Dzo kpo yi emenuwo dzi

Dzo kpo yi emenuawo dzi

Ŋgɔdonya

Ŋgɔdonya

‘Mizu ame siwo to xɔse kple dzigbɔɖi me nyi ŋugbedodowo dome la srɔ̃lawo.’—HEBRITƆWO 6:12.

1, 2. Nu kae dzikpɔla mɔzɔla aɖe ƒe nuƒoƒo ɖe fia le ale si wòbua nuteƒewɔla siwo ŋu woƒo nu tsoe le Biblia me ŋu, eye nu ka tae wòadzɔ dzi na mí ŋutɔ be ame mawo nava nye mía xɔlɔ̃wo?

ESI nɔvinyɔnu aɖe se nuƒo aɖe si dzikpɔla mɔzɔla tsitsi aɖe ƒo vɔ la, egblɔ be: “Eƒoa nu tso ame siwo ƒe ŋutinya le Biblia me la ŋu abe ɖe wonye exɔlɔ̃ siwo wònya xoxoxo ene.” Ele eme nenema hã, elabena ƒe gbogbo aɖewoe nye esia nɔviŋutsua srɔ̃a Mawu ƒe Nya la hetsɔnɛ fiaa nu amewo, si wɔe be ŋutsu kple nyɔnu xɔsetɔ siwo ƒe ŋutinya le Biblia me la va le nɛ abe exɔlɔ̃ siwo wònya tso eƒe ɖevime ke ene.

2 Ðe madzɔ dzi na mí ŋutɔ be ame siwo ŋu Biblia ƒo nu tsoe la dometɔ geɖewo nanye mía xɔlɔ̃wo oa? Ðe wole abe xɔlɔ̃wo ene na wòa? Kpɔ ale si wòanɔ ɖa le susu ne èle zɔzɔm hele dze ɖom kple amewo abe Noa, Abraham, Rut, Eliya kple Ester ene be nàdze si wo nyuie. Bu ŋusẽ nyui si woakpɔ ɖe wò agbe dzi ŋu kpɔ—woaɖo aɖaŋu nyuiwo na wò, eye woade dzi ƒo na wò hã!—Xlẽ Lododowo 13:20.

3. (a) Aleke nusɔsrɔ̃ tso ŋutsu kple nyɔnu xɔsetɔ siwo ŋu Biblia ƒo nu tsoe ŋu ate ŋu aɖe vi na mí? (b) Nyabiase kawo mee míadzro?

3 Le nyateƒe me la, anya wɔ be míade ha kpli wo le ‘ame dzɔdzɔewo ƒe tsitretsitsi la me’ wòaɖe vi na mí. (Dɔw. 24:15) Gake fifia gɔ̃ hã la, nusɔsrɔ̃ tso ŋutsu kple nyɔnu xɔsetɔ siwo ŋu woƒo nu tsoe le Biblia me ŋu ate ŋu aɖe vi na mí. Le mɔ ka nu? Apostolo Paulo na ŋuɖoɖo nyui sia be: ‘Mizu ame siwo to xɔse kple dzigbɔɖi me nyi ŋugbedodowo dome la srɔ̃lawo.’ (Heb. 6:12) Esi míele nu srɔ̃m tso ŋutsu kple nyɔnu xɔsetɔ siawo ŋu la, na míadzro nyabiase ʋɛ aɖewo siwo Paulo ƒe nyaa fɔ ɖe te la me, siwo nye: Nu ka koŋue nye xɔse, eye nu ka tae míehiã nɛ ɖo? Aleke míate ŋu asrɔ̃ nuteƒewɔla siwo nɔ anyi le blema?

