1-3. (a) Aleke Salomo ɖe nunya si tɔgbe mebɔ o fia le alesi wòkpɔ nyaʋiʋli si ku ɖe amesi nye vidzĩ aɖe dada ŋu ƒe nya gbɔe me? (b) Nukae Yehowa do ŋugbe be yeana mí, eye biabia kawoe fɔ ɖe te?

NYA sesẽ aɖee dzɔ—nyɔnu eve nɔ dzre wɔm ɖe vidzĩ aɖe ta. Nyɔnuawo nɔ aƒe ɖeka me, wo dometɔ ɖesiaɖe dzi ŋutsuvi, eye ŋkeke ʋɛ aɖe koe tso wo dome. Vidzĩawo dometɔ ɖeka ku, eye fifia nyɔnuawo dometɔ ɖesiaɖe le gbɔgblɔm be yee nye vidzĩ gbagbea dada. * Ðasefo aɖeke meli si kpɔ nusi dzɔ la teƒe o. Anɔ eme be wotsɔ nyaa yi ʋɔnudrɔ̃ƒe sue gake womete ŋu kpɔ ta nɛ o. Mlɔeba la, wotsɔ nyaʋiʋlia yi Salomo, si nye Israel-fia gbɔe. Ðe wòate ŋu aʋu go nyateƒea?

2 Esi Salomo ɖo to nyɔnuawo ƒe nyahehea sẽ la, ebia be woatsɔ yi vɛ. Eye esi wòdze abe ɖe wòɖoe kplikpaa ene la, eɖe gbe be woafe ɖevia me ɖe eve, eye woatsɔ afã afã ana nyɔnuawo dometɔ ɖesiaɖe. Enumake vidadaa ŋutɔ ɖe kuku na fia la be wòatsɔ vidzĩa—via si wòlɔ̃ vevie la—ana nyɔnu kemɛa. Gake nyɔnu evelia yi edzi nɔ tɔ tem ɖe edzi be woafe ɖevia me. Azɔ Salomo kpɔ nyateƒea. Enya alesi vidada ƒe dɔme trɔna ɖe eƒe dɔmevi ŋui, eye wòzã sidzedze ma tsɔ kpɔ nyaʋiʋlia gbɔe. Bu alesi vidadaa ƒe dzi adze emee, esi Salomo tsɔ vidzĩa nɛ eye wògblɔ be, ‘eyae nye dadaa’ ŋu kpɔ.—Fiawo I, 3:16-27.

3 Ðe menye nunya si tɔgbe mebɔ o enye ma oa? Esi ameawo se alesi Salomo kpɔ nyaa gbɔe la, ewɔ nuku na wo eye vɔvɔ̃ ɖo wo, “elabena wokpɔ be, Mawu ƒe nunya le eme.” Ẽ, Salomo ƒe nunya la nye nusi wòxɔ tso Mawu gbɔ. Yehowa tsɔ “dzi  nyanu, si sea nu gɔme” nɛ. (Fiawo I, 3:12, 28) Ke míawo hã ɖe? Ðe míawo hã míate ŋu axɔ nunya si tso Mawu gbɔa? Ẽ, míate ŋui, elabena gbɔgbɔ ʋã Salomo wòŋlɔ be: “Yehowa naa nunya.” (Lododowo 2:6) Yehowa do ŋugbe be yeatsɔ nunya—ŋutete be woatsɔ sidzedze, nugɔmesese, kple vovototodedenume ade dɔwɔwɔ si ɖea vi me—ana amesiwo dinɛ tso dzi dzadzɛ me. Gake aleke míawɔ be nunya sia si tso dziƒo nava su mía si? Eye aleke míate ŋu azãe le míaƒe agbe mee?

‘Ƒle Nunya’—Alekee?

4-7. Nudidi ene kawoe hiã bene nunya nasu mía si?

4 Ðe wòle be míanye susuɖaɖɛtɔwo alo be míanye agbalẽnyalagãwo hafi Mawu ƒe nunya nasu mía sia? Ao. Yehowa lɔ̃ faa be yeana yeƒe nunya mí metsɔ le eme nɔnɔme si me míele le agbe me alo afisi míede suku ɖoe o. (Korintotɔwo I, 1:26-29) Gake míawoe wòle be míawɔ afɔɖeɖea, elabena Biblia de dzi ƒo na mí be ‘míaƒle nunya.’ (Lododowo 4:7) Aleke míate ŋu awɔ esiae?

