Dzo kpo yi emenuwo dzi

Dzo kpo yi emenuawo dzi

 TA 31

‘Te Ðe Mawu Ŋu, Eye Wòate Ðe Ŋuwò’

‘Te Ðe Mawu Ŋu, Eye Wòate Ðe Ŋuwò’

1-3. (a) Nukae míate ŋu asrɔ̃ tso amegbetɔ ƒe nɔnɔme ŋu ne míelé ŋku ɖe alesi kadodo yia edzi le dzilawo kple wo vi fẽwo dome ŋu? (b) Nukae dona tsoa eme le dzɔdzɔme nu ne woɖe lɔlɔ̃ fia mí, eye biabia vevi kae míate ŋu abia mía ɖokui?

EDZƆA dzi na dzilawo be woakpɔ wo vi vidzĩ ƒe alɔgbɔnukoko. Zi geɖe wotea mo ɖe vidzĩa ƒe mo tututu, eye wofena kplii koa alɔgbɔnu nɛ dzidzɔtɔe. Wodina vevie be yewoakpɔ vidzĩa hã nako nu. Eye eteƒe medidina o, eya hã konɛ—vidzĩa ƒe alɔgoe nye ma nyé ɖe eme, eƒe nuyie nye ma ke, eye alɔgbɔnukoko dzeania nye ma. To nuwɔna tsɛ sia dzi la, alɔgbɔnukoko ma le vidzĩa ƒe seselelãme ɖem fia, si nye eƒe lɔlɔ̃ ɖeɖe fia ƒe gɔmedzedze, le esi dzilawo ɖe lɔlɔ̃ fiae ta.

2 Vidzĩ ƒe alɔgbɔnukoko ɖoa ŋku nu vevi aɖe dzi na mí ku ɖe amegbetɔ ƒe dzɔdzɔmenɔnɔme ŋu. Enye míaƒe nɔnɔme be míaɖe lɔlɔ̃ afia ne woɖe lɔlɔ̃ fia mí. Aleae wowɔ míi. (Psalmo 22:10) Ne míele tsitsim la, míaƒe ŋutete be míalɔ̃ ame ne wolɔ̃ mí la tsina ɖe edzi. Ðewohĩ àte ŋu aɖo ŋku alesi dziwòlawo, ƒowòmetɔwo, alo xɔ̃wòwo ɖe lɔlɔ̃ fia wòe tso ɖevime ke la dzi. Vividodoɖeameŋu ɖo mewò, etsi ɖe edzi, eye wòyɔ mewò fũ be nètsɔe de dɔwɔwɔ me. Wò hã nèɖe lɔlɔ̃ fia wo ɖe woƒe lɔlɔ̃ ta. Ðe nusia tɔgbe le dzɔdzɔm le mia kple Yehowa Mawu dome ƒomedodo mea?

3 Biblia gblɔ be: “Le mía gome la, míelɔ̃e, elabena etre mí lɔlɔ̃.” (Yohanes I, 4:19, NW) Le agbalẽ sia ƒe Akpa 1 vaseɖe 3 lia la, woɖo ŋku edzi na wò be Yehowa Mawu zãa eƒe ŋusẽ, eƒe dzɔdzɔenyenye, kple eƒe nunya le mɔ siwo me lɔlɔ̃ le nu ɖe tawò. Eye le Akpa 4 lia la, èkpɔe be eɖe lɔlɔ̃ fia ameƒomea tẽ—eɖee fia wò ŋutɔ hã—le mɔ siwo ɖe dzesi ŋutɔŋutɔ nu. Fifia biabia aɖe fɔ ɖe te. Le mɔ aɖe nu la, enye biabia vevitɔ kekeake si nàte ŋu abia ɖokuiwò be: ‘Aleke mawɔ nu wòasɔ ɖe Yehowa ƒe lɔlɔ̃ si wòɖe fiam la nui?’