Nu Si Xɔse Nye Kple Nu Si Tae Míehiã Nɛ Ðo

4. Aleke ame geɖe sea xɔse gɔmee, eye nu ka tae woda ƒu ɖo?

4 Xɔse nye nɔnɔme nyui aɖe si dzea ame ŋu, enye nɔnɔme si ŋu asixɔxɔ gã aɖe nɔ na ŋutsu kple nyɔnu siwo katã ŋu míele nu srɔ̃ ge tsoe le agbalẽ sia me. Egbea la, ame geɖe menya nu si tututu xɔse nye o, eye wosusuna be efia be woaxɔ nane dzi ase nenye be kpeɖodzi gobii aɖeke mele eŋu o gɔ̃ hã. Ke hã woda ƒu. Xɔse menye nu sia nu dzi xɔxɔ se ko o; menye seselelãme dzro aɖe koe wònye o; ede ŋgɔ wu lɔlɔ̃ ɖe nya aɖe dzi be ele eme ko. Afɔku le nya sia nya dzi xɔxɔ se me. Seselelãme ya vana gadzona, eye le Mawu dzi xɔxɔ se gome gɔ̃ hã  la, kaka ɖe edzi be eli ɖeɖe mesɔ gbɔ o, elabena “gbɔgbɔ vɔ̃wo hã xɔe se, eye wodzona nyanyanya.”—Yak. 2:19.

5, 6. (a) Nu vevi eve siwo míate ŋu akpɔ kple ŋku o kawo ŋue míaƒe xɔse kuna ɖo? (b) Aleke gbegbee wòle be míaƒe xɔse nasẽ? Wɔ eƒe kpɔɖeŋu.

5 Xɔse de ŋgɔ wu nya sia nya dzi xɔxɔ se alo kaka ɖe nya aɖe dzi ko. Ðo ŋku ale si Biblia ɖe emee la dzi. (Xlẽ Hebritɔwo 11:1.) Paulo gblɔ be nu vevi eve aɖewo siwo míate ŋu akpɔ kple ŋku o la ŋue xɔse kuna ɖo. Gbã la, ekuna ɖe nu ŋutɔŋutɔ siwo li fifia, siwo ‘womekpɔna o la’ ŋu. Míate ŋu akpɔ nu ŋutɔŋutɔ siwo le dziƒo, abe Yehowa Mawu, Via, alo Fiaɖuƒe si le dzi ɖum le dziƒo fifia la kple ŋku o. Evelia, xɔse kuna ɖe “nu siwo wole mɔ kpɔm na,” si fia nu siwo meva eme haɖe o, la ŋu. Míate ŋu akpɔ xexe yeye si Mawu Fiaɖuƒea ahe vɛ kpuie la kple ŋku o. Ekema ɖe esia fia be kpeɖodzi aɖeke mele nu ŋutɔŋutɔ siwo dzi míexɔ se kple nu siwo míele mɔ kpɔm na la ŋu oa?

6 Menye nenemae kura o! Paulo ɖe eme be kpeɖodzi sẽŋu dzie wotua xɔse akuakua ɖo. Esi wògblɔ be xɔse nye ‘nu si wole mɔ kpɔm na kakaɖedzitɔe’ la, ezã nya aɖe si agate ŋu afia “nutɔnyenyegbalẽ.” Tsɔe be ame aɖe ɖoe be yeatsɔ aƒe aɖe ana wò. Ate ŋu atsɔ aƒea ƒe nutɔnyenyegbalẽ ana wò agblɔ be, “Wò aƒe yeyeae nye esi.” Le nyateƒe me la, menye ɖe wòle gbɔgblɔm be pepa mae nye wò aƒea o; nya si gblɔm wòlee nye be ŋusẽ le agbalẽ ma ŋu le se nu ale gbegbe be ne ele asiwò la, enye kpeɖodzi be aƒea nye tɔwò. Le gɔmesese ma ke nu la, kakaɖedzi le kpeɖodzi siwo dzi míetu míaƒe xɔsea ɖo la ŋu ale gbegbe be woate ŋu atsɔe asɔ kple xɔse la ŋutɔ.

