Dzo kpo yi emenuwo dzi

Dzo kpo yi emenuawo dzi

 TA 26

Mawu si ‘Lɔ̃a Tsɔtsɔke’

Mawu si ‘Lɔ̃a Tsɔtsɔke’

1-3. (a) Agba kpekpe kae nɔ hakpala Dawid dzi, eye aleke wòkpɔ akɔfafa na eƒe dzi si nɔ nu xam lae? (b) Ne míewɔ nuvɔ̃ la, agba kae ate ŋu ava nɔ mía dzi, gake kakaɖedzi kae Yehowa na mí?

HAKPALA Dawid ŋlɔ bena: “Nye vodadawo gbɔ tanye, eye wole kpeyem ŋutɔ abe agba kpekpe ene. Megbɔdzɔ, eye nye lãme gbã gudugudu.” (Psalmo 38:5, 9) Dawid nya alesi gbegbe dzitsinya ƒe fɔbuame te ŋu doa agba kpekpe na amee. Gake ekpɔ akɔfafa na eƒe dzi si nɔ nu xam la. Enya be togbɔ be Yehowa tsri nuvɔ̃ hã, Meléa fu amesi wɔ nuvɔ̃ o nenye be amea trɔ dzime nyateƒe eye wòtrɔ le eƒe mɔ vɔ̃wo dzi ko. Esi Dawid xɔe se bliboe be Yehowa lɔ̃na faa kpɔa nublanui na dzimetrɔlawo ta la, egblɔ be: ‘Oo Yehowa, nèlɔ̃a tsɔtsɔke.’—Psalmo 86:5.

2 Ne míawo hã míewɔ nuvɔ̃ la, dzitsinya ƒe fɔbuame si nyea agba kpekpe la ate ŋu anɔ míawo hã dzi. Vevesese ɖe nuvɔ̃ ta alea nyo. Ate ŋu aʋã mí míawɔ afɔɖeɖe siwo hiã atsɔ aɖɔ vodadaa ɖo. Gake afɔku li be fɔbubu ame ɖokui ate ŋu agbɔ eme ava wu tsɔtsɔ na mí. Ðewohĩ míaƒe dzi si bua fɔ mí la ana míabui ɣesiaɣi be Yehowa matsɔ ake mí keŋkeŋ akpɔ gbeɖe o, eɖanye aleke ke míetrɔ dzimee o. Ne fɔbuame ‘mi’ mí alea la, Satana ate ŋu ate kpɔ be yeana míana ta, ahabui be viɖe aɖeke mele mía ŋu le Yehowa ŋkume o, eye be míedze asubɔe o.—Korintotɔwo II, 2:5-11.

3 Aleae Yehowa bua míi nyateƒea? Kura o! Tsɔtsɔke nye Yehowa ƒe lɔlɔ̃ gã ɖeɖe fia la ƒe akpa aɖe. Eka ɖe edzi na mí le eƒe Nya la me be ne míetrɔ dzime vavã la, yelɔ̃ faa be yeatsɔ ake mí. (Lododowo 28:13) Be magawɔ na mí be Yehowa matsɔ ake mí akpɔ gbeɖe o la, mina míadzro nusitae wòtsɔ kena kple alesi wòtsɔ kenae me.

 Nusita Yehowa ‘Lɔ̃a Tsɔtsɔke’

4. Nuka dzie Yehowa ɖoa ŋkui le míaƒe wɔwɔme ŋu, eye aleke esia kpɔa ŋusẽ ɖe alesi wòwɔa nu ɖe mía ŋui dzi?

4 Yehowa nya míaƒe gbɔdzɔgbɔdzɔwo. Psalmo 103:14 gblɔ be: “Enya míaƒe wɔwɔme, eɖoa ŋui be, kewɔ míenye.” Meŋlɔnɛ be be kewɔe wòtsɔ wɔ míi, eye vodada, alo gbɔdzɔgbɔdzɔ, siwo tso blibomademade gbɔ la le mía ŋu o. Nyagbɔgblɔ si nye “enya míaƒe wɔwɔme” ɖoa ŋku edzi na mí be Biblia tsɔ Yehowa sɔ kple zemela eye wòtsɔ míawo sɔ kple ze siwo wòmena. * (Yeremya 18:2-6) Zemela Gã la wɔa nu ɖe mía ŋu ŋuɖɔɖɔɖotɔe ɖe míaƒe nuvɔ̃menyenye ƒe gbɔdzɔgbɔdzɔwo nu kpakple ɖe alesi míexɔa eƒe mɔfiame alo gbea wo xɔxɔe la nu.

