Dzo kpo yi emenuwo dzi

Dzo kpo yi emenuawo dzi

 TA 18

Nunya Si Le ‘Mawu Ƒe Nya La’ Me

Nunya Si Le ‘Mawu Ƒe Nya La’ Me

1, 2. “Lɛta” kae Yehowa ŋlɔ na mí, eye nukatae wòŋlɔe?

ÈÐO ŋku zi mamlɛtɔ si nèxɔ lɛta tso wò ame vevi aɖe gbɔ, amesi le didiƒe, la dzia? Dzidzɔ si míekpɔna ne míexɔ lɛta wɔdɔɖeamedzi aɖe tso míaƒe ame vevi aɖe gbɔ la wua gbɔgblɔ. Edzɔa dzi na mí be míase amea ŋkɔ anya alesi wòle, ase eƒe nuteƒekpɔkpɔwo, ahanya ɖoɖo siwo wɔm wòle. Kadodo siawo tea lɔlɔ̃tɔwo ƒoa ƒui, ne eganye didiƒee wole tso wo nɔewo gbɔ gɔ̃ hã.

2 Ekema nu bubu kae agate ŋu ahe dzidzɔ geɖe vɛ na mí wu be mía Mawu lɔlɔ̃a ƒe nya siwo woŋlɔ nasu mía si? Ne míagblɔe la, Yehowa ŋlɔ “lɛta” na mí—si nye eƒe Nya, Biblia la. Egblɔ amesi wònye, nusiwo wòwɔ va yi, nusiwo wòɖo be yeagawɔ, kple nu bubu geɖewo ɖe eme na mí. Yehowa tsɔ eƒe Nya la na mí elabena edi be míate ɖe ye ŋu. Mɔnu si nye nyuitɔ kekeakee mía Mawu si ƒe nunya ƒo ɖesiaɖe ta la tia tsɔ ƒo nu na míi. Alesi woŋlɔ Bibliae kple nusiwo le eme la ɖe eƒe nunya si bubu aɖeke mede enu o la fia.

Nukata Woŋlɔ Eƒe Nya La?

3. Mɔ ka dzie Yehowa to tsɔ Sea na Mose?

3 Ame aɖewo abia be, ‘Nukatae Yehowa metia mɔnu si awɔ dɔ ɖe ame dzi wu—abe eƒe gbe naɖi tso dziƒo tẽ ene—tsɔ ƒo nu na amewoe o?’ Le nyateƒe me la, Yehowa to eƒe dɔlawo dzi ƒo nu tso dziƒo tẽ le ɣeyiɣi aɖewo me. Le kpɔɖeŋu me, eƒo nu tẽ esime wòtsɔ Sea na Israel-viwo. (Galatiatɔwo 3:19) Gbe si ɖi tso dziƒo la ɖi vɔvɔ̃—vɔvɔ̃ ɖo Israel-viwo ale gbegbe be wobia be Yehowa nagaƒo nu na yewo le mɔ ma nu o ke boŋ wòaƒo nu na yewo to Mose dzi. (Mose II, 20:18-20) Eyata Mose ye woƒo nu gblɔ Sea, si me sedede siwo ade 600 nɔ, la me nya sia nya na tẽ.

4. Ðe nusita nyawo gbɔgblɔ kple nu na dzidzimewo manye mɔnu si dzi woate ŋu aka ɖo le Mawu ƒe seawo tsɔtsɔna me o la me.

