒe kplu nu, aganɔ nu nom le gbɔgbɔ vɔ̃wo ƒe kplu nu o; miate ŋu anɔ nu ɖum le “Yehowa ƒe kplɔ̃” ŋu, aganɔ nu ɖum le gbɔgbɔ vɔ̃wo ƒe kplɔ̃ ŋu o. 22  Alo “ɖe míele ewɔm, be Yehowa naʋã ŋu” yea? Ŋusẽ mele mía ŋu wui o ɖe? 23  Woɖe nuwo katã ƒe mɔ na ame; gake menye nuwo katãe dea ame dzi o. Woɖe nuwo katã ƒe mɔ na ame; gake menye nuwo katãe tua ame ɖo o. 24  Ame aɖeke neganɔ ye ŋutɔ ƒe nyonyo dim o, ke ame bubu tɔ boŋ. 25  Nu sia nu si wodzrana le lãsi me la, minɔ eɖum, eye migabia eta se o le miaƒe dzitsinya ta; 26  elabena “Yehowa tɔe nye anyigba kple nu siwo yɔ edzi la.” 27  Ne dzimaxɔsetɔwo dometɔ aɖe kpe mi, eye mielɔ̃ be yewoayi la, miɖu nu sia nu si woatsɔ aɖo mia kɔme, eye migabia eta se o le miaƒe dzitsinya ta. 28  Gake ne ame aɖe gblɔ na mi be: “Wotsɔ nu sia sa vɔe” la, ekema migaɖui o, le ame si gblɔ nya sia na mi ta, kple dzitsinya ta. 29  Ne mebe “dzitsinya” la, menye wò ŋutɔ tɔwò ƒe nya gblɔm mele o, ke boŋ ame kemɛa tɔ. Elabena nu ka tae wòle be ame bubu ƒe dzitsinya nadrɔ̃ ʋɔnu nye ablɔɖe? 30  Ne meda akpe hafi le nua ɖum la, nu ka tae woaƒo nu gbegblẽ tso ŋunye le nu si ta meda akpe ɖo la ŋu? 31  Eya ta miele nu ɖum alo le nu nom, alo ɖale nu bubu aɖe wɔm o, miwɔ nuwo katã hena Mawu ƒe kafukafu. 32  Migazu nukikli na Yudatɔwo kple Helatɔwo kpakple Mawu ƒe hame la o, 33  abe ale si nye hã mele amewo katã ŋu dzem le nuwo katã me, eye nyemele nye ŋutɔ nye nyonyo dim o, ke boŋ ame geɖewo tɔ, bene woakpɔ ɖeɖe, la ene.

Etenuŋɔŋlɔ