Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Srɔ̃ Woƒe Xɔse

 TA ADRELIA

‘Enɔ Tsitsim Le Yehowa Gbɔ’

‘Enɔ Tsitsim Le Yehowa Gbɔ’

1, 2. Nɔnɔme ka mee Samuel ƒo nu na Israel dukɔa le, eye nu ka tae wòhiã be wòakpe ɖe wo ŋu woatrɔ dzi me?

SAMUEL yɔ Israel dukɔa ƒo ƒu ɖe Gilgal. Ele wo katã ƒe ŋkume kpɔm dũu. Ŋutsu sia nye nyagblɔɖila kple ʋɔnudrɔ̃la si wɔ nuteƒe na Yehowa ƒe geɖe. Dzomeŋɔlie; ƒoawo ƒu ɖe agbleawo dzi keŋ le nutoa me henyo na ŋeŋe. Ne egbeŋkekea mee la, anye May alo June me. Ameha la zi ɖoɖoe toŋtoŋ. Aleke Samuel awɔ be eƒe nyawo nawɔ dɔ ɖe wo dzi?

2 Dukɔa menya ale si nu si biam wole la nye ŋkubiãnyae o. Wobe ɖeko wòle be woaɖo amegbetɔ fiae ɖe yewo nu godoo. Womenya be yewoƒe nuwɔnaa nye bubumademade yewoƒe Mawu, Yehowa, kple eƒe nyagblɔɖilaa ŋu o. Woƒe nuwɔnaa ɖee fia be wole Yehowa gbem be wòaganye yewoƒe Fia azɔ o! Aleke Samuel awɔ akpe ɖe wo ŋu woatrɔ dzi me?

Ne míele ame vɔ̃ɖiwo dome hã la, Samuel ƒe ɖevimeŋutinyaa ate ŋu afia nu geɖe mí tso ale si míaxɔ Yehowa dzi see ŋu

3, 4. (a) Nu ka tae Samuel ƒo nu tso eƒe ɖekakpuime ŋu? (b) Nu ka tae xɔse ƒe kpɔɖeŋu si Samuel ɖo ɖi la ate ŋu aɖe vi na mí egbea?

3 Azɔ Samuel ƒo nu. Egblɔ na ameha la be: “Nye la metsi, meƒo wɔ.” Eƒe ta ƒowɔa hã na wotsɔ eƒe nyawo nya vevii. Eyi edzi be: “Mezɔ mia ŋgɔ tso nye ɖekakpuime va se ɖe egbe.” (1 Sam. 11:14, 15; 12:2) Togbɔ be Samuel zu amegãɖeɖi hã la, meŋlɔ eƒe ɖekakpuime be o. Egaɖoa ŋku ɣeyiɣi mawo dzi nyuie. Nyametsotso siwo wòwɔ ɣemaɣi esime wònɔ tsitsim la kpe ɖe eŋu wòva xɔ eƒe Mawu, Yehowa, dzi se bliboe hetsɔ eɖokui nae keŋkeŋ.

4 Togbɔ be xɔsemanɔsitɔwo kple ame mawɔnuteƒewo domee Samuel nɔ zi geɖe hã la, edo ŋusẽ eƒe xɔse hekpɔ eta. Nenema kee  egbea hã, ehiã be míadze agbagba vevie hafi míaƒe xɔse me nasẽ, elabena ame siwo mexɔ Mawu dzi se o eye wowɔa nu gbegblẽwo la domee míele. (Xlẽ Luka 18:8.) Eya ta na míakpɔe ɖa be nu kae míate ŋu asrɔ̃ tso Samuel gbɔ hã; míadze egɔme tso eƒe ɖevime ke.

‘Enye Ðevi Subɔna Le Yehowa Ŋkume’

5, 6. Nu ka tae Samuel ƒe ɖevime menɔ abe ɖevi bubuwo tɔ ene o, gake nu ka tae edzilawo ka ɖe edzi be woakpɔ edzi nyuie?

5 Samuel ƒe ɖevime menɔ abe ɖevi bubuwo tɔ ene o. Ðewohĩ ƒe etɔ̃ koe wòxɔ esi wòtso no, alo etsi vie wu ema, eye le esia megbe kpuie ko la, ete Yehowa subɔsubɔ le avɔgbadɔ kɔkɔea me le Silo, si anɔ abe kilometa 30 ene tso wo de Rama. Edzilawo, Elkana kple Xana, tsɔe na Yehowa be wòasubɔe le mɔ tɔxɛ aɖe nu; anye Nasiretɔ le eƒe agbemeŋkekewo katã me. * Ðe esia fia be Samuel dzilawo melɔ̃e o, eye womegale edim o taea?

