Dzo kpo yi emenuwo dzi

Dzo kpo yi emenuawo dzi

 TA WUIEVELIA

Eƒe Mawu Fa Akɔ Nɛ

Eƒe Mawu Fa Akɔ Nɛ

1, 2. Nu kae dzɔ le ŋkeke si Eliya maŋlɔ be akpɔ o le eƒe agbe me la dzi?

ELIYA le du dzi le tsia me esi anyigba nɔ tsyɔtsyɔm. Mɔ legbee aɖe gale eŋgɔ hafi wòaɖo Yezreel, evɔ menye ɖekakpuie wònye o. Ke hã, nu meti kɔ nɛ le dua ƒuƒu me o, elabena “Yehowa ƒe asi va” edzi. Ðikeke mele eme o be esiae nye zi gbãtɔ si wòse le eɖokui me be ŋusẽ ɖo ye ŋu nenema gbegbe. Edze to sɔ siwo nɔ Fia Axab ƒe tasiaɖam la hem gɔ̃ hã ŋu!—Xlẽ 1 Fiawo 18:46.

2 Fifia eɖe Fia Axab ɖe megbe ʋĩi. Kpɔe ɖa le susu me be Eliya le dua ƒum hele aɖaba ƒom le esi tsia le hehlẽm ɖe mo nɛ ta, eye le ɣeyiɣi ma ke me wòle nu wɔnuku siwo dzɔ teti koe nye ema ŋu bum. Ðikekemanɔmee la, nu si dzɔ la he ŋutikɔkɔe vɛ na Eliya ƒe Mawu, Yehowa, eye wòdo tadedeagu vavãtɔ ɖe dzi. Egblẽ Karmel To la ɖe megbe ʋĩi azɔ, tsia le dzadzam sesĩe le afi ma hã, eye blukɔ do. To sia dzie Yehowa to Eliya dzi wɔ nukunu aɖe le tsɔ ɖee fia be Baal subɔsubɔ nye ameflunu. Woɖe ha Baal nyagblɔɖila alafa geɖe be wonye alakpatɔ vɔ̃ɖiwo, eye esɔ be wowu wo. Eyome Eliya do gbe ɖa na Yehowa be wòana kuɖiɖi si va anyigba la dzi ƒe etɔ̃ kple afãe nye ema la nu natso. Ale tsi gã aɖe dza!—1 Fia. 18:18-45.

3, 4. (a) Esime Eliya nɔ mɔ dzi yina Yezreel la, nu ka tae wòanya nɔ mɔ kpɔm vevie be nuwo ava ɖɔ ɖo? (b) Nyabiase kawo mee míadzro?

3 Esi Eliya nɔ kilometa 30 ƒe du ma ƒum to tsia me ɖo ta Yezreel la, anɔ mɔ kpɔm be nuwo ava ɖɔ ɖo. Anya se le eɖokui me be tɔtrɔ gãwo le ŋgɔ gbɔna azɔ. Ðewohĩ Axab atrɔ! Eliya anya susu be le nu siwo teƒe Axab kpɔ fifia ta la, nu si wòate ŋu awɔ koe nye be wòadzudzɔ Baal subɔsubɔ; aɖo asi fiasrɔ̃ Izebel dzi; eye wòadzudzɔ Yehowa subɔlawo yome titi.

‘Eliya ƒu du dze Axab ŋgɔ va se ɖe Yezreel’

4 Le dzɔdzɔme nu la, ne míaƒe didiwo le eme vam la, míekpɔa mɔ vevie be nuwo anyo. Ðewohĩ míanɔ susum be nuwo ava de mía dzi wu, eye míaƒe kuxi sesẽwo ava zu gbeaɖegbenya. Mawɔ nuku na mí ne Eliya bu nuwo ŋu alea o, elabena enye “amegbetɔ si ƒe seselelãmewo sɔ kple mía tɔwo.” (Yak. 5:17) Ke hã, kuxi geɖe gale ŋgɔ na Eliya. Le nyateƒe me la, gaƒoƒo aɖewo ko megbe  la, vɔvɔ̃ aɖoe, eye dzi aɖe le eƒo ale gbegbe be ku adzroe gɔ̃ hã. Nu kae va dzɔ, eye nu kae Yehowa wɔ tsɔ do ŋusẽ eƒe nyagblɔɖilaa ƒe xɔse hena dzi ɖo eƒo? Na míakpɔe ɖa.

