Dzo kpo yi emenuwo dzi

Dzo kpo yi emenuawo dzi

 TA 3

“Kɔkɔe, Kɔkɔe, Kɔkɔe Enye Yehowa”

“Kɔkɔe, Kɔkɔe, Kɔkɔe Enye Yehowa”

1, 2. Ŋutega kae nyagblɔɖila Yesaya kpɔ, eye nukae wòfia mí le Yehowa ŋu?

NUSI Yesaya kpɔ la wɔ nuku nɛ eye mawuvɔvɔ̃ yɔ eyama me wu gbɔgblɔ—enye ŋutega si tso Mawu gbɔ. Edze nu ŋutɔŋutɔe ale gbegbe! Emegbe Yesaya ŋlɔ be ‘yekpɔ Yehowa’ kple ŋku wòbɔbɔ nɔ Eƒe fiazikpui gã la dzi. Awu ʋlaya si Yehowa do la yɔ Yerusalem gbedoxɔ gã la taŋ.—Yesaya 6:1, 2.

2 Nusi Yesaya se hã na vɔvɔ̃ ɖoe eye eƒe nu ku—enye hadzidzi si nu sẽ ale gbegbe be eʋuʋu gbedoxɔa va ɖo eƒe gɔmeɖoanyiwo ke. Serafiwo, siwo nye gbɔgbɔ me nuwɔwɔ siwo le ɖoƒe si kɔkɔ ŋutɔ, ye nɔ haa dzim. Woƒe hadzidzi sẽŋu, si wokɔ gbe dzi ɖekae dzii nyuie la, me nyawo nye nya bɔbɔe siwo ɖe gãnyenye fia, be: “Kɔkɔe, kɔkɔe, kɔkɔe enye Yehowa Zebaot! Eƒe ŋutikɔkɔe yɔ anyigba blibo la dzi!” (Yesaya 6:3, 4) Alesi woyɔ nya “kɔkɔe” zi gbɔ zi etɔ̃ le hadzidzia me na wònye gbeteteɖedzi tɔxɛ, eye esɔ nenema, elabena Yehowa ƒe kɔkɔenyenye ƒo ɖesiaɖe ta. (Nyaɖeɖefia 4:8) Wote gbe ɖe Yehowa ƒe kɔkɔenyenye dzi le Biblia bliboa me. Mawunyakpukpui alafa geɖe yɔ nya siwo nye “kɔkɔe” kpakple “kɔkɔenyenye” ɖe eƒe ŋkɔ ŋu.

3. Aleke nukpɔsusu totro siwo le ame geɖe si ɖe Yehowa ƒe kɔkɔenyenye ŋu wɔe be wotrɔ ɖa le Mawu ŋu tsɔ wu be woate ɖe eŋu?

3 Eyata edze ƒã be nu vevi siwo Yehowa di be míanya le ye ŋu dometɔ ɖekae nye be yele kɔkɔe. Gake egbea nya sia naa ame geɖe hena ɖe megbe kura. Ame aɖewo bunɛ vodadatɔe be kɔkɔenyenye fia ame ɖokui bubu ame dzɔdzɔe alo alakpa mawusosroɖa nuwo wɔwɔ. Amesiwo bua wo ɖokui be yewomele ɖeke me o la ate ŋu abu Mawu ƒe kɔkɔenyenye be enye nusi ŋu ŋɔdzi le tsɔ wu be wòanye nusi nyoa ame ŋu. Ðewohĩ woavɔ̃ be yewomadze ate ɖe Mawu kɔkɔetɔ sia ŋu akpɔ gbeɖe o. Le susu sia ta ame geɖe trɔ ɖa le Mawu ŋu le eƒe kɔkɔenyenye  ta. Esia wɔ nublanui ŋutɔ, elabena le nyateƒe me la, Mawu ƒe kɔkɔenyenye nye susu sẽŋu aɖe si ta wòle be míate ɖe eŋu boŋ. Nukata? Hafi míaɖo biabia sia ŋu la, mina míadzro nusi kɔkɔenyenye vavãtɔ nye me gbã.

