Dzo kpo yi emenuwo dzi

Dzo kpo yi emenuawo dzi

 TA WUIENELIA

Esrɔ̃ Nublanuikpɔkpɔ

Esrɔ̃ Nublanuikpɔkpɔ

1. Mɔzɔzɔ kae nɔ ŋgɔ na Yona, eye aleke wòse le eɖokui me tso du si me wòɖo tae la ŋu?

ƔEYIƔI geɖe su Yona si be wòatsɔ ade ŋugble. Kilometa 800 ƒe mɔzɔzɔ, si axɔ abe ɣleti ɖeka ene alo esi wu nenema gɔ̃ hã le eŋgɔ. Gbã la, ehiã be wòatiae nenye be yeato mɔ kpuitɔ si dzi afɔku le loo alo mɔ legbeetɔ si le dedie wu, eye ele be wòazɔ to baliwo me ahalia to geɖewo hã. Ðewohĩ ehiã be wòazɔ aƒo xlã Siria Dzogbe gã la, atso tɔwo abe Frat tɔsisi gã la ene, eye wòadi dɔƒe le ame siwo menya o la gbɔ le Siriatɔwo, Mesopotamiatɔwo kple Asiriatɔwo ƒe duwo kple kɔƒewo me. Esi ŋkekeawo va nɔ yiyim la, eƒe susu nɔ du si me wòɖo tae, si dzi ŋɔ nɛ ŋutɔ la ŋu, eye eƒe afɔɖeɖe ɖe sia ɖe na wònɔ tetem ɖe du ma, si nye Niniwe la, ŋu vivivi.

2. Nu kae na Yona kpɔe dze sii be yemate ŋu asi le dɔ si wode ye si la nu o?

2 Nu ɖeka aɖe nɔ nyanya na Yona nyuie: Eyae nye be yemagate ŋu asi le dɔdeasi sia nu o. Ete esia kpɔ va yi. Abe ale si míekpɔe le ta si do ŋgɔ me ene la, Yehowa gbɔ dzi ɖi fia nu Yona. Ewɔ esia esi wòna ahom sesẽ aɖe tu le ƒua dzi eye wòto ƒumelã gã aɖe dzi ɖee nukutɔe. Ŋkeke etɔ̃ megbe la, ƒumelãa yi ɖadzɔ Yona ɖe ƒuta dedie, si na vɔvɔ̃ ɖoe eye wòbɔbɔ eɖokui azɔ.—Yona, ta 1, 2.

3. Nɔnɔme nyui kae Yehowa ɖe fia Yona, ke hã nyabiase kae fɔ ɖe te?

3 Esi Yehowa dɔ Yona ɖe Niniwe zi evelia la, nyagblɔɖilaa ɖo to hedze mɔ legbee la ɖo ta ɣedzeƒe gome. (Xlẽ Yona 3:1-3.) Gake esi Yehowa ɖɔe ɖo la, ɖe wòtrɔ  dzi me vavã? Le kpɔɖeŋu me, Yehowa kpɔ nublanui nɛ hekpɔ eta be meno tsi ku o, mehe to nɛ ɖe eƒe tosesẽa ta hã o, eye wògana mɔnukpɔkpɔe zi evelia be wòayi dɔa gbe. Le esiawo katã megbe la, ɖe Yona srɔ̃ ale si wòakpɔ nublanui na amewoa? Esesẽna na amegbetɔ madeblibowo zi geɖe be woakpɔ nublanui na ame. Na míakpɔ nu si míate ŋu asrɔ̃ tso ale si nublanuikpɔkpɔ zu dɔ na Yonae la me ɖa.

Ʋɔnudrɔ̃gbedeasi Aɖe Kple Dzimetɔtrɔ Wɔnuku Aɖe

4, 5. Nu ka tae Yehowa yɔ Niniwe be “du gã” ɖo, eye nu kae esia fia mí tso eyama ŋu?