Nuwo Trɔ Bubui Kura

5. Ðe nu siwo dzɔ le Karmel Toa dzi la na Axab de bubu Yehowa ŋua, eye aleke míewɔ nya?

5 Esi Axab ɖo eƒe fiasã me le Yezreel la, ɖe wòwɔ nane si ɖo kpe edzi be etrɔ dzi mea? Nuŋlɔɖia gblɔ be: “Axab va to nu siwo katã Eliya wɔ kple ale si wòtsɔ yi wu nyagblɔɖilawo katãe la, na Izebel.” (1 Fia. 19:1) De dzesii be Axab mehe susu yi Eliya ƒe Mawu, Yehowa dzi esime wònɔ ŋkekea me nudzɔdzɔwo dzi ɖem na srɔ̃a o. Axab nye ŋutilãmeme, eye ebu nukunu siwo dzɔ le ŋkekea me la abe nu siwo dzɔ to amegbetɔ aɖe ƒe ŋusẽ me ko ene, elabena egblɔ be nu siwo “Eliya wɔ.” Edze ƒãa be mesrɔ̃ ale si wòle be wòade bubu Yehowa Mawu ŋu o. Ke aleke srɔ̃a hlɔ̃biala la wɔ nui?

6. Du kae Izebel ɖo ɖe Eliya, eye nu kae eƒe nyawo fia?

6 Izebel do dziku vevie! Le eƒe dɔmedzoe me la, eɖo du sia ɖe Eliya bena: “Mawuwo afiam agafiam ɖe dzi, ne nyemewɔ wò agbe etsɔ wɔle siawo abe wo dometɔ ɖeka ƒe agbe ene o fĩ!” (1 Fia. 19:2) Esia nye ku ƒe ŋɔdzidoname si vloe wu ɖe sia ɖe. Nya mawo fia be Izebel ka atam be, ne yemewu Eliya etsɔ hafi zã do tsɔ bia hlɔ̃ na Baal ƒe nyagblɔɖilawo o la, ke ye ŋutɔ yeaku boŋ. Kpɔe ɖa le susu me be le zã si me tsi gã ma nɔ dzadzam eye Eliya mlɔ aƒe vi kotoe aɖe me le Yezreel ko kasia, fiasrɔ̃ ƒe ame dɔdɔe nye ema va nyɔe hetsɔ gbedeasi dovoɖiname ma vɛ nɛ. Aleke wòwɔ nui?

Dzi Ðe Le Eƒo Eye Vɔvɔ̃ Ðoe

7. Aleke Eliya se le eɖokui me le Izebel ƒe ŋɔdzidodoawo ta, eye nu kae Eliya wɔ?

7 Ne Eliya nɔ susum be aʋa si woho ɖe Baal subɔsubɔ ŋu la ke vɔ la, ke akpɔe enumake be yeda ƒu. Izebel mena ta o. Ede se wowu Eliya hati nyagblɔɖila wɔnuteƒe geɖewo xoxo, eye fifia edze abe Eliya dzie wòɖo ene. Aleke Eliya wɔ nui le Izebel ƒe ŋɔdzidodoawo ta? Biblia gblɔ na mí be: “Tete wòvɔ̃.” Ðe Eliya kpɔ ale si Izebel adi be yeawui ŋutasesẽtɔe la le susu mea? Ne ebu nya ma ŋu la, ke mewɔ nuku be dzi ɖe le eƒo o. Aleke kee wòɖale o, Eliya ‘dze mɔ le eƒe agbe ta,’ si fia be esi, elabena enɔ vɔvɔ̃m be woawu ye.—1 Fia. 18:4; 19:3.

