Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Te Ðe Yehowa Ŋu

 TA 2

Ðe Nàte Ŋu ‘Ate Ðe Mawu Ŋu’ Nyateƒea?

Ðe Nàte Ŋu ‘Ate Ðe Mawu Ŋu’ Nyateƒea?

1, 2. (a) Nukae ame geɖe abu be mate ŋu adzɔ o, gake nuka dzie Biblia ka ɖo na mí? (b) Ƒomedodo kplikplikpli ka ƒe mɔe ʋu na Abraham, eye nukatae?

ALEKE nàse le ɖokuiwò me ne dziƒo kple anyigba Wɔla la gblɔ le ŋuwò be, “Xɔ̃nyee nye esi”? Awɔ na ame geɖe be esia mate ŋu adzɔ o. Ne èbu eŋu kpɔ la, aleke wòate ŋu adzɔe be amegbetɔ dzro ko nadze xɔ̃ Yehowa Mawu? Ke hã Biblia ka ɖe edzi na mí be mía kple Mawu dome ate ŋu anɔ kplikplikpli nyateƒe.

2 Blemafofo Abraham nye amesi kplii dome nɔ kplikplikpli nenema. Yehowa yɔ blemafofo ma be “xɔ̃nye.” (Yesaya 41:8) Ẽ, Yehowa bu Abraham be enye ye xɔlɔ̃ ŋutɔŋutɔ. Alesi Abraham ‘xɔ Yehowa dzi se’ tae ƒomedodo kplikplikpli ma su esi ɖo. (Yakobo 2:23) Egbea hã la, Yehowa ʋua mɔnukpɔkpɔ siwo awɔe be ‘ƒomedodo’ nanɔ woa kple amesiwo subɔnɛ le lɔlɔ̃ me dome ƒe mɔ ɖi. (Mose V, 10:15) Eƒe Nya la de dzi ƒo na mí be: “Mite ɖe Mawu ŋu, eye wòate ɖe mia ŋu.” (Yakobo 4:8) Míekpɔ amekpekpe kpakple ŋugbedodo siaa le nya mawo me.

3. Nukae Yehowa kpe mí be míawɔ, eye ŋugbedodo kae kpe ɖe eŋu?

3 Yehowa le mía kpem be míate ɖe ye ŋu. Ele klalo be yeaxɔ mí míanye ye xɔlɔ̃wo eye edii nenema hã. Le ɣeyiɣi ma ke me la, edo ŋugbe be ne míewɔ afɔɖeɖe be míate ɖe ye ŋu la, ye hã yeawɔ afɔɖeɖe ma. Ate ɖe mía ŋu. Awɔe be míava nɔ nɔnɔme xɔasi ŋutɔŋutɔ aɖe me—si nye ‘hadede kple Yehowa.’ * (Psalmo 25:14) Susu si  dze le ‘hadede’ mee nye dzimenya gbɔgblɔ na xɔlɔ̃ vevi aɖe.

4. Aleke nàgblɔ be xɔlɔ̃ vevi le, eye mɔ kawo nue Yehowa ɖee fia le be yenye xɔlɔ̃ ma ƒomevi na amesiwo te ɖe ye ŋu?

4 Ðe xɔlɔ̃ vevi aɖe le asiwò si nègblɔa wò dzimenya ɣaɣlawo na? Xɔlɔ̃ sia nye amesi tsɔa ɖe le eme na wò. Èɖoa dzi ɖe eŋu le esi wòɖee fia be yenye nuteƒewɔla ta. Dzi gadzɔa wò ɖe edzi ne èle wò dzidzɔnyawo gblɔm nɛ. Alesi wòɖoa to sea wò nyawo veveseseɖeamenutɔe la ɖea wò nuxaxawo dzi kpɔtɔna. Ne ewɔ abe ame bubu aɖeke mele nu gɔme sem na wò o gɔ̃ hã ene la, eya sea nu gɔme na wò. Nenema ke ne ète ɖe Mawu ŋu la, eva zua Xɔ̃wò vevitɔ si dea asixɔxɔ vavã ŋuwò, amesi tsɔa ɖe le eme na wò vevie, eye wòsea nu gɔme na wò bliboe. (Psalmo 103:14; Petro I, 5:7) Àɖe wò seselelãme detowo afiae, elabena ènya be ewɔa nuteƒe na amesiwo wɔa nuteƒe nɛ. (Psalmo 18:26) Gake esi Mawu ŋutɔe ʋu hadede ƒe mɔnukpɔkpɔa ɖi ta koe míate ŋu abɔ ha kplii ɖo.