6 Kpao! Wonya be woalé be na yewo via le Silo. Nunɔlagã Eli anya kpɔ egbɔ be wolé be na Samuel, elabena Samuel nɔ eŋu kplikplikpli. Nyɔnu geɖewo hã wɔa avɔgbadɔa ŋu dɔ aɖewo, eye edze ƒãa be ɖoɖo aɖe koŋ li ɖe dɔ siawo ŋu.—2 Mose 38:8; Ʋɔn. 11:34-40.

7, 8. (a) Ƒe sia ƒe la, aleke Samuel dzilawo dea dzi ƒo nɛ lɔlɔ̃tɔe? (b) Nu kae dzila siwo li egbea ate ŋu asrɔ̃ tso Samuel dzilawo gbɔ?

7 Azɔ hã, Xana kple Elkana meŋlɔ woƒe ŋgɔgbevi lɔlɔ̃a, si wodo gbe ɖa bia Mawu wòna wo la, be gbeɖe o. Xana ye do gbe ɖa na Mawu be wòana ŋutsuvi ye, eye wòdo ŋugbe be, ne ena ŋutsuvi ye la, yeatsɔe anae wòasubɔe le eƒe agbe me katã. Ƒe sia ƒe ne Xana yina Samuel kpɔ ge ɖa la, etɔa awudziwui yeye aɖe yina nɛ be wòazã le avɔgbadɔa me. Samuel ɖevi la kpɔa dzidzɔ godoo ne edzilawo va kpɔe ɖa. Ðikeke mele eme o be, ale si edzilawo lɔ̃e, fiaa mɔe hedea dzi ƒo nɛ be mɔnukpɔkpɔ tɔxɛe wònye be woasubɔ Yehowa le teƒe tɔxɛ ma la kpe ɖe eŋu wòwɔ nuteƒe.

8 Dzilawo ate ŋu asrɔ̃ nu geɖe tso Xana kple Elkana gbɔ. Zi geɖe la, dzilawo tsia dzi ɖe wo viwo ƒe ŋutilãmenuhiahiãwo ŋu wu ale si woakpe ɖe wo ŋu woadze si Mawu. Gake Samuel dzilawo ya tsɔ Mawu tɔ ɖo nɔƒe gbãtɔ, eye esiae na wo via tsi va zu ame ɖɔʋu.—Xlẽ Lododowo 22:6.

9, 10. (a) Ðɔ avɔgbadɔa kple ale si Samuel ɖevi la sena le eɖokui me tso eŋu. (Kpɔ etenuŋɔŋlɔa hã.) (b) Dɔ siwo Samuel anya nɔ wɔwɔm la dometɔ aɖewo ɖe, eye aleke nèsusu be sɔhɛ siwo li egbea ate ŋu asrɔ̃ eƒe kpɔɖeŋuae?

9 Ðe nàte ŋu akpɔ ale si Samuel si nɔ tsitsim la anɔ tsa ɖim le togbɛwo  dzi le Silo la le susu mea? Ne ele togbɛ mawo dzi heɖe ŋku ɖe eƒe axadzi kpɔ dua kple balia me ɖaa eye wòkpɔ Yehowa ƒe avɔgbadɔa la, anye dzidzɔ kple dada gã aɖe nɛ. Kɔkɔeƒee avɔgbadɔ ma nye nyateƒe. * Mose ye nɔ ŋgɔ wotui ƒe 400 kloe ye nye ema, eye wònye teƒe vevitɔ si wodea ta agu na Yehowa le le xexea me godoo ɣemaɣi.