5 Gbã la, ehiã be míavɔ̃ Mawu. Lododowo 9:10 gblɔ be: “Yehowa-vɔvɔ̃ enye nunya ƒe gɔmetoto.” Mawu vɔvɔ̃ enye nunya vavã ƒe gɔmeɖoɖoanyi. Nukatae? Ðo ŋku edzi be nunya enye ŋutete be woatsɔ sidzedze ade dɔwɔwɔ si ɖea vi me. Be woavɔ̃ Mawu mefia be woahe ɖa le egbɔ le ŋɔdziléame ta o, ke boŋ be woade ta agu nɛ le sisiɖa, bubu deto, kple kakaɖeamedzi me. Vɔvɔ̃ sia enye vɔvɔ̃ nyuitɔ eye ekpɔa ŋusẽ ɖe ame dzi vevie. Eʋãa mí be míatrɔ míaƒe agbenɔnɔ wòasɔ kple Mawu ƒe lɔlɔ̃nu kple eƒe mɔwo ƒe sidzedze si su mía si. Nuwɔna aɖeke megali si me nunya le wu esia o, elabena Yehowa ƒe dzidzenuwo hea viɖe gbogbotɔ kekeake vɛ na amesiwo wɔa wo dzi.

6 Evelia, ele be míanye ɖokuibɔbɔlawo eye míanya míaƒe ŋutetewo ƒe seɖoƒe. Mawu ƒe nunya mate ŋu asu mía si ne míenye ɖokuibɔbɔlawo o. (Lododowo 11:2) Nukata wòle nenema? Ne míenye ɖokuibɔbɔlawo la, míalɔ̃ ɖe edzi bɔbɔe be menye nusianue míenya o, be menye ɣesiaɣie míaƒe nukpɔsusuwo sɔna o, eye be ehiã be míanya nusi nye Yehowa ƒe susu le nyawo ŋu. Yehowa “tsia tre ɖe dadalawo ŋuti,” ke edzɔa dzi  nɛ be yeana nunya amesiwo bɔbɔ wo ɖokui ɖe anyi le dzi me.—Yakobo 4:6.

Be Mawu ƒe nunya nasu mía si la, ele be míadze agbagba aku nu me atsɔ adii

7 Nu etɔ̃lia si le vevie enye Mawu ƒe Nya si woŋlɔ la sɔsrɔ̃. Yehowa ɖe eƒe nunya fia le eƒe Nya la me. Be eƒe nunya ma nasu mía si la, ele be míadze agbagba aku nu me adii. (Lododowo 2:1-5) Nudidi enelia enye gbedodoɖa. Ne míebia tso dzi anukwaretɔ me be Mawu nana nunya mí la, ana mí faa dɔmenyotɔe. (Yakobo 1:5) Magbe gbe siwo míedona ɖa be wòana eƒe gbɔgbɔa nakpe ɖe mía ŋu la ŋuɖoɖo o. Eye eƒe gbɔgbɔa ate ŋu akpe ɖe mía ŋu míake ɖe kesinɔnu siwo le eƒe Nya la me ŋu, si ate ŋu akpe ɖe mía ŋu be míakpɔ kuxiwo gbɔ, míaƒo asa na afɔkuwo, eye míawɔ tiatia siwo me nunya le.—Luka 11:13.

8. Ne Mawu ƒe nunya su mía si vavã la, nukawo mee wòadze le?

8 Abe alesi míede dzesii le Ta 17 lia me ene la, Yehowa ƒe nunya sɔna ɣesiaɣi na agbenɔnɔ. Eyata ne Mawu ƒe nunya su mía si vavã la, adze le alesi míewɔa nui me. Nusrɔ̃la Yakobo ɖɔ mawumenunya ƒe kutsetsewo esi wòŋlɔ be: “Nunya si tso dziƒo la, gbã la, ele dzadzɛ, emegbe edia ŋutifafa, esea nu gɔme na ame, elɔ̃na faa be yeaɖo to, nublanuikpɔkpɔ kple kutsetse nyuiwo yɔe fũ, medea vovototo ame me o, alakpa mele eme o.” (Yakobo 3:17, NW) Esi míele Mawu ƒe nunya ƒe akpa siawo dometɔ ɖesiaɖe me dzrom la, asɔ be míabia mía ɖokui be, ‘Ðe mezãa nunya si tso dziƒo le nye agbenɔnɔ mea?’