 Nusi Wòfia be Woalɔ̃ Mawu

4. Mɔ ka nue amewo tɔtɔ le le nusi wòfia be woalɔ̃ Mawu me?

4 Yehowa, Amesi gbɔ lɔlɔ̃ tso, nya nyuie be ŋusẽ geɖe le lɔlɔ̃ ŋu be wòana amewo nawɔ nu nyuitɔ kekeake. Eyata togbɔ be amegbetɔƒomea me tɔ mawɔnuteƒewo kpɔtɔ yi edzi le aglã dzem hã la, Mawu kpɔtɔ ka ɖe edzi be amegbetɔ aɖewo axɔ yeƒe lɔlɔ̃ si yeɖe fia. Eva eme hã vavã, ame miliɔn geɖe xɔe. Gake ewɔ nublanui be xexe gblẽku sia me subɔsubɔhawo na amewo tɔtɔ kura le nusi wòfia be woalɔ̃ Mawu ŋu. Ame gbogbo aɖewo gblɔna be yewolɔ̃ Mawu, gake edze abe ɖeko wobu be lɔlɔ̃ sia nye seselelãme si woake nu agblɔ ko ene. Lɔlɔ̃ na Mawu ate ŋu adze egɔme le mɔ ma nu ya, abe alesi vidzĩ ƒe lɔlɔ̃ na edzilawo ate ŋu adze le eƒe alɔgbɔnukoko me ene. Gake le ame tsitsiwo gome la, lɔlɔ̃ bia nu geɖe wu ema ko.

5. Aleke Biblia ɖe lɔlɔ̃ na Mawu mee, eye nukata wòle be numeɖeɖe ma nana dzi nadzɔ mí?

5 Yehowa ɖe nusi wòfia be woalɔ̃ eyama la me. Eƒe Nya la gblɔ be: “Lɔlɔ̃ na Mawu enye si bena, míalé eƒe seawo me ɖe asi.” Eyata ehiã be míaɖe míaƒe lɔlɔ̃ na Mawu afia le nuwɔna ŋutɔŋutɔ me. Ele eme baa be medzea ame geɖe ŋu be woabia tso wo si be woanye toɖolawo o. Gake kpukpui ma ke gblɔ yi edzi dɔmenyotɔe be: “Eye [Mawu ƒe] seawo mesesẽ o.” (Yohanes I, 5:3) Yehowa ƒe sewo kple gɔmeɖosewo li na míaƒe viɖe, menye na mía tete ɖe anyi o. (Yesaya 48:17, 18) Gɔmeɖosewo bɔ ɖe Mawu ƒe Nya la me fũ siwo kpena ɖe mía ŋu míetena ɖe eŋu. Le mɔ ka nu? Mina míadzro akpa etɔ̃ aɖewo siwo me ƒomedodo nɔa mía kple Mawu dome le la me akpɔ. Woawoe nye nuƒoƒo, tadedeagu, kple eƒe nɔnɔme sɔsrɔ̃.

Nuƒoƒo Kple Yehowa

6-8. (a) Mɔ ka dzie míate ŋu ato aɖo to Yehowa le? (b) Aleke míate ŋu ana Ŋɔŋlɔawo me nudzɔdzɔwo nanye nu ŋutɔŋutɔ na mí ne míele wo xlẽm?

6 Wotsɔ biabia sia ʋu agbalẽ sia ƒe Ta 1 nui be: “Àte ŋu akpɔ alesi wòanɔ ɖa le susu me be yele dze ɖom kple Mawua?” Míekpɔe be esia menye nuŋububu dzro aɖe ko si manya wɔ  o. Mose ɖo dze kple Mawu alea ŋutɔŋutɔ. Ke míawo ya ɖe? Menye fifiae nye ɣeyiɣi na Yehowa be wòadɔ mawudɔlawo be woava ƒo nu kple amegbetɔwo o. Gake mɔnu nyui aɖe le Yehowa si si dzi tom wòle le nu ƒom na mí egbea. Aleke míawɔ ase nya si gblɔm Yehowa le?