10 Esi Samuel nɔ tsitsim la, avɔgbadɔa me nɔnɔ dzɔa dzi nɛ. Eya ŋutɔ va ŋlɔ emegbe be: ‘Samuel subɔna le Yehowa ŋkume, enye ɖevi, eye wòdoa aklala kɔmewu.’ (1 Sam. 2:18) Edze ƒãa be kɔmewu ma nye dzesi be Samuel kpena ɖe nunɔlawo ŋu le avɔgbadɔa me. Togbɔ be menye nunɔlae Samuel nye o hã la, eƒe dɔwo dometɔ aɖewoe nye be wòaʋu kpɔ si me avɔgbadɔa le la ƒe agbowo ŋdi sia ŋdi, eye wòatsɔ dɔ na Eli si nye amegãɖeɖi la. Togbɔ be dɔ siawo wɔwɔ vivia enu ŋutɔ hã la, le ɣeyiɣi aɖe megbe la, nanewo va te ɖe edzi vevie. Nu gbegblẽ gã aɖe nɔ edzi yim le Yehowa ƒe aƒea me.

Elé Eɖokui Dzadzɛ Le Nu Vɔ̃ɖi Wɔlawo Dome

11, 12. (a) Nu ka koŋue kplɔ Xofni kple Pinexas de nu gbegblẽ wɔwɔ me? (b) Nu vɔ̃ɖi kple nu fitifiti kawoe Xofni kple Pinexas nɔa wɔwɔm le avɔgbadɔa me? (Kpɔ etenuŋɔŋlɔa hã.)

11 Samuel ɖevi la kpɔ ame siwo ɖoe koŋ nɔ nu vɔ̃ɖi kple nu fitifiti wɔm la ƒe nuwɔnawo teƒe. Viŋutsu eve nɔ Eli si, woƒe ŋkɔwoe nye Xofni kple Pinexas. Samuel ƒe nuŋlɔɖia gblɔ be: “Eli viŋutsuwo nye ame vlowo, eye wometsɔ ɖeke le Yehowa ƒe nya [me o].” (1 Sam. 2:12) Nya eve siwo wogblɔ tso wo ŋu le kpukpui sia me la de nu wo nɔewo me. Xofni kple Pinexas nye “ame vlowo”—ne woaɖe egɔme tẽe la, efia be wonye “vi siwo ŋu viɖe aɖeke mele o”—elabena womedea bubu aɖeke Yehowa ŋu o. Wometsɔa ɖeke le eƒe dzidzenu kple nudidi dzɔdzɔeawo me o. Esiae kplɔ wo de nu vɔ̃ bubu siwo katã wowɔ la me.

12 Mawu ƒe Se la gblɔ dɔ si wòle be nunɔlawo nawɔ kple ale si woasa vɔwo le avɔgbadɔa me la eme kɔ nyuie. Eye susu vevi aɖe tae! Vɔsa mawo le tsitre ɖi na ɖoɖo siwo Mawu wɔ hena nu vɔ̃wo tsɔtsɔ ke, be amewo nate ŋu anɔ dzadzɛ le ye ŋkume, ale be woadze na yeƒe yayrawo kple  mɔfiamewo. Gake Xofni kple Pinexas ƒe nuwɔnawo wɔe be nunɔla bubuawo hã megadea bubu aɖeke vɔsawo ŋu o. *

13, 14. (a) Nu ka tae nu gbegblẽ siwo nɔ edzi yim le avɔgbadɔa me la agblẽ nu le anukwareɖilawo ŋu godoo? (b) Aleke Eli do kpo nu le dzilanyenye kpakple nunɔlagãnyenye ƒe agbanɔamedzia siaa me?

13 Wò ya kpɔ ale si Samuel ɖevi la ake ŋku ɖi gãa anɔ nu gbegblẽ siawo gbegbe teƒe kpɔm, evɔ womele naneke wɔm tso eŋu o la ɖa le susu me. Bu ame siwo gbegbe wòanya kpɔ—ame dahewo, ame tsɛwo, ame siwo wote ɖe anyi—siwo vaa avɔgbadɔ kɔkɔe ma me kple susu be woafa akɔ na yewo ahado ŋusẽ yewo, evɔ ɖeko wotrɔna dzona kple dzigbagbã, vevesese kple ŋukpee ŋu kpɔ. Eye esi wòsee hã be Xofni kple Pinexas mebua Yehowa ƒe se si ku ɖe gbɔdɔdɔ ŋu o, ke boŋ wodɔa nyɔnu siwo subɔna le avɔgbadɔa me la dometɔ aɖewo gbɔ la, aleke wòse le eɖokui me? (1 Sam. 2:22) Ðewohĩ enɔ mɔ kpɔm be Eli awɔ nane tso eŋu.

