Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Te Ðe Yehowa Ŋu

 TA 27

“Aleke Gbegbe Eƒe Nyuiwɔwɔ Sɔ Gbɔe Nye Si!”

“Aleke Gbegbe Eƒe Nyuiwɔwɔ Sɔ Gbɔe Nye Si!”

1, 2. Aleke Mawu ƒe nyuiwɔwɔ keke tae, eye aleke Biblia te gbe ɖe nɔnɔme sia dzii?

XƆLƆ̃ xoxo aɖewo va kpe ta ɖe fiẽya fafɛ nu le gota esime ɣea gba amigo eye woɖo kplɔ̃ le nu ɖum, le nu kom, le dze viviwo ɖom hele alesi nuto si ƒo xlã wo nya kpɔe la kafum. Agbledela aɖe tsi tre ɖe teƒe bubu aɖe ɖaa le eƒe agble ta kpɔm hele alɔgbɔnu kom esime tsi gã aɖe ɖo eye wòte dzadza ɖe eƒe nuku siwo hiã tsi vevie la dzi. Le teƒe aɖe hã srɔ̃ŋutsu kple srɔ̃nyɔnu aɖe ƒe dzi yɔ fũ kple dzidzɔ esi wokpɔ wo vi suea tso, ɖo agbagba, hete afɔɖeɖe zi gbãtɔ.

2 Amesiawo ɖanya alo womeɖanya o, nu ɖeka aɖe teƒe kpɔm wo katã wole dzidzɔtɔe—Yehowa Mawu ƒe nyuiwɔwɔ. Zi geɖe amesiwo doa vivi ɖe mawusubɔsubɔ ŋu gblɔa nya sia be, “Mawu nyo lo!” Gake ŋusẽ le nya siwo Biblia tsɔ gblɔe ŋu wu. Egblɔ be: “Oo, aleke gbegbe eƒe nyuiwɔwɔ sɔ gbɔe nye si!” (Zaxarya 9:17, NW) Gake edze abe ame ʋɛ aɖewo koe nya gɔmesese si tututu le nya mawo ŋu egbea ene. Nukawo tututu ŋue Yehowa Mawu ƒe nyuiwɔwɔ ku ɖo, eye aleke Mawu ƒe nɔnɔme sia kpɔa ŋusẽ ɖe mía dometɔ ɖesiaɖe dzii?

Mawu ƒe Lɔlɔ̃ ƒe Akpa Ðedzesi Aɖee Wònye

3, 4. Nukae nye nyuiwɔwɔ, eye nukata woate ŋu agblɔ le Yehowa ƒe nyuiwɔwɔ ŋu be enye eƒe lɔlɔ̃ ɖeɖe fia?

3 Le gbegbɔgblɔ geɖe me egbea la, “nyuiwɔwɔ” nye nya aɖe si ƒe gɔmesese le gbadzaa ko. Gake abe alesi woɖee fia le Biblia me ene la, nyuiwɔwɔ menye nya si le gbadzaa o. Nusi wòfia koŋ enye amewɔwɔ kple agbenyuinɔnɔ deŋgɔ. Eyata le susu aɖe nu la, míate ŋu agblɔ be Yehowa yɔ fũ kple nyuiwɔwɔ. Eƒe nɔnɔme vevitɔwo katã—siwo dome eƒe ŋusẽ, eƒe dzɔdzɔenyenye, kple eƒe nunya le—nyo heganyo ale gbegbe le go sia  go me. Ke hã míagate ŋu agblɔ le nyuiwɔwɔ ŋu wòasɔ wu be enye Yehowa ƒe lɔlɔ̃ ɖeɖe fia. Nukatae?

4 Nɔnɔme si dzena le nuwɔwɔ ɖe amewo ŋu mee nyuiwɔwɔ nye. Apostolo Paulo ɖee fia be le amegbetɔwo gome la, nɔnɔme sia nyoa ame ŋu gɔ̃ hã wu nudzɔdzɔewɔwɔ. (Romatɔwo 5:7) Woate ŋu aɖo ŋu ɖe ame dzɔdzɔe ŋu be awɔ ɖe nusiwo wobia tso esi le se nu dzi pɛpɛpɛ nuteƒewɔwɔtɔe, gake ame nyui ya wɔa nusi yi ŋgɔ wu ema. Etsona le eɖokui si dia mɔ siwo dzi wòato awɔ nusi aɖe vi na ame bubuwo hã. Abe alesi míava kpɔe ene la, Yehowa nyo ŋutɔŋutɔ le gɔmesese ma nu. Edze ƒã be Yehowa ƒe lɔlɔ̃ si seɖoƒe meli na o mee nyuiwɔwɔ sia tsona.