5. Aleke Romatɔwo ƒe agbalẽa ƒo nu tso ŋusẽ si gbegbe nuvɔ̃ kpɔ ɖe mía dzi ŋui?

5 Yehowa se alesi gbegbe nuvɔ̃ ƒe ŋusẽkpɔɖeamedzi sẽ ŋui la gɔme. Eƒe Nya la ƒo nu tso nuvɔ̃ ŋu be ekpɔ ŋusẽ gã wuame ɖe amegbetɔwo dzi. Aleke gbegbe nuvɔ̃ kpɔ ŋusẽ ɖe amegbetɔwo dzii? Apostolo Paulo ɖe eme le Romatɔwo ƒe agbalẽa me be: Míele ‘nuvɔ̃ te,’ abe alesi asrafowo nɔa woƒe gbeɖela te ene (Romatɔwo 3:9); nuvɔ̃ “ɖu” ameƒomea dzi abe fia ene (Romatɔwo 5:21); ‘exɔ aƒe’ alo ‘xɔ anyinɔ’ ɖe mía me (Romatɔwo 7:17, 20); eƒe “se” nɔa dɔ dzi le mía me, si fia be edzea agbagba be yeakpɔ ŋusẽ ɖe míaƒe nuwɔna dzi. (Romatɔwo 7:23, 25) Aleke gbegbe nuvɔ̃ kpɔ ŋusẽ ɖe míaƒe ŋutilã madebliboa dzi sesĩe enye si!—Romatɔwo 7:21, 24.

6, 7. (a) Aleke Yehowa bua amesiwo dia eƒe nublanuikpɔkpɔ tso dzi si le nu xam mee? (b) Nukata mele be míabu Mawu ƒe nublanuikpɔkpɔ nu tsɛe o?

6 Eyata Yehowa nya be manya wɔ be míaɖo to yeƒe gbe bliboe o, eɖanye aleke ke míaƒe dzi adi be yeaɖo to yee hafi o. Eka ɖe edzi na mí lɔlɔ̃tɔe be ne míebia yeƒe nublanuikpɔkpɔ  tso dzi si le nu xam me la, yeatsɔ ake mí. Psalmo 51:19 gblɔ be: “Vɔsawo na Mawu wonye gbɔgbɔ, si wote ɖe anyi; Mawu, màdo vlo dzi gbagbã, si tugu la o.” Yehowa magbe dzi si fɔbuame te ɖe anyi ‘hegbãe gudugudu’ la, alo atrɔ megbe adee akpɔ gbeɖe o.

7 Gake ɖe esia fia be míabu Mawu ƒe nublanuikpɔkpɔ nu tsɛe, ahatsɔ míaƒe nuvɔ̃menyenye ado taflatse ɖe míaƒe nuvɔ̃wo taa? Kura o! Yehowa menɔa te ɖe seselelãme dzro ko dzi wɔa nu o. Seɖoƒe le eƒe nublanuikpɔkpɔ ŋu. Matsɔ ake amesiwo sẽa dzime ɖonɛ koŋ wɔa nuvɔ̃ eye wogbea dzimetɔtrɔ la gbeɖe o. (Hebritɔwo 10:26) Gake ne ekpɔ dzi si le nu xam ɖe nuvɔ̃ ta la, elɔ̃na faa be yeatsɔ ake. Mina míadzro nya ɖedzesi siwo tsia susu me na ame, siwo wozã le Biblia me tsɔ ƒo nu tso Yehowa ƒe lɔlɔ̃ ƒe akpa lédziname sia dometɔ aɖewo ŋu me akpɔ.

Aleke Yehowa Tsɔ Kena Keŋkeŋui?

8. Nukae Yehowa wɔna, le kpɔɖeŋumɔ nu, ne etsɔ míaƒe nuvɔ̃wo ke mí, eye kakaɖedzi kae esia naa mí?

8 Fia Dawid si trɔ dzime la gblɔ be: ‘Meɖe nye nuvɔ̃wo fia wò, eye nyemetsɔ nu tsyɔ nye vodadawo dzi o; tete nètsɔ nye nuvɔ̃ ƒe vodadawo kem.’ (Psalmo 32:5) Nya si gɔme woɖe be ‘tsɔ ke’ la nye Hebrigbe me nya si gɔme koŋue nye “kɔ nu ɖe dzi,” alo “kɔ agba.” Alesi wozãe le afisia la fia be woaɖe “fɔɖiɖi, nuvɔ̃, kple vodada” ɖa. Eyata ɖeko wòsɔ kple alesi Yehowa nakɔ Dawid ƒe nuvɔ̃wo eye wòaɖe wo ɖa. Ðikeke mele eme o be esia ɖe fɔɖiɖi ƒe seselelãme si nɔ Dawid me la dzi kpɔtɔ. (Psalmo 32:3) Míawo hã míate ŋu aka ɖe Mawu, amesi tsɔa amesiwo biaa woƒe nuvɔ̃wo ƒe tsɔtsɔke to Yesu ƒe tafevɔsa dzixɔxɔse dzi kea wo la, dzi bliboe.—Mateo 20:28.