4 Gake ne ɖe womeŋlɔ Sea ɖi kura o ɖe? Anye ne ɖe Mose  ate ŋu aɖo ŋku seawo me nya sia nya dzi pɛpɛpɛ agblɔe na dukɔa tsitotsito vodada mawɔmawɔea? Ke megbeviwo hã ɖe? Ðe wòle be woaɖo ŋu ɖe nya siwo wogblɔ kple nu ko ŋua? Ema manye mɔnu si dzi woaka ɖo si dzi woato atsɔ Mawu ƒe sewo ana amewo o. Bu nusi adzɔ ŋu kpɔ ne wòanye be nègblɔ nya ɖe tome na amesiwo ɖo fli legbee la dometɔ gbãtɔ be eya hã nagblɔe na ame evelia eye woanɔ egblɔm na wo nɔewo vaseɖe flia ƒe nuwuwu. Anɔ eme be nya si amesi le flia ƒe nuwuwu ase la ato vovo kura na nya si nègblɔ na ame gbãtɔ. Nya siwo Mawu gblɔ le eƒe Sea me la meɖo afɔku sia me o.

5, 6. Nukae Yehowa bia tso Mose si be wòawɔ le Yeƒe nyawo ŋu, eye nukatae wònyo be Yehowa ƒe Nya si su mía si la nye nuŋlɔɖi?

5 Yehowa tiae nunyatɔe be yeana woaŋlɔ yeƒe nyawo ɖi. Ede se na Mose be: “Ŋlɔ nya siawo ɖi; elabena nya siawo dzi mebla nu kpli wò kpakple Israel-viwo ɖo.” (Mose II, 34:27) Aleae Biblia la ŋɔŋlɔ dze egɔmee, le ƒe 1513 D.M.Ŋ. me. Le ƒe siwo wu 1,610 siwo kplɔe ɖo tso ɣemaɣi la, Yehowa ‘ƒo nu zi geɖe le nya ƒomevi geɖewo ŋu’ na amegbetɔ siwo ade 40 ale be woŋlɔ Biblia la. (Hebritɔwo 1:1) Le ɣeyiɣi mawo me la, nugbugbɔgaŋlɔla dovevienuwo tsɔ beléle tɔxɛ kpɔ gbãtɔwo dzi gbugbɔ ŋlɔe ɖi pɛpɛpɛ bene woakpɔ Ŋɔŋlɔawo ta.—Ezra 7:6; Psalmo 45:2.

6 Yehowa ve mía nu ŋutɔ be wòto nuŋlɔɖiwo dzi ƒo nu na mí. Èxɔ lɛta aɖe si ŋu nède asixɔxɔe vevie—ɖewohĩ le esi akɔfanamenya siwo tututu nèhiã lae le eme ta—ale be nèdzrae ɖo xlẽe gaxlẽe zi geɖe kpɔa? Aleae Yehowa ƒe “lɛta” si wòŋlɔ na mí la le. Esi Yehowa na woŋlɔ eƒe nyawo ɖi ta la, míete ŋu xlẽnɛ ɣesiaɣi eye míedea ŋugble le emenyawo ŋu. (Psalmo 1:2) Míate ŋu akpɔ ‘akɔfafa si tso Ŋɔŋlɔawo me’ ɣesiaɣi si míehiãe.—Romatɔwo 15:4.

Nukata Wònye Amegbetɔwoe Wozã le Eŋɔŋlɔ Me?

7. Aleke Yehowa ɖe eƒe nunya fia le amegbetɔwo zazã be woaŋlɔ eƒe nyawoe me?

7 Yehowa ɖe eƒe nunya fia be wòna amegbetɔwo ŋlɔ eƒe Nya  la ɖi. Bu esia ŋu kpɔ: Ne mawudɔlawoe Yehowa zã woŋlɔ Biblia la, anye ne ɖe nyawo awɔ dɔ ɖe ame dzi abe alesi wòle enea? Nyateƒee, mawudɔlawo ate ŋu azã woƒe nukpɔsusu deŋgɔa atsɔ aƒo nu tso Yehowa ŋui, woate ŋu agblɔ alesi woa ŋutɔwo wotsɔ wo ɖokui ɖo anyi na esubɔsubɔe, eye woate ŋu aka nya ta tso Mawu subɔla wɔnuteƒe siwo nɔ anyi va yi hã ŋu ya. Gake ɖe míate ŋu ase gbɔgbɔ me nuwɔwɔ deblibowo, amesiwo ƒe sidzedze, nuteƒekpɔkpɔ, kple ŋusẽ de ŋgɔ boo wu mía tɔ la ƒe nuwo gɔmea?—Hebritɔwo 2:6, 7.