Yehowa Ʋu Mɔ la Ði

5. Nukae Yehowa wɔ be míate ŋu ate ɖe eŋu?

5 Ne mía gomee wòatso la, anye ne mí nuvɔ̃wɔlawo míate ŋu ate ɖe Mawu ŋu akpɔ gbeɖe o. (Psalmo 5:5) Apostolo Paulo ŋlɔ be: “Ke Mawu ɖe ye ŋutɔ ƒe lɔlɔ̃, si wòtsɔ lɔ̃ mí la fia bena, esime míeganye nuvɔ̃wɔlawo la, Kristo ku ɖe mía ta.” (Romatɔwo 5:8) Ẽ, Yehowae wɔ ɖoɖo be Yesu ‘natsɔ eƒe agbe ana ɖe ame geɖe ƒe xɔxɔ ta.’ (Mateo 20:28) Tafevɔsa si dzi míaxɔ ase ye awɔe be míate ŋu ate ɖe Mawu ŋu. Esi wònye Mawue ‘tre mí lɔlɔ̃’ ta la, eyae wɔ afɔɖeɖea gbã be xɔlɔ̃wɔwɔ nava nɔ mía kplii dome.—Yohanes I, 4:19.

6, 7. (a) Aleke míewɔ nya be Yehowa menye Mawu si le ɣaɣla si womate ŋu adze sii o? (b) Mɔ kawo nue Yehowa ɖe eɖokui fia le?

6 Yehowa gaɖe afɔ bubu: Eɖe eɖokui fia mí. Le xɔlɔ̃wɔwɔ ɖesiaɖe me la, amea nyanya nyuie kple asixɔxɔ  dede eƒe nɔnɔmewo kple nuwɔnawo ŋue wɔnɛ be wonɔa ƒomedodo kplikplikpli me. Eyata ne ɖe Yehowa nye Mawu si le ɣaɣla, eye míate ŋu adze sii o la, anye ne míate ŋu ate ɖe eŋu gbeɖe o. Gake meɣla eɖokui kura o, ke boŋ edi be míanya ye. (Yesaya 45:19) Gakpe ɖe eŋu la, nusi wòɖe fia le eɖokui ŋu li amesiame ate ŋu akpɔ, eye eli na mí amesiwo woabu ame tsɛwoe le xexeame ƒe dzidzenuwo nu gɔ̃ hã.—Mateo 11:25.

Yehowa ɖe eɖokui fia to eƒe nuwɔwɔwo kple eƒe Nya si woŋlɔ dzi

7 Aleke Yehowa ɖe eɖokui fia míi? Eƒe nuwɔwɔwo ɖe eƒe amenyenye ƒe akpa aɖewo fia—eƒe ŋusẽ ƒe gãnyenye, eƒe nunya ƒe goglome, eƒe lɔlɔ̃ ƒe agbɔsɔsɔme. (Romatɔwo 1:20) Gake menye nusiwo Yehowa wɔ ko dzie wòɖe eɖokui fia toe o. Esi wònye Nyatakakanala Gãtɔ ta la, eɖe eɖokui fia woŋlɔ ɖe eƒe Nya, Biblia, me.

‘Yehowa ƒe Dɔmenyo’ Kpɔkpɔ

8. Nukatae míate ŋu agblɔ be Biblia ŋutɔ nye kpeɖodzi be Yehowa lɔ̃ mí?

8 Biblia ŋutɔ nye kpeɖodzi be Yehowa lɔ̃ mí. Ezã nya siwo gɔme míate ŋu ase tsɔ ɖe eɖokui fia le eƒe Nya la me—si nye kpeɖodzi be menye ɖe wòlɔ̃ mí ko o ke edi be míanya ye ahalɔ̃ ye hã. Nusiwo míexlẽna le agbalẽ xɔasi sia me wɔnɛ be míekpɔa ‘Yehowa ƒe dɔmenyo’ dzea sii eye wòʋãa mí míedina be míate ɖe eŋu. (Psalmo 90:17) Mina míadzro mɔ lédziname siwo dzi Yehowa to ɖe eɖokui fia le eƒe Nya la me akpɔ.