7. Nu kae xɔse vavã bia?

7 Eya ta xɔse vavã bia be woanɔ te ɖe nu si ŋu kpeɖodzi sẽŋu le dzi aka ɖe nu siwo katã ku ɖe Yehowa Mawu ŋu la dzi. Xɔse kpena ɖe mía ŋu míebua Yehowa be enye mía Fofo si lɔ̃ mí, eye míekana ɖe edzi be eƒe ŋugbedodowo katã ava eme godoo. Gake xɔse vavã bia nu geɖe wu ema. Abe nu gbagbe ene la, ele be woanɔ xɔse la nyim be wòanye xɔse gbagbe. Ele be woaɖee afia to dɔwɔwɔ me, ne menye nenema o la, aku.—Yak. 2:26.

8. Nu ka tae xɔse le vevie nenema gbegbe ɖo?

8 Nu ka tae xɔse le vevie nenema gbegbe ɖo? Paulo na nya sia ƒe ŋuɖoɖo nyui aɖe mí. (Xlẽ Hebritɔwo 11:6.) Míate ŋu ate ɖe Yehowa ŋu alo adze eŋu o, negbe ɖe xɔse le mía si hafi. Eya ta xɔse le vevie hafi míate ŋu aɖo taɖodzinu nyuitɔ kekeake si gbɔ wòle be nuwɔwɔ nyanu ɖe sia ɖe naɖo la gbɔ: eyae nye be míate ɖe mía Fofo, Yehowa, si le dziƒo la ŋu ahakafui.

9. Aleke Yehowa ɖee fia be yenya be ehiã be xɔse nanɔ mía si?

9 Yehowa nya ale si gbegbe wòhiã be xɔse nanɔ mía si, eya ta ena xɔse ƒe kpɔɖeŋu siwo akpe ɖe mía ŋu míatu xɔse ɖo ahaɖee afia la  mí. Eyra Kristo hamea kple ŋutsu nuteƒewɔla siwo le ŋgɔ xɔm be woanye kpɔɖeŋu na mí. Eƒe Nya la gblɔ be: “Misrɔ̃ woƒe xɔse.” (Heb. 13:7) Eye egana xɔse ƒe kpɔɖeŋu bubuwo hã mí. Paulo ŋlɔ nu tso “ɖasefowo ƒe alilikpo gã,” siwo nye ŋutsu kple nyɔnu siwo nɔ anyi le blema, siwo ɖo xɔse ƒe kpɔɖeŋu nyuiwo ɖi na mí la ŋu. (Heb. 12:1) Menye ame siwo ƒe ŋkɔwo Paulo yɔ le Hebritɔwo ta 11 la koe nye xɔsetɔ siwo nɔ anyi le blema o. Ŋutsuwo kple nyɔnuwo, ɖeviwo kple tsitsiawo siaa, siwo to nɔnɔme vovovowo me eye wozɔ le xɔse me la ƒe agbemeŋutinyawo sɔ gbɔ ɖe Biblia me, eye míate ŋu asrɔ̃ nu geɖe tso wo gbɔ le xɔsemanɔamesi ƒe xexe sia me.

Aleke Míate Ŋu Asrɔ̃ Ame Bubuwo Ƒe Xɔse?