‘Ŋɔŋlɔawo katã tso Mawu ƒe gbɔgbɔ me’

8. Mɔ ka nue wona Biblia ŋlɔlawo zã woa ŋutɔwo ƒe tamesusu le? (Kpɔ etenuŋɔŋlɔa hã.)

8 To amegbetɔwo zazã be woaŋlɔ eƒe nyawo ɖi me la, Yehowa na nusi tututu míehiã la su mía si—nuŋlɔɖi si ‘tso Mawu ƒe gbɔgbɔ me’ evɔ wògasɔ pɛpɛpɛ ɖe amegbetɔwo ƒe nɔnɔme nu hã. (Timoteo II, 3:16) Aleke wòwɔ esiae? Le go geɖe me la, edze abe ɖe wòɖe mɔ na nuŋlɔlawo be woazã woa ŋutɔwo ƒe tamesusu le alesi woatia ‘nya viviwo kple nyateƒenyawo’ aŋlɔ ɖii me ene. (Nyagblɔla 12:10, 11) Esia na míese nusita nyawo gbɔgblɔ mɔnu ƒe atsyã vovovowo le Biblia me ɖo la gɔme; afisi eŋlɔlawo tso kple woƒe nɔnɔmewo kpakple woƒe amenyenye dze le woƒe nuŋɔŋlɔwo me. * Ke hã “Gbɔgbɔ kɔkɔe lae ʋã Mawu ƒe ame kɔkɔewo, hafi wogblɔ nya ɖi.” (Petro II, 1:21) Eyata enye nyateƒe be nusiwo woŋlɔ ɖi wòva su mía si la nye “Mawu ƒe nya.”—Tesalonikatɔwo I, 2:13.

9, 10. Nukatae amegbetɔwo zazã le Biblia ŋɔŋlɔ me la na be wòléa dzi na ame heʋãa ame?

9 Amegbetɔwo zazã woaŋlɔ Biblia la na be emenyawo léa dzi na ame heʋãa ame. Eŋlɔlawo nye amesiwo si seselelãme siwo ɖi mía tɔ le. Esi woawo hã wonye ame madeblibowo ta la, wodo go tetekpɔ kple nuteɖeamedzi siwo ɖi esiwo vaa míawo hã dzi. Le go aɖewo me la, Yehowa ƒe gbɔgbɔ ʋã wo woŋlɔ nu  tso woa ŋutɔwo ƒe seselelãmewo kple fukpekpewo ŋu. (Korintotɔwo II, 12:7-10) Eyata wozã nya siwo ku ɖe woa ŋutɔwo tututu ŋu, nya siwo mawudɔla aɖeke mate ŋu agblɔ tso eɖokui ŋu o.

10 Le kpɔɖeŋu me, bu Israel-fia Dawid ŋu kpɔ. Esi Dawid wɔ nuvɔ̃ gã aɖewo megbe la, ekpa ha si me wòɖe eƒe dzimenyawo gblɔ le, si me wònɔ Mawu ƒe tsɔtsɔke biam le. Eŋlɔ bena: “Le tsi nam keŋkeŋ tso nye vodada me, eye naklɔ ŋunye tso nye nuvɔ̃ me! Elabena nye dzidadawo la, medze si wo, eye nye nuvɔ̃ le ŋkunye me ɖaa. Kpɔ ɖa, vodada me wodzim ɖo, eye nuvɔ̃ me danye fɔ nye fu ɖo. Megatsɔm ƒu gbe le ŋkuwò me o, eye megaxɔ wò gbɔgbɔ kɔkɔe la le asinye o! Vɔsawo na Mawu wonye gbɔgbɔ, si wote ɖe anyi; Mawu, màdo vlo dzi gbagbã, si tugu la o.” (Psalmo 51:4, 5, 7, 13, 19) Ðe mèse alesi gbegbe eŋlɔla nɔ nu xamee la le ɖokuiwò me oa? Ðe menye amegbetɔ madeblibo koe ate ŋu aɖe eƒe dzimenya siawo agblɔ oa?