9. Nya siwo wogblɔ le Biblia me tẽ siwo ɖe Mawu ƒe nɔnɔmewo fia dometɔ aɖewo ɖe?

9 Wogblɔ nya geɖe le Ŋɔŋlɔawo me tẽ siwo ɖe Mawu ƒe nɔnɔmewo fia. Kpɔ eƒe kpɔɖeŋu aɖewo ɖa. “Yehowa lɔ̃a nya dzɔdzɔe.” (Psalmo 37:28) Mawu ƒe “ŋusẽ tri akɔ.” (Hiob 37:23) “Amelɔ̃la menye, . . . Yehowa ye gblɔe.” (Yeremya 3:12) “Dzi nyanu le esi.” (Hiob 9:4) Enye “nublanuikpɔla kple amenuve Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ.” (Mose II, 34:6) “Aƒetɔ,  wò dɔme nyo, eye nèlɔ̃a tsɔtsɔke.” (Psalmo 86:5) Eye abe alesi míegblɔe le ta si do ŋgɔ me ene la, nɔnɔme ɖeka aɖe ƒo wo katã ta: “Mawu enye lɔlɔ̃.” (Yohanes I, 4:8) Esi nèle ŋugble dem le nɔnɔme nyoameŋu siawo ŋu la, ɖe tete ɖe Mawu sia si ɖeke mesɔ kplii o ŋu medzro wò oa?

Biblia kpena ɖe mía ŋu míetena ɖe Yehowa ŋu

10, 11. (a) Nukae Yehowa na woŋlɔ ɖe eƒe Nya la me be wòakpe ɖe mía ŋu míadze si eƒe amenyenye nyuie wu? (b) Biblia me kpɔɖeŋu kae kpe ɖe mía ŋu míekpɔ Mawu ƒe ŋusẽ ƒe dɔwɔwɔ le susu me?

10 Tsɔ kpe ɖe eƒe nɔnɔmewo gbɔgblɔ na mí ŋu la, lɔlɔ̃ ʋã Yehowa wòɖe nɔnɔme siawo ƒe kpɔɖeŋu ŋutɔŋutɔwo fia le nuwɔna me wòna woŋlɔ wo ɖe eƒe Nya la me. Nuŋlɔɖi siawo na míekpɔa nuwo le susu me nyuie wòwɔnɛ be míedzea si eƒe amenyenye ƒe akpa vovovoawo kɔte wu. Esia hã gawɔnɛ be míetena ɖe eŋu. Kpɔ kpɔɖeŋu aɖe ɖa.

11 Exexlẽ be Mawu ƒe “alɔkame sesẽ” nye nya ɖeka. (Yesaya 40:26) Eye enye nya bubu kura be woaxlẽ alesi wòɖe Israel-viwo to Ƒudzĩa me eye emegbe wònyi dukɔa le gbedadaƒo ƒe 40 sɔŋ ŋu nya. Àte ŋu akpɔ alesi tsi dzeagboawo me mae ɖa le susu me. Àgate ŋu akpɔe le susu me alesi dukɔa—siwo katã anɔ ame 3,000,000—zɔ to ƒubali ƒuƒuia me, eye tsia dzɔ abe gli gã nyadriwo ene ɖe woƒe ɖusi kple mia me. (Mose II, 14:21; 15:8) Àte ŋu akpɔ nusi ɖo kpe edzi be Mawu lé be na wo ametakpɔkpɔtɔe le gbeadzi. Tsi do tso agakpe me. Nuɖuɖu, si nɔ abe nuku ɣiwo, kɔ ɖe anyigba. (Mose II, 16:31; Mose IV, 20:11) Yehowa ɖee fia le afisia be menye ɖe ŋusẽ le ye si ko o ke yezãnɛ hã wòɖea vi na yeƒe  amewo. Ðe mede dzi ƒo ŋutɔ be míanya be míaƒe gbedodoɖawo yia Mawu ŋusẽtɔ sia si ‘nye sitsoƒe kple ŋusẽ na mí, eye wònye xɔnametɔ le xaxawo me’ gbɔ oa?—Psalmo 46:2.