5-7. Nukata Yesu gbe be woagayɔ ye be “Nufiala Nyui” o, eye nyateƒenya vevi ka dzie wòto ema me ɖo kpee?

5 Yehowa ƒe nyuiwɔwɔ hã nye esi le etɔxɛ si ɖeke mede enu o. Ɣeyiɣi kpui aɖe do ŋgɔ na Yesu ƒe ku la, ŋutsu aɖe te ɖe eŋu be yeabia nyae, eye wòyɔe be “Nufiala Nyui.” Yesu gblɔ nɛ be: “Nuka nèle yɔyem bena nyui mahã? Ame aɖeke mele nyui o, negbe Mawu ɖeka ko.” (Marko 10:17, 18) Ðewohĩ eƒe ŋuɖoɖo ma awɔ mo yaa na wò. Nukata wòle be Yesu naɖɔ ŋutsu ma ɖo? Le nyateƒe me la, ɖe Yesu menye “Nufiala Nyui” oa?

6 Edze ƒã be ɖe ŋutsua nɔ nya siwo nye “Nufiala Nyui” zãm abe kafukafuŋkɔ si ana yeadze eŋu ene. Yesu he eƒe susu yi edzi ɖokuibɔbɔtɔe be kafukafu ma nye ye Fofo si le dziƒo tɔ, amesi ƒe nyonyo ƒo ɖesiaɖe ta. (Lododowo 11:2) Gake Yesu nɔ kpe ɖom nyateƒenya vevi aɖe hã dzi. Yehowa ɖeka koe nye amesi ɖoa nusi nyo ƒe dzidzenu. Eya ɖeka hɔ̃ ko sie gome si ƒo ɖesiaɖe ta le be wòafia nusi nyo kple nusi menyo o. Adam kple Xawa di be gome ma nasu yewo ŋutɔ si esi woto aglãdzedze me ɖu sidzedze nyui kple vɔ̃ ƒe ati la. Gake Yesu ya mele abe woawo ene o, elɔ̃ ɖe edzi ɖokuibɔbɔtɔe be ye Fofo koe dze aɖo dzidzenuwo.

7 Gawu la, Yesu nya be Yehowa gbɔe nusianu si nye nu nyuitɔ kekeake la tso. Eyae nye “nunana nyuiwo katã kple nunana  blibowo katã” Nala. (Yakobo 1:17) Mina míadzro alesi Yehowa ƒe nyuiwɔwɔ dze le eƒe dɔmenyonyo mee la me.

Yehowa ƒe Nyuiwɔwɔ Gbogboawo ƒe Kpeɖodzi

8. Aleke Yehowa wɔa nyui na ameƒomea katãe?

8 Yehowa ƒe nyuiwɔwɔ ɖe vi na amesiame si nɔ anyi kpɔ. Psalmo 145:9 gblɔ be: ‘Yehowa nye dɔmenyotɔ na amewo katã.’ Eƒe nyuiwɔwɔ na amewo katã ƒe kpɔɖeŋu aɖewo ɖe? Biblia gblɔ be: “Medzudzɔ ɖaseɖiɖi le eɖokui ŋuti o, le esime wòwɔa nyui, eye wòna tsidzadza mí tso dziƒo kple nuƒãɣiwo, eye wòtsɔ nuɖuɖu kple dzidzɔ yɔ míaƒe dziwo me fũ.” (Dɔwɔwɔwo 14:17) Nu vivi aɖe ɖuɖu na be dzidzɔ yɔ wò dzime fũ kpɔa? Ne ɖe menye Yehowa ƒe nyuiwɔwɔe na be wòwɔ anyigba sia ale be tsidzadza ƒe ɖoɖo si na be míekpɔa tsi nyui ɣesiaɣi kple “nuƒãɣiwo” bene míakpɔ nuɖuɖu vovovowo o la,  anye ne nu manɔ anyi míakpɔ aɖu o. Menye amesiwo lɔ̃a Yehowa koe wòwɔa nyui sia na o, ke boŋ ewɔnɛ na amesiame. Yesu gblɔ be: “Eyae nana eƒe ɣe dzena na ame vɔ̃ɖiwo kple ame nyuiwo, eye wònana tsi dzana na ame dzɔdzɔewo kple ame madzɔmadzɔwo.”—Mateo 5:45.