“Ele Dzadzɛ, Emegbe Edia Ŋutifafa”

9. Nukae wòfia be woanɔ dzadzɛ, eye nukata wòsɔ be dzadzɛnyenyee nye nɔnɔme gbãtɔ si woyɔ be ehiã hena nunya ƒe amesisusu?

9 “Gbã la, ele dzadzɛ.” Be woanɔ dzadzɛ fia be woanɔ kɔkɔe ɖimaƒomaƒoe, menye le gotagome ko o ke le ememe hã. Biblia yɔ nunya tɔ ɖe dzi ŋu, gake dziƒo nunya mate ŋu age ɖe dzi si tamesusu, dzodzro, kple taɖodzinu vɔ̃wo ƒo ɖii la me o. (Lododowo 2:10; Mateo 15:19, 20) Gake ne míaƒe dzi me le dzadzɛ—si nye vaseɖe afisi wòanya wɔ na amegbetɔ madeblibowo ase ɖo—la, ‘míatsri vɔ̃ eye míawɔ nyui.’ (Psalmo 37:27; Lododowo 3:7) Ðe mesɔ ŋutɔ be dzadzɛnyenyee nye nɔnɔme gbãtɔ si woyɔ be ehiã hena nunya ƒe amesisusu oa? Nya lae nye be  ne míele dzadzɛ le agbenɔnɔ kple gbɔgbɔ me o la, aleke míate ŋu aɖe nunya si tso dziƒo ƒe nɔnɔme bubuawo afia ŋutɔŋutɔe?

10, 11. (a) Nukata wòle vevie be míanye ŋutifafamewo? (b) Ne èkpɔ be yedze agɔ le hati tadeagula aɖe dzi la, aleke nàte ŋu aɖee afiae be yenye ŋutifafalɔ̃la? (Kpɔ etenuŋɔŋlɔa hã.)

10 “Emegbe edia ŋutifafa.” Dziƒo nunya ʋãa mí be míati ŋutifafa, si nye Mawu ƒe gbɔgbɔa ƒe kutsetsewo dometɔ ɖeka, yome. (Galatiatɔwo 5:22) Míeʋlina be míatsri mama dede “ŋutifafa ƒe nublanu” si bla Yehowa ƒe amewo ɖekae la me. (Efesotɔwo 4:3) Míewɔa nusianu si míate ŋui hã be míakpɔ ŋutifafa si le mía kple amewo dome la ta ne nugɔmemasemase aɖe do mo ɖa. Nukata esia le vevie? Biblia gblɔ be: ‘Miyi edzi mianɔ anyi le ŋutifafa me, eye lɔlɔ̃ kple ŋutifafa Mawu la anɔ anyi kpli mi.’ (Korintotɔwo II, 13:11) Eyata zi alesi míeyi edzi nɔ anyi kple amewo le ŋutifafa me la, ŋutifafa Mawu la anɔ anyi kpli mí. Alesi míewɔa nu ɖe mía hati tadeagulawo ŋui la wɔa akpa vevi aɖe le mía kple Yehowa dome ƒomedodo me. Aleke míate ŋu aɖee afia be míenye ŋutifafalɔ̃lawoe? Bu eƒe kpɔɖeŋu aɖe ŋu kpɔ.

11 Nukae nàwɔ ne èkpɔe be yedze agɔ le hati tadeagula aɖe dzi? Yesu gblɔ be: “Ne ètsɔ wò nunana va da ɖe vɔsamlekpuia dzi, eye nèɖo ŋui le afima bena, nya aɖe le nɔviwò ƒe dzi me ɖe ŋutiwò la, gblẽ wò nunana la ɖe afima le vɔsamlekpuia ŋgɔ, eye nayi aɖadzra mia kple nɔviwò dome ɖo gbãgbiagbã, hafi nava tsɔ wò nunana la vae.” (Mateo 5:23, 24) Àte ŋu awɔ ɖe nuxlɔ̃ame ma dzi ne èxɔ ŋgɔ ɖe afɔ heyi nɔviwòa gbɔ. Kple taɖodzinu ka? Be ‘nàɖadzra mia dome ɖo.’ * Be nàte ŋu awɔ ema la, ahiã be nàlɔ̃ ɖe edzi be yewɔ nusi vee, menye be nàgbe lɔlɔ̃ ɖe edzi o. Ne ète ɖe eŋu kple taɖodzinu be miadzra mia nɔewo dome ɖo ne ŋutifafa naganɔ anyi eye mètrɔ taɖodzinu ma o la, anɔ bɔbɔe be miate ŋu aɖe nugɔmemasemase ɖesiaɖe ɖa,  aɖe kuku, ahatsɔ ake mia nɔewo. Ne èxɔ ŋgɔ wɔ ŋutifafa la, ekema èle eɖem fia be Mawu ƒe nunyae le ye kplɔm.