Nukata Wònye Agbalẽ si Ku Ðe Amewo Ŋu?

11. Agbemenudzɔdzɔ ŋutɔŋutɔ ƒe kpɔɖeŋu kawo ƒomeviwoe wode Biblia me “le míaƒe nufiafia ta”?

11 Nu bubu aɖe hã gali si na be Biblia la wɔa dɔ ɖe ame dzi. Agbalẽa me nyawo ƒe akpa gã aɖe ku ɖe amewo ŋu—amesiwo nɔ anyi kpɔ ŋutɔŋutɔ—amesiwo subɔ Mawu kple amesiwo mesubɔe o. Míexlẽa nu tso woƒe nuteƒekpɔkpɔwo, nɔnɔme sesẽwo, kple dzidzɔwo ŋu. Míekpɔa nusiwo do go tso tiatia siwo wowɔ le agbe me la me. Wode nudzɔdzɔ siawo katã eme “le míaƒe nufiafia ta.” (Romatɔwo 15:4) Yehowa toa agbemenudzɔdzɔ ŋutɔŋutɔ ƒe kpɔɖeŋu siawo dzi fiaa nu mí le mɔ si wɔa dɔ ɖe míaƒe dzi dzi la nu. Bu eƒe kpɔɖeŋu aɖewo ŋu kpɔ.

12. Mɔ ka nue Biblia ƒe nuŋlɔɖi siwo ku ɖe amesiwo mewɔ nuteƒe o ŋu kpena ɖe mía ŋu le?

12 Biblia ƒo nu tso amegbetɔ siwo mewɔ nuteƒe o, esiwo vɔ̃ɖi gɔ̃ hã, kple nusiwo dzɔ ɖe wo dzi ŋu. Le nudzɔdzɔ mawo me la, míekpɔa nɔnɔme manyomanyo siwo dze le woƒe nuwɔna me, eye ena míesea wo gɔme bɔbɔe. Le kpɔɖeŋu me, nuteƒemawɔmawɔ ƒe se kae ate ŋu akpɔ ŋusẽ ɖe ame dzi wu nuwɔna sia ƒe  kpɔɖeŋu ŋutɔŋutɔ si woŋlɔ ɖi na mí tso Yuda ŋu, esime wòɖo nugbe vɔ̃ɖivɔ̃ɖi ɖe Yesu ŋu hefia eyome mɔ? (Mateo 26:14-16, 46-50; 27:3-10) Nuŋlɔɖiwo abe esia ene la dea dzi gbɔ na mí wu, eye wòkpena ɖe mía ŋu míedea dzesi nɔnɔme gbegblẽwo hetsria wo.

13. Mɔ ka nue Biblia kpena ɖe mía ŋu be nɔnɔme nyuiwo gɔmesese nanɔ bɔbɔe na mí le?

13 Biblia ƒo nu tso Mawu subɔla wɔnuteƒe geɖewo hã ŋu. Míexlẽa nu tso woƒe ɖokuitsɔtsɔna kple nuteƒewɔwɔ ŋu. Míekpɔa nɔnɔme siwo wòhiã be míatu ɖo be míate ŋu adze Mawu ŋu la ƒe kpɔɖeŋu ŋutɔŋutɔwo le wo me. Le kpɔɖeŋu me, bu xɔse ŋu kpɔ. Biblia ɖe nusi xɔse nye la me eye wògblɔ alesi wòhiã vevie bene míaƒe nu nadze Mawu ŋu na mí. (Hebritɔwo 11:1, 6) Gake xɔse ɖeɖe fia ŋutɔŋutɔ ƒe kpɔɖeŋuwo hã gale Biblia me na mí. Bu xɔse si Abraham ɖe fia esime wòlɔ̃ be yeatsɔ Isak asa vɔe ŋu kpɔ. (Mose I, ta 22; Hebritɔwo 11:17-19) To nuŋlɔɖi siawo dzi la, gɔmesese si le nya “xɔse” ŋu la me kɔna ɖe edzi na mí wu eye míesea egɔme hã bɔbɔe wu. Aleke gbegbe Yehowa ɖe nunya fiae nye si be menye ɖeko wòxlɔ̃ nu mí be míatu nɔnɔme nyuiwo ɖo ko o ke ena alesi amewo ɖee fiae ƒe kpɔɖeŋu ŋutɔŋutɔwo hã mí!

