Dzo kpo yi emenuwo dzi

Dzo kpo yi emenuawo dzi

 TA GBÃTƆ

“Togbɔ Be Eku Hã La, Egale Nu Ƒom”

“Togbɔ Be Eku Hã La, Egale Nu Ƒom”

1. Nu kae xe mɔ na Adam kple Xawa ƒe ƒomea be woagage ɖe Eden bɔa me o, eye nu kae nɔ vevie na Habel wu nu sia nu?

HABEL lé ŋku ɖe eƒe alẽ siwo le gbe ɖum bɔkɔɔ le togbɛa dzi la ŋu. Ðewohĩ esia yome, eɖe ŋku ɖa le alẽawo ŋu hefɔ mo dzi kpɔ adzɔge ʋĩi ke eye wòkpɔ kekeli aɖe ƒe keklẽ. Enyae be yi si nɔa eɖokui trom ɖaa, eye wòklẽna abe dzo ƒe aɖe ene, la le Eden bɔa ƒe mɔnu. Edzilawo nɔ abɔ ma me kpɔ, gake fifia ya, woawo loo alo wo viwo magate ŋu age ɖe eme o. Kpɔe ɖaa le susu me ko be, le anyinufaɣi esime ya fafɛ la na Habel ƒe taɖa le ya ƒom la, ewu mo dzi le ŋugble dem le Ewɔlaa ŋu. Ðe Mawu kple amegbetɔwo dome ava nɔ nyuie gbe aɖe gbea? Naneke meganɔ vevie na Habel wu ema o.

2-4. Gɔmesese ka nue Habel le nu ƒom le na mí egbea?

2 Le mɔ aɖe nu la, Habel le nu ƒom na wò egbea. Ðe nàte ŋu ase eƒe gbea? Ðewohĩ àgblɔ be esia manya wɔ o, elabena Adam ƒe vi evelia sia ku gbe aɖe gbe ke. Eƒe kukua nyunyɔ xoxoxo hezu anyi ƒe 6,000 kloe ye nye esia. Biblia gblɔ be: “Kukuawo menya naneke o.” (Nyagb. 9:5, 10) Eye womeŋlɔ Habel ƒe numenya aɖeke hã ɖe Biblia me o. Ekema aleke wòate ŋu aƒo nu na mí egbeae?

3 Mawu ƒe gbɔgbɔ ʋã apostolo Paulo wògblɔ tso Habel ŋu be: “To esia dzi la, togbɔ be eku hã la, egale nu ƒom.” (Xlẽ Hebritɔwo 11:4.) To nu ka dzie Habel gale nu ƒom? Eyae nye xɔse. Habel ye nye ame gbãtɔ si tu nɔnɔme nyui sia ɖo. Xɔse si wòɖe fia la ɖe dzesi ale gbegbe be egakpɔtɔ nye kpɔɖeŋu nyui na mí egbea be míasrɔ̃. Ne míesrɔ̃ Habel ƒe xɔse hetoa eƒe afɔɖoƒewo la, ekema eƒe ŋutinyaa le nu ƒom na mí hele vi ɖem na mí vavã.

4 Ke esi wònye nya ʋɛ aɖewo koe wogblɔ tso Habel ŋu le Biblia me ɖe, nu kae míate ŋu asrɔ̃ tso eyama kple eƒe xɔse ŋu? Na míakpɔe ɖa.

Enɔ Anyi Le “Xexea Ƒe Gɔmeɖoanyiɣi”

5. Nya si Yesu gblɔ ku ɖe Habel ƒe anyinɔnɔ le “xexea ƒe gɔmeɖoanyiɣi” ŋu la gɔme ɖe? (Kpɔ etenuŋɔŋlɔa hã.)

5 Ɣeyiɣi kpui aɖe le amegbetɔwo wɔɣi megbee wodzi Habel.  Emegbe Yesu he susu yi Habel dzi esi wònɔ nu ƒom tso “xexea ƒe gɔmeɖoanyiɣi” ŋu. (Xlẽ Luka 11:50, 51.) Esi Yesu gblɔ nya sia la, edze ƒãa be ameƒomea me tɔ siwo mɔkpɔkpɔ li be woaɖe wo tso nu vɔ̃ me lae wòwɔnɛ. Togbɔ be Habel ye nye ame enelia tso Adam dzi hã la, edze abe eyae nye ame gbãtɔ si Mawu kpɔ be edze na ɖeɖekpɔkpɔ ene. * Eme kɔ ƒãa be menye kpɔɖeŋu nyui ɖolawo domee Habel nɔ tsi o.

