Dzo kpo yi emenuwo dzi

Dzo kpo yi emenuawo dzi

 TA 29

‘Be Nàdze Si Kristo Ƒe Lɔlɔ̃’

‘Be Nàdze Si Kristo Ƒe Lɔlɔ̃’

1-3. (a) Nukae ʋã Yesu wòdi be yeanɔ abe ye Fofo ene? (b) Yesu ƒe lɔlɔ̃ ƒe akpa kawo mee míadzro?

ÈKPƆ ŋutsuvi sue aɖe si le agbagba dzem be yeanɔ abe ye fofo ene kpɔa? Ðewohĩ ŋutsuvia asrɔ̃ alesi fofoa zɔnae, alesi wòƒoa nui, alo alesi wòwɔa nui. Le ɣeyiɣi aɖe megbe la, anɔ eme be fofoa ƒe agbenɔnɔ kple gbɔgbɔ me dzidzenuwo gɔ̃ hã ava tsi ɖevia si. Ẽ, lɔlɔ̃ kple ŋudzedzekpɔkpɔ si le ɖevia me na fofoa si lɔ̃a ame lae ʋãnɛ wòdina be yeanɔ abe ye fofo ene.

2 Ke ƒomedodo si le Yesu kpakple Fofoa si le dziƒo dome ya ɖe? Yesu gblɔ kpɔ ɣeaɖeɣi be: “Melɔ̃a Fofo la.” (Yohanes 14:31) Ame aɖeke megali si ate ŋu alɔ̃ Yehowa wu Vi sia, amesi nɔ Fofoa gbɔ ɣeyiɣi didi aɖe hafi wova wɔ nuwɔwɔ bubu ɖesiaɖe, o. Lɔlɔ̃ mae ʋã Vi sia si tsɔ eɖokui nae bliboe wòdi be yeanɔ abe ye Fofo ene.—Yohanes 14:9.

3 Le agbalẽ sia ƒe ta siwo do ŋgɔ me la, míedzro alesi Yesu srɔ̃ Yehowa ƒe ŋusẽ, eƒe dzɔdzɔenyenye, kple eƒe nunya bliboe me. Gake aleke Yesu ɖe Fofoa ƒe lɔlɔ̃ fiae? Mina míadzro Yesu ƒe lɔlɔ̃ ƒe akpa etɔ̃ aɖewo me akpɔ—eƒe ɖokuitsɔtsɔsavɔ ƒe gbɔgbɔ, eƒe dɔmetɔtrɔ si me nublanuikpɔkpɔ le, kple eƒe lɔlɔ̃ faa be yeatsɔ ake.

‘Lɔlɔ̃ Gã Wu Esia Megale Ame Aɖeke Si O’

4. Aleke Yesu ɖo ɖokuitsɔtsɔsavɔ ƒe lɔlɔ̃ gãtɔ kekeake si amegbetɔ aɖe ɖo kpɔ ƒe kpɔɖeŋui?

4 Yesu ɖo ɖokuitsɔtsɔsavɔ ƒe lɔlɔ̃ ƒe kpɔɖeŋu ɖedzesi aɖe ɖi. Ðokuitsɔtsɔsavɔ fia be woatsɔ ame bubuwo ƒe hiahiãwo kple didiwo aɖo ŋgɔ na ame ŋutɔ tɔ. Aleke Yesu ɖe lɔlɔ̃ ƒe akpa sia fiae? Eya ŋutɔ ɖe eme be: “Lɔlɔ̃ gã wu esia megale ame aɖeke si bena, wòatsɔ eƒe agbe aɖo anyi ɖe xɔlɔ̃awo ta o.” (Yohanes 15:13) Yesu lɔ̃ faa tsɔ eƒe agbe deblibo  na ɖe mía ta. Enye lɔlɔ̃ gãtɔ kekeake si amegbetɔ aɖe ɖe fia kpɔ. Gake Yesu gaɖe ɖokuitsɔtsɔsavɔ ƒe lɔlɔ̃ fia le mɔ bubuwo hã nu.