10. Aleke míaƒe ɖokuisinusɔsrɔ̃ ate ŋu akpe ɖe mía ŋu míasrɔ̃ ŋutsu kple nyɔnu wɔnuteƒe siwo ƒe ŋutinyawo le Biblia me?

10 Ne mèlé ŋku ɖe ame aɖe ŋu nyuie o la, màte ŋu asrɔ̃e o. Esi nèle agbalẽ sia xlẽm la, àde dzesii be wowɔ numekuku geɖe tso ŋutsu kple nyɔnu xɔsetɔ siawo ŋu be wòakpe ɖe ŋuwò nànya wo nyuie wu. Ðe manyo be wò ŋutɔ hã nàwɔ numekuku bubuwo akpee le ɖokuiwò si oa? Ne èle ɖokuisinusɔsrɔ̃ wɔm la, zã numekugbalẽ kple dɔwɔnu bubu siwo le asiwò nàtsɔ adzro Biblia me nyuie. Ne èle ŋugble dem le nu si srɔ̃m nèle ŋu la, dze agbagba nàkpɔ afi si nuawo dzɔ le kpakple nɔnɔme si me Biblia ŋutinyaawo dzɔ le la le susu me. Tsɔe be èle afi ma le nudzɔdzɔawo teƒe kpɔm, le nyawo sem hele nuwo ƒe ʋeʋẽ sem. Gawu la, dze agbagba nàde dzesi ale si ame siwo ŋu ŋutinyaa ku ɖo la nɔ sesem le wo ɖokuiwo me. Ne ètsɔe be wòe le nɔnɔme si me ŋutsu kple nyɔnu wɔnuteƒe mawo to me la, àva nya wo ɖe edzi nyuie wu, eye wo dometɔ aɖewo ava nɔ na wò abe xɔlɔ̃ vevi siwo nènya xoxoxo ene gɔ̃ hã.

11, 12. (a) Aleke nàwɔ be Abram kple Sarai nava nɔ abe xɔlɔ̃wo ene na wò? (b) Aleke Xana, Eliya, alo Samuel ƒe kpɔɖeŋu ate ŋu aɖe vi na wò?

11 Ne èva nya wo nyuie la, àdi be yeasrɔ̃ woƒe kpɔɖeŋu. Le kpɔɖeŋu me, tsɔe be èle ŋugble dem le dɔdeasi yeye aɖe xɔxɔ ŋu. Yehowa ƒe habɔbɔa bia tso asiwò be nàkeke wò subɔsubɔdɔa ɖe enu le mɔ aɖe nu. Ðewohĩ wobia tso asiwò be nàʋu ayi nuto aɖe si me wohiã gbeƒãɖela geɖe wu le vevie la me, alo be nàkpɔ gome le gbeƒãɖeɖedɔa ƒe akpa aɖe si mema wò o alo si sesẽna na wò la me. Ne èle ŋugble dem le dɔdeasia ŋu hele gbe dom ɖa le eŋu la, ɖe Abram ƒe kpɔɖeŋua ŋu bubu aɖe vi na wòa? Woa kple Sarai wolɔ̃ faa ɖe asi le dzidzemegbe si wonɔ le Ur la ŋu eye Mawu yra wo geɖe. Ðikeke mele eme o be, ne èle woƒe afɔɖoƒewo tom la, àse le ɖokuiwò me be yeva se woƒe nɔnɔmea gɔme nyuie fifia wu tsã.

12 Ke ne ame aɖe si nènya nyuie la wɔ nu wòte ɖe dziwò vevie eye dzi ɖe le ƒowò ale  gbegbe be edzro wò be yeadzudzɔ kpekpeawo dede gɔ̃ hã ɖe? Ne ède ŋugble le Xana ƒe kpɔɖeŋua ŋu eye nèva de dzesi ale si wòwɔ ɖu Penina ƒe nuxaxadonamea dzi la, akpe ɖe ŋuwò nàwɔ nyametsotso nyuitɔ, eye ɖewohĩ esia ana nàva se Xana ƒe nɔnɔmea gɔme nyuie wu, eye eƒe nu anyo ŋuwò abe xɔlɔ̃ vevi aɖe ene. Eye ne dzi ɖe le ƒowò eye nèse le ɖokuiwò be yemele ɖeke me o la, nusɔsrɔ̃ tso nɔnɔme sesẽ si me Eliya to kple ale si Yehowa fa akɔ nɛ ŋu ate ŋu ana eƒe nu nado dzidzɔ na wò. Eye ne sɔhɛ siwo nu woƒe sukuhatiwo ƒoa nya ɖo be woanɔ agbe gbegblẽ la srɔ̃ nu tso ale si Samuel meɖe mɔ Eli viŋutsuwo ƒe nu gbegblẽ siwo wowɔna le avɔgbadɔa me kpɔ ŋusẽ ɖe edzi o ŋu la, Samuel ƒe nu ate ŋu ava lé dzi na wo.