12. Aleke Yehowa to nya siwo gɔme míate ŋu ase dzi kpe ɖe mía ŋu be ‘míakpɔ’ eyamae?

12 Yehowa, amesi nye gbɔgbɔ, gawɔ nu bubuwo hã be wòakpe ɖe mía ŋu míadze sii. Esi míenye amegbetɔwo ta la, nusiwo ŋku te ŋu kpɔna koe míekpɔna eyata míete ŋu kpɔa nusiwo le gbɔgbɔ me nutowo me o. Ne ɖe Mawu aɖɔ eɖokui na mí le gbɔgbɔmenyawo me la, anye ne ɖeko wòanɔ abe alesi nànɔ wò dzedzeme, abe wò ŋku ƒe amadede alo dzesi siwo le ŋuwò ene, ɖɔm na amesi wodzi ŋkuagbãtɔe ene. Ke Yehowa nyo dɔme to nya siwo gɔme míate ŋu ase dzi kpe ɖe mía ŋu be ‘míakpɔ’ eyama. Ɣeaɖewoɣi la, ezãa kpɔɖeŋunyagbɔgblɔwo ale be wòtsɔa eɖokui sɔna kple nusiwo míenya. Eɖɔ eɖokui gɔ̃ hã abe ɖe amegbetɔ ƒe ŋutinu aɖewo le esi ene. *

13. Nɔnɔme kae Yesaya 40:11 ta ɖe míaƒe susu me, eye aleke wòwɔa dɔ ɖe dziwòe?

13 Se alesi woɖɔ Yehowae ɖa le Yesaya 40:11, be: “Anyi eƒe alẽhawo abe alẽkplɔvi ene, alé alẽviawo ɖe abɔ dome, eye wòakɔ wo ɖe akɔnu, eye wòakplɔ vinɔwo ɖɔɖɔɖɔ.” Le afisia wotsɔ Yehowa sɔ kple alẽkplɔla si kɔa alẽviwo ɖe “abɔ dome.” Esia fia alesi Mawu kpɔa eƒe amewo ta eye wòkpena ɖe wo ŋui, hekpena ɖe wo dometɔ siwo mesẽ tututu o gɔ̃ hã ŋu. Míate ŋu ase le mía ɖokui me be míele dedie le eƒe abɔ sesẽawo dome, elabena ne míeku ɖe eŋu la, magblẽ mí ɖi akpɔ gbeɖe o. (Romatɔwo 8:38, 39) Alẽkplɔla Gãtɔa kɔa alẽviawo ɖe “akɔnu”—enye nyagbe si fia awu  ʋlaya ƒe akpa si avɔa me keke le ale be alẽkplɔla kɔa alẽvi fẽwo ɖe eme ɣeaɖewoɣi. Eyata wona kakaɖedzi mí be Yehowa melɔ̃a nu le mía gbɔ o eye be eléa be na mí lɔlɔ̃tɔe. Míadi godoo be míate ɖe eŋu.

‘Vi la Lɔ̃ be Yeaɖee Afia’

14. Nukatae míate ŋu agblɔ be Yehowa ɖe eƒe nɔnɔme goglowo fia to Yesu dzi?

14 Yehowa to Via, Yesu, si gbɔ melɔ̃a nu le o dzi ɖe eƒe nɔnɔme goglowo fia le eƒe Nya la me. Ame aɖeke mate ŋu aɖe Mawu ƒe tamesusu kple seselelãmewo afia tututu alo aɖɔ Eyama bene woadze sii nyuie wu alesi Yesu wɔe o. Nya lae nye be Ŋgɔgbevi ma nɔ anyi kple Fofoa kura hafi wova wɔ gbɔgbɔ me nuwɔwɔwo kple xexeme si míekpɔna. (Kolosetɔwo 1:15) Yesu nya Yehowa nyuie. Esia tae wòte ŋu gblɔ be: “Ame aɖeke menya amesi enye Vi la o, negbe Fofo la ko, kple amesi enye Fofo la o, negbe Vi la ko kple amesi ke Vi la lɔ̃ be, yeaɖee afiae.” (Luka 10:22) Esime Yesu nye amegbetɔ le anyigba dzi la, eɖe Fofoa fia le mɔ vevi eve nu.

15, 16. Mɔ eve kawo nue Yesu ɖe Fofoa fia le?