Yehowa naa ‘tsidzadza mí tso dziƒo kple nuƒãɣi siwo naa kutsetse nyui geɖe’

9. Aleke Yehowa ƒe nyuiwɔwɔ dze le alesi wòwɔ atɔtɔŋuti mee?

9 Dɔmenyonyo gã si wòwɔna na mí amegbetɔwo esi wònaa ɣe ƒe keklẽ, tsidzadza, kple nuƒãɣi nyuiwo mí ɣesiaɣi la nye nusiwo ŋu ame geɖe mebuna o. Le kpɔɖeŋu me, bu atɔtɔŋuti (apple, alo pomme) ŋu kpɔ. Enye atikutsetse si bɔ ŋutɔ ɖe xexeame ƒe akpa siwo katã dzoxɔxɔ mele fũ o. Ke hã edze ani, evivina, eye tsi vivi kple nunyiame veviwo le eme fũ. Ènya  be le xexeame godoo la, atɔtɔŋuti ƒomevi vovovo siwo ade 7,500 ye li, eye be woƒe amadedewo le vovovo, tso dzĩtɔwo dzi yi sikatsi kple aŋutiɖiɖitɔwo dzi vaseɖe gbemu tɔwo dzi, eye woƒe lolome hã le vovovo, ɖewo le abe aŋuti ene eye bubuwo lolo wuia? Ne èlé atɔtɔŋuti ƒe ku suea ɖe asiƒome la, màbui o. Gake eyae miena zua ati siwo dze ani wu la dometɔ ɖeka. (Hawo ƒe Ha 2:3) Atɔtɔŋutiti ƒoa se siwo dze ani le adame ɖesiaɖe; etsea ku le kele ɖesiaɖe me. Ƒe sia ƒe le mama dedie nu—vaseɖe ƒe 75 sɔŋ—la, atɔtɔŋutiti ɖeka tsea ku siwo ayɔ nugo gã 20 siwo dometɔ ɖesiaɖe ƒe kpekpeme ade kilogram 19!

Ku sue sia miena zua ati si ƒe tsetse naa nuɖuɖu ƒe bla nanewo eye wòdoa dzidzɔ na ame

10, 11. Aleke míaƒe sidzenuwo ɖe Mawu ƒe nyuiwɔwɔ fiae?

10 Yehowa ƒe nyuiwɔwɔ gbogbo si ŋu seɖoƒe mele o na wòwɔ míaƒe ŋutilã “nukutɔe,” eye wòna sidzenuwo mí be wòakpe ɖe mía ŋu míanya nu le eƒe asinudɔwo ŋu eye míakpɔ dzidzɔ ɖe wo ŋu. (Psalmo 139:14) Gaɖo ŋku nukpɔkpɔ siwo ŋu míeƒo nu le le ta sia ƒe gɔmedzedze dzi. Nukpɔkpɔ kawoe naa dzi dzɔa ame le ɣeyiɣi mawo me? Ðevi sue si dzi le dzɔdzɔm ƒe alɔgbɔnukoko. Tsi si le dzadzam ɖe agblewo dzi. Ɣe ƒe amigogbagba me amadede dzĩawo, sikatsiawo, kpakple blɔtɔ kple dzĩtɔ ƒe tsakatsakawo. Wowɔ amegbetɔ ƒe ŋku be wòate ŋu akpɔ amadede vovovo 300,000! Míaƒe nusese te ŋu dea vovototo gbeɖiɖi ƒe tɔtrɔ vovovowo me, si ƒe ɖewoe nye amesi míelɔ̃ vevie ƒe gbe, yaƒoƒo ƒe ɖiɖi to atiwo me, kple ɖevi sue ƒe nukoko dodzidzɔname. Nukatae nukpɔkpɔ kple nusese siawo te ŋu doa dzidzɔ na mí? Biblia gblɔ be: “To senu kple ŋku kpɔnu la, Yehowa ye wɔ woa kple evea siaa.” (Lododowo 20:12) Gake míaƒe sidzenuwo dometɔ eve koe nye ema.