4 Yona mebu Niniwe abe ale si Yehowa bui ene o. Nuŋlɔɖia gblɔ be: ‘Niniwe nye du gã aɖe le Mawu ŋkume.’ (Yona 3:3) Yona ƒe nuŋlɔɖia gblɔ be Yehowa yɔ du sia zi etɔ̃ sɔŋ be “Niniwe, du gã la.” (Yona 1:2; 3:2; 4:11) Nu ka tae wònye du gã alo du vevi aɖe na Yehowa ɖo?

5 Blemadue Niniwe nye, eye enɔ du gbãtɔ siwo Nimrod tso  le Tsiɖɔɖɔa megbe la dome. Ðikeke mele eme o be enye nuto gã aɖe si me dugã geɖewo nɔ, si anye ŋkeke etɔ̃ ƒe azɔli tso eƒe go ɖeka dzi yi go evelia dzi. (1 Mose 10:11; Yona 3:3) Niniwe nye du gã aɖe si ŋu woɖo gli kɔkɔ sesẽwo ɖo, si me gbedoxɔ gãwo kple xɔ gã bubu geɖewo nɔ. Gake menye nu siawo dometɔ aɖekee na du sia nɔ vevie na Yehowa Mawu o. Nu si nɔ vevie nɛ lae nye dua me tɔwo. Ame gbogbo aɖewo ŋutɔe nɔ Niniwe ɣemaɣi. Togbɔ be wovɔ̃ɖi ŋutɔ hã la, Yehowa tsɔ ɖe le eme na wo. Edea asixɔxɔ amegbetɔ ƒe agbe ŋu eye wòdina be ame sia ame natrɔ dzi me ahasrɔ̃ nu dzɔdzɔe wɔwɔ.

Yona kpɔe be Niniwe nye du gã aɖe si me yɔ fũu kple nu baɖa wɔwɔ

6. (a) Nu ka tae vɔvɔ̃ anya ɖo Yona esi wòge ɖe Niniwe dua me? (Kpɔ etenuŋɔŋlɔa hã.) (b) Nu kae míesrɔ̃ tso ale si Yona te ŋu ɖe gbeƒã le du ma mee la me?

6 Esi Yona ɖo Niniwe dua me mlɔeba la, anɔ eme be dua me tɔ siwo wu 120,000 sɔŋ la gana vɔvɔ̃ ɖoe ɖe edzi. * Yona zɔ ŋkeke ɖeka ƒe mɔ henɔ ameha gbogboawo dome tom, ɖewohĩ be yeakpɔ teƒe si amewo sɔ gbɔ le wu ne yeadze yeƒe gbedeasia gbɔgblɔ gɔme tso afi ma. Aleke wòawɔ aƒo nu na ame siawo katã? Ðe wòse Asiriagbe xoxoa? Alo ɖe Yehowa na wòdo gbea nukutɔea? Míenya o. Ate ŋu anye be Yona gblɔ gbedeasia le Hebrigbe, si nye ye ŋutɔ degbe me, eye ame bubu ɖe egɔme na Niniwetɔawo. Aleke kee wòɖale o, eƒe gbedeasia le tẽe eye ate ŋu ana amewo natsi tsitre ɖe eŋu; eɖe gbeƒã be: “Esusɔ ŋkeke blane, ne Niniwe natsrɔ̃!” (Yona 3:4) Egblɔ nya sia dzinɔameƒotɔe zi gbɔ zi geɖe. Eɖe dzideƒo kple xɔse ɖedzesi aɖe fia le esia wɔwɔ me, eye esiawo nye nɔnɔme nyui siwo Kristotɔwo hiã egbea wu ɣeyiɣi bubu ɖe sia ɖe.

Yona ƒe gbedeasia le tẽe eye ate ŋu ana amewo natsi tsitre ɖe eŋu

7, 8. (a) Aleke Niniwetɔwo wɔ nui esi wose Yona ƒe gbedeasia? (b) Aleke Niniwe fia la wɔ nui esi wòse Yona ƒe gbedeasia?