Ne míedi be dzi nanɔ mía ƒo la, mele be míaɖe mɔ míaƒe susu nanɔ vɔ̃ siwo ate ŋu ava mía dzi la ŋu o

8. (a) Aleke Petro ƒe kuxia ɖi Eliya tɔe? (b) Nu kae míate ŋu asrɔ̃ tso nu si me Eliya kple Petro to la me?

8 Menye Eliya ɖeɖe koe nye xɔsetɔ si mete ŋu ɖu vɔvɔ̃ dzi o. Ƒe geɖe megbe la, apostolo Petro hã do go kuxi sia tɔgbi. Le  kpɔɖeŋu me, esi Yesu na Petro zɔ tsia dzi abe ale si eya ŋutɔ hã nɔ edzi zɔmee ene la, apostoloa ‘kpɔ ale si ya la le ƒoƒom sesĩe.’ Esia na wòvɔ̃, eye wòde asi toyiyi me. (Xlẽ Mateo 14:30.) Eya ta nufiame vevi aɖe le nu si me Eliya kple Petro to la me na mí. Ne míedi be dzi nanɔ mía ƒo la, mele be míaɖe mɔ míaƒe susu nanɔ vɔ̃ siwo ate ŋu ava mía dzi la ŋu o. Ele be míana míaƒe susu nanɔ Ame si dzi míeda míaƒe mɔkpɔkpɔ ɖo si doa ŋusẽ mí la boŋ ŋu.

“Esɔ Gbɔ!”

9. Aleke Eliya ƒe mɔzɔzɔa nɔ, eye aleke wònɔ sesem le eɖokui me?

9 Le vɔvɔ̃ ta la, Eliya si ɖo ta anyieheɣetoɖoƒe gome hezɔ kilometa 150 ƒe mɔ yi Beer-Seba, si nye du aɖe si te ɖe Yuda ƒe anyieheliƒo ŋu. Egblẽ eƒe subɔvia ɖe afi ma eye eya ɖeka ɖo ta gbe dzi. Nuŋlɔɖia gblɔ be ezɔ “ŋkeke ɖeka ƒe azɔli,” eya ta míate ŋu akpɔe le susu me be edze mɔ esime agu dze, eye edze ƒãa be medo mɔzɔgba aɖeke o. Nu te ɖe edzi, eye vɔvɔ̃ ƒoe ɖe enu wòle azɔlia dzi hele ŋusẽ dom nu le gbedzimɔ dzekpodzeʋeea dzi le ŋudɔkutsu dzatsɛ. Kaka ɣea nagba amigo ahaɖo to keŋ la, nu te Eliya ŋu keŋkeŋ. Esi ɖeɖi te eŋu belibeli la, ebɔbɔ nɔ anyi ɖe dzoŋgbalẽti aɖe te—eya koe ganye fafɛƒe si wòkpɔ le dzogbenyigba ma dzi.—1 Fia. 19:4.

10, 11. (a) Gɔmesese kae le gbe si Eliya do ɖa na Yehowa la ŋu? (b) Zã mawunyakpukpuiawo me nyawo nàtsɔ aɖɔ ale si nu te ɖe Mawu subɔla bubuwo dzii.

10 Dzi ɖe le Eliya ƒo keŋkeŋ, eye wòdo gbe ɖa. Ebia be Mawu nana yeaku. Egblɔ be: “Nyemenyo wu fofonyewo o.” Enyae be ye fofowo zu ƒu kple ke le yɔ me ɖaa, eye womate ŋu akpe ɖe ame aɖeke ŋu o. (Nyagb. 9:10) Eliya se le eɖokui me be viɖe aɖeke megale ye ŋu o, abe woawo ke ene. Eya ta mewɔ nuku o be wòdo ɣli gblɔ be: “Esɔ gbɔ!” Nu ka tae yeaganɔ agbe ɖo?