14, 15. Nukae Biblia gblɔ na mí tso nyɔnu aɖe si va gbedoxɔa me ŋu, eye nukae míesrɔ̃ tso Yehowa ŋu le nuŋlɔɖi sia me?

14 Zi geɖe amewo ƒe agbemenudzɔdzɔ ŋutɔŋutɔ siwo le Biblia me la fiaa nane mí tso amesi ƒomevi Yehowa nye ŋu. Bu nusi míexlẽ tso nyɔnu aɖe si Yesu kpɔ le gbedoxɔa me ŋu kpɔ. Esi Yesu bɔbɔ nɔ afisi te ɖe nudzɔɖakawo ŋu la, enɔ ŋku lém ɖe amesiwo nɔ ga dam ɖe wo me ŋu. Kesinɔtɔ geɖe va, eye woda ‘ga si tsi dzi na wo’ ɖe eme. Gake Yesu ƒe ŋku va nɔ ahosi dahe aɖe ŋu. Nusi wòda ɖe emee nye ‘lepta eve, siwo ƒe home le sue ŋutɔ.’ * Esiae nye ga mamlɛ si susɔ ɖe esi. Yesu, amesi ɖe Yehowa  ƒe susu fia bliboe le nyawo ŋu la, gblɔ be: “Ahosi dahe sia ƒe nusi wòtsɔ da ɖe eme la, wu nusi ame siawo tsɔ da ɖe nudzɔɖaka la me.” Nusi nya mawo fia enye be nusi wòda ɖe eme la wu nusi ame bubuawo katã da ɖe eme ne wotsɔ wo ƒo ƒui.—Marko 12:41-44; Luka 21:1-4; Yohanes 8:28.

15 Ðe meɖe dzesi be le amesiwo katã va gbedoxɔa me gbemagbe dome la, ahosi sia koe woyɔ ƒo nu tso eŋu le Biblia me oa? To kpɔɖeŋu sia dzi la, Yehowa le mía fiam be Mawu si kpɔa ŋudzedze ɖe nu ŋu ye yenye. Edzɔa dzi nɛ be yeaxɔ míaƒe nunana siwo tso luʋɔ blibo me, aleke ke woɖale ne wotsɔe sɔ kple nusi ame bubuwo te ŋu na o. Mɔ nyuitɔ kekeake si dzi Yehowa ate ŋu ato aɖe nyateƒenya sia si léa dzi na ame afia mí enye ema!

Nusiwo Womeŋlɔ ɖe Biblia me O

16, 17. Aleke Yehowa ɖe eƒe nunya fia le nusiwo wòɖo be yemade yeƒe Nya la me o la gɔ̃ hã mee?

16 Ne èle lɛta ŋlɔm na wò lɔlɔ̃tɔ aɖe la, nyawo ƒe agbɔsɔsɔme aɖe koe nàte ŋu aŋlɔ. Eyata èbua nuwo ŋu nyuie hetiaa esiwo nàŋlɔ. Nenema ke Yehowa hã ɖoe be yeaƒo nu tso ame aɖewo kple nudzɔdzɔ aɖewo ko ŋu le yeƒe Nya la me. Gake le nuŋlɔɖi mawo me la, menye ɣesiaɣie Biblia gblɔa nyawo ƒe akpa sia akpa tsitotsito o. (Yohanes 21:25) Le kpɔɖeŋu me, ne Biblia le nu ƒom tso Mawu ƒe ʋɔnudɔdrɔ̃ ŋu la, anɔ eme be míakpɔ ŋuɖoɖo na biabia siwo katã ava susu me na mí le nya sia ŋu o. Míekpɔa Yehowa ƒe nunya le nusiwo wòɖo be yemaƒo nu tso wo ŋu le yeƒe Nya la me o gɔ̃ hã me. Le mɔ ka nu?