“Esea Nu Gɔme na Ame, Elɔ̃na Faa be Yeaɖo To”

12, 13. (a) Nukae nya si gɔme woɖe be “esea nu gɔme na ame” le Yakobo 3:17 la fia? (b) Aleke míate ŋu aɖee afia be míenye nugɔmesenamelawo?

12 “Esea nu gɔme na ame.” Nukae wòfia be woanye nugɔmesenamela? Agbalẽnyalawo gblɔ be Helagbe me nya si gɔme woɖe le Yakobo 3:17 be “esea nu gɔme na ame” nye nya si gɔmeɖeɖe sesẽ. Gbegɔmeɖelawo zã nyawo abe “efaa tu,” “eléa eɖokui,” kple “ebua ame ŋu.” Le nyaa ŋutɔŋutɔ nu la, Helagbe me nya la gɔmee nye “eɖea asi le nya ŋu.” Aleke míate ŋu aɖee afia be míezãa nunya si tso dziƒo le go sia mee?

13 Filipitɔwo 4:5 (NW) gblɔ be: “Mina amewo katã nanya miaƒe nugɔmesesename.” Biblia gɔmeɖeɖe bubu xlẽ be: “Mina woadze si mi be mienye nugɔmesenamelawo.” (The  New Testament in Modern English, si gɔme J. B. Phillips ɖe) De dzesii be menye nya lae nye alesi míawo míebua mía ɖokui o; alesi ame bubuwo bua míi, alesi wodze si míi, koŋ dzie wònɔ te ɖo. Nugɔmesenamela metea tɔ ɖe sea dzi kpaɖii ɣesiaɣi o, alo metea tɔ ɖe edzi be woawɔ nuwo alesi yedii kokoko o. Ke boŋ elɔ̃na faa be yeaɖo to ame bubuwo, eye le afisi wòasɔ le la, be yeaɖe asi le nya ŋu awɔ ɖe woƒe didiwo dzi. Enye amesi fa tu hã le eƒe nuwɔwɔ ɖe amewo ŋu me, ke menye amesi ƒe nya me sẽ o. Togbɔ be esia le vevie na Kristotɔwo katã hã la, egahiã vevietɔ na amesiwo nye hamemegãwo. Tufafa hea amewo ɖe ame ŋu, enaa wote ŋu tena ɖe hamemegãwo ŋu bɔbɔe. (Tesalonikatɔwo I, 2:7, 8) Asɔ be míabia mía ɖokui be, ‘Ðe wodze sim be menye amesi bua ame ŋu, amesi ɖea asi le nya ŋu bɔbɔe, kple amesi fa tua?’

14. Aleke míate ŋu aɖee afia be míenye amesiwo ‘lɔ̃na faa ɖoa to’?

14 “Elɔ̃na faa be yeaɖo to.” Helagbe me nya si gɔme woɖe be “elɔ̃na faa be yeaɖo to” megadze le teƒe bubu aɖeke le Kristotɔwo ƒe Hela Ŋɔŋlɔawo me o. Agbalẽnyala aɖe gblɔ be “asrafowo ƒe hehexɔxɔ mee wolɔ̃a [nya sia] zazã le.” Gɔmesese si dze le eme enye “be woaxɔ nya ade eme bɔbɔe” kple “be woabɔbɔ ɖe ame te.” Amesi nunya si tso dziƒo fiaa mɔe la lɔ̃na faa be yeabɔbɔ ɖe nya si Ŋɔŋlɔawo gblɔ la te. Womenyanɛ le eŋu be enye amesi wɔa eƒe nyametsotso eye wògbea nya sia nya si tsi tre ɖe etɔ ŋu la xɔxɔ o. Ke boŋ ne wofia Ŋɔŋlɔawo me kpeɖodzi si me kɔ ƒãe be akpa si wòle mesɔ o alo be nyametsotso si wòwɔ mesɔ o la, elɔ̃na faa be yeawɔ tɔtrɔ kaba. Amesia tɔgbee wonya wò be nènyea?