Eli viŋutsuawo ƒe nu vlo wɔwɔ anya do nuxaxa na Samuel vevie

14 Eli koŋue nye ame si ate ŋu akpɔ kuxi sia si nɔ gã dom ɖe edzi la gbɔ nyuie. Nunɔlagãe wònye, eya ta eya dzie nu siwo yia edzi le avɔgbadɔa me la ƒe agba le. Eye viawoe nɔ agbe maɖɔʋua nɔm, eya ta agba le edzi be wòaɖɔ viawo ɖo. Ne èbu eŋu kpɔ la, wonɔ nu gblẽm le woawo ŋutɔwo kple dukɔa me tɔ bubu geɖewo ŋu. Ke hã Eli do kpo nu le nunɔlanyenye kple vifofo ƒe agbanɔamedzia siaa tsɔtsɔ me. Ðeko wòtsɔa gbe bɔbɔe ƒoa nu na wo ɖewoɖewoe be nya gbem yele na woe nye ema. (Xlẽ 1 Samuel 2:23-25.) Gake ɖe wòle be wòaka mo na viawo vevie hafi. Wodze ku le nu vɔ̃ siwo wɔm wonɔ ta!

15. Gbedeasi sesẽ kae Yehowa ɖo ɖe Eli, eye aleke Eli ƒe ƒomea wɔ nu ɖe nuxlɔ̃amea ŋui?

15 Nuwo va gblẽ ale gbegbe be Yehowa tsɔ ʋɔnudrɔ̃gbedeasi sesẽ aɖe de “Mawu ƒe ame aɖe,” si nye nyagblɔɖila aɖe si ŋkɔ womeyɔ o la, si ɖo ɖe Eli. Yehowa gblɔ na Eli be: “Èbu viwòwo wum.” Ale Mawu gblɔe ɖi be Eli viŋutsu vɔ̃ɖi eveawo siaa aku le ŋkeke ɖeka dzi, nu geɖe agblẽ le eƒe ƒomea ŋu, eye nunɔlanyenye ƒe ɖoƒe tɔxɛ la age le wo si. Ðe nuxlɔ̃ame sesẽ sia na ƒome ma me tɔwo trɔ dzi mea? Naneke mele nuŋlɔɖia me si ɖee fia be wotrɔ dzi me o.—1 Sam. 2:27–3:1.

16. (a) Nya kawoe nuŋlɔɖia gblɔ tso Samuel ɖevi la ŋu esime wònɔ tsitsim? (b) Ðe nya mawo wɔ dɔ ɖe dziwòa? Nu ka tae?

16 Ðe nu gbegblẽ wɔwɔ siawo gblẽ nu le Samuel ŋua? Ne èle nuŋlɔɖia  xlẽm la, àkpɔe be nya nyuiwo sɔŋ ko wogblɔ tso Samuel ŋu, be enɔ tsitsim nyuie henɔ ŋgɔ yim. Ðo ŋku edzi be wogblɔ le 1 Samuel 2:18 be Samuel wɔ nuteƒe, eye wònye ɖevi si ‘subɔna le Yehowa ŋkume.’ Togbɔ be ɖevi dzaa koe Samuel nye ɣemaɣi hã la, Mawu subɔsubɔe nye nu vevitɔ nɛ le agbe me. Ta ma ke ƒe kpukpui 21 lia gblɔ nya dodzidzɔname sia tso eŋu be: ‘Samuel ɖevi la nɔ tsitsim le Yehowa gbɔ.’ Esi wònɔ tsitsim la, woa kple Fofoa si le dziƒo la dome gava nɔ kplikplikpli wu tsã. Ne ame kple Yehowa dome le kplikplikpli alea ko hafi wòate ŋu aƒo asa na nu gbegblẽ wɔwɔ ɖe sia ɖe ƒomevi.

17, 18. (a) Aleke sɔhɛ Kristotɔwo ate ŋu asrɔ̃ Samuel ƒe kpɔɖeŋua ne ame bubuwo le nu gbegblẽ wɔm? (b) Nu kae ɖee fia be Samuel wɔ tiatia nyuitɔ?