5. Nukata asiɖeɖe le dziƒogbenɔnɔ ŋu fia be Mawu ƒe Tenuvi la tsɔ nuwo sa vɔe lɔlɔ̃tɔe?

5 Le Mawu ƒe Tenuvi la ƒe agbenɔnɔ do ŋgɔ na amegbetɔzuzu me la, mɔnukpɔkpɔ tɔxɛ kple ɖoƒe kɔkɔ aɖee nɔ esi le dziƒo. Hadede kplikplikpli nɔ woa kple Yehowa kpakple gbɔgbɔ me nuwɔwɔ akpeakpe bubuawo dome. Togbɔ be nuwo sɔ nyuie na Vi lɔlɔ̃tɔ sia alea hã la, ‘eɖi gbɔlo eɖokui eye wòtsɔ dɔla ƒe nɔnɔme ɖo eɖokui dzi, heva dzɔ ɖe amewo ƒe nɔnɔme me.’ (Filipitɔwo 2:7) Elɔ̃ faa va nɔ agbe le amegbetɔ nuvɔ̃mewo dome le xexe ‘si le vɔ̃ɖitɔ la ƒe ŋusẽ te’ me. (Yohanes I, 5:19) Ðe esia mefia be Mawu ƒe Vi la tsɔ nuwo sa vɔe lɔlɔ̃tɔe oa?

6, 7. (a) Mɔ kawo nue Yesu ɖe ɖokuitsɔtsɔsavɔ ƒe lɔlɔ̃ fia le eƒe anyigba dzi subɔsubɔdɔa wɔwɔ me? (b) Ðokuitɔmadimadi ƒe lɔlɔ̃ ƒe kpɔɖeŋu wɔdɔɖeamedzi kae woŋlɔ ɖe Yohanes 19:25-27?

6 Yesu ɖe ɖokuitsɔtsɔsavɔ ƒe lɔlɔ̃ fia le mɔ vovovowo nu le eƒe anyigba dzi subɔsubɔdɔa ƒe akpa sia akpa wɔwɔ me. Enye amesi medi eɖokui tɔ le naneke me o. Eƒe subɔsubɔdɔa xɔ eyama me ale gbegbe be etsɔ nu vevi aɖewo siwo hiã amegbetɔ be wòakpɔ dzidzeme gɔ̃ hã sa vɔe. Egblɔ be: “Abeiwo kpɔ dowo, eye dziƒoxeviwo hã kpɔ atɔwo; ke Amegbetɔvi la mekpɔ afisi wòatsɔ ta aziɔ ɖo o.” (Mateo 8:20) Esi Yesu nye atikpala bibi ta la, anye ne ate ŋu azã ɣeyiɣi aɖe atsɔ atu xɔ nyui aɖe na eɖokui alo awɔ zikpui dzeaniwo adzra akpɔ ga geɖe hafi. Gake mezã eƒe dɔnyanya tsɔ di ŋutilãmenuwo na eɖokui o.

7 Woŋlɔ Yesu ƒe ɖokuitsɔtsɔsavɔ ƒe lɔlɔ̃ ƒe kpɔɖeŋu wɔdɔɖeamedzi ŋutɔ aɖe ɖe Yohanes 19:25-27. Bu nu geɖe siwo axɔ susu kple dzi me na Yesu le ŋdɔ si do ŋgɔ na eƒe ku me la ŋu kpɔ. Esi wònɔ fu kpem le fuwɔametia ŋu la, eƒe nusrɔ̃lawo, gbeƒãɖeɖedɔa, kple vevietɔ eƒe nuteƒewɔwɔ kpakple dɔ si esia awɔ ɖe Fofoa ƒe ŋkɔ dzi nye nusiwo ŋu wòtsi dzi ɖo.  Nyateƒee, ameƒomea ƒe etsɔme bliboa katã nɔ te ɖe eyama dzi! Ke hã ɣeyiɣi kpui aɖe hafi Yesu naku la, eɖee fia be yetsɔ ɖe le eme na ye dada, Maria, amesi anya zu ahosi ɣemaɣi. Yesu bia tso apostolo Yohanes si be wòakpɔ Maria dzi abe eya Yohanes ŋutɔ dada ene, eye ema megbe apostoloa kplɔ Maria yi eƒemee. Yesu to esia me wɔ ɖoɖo ɖe dadaa ƒe ŋutilã me kple gbɔgbɔ me nuhiahiãwo gbɔ kpɔkpɔ ŋu. Ðokuitɔmadimadi ƒe lɔlɔ̃ ka gbegbee nye si wòɖe fia!