“Nublanuikpɔkpɔ Kple Kutsetse Nyuiwo Yɔe Fũ”

15. Nukae nye nublanuikpɔkpɔ, eye nukata wòsɔ be woyɔ “nublanuikpɔkpɔ” kple “kutsetse nyuiwo” ɖekae le Yakobo 3:17?

15 “Nublanuikpɔkpɔ kple kutsetse nyuiwo yɔe fũ.” * Nublanuikpɔkpɔ  nye nunya si tso dziƒo ƒe akpa vevi aɖe, elabena wogblɔ le nunya sia ŋu be “nublanuikpɔkpɔ . . . yɔe fũ.” De dzesii be woyɔ “nublanuikpɔkpɔ” kple “kutsetse nyuiwo” siaa ɖekae. Esia sɔ, elabena le Biblia me la, zi geɖe nublanuikpɔkpɔ fia ɖetsɔtsɔ le eme na amewo vevie, enye dɔmetɔtrɔ ɖe ame ŋu si tsea nyuiwɔwɔ ƒe ku geɖe. Numekugbalẽ aɖe ɖe nublanuikpɔkpɔ gɔme be enye “vevesese ɖe nɔnɔme manyomanyo si me ame aɖe ge ɖo la nu kple agbagbadzedze be woawɔ nane tso eŋu.” Eyata mawumenunya menye esi me vevemasemaseɖeamenu alo ɖekematsɔleme le o, eye menye nunyanya ɖe susu me eŋudɔmawɔmawɔe hãe wònye o. Ke boŋ enye esi sea veve ɖe ame nu lɔlɔ̃tɔe, etsoa dzi me na ame, eye etsɔa ɖe le amewo ƒe nɔnɔmewo me. Aleke míate ŋu aɖee afiae be nublanuikpɔkpɔ yɔ mí fũ?

16, 17. (a) Hekpe ɖe lɔlɔ̃ na Mawu ŋu la, nuka hãe gaʋãa mí míeƒoa mía ɖokui ɖe gbeƒãɖeɖedɔa me, eye nukatae? (b) Mɔ kawo nue míate ŋu aɖee afia le be nublanuikpɔkpɔ yɔ mí fũ?

16 Mɔnu vevi ɖekae nye to Mawu ƒe Fiaɖuƒe ŋuti nyanyuia gbɔgblɔ na amewo me. Nukae ʋãa mí míeƒoa mía ɖokui ɖe dɔ sia wɔwɔ me? Lɔlɔ̃ na Mawu koŋ ye. Gake nublanuikpɔkpɔ, alo dɔmetɔtrɔ ɖe amewo ŋu, hã ʋãa mí. (Mateo 22:37-39) Egbea ame geɖe ƒe “lãme gbɔdzɔ, eye woka hlẽ abe alẽ, siwo kplɔla meli na o la ene.” (Mateo 9:36) Subɔsubɔhakplɔla alakpatɔwo metsɔ ɖeke le eme na wo o eye wogbã ŋku na wo le gbɔgbɔ me. Le esia ta womenya nu tso mɔfiame siwo me nunya le si dze le Mawu ƒe Nya la me ŋu o eye womenya yayra siwo Fiaɖuƒea ahe va anyigba sia dzi kpuie o. Eyata ne míede ŋugble le amesiwo dome míele ƒe gbɔgbɔ me nuhiahiãwo ŋu la, dɔmetɔtrɔ si tso dzi me ʋãa mí be míawɔ nusianu si míate ŋui agblɔ Yehowa ƒe tameɖoɖo si me lɔlɔ̃ le la na wo.