17 Anɔ bɔbɔe be Samuel nasusui be ne nunɔlagã kple viawo tea ŋu wɔa nu vɔ̃ siawo gbegbe la, ekema ye hã yeate ŋu awɔ nu si dze ye ŋu faa. Gake mele be míatsɔ ame bubuwo, siwo dome ame siwo le ŋgɔ xɔm le la, ƒe nu gbegblẽ wɔwɔ ado taflatsɛ gbeɖe be míawo hã míate ŋu awɔ nu vɔ̃ o. Sɔhɛ Kristotɔ geɖe srɔ̃a Samuel ƒe kpɔɖeŋua egbea, eye ‘wole tsitsim le Yehowa gbɔ,’ ne ame siwo dome wole la meɖoa kpɔɖeŋu nyui aɖeke ɖi na wo o hã.

18 Aleke agbenɔnɔ alea ɖe vi na Samuel? Nuŋlɔɖia gblɔ be: “Samuel ɖevi la tsi ɖe dzi, eye eƒe nu nyo Yehowa kple amegbetɔwo ŋu.” (1 Sam. 2:26) Eya ta ame siwo ŋu wòle be Samuel nadze ya teti lɔ̃ eƒe nya gbɔ. Yehowa ŋutɔ bu ɖevi sia ame vevii le esi wòwɔa nuteƒe ta. Eye Samuel ka ɖe edzi be yeƒe Mawua ahe to na ame siwo katã le nu vlo wɔm le Silo la gbe ɖeka, gake ɖewohĩ anɔ eɖokui biam be ɣekaɣie wòle ewɔ ge hã. Wova ɖo nya sia ŋu nɛ le zã aɖe me gbe ɖeka.

 “Ƒo Nu, Wò Dɔla Kè To Ði!”

19, 20. (a) Gblɔ nu si dzɔ ɖe Samuel dzi zã aɖe me le avɔgbadɔa me. (b) Aleke Samuel wɔ nya ame si gbɔ gbedeasia tso, eye aleke Samuel wɔ nu ɖe Eli ŋui?

19 Ŋu le kekem, gake xexea me mekɔ haɖe o; akaɖi gã si wosi ɖe avɔgbadɔa me la gakpɔtɔ le keklẽm. Le fɔŋli ƒe ɖoɖoeziɣi ma me la, Samuel se gbe aɖe wòyɔ eŋkɔ. Esusui be amegãɖeɖi Eli, si ƒe ŋkuwo le tsitsim lae. Samuel fɔ enumake, eye “wòƒu du” yi egbɔ. Kpɔe ɖa le susu me, be ɖevi sia le afɔ ƒuƒlu hele du dzi ɖo ta Eli gbɔ be yeakpɔe ɖa be nu kae yeate ŋu awɔ nɛ hã. Ðe mewɔ dɔ ɖe dziwò ŋutɔ be Samuel dea bubu Eli ŋu heléa be nɛ nyuie alea oa? Togbɔ be Eli wɔ nu vɔ̃ geɖe hã la, egakpɔtɔ nye nunɔlagã si Yehowa ɖo.—1 Sam. 3:2-5.

20 Samuel yi ɖanyɔ Eli gblɔ nɛ be: “Nyee nye si, elabena èyɔm.” Gake Eli gblɔ nɛ be negbugbɔ yi ɖamlɔ anyi, elabena yemeyɔe o. Gake wogayɔe ake zi gbɔ zi eve! Mlɔeba Eli de dzesi nu si tututu nɔ dzɔdzɔm. Ɣemaɣi la, Yehowa meganaa ame aɖeke kpɔa ŋutega alo gblɔa nya ɖi na eƒe dukɔa abe tsã ene o, eye woawo ŋutɔwo hã nya nu si tae. Gake Eli de dzesii be Yehowa gadi be yeagblɔ nya aɖe, eye fifia, edi be yeaƒo nu to ɖevi sia dzi! Eli gblɔ na Samuel be negbugbɔ yi ɖamlɔ anyi, eye wòfiae mɔ nyuitɔ si wòatɔ ne wogayɔe ake. Eya ta Samuel trɔ yi ɖamlɔ anyi. Eteƒe medidi o, egase gbea gayɔe ake be: “Samuel! Samuel!” Ðevi la ɖo eŋu be: “Ƒo nu, wò dɔla kè to ɖi!”—1 Sam. 3:1, 5-10.