11 Ðe wòle be wòawɔ nuku na mí be dzi ɖe le Mawu ƒe ame aɖe ƒo alea gbegbea? Ao. Biblia ƒo nu tso ŋutsu kple nyɔnu nuteƒewɔla geɖe siwo lé blanui ale gbegbe be ku dzro wo la ŋu—wo dometɔ aɖewoe nye Rebeka, Yakob, Mose kple Hiob.—1 Mose 25:22; 37:35; 4 Mose 11:13-15; Hiob 14:13.

12. Ne dzi ɖe le ƒowò vevie la, mɔ ka nue nàte ŋu asrɔ̃ Eliya ƒe kpɔɖeŋu le?

12 “Ɣeyiɣi sesẽ siwo me nɔnɔ sesẽ” mee míele, eya ta mewɔ nuku o be dzi ɖena le ame geɖe, siwo dome Mawu subɔla wɔnuteƒewo gɔ̃ hã le la, ƒo ɣeaɖewoɣi. (2 Tim. 3:1) Ne èkpɔ ɖokuiwò le  nɔnɔme wɔnublanui sia tɔgbi me la, srɔ̃ Eliya ƒe kpɔɖeŋu le go sia me: Gblɔ wò dzimenyawo na Mawu. Nyateƒeae nye be Yehowae nye ‘akɔfafawo katã ƒe Mawu’ la. (Xlẽ 2 Korintotɔwo 1:3, 4.) Ðe wòfa akɔ na Eliya?

Yehowa Lé Eƒe Nyagblɔɖilaa Ðe Te

13, 14. (a) Aleke Yehowa to mawudɔla aɖe dzi ve Eƒe nyagblɔɖila si dzi nu te ɖo vevie la nu? (b) Nu ka tae wòfaa akɔ na mí be míanyae be Yehowa nya mía dometɔ ɖe sia ɖe nyuie kple afi si míaƒe ŋutetewo se ɖo?

13 Aleke nèsusu be Yehowa se le eɖokui me esi wòle dziƒo kpɔ eƒe nyagblɔɖila lɔlɔ̃a wòmlɔ anyi ɖe atia te le gbe dzi hele kuku ɖem nɛ be wòana yeaku? Biblia akpe ɖe mía ŋu míakpɔ ŋuɖoɖoa. Esi Eliya yi alɔ̃ me la, Yehowa dɔ mawudɔla aɖe ɖe egbɔ. Mawudɔlaa ka asi Eliya ŋu wònyɔ, eye wògblɔ nɛ be: “Fɔ nàɖu nu!” Eliya fɔ heɖu nu, elabena mawudɔlaa tsɔ abolo dzodzoe kple tsi nɛ. Ðe wòda akpe na mawudɔlaa gɔ̃ hã ya? Ðeko nuŋlɔɖia gblɔ be eɖu nu no nu, eye wògamlɔ anyi. Ðe dzi ɖe le eƒo ale gbegbe be menya nya si wòagblɔ oa? Aleke kee wòɖale o, mawudɔlaa gava nyɔe ake, ɖewohĩ le fɔŋli. Egagblɔ na Eliya be, “Fɔ nàɖu nu,” eye wògblɔ nya wɔdɔɖeamedzi sia kpee be, “elabena wò mɔ didi akpa!”—1 Fia. 19:5-7.

14 Mawudɔlaa nya afi si Eliya ɖo tae, elabena Mawu ɖee fiae. Enya hã be Eliya mate ŋu azɔ mɔ legbee ma le eya ŋutɔ ƒe ŋusẽ me o. Aleke gbegbe wòfaa akɔ na míi ye nye esi be míele Mawu si nya míaƒe tameɖoɖowo kple afi si míaƒe ŋutete se ɖo wu míawo ŋutɔwo gɔ̃ hã la subɔm! (Xlẽ Psalmo 103:13, 14.) Aleke nuɖuɖu ma ɖe vi na Eliyae?