7 Esi “Ŋɔŋlɔawo katã tso Mawu ƒe gbɔgbɔ me” ta la, míesea nya si gblɔm Yehowa le to eƒe Nya Biblia la xexlẽ me. (Timoteo II, 3:16, NW) Esia tae Fia Dawid de dzi ƒo na Yehowa subɔlawo be woaxlẽe “zã kple keli” ɖo. (Psalmo 1:1, 2) Esia wɔwɔ bia be míaku kutri geɖe. Gake agbagba ɖesiaɖe si míadze ɖe esia ta manye dzodzro o. Abe alesi míekpɔe le Ta 18 lia me ene la, Biblia la le abe lɛta vevi aɖe si mía Fofo si le dziƒo ŋlɔ na mí ene. Eyata mele be exexlẽ nati mí o. Ele be míana Ŋɔŋlɔawo me nudzɔdzɔwo nanye nu ŋutɔŋutɔ na mí ne míele wo xlẽm. Aleke míate ŋu awɔ esiae?

8 Kpɔ Biblia me nudzɔdzɔwo le susu me ne èle wo xlẽm. Dze agbagba nàkpɔ amesiwo woyɔ le Biblia me la le susu me be wonye amewo ŋutɔŋutɔ. Dze agbagba nàse teƒe si wole, nɔnɔme si me wole, kple nusi na wowɔ nusiwo wowɔ la gɔme. Eyome de ŋugble le nusi nèxlẽ ŋu vevie, nàbia nya siawo tɔgbe ɖokuiwò: ‘Nukae nuŋlɔɖi sia fiam tso Yehowa ŋu? Eƒe nɔnɔme kawoe ɖe dzesi le afisia? Gɔmeɖose kawoe Yehowa di be masrɔ̃ tso eme, eye aleke mate ŋu atsɔe ade dɔwɔwɔ me le nye agbe mee?’ Xlẽe, de ŋugble le eŋu, nàdee dɔwɔwɔ me—ne èle esia wɔm la, Mawu ƒe Nya la me nudzɔdzɔwo adze nu ŋutɔŋutɔe le susu me na wò.—Psalmo 77:13; Yakobo 1:23-25.

9. Amekae nye “dɔla nuteƒewɔla kple aɖaŋudzela” la, eye nukata wòle vevie be míaɖo to “dɔla” ma nyuie?

9 Yehowa ƒoa nu na mí to “dɔla nuteƒewɔla kple aɖaŋudzela” la hã dzi. Abe alesi Yesu gblɔe ɖi ene la, woɖo nɔviŋutsu Kristotɔ amesiaminawo ƒe ƒuƒoƒo sue aɖe be woana gbɔgbɔ me ‘nuɖuɖu le ɣeyiɣi nyui dzi’ le ŋkeke mamlɛ vɔ̃ɖi siawo me. (Mateo 24:45-47) Ne míexlẽa agbalẽ siwo wota be woakpe ɖe mía ŋu Biblia me sidzedze vavãtɔ nasu mía si, hedea Kristotɔwo ƒe kpekpewo kple takpekpewo la, ke dɔla ma le mía nyim le gbɔgbɔ me. Esi Kristo ƒe dɔlae wonye ta la, míewɔna ɖe Yesu  ƒe nya siawo dzi nunyatɔe be: “Milé ŋku ɖe alesi mieɖoa toe la ŋu nyuie.” (Luka 8:18, NW) Míeɖoa to nyuie elabena míenyae be mɔ siwo dzi tom Yehowa le le nu ƒom na mí dometɔ ɖekae nye to kluvi nuteƒewɔla sia dzi.

10-12. (a) Nukata gbedodoɖa nye nunana wɔnuku si tso Yehowa gbɔ? (b) Aleke míado gbe ɖa wòadze Yehowa ŋui, eye nukata wòle be míaka ɖe edzi be edea asixɔxɔ míaƒe gbedodoɖawo ŋu?