11 Nuʋeʋẽse hã nye Yehowa ƒe nyuiwɔwɔ ŋuti kpeɖodzi bubu. Amegbetɔ ƒe ŋɔti ate ŋu ade vovototo ʋeʋẽ vovovo siwo ade 10,000 dome. Bu eƒe kpɔɖeŋu ʋɛ aɖewo ŋu kpɔ: nuɖuɖu si dzɔa dzi na wò wu si ɖam wole ƒe ʋeʋẽ, seƒoƒowo ƒe ʋeʋẽ, aŋgba siwo dudu kɔ ɖe anyi ƒe ʋeʋẽ, kple dzo sue si le dzudzɔ tum ƒe ʋeʋẽ. Eye wò asikakanuŋu ƒe sidzenu hã naa  nète ŋu sea ya si le ƒoƒom ɖe mo na wò, wò lɔlɔ̃tɔ ƒe asikplakɔname vividoɖeameŋutɔe, atikutsetse si le wò asiƒome ƒe zɔzrɔ̃ nyuie. Ne èka ɖe de nu me la, wò nuɖɔɖɔkpɔ ƒe sidzenu tea dɔwɔwɔ. Wò aɖe sea nu ƒe vivi alo veve vovovo siwo le atikutsetsea me tsi si me nu hamehamewo le. Ẽ, esɔ le go sia go me be míagblɔ le Yehowa ŋu be: “Wò dɔmenyo, si nètu ɖo na amesiwo vɔ̃a wò la, . . . sɔ gbɔ loo!” (Psalmo 31:20) Gake aleke Yehowa ‘dzra’ nyuiwɔwɔ ‘ɖo’ na amesiwo me mawuvɔvɔ̃ le lae?

Nyuiwɔwɔ si me Viɖe Mavɔwo Le

12. Yehowa ƒe nunana kawoe nye vevitɔwo, eye nukatae?

12 Yesu gblɔ be: “Woŋlɔ ɖi bena: ‘Menye abolo ɖeɖe ko ŋuti ame lanɔ agbe ɖo o, negbe ɖe nya sia nya, si dona tsoa Mawu ƒe nu me la ŋuti.’” (Mateo 4:4) Vavãe, Yehowa ƒe gbɔgbɔ me nunanawo ate ŋu aɖe vi geɖe na mí wu ŋutilãmenuwo, elabena woawo kplɔa ame yia agbe mavɔ mee. Míede dzesii le agbalẽ sia ƒe Ta 8 lia me be Yehowa zã eƒe ɖɔɖɔɖoŋusẽ le ŋkeke mamlɛ siawo me tsɔ ɖo gbɔgbɔ me paradiso anyii. Paradiso ma ƒe akpa vevi aɖee nye gbɔgbɔmenuɖuɖu gbogbo siwo nam wòle mí.

13, 14. (a) Nukae nyagblɔɖila Xezekiel kpɔ le ŋutega me, eye gɔmesese kae le eŋu na mí egbea? (b) Gbɔgbɔmenu siwo naa agbe ƒe ɖoɖo kawoe Yehowa wɔna na esubɔla wɔnuteƒewo?

13 Le Biblia ƒe gbugbɔɖoanyi ƒe dɔ gãwo ŋuti nyagblɔɖiwo dometɔ ɖeka me la, wona nyagblɔɖila Xezekiel kpɔ gbedoxɔ si wogbugbɔ ɖo anyi eye wokɔ eŋu la ƒe ŋutega. Tɔ aɖe nɔ sisim tso gbedoxɔ ma me, si nɔ kekem ɖe enu eye eme nɔ goglom ɖe edzi vaseɖe esime wòtrɔ zu ‘tɔsisi gã.’ Afisiafi si tɔa si toe la, nu nyuiwoe wòhena vɛ. Ati tsekuwo mie ɖe tɔsisia ƒe goawo dzi siwo nyo na ɖuɖu kple na dɔyɔyɔ. Eye tɔsisia ƒe tsiwo gbɔ agbe Ƒukukua ƒe dzetsi gɔ̃ hã ale be lãɖedɔwo gafɔ ɖe te! (Xezekiel 47:1-12) Gake nukae nusiawo katã fia?