7 Niniwetɔwo ɖo to Yona ƒe gbedeasia. Ðikeke mele eme o be enɔ mɔ kpɔm be woalé fu ye ahawɔ anyra le ye ŋu. Ke hã nu wɔmoyaa aɖe boŋue dzɔ. Ameawo ɖo toe! Eƒe nyawo kaka kabakaba abe dzo dzeave ene. Eteƒe medidi hafi dugã la me tɔwo katã va nɔ nu ƒom tso Yona ƒe tsɔtsrɔ̃gbedeasia ŋu o. (Xlẽ Yona 3:5.) Kesinɔtɔwo kple ame dahewo, ame sesẽwo kple ame beliwo,  ɖeviwo kple tsitsiawo siaa trɔ dzi me. Womeka asi nuɖuɖu ŋu o. Eteƒe medidi hafi fia la se dua me tɔwo ƒe dzimetɔtrɔ ŋu nya o.

Yona hiã dzideƒo kple xɔse be wòate ŋu aɖe gbeƒã le Niniwe

8 Fia la hã trɔ dzi me esi wòse Yona ƒe gbedeasia. Mawu ƒe ŋɔdzi lée, ale wòtso le eƒe fiazikpui dzi heɖe eƒe atsyɔ̃fiawuwo da ɖi, eye eya hã ta akpanya abe eteviwo ke ene, eye ‘wòbɔbɔ nɔ dzowɔ me’ gɔ̃ hã. Eya kple eƒe “amegãwo,” alo ame ŋkutawo, de se aɖe si na ame ɖekaɖekawo ƒe nutsitsidɔa va trɔ zu fia ƒe sedede si dzi wòle be dua me tɔwo katã nawɔ ɖo. Ede se be amewo katã kple aƒemelãwo gɔ̃ hã nata akpanya. * Elɔ̃ ɖe edzi ɖokuibɔbɔtɔe be yeƒe dua me tɔwo dze agɔ le woƒe nu vɔ̃ɖi kple ŋutasẽnu wɔwɔwo ta. Fia la nɔ mɔ kpɔm hã be Mawu vavã la akpɔ nublanui na yewo ne ekpɔe be yewotrɔ dzi me, elabena egblɔ be: “Mawu atrɔ tame . . . eye eƒe dɔmedzoe helĩhelĩ la nu afa, be míatsrɔ̃ o hĩ!”—Yona 3:6-9.

9. Nya kae ɖikelawo gblɔ tso Niniwetɔwo ƒe dzimetɔtrɔ ŋu, gake aleke míewɔ nya be woƒe nyaa mele eteƒe o?

9 Ðeklemiɖela aɖewo ke ɖi be Niniwetɔwo mate ŋu atrɔ dzi me kaba nenema o. Gake Biblia ŋuti nunyalawo gblɔ be nuwɔna ma nye nu si ate ŋu adzɔ le blematɔ mawo, siwo léa aʋatsodzixɔsewo me ɖe asi la, dome bɔbɔe. Nu si hã na míeka ɖe edzi be ɖikela mawo ƒe nyaa mele eteƒe o ye nye be, Yesu Kristo ŋutɔ hã va ƒo nu tso Niniwetɔwo ƒe dzimetɔtrɔa ŋu emegbe. (Xlẽ Mateo 12:41.) Yesu nya nya si gblɔm wònɔ, elabena enɔ dziƒo kpɔ nudzɔdzɔ mawo teƒe. (Yoh. 8:57, 58) Nyateƒeae nye be, aleke kee wòawɔ na mí be amewo vɔ̃ɖii o, mele be míasusui gbeɖe be womate ŋu atrɔ dzi me o. Yehowa ɖeɖe koe ate ŋu anya nu si le ame ƒe dzi me.

Mawu Kpɔa Nublanui, Ke Amegbetɔwo Ya Léa Nya Me Ðe Asi Kpaɖii

10, 11. (a) Aleke Yehowa wɔ nui esi Niniwetɔwo trɔ dzi me? (b) Nu ka tae míate ŋu aka ɖe edzi be vodada mele Yehowa ƒe ʋɔnudɔdrɔ̃a me o?