10 Ke nuƒoƒo kple Mawu ya ɖe? Ðe míate ŋu aƒo nu kple Yehowa? Esia ŋu bubu naa vɔvɔ̃ kple bubu deto yɔa mía me. Ne èdze agbagba be yeate ɖe dziɖula si nye ŋusẽtɔ gãtɔ le miaƒe dukɔa me ŋu be yeagblɔ wò dzimaɖitsitsi aɖewo nɛ la, ɖe wòanɔ bɔbɔe be woaɖe mɔ na wò nàyi egbɔa? Le go aɖewo me la, afɔku ate ŋu anɔ afɔ ma si nàɖe me gɔ̃ hã! Le Ester kple Mardoxai ƒe ŋkekeawo me la, wote ŋu wua amesi do ɖe Persia fiagã ŋkume ne menye fia la ŋutɔe yɔe be wòava hafi o. (Ester 4:10, 11) Ke bu dodo ɖe xexeame katã ƒe Aƒetɔ Dziɖulagã la ŋkume, amesi ne míetsɔ amegbetɔ ŋusẽtɔ gãtɔwo kekeake sɔ kplii la, ɖeko amegbetɔwo le abe “ʋetsuviwo ene” le eŋkume la ŋu kpɔ. (Yesaya 40:22) Ðe wòle be vɔvɔ̃ naɖo mí vevie be míate ɖe eŋua? Kura o!

11 Yehowa ʋu mɔnu aɖe ɖi, si le bɔbɔe, si dzi míato ate ɖe eŋu—eyae nye gbedodoɖa. Ðevi sue gɔ̃ hã ate ŋu ado gbe ɖa na Yehowa le xɔse me, eye wòadoe ɖa le Yesu ƒe ŋkɔ me. (Yohanes 14:6; Hebritɔwo 11:6) Evɔ wònye gbedodoɖa na míete ŋu gblɔa míaƒe dzimesusuwo kple seselelãme detowo bɔbɔe—esiwo nye vevesese na mí siwo míenya alesi míaɖe wo agblɔe o gɔ̃ hã—hafi. (Romatɔwo 8:26) Meɖea vi aɖeke be míadze agbagba be míazã nya gã nya gãwo, nya ŋanɛwo alo nya geɖe fũ atsɔ ado gbe legbewo ɖa o be wòadze Yehowa ŋu o. (Mateo 6:7, 8) Gake Yehowa meɖo seɖoƒe na ɣeyiɣi didi si míatsɔ ado gbe ɖa alo zi gbɔ zi alesi míadoe ɖa o. Eƒe Nya la kpe mí gɔ̃ hã be ‘míanɔ gbedodoɖa dzi madzudzɔmadzudzɔe!’—Tesalonikatɔwo I, 5:17.

12 Ðo ŋku edzi be Yehowa ɖeka koe woyɔ be ‘Gbedodoɖasela,’ eye etsɔa veveseseɖeamenu ŋutɔŋutɔ ɖoa to míi. (Psalmo 65:3) Ðe wòsea esubɔla wɔnuteƒewo ƒe gbedodoɖa dzro  koa? Ao, wodoa dzidzɔ nɛ ŋutɔŋutɔ boŋ. Eƒe Nya la tsɔ gbedodoɖa mawo sɔ kple atike ʋeʋĩ, si ne wodoe la, eƒe dzudzɔ tuna wòʋẽna lilili yia dzi. (Psalmo 141:2; Nyaɖeɖefia 5:8; 8:4) Ðe mefaa akɔ na mí be míabu eŋu be míaƒe gbedodoɖa siwo tso dzi anukwaretɔ me la yina ɖe Aƒetɔ Dziɖulagã la gbɔ eye wodzea eŋu oa? Eyata ne èdi be yeate ɖe Yehowa ŋu la, do gbe ɖa nɛ ɖokuibɔbɔtɔe zi geɖe, gbesiagbe. Trɔ wò dzimenyawo ƒo ɖe eŋkume; mègaɣla naneke ɖee o. (Psalmo 62:9) Gblɔ wò dzimaɖitsitsiwo, wò dzidzɔwo, wò akpedadawo, kple wò kafukafunyawo na Fofowò si le dziƒo. Esia ana ƒomedodo si le mia kplii dome nanɔ tsitsim ɖe edzi eye wòanɔ ŋu sẽm ɖe edzi.