Nukae Nye Kɔkɔenyenye?

4, 5. (a) Nukae kɔkɔenyenye fia, eye nukae mefia o? (b) Mɔ vevi eve kawo nue Yehowa “ɖe ɖe vovo” le?

4 Ne wobe Mawu le kɔkɔe la, mefia be enye ɖokuiŋudzela, ɖokuidoɖedzila, alo amesi doa vlo amewo o. Ðe wòlé fu nɔnɔme siawo boŋ. (Lododowo 16:5; Yakobo 4:6) Ekema nya si nye “kɔkɔe” gɔme ŋutɔŋutɔ ɖe? Le Hebrigbe si wotsɔ ŋlɔ Bibliae me la, nya la tso nya aɖe si gɔmee nye “ɖe ɖe vovo” me. Le mawusubɔsubɔ me la, “kɔkɔe” fia nusi woɖe ɖe vovo tso ŋudɔwɔnu tsɛ bubuwo gbɔ, alo enye nusi wobuna nu kɔkɔe. Nukpɔsusu si gadze le kɔkɔenyenye me vevie enye dzadzɛnyenye. Aleke nya sia ku ɖe Yehowa ŋui? Ðe wòfia be ‘eɖe vovo’ tso amegbetɔ madeblibowo gbɔ kura, hete ɖa boo tso mía gbɔa?

5 Menye nenemae kura o. Yehowa si nye “Israel ƒe kɔkɔetɔ” la gblɔ le eɖokui ŋu be yele yeƒe amewo ‘dome,’ togbɔ be wonye nuvɔ̃mewo hã. (Yesaya 12:6; Hosea 11:9) Eyata eƒe kɔkɔenyenye mewɔe be wòɖe ɖe aga o. Ekema aleke ‘wòɖe ɖe vovoe’? Le mɔ vevi eve nu. Gbã la, eɖe vovo tso nuwɔwɔwo katã gbɔ le susu sia nu be eya ɖeɖekoe nye Dziƒoʋĩtɔ. Eƒe dzadzɛnyenye kple kɔkɔenyenye de blibo ale gbegbe eye seɖoƒe meli nɛ o. (Psalmo 40:6; 83:19) Susu eveliae nye be Yehowa te ɖa xaa tso nuvɔ̃ ɖesiaɖe gbɔ, eye nya fakɔname aɖee nya sia nye. Nukata?

6. Nukatae alesi Yehowa te ɖa xaa tso nuvɔ̃ gbɔ ate ŋu anye akɔfanya na mí?

6 Míele xexe si me kɔkɔenyenye vavãtɔ mebɔ ɖo o me. Amegbetɔƒome si te ɖa tso Mawu gbɔ la ƒe nusianu ƒo ɖi le mɔ aɖe nu, nuvɔ̃ kple blibomademade ɖe ɖe eŋu. Ele na mí katã be míawɔ avu kple nuvɔ̃ si le mía me. Eye ate ŋu adzɔ ɖe mí katã  dzi be nuvɔ̃ naɖu mía dzi ne míeɖɔ ŋu ɖo o. (Romatɔwo 7:15-25; Korintotɔwo I, 10:12) Nusia tɔgbe aɖeke mate ŋu adzɔ ɖe Yehowa dzi o. Esi wòte ɖa xaa tso nuvɔ̃ gbɔ ta la, nuvɔ̃ suetɔ kekeake gɔ̃ hã maɖe ɖe eŋu akpɔ gbeɖegbeɖe o. Nya sia gado ŋusẽ alesi míebua Yehowae be enye Fofo nyuitɔ kekeake, elabena efia be woate ŋu aɖo ŋu ɖe eŋu bliboe. To vovo na alesi vifofo siwo nye amegbetɔ nuvɔ̃mewo le la, Yehowa ya mazu ame gblẽku, ɖokuidzimaɖula, alo ŋutasẽla gbeɖegbeɖe o. Eƒe kɔkɔenyenye wɔe be nu ma tɔgbe aɖeke mate ŋu adzɔ le egome kura o. Yehowa tàa eya ŋutɔ ƒe kɔkɔenyenye ɣeaɖewoɣi kura gɔ̃ hã, elabena naneke megali si ana kakaɖedzi blibo wu ema o. (Amos 4:2) Ðe nya ma mede dzi ƒo ŋutɔ oa?

