Dzo kpo yi emenuwo dzi

Dzo kpo yi emenuawo dzi

 Kpɔkplɔyiɖeme

Lɛta Si Tso Dɔdzikpɔha La Gbɔ

Lɛta Si Tso Dɔdzikpɔha La Gbɔ

Na Mía Nɔviŋutsu Kple Nɔvinyɔnu Lɔlɔ̃tɔwo:

Tso Gbetakpɔxɔ ƒe tata si míemana ƒe gbãtɔ si nye January 1, 2008 tɔ dzi la, míedze nyati dodzidzɔname siwo ƒe tanyae nye “Srɔ̃ Woƒe Xɔse” tata gɔme. Tso ɣemaɣi la, nyati mawo dzena le Gbetakpɔxɔ me ɣleti etɔ̃ sia ɣleti etɔ̃, eye wodoa dzidzɔ na mí ŋutɔ!

Nya kae Gbetakpɔxɔ xlẽlawo gblɔ tso nyati siawo ŋu? Esi nyɔnu aɖe xlẽ nyati si ku ɖe Marta ŋu vɔ la, eŋlɔ bena: “Esi mexlẽe vɔ la, meko nu, elabena eƒe nɔnɔme tututue le asinye—medina ɣesiaɣi be maxɔ nye amedzrowo nyuie, si wɔnɛ be metsoa hloloe, gake ɣeaɖewoɣi la, meŋlɔna be be, ele be makpɔ vovo ɖe xɔ̃nyeawo ŋu ahaɖo dze kpli wo.” Esi ƒewuivi aɖe xlẽ Ester ƒe ŋutinyaa vɔ la, eƒo nya ta nyuie ale: “Mekpɔe be ele bɔbɔe be míava nɔ dzi tsim ɖe nudodowo kple atsyã siwo le tsia dzi la ŋu fũu akpa. Ele eme be ele be míadzra ɖo nyuie ya; ke hã míadi be míawɔ nu wòagbɔ eme o.” Egblɔ kpee be: “Ame si míenye le ememe ye le vevie na Yehowa.” Eye nyati aɖe si ƒo nu tso apostolo Petro ŋu xexlẽ na nɔvinyɔnu aɖe gblɔ vividoɖenuŋutɔe be: “Esi menɔ ŋutinyaa xlẽm la, nye dzi katã ku ɖe eŋu. Ðeko wòwɔ nam abe ɖe mele nudzɔdzɔa teƒe ene! Mewɔa nye sidzenuwo ŋu dɔ be made dzesi nu siwo dzi wohe susu yi la nyuie.”

Nya siwo nuxlẽla siawo kple bubu geɖewo ŋlɔ tsɔ ɖe woƒe ŋudzedzekpɔkpɔ ɖe nyati siawo ŋu fia la ɖo kpe nya si apostolo Paulo gblɔ ɣeyiɣi didi aɖee nye esi va yi la dzi be: “Nu siwo katã woŋlɔ ɖi tsã la, woŋlɔ wo ɖi le míaƒe nufiafia ta.” (Rom. 15:4) Ɛ̃, Yehowa na woŋlɔ ŋutinya siawo ɖe Biblia me be yeafia nu vevi aɖewo mí. Ɣeyiɣi didi ka kee míeɖale nyateƒea me o, mí katã míate ŋu asrɔ̃ nu tso ŋutinya siawo me.

Míele dzi dem ƒo na mi vevie be miaxlẽ agbalẽ sia kaba ale si wòanya wɔ. Mizã eya hã le miaƒe Ƒometadedeagu me—ɖeviwo akpɔ dzidzɔ ɖe eŋu ŋutɔ! Ne hamea le esrɔ̃m le Hame Ƒe Biblia Nusɔsrɔ̃ me la, mègana nusɔsrɔ̃ ɖeka pɛ hã nato ŋuwò o! Mègato eme dzradzradzra o, gbɔ dzi ɖi ɖe nuxexlẽa ŋu. Nɔ nudzɔdzɔa kpɔm le susu me; tsɔe be èle eteƒe hafi nuawo le dzɔdzɔm. Dze agbagba nàtsɔ ɖokuiwò aɖo ame siwo ŋu Biblia ƒo nu tsoe, siwo ƒe ŋutinya me dzrom wole la teƒe, kpɔ nu si kpɔm wonɔ. De dzesi ale si wowɔ nui le nɔnɔme si me wonɔ me eye nàkpɔe ɖa be nenye yee le nɔnɔme ma me ɖe aleke yeawɔ nui hã.

Dzidzɔ gã aɖee wònye na mí be míana agbalẽ sia nasu mia si. Neva eme be wòaɖe vi na mia kple wò ƒomea siaa. Míelɔ̃ mi vevie, eye míebia Yehowa ƒe yayra na mi,

Yehowa Ðasefowo Ƒe Dɔdzikpɔha