Tadedeagu na Yehowa

13, 14. Nukae wòfia be woade ta agu na Yehowa, eye nukata wòsɔ be míade ta agu nɛ?

13 Ne míele dze ɖom kple Yehowa Mawu la, menye ɖeko míeɖoa to heƒoa nu abe alesi míewɔnɛ kple xɔlɔ̃ alo ƒometɔ aɖe ene o. Nusi tututu wɔm míele enye be míele Yehowa subɔm, míetsɔ subɔsubɔ ƒe bubu si wòdze na ale gbegbe la le enam. Míaƒe agbenɔnɔ ƒe akpa sia akpa nɔ te ɖe nyateƒe tadedeagu dzi. Enye alesi míetsɔa míaƒe lɔlɔ̃ kple subɔsubɔ blibo naa Yehowae, eye enye nusi naa Yehowa ƒe nuwɔwɔ wɔnuteƒewo katã wɔa ɖeka, eɖanye le dziƒo loo alo le anyigba dzi o. Le ŋutega aɖe me apostolo Yohanes se mawudɔla aɖe wòde se sia be: “Mide ta agu na amesi wɔ dziƒo kple anyigba kple atsiaƒu kple tsi dzidziwo.”—Nyaɖeɖefia 14:7.

14 Nukatae wòle be míade ta agu na Yehowa? Bu nɔnɔme siwo me míedzro le agbalẽ sia me, abe kɔkɔenyenye, ŋusẽ, ɖokuiléle, dzɔdzɔenyenye, dzideƒo, nublanuikpɔkpɔ, nunya, ɖokuibɔbɔ, lɔlɔ̃, veveseseɖeamenu, nuteƒewɔwɔ, kple nyuiwɔwɔ ene ŋu kpɔ. Míekpɔe be Yehowa sie nɔnɔme xɔasi ɖesiaɖe, woƒe dzidzenu gãtɔ kekeake, kple woƒe gbogbotɔ kekeake la le. Ne míedze agbagba be míase eƒe nɔnɔme siawo katã gɔme la, míekpɔnɛ be enye Amesi de ŋgɔ boo wu bubume gãtɔ kekeake ko. Enye amesi ƒe ŋutikɔkɔe de ŋgɔ ale gbegbe, eye wòkɔkɔ  boo wu mí ale gbegbe be gbɔgblɔ mele eŋu o. (Yesaya 55:9) Ðikeke aɖeke mele eŋu o be Yehowae nye míaƒe Dziɖulagã si dze, eye eyae dze ŋutɔŋutɔ be míade ta agu na. Gake aleke wòle be míade ta agu na Yehowae?

15. Aleke míawɔ ade ta agu na Yehowa “le gbɔgbɔ kple nyateƒe me,” eye mɔnukpɔkpɔ kawoe Kristotɔwo ƒe kpekpewo ʋuna ɖi na mí?

15 Yesu gblɔ be: “Mawue nye Gbɔgbɔ, eye amesiwo le gbe dom ɖa nɛ la, ele be, woado gbe ɖa le gbɔgbɔ kple nyateƒe me.” (Yohanes 4:24) Be míasubɔ Mawu ‘le gbɔgbɔ me’ la, ele be eƒe gbɔgbɔa nanɔ mía dzi eye wòafia mɔ mí. Ele hã be míade ta agu na Yehowa le nyateƒe me, wòawɔ ɖeka kple sidzedze vavãtɔ si le Mawu ƒe Nya la me. Mɔnukpɔkpɔ xɔasi aɖe sua mía si be míade ta agu na Yehowa “le gbɔgbɔ kple nyateƒe me” ɣesiaɣi si míeva kpe ta kple haxɔsetɔwo. (Hebritɔwo 10:24, 25) Ne míele kafukafuhawo dzim na Yehowa, ne míewɔ ɖeka le gbedodoɖa me, eye ne míeɖo to  hekpɔ gome le eƒe Nya la me dzodzro me la, míele míaƒe lɔlɔ̃ ɖem fia eyama le tadedeagu dzadzɛtɔ me.