7. Nukatae míate ŋu agblɔ be kɔkɔenyenye nye Yehowa ƒe amenyenye ƒe akpa aɖe?

7 Kɔkɔenyenye dze le Yehowa ƒe amenyenye ƒe akpa sia akpa. Nukae nyagbɔgblɔ sia fia? Le kpɔɖeŋu me: Bu nya siwo nye “amegbetɔ” kpakple “blibomademade” ŋu kpɔ. Màte ŋu aƒo nu tso amegbetɔ ŋu eye nàgbe ŋkuɖoɖo blibomademade dzi o. Blibomademade le mí katã mía ŋu eye wòkpɔa ŋusẽ ɖe nusianu si míewɔna dzi. Azɔ bu nya eve siwo le vovo kura ŋu kpɔ—“Yehowa” kpakple “kɔkɔe.” Kɔkɔenyenye dzena le Yehowa ƒe nusianu me. Eƒe nusianu le kɔkɔe, le dzadzɛ, hele dzɔdzɔe. Manya wɔ be míanya alesi tututu Yehowa le evɔ míado kpo nya goglo sia—si nye “kɔkɔe”—la gɔmesese o.

‘Kɔkɔenyenye Nye Yehowa Tɔ’

8, 9. Nukae fia be Yehowa kpena ɖe amegbetɔ madeblibowo ŋu be woanɔ kɔkɔe le mɔ sue aɖe nu?

8 Esi kɔkɔenyenye nye Yehowa ƒe amenyenye ta la, asɔ be míagblɔ be eya gbɔe kɔkɔenyenye ɖesiaɖe dzɔ tso. Meɣlaa nɔnɔme xɔasi sia ɖokuitɔdiditɔe o; enanɛ ame bubuwo hã, eye enaa wo faa. Le kpɔɖeŋu me, esi Mawu to mawudɔla aɖe dzi ƒo nu na Mose le ŋuve si nɔ bibim gbɔ la, anyigba si le afima gɔ̃ hã zu kɔkɔe le Yehowa ƒe nuwɔwɔ le teƒea ta!—Mose II, 3:5.

9 Ðe amegbetɔ madeblibowo ate ŋu anɔ kɔkɔe to Yehowa  ƒe kpekpeɖeŋu mea? Ẽ, le mɔ sue aɖe nu. Mawu na mɔnukpɔkpɔ Israel-viwo be woava zu “dukɔ kɔkɔe.” (Mose II, 19:6) Eyra dukɔa ale be tadedeagu ƒe ɖoɖo si le kɔkɔe, hele dzadzɛ, nɔ wo si. Eyata kɔkɔenyenye dze enuenu le Mose ƒe Sea me. Le nyateƒe me la, sika gagbadzɛ aɖe nɔa nunɔlagã la ƒe ŋgoblanu ŋu, eye amesiame te ŋu kpɔnɛ wònɔa keklẽm. Nya siwo woɖe ɖe edzie nye: ‘Kɔkɔenyenye nye Yehowa tɔ.’ (Mose II, 28:36) Eyata ebia be kɔkɔenyenye kple dzadzɛnyenye ƒe dzidzenu kɔkɔwo nawɔe be woƒe tadedeagu nato vovo, eye le nyateƒe me la, woƒe agbenɔnɔ hã nato vovo. Yehowa gblɔ na wo be: “Ame kɔkɔewo mianye, elabena nye Yehowa, mia Mawu la, mele kɔkɔe.” (Mose III, 19:2) Zi alesi Israel-viwo nɔ agbe ɖe Mawu ƒe nuxlɔ̃amewo nu alesi amegbetɔ madeblibo ate ŋui ko la, wonɔa kɔkɔe le mɔ sue aɖe nu.