14 Ŋutega la fia be Yehowa agbugbɔ ɖoɖo si wòwɔ na tadedeagu dzadzɛ aɖo anyi, si ƒe kpɔɖeŋu enye gbedoxɔ si Xezekiel  kpɔ la. Abe ŋutega me tɔsisi ma ene la, Mawu ƒe nunanawo na agbekpɔkpɔ atsa ade eƒe amewo gbɔ le agbɔsɔsɔ si anɔ dzidzim ɖe edzi me. Tso esime wogbugbɔ tadedeagu dzadzɛtɔ ɖo anyi le ƒe 1919 me la, Yehowa yi edzi tsɔ nunana siwo naa agbe la le eƒe amewo yramee. Le mɔ ka nu? Eyae nye be eto Bibliawo, Biblia-srɔ̃gbalẽwo, kpekpewo, kple takpekpewo dzi tsɔ nyateƒenya xɔasiwo le ame miliɔn geɖe gbɔ ɖom. Yehowa to mɔnu siawo dzi le nu fiam amewo tso eƒe nunana vevitɔ kekeake si ƒe ɖoɖo wòwɔ na agbekpɔkpɔ ŋu—Kristo ƒe tafevɔsa si hea tenɔnɔ dzadzɛ le Yehowa ŋkume kple agbe mavɔ nɔnɔ ƒe mɔkpɔkpɔ vɛ na amesiwo katã lɔ̃a Mawu hevɔ̃nɛ la. * Le esia ta esime gbɔgbɔmedɔ le amewo wum le xexeame le ŋkeke mamlɛ siawo me la, Yehowa ƒe amewo ya yi edzi le gbɔgbɔmenuɖuɖu damiwo ɖum.—Yesaya 65:13.

15. Aleke Yehowa ƒe nyuiwɔwɔ ayi edzi aɖe vi na ameƒomea me tɔ wɔnuteƒewo le Kristo ƒe Ƒe Akpe Ðeka Dziɖuɖua mee?

15 Gake Xezekiel ƒe ŋutega me tɔa madzudzɔ sisi ne nuɖoanyi xoxo sia wu enu o. Ðe wòayi edzi anɔ sisim geɖe wu le Kristo ƒe Ƒe Akpe Ðeka Dziɖuɖua me boŋ. Ekema Yehowa ato Mesia Fiaɖuƒea dzi awɔ Yesu ƒe tafevɔsa la ƒe asixɔxɔ ŋudɔ atsɔ akplɔ ameƒomea me tɔ wɔnuteƒewo aɖo blibodede gbɔe. Aleke gbegbe míatso aseye ɖe Yehowa ƒe nyuiwɔwɔ tae nye si!

Yehowa ƒe Nyuiwɔwɔ ƒe Akpa Bubuwo

16. Aleke Biblia ɖee fiae be Yehowa ƒe nɔnɔme nyui bubuwo dze le eƒe nyuiwɔwɔ me, eye wo dometɔ aɖewoe nye kawo?

16 Menye dɔmenyowɔwɔ ko dzie Yehowa ƒe nyuiwɔwɔ se ɖo o. Mawu gblɔ na Mose be: “Mana nye atsyɔ̃ɖoɖo [nyonyo, NW] blibo la nato ŋkuwò me ayi, eye maɖe gbeƒã Yehowa ƒe ŋkɔ le ŋgɔwò.” Emegbe nuŋlɔɖia gblɔ kpee be: ‘Eye Yehowa  va to eŋuti yi heɖe gbeƒã bena: Yehowa, Yehowa, Mawu nublanuikpɔla kple ameŋubula, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ.’ (Mose II, 33:19; 34:6) Eyata Yehowa ƒe nɔnɔme nyui bubu geɖewo le eƒe nyuiwɔwɔ la me. Mina míade ŋugble le wo dometɔ eve ko ŋu.