6. Dzila ka ƒomeviwoe Habel dzilawo nye?

6 Togbɔ be ameƒomea dzɔɣi teƒe medidi ɣemaɣi o hã la, wonɔ nɔnɔme wɔnublanui aɖe me. Anɔ eme be Adam kple Xawa, siwo nye Habel dzilawo la ƒe dzedzeme nyo eye ŋusẽ nɔ wo ŋu. Gake woda vo gã aɖe, eye esia nɔ nyanya na wo. Tsã la, wode blibo, eye agbe tegbee nɔnɔ ƒe mɔkpɔkpɔ nɔ wo si. Ke wova dze aglã ɖe Yehowa Mawu ŋu, si wɔe be wònya wo le Eden bɔa, si nye woƒe Paradisoƒe la me. Esi kɔɖiɖi na woƒe dzodzrowo nɔ vevie na wo wu nu sia nu, eye wònɔ vevie na wo wu woƒe dzidzimeviwo ƒe nyonyo gɔ̃ hã ta la, blibodede kple agbe tegbee nɔnɔ ƒe mɔkpɔkpɔa ge le wo si.—1 Mose 2:15–3:24.

7, 8. Nya kae Xawa gblɔ esi wòdzi Kain, eye nu kae anya nɔ susu me nɛ?

7 Agbea menɔ bɔbɔe na Adam kple Xawa le abɔa godo o. Ke hã esi wodzi wo vi gbãtɔ si wotsɔ ŋkɔ na be Kain, si gɔmee nye “Ame Si Wodzi” la, Xawa gblɔ be: “Yehowa ɖi nam be, medzi ŋutsu.” Eƒe nyaa na wòdze abe nya si Yehowa gblɔ ɖi le abɔa me ku ɖe nyɔnu  aɖe si ƒe ‘dzidzimevi’ ava tsrɔ̃ vɔ̃ɖitɔ si ble Adam kple Xawa gbe ɖeka lae nɔ susu me nɛ ene. (1 Mose 3:15; 4:1) Ðe Xawa susui be yee nye nyɔnu si ŋu nya wogblɔ ɖi eye Kain ye nye ‘dzidzimevi’ si ŋugbe wodo la?

8 Ne nenemae la, ke eda ƒu ŋutɔ. Azɔ hã, ne woa kple Adam woƒã susu sia ɖe Kain me esime wònɔ tsitsim la, ke ɖikekemanɔmee la, wona dada si ƒe dome wònyi le blibomademade ta la gado gã ɖe edzi. Emegbe Xawa dzi ŋutsuvi evelia, gake nuŋlɔɖia megblɔ be egblɔ nya siwo wògblɔ esi wòdzi Kain la tɔgbi le eŋu o. Wotsɔ ŋkɔ nɛ be Habel, si ate ŋu afia “Tofloko,” alo “Ƒuƒu.” (1 Mose 4:2) Ðe wotsɔ woƒe mɔkpɔkpɔ da ɖe Kain dzi wu Habel tae wotsɔ ŋkɔ ma nɛ ɖoa? Míenya ya o.

9. Nu kae dzila siwo li egbea ate ŋu asrɔ̃ tso mía dzila gbãtɔwo ƒe nuwɔna me?

9 Dzila siwo li egbea ate ŋu asrɔ̃ nu geɖe tso dzila gbãtɔ mawo ƒe nuwɔna me. Ðe nàto wò nyagbɔgblɔwo kple nuwɔnawo dzi aƒã dada, nɔƒe gã didi kple ɖokuitɔdidi ɖe viwòwo mea? Alo àfia wo be woalɔ̃ Yehowa Mawu ahanɔ ƒomedodo nyui me kplii? Nublanuitɔe la, mía dzila gbãtɔwo do kpo nu le woƒe agbanɔamedzia tsɔtsɔ me. Ke hã mɔkpɔkpɔ li na woƒe dzidzimeviwo.

Aleke Habel Wɔ Tu Xɔse Ðo?

10, 11. Dɔ ka wɔlawoe Kain kple Habel va zu, eye nɔnɔme nyui kae Habel tu ɖo?

10 Esime Kain kple Habel nɔ tsitsim la, anɔ eme be Adam fia dɔ si hiã be woawɔ atsɔ akpɔ ƒomea ƒe nuhiahiãwo gbɔ la wo. Kain zu agbledela, ke Habel ya zu lãnyila.