Kristotɔwo ƒe kpekpewo nyea dzidzɔɣiwo na tadedeagu na Yehowa

16. Se vevitɔ siwo wode na Kristotɔ vavãwo dometɔ ɖekae nye ka, eye nukae na didia le mía me be míawɔ ɖe edzi?

16 Enyea míaƒe tadedeagu na Yehowa hã ne míeƒo nu tso eŋu na amewo, hekafui le gaglãgbe. (Hebritɔwo 13:15) Nyateƒee wònye be gbeƒãɖeɖe Yehowa ƒe Fiaɖuƒe ŋuti nyanyuia nye se vevitɔ siwo wode na Kristotɔ vavãwo dometɔ ɖeka. (Mateo 24:14) Míetsɔa didi vevie wɔna ɖe edzi le esi míelɔ̃ Yehowa ta. Ne míebu alesi “nuɖoanyi sia ƒe mawu,” Satana Abosam, “gbã ŋku na dzimaxɔsetɔwo ƒe tamesusu,” eye wòle alakpanya vɔ̃ɖivɔ̃ɖiwo kakam le Yehowa ŋui la, ɖe medzroa mí vevie be míasubɔ abe Ðasefo siwo le Mawu ƒe akpa dzi ene, ahakɔ eŋu tso ameŋugblẽnya mawo me oa? (Korintotɔwo II, 4:4, NW; Yesaya 43:10-12) Eye ne míede ŋugble le Yehowa ƒe nɔnɔme wɔnukuawo ŋu la, ɖe didi meɖoa mía me be míagblɔ eŋu nya na amewo oa? Nyateƒee, mɔnukpɔkpɔ gã bubu aɖeke megali wu be míakpe ɖe amewo ŋu woava dze si mía Fofo si le dziƒo eye woalɔ̃e abe alesi míedze sii helɔ̃e ene o.

17. Nukawo ŋue míaƒe tadedeagu na Yehowa ku ɖo, eye nukata wòle be míade ta agu nɛ le nuteƒewɔwɔ me?

17 Míaƒe tadedeagu na Yehowa gaku ɖe nu geɖe wu ŋu. Eku ɖe míaƒe agbenɔnɔ ƒe akpa sia akpa hã ŋu. (Kolosetɔwo 3:23) Ne míexɔ Yehowa be enye míaƒe Aƒetɔ Dziɖulagã vavã la, ekema míadi be míawɔ eƒe lɔlɔ̃nu le nusianu me—le míaƒe ƒomegbenɔnɔ me, le míaƒe dɔwɔƒewo, le míaƒe nuwɔwɔ ɖe amewo ŋu me, kple le alesi míezãa míaƒe vovoɣiwoe hã me. Míadi be míasubɔ Yehowa “kple dzi blibo,” le nuteƒewɔwɔ me. (Kronika I, 28:9) Tadedeagu sia meɖea mɔ ɖe dzi afãafã ƒe nuwɔna alo ɖe agbevenɔnɔ ŋu o—si anye alakpanuwɔwɔ be míadze abe amesiwo le Yehowa subɔm ene evɔ ahanɔ nuvɔ̃ gãwo wɔm le adzame. Nuteƒewɔwɔ maɖe mɔ na mí be míawɔ alakpanu sia o; lɔlɔ̃ ana míanyɔ ŋu nuwɔna ma. Mawuvɔvɔ̃ hã akpe ɖe mía ŋu. Biblia fia be mawusosroɖa alea ku ɖe mía kple Yehowa dome ƒomedodo kplikplikpli me nɔnɔ ɖaa ŋu.—Psalmo 25:14.

 Yehowa Sɔsrɔ̃

18, 19. Nukata wòle be míakpɔ mɔ be anya wɔ na amegbetɔ madeblibowo ŋutɔŋutɔ be woasrɔ̃ Yehowa Mawu?