“Eƒe Dɔme Trɔ Ðe Wo Ŋuti”

8. Gɔmesese kae le Helagbe me nya si Biblia zã tsɔ ƒo nu tso Yesu ƒe nublanuikpɔkpɔ na ame ŋu?

8 Ame ƒe nu wɔa nublanui na Yesu abe Fofoa ke ene. Ŋɔŋlɔawo ƒo nu tso Yesu ŋu be enye amesi lɔ̃ faa na kpekpeɖeŋu amesiwo nɔ fu kpem le esi woƒe nu wɔ nublanui nɛ vevie ta. Biblia zã Helagbe me nya aɖe si gɔme woɖe be “eƒe dɔme trɔ ɖe wo ŋu” tsɔ ƒo nu tso Yesu ƒe nublanuikpɔkpɔ na ame ŋu. Agbalẽnyala aɖe gblɔ be: “Nya ma fia . . . seselelãme aɖe si ʋãa ame yina ememe ʋĩ ke. Eyae nye nya sẽŋu kekeake le Helagbe me si wozãna tsɔ ƒoa nu tso ame ƒe nu ƒe nublanuiwɔwɔ na ame ŋu.” Bu nɔnɔme aɖewo siwo me dɔmetɔtrɔ ɖe ame ŋu vevie ʋã Yesu wòwɔ afɔɖeɖe aɖewo ŋu kpɔ.

9, 10. (a) Nɔnɔme kawoe na be Yesu kple eƒe apostolowo va di teƒe si ɖoɖoezizi le? (b) Esi ameha aɖewo va gblẽ Yesu ƒe ɖiɖiɖeme me la, aleke wòwɔ nui, eye nukatae?

9 Eʋãe wòkpɔ amewo ƒe gbɔgbɔ me nuhiahiãwo gbɔ. Nuŋlɔɖi si le Marko 6:30-34 na míekpɔ nusi koŋ ʋã Yesu wòkpɔ nublanui na amewo. Kpɔ alesi nuwo nɔ ɖa le susu me. Dzi nɔ apostoloawo dzɔm elabena ɖeko wowu gbeƒãɖeɖedɔ si wowɔ de didiƒe ke la nu teti koe enye ma. Wotrɔ gbɔ va Yesu gbɔ eye wotsɔ dzidzɔ ka nusiwo katã wokpɔ kple nusiwo wose la ta nɛ. Gake ameha gã aɖe va ƒo ƒu, eye esia na be Yesu kple eƒe apostoloawo mekpɔ asinu aɖu nu teti hã o. Esi Yesu léa ŋku ɖe nuwo ŋu ɣesiaɣi ta la, ekpɔe be ɖeɖi te yeƒe apostoloawo  ŋu. Egblɔ na wo be: “Miva, ne míawo ɖeɖe míayi gbedzi, ne míadzudzɔ mía ɖokui ʋee.” Esi woɖo tɔdziʋu la, wotso Galilea-ƒua yi teƒe aɖe si ɖoɖoezizi le. Gake amehaawo kpɔ wo esi wodzo yina. Wo dometɔ aɖewo hã se nya si wògblɔ. Ale wo katã woƒu du to ƒua ta to dziehe gome heva ɖo ƒuta kemɛ do ŋgɔ na tɔdziʋua!