11 Gake Habel ya gawɔ nane si le vevie wu kura. Esi ƒeawo va nɔ yim la, etu xɔse, si nye nɔnɔme nyoameŋu si ŋu Paulo va ƒo nu tsoe emegbe la ɖo. Bu eŋu kpɔ! Amegbetɔ kpɔɖeŋu nyui ɖola aɖeke menɔ anyi ne Habel nasrɔ̃ o. Ke aleke wòwɔ va xɔ Yehowa Mawu dzi se? Bu nu vevi etɔ̃ siwo dzi wòanya tu eƒe xɔse ɖo la ŋu kpɔ.

12, 13. Aleke ŋkuléle ɖe Yehowa ƒe nuwɔwɔwo ŋu anya kpe ɖe Habel ŋu wòtsi le xɔse me?

12 Yehowa ƒe nuwɔwɔwo. Enye nyateƒe be Yehowa ƒo fi de anyigba, si wɔe be ŋu kple aŋɔkawo miena henana agbledede sesẽna ya. Ke hã anyigba gawɔa nu kokoko, si nu Habel kple eƒe ƒometɔwo nɔa agbe ɖo. Azɔ hã, Mawu meƒo fi de lãwo, siwo dome xewo kple tɔmelãwo le la o; meƒo fi de towo, amuwo, tɔsisiwo kple atsiaƒu o; eye meƒo fi de dziŋgɔlia, alilikpowo, ɣe, ɣleti kple ɣletiviwo o. Nu siwo ɖo kpe Yehowa Mawu, ame si wɔ nuwo katã la ƒe lɔlɔ̃ deto, nunya kple nyuiwɔwɔ dzi la ƒo xlã Habel godoo wòakpɔ.  (Xlẽ Romatɔwo 1:20.) Ðikeke mele eme o be, ŋugbledede le nu siawo ŋu ŋudzedzekpɔkpɔtɔe do ŋusẽ Habel ƒe xɔse.

Habel kpɔ kpeɖodzi sẽŋu le nuwɔwɔwo me si na wòxɔe se be Wɔla lɔ̃ame aɖe li

13 Anɔ eme godoo be Habel dia ɣeyiɣi dea ŋugble le Yehowa ŋu. Kpɔe ɖaa le susu me be ele eƒe alẽwo kplɔm. Azɔlidɔe alẽkpɔkplɔ nye. Ekplɔa lã fatu siawo toa togbɛwo dzi kple baliwo me hekplɔa wo tsoa tɔwoe eye wòdia gbeɖuƒe damawo, tsita nyuitɔwo kple gbɔɖemeƒe, afi si ŋdɔ maɖu wo le o la na wo. Le Mawu ƒe nuwɔwɔwo katã dome la, edze abe alẽwoe hiã na beléle wu ene, abe ɖe wowɔ wo be amegbetɔwo nanɔ mɔ fiam wo ahanɔ wo ta kpɔm ene. Ðe Habel hã de dzesii be ehiã be Ame aɖe si ƒe nunya kple ŋusẽ de ŋgɔ sãsãsã wu amegbetɔwo tɔ la nafia mɔ ye ahakpɔ ye ta? Ðikekemanɔmee la, eɖe susu siawo tɔgbi geɖe gblɔ le gbedodoɖa me, si wɔe be eƒe xɔse ganɔ sesẽm ɖe edzi.

14, 15. Yehowa ƒe nyagblɔɖi kawoe ana mɔnukpɔkpɔ Habel be wòayi ŋugble me?

14 Yehowa ƒe nyagblɔɖiwo. Adam kple Xawa anya gblɔ Eden bɔa me nudzɔdzɔ siwo ta wonya wo le abɔa me ɖo la ŋu nya na wo viŋutsuawo. Eya ta nu geɖe li siwo ŋu Habel ate ŋu ade ŋugble le.