10 Aleke Yehowa wɔ nui esi Niniwetɔwo trɔ dzi me? Yona ŋlɔ emegbe be: ‘Esi Mawu kpɔ ale si wowɔ, be woɖe asi le woƒe mɔ  vɔ̃wo ŋu la, vɔ̃, si Mawu gblɔ be, yeawɔ wo la vee, eye mewɔe o.’—Yona 3:10.

11 Ðe esia fia be Yehowa va kpɔe be vodadae wònye yewɔ esi yeɖoe be yeatsrɔ̃ Niniwea? Ao. Biblia gblɔ be Yehowa ƒe ʋɔnudɔdrɔ̃ de blibo. (Xlẽ 5 Mose 32: 4.) Nya la koe nye be dziku si Yehowa do ɖe Niniwe ŋu le dzɔdzɔenyenye me la nu fa. Ekpɔ tɔtrɔ si Niniwetɔwo wɔ eye wòkpɔe be to si yeɖo be yeahe na wo la megahiã o. Esɔ be Mawu nakpɔ nublanui le go sia me.

12, 13. (a) Aleke Yehowa ɖee fia be yenye nugɔmesela, ame si trɔna ɖe nɔnɔmewo ŋu kple nublanuikpɔla? (b) Nu ka tae Yona ƒe nyagblɔɖia menye aʋatso o?

12 Yehowa menye Mawu si ƒe nya me sẽ kpaɖii, si mesea veve ɖe ame nu o, si sẽa ŋuta, abe ale si subɔsubɔhakplɔlawo ƒe nufiafiawo nana wòdzena na amewo ene o. Ke boŋ enye nugɔmesela, ame si trɔna ɖe nɔnɔmewo ŋu kple nublanuikpɔla. Ne eɖoe be yeahe to na ame vɔ̃ɖiwo la, enana eteƒenɔla siwo le anyigba dzi la xlɔ̃a nu wo do ŋgɔ, elabena edi vevie be ame vɔ̃ɖiwo nawɔ nu si Niniwetɔwo wɔ, si nye be woatrɔ dzi me ahaɖe asi le woƒe mɔwo ŋu. (Eze. 33:11) Yehowa gblɔ na nyagblɔɖila Yeremiya be: ‘Ne meƒo nu kple dukɔ kple fiaɖuƒe aɖe, be mahoe ɖa, magbãe, eye matsrɔ̃e, ke dukɔ ma trɔ tso eƒe nu vɔ̃ɖi wɔwɔ, si ŋu meƒo nu le me la, ekema vɔ̃, si meɖo be, mawɔe la, avem.’—Yer. 18:7, 8.

Mawu di vevie be ame vɔ̃ɖiwo natrɔ dzi me eye woatrɔ woƒe mɔwo, abe ale si Niniwetɔwo wɔe ene

13 Ðe Yona ƒe nyagblɔɖia nye aʋatsoa? Ao; ke boŋ eɖo eƒe taɖodzinu si nye be wòanye nuxlɔ̃ame la gbɔ. Niniwetɔwo ƒe nu vɔ̃ɖi wɔwɔwo tae woxlɔ̃ nu wo ɖo, gake wotrɔ dzi me. Ne Niniwetɔwo gatrɔ ɖe woƒe nu vɔ̃ɖi wɔwɔa ŋu la, ke Mawu ahe to na wo abe ale si wòxlɔ̃ nu woe ene. Nu ma tututue va dzɔ emegbe.—Zef. 2:13-15.