10. Vovototo kae nɔ blema Israel kple dukɔ siwo ƒo xlã wo dome le kɔkɔenyenye gome?

10 Gbetete ɖe kɔkɔenyenye dzi alea na nuwo to vovo kura tso alesi wònɔ le dukɔ siwo ƒo xlã Israel ƒe subɔsubɔ gbɔ. Trɔ̃subɔdukɔ mawo dea ta agu na mawu siwo ƒe anyinɔnɔ ŋutɔ gɔ̃ hã nye alakpanya kple ameflunya, eye woɖea mawu siawo fiana be wonye ŋutasẽlawo, ŋuklẽlawo, kple agbe bliba nɔlawo. Woƒaƒã le go sia go me. Mawu siawo subɔsubɔ wɔe be wo subɔlawo menɔ kɔkɔe o. Eyatae Yehowa xlɔ̃ nu esubɔlawo be woate wo ɖokui ɖa tso trɔ̃subɔlawo kple woƒe subɔsubɔkɔnu nyɔŋuawo gbɔ ɖo.—Mose III, 18:24-28; Fiawo I, 11:1, 2.

11. Aleke Yehowa ƒe dziƒohabɔbɔa ƒe kɔkɔenyenye dzena le (a) mawudɔlawo ŋu? (b) serafiwo ŋu? (d) Yesu ŋu?

11 Le ɣeyiɣi siwo me Yehowa ƒe dukɔ tiatia si nye blema Israel nɔ nɔnɔme nyuitɔ me gɔ̃ hã la, Mawu ƒe dziƒohabɔbɔa ƒe kɔkɔenyenye ƒe akpa sue aɖe koe wote ŋu ɖe fia. Woyɔa gbɔgbɔ me nuwɔwɔ miliɔn geɖe siwo subɔa Mawu nuteƒewɔwɔtɔe be eƒe “ame kɔkɔe akpe nanewo.” (Mose V, 33:2; Yuda 14) Mawu ƒe kɔkɔenyenye dzadzɛ dzeania dzena le wo ŋu bliboe. Azɔ ɖo ŋku serafi siwo Yesaya kpɔ le eƒe ŋutegaa me dzi. Gbɔgbɔ me nuwɔwɔ sẽŋu siawo ƒe hadzidzia me  nyawo fia be wowɔa akpa vevi aɖe bene woanya Yehowa ƒe kɔkɔenyenye le xexeame godoo. Gake gbɔgbɔ me nuwɔwɔ aɖe ƒo amesiawo katã ta—eyae nye Mawu ƒe Tenuvi la. Yesue nye amesi ɖe Yehowa ƒe kɔkɔenyenye fia wu. Esɔ ŋutɔ be woyɔe be ‘Mawu ƒe Kɔkɔetɔ la.’—Yohanes 6:68, 69.

Ŋkɔ Kɔkɔe, Gbɔgbɔ Kɔkɔe

12, 13. (a) Nukatae wòsɔ be wogblɔ be Mawu ƒe ŋkɔ le kɔkɔe? (b) Nukatae wòle be woakɔ Mawu ƒe ŋkɔ ŋu?