10 Ðe dzi ku Yesu be wole yeƒe vovoɣi me gblẽm na yea? Kura o! Esi wòkpɔ ameha sia siwo anye ame akpe geɖe, siwo nɔ elalam la, ewɔ dɔ ɖe edzi ŋutɔ. Marko ŋlɔ bena: “Ekpɔ ameha gã aɖe, eye eƒe dɔme trɔ ɖe wo ŋuti, elabena wole abe alẽ, siwo nu kplɔla mele o ene, eye wòde asi nu geɖe fiafia me wo.” Yesu bu amesiawo be wonye amesiwo gbɔgbɔmenuwo hiã. Ðeko wole abe alẽ siwo tra, eye kplɔla mele wo nu akplɔ wo alo akpɔ wo ta o ene. Yesu nya be subɔsubɔhakplɔla vevemaseɖeamenula siwo wòle be woalé be na alẽawo hafi la doa vlo ame tsɛwo eye woŋea aɖaba ƒu woƒe gbɔgbɔ me nuhiahiãwo dzi. (Yohanes 7:47-49) Ameawo ƒe nu wɔ nublanui nɛ eye wòte nufiafia wo tso ‘Mawu ƒe fiaɖuƒea ŋuti.’ (Luka 9:11) De dzesii be Yesu ƒe dɔme trɔ ɖe ameawo ŋu do ŋgɔ hafi wòava kpɔ alesi woawɔ ɖe nusi wòafia wo ŋu gɔ̃ hã. Ne míagblɔe bubui la, eƒe dɔme trɔ ɖe amewo ŋu nublanuikpɔkpɔtɔe, menye le eƒe nufiafia amehawo me tsonu ta o, ke boŋ le nusi ʋãe ɖe esia wɔwɔ ŋu tae.

‘Edo abɔ ɖa, eye wòka asi eŋu’

11, 12. (a) Aleke wobua anyidzelawoe le Biblia ƒe ɣeyiɣiwo me, gake aleke Yesu wɔ nui esi ŋutsu aɖe “si ŋu yɔ fũ kple anyi” la te ɖe eŋu? (b) Anɔ eme be dɔ kae asi si Yesu ka anyidzelaa ŋu awɔ ɖe edzi, eye aleke ɖɔkta aɖe ƒe nuteƒekpɔkpɔ kɔ nusia mee?

11 Eʋãe wòɖe amewo ƒe fukpekpe ɖa. Amesiwo ŋu dɔléle vovovowo nɔ la kpɔe be Yesu ƒe dɔme trɔna ɖe ame ŋu, eyata wote ŋu te ɖe eŋu faa. Esia ɖe dzesi vevietɔ esi ŋutsu aɖe “si ŋu yɔ fũ kple anyi” la te ɖe Yesu ŋu esime amehawo nɔ Yesu yome. (Luka 5:12) Le Biblia ƒe ɣeyiɣiwo me la, woɖea anyidzelawo ɖe aga be ame bubuwo nagaxɔ dɔ le wo ŋu o.  (Mose IV, 5:1-4) Gake le ɣeyiɣi aɖe megbe la, kplɔla siwo nye rabiwo ƒã vevemasemase ɖe anyidzelawo nu ɖe amewo me eye wode woa ŋutɔwo ƒe se sesẽwo tsɔ te wo ɖe anyii. * Gake de dzesi alesi Yesu wɔ nu ɖe anyidzela la ŋui: “Anyidzela aɖe va egbɔ le kuku ɖem nɛ, eye wòdze klo nɛ gblɔ bena: Ne èlɔ̃ ko, àte ŋu aklɔ ŋutinye. Eye esi eƒe dɔme trɔ ɖe eŋuti la, edo eƒe abɔ ɖa, eye wòde asi eŋu hegblɔ nɛ bena: Melɔ̃ ŋutiwò nakɔ! Eye enumake la anyi la vɔ le eŋuti, eye eŋuti kɔ.” (Marko 1:40-42) Yesu nya be se meɖe mɔ na anyidzela ma be wòava afima gɔ̃ hã o. Gake le esi Yesu nanyae ɖa teƒe la, eƒe nu wɔ nublanui nɛ ale gbegbe be wòwɔ nusi meva susu me na ame kura o. Yesu ka asi eŋu!