17. Nukae ameŋububu fia, eye aleke Yehowa bu amegbetɔ tsɛ madeblibo ŋui?

17 “Ameŋubula.” Nɔnɔme sia fia nu geɖe mí tso alesi Yehowa wɔa nu ɖe eƒe nuwɔwɔwo ŋui la ŋu. Le esi Yehowa nanye gbedaɖeamegbɔla, vivimadoɖeameŋula, alo ŋutasẽla abe alesi wòle le amegbetɔ ŋusẽtɔwo gome ene teƒe la, ame fatu kple dɔmenyotɔ boŋue wònye. Le kpɔɖeŋu me, Yehowa gblɔ na Abram be: “[Meɖe kuku, NW], tsa ŋku tso afisi nèle, eye nakpɔ dziehe, anyiehe, ɣedzeƒe kple ɣetoɖoƒe ɖa.” (Mose I, 13:14) Biblia gɔmeɖeɖe geɖe ɖe nya siwo nye “meɖe kuku” ɖa le teƒe ma. Gake Biblia me kulawo de dzesii be wozã nya aɖe le Hebrigbe gbãtɔ si me woŋlɔe ɖo me si fia be nyagbɔgblɔa menye gbeɖeɖe na ame o ke boŋ enye nubiabia tso ame si tufafatɔe. Esia ƒe kpɔɖeŋu bubuwo hã gali. (Mose I, 31:12; Xezekiel 8:5) Bu eŋu kpɔ ko be xexeame katã ƒe Dziɖulagã nagblɔ na amegbetɔ tsɛwo be “meɖe kuku”! Le xexe sia si me gbedadaɖeamegbɔ, amedzizizi, kple nya madzetowo gbɔgblɔ bɔ ɖo me la, ɖe meléa dzi na mí ne míede ŋugble le alesi mía Mawu Yehowa bua ame ŋui ŋu oa?

18. Gɔmesese ka nue Yehowa ‘ƒe nuteƒewɔwɔ sɔ gbɔ’ le, eye nukata nya mawo naa kakaɖedzi ame?

18 “Eƒe . . . nuteƒewɔwɔ sɔ gbɔ.” Anukwaremaɖimaɖi va xɔ aƒe ɖe xexeame egbea. Gake Biblia ɖo ŋku edzi na mí be: “Mawu menye amegbetɔ wònye, ne wòaka aʋatso o.” (Mose IV, 23:19) Le nyateƒe me la, Tito 1:2 gblɔ be ‘Mawu mate ŋu aka aʋatso o.’ Eƒe nyonyo de ŋgɔ ale gbegbe be mate ŋu aka aʋatso o. Eyata míate ŋu aɖo ŋu ɖe Yehowa ƒe ŋugbedodowo ŋu bliboe; eƒe nyawo ava eme godoo. Wogayɔ Yehowa be “Mawu nuteƒetɔ.” (Psalmo 31:6) Menye ɖeko mekaa aʋatso ko o ke egbɔ hãe nyateƒenya gbogbo aɖe tsona. Menye amesi tsyɔa  nu eƒe nyawo dzi, gbea wo ɖeɖe ɖe go, alo ɣlaa wo o; ke boŋ enaa eƒe nunya gogloa me kɔna na esubɔla wɔnuteƒewo dɔmenyotɔe. * Efiaa alesi woawɔ anɔ agbe ɖe nyateƒe siwo ɖem wòle ɖe go la nu gɔ̃ hã wo ale be ‘woayi edzi azɔ le nyateƒe la me.’ (Yohanes III, 3) Le mía gome la, aleke wòle be Yehowa ƒe nyuiwɔwɔ nawɔ dɔ ɖe mía dometɔ ɖesiaɖe dzii?

‘Tso Aseye ɖe Yehowa ƒe Nyuiwɔwɔ Ŋu’

19, 20. (a) Mɔ ka dzie Satana to be wòatsɔ agblẽ Xawa ƒe kaka ɖe Yehowa ƒe nyuiwɔwɔ dzi dome, eye nukae do tso eme? (b) Dɔ nyui kae wòsɔ be Yehowa ƒe nyuiwɔwɔ nawɔ ɖe mía dzi, eye nukatae?

19 Esime Satana te Xawa kpɔ le Eden-bɔa me la, etsɔ ayedzedze dze egɔme kple nya siwo ana magaka ɖe Yehowa ƒe nyuiwɔwɔ dzi o. Yehowa gblɔ na Adam be: “Ðu abɔmetiawo katã ƒe tsetse faa.” Le ati akpe geɖe siwo Yehowa tsɔ ɖo atsyɔ̃ na abɔa dome la, ɖeka ko ɖuɖu nue wòde se ɖo. Gake de dzesi alesi Satana dze nya gbãtɔ si wòbia Xawae la gɔme, be: “Vavãe Mawu gblɔ bena, migaɖu abɔmetiawo katã ƒe tsetse aɖeke o mahã?” (Mose I, 2:9, 16; 3:1) Satana tro Yehowa ƒe nyawo be wòana Xawa nasusui be ɖe Yehowa le nu nyui aɖe tem wo. Nublanuitɔe la, eƒe ayemenuwɔwɔa dze edzi nɛ. Xawa te ɖikeke le Mawu, amesi gbɔ nusianu si le esi tso, ƒe nyuiwɔwɔ ŋu, abe alesi ŋutsu kple nyɔnu geɖe siwo va dzɔ emegbe hã wɔna ene.