18 Agbalẽ sia ƒe akpa ɖesiaɖe wu enu kple ta aɖe si ku ɖe alesi ‘míazu Mawu srɔ̃lawo abe lɔlɔ̃viwo ene’ ŋu. (Efesotɔwo 5:1) Ele vevie be míaɖo ŋku edzi be togbɔ be míenye ame madeblibowo hã la, míate ŋu asrɔ̃ mɔ deblibo siwo nu Yehowa zãa eƒe ŋusẽ le, wɔa nu le dzɔdzɔenyenye me, zãa eƒe nunya, eye wòɖea lɔlɔ̃ fiana le la. Aleke míewɔ nya be anya wɔ na mí ŋutɔŋutɔ be míasrɔ̃ Ŋusẽkatãtɔ la? Ðo ŋku edzi be Yehowa ƒe ŋkɔa gɔmesese fia mí be eyama va zua nusianu si wòlɔ̃ be yeazu be wòana eƒe tameɖoɖowo nava eme. Esɔ be eƒe ŋutete ma naa vɔvɔ̃ kple bubu deto yɔa mía me, gake ɖe wònye amesi míate ŋu asrɔ̃ kura oa? Ao.

19 Mawu ƒe nɔnɔme nue wòwɔ mí ɖo. (Mose I, 1:26) Le esia ta amegbetɔwo to vovo na nuwɔwɔ bubu siwo katã le anyigba dzi sasasã. Menye lãmenusese, agbedomenyiŋusẽ, alo nɔnɔme siwo ƒo xlã mí koe ʋãa mí míewɔa nu o. Yehowa na nunana xɔasi aɖe mí—tiatiawɔwɔblɔɖe. Togbɔ be gbɔdzɔgbɔdzɔwo le mía ŋu eye míede blibo o hã la, míekpɔ mɔ faa atia nusi míedi be míava zu. Ðe nèdi be yeanye amesi lɔ̃a ame, amesi dze nunya, kple ame dzɔdzɔe si zãa ŋusẽ ɖe mɔ nyuitɔ nua? Dzidzɔtɔe la, àte ŋu ava zu amesia ƒomevi tututu le Yehowa ƒe gbɔgbɔa ƒe kpekpeɖeŋu me! Bu nu nyui siwo esia ana nàte ŋu awɔ ŋu kpɔ.

20. Nu nyui kawoe ado go tso eme ne míesrɔ̃ Yehowa?

20 Wò nu adze Fofowò si le dziƒo ŋu, eye esia ado dzidzɔ na eƒe dzi. (Lododowo 27:11) Yehowa ate ŋu akpɔ ‘ŋudzedze blibo’ ɖe ŋuwò gɔ̃ hã, elabena esea wò ŋutetewo ƒe seɖoƒe gɔme. (Kolosetɔwo 1:9, 10) Eye ne èyi edzi le nɔnɔme nyuiwo tum ɖo le Fofowò lɔlɔ̃a sɔsrɔ̃ me la, atsɔ mɔnukpɔkpɔ gãwo ayra wòe. Àzu kekelitsoƒe le xexe doblukɔ sia si tsɔ eɖokui wɔ Mawu ƒe futɔe me. (Mateo 5:1, 2, 14) Àkpe asi ɖe eŋu be woana Yehowa ƒe amenyenye kɔkɔe la ƒe akpa sue aɖe naklẽ ɖe anyigba bliboa dzi. Bubu gã kae nye si!

 ‘Te Ðe Mawu Ŋu, eye Wòate Ðe Ŋuwò’

Neva eme be nàyi edzi anɔ tetem ɖe Yehowa ŋu ɖaa

21, 22. Mɔzɔzɔ si ŋu seɖoƒe mele o kae le amesiwo katã lɔ̃ Yehowa ŋgɔ?