21. Aleke míate ŋu ase Yehowa ƒe gbe egbeae, eye nu ka tae esia wɔwɔ aɖe vi na mí?

21 Azɔ ko Yehowa gakpɔ esubɔla aɖe le Silo si wòate ŋu aƒo nu na wòasee. Nenemae Samuel ɖo to Yehowa le eƒe agbe me katã. Ðe wò hã èɖoa to Yehowa nenema? Mele be míanɔ mɔ kpɔm be míase gbe aɖe tso dziƒo wòaƒo nu na mí le zã me hafi míaɖo to o. Le mɔ aɖe nu la, mɔnukpɔkpɔa le ʋuʋu ɖi na mí ɣesiaɣi be Mawu naƒo nu na mí egbea. Eƒe Nya Biblia si de blibo la dzie wòtona. Zi ale si míeɖoa to Mawu hewɔa eƒe gbe dzi la, zi nenemae míaƒe xɔse hã asẽe. Aleae wònɔ le Samuel gome.

Togbɔ be Samuel vɔ̃ hã la, egblɔ Yehowa ƒe ʋɔnudrɔ̃gbedeasia na Eli

22, 23. (a) Aleke gbedeasi si Samuel nɔ vɔvɔ̃m gbã be yeagblɔ la va emee? (b) Aleke Samuel ƒe ŋkɔ ganyɔ le esia megbe?

22 Zã vevi aɖee zã ma nye le Samuel ƒe agbe me, elabena tso ɣemaɣi, le Silo, ye wòva te sidzedze Yehowa Mawu etɔxɛe heva zu eƒe nyagblɔɖila kple nyanuɖela. Gbã la, ɖevi la vɔ̃ be yeagblɔ Yehowa ƒe gbedeasia na Eli, elabena ʋɔnudrɔ̃gbedeasi wònye na eƒe ƒomea be nya si wogblɔ ɖi ɖe ƒome ma ŋu la le eme va ge kpuie. Gake Samuel lé dzi ɖe ƒo hegblɔe na Eli, eye Eli lɔ̃ ɖe edzi be Mawu nedrɔ̃ ʋɔnu ale si dze eŋu. Eteƒe medidi o, nya siwo katã Yehowa gblɔ la va  eme: Israel viwo kpe aʋa kple Filistitɔwo, wowu Xofni kple Pinexas siaa le ŋkeke ɖeka dzi, eye Eli ŋutɔ hã ku esi wòse be woxɔ Yehowa ƒe Nubablaɖaka kɔkɔe la.—1 Sam. 3:10-18; 4:1-18.

23 Gake ɖeko nyagblɔɖila wɔnuteƒe Samuel ƒe ŋkɔ ganyɔ ɖe edzi wu. Nuŋlɔɖia gblɔ tso eŋu be: “Yehowa nɔ kplii,” eye be Yehowa mena Samuel ƒe nyagblɔɖiwo dometɔ aɖeke do kpo emevava o.—Xlẽ 1 Samuel 3:19.

“Samuel Yɔ Yehowa”

24. Nyametsotso kae Israel viwo va wɔ emegbe, eye nu ka tae woƒe nu vɔ̃a nye ŋkubiãnya?

24 Ðe Israel viwo srɔ̃ Samuel ƒe kpɔɖeŋua ale be wova te ɖe Yehowa ŋu kplikplikpli hewɔ nuteƒe nɛa? Kpao. Mlɔeba la, wova tso nya me be yewomedi be nyagblɔɖila dzro nanye ʋɔnudrɔ̃la le yewo nu o. Wodi be yewoanɔ abe dukɔ bubuwo ene, eye woaɖo fia, si nye amegbetɔ, ɖe yewo nu. Yehowa gblɔ na Samuel be wòawɔ woƒe didia dzi na wo. Gake ele be wòana Israel viawo nakpɔ ale si gbegbe woƒe nu vɔ̃a loloe. Menye amegbetɔ dzro aɖe gbemee wole o, ke boŋ Yehowa ŋutɔ gbem wole! Eya ta eyɔ dukɔa ƒo ƒu ɖe Gilgal.

Samuel do gbe ɖa le xɔse me, eye Yehowa ɖo eŋu nɛ esi wòna tsi gã aɖe dza

25, 26. Esi amegãɖeɖi Samuel ƒo Israel viwo nu ƒu ɖe Gilgal la, aleke wòkpe ɖe wo ŋu wode dzesi ale si gbegbe woƒe nu vɔ̃ si wowɔ ɖe Yehowa ŋu la loloe?