17 Alesi woŋlɔ Bibliae la nye míaƒe dzi ƒe nɔnɔme dodo kpɔ. Hebritɔwo 4:12 gblɔ be: “Mawu ƒe nya [alo, gbedasi] la le agbe, eye wòsẽa ŋu, eye wòɖana wua yi nuevee sia yi nuevee, eye wòƒona ɖe ame yina ɖe eme, halase esime wòmãa luʋɔ kple gbɔgbɔ . . . me, eye wònye tamesusuwo kple dzimedidiwo ƒe ʋɔnudrɔ̃la.” Biblia ƒe gbedasia ƒona ɖe ame yina ɖe ememe, heɖea tamesusu kple taɖodzinu si tututu le mía si la fiana. Amesiwo  xlẽa Biblia kple dzimedidi be yewoakpɔ vodada le eme la kpɔa nuɖiaɖia le nuŋlɔɖi siwo ŋu nya womegblɔ tsitotsito alesi dze wo ŋu o la me. Amesiawo ate ŋu ahe nya gɔ̃ hã nenye be vavãe wònye be Yehowa lɔ̃a mí, be enye nunyala gã, kple dzɔdzɔetɔ.

18, 19. (a) Ne Biblia ƒe nuŋlɔɖi aɖe fɔ biabia aɖewo ɖe te siwo míate ŋu akpɔ ŋuɖoɖo na enumake o la, nukata mele be wòaɖe fu na mí o? (b) Nukae hiã bene míate ŋu ase Mawu ƒe Nya la gɔme, eye aleke esia ɖo kpe Yehowa ƒe nunya gã la dzii?

18 Gake ne míetsɔ dzi ƒe nɔnɔme nyui srɔ̃ Bibliae nyuie la, míeva kpɔa Yehowa le gɔmesese si nu Biblia bliboa ɖe eyama fia le la nu. Eyata ne nuŋlɔɖi aɖe fɔ biabia aɖewo ɖe te siwo míate ŋu akpɔ ŋuɖoɖo na enumake o la, meɖea fu na mí o. Le kpɔɖeŋu me: Ne míele nɔnɔmetata si wofli kakɛkakɛe fɔm kpe la, ɖewohĩ gbã la míakpɔ kakɛ aɖe adze sii o alo míanya afisi míadee wòasɔ ɖe enu o. Ke hã anɔ eme be míefɔ geɖe kpe siwo ate ŋu ana míakpɔ alesi nɔnɔmetata bliboa anɔ. Nenema ke ne míele Biblia srɔ̃m la, ʋɛʋɛʋɛ la, míeva kpɔa Mawu si ƒomevi Yehowa nye, eye nuwo me va kɔna na mí nyuie wu. Ne gbã míete ŋu le nuŋlɔɖi aɖe gɔme sem tututu o alo míekpɔ alesi wòsɔ ɖe Mawu ƒe amenyenye nu o la, nusiwo míesrɔ̃ tso Biblia me xoxo la fiaa nu geɖe mí tso Yehowa ŋu si akpe ɖe mía ŋu míakpɔe be enye Mawu si lɔ̃a mí ɣesiaɣi, amesi wɔa nusi sɔ, eye wònye dzɔdzɔetɔ le nusianu me.