Ne míeɖe nublanuikpɔkpɔ, alo dɔmetɔtrɔ, fia amewo la, ke míele “nunya si tso dziƒo” ɖem fia

17 Mɔ bubu kawo hã nue míate ŋu aɖee afia le be nublanuikpɔkpɔ yɔ mí fũ? Ðo ŋku Samariatɔ si kpɔ mɔzɔla si woda adzoe eye woƒoe wòmlɔ anyi ɖe mɔ to si ƒe kpɔɖeŋu Yesu gblɔ dzi. Esi Samariatɔ la ƒe dɔme trɔ ɖe ŋutsua ŋu ta la, ‘ekpɔ  nublanui nɛ,’ ebla eƒe abiwo eye wòkpɔ edzi. (Luka 10:29-37) Ðe esia mefia be nublanuikpɔkpɔ bia be míawɔ nu ŋutɔŋutɔ atsɔ akpe ɖe amesiwo ɖo xaxa me ŋu oa? Biblia gblɔ na mí be “míawɔ nu nyui na amesiame, ke vevietɔ na haxɔsetɔwo.” (Galatiatɔwo 6:10) Bu go aɖewo siwo me míate ŋu awɔ esia le ŋu kpɔ. Ðewohĩ haxɔsetɔ tsitsi aɖe hiã kpekpeɖeŋu be wòate ŋu aɖo ʋu ava Kristotɔwo ƒe kpekpeawo agatrɔ ayi aƒeme. Ðewohĩ ahosi aɖe si le hamea me hiã kpekpeɖeŋu le nanewo siwo gblẽ le eƒe aƒeme dzadzraɖo me. (Yakobo 1:27) Ðewohĩ amesi ƒo dzi ɖe le la hiã “xɔlɔ̃nya” nyui aɖe si afa akɔ nɛ. (Lododowo 12:25) Ne míeɖe nublanuikpɔkpɔ fia le mɔ siawo tɔgbe nu la, míeɖenɛ fiana be míewɔa nunya si tso dziƒo ŋudɔ le míaƒe agbe me.

“Medea Vovototo Ame Me O, Alakpa Mele Eme O”

18. Ne nunya si tso dziƒo le mía kplɔm la, nukae wòle be míadze agbagba aɖe ɖa le míaƒe dzi me, eye nukatae?

18 “Medea vovototo ame me o.” Mawu ƒe nunya ɖua ameƒomeviwo dome nazãbubu kple dukɔmevinyenye ƒe dada ɖesiaɖe dzi. Ne nunya sia le mía kplɔm la, enaa míedzea agbagba be míaɖe ameŋkumekpɔkpɔ ƒe nɔnɔme ɖesiaɖe ɖa le míaƒe dzi me. (Yakobo 2:9) Míenɔa te ɖe amewo ƒe sukudede, gakpɔkpɔ, alo agbanɔamedzi si le ame si le hamea me dzi wɔa nu ɖe wo ŋu ameŋkumekpɔkpɔtɔe o; eye míedoa vlo mía hati tadeagula aɖeke hã o, eɖanye ɖoƒe tsɛ ka ke wole o. Ne Yehowa ɖe eƒe lɔlɔ̃ fia amesiawo la, ke godoo la ele be míabu wo be wodze be míaɖe míaƒe lɔlɔ̃ afia wo.

19, 20. (a) Afikae Helagbe me nya si wozã na “alakpanuwɔla” dzɔ tso? (b) Aleke míawɔ aɖe “nɔvilɔlɔ̃, si me alakpa mele o” afia, eye nukata esia le vevie?

19 “Alakpa mele eme o.” Helagbe me nya si gɔme woɖe be “alakpanuwɔla” ate ŋu aku ɖe “fefewɔla si trɔ eɖokui ɖe nɔnɔme aɖe me” ŋu. Le blemaɣeyiɣiwo me la, Hela kple Roma fefewɔlawo ɖɔa amemo gãwo le woƒe fefewo wɔwɔ me. Eyata  Helagbe me nya si wozã na “alakpanuwɔla” va ku ɖe ayemenuwɔwɔ, alo alakpanuwɔwɔ ŋu. Menye alesi míewɔa nu ɖe amewo ŋu dzi koe wòle be mawumenunya ƒe akpa sia nakpɔ ŋusẽ ɖo o ke ele be wòakpɔe ɖe alesi míebua woe hã dzi.