25 Na míatrɔ ɖe eŋu azɔ ne míase nya si wògblɔ na Israel le Gilgal gbe ma gbe, le ɣeyiɣi sesẽ ma me ɖa. Samuel si zu amegãɖeɖi ɣemaɣi la ɖo ŋku edzi na Israel viwo le afi ma be yewɔ nuteƒe tso yeƒe ɖevime ke. Eyome nuŋlɔɖia gblɔ be: “Samuel yɔ Yehowa.” Ebia Yehowa be wòana dzi naɖe gbe, eye tsi gã aɖe nadza.—1 Sam. 12:17, 18.

26 Be tsi nadza? Le dzomeŋɔlia? Ðe ame aɖe se nya sia kpɔa? Ne ameawo dometɔ aɖe ke ɖi alo ɖu fewu hã la, eƒe nu aku kpuie. Kasia tsi ɖo, eye xexea me tsyɔ. Tete ya de asi ƒoƒo me, eye wònyama nukuwo le agbleawo dzi keŋ. Dzi de asi gbeɖeɖe me sesĩe. Tete tsi kɔ ɖi yoo. Aleke dukɔa wɔ nui? “Dukɔ blibo la vɔ̃ Yehowa kple Samuel ŋutɔ.” Ɛ̃, wode dzesi ale si gbegbe woƒe nu vɔ̃a loloe la mlɔeba.—1 Sam. 12:18, 19.

27. Nu kae Yehowa wɔna na ame siwo srɔ̃a Samuel ƒe xɔse egbea?

27 Gake menye Samuel ye ɖo dukɔ dzeaglã sia ƒe dzi gbɔ o, ke boŋ eƒe Mawu Yehowa ye. Samuel xɔ eƒe Mawu la dzi se tso eƒe ɖevime ke va de asi na eƒe amegãkuɣi. Eye Yehowa ɖo eteƒe nɛ. Yehowa metrɔ o. Egakpena ɖe ame siwo srɔ̃a Samuel ƒe xɔse egbea la hã ŋu.

^ mm. 5 Ame siwo nye Nasiretɔwo la ɖe adzɔgbe, eye esia bia hã be womano aha muame o, womalũ woƒe taɖa hã o. Wo dometɔ akpa gãtɔ ɖe adzɔgbe sia ɣeyiɣi aɖe ko, gake ame ʋɛ aɖewo, abe Simson, Samuel kple Yohanes Amenyrɔɖetsimela ene, nye Nasiretɔwo le woƒe agbe me katã.

^ mm. 9 Atie wotsɔ tu kɔkɔeƒe sia, eye wònye avɔgbadɔ si le dzogoe ene me. Gake nu adodoewoe wotsɔ tui: nyogbalẽwo, avɔ dzeani siwo me wolɔ̃ nu ɖo, kple ati xɔasi siwo ŋu wofa klosalo kple sika ɖo. Wotɔ kpɔ si hã le dzogoe ene me ƒo xlã kɔkɔeƒe sia, eye vɔsamlekpui gã aɖe si dzi wosaa vɔ le hã le eme. Edze ƒãa be emegbe la, wova tu xɔ aɖewo ɖe avɔgbadɔa ƒe axawo dzi na nunɔlawo. Edze abe xɔ siawo dometɔ ɖeka mee Samuel mlɔna ene.

^ mm. 12 Nuŋlɔɖia gblɔ nu eve siwo me womede bubu Yehowa ŋu le o. Gbãtɔe nye be, Sea gblɔ vɔsalãa ƒe akpa si nye nunɔlawo tɔ be woaɖu. (5 Mose 18:3) Gake nunɔla vɔ̃ɖi siawo va wɔ ɖoɖo bubu kura le avɔgbadɔa me. Wonana woƒe subɔviwo tsɔa gaflo gã aɖe ƒona ɖe ze si me lãa le fiefiem le la me, eye wotsɔa lãkɔ ɖe sia ɖe si gafloa he do goe la na wo ɖokui! Eveliae nye be, ne amewo tsɔ woƒe vɔsalãwo va be woame le vɔsamlekpuia dzi la, nunɔla vɔ̃ɖiawo nana woƒe subɔviwo doa ŋɔdzi na ame si tsɔ vɔsaa vɛ, eye wobiana gɔ̃ hã be yewoaxɔ lã mumua hafi woatsɔ lã la ƒe amiwo asa vɔe na Yehowa.—3 Mose 3:3-5; 1 Sam. 2:13-17.