 15 Gbã la, Yesu ƒe nufiafiawo kpe ɖe mía ŋu be míenya Fofoa. Yesu ɖɔ Yehowa le mɔ siwo ʋãa míaƒe dzi nu. Le kpɔɖeŋu me, esi Yesu nɔ alesi Mawu nye nublanuikpɔla si gaxɔa nuvɔ̃wɔla trɔdzimewo ŋu nya gblɔm la, etsɔ Yehowa sɔ kple vifofo si tsɔa nu kena faa si kpɔ via nudomegblẽla wògbɔna ale be wòwɔ dɔ ɖe edzi wòƒu du yi ɖakpla asi kɔ na via hegbugbɔ nu nɛ lɔlɔ̃tɔe. (Luka 15:11-24) Yesu gaɖe Yehowa fia be enye Mawu si ‘hea’ dzinyuitɔwo vaa eɖokui gbɔ le esi wòlɔ̃ wo dometɔ ɖesiaɖe ta. (Yohanes 6:44) Ne atsutsurɔe sue ɖeka hɔ̃ hã ge dze anyigba la, enyana. Yesu ɖe nu me be: “Migavɔ̃ o! Mia tɔ vena wu atsutsurɔe geɖewo tɔ.” (Mateo 10:29, 31) Ðeko wòadzro mí godoo be míate ɖe Mawu lɔ̃ame sia ŋu.

16 Evelia, Yesu ƒe kpɔɖeŋu fia mí alesi Yehowa le. Yesu wɔ nu wòɖi Fofoa bliboe ale gbegbe be egblɔ be: “Amesi ke kpɔm la, ekpɔ Fofo la [hã].” (Yohanes 14:9) Eyata ne míexlẽ nu tso Yesu ŋu le Nyanyuigbalẽawo me—seselelãme siwo wòɖe fia kple alesi wòwɔ nu kple ame bubuwoe—la, ke le gɔmesese aɖe nu la, míele Fofoa ƒe nɔnɔme ŋutɔŋutɔ kpɔm. Yehowa mate ŋu aɖe eƒe nɔnɔmewo afia mí eme nakɔ wu ema o. Nukata?

17. Wɔ nusi Yehowa wɔ be wòakpe ɖe mía ŋu míadze si alesi wòle ƒe kpɔɖeŋu.

17 Le kpɔɖeŋu me: Tsɔe be nèdi be yeaɖe nusi dɔmenyo nye me na ame aɖe. Àte ŋu agblɔ nya atsɔ aɖe emee. Gake ne ɖe nàte ŋu afia asi ame aɖe si le dɔmenyonu ŋutɔŋutɔ aɖe wɔm eye nàgblɔ be, “Dɔmenyowɔwɔ ƒe kpɔɖeŋu enye si” la, gɔmesese geɖe ava nɔ nya “dɔmenyo” ŋu wu eye egɔme anya se bɔbɔe wu. Yehowa wɔ nu ma tɔgbe be yeakpe ɖe mía ŋu míadze si alesi wòle. Le nyagbewo tsɔtsɔ ɖɔ eɖokui vɔ la, egana Via ƒe agbenɔnɔ ƒe kpɔɖeŋu hã mí. Yesu ɖe Mawu ƒe nɔnɔmewo fia ŋutɔŋutɔ míekpɔ. To alesi Nyanyuigbalẽawo ɖɔ Yesui dzi la, ɖeko wòle abe ɖe Yehowa  le gbɔgblɔm ene be, “Nenemae mele.” Aleke nuŋlɔɖi si tso gbɔgbɔ me ɖɔ Yesu esime wònɔ anyigba dzii?

18. Aleke Yesu ɖe nɔnɔme siwo nye ŋusẽ, dzɔdzɔenyenye, kple nunya fiae?

18 Mawu ƒe nɔnɔme vevi eneawo dze le Yesu ƒe nuwɔnawo me wòɖe dzesi nyuie. Ekpɔ ŋusẽ ɖe dɔléle, dɔwuame, kple ku gɔ̃ hã dzi. To vovo na amegbetɔ ɖokuitɔdila siwo zãa woƒe ŋusẽ madzemadzee la, mezã nukunuwɔŋusẽa tsɔ di eɖokui tɔ alo tsɔ gblẽ nu le amewo ŋu o. (Mateo 4:2-4) Elɔ̃ dzɔdzɔenyenye. Edo dziku wòsɔ esime wòkpɔ asitsala amebalawo wonɔ amewo tafam. (Mateo 21:12, 13) Ewɔ nu ɖe ame dahewo kple amesiwo wote ɖe to ŋu ameŋkumemakpɔmakpɔe, eye wòkpe ɖe wo ŋu ‘wokpɔ gbɔdzɔe’ na woƒe luʋɔwo. (Mateo 11:4, 5, 28-30) Nunya si ɖeke mesɔ kplii o nɔ Yesu, amesi de ŋgɔ “wu Salomo,” ƒe nufiafiawo me. (Mateo 12:42) Gake Yesu metsɔ eƒe nunya ƒo adegbee gbeɖe o. Eƒe nyawo ɖo ame tsɛwo ƒe dzi gbɔ, elabena eƒe nufiafiawo me kɔ, womesesẽ o, eye wosɔ ɖe agbenɔnɔ nu.