15, 16. (a) Nu kae nuɖuɖu si Yehowa na Eliya la do ŋusẽe wòwɔ? (b) Nu ka tae wòle be míakpɔ ŋudzedze ɖe ale si Yehowa nyia esubɔlawo egbea la ŋu?

15 Biblia gblɔ be: “[Efɔ] ɖu nu no nu, eye nuɖuɖu sia do ŋusẽe wòzɔ ŋkeke blane kple zã blane va se ɖe Mawu ƒe to Xoreb gbɔ.” (1 Fia. 19:8) Abe ale si Mose wɔe ƒe alafa ade do ŋgɔ eye Yesu hã va wɔe ƒe akpe ɖeka kloe megbe ene la, Eliya hã tsi nu dɔ ŋkeke 40 kple zã 40. (2 Mose 34:28; Luka 4:1, 2) Nuɖuɖu ma meɖe eƒe kuxiwo katã ɖa o, gake edo ŋusẽe nukutɔe. Kpɔe ɖa le susu me be ame tsitsi ma le azɔli dzi tso ŋkeke yi ŋkeke le gbe dzi, afi si mɔ tatawo mele o, kwasiɖa geɖe va se ɖe esime wòzɔ ɣleti ɖeka kple afã kloe ƒe azɔli!

16 Yehowa doa ŋusẽ esubɔlawo egbea hã, menye to nuɖuɖu si doa ŋusẽ ame nukutɔe dzi o, ke boŋ le mɔ si le vevie wu nu. Enaa gbɔgbɔmenuɖuɖu esubɔlawo. (Mat. 4:4) Nusɔsrɔ̃ tso Mawu ŋu le eƒe Nya la kple agbalẽ nyui siwo wotu ɖe Biblia dzi me doa ŋusẽ  mí le gbɔgbɔ me. Gbɔgbɔmenunyiame mawo maɖe míaƒe kuxiwo katã ɖa ya o, gake woate ŋu akpe ɖe mía ŋu míado dzi le nɔnɔme sesẽ siwo ate ŋu awu tsɔtsɔ na mí hafi la me. Wokplɔa ame yia “agbe mavɔ” me hã.—Yoh. 17:3.

17. Afi kae Eliya yi, eye nu ka tae wònye teƒe vevi aɖe?

17 Eliya zɔ kilometa 320 kloe va se ɖe esime wòɖo Xoreb Toa gbɔ mlɔeba. Enye teƒe vevi aɖe, elabena afi mae Yehowa Mawu to eƒe dɔla aɖe dzi ɖe eɖokui fia Mose le ŋuve si le bibim la me le, eye wòganye afi si Yehowa wɔ Se ƒe nubablaa kple Israel viwo le emegbe. Eliya kpɔ agado aɖe le afi ma hebe ɖe eme.

Ale Si Yehowa Fa Akɔ Na Eƒe Nyagblɔɖilaa Hedo Ŋusẽe

18, 19. (a) Nya kae Yehowa ƒe dɔlaa bia Eliya, eye aleke wòɖo eŋui? (b) Le Eliya ƒe nya nu la, susu etɔ̃ kawo tae nu te ɖe edzi ɖo?