14. Aleke Yona wɔ nui esi Yehowa kpɔ nublanui na Niniwetɔwo?

14 Aleke Yona wɔ nui esime tsɔtsrɔ̃a meva le ɣeyiɣi si wònɔ mɔ kpɔm nɛ me o? Nuŋlɔɖia gblɔ be: “Ke esia medze Yona ŋu o, eye dzi kui vevie.” (Yona 4:1) Yona do gbe aɖe ɖa si nɔ abe nyahehe ɖe Ŋusẽkatãtɔ la ŋu ene gɔ̃ hã! Yona ƒe nyawo fia be mehiã be yeadzo le yewo de ava afi ma hafi o. Egblɔ be yenyae be Yehowa mele Niniwetɔwo tsrɔ̃ ge o, eye wògblɔ be esia tae yesi yi Tarsis gbã ɖo. Eyome ebia Mawu be wòaxɔ yeƒe agbe le ye si hegblɔ be enyo na ye be yeaku wu esi yeanɔ agbe.—Xlẽ Yona 4:2, 3.

15. (a) Anye nu ka gbɔe wòtso be nu te ɖe Yona dzi eye wòdo dziku? (b) Aleke Yehowa wɔ nu ɖe eƒe nyagblɔɖila si dzi nu te ɖo la ŋu?

15 Nu kae nɔ fu ɖem na Yona? Míate ŋu anya nu siwo katã  va ta me nɛ ya o, gake míenya be Yona ɖe gbeƒã Niniwe ƒe tsɔtsrɔ̃ amewo katã se. Woxɔ eƒe nyaa dzi se. Gake fifia, tsɔtsrɔ̃ aɖeke meva wo dzi o. Ðe Yona vɔ̃ be woabu ye aʋatsonyagblɔɖila ahaɖu fewu le ye ŋua? Aleke kee wòɖale o, mekpɔ dzidzɔ ɖe ameawo ƒe dzimetɔtrɔ kple ale si Yehowa kpɔ nublanui na wo la ŋu o. Ke boŋ edze ƒãa be ete ɖe edzi vevie, eƒe nu wɔnublanui na eɖokui, eye wòse le eɖokui me be bubu klo le ye ŋu. Gake edze ƒãa be Yona ƒe Mawu nublanuikpɔla la kpɔ nu nyui aɖe le nyagblɔɖila sia si dzi nu te ɖo la ŋu. Le esi teƒe be Yehowa nahe to na Yona ɖe eƒe nuwɔwɔ amemabumabutɔe ta la, ɖeko wòbia nya aɖe si ana wòabu tame lae lɔlɔ̃tɔe be: “Ðe nèle dɔmedzoe dom ɖe eteƒea?” (Yona 4:4) Ðe Yona ɖo biabia ma ŋu ya? Biblia megblɔe o.

16. Nu kawo mee ame aɖewo akpɔe be yewoƒe susu to vovo na Mawu tɔ le, eye nufiame kae le Yona ƒe kpɔɖeŋua me na mí?

16 Ele bɔbɔe be míadrɔ̃ ʋɔnu Yona ɖe eƒe nuwɔnaa ta, gake anyo be míade dzesii be menye Yona koe nye amegbetɔ madeblibo si ƒe susu mewɔ ɖeka kple Mawu tɔ o. Ame aɖewo asusu be ɖe wòle be Yehowa naxe mɔ ɖe afɔku aɖewo nu alo be wòadrɔ̃ ʋɔnu ame vɔ̃ɖiwo kaba alo ele be wòahe xexe me nuɖoanyi blibo sia ava nuwuwui xoxoxo hafi. Yona ƒe kpɔɖeŋua ɖoa ŋku edzi na mí be, ɣesiaɣi si míaƒe susu mewɔ ɖeka kple Yehowa Mawu tɔ le nane me o la, míawo boŋue wòle be míatrɔ asi le míaƒe nukpɔsusu ŋu, ke menye Mawu o.

Ale Si Yehowa Fia Nublanuikpɔkpɔ Yona

17, 18. (a) Nu kae Yona yi ɖawɔ esi wòdo go le Niniwe dua me? (b) Aleke nukunu siwo Yehowa wɔ ku ɖe treklɔnua ŋu la wɔ dɔ ɖe Yona dzi?