12 Àte ŋu abu dɔ si gbegbe asikaka ame ŋu ma awɔ ɖe anyidzela ma dzi ŋua? Be míawɔ eƒe kpɔɖeŋu aɖe la, bu nuteƒekpɔkpɔ sia ŋu kpɔ. Ðk. Paul Brand, amesi nye anyidɔŋutinunyala, gblɔ anyidzela aɖe si wòwɔ atike na le India ŋu nya. Esi ɖɔktaa nɔ anyidzelaa dom kpɔ la, eda asi ɖe eƒe abɔta henɔ atike si wɔ ge wògbɔna la me ɖem nɛ to gbegɔmeɖela aɖe dzi. Kasia, ɖeko anyidzela la lé avi me. Ðɔktaa bia be: “Ðe megblɔ nya aɖe si te ɖe dziwòa?” Gbegɔmeɖela la bia ɖekakpuia le wo degbe me eye wòɖo eŋu be: “Ao, ɖɔkta. Ebe esi nèda asi ɖe kɔme na ye tae yele avi fam ɖo. Vaseɖe esime wòva afisia la, ƒe gbogbo aɖee nye si va yi si ame aɖeke meka asi eŋu kpɔ o.” Le anyidzela si va Yesu gbɔ gome la, gɔmesese geɖe wu ye nɔ asi si woka eŋu la ŋu nɛ. Le asikaka eŋu alea megbe la, dɔléle ma si na wonyae de gbe la bu kura!

13, 14. (a) Ameha kawoe Yesu do goe le Nain gbɔto, eye nukae na nɔnɔmea wɔ nublanui ale gbegbe? (b) Nukae Yesu ƒe dɔmetɔtrɔ ʋãe be wòwɔ na ahosi si nɔ Nain?

 13 Eʋãe wòɖe amewo ƒe nuxaxa ɖa. Amewo ƒe fukpekpe wɔ dɔ ɖe Yesu dzi ale gbegbe. Le kpɔɖeŋu me, bu nuŋlɔɖi si le Luka 7:11-15 ŋu kpɔ. Esia dzɔ le Yesu ƒe subɔsubɔdɔa wɔwɔ ƒe domedome lɔƒo esime wògogo Galilea-du si nye Nain gbɔto. Esi Yesu nɔ dua ƒe agbonu gogom la, edo go ameha siwo yina ameɖiƒe. Nɔnɔmea wɔ nublanui ale gbegbe. Ahosi aɖe viŋutsu si nye eƒe tenuvi ɖeka kolia ye ku. Ɣeaɖeɣi do ŋgɔ la, anɔ eme be nyɔnu sia nɔ amehawo dome alea wozɔ yi ameɖibɔ me—esi wova ɖi srɔ̃aŋutsu. Fifia ya viaŋutsuvi, amesi ŋu wòle agbe ɖo la ɖiƒee woyina. Anɔ eme be ameha siwo le eyome la nye konyifala siwo nɔ konyifahawo dzim kpakple haƒola siwo nɔ kuhawo ƒom. (Yeremya 9:17, 18; Mateo 9:23) Gake vidada si nɔ konyi fam vevie la koŋ ŋue Yesu ƒe ŋku nɔ, amesi ɖikeke mele eme o be enɔ nusi dzi wotsɔ via ɖo la xa tututu.

14 Yesu ƒe ‘dɔme trɔ ɖe’ vidada si ƒe vi ku la ‘ŋu’ vevie. Egblɔ nɛ kple gbe si me kakaɖedzi dze le be: “Megafa avi o!” Yesu ŋutɔ te ɖe wo ŋu togbɔ be womebia tso esi o hã eye wòka asi nusi dzi wotsɔe ɖo la ŋu. Etsɔlawo—kple ɖewohĩ ameha blibo la—tɔ. Yesu gblɔ na ame kukua kple gbe si me ŋusẽ le be: “Ðekakpui, mele egblɔm na wò bena: Tsi tre!” Nukae dzɔ ɖe esia yome? “Ame kuku la fɔ bɔbɔ nɔ anyi, eye wòde asi nuƒoƒo me,” abe alɔ̃ me ʋĩe wofɔe tsoe ene! Esia yome wogblɔ nya wɔdɔɖeamedzi sia be: ‘Eye Yesu tsɔe na dadaa.’