21 Nuxlɔ̃ame bɔbɔe sia si woŋlɔ ɖe Yakobo 4:8 bia nu geɖe wu taɖodzinu aɖe si woaminya ko. Enye mɔzɔzɔ. Zi alesi míeyi edzi lé nuteƒewɔwɔ me ɖe asi ko la, mɔzɔzɔ ma mawu enu akpɔ o. Míawu tete ɖe Yehowa ŋu kplikplikpli nu gbeɖe o. Ne míagblɔe tututu la, nu geɖe anɔ anyi ɣesiaɣi si míasrɔ̃ tso eŋu. Mele be míatsɔe be agbalẽ sia fia nusiwo katã wòle be míanya tso Yehowa ŋu la mí o. Nya lae nye be nusiwo katã Biblia gblɔ tso mía Mawu ŋu me dzodzro ƒe akpa sue aɖe koe nye sia gɔme míedze! Eye Biblia la ŋutɔ gɔ̃ hã megblɔ nusiwo katã li míanya tso Yehowa ŋu la na mí o. Apostolo Yohanes gblɔ be ne ɖe woaŋlɔ nusiwo katã Yesu wɔ le eƒe anyigba dzi subɔsubɔdɔa me ɖe agbalẽ me la, anye ne “xexeame ŋutɔ mele ŋu te ge axɔ agbalẽ, siwo ŋlɔ ge woala o.” (Yohanes 21:25) Ne woate ŋu agblɔe alea tso Via ŋu la, ke aleke gbegbe esi woate ŋu agblɔ tso Fofoa ŋu asɔ gbɔ wu kura enye si!

22 Agbe tegbee nɔnɔ gɔ̃ hã mana míaɖo nusɔsrɔ̃ tso Yehowa ŋu ƒe seɖoƒe o. (Nyagblɔla 3:11) Eyata bu mɔnukpɔkpɔ gã si le  ŋgɔ na mí ŋu kpɔ ko. Kaka míanɔ agbe wòaɖo ƒe alafa geɖe, ƒe akpe geɖe, ƒe miliɔn geɖe, ƒe biliɔn geɖe gɔ̃ hã la, nusiwo míava nya tso Yehowa Mawu ŋu la asɔ gbɔ kura wu esi míenya fifia. Gake ɣemaɣi gɔ̃ hã míasee le mía ɖokui me be nu gbogbo aɖewo siwo mele xexlẽ me o gakpɔtɔ li wòle be míasrɔ̃. Didia anɔ mía me be míayi edzi asrɔ̃ nu geɖe, elabena susu geɖe anɔ mía si si ta wòle be míase le mía ɖokui me abe hakpala la ene, amesi gblɔ be: ‘Tete ɖe Mawu ŋu geɖe wu nyo nam ŋutɔ.’ (Psalmo 73:28) Agbe tegbee nɔnɔ ayɔ fũ kple gɔmesese kple nu vovovo siwo ŋu míate ŋu abu fifia o—eye tete ɖe Yehowa ŋu geɖe wu anye eƒe akpa si ado dzidzɔ na ame ɣesiaɣi wu.

23. Nukae wole dzi dem ƒo na wò be nàwɔ?

23 Neva eme be nàwɔ nu wòasɔ ɖe Yehowa ƒe lɔlɔ̃ si wòɖe fia wò fifia la nu, to alesi nàlɔ̃e tso dzi blibo, luʋɔ blibo, tamesusu blibo, kple ŋusẽ blibo mee la me. (Marko 12:29, 30) Neva eme be wò lɔlɔ̃ nɛ nayi edzi le nuteƒewɔwɔ me eye wòali ke sesĩe. Neva eme be nyametsotso siwo nàwɔ gbesiagbe, tso suetɔwo dzi vaseɖe gãtɔwo dzi, katã naɖee fia be gɔmeɖose ɖeka ma kee le kplɔwòm—be mɔ si akplɔ wò ayi mia kple Fofowò si le dziƒo dome ƒomedodo si me asẽ wu gbɔ la ko nàtia ɣesiaɣi. Ƒo wo katã ta la, neva eme be nàte ɖe Yehowa ŋu geɖe wu, eye wòava eme be eya hã nate ɖe ŋuwò—tso fifia tsɔ yi ɖe mavɔmavɔ me!