12 Ke Mawu ƒe ŋkɔ hã ɖe? Abe alesi míekpɔe le Ta 1 me ene la, menye dzesideŋkɔ dzro aɖe koe ŋkɔa nye o. Etsi tre ɖi na Yehowa Mawu, eye eƒe nɔnɔmewo katã dze le eme. Eyatae Biblia gblɔ na mí be eƒe “ŋkɔ nye kɔkɔe” ɖo. (Yesaya 57:15) Ele Mose ƒe Sea me be amesi ado gu Mawu ƒe ŋkɔa dze na ku. (Mose III, 24:16) Azɔ se nusi Yesu yɔ gbãgbiagbã le gbedodoɖa me ɖa, ebe: “Mía Fofo, si le dziƒowo! Wò ŋkɔ ŋuti nakɔ.” (Mateo 6:9) Be woakɔ nane ŋu fia be woaɖee ɖe vovo be enye nu kɔkɔe eye woade bubu eŋu, woalé eƒe kɔkɔenyenye me ɖe asi. Gake nukata wòahiã be woagakɔ Mawu ŋutɔ ƒe ŋkɔ si le dzadzɛ le eɖokui si la ŋuti?

13 Wodo vlo Mawu ƒe ŋkɔ kɔkɔe la, eye woto alakpadada kple eŋugbegblẽ dzi ƒo ɖii. Satana da alakpa ɖe Yehowa si le Eden-bɔa me hegblɔ nya siwo fia be Enye Dziɖula madzɔmadzɔ. (Mose I, 3:1-5) Tso ɣemaɣi ke la, Satana—xexeme makɔmakɔ sia dziɖula—kpɔ egbɔ be wogblɔ alakpanya gbogbo aɖewo ɖe Mawu ŋu. (Yohanes 8:44; 12:31; Nyaɖeɖefia 12:9) Subɔsubɔhawo na Mawu ɖi akpasesẽnuwɔla, ɖekematsɔlemetɔ, alo tagbɔsesẽtɔ. Woƒu asi akɔ be eyae le megbe na yewo le yewoƒe ʋukɔkɔɖiʋa siwo yewowɔ me. Zi geɖe la, wotsɔa Mawu ƒe nu wɔnuku siwo wòwɔ ƒe kafukafu naa nudzɔleɖokuisi, alo nɔnɔmetɔtrɔ, si me nunya mele o. Ẽ, wogblẽ Mawu ƒe ŋkɔ ŋu vɔ̃ɖitɔe. Ele be woakɔ eŋu; ele be woagbugbɔ ŋutikɔkɔe si dze nɛ la anae. Míele mɔ kpɔm vevie na eƒe ŋkɔa ŋu kɔkɔ kple eƒe dziɖulanyenye taʋiʋli, eye anye dzidzɔ  na mí be míawɔ akpa ɖesiaɖe si míate ŋui le tameɖoɖo nyui ma me.

14. Nukata woyɔa Mawu ƒe gbɔgbɔa be kɔkɔe, eye nukata busunyagbɔgblɔ ɖe gbɔgbɔ kɔkɔea ŋu nye ŋkubiãnya gã aɖe ŋutɔ?

14 Nu bubu aɖe gali si do ƒome kplikplikpli kple Yehowa si womegbea kɔkɔe yɔyɔ kpe ɖe eŋu o—eyae nye eƒe gbɔgbɔ, alo dɔwɔŋusẽ. (Mose I, 1:2) Yehowa zãa ŋusẽ triakɔ sia si ŋu womate ŋu atsi tre ɖo wòadze edzi o tsɔ wɔa eƒe tameɖoɖowo dzi. Nusianu si Mawu wɔna la, ewɔnɛ le mɔ kɔkɔe si le dzadzɛ nu, eyata esɔ be woyɔa eƒe dɔwɔŋusẽ la be gbɔgbɔ kɔkɔe, alo kɔkɔenyenye ƒe gbɔgbɔ. (Luka 11:13; Romatɔwo 1:4) Busunyagbɔgblɔ ɖe gbɔgbɔ kɔkɔea ŋu, si ate ŋu anye alesi woaɖoe koŋ awɔ nusi tsi tre ɖe Yehowa ƒe tameɖoɖowo ŋu, nye nuvɔ̃ si ŋu tsɔtsɔke mele o.—Marko 3:29.