15. (a) Nukae Biblia me nudzɔdzɔ siwo fia be Yesu ƒe dɔme trɔ ɖe amewo ŋu ɖe fia le ɖekawɔwɔ si le dɔmetɔtrɔ kple afɔɖeɖe awɔ nane tso nɔnɔmea ŋu dome? (b) Aleke míate ŋu asrɔ̃ Yesu le esia mee?

15 Nukae míesrɔ̃ tso ŋutinya siawo me? Le wo dometɔ ɖesiaɖe me la, de dzesi ɖekawɔwɔ si le dɔmetɔtrɔ kple nane wɔwɔ tso nɔnɔmea ŋu dome. Yesu makpɔ amewo ƒe vevesese teƒe eƒe dɔme nagbe tɔtrɔ ɖe wo ŋu o, eye eƒe dɔme matrɔ ɖe ame ŋu eye wòagbe nane wɔwɔ tso eŋu o. Aleke míate ŋu asrɔ̃ eƒe  kpɔɖeŋuae? Agba le mí Kristotɔwo dzi be míaɖe gbeƒã nyanyuia ahawɔ nusrɔ̃lawo. Nusi ʋã mí koŋ enye lɔlɔ̃ na Mawu. Gake mina wòanɔ susu me na mí hã be dɔ sia hã bia dɔmetɔtrɔ ɖe amewo ŋu. Ne míesea veve ɖe amewo nu abe Yesu ene la, míaƒe dzi aʋã mí be míawɔ nusianu si míate ŋui agblɔ nyanyuia na wo. (Mateo 22:37-39) Ke dɔmetɔtrɔ ɖe mía nɔvi xɔsetɔ siwo le fu kpem alo le nu xam ŋu hã ɖe? Míawo míate ŋu aɖe ŋutilã me vevesesewo ɖa alo afɔ ame kukuwo ɖe tsitre nukutɔe o. Gake míate ŋu aɖe dɔmetɔtrɔ afia, to alesi míatso le mía ɖokui si aɖee afia be míetsɔ ɖe le eme na wo alo ana kpekpeɖeŋu si hiã wo me.—Efesotɔwo 4:32.

“Fofo, Tsɔe Ke Wo”

16. Aleke alesi Yesu lɔ̃na faa be yeatsɔ ake la dzee esime wònɔ fuwɔametia ŋu gɔ̃ hã?

16 Yesu ɖe Fofoa ƒe lɔlɔ̃ fia le mɔ vevi bubu aɖe hã nu—‘elɔ̃na faa be yeatsɔ ake.’ (Psalmo 86:5) Eƒe lɔlɔ̃ faa sia dze esime wònɔ fuwɔametia ŋu gɔ̃ hã. Esime wodi be Yesu naku ŋukpedoameku, eye woƒo gatagbadzɛwo ɖe eƒe asi kple afɔ wònɔ veve sem la, nya kae wògblɔ? Ðe wòdo ɣli yɔ Yehowa be wòahe to na ye wulawoa? Kura o, ke boŋ Yesu ƒe nya mamlɛtɔwo dometɔ aɖewoe nye: “Fofo, tsɔe ke wo, elabena womenya nusi wɔm wole o.”—Luka 23:34. *

17-19. Mɔ kawo dzie Yesu to ɖee fia apostolo Petro be yetsɔ kee esi wògbe nu le Egbɔ zi etɔ̃ megbe?