19, 20. (a) Aleke Yesu nye lɔlɔ̃ ƒe kpɔɖeŋuɖola ɖedzesii? (b) Esi míele nu xlẽm tso Yesu ƒe kpɔɖeŋu ŋuti hele ŋugble dem le eŋu la, nukae wòle be wòanɔ susu me na mí?

19 Yesu nye lɔlɔ̃ ƒe kpɔɖeŋuɖola ɖedzesi aɖe. Le eƒe subɔsubɔdɔa wɔwɔ me katã la, eɖe lɔlɔ̃ ƒe akpa vovovoawo fia, siwo ƒe ɖewoe nye veveseseɖeamenu kple nublanuikpɔkpɔ. Mekpɔa amewo ƒe fukpekpe wògbea nublanuiwɔwɔ nɛ o. Enuenu la, veveseseɖeamenu mae ʋãe be wòkpe ɖe amewo ŋu. (Mateo 14:14) Togbɔ be Yesu da gbe le dɔnɔwo ŋu henyi dɔwuitɔwo hã la, eɖe dɔmetɔtrɔ fia le mɔ si gale vevie wu nu. Ekpe ɖe amewo ŋu wonya nyateƒe si ku ɖe Mawu ƒe Fiaɖuƒe si ahe yayra mavɔwo vɛ na ameƒomea ŋuti, eye wòkpe ɖe wo ŋu woxɔ nyateƒea helɔ̃e. (Marko 6:34; Luka 4:43) Ƒo wo katã ta la, Yesu ɖe ɖokuitsɔtsɔsavɔ ƒe lɔlɔ̃ fia esi wòlɔ̃ faa tsɔ eƒe luʋɔ ɖo anyi ɖe amewo ta.—Yohanes 15:13.

 20 Ðe wòwɔ nuku be ame ƒomeviwo katã di be yewoate ɖe ŋutsu sia si doa vivi ɖe ame ŋu hesea veve ɖe ame nu nenema gbegbe ŋua? (Marko 10:13-16) Gake esi míele nu xlẽm tso Yesu ƒe kpɔɖeŋuwo ŋu hele ŋugble dem le wo ŋu la, mina míaɖo ŋku edzi ɣesiaɣi be Fofoa ƒe nɔnɔmewo kpɔm míele kɔte le Vi la me.—Hebritɔwo 1:3.

Nusrɔ̃gbalẽ si Akpe Ðe Mía Ŋu

21, 22. Nukae Yehowa didi lɔ ɖe eme, eye nukawoe le nusrɔ̃gbalẽ sia me siwo akpe ɖe mía ŋu le edidi me?

21 Le alesi Yehowa ɖe eɖokui fia kɔte le eƒe Nya la me ta la, ɖikeke aɖeke mele eŋu o be ɖe wòdi be míate ɖe ye ŋu. Le ɣeyiɣi ma ke me la, menye ɖe wòle mía dzi zim be míana ƒomedodo nyui nanɔ mía kple ye dome o. Ekpo ɖe mía gbɔ be míadi Yehowa “ŋkeke alesi wòle gaglãgbe.” (Yesaya 55:6) Yehowa didi bia be míanya eƒe nɔnɔmewo kple alesi wòwɔa nui abe alesi woɖee fia le Biblia me ene. Wotrɔ asi le nusrɔ̃gbalẽ sia si xlẽm nèle fifia ŋu be wòakpe ɖe ŋuwò le edidi me.