15 Yehowa gblɔ be yeaƒo fi ade anyigba. Habel akpɔe adze sii kɔtɛ be ŋu kple aŋɔka siwo mie la ɖo kpe edzi be nya mawo va eme. Yehowa gblɔe ɖi hã be Xawa akpe fu le fufɔfɔ me eye alé ku hafi adzi vi. Ðikeke mele eme o be le Habel nɔviwo dziɣi la, Habel de dzesii be nya mawo hã va eme. Yehowa ɖee gblɔ be didi sẽŋu si meda sɔ o anɔ Xawa me be ye srɔ̃ nalɔ̃ ye ahatsɔ ɖe le eme na ye, eye Adam hã anye gã ɖe edzi. Habel ŋutɔ kpɔ nɔnɔme wɔnublanui ma me vava teƒe kple ŋku. Habel de dzesii le go sia go me be kakaɖedzi blibo le Yehowa ƒe nyawo ŋu. Eya ta kpeɖodzi sẽŋuwo li siwo tae Habel axɔ ŋugbe si Mawu do ku ɖe ‘dzidzimevi’ si ava ɖɔ nu siwo gblẽ tso Eden bɔa me ke la ɖo gbe ɖeka la dzi ase.—1 Mose 3:15-19.

16, 17. Nu kae Habel anya srɔ̃ tso Yehowa ƒe kerubiawo gbɔ?

 16 Yehowa ƒe dɔlawo. Habel mekpɔ kpɔɖeŋu nyui ɖola aɖeke le amegbetɔwo dome o, gake menye amegbetɔwo koe nye nuwɔwɔ siwo si nunya le siwo nɔ anyigba dzi ɣemaɣi o. Esi Yehowa nya Adam kple Xawa le abɔa me la, ekpɔ egbɔ be woawo ŋutɔwo loo alo woƒe dzidzimeviwo mage ɖe anyigba dzi Paradiso ma me o. Yehowa tsɔ kerubiwo, siwo nye mawudɔla siwo le ɖoƒe kɔkɔ ŋutɔ la kple yi si troa eɖokui heklẽna abe dzo ƒe aɖe ene la ɖo abɔa ƒe mɔnu be woadzɔ eŋu.—Xlẽ 1 Mose 3:24.

17 Bu ale si Habel ɖevi la ase le eɖokui me ne ekpɔ kerubiawo la ŋu kpɔ. Mawudɔla mawo siwo do amegbetɔŋutilã la adze ame triakɔwo vavã. Eye “yi” ma si le totrom madzudzɔmadzudzɔe hele dzo dam la hã teƒe kpɔkpɔ aɖi vɔvɔ̃ ŋutɔ. Esime Habel nɔ tsitsim la, ɖe wòkpɔe kpɔ be nu va ti kɔ na kerubiawo, si wɔe be wogblẽ dɔa ɖi dzoa? Ao. Nuwɔwɔ triakɔ nyanu mawo medzo le afi si woda wo ɖo la o, wonɔ afi ma zã kple keli, ƒe sia ƒe hena ƒe geɖe. Eya ta Habel kpɔe dze sii be dɔla dzɔdzɔe siwo wɔa nuteƒe la le Yehowa Mawu si. Habel de dzesi nuteƒewɔwɔ kple toɖoɖo Yehowa ƒe nɔnɔme si menɔ eƒe ƒometɔwo ya si o la le kerubi mawo ŋu. Ðikeke mele eme o be mawudɔlawo ƒe kpɔɖeŋu nyui la do ŋusẽ Habel ƒe xɔse.

Le Habel ƒe agbe me katã la, ekpɔe be kerubiawo nye Yehowa subɔla wɔnuteƒe siwo ɖoa to eƒe gbe

18. Nu kawoe ate ŋu akpe ɖe mía ŋu míatu xɔse ɖo egbea?

18 Habel kpɔe be ŋugbledede le nu siwo katã Yehowa ɖe fia le eɖokui ŋu to nuwɔwɔwo, nyagblɔɖiwo kple Eƒe dɔlawo ƒe kpɔɖeŋu  nyuiwo dzi ŋu na yeƒe xɔse nɔ sesẽm ɖe edzi. Ðe eme mekɔ ƒãa be míate ŋu asrɔ̃ nu tso eƒe kpɔɖeŋua me oa? Esia ate ŋu ade dzi ƒo na ɖeviwo koŋ be, afɔ ka kee woƒe ƒometɔwo ɖaɖe o, woate ŋu atu xɔse vavã ɖo na Yehowa Mawu. Nuwɔwɔ wɔnuku siwo katã ƒo xlã mí, Biblia bliboa si le mía si kple xɔse ƒe kpɔɖeŋu nyui ɖola geɖe siwo li egbea la ate ŋu akpe ɖe mía ŋu míatu xɔse ɖo.