17 Ðewohĩ Yesu ƒe tsɔtsɔke faa ƒe kpɔɖeŋu bubu si wɔ dɔ ɖe ame dzi wu enye alesi wòwɔ nu ɖe apostolo Petro ŋui.  Ðikeke mele eŋu o be Petro lɔ̃ Yesu vevie. Le Nisan 14 lia ƒe zã si nye mamlɛtɔ le Yesu ƒe agbenɔnɔ le anyigba dzi me la, Petro gblɔ nɛ be: “Aƒetɔ, mesu te be, mía kpli wò míayi gaxɔ me kple ku me.” Gake le gaƒoƒo ʋɛ aɖewo megbe la, Petro gbe zi gbɔ zi etɔ̃ sɔŋ be yemenya Yesu gɔ̃ hã o! Biblia gblɔ nusi dzɔ esi Petro sẽ nu zi etɔ̃lia na mí, be: “Eye Aƒetɔ la trɔ kpɔ Petro dũ.” Esi nuvɔ̃ si Petro wɔ ƒe agba te ɖe edzi vevie ta la, ‘edo go, eye wòfa avi vevie.’ Emegbe esi Yesu ku le ŋkeke ma dzi la, apostoloa anya nɔ nya sia ŋu bum vevie be, ‘Ðe nye Aƒetɔ tsɔ nye vodada kema?’—Luka 22:33, 61, 62.

18 Petro melala ɣeyiɣi didi hafi kpɔ ŋuɖoɖoa o. Wofɔ Yesu ɖe tsitre le Nisan 16 lia ƒe ŋdi me, eye anye be le ŋkeke ma ke dzi la, eya ŋutɔ ɖe eɖokui fia Petro. (Luka 24:34; Korintotɔwo I, 15:4-8) Nukata Yesu ɖe ameŋububu tɔxɛ sia fia apostolo si sẽ nu sesĩe hegbe nu le Egbɔ la? Anɔ eme be ɖe Yesu di be yeaka ɖe edzi na Petro si trɔ dzime la be ye si nye eƒe Aƒetɔ la yekpɔtɔ lɔ̃e eye yedea asixɔxɔ eŋu. Gake Yesu gawɔ nusi yi ŋgɔ wu ema tsɔ na kakaɖedzi Petro.

19 Le ɣeyiɣi aɖe megbe la, Yesu ɖe eɖokui fia nusrɔ̃lawo le Galilea-ƒua to. Le ɣeyiɣi sia dzi la, Yesu bia gbe Petro (amesi gbe nu le eƒe Aƒetɔ gbɔ zi etɔ̃) nenye be Petro lɔ̃ ye hã. Esi wòbia nya siae zi etɔ̃lia vɔ megbe la, Petro ɖo eŋu be: “Aƒetɔ, wòe nya nuwo katã, wòe dze sii bena, nyemelɔ̃a nu gbɔwò o.” Nyateƒee, Yesu, amesi ate ŋu anya nusi le amewo ƒe dzi me, nya nyuie be Petro melɔ̃a nu le ye gbɔ o. Ke hã Yesu na mɔnukpɔkpɔ Petro be wòaɖo kpe eƒe lɔlɔ̃ na ye dzi. Gawu la, Yesu de dɔ asi na Petro be ‘wòanyi’ Yeƒe “alẽviawo” eye ‘wòakplɔ’ wo. (Yohanes 21:15-17) Do ŋgɔ la, wode dɔ asi na Petro be wòaɖe gbeƒã. (Luka 5:10) Gake fifia la, esi Yesu ɖee fia le mɔ ɖedzesi aɖe nu be yeka ɖe edzi megbe la, egatsɔ agbanɔamedzi kpekpe aɖe de asi nɛ—be wòalé be na amesiwo ava nye Kristo yomedzelawo. Le ema megbe kpuie la, Yesu tsɔ Petro ɖo ɖoƒe vevi aɖe le dɔ si eƒe nusrɔ̃lawo awɔ me. (Dɔwɔwɔwo 2:1-41) Aleke gbegbe Petro ƒe dzi adze emee nye si be wòanya be Yesu tsɔ ke ye eye wòkpɔtɔ ka ɖe ye dzi!

 Ðe ‘Nèdze Si Kristo ƒe Lɔlɔ̃ La’?