19 Eyata ne míedi be míase Mawu ƒe Nya la gɔme la, ahiã be míaxlẽe eye míatsɔ dzi ƒe nɔnɔme nyui kple susu nyui asrɔ̃e. Ðe esia meɖo kpe Yehowa ƒe nunya gã dzi oa? Amegbetɔ siwo nye nunyalawo ate ŋu aŋlɔ agbalẽ si gɔme “nunyalawo kple nugɔmeselawo” ko ate ŋu ase. Gake be woaŋlɔ agbalẽ aɖe si bia be dzi ƒe nɔnɔme nyui nanɔ ame si hafi woate ŋu ase egɔme ya la—ke Mawu ƒe nunya koe ate ŋui!—Mateo 11:25.

Agbalẽ si ƒe ‘Nunya Nyo na Agbenɔnɔ’

20. Nukata Yehowa ɖeka koe ate ŋu afia mɔ nyuitɔ kekeake si nu míanɔ agbe ɖo la mí, eye nukae le Biblia me si ate ŋu akpe ɖe mía ŋu?

20 Yehowa fiaa mɔ nyuitɔ kekeake si nu míanɔ agbe ɖo la mí  le eƒe Nya la me. Eya si nye mía Wɔla la nya míaƒe nuhiahiãwo wu mía ŋutɔwo. Eye amegbetɔwo ƒe nuhiahiã vevitɔwo—siwo dometɔ aɖewoe nye didi be woalɔ̃ mí, be míakpɔ dzidzɔ, kple be mía kple amewo dome nanɔ nyuie—metrɔ o. ‘Nunya si nyo na agbenɔnɔ’ bɔ ɖe Biblia me fũ siwo ate ŋu akpe ɖe mía ŋu be agbe nadze edzi na mí. (Lododowo 2:7) Le nusrɔ̃gbalẽ sia ƒe akpa vovovoawo la, ta ɖeka le akpawo dometɔ ɖesiaɖe me si fia alesi míate ŋu awɔ Biblia ƒe aɖaŋuɖoɖo siwo me nunya le ŋudɔe le mía ŋutɔwo míaƒe agbenɔnɔ me, gake mina míagakpɔ esia ƒe kpɔɖeŋu ɖeka aɖe ko ɖa.

21-23. Nuxlɔ̃ame si me nunya le kae ate ŋu akpe ɖe mía ŋu míatsri nyaléleɖedɔme kple dɔmedzoedodo?

21 Ède dzesii kpɔ be amesiwo léa nya ɖe dɔme eye woléa dɔmedzoe ɖi la gblẽa nu le woa ŋutɔwo ɖokui ŋu zi geɖea? Agba gã aɖe tsɔtsɔ le agbe mee nyaléleɖedɔme nye. Ne míelé nya ɖe dɔme la, exɔa míaƒe susu me, enaa míete ŋu ɖea dzi ɖi o, eye wògblẽa míaƒe dzidzɔ me na mí. Atikewɔwɔ me nunya ɖee fia be dziku léle ɖi ate ŋu ana wòanɔ bɔbɔe be woadze dzidɔ kple dɔlémafɔe bubu geɖewo. Ɣeyiɣi didi aɖe do ŋgɔ hafi woava ke ɖe atikewɔwɔ me nunya sia ŋu la, Biblia ya gblɔ nya siawo siwo me nunya le be: “Wò dɔmedzoe nu nefa, eye nadzudzɔ dzikudodo.” (Psalmo 37:8) Gake aleke míate ŋu awɔ esiae?

22 Mawu ƒe Nya la ɖo aɖaŋu sia si me nunya le, be: “Amesi gbɔa dzi blewu la, [nugɔmesese yi eme ʋĩ le esi, NW] eye bubu wònye nɛ, nenye be, eɖe kɔ ɖa le dzidada ŋu.” (Lododowo 19:11) Nugɔmesese yi eme ʋĩ nye ŋutete be woakpɔ nu ayi ŋgɔe wu nusi le dzedzem ko, be woakpɔ nusi medzena gaglãa o adze sii nyuie. Nugɔmesese yi eme ʋĩ naa wozua nugɔmesela, elabena ate ŋu akpe ɖe mía ŋu míanya nusita ame aɖe ƒo nu alo wɔ nu le mɔ aɖe nu. Agbagbadzedze be míase nusita amea wɔ nane, eƒe seselelãmewo, kple eƒe nɔnɔmewo gɔme ate ŋu akpe ɖe mía ŋu míaɖe nukpɔsusu kple seselelãme masɔmasɔ siwo anɔ mía si ɖe eŋu la ɖa.