Nu Si Tae Habel Ƒe Vɔsaa Nyo Wu

19. Nyateƒenya vevi kae Habel va de dzesii?

19 Esi xɔse si nɔ Habel si na Yehowa nɔ sesẽm ɖe edzi la, edi be yeaɖee afia to nuwɔna me. Gake nu kae amegbetɔ dzro ate ŋu ana xexea katã Wɔla la? Eme kɔ ƒãa be Mawu mehiã na nunana alo kpekpeɖeŋu aɖeke tso amegbetɔwo gbɔ o. Habel va nya nyateƒenya vevi sia be: Ne susu nyui le ye si eye yetsɔ yeƒe nu nyuitɔ na Yehowa, ye Fofo lɔ̃ame si le dziƒo la, adze eŋu.

Habel sa vɔ le xɔse me; menɔ alea le Kain ya gome o

20, 21. Nu kawoe Kain kple Habel tsɔ sa vɔ na Yehowa, eye nu kae Yehowa wɔ?

20 Habel ɖoe be yeatsɔ yeƒe alẽawo dometɔ aɖewo asa vɔe. Etia ŋgɔgbeviawo, nyuitɔawo, eye wòtsɔ woƒe akpa siwo wòkpɔ be wodze ame ŋu wu la sa vɔe. Kain hã di Mawu ƒe yayra kple amenuveve, eya ta etsɔ eƒe agblemenu aɖewo sa vɔe, gake menye kple susu nyuitɔ, abe Habel ene o. Esia va dze kɔtɛ esi wo ame evea wotsɔ woƒe nunanawo va sa vɔe.

21 Adam viŋutsu eveawo siaa anya tɔ dzo woƒe vɔsanuawo le vɔsamlekpuiwo dzi, ɖewohĩ le afi si woate ŋu anɔ kerubiawo, siwo ko ganye Yehowa teƒenɔlawo le anyigba dzi ɣemaɣi la, kpɔm le. Yehowa ɖee fia be yede dzesi nu si wowɔ la! Biblia gblɔ be: “Habel kple eƒe nunana dze Yehowa ŋu.” (1 Mose 4:4) Gake Biblia megblɔ mɔ si dzi Mawu to ɖee fia be yekpɔ ŋudzedze ɖe eŋu la o.

22, 23. Susu ka tae Yehowa kpɔ ŋudzedze ɖe Habel ƒe vɔsaa ŋu?

22 Nu ka tae Mawu kpɔ ŋudzedze ɖe Habel ŋu? Nu si wòtsɔ sa vɔ ta yea? Nu si me agbe le, si me agbegbɔgbɔ le, ye Habel tsɔ sa vɔe hekɔ eƒe ʋu xɔasi la ɖe anyi. Ðe Habel nya asixɔxɔ si gbegbe ava nɔ vɔsa sia tɔgbi ŋua? Ƒe alafa geɖe le Habel ƒe ku megbe la, Mawu zã alẽvi si sɔ blibo ƒe vɔsa tsɔ wɔ kpɔɖeŋui na Eya ŋutɔ ƒe Vi deblibo la ƒe vɔsa, si me wokɔ “Mawu ƒe Alẽvi” sia ƒe ʋu maɖifɔ ɖe anyi le. (Yoh. 1:29; 2 Mose 12:5-7) Gake edze kɔtɛ be esia ŋuti sidzedze alo gɔmesese aɖeke mesu Habel si o.

23 Nu si dzi míeka ɖoe nye be: Habel tsɔ eƒe nu nyuitɔ kekeake sa vɔe. Menye eƒe nunana la ko ŋue Yehowa kpɔ ŋudzedze ɖo o, ke ekpɔ ŋudzedze ɖe eya amea ŋutɔ hã ŋu. Lɔlɔ̃ si le Habel si na Yehowa kple xɔse vavã ye ʋãe wòsa vɔa.

24. (a) Nu ka tae míagblɔ be naneke megblẽ le nu si Kain tsɔ sa vɔ la ŋutɔ ŋu o? (b) Mɔ ka nue Kain ƒe nɔnɔme sɔ kple ame geɖe tɔ le egbea kple blema siaa?

 24 Menɔ alea le Kain ya gome o. “Kain kple eƒe nunana ya medze [Yehowa ŋu] o.” (1 Mose 4:5) Menye ɖe nanee gblẽ le Kain ƒe nunanaa ŋu tae o, elabena emegbe la, Mawu ƒe Sea ɖe mɔ be woatsɔ agblemenuwo asa vɔe. (3 Mose 6:7, 8) Gake Biblia gblɔ tso Kain ŋu be “ye ŋutɔ ƒe dɔwɔwɔwo vɔ̃ɖi.” (Xlẽ 1 Yohanes 3:12.) Edze ƒãa be Kain susui be gotagome mawusosroɖa adze Mawu ŋu, abe ale si ame geɖe susunɛ egbea kple blema siaa ene. Xɔse kple lɔlɔ̃ akuakua si menɔ esi na Yehowa o la va dze enumake le eƒe nuwɔnawo me.