Nusita Yehowa ƒe Kɔkɔenyenye Tea Mí Ðe Eŋu

15. Nukatae wòsɔ be mawuvɔvɔ̃ nayɔ mía me le Yehowa ƒe kɔkɔenyenye ta, eye nukae vɔvɔ̃ ma fia?

15 Eyata mesesẽ be míakpɔ nusita Biblia na kadodo le Mawu ƒe kɔkɔenyenye kpakple alesi amegbetɔwo avɔ̃ Mawui dome o. Le kpɔɖeŋu me, Psalmo 99:3 me nyawo xlẽ be: “Woakafu wò ŋkɔ, elolo, ŋɔdzi le eŋu, eye wòle kɔkɔe.” Gake ŋɔdzi sia menye vɔvɔ̃ si naa dzidzi ƒoa ame o. Ke boŋ enye mawuvɔvɔ̃ ƒe bubu deto, sisiɖa blibo si ƒo ɖesiaɖe ta. Esɔ be míasee le mía ɖokui me nenema elabena Mawu ƒe kɔkɔenyenye kɔ gbɔ mía ŋu sasasã. Edza keŋkeŋ eye eŋuti kɔ keŋkeŋ le go sia go me. Ke hã mele be esia nanya mí ɖa le eyama ŋu o. Ðe Mawu ƒe kɔkɔenyenye ŋuti nukpɔsusu nyuitɔ ate mí ɖe eŋu boŋ. Nukatae?

Ale si nyonyo léa dzi na míi la, nenemae wòle be kɔkɔenyenye nalé dzi na míi

16. (a) Aleke kɔkɔenyenye do ƒome kple nyonyoe? Wɔ eƒe kpɔɖeŋu. (b) Aleke alesi Yehowa dze le ŋutegawo mee te gbe ɖe kɔkɔenyenye, dzadzɛnyenye, kple kekeli dzi?

16 Nusiwo tae dometɔ ɖekae nye be kadodo le kɔkɔenyenye kple nyonyo, alo nusi dze ani, dome le Biblia me. Wogblɔ le dziƒo ŋu le Yesaya 63:15 be enye Mawu ƒe “nɔƒe kɔkɔe nyo  la.” Nu nyui nya kpɔna na mí. Le kpɔɖeŋu me, kpɔ nɔnɔmetata si le axa 33 ɖa. Ðe teƒea menya kpɔ na wò oa? Nukae na wònya kpɔ nenema gbegbe? Kpɔ alesi tsia le dzadzɛe ɖa. Ya la me gɔ̃ hã anya nɔ dzadzɛ, elabena dziŋgɔlia le blɔ eye edze abe kekelia le dzo dam ene. Azɔ ne ɖe woatrɔ teƒea—ɖewohĩ gbeɖuɖɔ xɔ tɔsisia me, wota nu ɖe atiawo kple agakpeawo ŋu alo ŋlɔ nu ɖe wo ŋu, eye dzudzɔ bla ya la me kɔtɔɔ—ɖe, anye ne magalé dzi na mí o; míatrɔ kɔ ɖa le eŋu. Míebua kɔkɔenyenye, dzadzɛnyenye, kple keklẽ ɖe nyonyo ŋu. Míate ŋu azã nya siawo na Yehowa ƒe kɔkɔenyenye. Eyata mewɔ nuku o be alesi Yehowa dze le ŋutegaa me la lé dzi na mí! Ele keklẽm hele dzo dam abe kpe xɔasi ene, enɔ bibim abe dzo ene alo abe ga xɔasi adodoe dadzo aɖe ene—nenemae mía Mawu kɔkɔea nya kpɔe.—Xezekiel 1:25-28; Nyaɖeɖefia 4:2, 3.

17, 18. (a) Dɔ kae ŋutega si Yesaya kpɔ la wɔ ɖe edzi gbã? (b) Aleke Yehowa zã serafi wòfa akɔ na Yesayae, eye vevienyenye kae le serafia ƒe nuwɔna ŋu?