17 Nyagblɔɖila sia si dzi menɔ dzɔdzɔm kura o la do go le Niniwe dua me, gake meyi aƒe o, ke boŋ eɖo ta tonuto si le ɣedzeƒe gome la me. Etu agbadɔ vi aɖe hebɔbɔ nɔ ete nɔ lalam be yeakpɔ nu si le dzɔdzɔ ge ɖe Niniwe dzi. Ðewohĩ egakpɔtɔ nɔ mɔ kpɔm kokoko be yeakpɔ eteƒe ne wole dua tsrɔ̃m. Aleke Yehowa afia nublanuikpɔkpɔ ŋutsu sia si ƒe nya me sẽ alea la?

18 Le zã ɖeka ko me la, Yehowa na treklɔnu aɖe mie hedo vɔvɔli ɖe edzi. Yona fɔ eye wòkpɔ nu miemie dama sia hede dzesii be eƒe aŋgbawo ƒe vɔvɔli nyo sãsãsã wu agbadɔ vi ma si yetu la tɔ. Dzi dzɔe ale gbegbe. “Yona kpɔ dzidzɔ le treklɔnu la ŋu ŋutɔ,” eye ɖewohĩ ebu eƒe miemie nukutɔe alea be enye Mawu ƒe yayra kple ŋudzedzekpɔkpɔ ƒe dzesi. Ke hã nu si Yehowa  di be yeawɔ la de ŋgɔ wu Yona ta kpɔkpɔ tso dzoxɔxɔ me kple eƒe dziku nu fafa nɛ ko. Edi be yeaɖo Yona ƒe dzi gbɔ. Eya ta Mawu gawɔ nukunu bubu aɖewo. Ena ŋɔ aɖe va ɖu treklɔnu la wòku. Emegbe Yehowa dɔ “ɣedzeƒeya xɔdzo” ɖa va se ɖe esime “nu te [Yona ŋu] belibeli” le dzoxɔxɔa ta. Dzi ɖe le ŋutsu sia ƒo vevie eye wògagblɔ na Mawu ake be nena yeaku.—Yona 4:6-8.

19, 20. Aleke Yehowa to treklɔnua dzi fia nu Yona?

19 Fifia Yehowa gabia Yona ake be ɖe wòle dziku dom ɖe eteƒe le treklɔnua ƒe kuku ta hã. Le esi teƒe be Yona natrɔ dzi me la, eɖe eɖokui nu gblɔ be: “Tɔnye dzɔ be, mado dziku, va se ɖe esime maku.” Nɔnɔmea sɔ nyuie azɔ be Yehowa nafia nu vevi aɖe Yona.—Yona 4:9.

Mawu zã treklɔnua tsɔ fia nublanuikpɔkpɔ Yona

20 Mawu he Yona ƒe susu yi ale si wòle dziku dom ɖe treklɔnu dzro aɖe si mie le zã ɖeka me, si Yona medo alo na wòtsi o la ƒe kuku ta dzi. Azɔ Mawu gblɔ nɛ be: ‘Ðe du gã Niniwe, si me amewo le wu ame akpe alafa ɖeka blave, siwo menya nu kae nye  ɖusi kple mia o hekpe ɖe lã geɖewo ŋu la ƒe nu mavem oa?’—Yona 4:10, 11. *

21. (a) Kpɔɖeŋu kae Yehowa wɔ tsɔ fia nu Yona? (b) Aleke Yona ƒe ŋutinyaa ate ŋu akpe ɖe mía ŋu míadzro mía ɖokui me kpɔ anukwaretɔe?