25, 26. Aleke Yehowa xlɔ̃ nu Kain, ke hã nu kae Kain wɔ?

25 Esi Kain kpɔe be yeƒe nu medze Yehowa ŋu o la, ɖe wòdze agbagba be yeasrɔ̃ Habel ƒe kpɔɖeŋua? Ao. Edo dziku ɖe nɔvia ŋu helé fui boŋ. Yehowa kpɔ nu si nɔ edzi yim le Kain ƒe dzi me eye wòxlɔ̃ nui dzigbɔɖitɔe. Exlɔ̃ nu Kain be eƒe dzibibia ate ŋu ana wòawɔ nu vɔ̃ gã, eye wòdo ŋugbe na Kain be, ne etrɔ le eƒe mɔwo dzi ko la, ekema yeakpɔ “ŋudzedze” ɖe eŋu.—1 Mose 4:6, 7, NW.

26 Kain do toku Mawu ƒe nuxlɔ̃amea. Egblɔ na nɔvia Habel be wòava ne yewoayi gbe me, evɔ nɔvia ya ka ɖe edzi hafi. Esi wole gbea me la, Kain tso ɖe Habel ŋu hewui. (1 Mose 4:8) Ne míagblɔe la, Habel va nye xɔsetakula gbãtɔ, alo ame gbãtɔ si wowu le mawusosroɖa ta. Togbɔ be eku hã la, Yehowa meŋlɔe be o.

27. (a) Nu ka tae míate ŋu aka ɖe edzi be woava fɔ Habel ɖe tsitre? (b) Nu kae míawɔ be míava kpɔ Habel gbe ɖeka?

27 Le kpɔɖeŋunyagbɔgblɔ nu la, Habel ƒe ʋu do ɣli na Yehowa Mawu be wòabia hlɔ̃, alo wòadrɔ̃ ʋɔnu dzɔdzɔe. Mawu drɔ̃ ʋɔnu dzɔdzɔe hã, elabena ehe to na Kain vɔ̃ɖi la ɖe eƒe hlɔ̃dodoa ta. (1 Mose 4:9-12) Gawu la, Habel ƒe xɔse ŋuti nuŋlɔɖia le nu ƒom na mí egbea. Habel ƒe agbenɔƒewo, si ɖewohĩ anɔ ƒe alafa ɖeka la le kpuie ne wotsɔe sɔ kple eŋɔlimetɔwo tɔ, gake ewɔ ƒe mawo ŋu dɔ nyuie. Hafi wòaku la, enya be yeƒe nu dze Yehowa, ye Fofo si le dziƒo la ŋu, eye wòlɔ̃ ye. (Heb. 11:4) Eya ta míate ŋu aka ɖe edzi be Yehowa aɖo ŋku edzi, elabena meŋlɔa nu be o, afɔe ɖe tsitre be wòava nɔ agbe le paradiso me le anyigba dzi. (Yoh. 5:28, 29) Èle afi ma nɔ ge akpɔea? Ava eme na wò ne èɖoe kplikpaa be yeaƒu to anyi esime Habel le nu ƒom eye nèsrɔ̃ eƒe xɔse ɖedzesi la.

^ mm. 5 Gɔmesese si le nyagbɔgblɔ “xexea ƒe gɔmeɖoanyiɣi” ŋu la lɔ nukuwo wuwu ɖe eme, eye esia he susu yi vidzidzi dzi, eya ta amegbetɔ gbãtɔ siwo wodzi la ŋue nya sia ku ɖo. Ke nu ka tae Yesu zã nyagbe “xexea ƒe gɔmeɖoanyiɣi” na Habel, ke menye na Kain, si nye ame gbãtɔ si wodzi la o? Kain ƒe nyametsotsowo kple nuwɔnawo ɖee fia be eɖoe koŋ dze aglã ɖe Yehowa Mawu ŋu. Edze abe tsitretsitsi kple ɖeɖekpɔkpɔ ƒe mɔkpɔkpɔ meli na Kain o ene, abe ale si wòle le edzilawo hã gome ene.