17 Gake ɖe wòle be Mawu ƒe kɔkɔenyenye nana míabui be míele tsɛ ne míetsɔ mía ɖokui sɔ kplia? Ðeko wòle be ŋuɖoɖoa nanye, ẽ. Ðikeke mele eme o be míele tsɛ ŋutɔ le Yehowa gbɔ—eye mía ɖokui tsɔtsɔ sɔ kplii alea kura yi akpa. Ðe wòle be esia nyanya nate mí ɖa le eŋua? Bu alesi Yesaya wɔ nui esi wòsee serafiwo ɖe gbeƒã Yehowa ƒe kɔkɔenyenye ŋu kpɔ. “Tete megblɔ be: Alele, evɔ nam! Elabena ame nuyi makɔmakɔtɔ menye, eye mele dukɔ, si ƒe nuyi mekɔ o la dome; elabena nye ŋkuwo kpɔ fia Yehowa Zebaot.” (Yesaya 6:5) Ẽ, Yehowa ƒe kɔkɔenyenye si ŋu seɖoƒe mele o wɔe be Yesaya ɖo ŋku eƒe nuvɔ̃menyenye kple eƒe blibomademade dzi. Gbã la, ŋutsu nuteƒewɔla ma ƒe dzi gbã. Gake Yehowa megblẽe ɖe nɔnɔme ma me o.

18 Enumake serafi aɖe va fa dzi na nyagblɔɖila la. Le mɔ ka nu? Gbɔgbɔ me nuwɔwɔ sẽŋua dzo yi vɔsamlekpuia gbɔ, eɖe aka le edzi, eye wòtsɔe ka Yesaya ƒe nuyiwo ŋu. Adze abe ɖe nuwɔna sia ana wòase veve boŋ ke menye be wòafa akɔ nɛ o ene. Gake ɖo ŋku edzi be ŋutega si me nukpɔkpɔwo nye  kpɔɖeŋuwo sɔŋ ye wònye. Yesaya, si nye Yudatɔ nuteƒewɔla, nya nyuie be wosaa vɔ gbesiagbe le gbedoxɔ me vɔsamlekpui dzi tsɔ léa avu nuvɔ̃woe. Eye serafi la ɖo ŋku edzi na nyagblɔɖila la lɔlɔ̃tɔe be togbɔ be enye ame madeblibo, “nuyi makɔmakɔtɔ” nyateƒe hã la, ate ŋu ava nye ame kɔkɔe le Mawu ŋkume. * Yehowa lɔ̃ faa be yeabu amegbetɔ si nye nuvɔ̃me madeblibo ame kɔkɔee—vaseɖe afi aɖe ya teti.—Yesaya 6:6, 7.

19. Togbɔ be míede blibo o hã la, aleke wòanya wɔe be míanɔ kɔkɔe vaseɖe afi aɖe?

19 Nenemae wòle egbea hã. Vɔ siwo katã wosana le vɔsamlekpui dzi le Yerusalem nye nusi lolo wu ƒe vɔvɔli—si nye Yesu Kristo ƒe vɔsa deblibo ɖeka kolia si wòsa le ƒe 33 M.Ŋ. me. (Hebritɔwo 9:11-14) Ne míetrɔ dzime tso míaƒe nuvɔ̃wo me le nyateƒe me, heɖɔ míaƒe nuwɔna gbegblẽwo ɖo, eye míeɖe vɔsa ma dzixɔxɔse fia la, woatsɔ míaƒe nuvɔ̃wo ake mí. (Yohanes I, 2:2) Míawo hã míate ŋu anɔ dzadzɛ le Mawu ŋkume. Esia tae apostolo Petro ɖo ŋku edzi na mí be: “Woŋlɔ bena: ‘Minɔ kɔkɔe, elabena nye la mele kɔkɔe.’” (Petro I, 1:16) De  dzesii be Yehowa megblɔ be míanɔ kɔkɔe abe ye ene o. Media nusi kɔ wu mí tsoa mía si o. (Psalmo 103:13, 14) Ke boŋ Yehowa le gbɔgblɔm na mí be míanɔ kɔkɔe elabena ye la, yele kɔkɔe. ‘Esi míenye lɔlɔ̃viwo ta la,’ míedi be míasrɔ̃e nyuie alesi mí amegbetɔ madeblibowo míate ŋui. (Efesotɔwo 5:1) Eyata ebia agbagbadzedze ɣeawokatãɣi hafi míate ŋu anɔ kɔkɔe. Ne míele tsitsim le gbɔgbɔ me la, míadze agbagba gbesiagbe be “míawu kɔkɔenyenye nu.”—Korintotɔwo II, 7:1.