23 Nuxlɔ̃ame bubu sia gale Biblia me na mí be: ‘Miyi edzi miahe adodo kple mia nɔewo, eye miatsɔ ake mia nɔewo faa.’  (Kolosetɔwo 3:13) Nyagbɔgblɔ ‘miyi edzi miahe adodo kple mia nɔewo’ fia be míagbɔ dzi ɖi na amewo, eye míaɖe mɔ ɖe woƒe nɔnɔme siwo anye ne ado dziku na mí hafi la ŋu. Mɔɖeɖeɖenuŋu alea ate ŋu akpe ɖe mía ŋu be míaganɔ nya suesuewo lém ɖe dɔme o. “Miatsɔ ake” fia be woadzudzɔ dzikudodo. Mía Mawu nunyala la nyae be ehiã be míatsɔ ake mía nɔewo ne susu nyui aɖe li na tsɔtsɔke. Esia menye na woawo ko ƒe viɖe o ke ana be mía ŋutɔwo hã míavo le susu kple dzi me. (Luka 17:3, 4) Nunya ka gbegbee nye si le Mawu ƒe Nya la me!

24. Nukae dona tsoa eme ne míetrɔ míaƒe agbenɔnɔ wòsɔ ɖe Mawu ƒe nunya nu?

24 Lɔlɔ̃ gã si le Yehowa si lae ʋãe be wòdi be yeaɖo dze kpli mí. Etia mɔnu nyuitɔ kekeake—si nye “lɛta” si wòŋlɔ to amegbetɔwo dzi le eƒe gbɔgbɔ kɔkɔea ƒe mɔfiafia te. Esia na be Yehowa ŋutɔ ƒe nunya dze le agbalẽ bliboa me. Eƒe nunya sia nye nusi dzi ‘míate ŋu aka ɖo ŋutɔŋutɔ.’ (Psalmo 93:5) Esi míeyi edzi le míaƒe agbenɔnɔ trɔm be wòasɔ ɖe enu eye míeyi edzi le efiam ame bubuwo hã la, ewɔnɛ be míetena ɖe mía Mawu, nuwokatãnyala la ŋu. Le ta si kplɔe ɖo me la, míadzro Yehowa ƒe nunya gogloa ƒe kpɔɖeŋu ɖedzesi bubu aɖe hã me: eƒe ŋutete be wòagblɔ nusiwo adzɔ le etsɔme ɖi eye be wòana eƒe tameɖoɖowo nava eme.

^ mm. 8 Le kpɔɖeŋu me, Dawid si nye alẽkplɔla la zã kpɔɖeŋu siwo ku ɖe alẽkpɔkplɔ ŋu. (Psalmo 23) Mateo si nye nudzɔla gblɔ nya geɖe tso nuwo ƒe xexlẽme kple woƒe home ŋu. (Mateo 17:27; 26:15; 27:3) Luka si nye atikewɔla zã nya siwo ɖe eƒe nunyanya le dɔlélewo ŋu fia.—Luka 4:38; 14:2; 16:20.

^ mm. 14 Gaku si nye lepta la nye Yudatɔwo ƒe gaku suetɔ kekeake si wozãna ɣemaɣi. Lepta eve ƒe home enye ŋkeke ɖeka ƒe dɔwɔfetu mama ɖe akpa 64 me ƒe akpa ɖeka. Gaku eve siawo mate ŋu aƒle atsutsurɔe ɖeka, si nye xevi si ƒe asi bɔbɔ wu ɖesiaɖe, si ame dahewo tsɔ ɖaa nui, la gɔ̃ hã o.