18 Le Xoreb Toa gbɔ la, Yehowa ƒe “gbe,” si anɔ eme be eva na Eliya to mawudɔla aɖe dzi la, bia nya bɔbɔe siae be: “Eliya, nu ka wɔm nèle le afi sia?” Anɔ eme be eƒo nu kple gbe blewu, elabena Eliya se egɔme be ɖe wona mɔnukpɔkpɔ ye be yeaɖe yeƒe dzimenyawo agblɔ. Eye eɖee gblɔ hã vavã! Egblɔ be: “Ðe meʋã ŋu ɖe Yehowa, aʋakɔwo ƒe Mawu la nu, elabena Israel viwo gblẽ wò nubabla ɖi, wogbã wò vɔsamlekpuiwo ƒu anyi, eye wowu wò nyagblɔɖilawo kple yi; ke nye ɖeka koe kpɔtɔ, eye wole nye agbe dim be yewoaɖe ɖa.” (1 Fia. 19:9, 10) Eliya ƒe nyawo na míekpɔ susu etɔ̃ ya teti siwo tae dzi ɖe le eƒo ɖo.

19 Gbã la, Eliya se le eɖokui me be yewɔ dɔ vlo. Togbɔ be Eliya subɔ Yehowa ‘heʋã ŋu ɖe enu’ eye wòdo Mawu ƒe ŋkɔ kɔkɔea kple eƒe tadedeagua ɖe dzi wu nuwo katã hã la, ekpɔe be ɖeko nɔnɔmeawo gavloe ɖe edzi. Dukɔ la gbe Mawu dzi xɔxɔ se kokoko, eye wodze aglã, gake alakpasubɔsubɔ ya le ta kekem. Evelia, Eliya se le eɖokui me be yetsi akogo. Egblɔ be, “nye ɖeka koe kpɔtɔ,” abe ke ɖe eya koe ganye Yehowa subɔla si kpɔtɔ ɖe dukɔa me ene. Etɔ̃lia, vɔvɔ̃ ɖo Eliya. Wowu ehati nyagblɔɖila geɖe xoxo, eye eka ɖe edzi be ye dzie wòɖo. Manya nɔ bɔbɔe na Eliya be wòagblɔ eƒe dzimenya mawo o, gake meɖe mɔ dada alo ŋukpe wɔe be wògbe egbɔgblɔ o. Ale si wòɖe eƒe dzimenyawo gblɔ na Mawu le gbedodoɖa me la nye kpɔɖeŋu nyui aɖe na nuteƒewɔlawo katã.—Ps. 62:9.

20, 21. (a) Ðɔ nu si teƒe Eliya kpɔ esime wònɔ agado aɖe nu le Xoreb Toa dzi. (b) Nu kae Eliya srɔ̃ tso Yehowa ƒe ŋusẽ ɖeɖe fia si teƒe wòkpɔ la me?

20 Nu kae Yehowa wɔ tso Eliya ƒe vɔvɔ̃a kple eƒe dzimaɖeɖia ŋu? Mawudɔlaa gblɔ na Eliya be wòava tsi tsitre ɖe agadoa nu.  Eɖo to, gake menya nu si le ŋgɔ gbɔna o. Kasia, ya ʋuduʋudu aɖe ƒo! Eƒe hoowɔwɔ anya de dzi ŋutɔ, elabena enu sẽ ale gbegbe be towo wo, eye agakpewo tu wɔ. Kpɔe ɖa le susu me be Eliya tsɔ asi tsyɔ mo hele eƒe lãgbalẽwu titri si me ya ʋuduʋudua ɖo la xatsam ɖe eɖokui ŋu. Ema yome la, ele be wòakpɔ nyuie be yeagadze anyi o, elabena anyigba te ʋuʋu sesĩe ŋutɔ le nutoa me! Ema yome teti ko la, dzo gã aɖe bi, si ƒoe ɖe enu be wòtrɔ yi ɖe agadoa me be yeakpɔ ye ɖokui ta tso dzogbɔgbɔ sesẽa nu.—1 Fia. 19:11, 12.