20 Míenya fukpekpe kple nu wɔnublanui siwo do tso ɖikeke mawo me. Eyata mina míawɔ ɖe nya siwo le Yeremya 31:12 dzi, be: ‘Woatso aseye ɖe Yehowa ƒe nu nyui wɔwɔwo ŋu.’ Nyateƒee, ele be Yehowa ƒe nyuiwɔwɔwo nana míagli kple dzidzɔ. Mele be míake ɖi le mía Mawu, amesi me nyuiwɔwɔ yɔ fũ, la ƒe susuwo ŋu gbeɖe o. Míate ŋu aka ɖe eyama dzi bliboe, elabena nyui ko wòdina na amesiwo lɔ̃nɛ.

21, 22. (a) Mɔ siwo dzi nàdi be yeato aɖee afia be yekpɔ dzidzɔ ɖe Yehowa ƒe nyuiwɔwɔ ŋu la dometɔ aɖewo ɖe? (b) Nɔnɔme ka mee míadzro le ta si kplɔe ɖo me, eye aleke wòto vovo na nyuiwɔwɔe?

 21 Tsɔ kpe ɖe eŋu la, edzɔa dzi na mí ne mɔnukpɔkpɔ su mía si be míagblɔ Mawu ƒe nyuiwɔwɔ ŋu nyawo na amewo. Psalmo 145:7 gblɔ le Yehowa ƒe amewo ŋu be: “Woaɖe wò nyuiwɔwɔ gãwo ƒe ŋkuɖoɖodzi afia.” Ŋkeke sia ŋkeke si míele agbe la, Yehowa ƒe nyuiwɔwɔ ɖea vi na mí le mɔ aɖe nu. Nukata màna wòazu numame na wò gbesiagbe be nàda akpe na Yehowa ɖe eƒe nyuiwɔwɔ ta, ahayɔ eƒe nu nyui wɔwɔ aɖewo tẽ le wò gbedodoɖawo me o? Nɔnɔme sia ŋu bubu, akpedada na Yehowa ɖe eta gbesiagbe, kple egbɔgblɔ na ame bubuwo akpe ɖe mía ŋu míasrɔ̃ mía Mawu nyui la. Eye ne míeyi edzi le mɔ siwo dzi míato awɔ nyui dim, abe alesi Yehowa wɔnɛ ene la, ana be míanɔ tetem ɖe eyama ŋu geɖe wu. Apostolo Yohanes si ku amegã ŋlɔ be: “Lɔlɔ̃tɔ, megasrɔ̃ nu vɔ̃ɖi o, ke srɔ̃ nu nyui boŋ. Amesi wɔa nu nyui la, Mawu gbɔ wòtso.”—Yohanes III, 11.

22 Ƒomedodo le Yehowa ƒe nyuiwɔwɔ kple eƒe nɔnɔme bubuwo hã dome. Le kpɔɖeŋu me, Mawu ƒe “amenuveve,” alo nuteƒewɔwɔ ƒe lɔlɔ̃, “sɔ gbɔ.” (Mose II, 34:6) Nɔnɔme sia ku ɖe nane koŋ ŋu tẽ wu alesi nyuiwɔwɔ le, elabena amesiwo nu Yehowa vena koŋ enye esubɔla wɔnuteƒewo. Míasrɔ̃ alesi wòvea wo nui le ta si kplɔe ɖo me.

^ mm. 14 Yehowa ƒe nyuiwɔwɔ ƒe kpɔɖeŋu bubu aɖeke meli si de tafea nu o. Le Yehowa ƒe gbɔgbɔ me nuwɔwɔ miliɔn geɖe siwo li wòate ŋu azã dome la, eƒe Tenuvi si gbɔ melɔ̃a nu le o ye wòtia be wòava ku ɖe mía ta.

^ mm. 18 Esɔ nyuie be Biblia na ɖekawɔwɔ si le nyateƒe kple kekeli dome dze. Hakpala la gblɔ be: “Ðo wò kekeli kple wò nyateƒe ɖa.” (Psalmo 43:3) Yehowa naa gbɔgbɔmekekeli geɖe sua amesiwo lɔ̃na faa be wòafia nu alo wòakɔ nu me na yewo la si.—Korintotɔwo II, 4:6; Yohanes I, 1:5.