20. (a) Nukata wòle vevie be míase egɔme be míate ŋu anɔ kɔkɔe le mía Mawu kɔkɔea ŋkume? (b) Dɔ kae wòwɔ ɖe Yesaya dzi esi wòdze sii be wolé avu ɖe yeƒe nuvɔ̃wo ta?

20 Yehowa lɔ̃ nusi dzɔ hele dzadzɛ. Elé fu nuvɔ̃. (Xabakuk 1:13) Gake melé fu mí o. Zi alesi míebua nuvɔ̃ abe alesi wòbunɛ ene—alé fu nuvɔ̃, ahalɔ̃ nu nyui—eye míedze agbagba zɔ Kristo Yesu ƒe afɔtoƒe debliboawo la, Yehowa atsɔ míaƒe nuvɔ̃wo ake mí. (Amos 5:15; Petro I, 2:21) Ne eme kɔ na mí be míate ŋu anɔ kɔkɔe le mía Mawu kɔkɔea ŋkume ko la, nusiwo dona tsoa eme la sɔa gbɔ ŋutɔ. Ðo ŋku edzi be gbã la, Yehowa ƒe kɔkɔenyenye na Yesaya ɖo ŋku eya ŋutɔ ƒe ame makɔmakɔnyenye dzi. Edo ɣli be: “Alele, evɔ nam!” Gake esi wònya se egɔme be wolé avu ɖe yeƒe nuvɔ̃wo ta ko la, eƒe nukpɔsusu trɔ. Esi Yehowa bia be amekae alɔ̃ atsɔ dɔ na ye la, Yesaya lɔ̃ enumake, togbɔ be menya nusiwo wòabia o hã. Edo ɣli be: “Nyee nye esi, dɔm!”—Yesaya 6:5-8.

21. Susu ka tae míate ŋu aka ɖe edzi be míate ŋu atu kɔkɔenyenye ƒe nɔnɔmea ɖo?

21 Mawu kɔkɔea ƒe nɔnɔme nue wòwɔ mí ɖo, eye wòna agbenyuinɔnɔ ƒe nɔnɔme kple ŋutete mí bene míanye gbɔgbɔmemewo. (Mose I, 1:26) Ŋutetea le mí katã ŋu be míanɔ kɔkɔe. Zi alesi míeyi edzi le kɔkɔenyenye tum ɖo ko la, adzɔ dzi na Yehowa be yeakpe ɖe mía ŋu. Le esia wɔwɔ me la, míagate ɖe mía Mawu kɔkɔea ŋu geɖe wu. Gakpe ɖe eŋu la, ne míele Yehowa ƒe nɔnɔmewo me dzrom le ta siwo gale ŋgɔ me la, míakpɔe be susu sẽŋu geɖe li siwo ta wòle be míate ɖe eŋu ɖo!

^ mm. 18 Nyagbɔgblɔ “nuyi makɔmakɔtɔ” sɔ ŋutɔ, elabena wozãa nuyi zi geɖe le Biblia me wòtsia tre ɖi na nuƒoƒo alo gbegbɔgblɔ. Le amegbetɔ madeblibowo dome la, alesi wozãa woƒe nuƒoƒo ŋutete gbɔe nuvɔ̃ gbogbo aɖewo tsona.—Lododowo 10:19; Yakobo 3:2, 6.