Yehowa to eƒe ŋusẽ triakɔa dzi fa akɔ na Eliya hede dzi ƒo nɛ

21 Le nukunuawo dometɔ ɖe sia ɖe me la, nuŋlɔɖia ɖo ŋku edzi na mí be Yehowa menɔ yaƒoƒoa, anyigbaʋuʋua, alo dzo la me o. Eliya nyae be Yehowa menye mawu siwo ŋu woƒoa nu tsoe le xotutuwo me be wonye dzɔdzɔmeŋusẽwo ƒe mawuwo abe Baal, si Baal subɔlawo kafuna be enye “alilikpowo dola,” alo mawu si naa tsidzadza la ene o. Yehowa gbɔe dzɔdzɔmeŋusẽ triakɔwo tso, ke hã, elolo akpa be wòanɔ nu si eya ŋutɔ wɔ me. Dziƒo gbahoo si míekpɔna la gɔ̃ hã melolo nɛ o! (1 Fia. 8:27) Aleke nukunu siawo teƒe kpɔkpɔ kpe ɖe Eliya ŋui? Ðo ŋku edzi be enɔ vɔvɔ̃m. Esi wònye be Yehowa Mawu ŋutɔ li kplii eye ŋusẽ triakɔ sia gbegbe le esi ta la, mehiã be Eliya navɔ̃ Axab kple Izebel kura o!—Xlẽ Psalmo 118:6.

22. (a) Aleke ‘gbe bɔbɔe si ɖi blewu’ la ka ɖe edzi na Eliya be Mawu dea asixɔxɔ eŋu? (b) Ame ka gbɔe ‘gbe bɔbɔe si ɖi blewu’ la anya tso? (Kpɔ etenuŋɔŋlɔa.)

22 Le dzobibia yome la, ɖoɖoe zi toŋtoŋtoŋ, eye Eliya se “gbe bɔbɔe aɖe ɖi blewu” (NW). Ame si nɔ nua ƒom la gabia nya Eliya ake. Ale wògaƒo nu tso nu siwo ŋu wòtsi dzi ɖo la ŋu zi evelia. * Ðewohĩ esia na eƒe dzi gadze eme wu. Gake ɖikeke mele eme o be ‘gbe bɔbɔe si ɖi blewu’ la ƒe nya si kplɔe ɖo lae fa akɔ na Eliya wu. Yehowa ka ɖe edzi na Eliya be yedea asixɔxɔ eŋu ŋutɔ. Aleke wòwɔe? Mawu ɖe nu geɖe fiae ku ɖe tame si wòɖo be yeaɖe Baal subɔsubɔ ɖa le Israel mlɔeba la ŋu. Edze ƒãa be Eliya  mewɔ dɔ vlo o, elabena Mawu ƒe tameɖoɖoa le eme vam, eye naneke mate ŋu axe mɔ nɛ o. Gawu la, Eliya awɔ akpa aɖe le tameɖoɖo ma me vava me, elabena Yehowa na wòyi eƒe nyagblɔɖidɔa dzi, eye wòna mɔfiame siwo dzi wòazɔ ɖo lae.—1 Fia. 19:12-17.

23. Nu eve kawoe Yehowa wɔ tso Eliya ƒe akogotsitsia ŋu?

23 Ke Eliya ƒe akogotsitsia ya ɖe? Yehowa wɔ nu eve tso eŋu. Gbã la, egblɔ na Eliya be wòasi ami na Elisa be wòava nye nyagblɔɖila si axɔ ɖe eteƒe. Ŋutsu sia si Eliya nye xoxo na la ava nye Eliya ƒe zɔhɛ kple kpeɖeŋutɔ hena ƒe aɖewo. Esia afa akɔ nɛ ŋutɔ! Evelia, Yehowa gblɔ nya dodzidzɔname sia nɛ be: “[Mekpɔtɔ] ame akpe adre ɖi le Israel, ame siwo katã medze klo na Baal o kple ame siwo katã megbugbɔ nu nɛ o.” (1 Fia. 19:18) Menye Eliya ɖeka koe kpɔtɔ o. Esese be nuteƒewɔla akpe adre mawo mede ta agu na Baal o anya de dzi ƒo nɛ ŋutɔ. Wohiã ame abe Eliya ene be wòayi eƒe subɔsubɔ nuteƒewɔwɔtɔea dzi, be wòanye nuteƒewɔwɔ na Yehowa ƒe kpɔɖeŋu ɖedzesi le blukɔ ƒe ɣeyiɣi mawo me. Nya mawo siwo Eliya se to Yehowa ƒe dɔlaa dzi wònye eƒe Mawu ƒe ‘gbe bɔbɔe si ɖi blewu’ la anya wɔ dɔ ɖe edzi ŋutɔ.