21 Ède dzesi nufiame vevi si le kpɔɖeŋu nyui sia si Yehowa zã la mea? Yona ŋutɔ mewɔ naneke le treklɔnua ƒe miemie ŋu o. Gake le Yehowa gome la, eyae na agbe Niniwetɔwo helé woƒe agbe ɖe te, abe ale si wòwɔnɛ na nuwɔwɔ siwo katã le anyigba dzi ene. Nu ka tae Yona ade asixɔxɔ nu miemie ɖeka pɛ ma ŋu wu ame 120,000 kple woƒe lãhawo ƒe agbe? Ðe manye esi Yona ɖe mɔ ɖokuitɔdidi kpɔ ŋusẽ ɖe eƒe nuŋububu dzi tae oa? Esia dze ƒãa, elabena ale si nu miemiea do vɔvɔli nɛ la ta koe eƒe kukua te ɖe edzi ɖo. Ðe menye eƒe ɖokuitɔdidi alo dada si le eme be yeagaɖu ŋukpe o kple didi be woabu ye nyateƒetɔ ye na wòdo dziku be wometsrɔ̃ Niniwe oa? Yona ƒe ŋutinyaa ate ŋu akpe ɖe mía ŋu míadzro mía ɖokui me kpɔ anukwaretɔe. Mía dometɔ ka mee ɖokuitɔdidi ƒe nɔnɔme sia tɔgbi mele kura o? Aleke gbegbe wòle be míada akpee nye esi be Yehowa le nu fiam mí dzigbɔɖitɔe be míanye ɖokuitɔmadilawo, veveseɖeamenulawo kpakple nublanuikpɔlawo geɖe wu, abe eya ŋutɔ ke ene!

22. (a) Aleke ale si Yehowa fia nublanuikpɔkpɔ Yona aɖaŋutɔe la wɔ dɔ ɖe Yona dzi? (b) Nu kae wòle be mí katã míasrɔ̃?

22 Gake ɖe Yona srɔ̃ nane tso nudzɔdzɔ sia mea? Biblia gbalẽ si ŋu eƒe ŋkɔ le la wu enu kple Yehowa ƒe biabia si ŋu Yona meɖo o. Ðeklemiɖela aɖewo agblɔ be Yona meɖo biabia ma ŋu kpɔ o. Gake le nyateƒe me la, eƒe ŋuɖoɖoa li. Eyae nye eƒe agbalẽa ŋutɔ. Nya lae nye be, kpeɖodziwo ɖee fia be Yona ŋutɔe ŋlɔ agbalẽ si ŋu woyɔ eƒe ŋkɔ tɔ ɖo la. Bu eŋu kpɔ ko be nyagblɔɖila sia ɖe dzi ɖi le wo de hele nudzɔdzɔ sia ŋlɔm. Míate ŋu akpɔe le susu me be amegãɖeɖi si dze nunya wu tsã hebɔbɔ eɖokui geɖe wu lae nye ema le ta ʋuʋum nuteɖeamedzitɔe hele eya ŋutɔ ƒe vodadawo, eƒe tosesẽ kple ale si wòsẽ dzi me gbe nublanuikpɔkpɔ la ŋlɔm ɖi. Edze kɔtɛ be Yona se nu si Yehowa fiae aɖaŋutɔe la gɔme. Esrɔ̃ nublanuikpɔkpɔ. Ðe míawo hã míawɔ nenema?—Xlẽ Mateo 5:7.

^ mm. 6 Wobu akɔnta be ame siwo ƒe xexlẽme ade 20,000 va ɖo 30,000 lae nɔ Israel ƒe fiadu Samaria me le Yona ƒe ŋkekeawo me—si mede ame xexlẽme si nɔ Niniwe la ƒe akpa ɖeka le ene me gɔ̃ hã o. Anɔ eme be le ɣeyiɣi si me Niniwe ƒe ŋkɔ nyɔ la, eyae nye du gãtɔ le xexea me ɣemaɣi.

^ mm. 8 Adze abe nu sia mate ŋu adzɔ ŋutɔŋutɔ o ene, gake menye zi gbãtɔe nye ema nu sia tɔgbi dzɔ le blema o. Helatɔ ŋutinyaŋlɔla Herodotus gblɔ be esi blema Persiatɔwo ƒe aʋafia aɖe si gbɔ womelɔ̃a nu le o ku la, wona woƒe lãwo hã kpɔ gome le konyifafa ƒe kɔnuawo me.

^ mm. 20 Esi Mawu gblɔ be ameawo menya nu kae nye ɖusi kple mia o la, efia be womenya naneke tso Mawu ƒe dzidzenuwo ŋu o, abe ɖevi ɖekemanyalawo ene.