13. Ðe xɔsetɔ siwo ŋu Biblia ƒo nu tsoe la sɔsrɔ̃ fia be asixɔxɔ boo aɖeke mele wò xɔse ŋu le Yehowa gbɔ oa? Ðe eme.

13 Ðe xɔsetɔ siwo ŋu Biblia ƒo nu tsoe la sɔsrɔ̃ fia be asixɔxɔ boo aɖeke mele wò xɔse ŋu le Yehowa gbɔ oa? Menye nenemae kura o! Ðo ŋku edzi be Yehowa ƒe Nya la de dzi ƒo na mí be míasrɔ̃ xɔsetɔwo ƒe kpɔɖeŋu. (1 Kor. 4:16; 11:1; 2 Tes. 3:7, 9) Gawu la, ame siwo ŋu míasrɔ̃ tsoe le agbalẽ sia me la dometɔ aɖewo hã srɔ̃ nu tso xɔsetɔ siwo nɔ anyi do ŋgɔ na wo la gbɔ. Le kpɔɖeŋu me, le agbalẽ sia ƒe Ta 17 lia me la, míede dzesii le Maria ƒe nyawo me be eyɔ nya tso Xana ƒe nyawo me, si ɖee fia kɔtɛ be esrɔ̃ Xana ƒe kpɔɖeŋu. Ðe ema fia be Maria ƒe xɔse menye akuakua oa? Kura o! Ke boŋ Xana ƒe kpɔɖeŋua kpe ɖe Maria ŋu be eya ŋutɔ te ŋu wɔ ŋkɔ nyui na eɖokui le Yehowa Mawu gbɔ.

14, 15. Nu siwo ɖe dzesi le agbalẽ sia ŋu la dometɔ aɖewo ɖe, eye aleke míate nu awɔ eŋu dɔ nyuie?

14 Wotrɔ asi le agbalẽ sia ŋu be wòakpe ɖe ŋuwò nàdo ŋusẽ wò xɔse. Ta vovovo siwo le eme la nye “Srɔ̃ Woƒe Xɔse” ƒe nyati siwo dze le Gbetakpɔxɔ me tso ƒe 2008 va de asi na ƒe 2013. Ke hã míetsɔ nu yeye aɖewo hã kpe ɖe eŋu. Biabiawo le eme be woakpe ɖe mía ŋu míadzro eme ahanya ale si míawɔ nufiameawo ŋu dɔe. Míede nɔnɔmetata dzeani yeye geɖewo agbalẽ sia me, eye míetrɔ asi le esiwo li xoxo la ŋu wololo heganya kpɔ wu tsã. Nu nyui bubu siwo le emee nye ɣeyiɣikɔntabubu ƒe fli kple anyigbatatawo. Wotrɔ asi le Srɔ̃ Woƒe Xɔse gbalẽa ŋu be míazãe le ɖokuisinusɔsrɔ̃, ƒomenusɔsrɔ̃ kple hame ƒe nusɔsrɔ̃ me. Ado dzidzɔ na ƒome geɖewo hã be yewoaxlẽ ŋutinyaawo ɖekae.

15 Neva eme be agbalẽ sia nakpe ɖe ŋuwò nàsrɔ̃ Yehowa subɔla wɔnuteƒe siwo nɔ anyi le blema la ƒe xɔse. Eye neva eme be wòakpe ɖe ŋuwò nàtsi le xɔse me eye nàyi edzi anɔ tetem ɖe Yehowa, Fofowò si le dziƒo la, ŋu geɖe wu!