22 Àde dzesii be woma agbalẽ sia ɖe akpa vovovo me wòsɔ ɖe Yehowa ƒe nɔnɔme vevi eneawo nu: ŋusẽ, dzɔdzɔenyenye, nunya, kple lɔlɔ̃. Wodze akpa ɖesiaɖe gɔme kple eƒe nɔnɔmea ŋu nya kpuie. Ta ʋɛ siwo kplɔe ɖo ƒo nu tso alesi  Yehowa ɖea nɔnɔmea fianae le mɔ vovovoawo nu ŋu. Akpa ɖesiaɖe ƒe ta ɖeka fia alesi Yesu ɖo nɔnɔmea ƒe kpɔɖeŋui, eye ta bubu hã dzro alesi míate ŋu aɖee afia le mía ŋutɔwo míaƒe agbenɔnɔ mee la me.

23, 24. (a) Ƒo nu tso akpa tɔxɛ si nye “Biabiawo Hena Ŋugbledede” ŋu. (b) Aleke ŋugbledede kpena ɖe mía ŋu be míetena ɖe Mawu ŋu geɖe wu?

23 Tso ta sia dzi la, akpa tɔxɛ aɖe li si woɖo tanya na be “Biabiawo Hena Ŋugbledede.” Le kpɔɖeŋu me, kpɔ aɖaka si le axa 24 ɖa. Menye ɖe woɖoe be woatsɔ mawunyakpukpuiawo kple biabiawo ato ta ma mee o. Ke boŋ taɖodzinu si le wo ŋue nye be woakpe ɖe ŋuwò nàde ŋugble le nyatia ƒe akpa vevi bubuwo ŋu. Aleke nàwɔ akpa sia ŋudɔ wòaɖe vii? Ʋu mawunyakpukpui siwo woyɔ eye nàxlẽ wo nyuie. Emegbe nàde ŋugble le biabia si kpe ɖe mawunyakpukpuia ŋu la ŋuti. De ŋugble le ŋuɖoɖoawo ŋu. Àte ŋu awɔ numekuku. Bia nya bubuwo ɖokuiwò: ‘Nukae nya sia le gbɔgblɔm nam tso Yehowa ŋu? Aleke wòku ɖe nye agbenɔnɔ ŋui? Aleke mazãe atsɔ akpe ɖe ame bubuwo ŋui?’

24 Ŋugbledede alea ate ŋu akpe ɖe mía ŋu be míate ɖe Yehowa ŋu wu tsã. Nukata? Biblia tsɔ ŋugbledede do ƒome kple dzi. (Psalmo 19:15) Ne míede ŋugble ŋudzedzekpɔkpɔtɔe le nusiwo míesrɔ̃ tso Mawu ŋu ŋuti la, nya la gena ɖe míaƒe kpɔɖeŋudzia me, eye wòwɔa dɔ ɖe míaƒe tamebubu dzi, eʋãa míaƒe seselelãme, eye wòʋãa mí mlɔeba be míawɔ nusi sɔ. Lɔlɔ̃ si le mía si na Mawu dea to ɖe edzi, eye lɔlɔ̃ ma ʋãa mí hã míedina be míawɔ nusi dzea eya si nye mía Xɔlɔ̃ vevitɔ kekeake la ŋu. (Yohanes I, 5:3) Hafi ƒomedodo sia nava nɔ mía kple Yehowa dome la, ele be míanya eƒe nɔnɔmewo kple alesi wòwɔa nui. Gake gbã la, mina míadzro Mawu ƒe amenyenye ƒe akpa aɖe si nye susu sẽŋu si ta wòle be míate ɖe eŋu me—eƒe kɔkɔenyenye.

^ mm. 3 Anyo be míade dzesii be wozã Hebrigbe me nya si gɔme woɖe le Eʋegbe Biblia me be ‘bɔ ha’ le Amos 3:7, afisi wogblɔ le be Yehowa Aƒetɔ Dziɖulagã la ɖea eƒe “tameɖoɖo” fiaa esubɔlawo, ale be ena wonyaa nusi wòɖo be yeawɔ doa ŋgɔ.

^ mm. 12 Le kpɔɖeŋu me, Biblia ƒo nu tso Mawu ƒe mo, ŋku, to, ŋɔti, nu, abɔ, kple afɔwo ŋu. (Psalmo 18:16; 27:8; 44:4; Yesaya 60:13; Mateo 4:4; Petro I, 3:12) Mele be míabu kpɔɖeŋunyagbɔgblɔ mawo be nenema tututue wòle o, abe alesi míebua Yehowa be enye “agakpe” alo “akpoxɔnu” le nyaa ŋutɔ nu o ene.—Mose V, 32:4; Psalmo 84:12.