20 Apostolo Petro de dzesii be ele be míaƒe “toɖoɖo nyateƒe la” nawɔe be míaɖe “nɔvilɔlɔ̃, si me alakpa mele o” afia. (Petro I, 1:22) Nyateƒee, mele be nɔvilɔlɔ̃ si míaɖe afia la nanye ameŋkumenuwɔwɔ o. Mele be míaɖɔ amemo alo atrɔ ɖe nɔnɔme aɖe me bene míatsɔ aflu amewoe o. Ele be míaƒe nɔvilɔlɔ̃ nanye vavãtɔ, wòatso dzi me. Ne míewɔe alea la, ana mía haxɔsetɔwo naka ɖe mía dzi, elabena woanyae be amesi ƒomevi míele ɖeɖem fia be míenye lae míenye vavã. Nuwɔwɔ anukwaretɔe alea ʋua mɔ na ƒomedodo nyuiwo le Kristotɔwo dome eye wòwɔnɛ be míekana ɖe mía nɔewo dzi le hamea me.

 ‘Lé Nunya Vavã Me Ðe Asi’

21, 22. (a) Aleke Salomo mete ŋu lé nunya me ɖe asi hekpɔ etae o? (b) Aleke míate ŋu alé nunya me ɖe asi ahakpɔ etae, eye viɖe kawoe esia wɔwɔ ahe vɛ na mí?

21 Mawumenunya nye nunana tso Yehowa gbɔ, eye ehiã be míakpɔ eta. Salomo gblɔ be: “Vinye, . . . lé [nunya] vavã kple tamebubu me ɖe asi sesĩe.” (Lododowo 3:21) Nublanuitɔe la, Salomo ŋutɔ mete ŋu wɔ esia de goe o. Le ɣeyiɣi siwo katã me dzi ɖoto nɔ esi la, nunya hã nɔ esi. Gake le nuwuwu la, dutanyɔnu geɖe siwo wòɖe la trɔ eƒe dzi ɖa tso Yehowa ƒe tadedeagu dzadzɛtɔ ŋu. (Fiawo I, 11:1-8) Nusi va dzɔ ɖe Salomo dzi ɖee fia be sidzedze meɖea vi aɖeke nenye be wometsɔe de dɔwɔwɔ me nyuie o.

22 Aleke míate ŋu alé nunya vavã me ɖe asi ahakpɔ etae? Menye be míaxlẽ Biblia kple Biblia-srɔ̃gbalẽ siwo “dɔla nuteƒewɔla kple aɖaŋudzela” la ta edziedzi ko o, ke ele be míadze agbagba ɖesiaɖe atsɔ nusiwo srɔ̃m míele ade dɔwɔwɔ me hã. (Mateo 24:45) Esɔ le go sia go me be míawɔ mawumenunya ŋudɔ le míaƒe agbe me. Ana míanɔ agbe si nyo wu fifia. Ana míaƒe “asi nasu agbe vavã la dzi”—si nye agbenɔnɔ le Mawu ƒe xexe yeyea me. (Timoteo I, 6:19) Eye vevietɔ, nana be nunya sia si tso dziƒo nasu mía si ate mí ɖe Yehowa Mawu, amesi gbɔ nunyawo katã dzɔ tso, ŋu kplikplikpli.

^ mm. 1 Fiawo I, 3:16 gblɔ be gbolowoe nyɔnu eveawo nye. Insight on the Scriptures ɖe eme be: “Anɔ eme be nyɔnu siawo nye gbolowo, gake menye be wotsɔe ɖo dɔe ya o, ke boŋ wonye nyɔnu siwo wɔ matre, ɖewohĩ Yuda-nyɔnuwoe wonye loo alo ate ŋu anye be dutanyɔnuwoe wonye.”—Yehowa Ðasefowoe tae.

^ mm. 11 Helagbe me nyagbɔgblɔ si gɔme woɖe be “dzra mia dome ɖo” la tso dɔwɔnya si gɔmee nye “‘woawɔ tɔtrɔ, alo woaɖɔ li nu’ me, eyata efia be ‘woalé avu.’” Eyata wò taɖodzinu enye be yeana nuwo natrɔ, ne anya wɔ la, miaɖe vevesese ɖesiaɖe si le dzi me na amesi dzi wodze agɔ le la ɖa.—Romatɔwo 12:18.

^ mm. 15 Biblia gɔmeɖeɖe bubu gblɔ be “dɔmetɔtrɔ kple nuwɔna nyuiwo yɔe fũ.”—A Translation in the Language of the People, si gɔme Charles B. Williams ɖe.