Biblia ate ŋu anɔ abe ‘gbe bɔbɔe si ɖi blewu’ la ene na mí egbea ne míeɖea mɔ wòfiaa mɔ mí

24, 25. (a) Mɔ ka nue míate ŋu ase Yehowa ƒe ‘gbe bɔbɔe si ɖi blewu’ la le egbea? (b) Nu ka tae míate ŋu aka ɖe edzi be Eliya ɖe mɔ Yehowa fa akɔ nɛ?

24 Abe Eliya ene la, ɖewohĩ dzɔdzɔmeŋusẽ triakɔ si dzena le nuwɔwɔwo me la awɔ dɔ ɖe mía dzi ŋutɔ, eye esɔ nenema hã. Ŋusẽ si le Wɔlaa si la dzena kɔtɛ le nu siwo wòwɔ me. (Rom. 1:20) Yehowa galɔ̃na faa be yeazã yeƒe ŋusẽ si seɖoƒe meli na o la atsɔ akpe ɖe ye subɔla wɔnuteƒewo ŋu. (2 Kron. 16:9) Ke hã, Mawu ƒoa nu na mí eme kɔna nyuie wu to eƒe Nya, Biblia dzi. (Xlẽ Yesaya 30:21.) Le mɔ aɖe nu la, Biblia ate ŋu anɔ abe ‘gbe bɔbɔe si ɖi blewu’ la ene na mí egbea ne míeɖea mɔ wòfiaa mɔ mí. Yehowa toa agbalẽ xɔasi sia dzi ɖɔa mí ɖo, dea dzi ƒo na mí heɖoa kpe eƒe lɔlɔ̃ dzi na mí.

25 Ðe Eliya na nu siwo katã Yehowa wɔ le Xoreb Toa dzi la fa akɔ nɛa? Ɛ̃! Mehe ɖe megbe o, egayi eƒe nyagblɔɖidɔa dzi dzinɔameƒotɔe, ewɔ nuteƒe, eye wòtsi tsitre ɖe vɔ̃ɖinyenye kple alakpasubɔsubɔ ŋu. Ne míawo hã míena nya siwo tso Mawu gbɔ, siwo nye “akɔfafa si míekpɔna le Ŋɔŋlɔawo me,” de dzi gbɔ na mí la, ekema míate ŋu asrɔ̃ Eliya ƒe xɔse.—Rom. 15:4.

^ mm. 22 Anɔ eme be ame si gbɔ ‘gbe bɔbɔe si ɖi blewu’ la tso la kee nye mawudɔla si wode “Yehowa ƒe gbe” asi na wògblɔ le 1 Fiawo 19:9. Le kpukpui 15 lia me la, ɖeko woyɔ Mawu ƒe ŋkɔ “Yehowa” tɔ ɖe mawudɔla sia ŋu. Ðewohĩ esia ana míaƒe susu nayi mawudɔla si dzi Yehowa to kplɔ Israel viwo le gbea dzi la dzi. Mawu gblɔ tso eŋu be: “Nye ŋkɔ le eya amea me.” (2 Mose 23:21, NW) Míate ŋu agblɔ nya sia kple kakaɖedzi ya o, gake anyo be míade dzesii be do ŋgɔ na Yesu ƒe anyigba dzi vava la, enye “Nya la,” si fia be enye Nyanuɖela tɔxɛ le Yehowa kple esubɔlawo dome.—Yoh. 1:1.