20, 21. Aleke míawɔ ava ‘dze si Kristo ƒe lɔlɔ̃ la’ bliboe?

20 Vavãe, Yehowa ƒe Nya la ƒo nu tso Kristo ƒe lɔlɔ̃ ŋu wònya se ŋutɔ. Gake aleke wòle be míawɔ nu ɖe Yesu ƒe lɔlɔ̃ ŋui? Biblia de dzi ƒo na mí be ‘míadze si Kristo ƒe lɔlɔ̃ si ƒo sidzedze ta sã la.’ (Efesotɔwo 3:19) Abe alesi míekpɔe ene la, Nyanyuigbalẽawo me nuŋlɔɖi siwo ku ɖe Yesu ƒe agbenɔnɔ kple eƒe subɔsubɔdɔ ŋu la fia nu geɖe mí tso Kristo ƒe lɔlɔ̃ ŋu. Gake be ‘míadze si Kristo ƒe lɔlɔ̃ la’ bliboe bia nu geɖe wu nusi Biblia gblɔ tso eŋu la sɔsrɔ̃ ko.

21 Helagbe me nya si gɔme woɖe be “woadze si” fia be woanya nu “to eŋudɔwɔwɔ ŋutɔŋutɔ me, to eƒe nuteƒekpɔkpɔ me.” Ne míeɖe lɔlɔ̃ fia amewo abe Yesu ene—míetsɔ mía ɖokui ɖo anyi na amewo faa ɖokuitɔmadimaditɔe, ne míaƒe dɔme trɔ ɖe wo ŋu eye míekpɔ woƒe hiahiãwo gbɔ, eye míetsɔ ke amewo faa tso dzi me faa—la, ekema míate ŋu ase eƒe seselelãmewo gɔme ŋutɔŋutɔ. Le esia me la, míetoa nuwɔna ŋutɔŋutɔ me va ‘dzea si Kristo ƒe lɔlɔ̃, si ƒo sidzedze ta sã.’ Eye migana míaŋlɔ be gbeɖe o be zi alesi míele Kristo ƒe nɔnɔme srɔ̃m la, zi nenemae míanɔ tetem ɖe amesi Yesu srɔ̃ bliboe, si nye mía Mawu lɔlɔ̃a, Yehowa, ŋui.

^ mm. 11 Rabiwo ƒe se gblɔ be mele be ame aɖeke nate ɖe anyidzela ŋu abɔklugui ene (anɔ meta 1.8) o. Gake ne ya le ƒoƒom la, ele be woana anyidzela nate yi adzɔge abɔklugui 100 (anɔ meta 45) ya teti. Midrash Rabbah la ƒo nu tso rabi aɖe si nɔa bebem na anyidzelawo kple bubu aɖe si daa kpe wo tsɔ nyaa wo ɖae ŋu. Eyata anyidzelawo nya vevesese si wònyena be woase le wo ɖokui me be wodo vlo yewo eye be womelɔ̃ yewo o.

^ mm. 16 Woɖe Luka 23:34 me nyawo ƒe akpa gbãtɔ ɖa le blema asinuŋɔŋlɔgbalẽ aɖewo me. Gake esi wokpɔ nya mawo le blema asinuŋɔŋlɔgbalẽ bubu geɖe siwo ŋu kakaɖedzi le me ta la, wodee New World Translation kple Biblia gɔmeɖeɖe bubu geɖe me. Edze ƒã be Roma-srafo siwo klã Yesu ɖe ati ŋu la ŋue wònɔ nu ƒom le. Womenya nusi wɔm wonɔ o, le esi womenya amesi tututu Yesu nye o ta. Gake fɔɖiɖi geɖe le subɔsubɔhakplɔla siwo nɔ megbe na amewuwua ya dzi le esi woawo ya nya nusi wɔm wonɔ nyuie hafi yi edzi wɔe ŋutasesẽtɔe ta. Tsɔtsɔke aɖeke meli na wo dometɔ geɖe o.—Yohanes 11:45-53.