9. Vaseɖe afika kee Yehowa tea míaƒe nuvɔ̃wo ɖa tso mía gbɔ senae?

9 Dawid zã nya bubu si míate ŋu akpɔ le susu me tsɔ ƒo nu tso Yehowa ƒe tsɔtsɔke ŋui, be: ‘Alesi ɣedzeƒe didi tso ɣetoɖoƒe gbɔe la, nenema Wòte mía dzidadawo ɖa boo  tso mía gbɔe.’ (Psalmo 103:12) Aleke gbegbe ɣedzeƒe didi tso ɣetoɖoƒe gbɔe? Le gɔmesese aɖe nu la, ɣedzeƒe nyea teƒe diditɔ kekeake ɣesiaɣi tsoa ɣetoɖoƒe gbɔ; akpa eveawo mate ŋu ado go gbeɖe o. Agbalẽnyala aɖe gblɔ be nyagbɔgblɔ sia fia “vaseɖe adzɔge ʋĩ ke; vaseɖe didiƒe ʋĩtɔ kekeake si ate ŋu ava susu me na ame.” Dawid ƒe nya siawo siwo tso gbɔgbɔ me le eɖem fia be ne Yehowa tsɔ ke la, etea míaƒe nuvɔ̃wo ɖa tso mía gbɔ vaseɖe didiƒe ʋĩtɔ kekeake si ate ŋu ava susu me na mí.

‘Miaƒe nu vɔ̃wo afu abe sno ene’

10. Ne Yehowa tsɔ míaƒe nuvɔ̃wo ke mí la, nukata mele be míabui be nuvɔ̃ mawo gakpɔtɔ ɖe ɖe mía ŋu le míaƒe agbemeŋkeke mamlɛawo me o?

10 Ète kpɔ be yeaɖe ɖi aɖe si ɖe ɖe awu ɣi me kpɔa? Ðewohĩ togbɔ be nèwɔ ɖesiaɖe si nàte ŋui hã, nusi ɖe ɖe eme la gbe ɖeɖe. De dzesi nya si Yehowa gblɔ le ŋutete si le esi be wòatsɔ ake ŋu le afisia: ‘Ne miaƒe nuvɔ̃wo biã abe nyagadzĩ ene la, woafu abe sno ene, eye ne wobiã abe aɖabɛ ene la, woazu abe alẽfu ene.’ (Yesaya 1:18) Nya si gɔme woɖe le  afisia be “nyagadzĩ” la fia nusi ƒe amadede biã hẽ. * Eye nya si gɔme woɖe be “aɖabɛ” hã fia amadede si biã dzĩe ale gbegbe si wotsɔ dea ama awuwoe. (Naxum 2:4) Míate ŋu ato mía ŋutɔwo míaƒe agbagbadzedzewo me aɖe nuvɔ̃ si ɖe ɖe mía ŋu la ɖa akpɔ gbeɖe o. Gake Yehowa ate ŋu ana nuvɔ̃ siwo biã hẽ abe nyagadzĩ kple aɖabɛ ene la nafu tititi abe sno alo ɖetifu si womede amae o ene. Ne Yehowa tsɔ míaƒe nuvɔ̃wo ke mí la, mele be míabui be nuvɔ̃ mawo gakpɔtɔ ɖe ɖe mía ŋu le míaƒe agbemeŋkeke mamlɛawo me o.

11. Gɔmesese ka nue Yehowa tsɔa míaƒe nuvɔ̃wo ƒua gbe ɖe emegbe le?

11 Le akpedaha wɔdɔɖeamedzi aɖe si Xizkiya kpa esi wove enu wòhaya tso kuba dzi vɔ megbe me la, egblɔ na Yehowa be: ‘Ètsɔ nye nuvɔ̃wo katã ƒu gbe ɖe megbewò.’ (Yesaya 38:17) Wogblɔ le Yehowa ŋu le afisia be etsɔ nuvɔ̃wɔla si trɔ dzime ƒe nuvɔ̃ ƒu gbe ɖe Emegbe eye Megakpɔa wo loo alo naa eƒe ŋku ganɔa wo ŋu o. Numeɖegbalẽ aɖe gblɔ be woate ŋu agblɔ nukpɔsusu si dze le afisia ale: “Nèwɔ [nye nuvɔ̃wo] abe ɖe womedzɔ kura o ene.” Ðe esia mede dzi ƒo ŋutɔ oa?

12. Aleke nyagblɔɖila Mixa ɖee fiae be ne Yehowa tsɔ míaƒe nuvɔ̃wo ke la, Eɖea wo ɖa tegbee?

12 Nyagblɔɖila Mixa ɖe alesi wòka ɖe edzi be Yehowa atsɔ eƒe ame siwo trɔ dzime ƒe nuvɔ̃wo ake woe la gblɔ esi wònɔ nu ƒom tso gbugbɔgaɖɔɖo ŋuti ŋugbedodo aɖe ŋu, be: ‘Mawu kae de nuwò? Wò amesi tsɔa vodada kena. Eye àtsɔ míaƒe nuvɔ̃wo katã aƒu gbe ɖe atsiaƒu ƒe gogloƒe.’ (Mixa 7:18, 19) Bu nusi nya mawo fia na amesiwo nɔ anyi le Biblia ƒe ɣeyiɣiwo me ŋu kpɔ. Ðe mɔ aɖe li si dzi woato agaɖe nane si ‘wotsɔ ƒu gbe ɖe atsiaƒu ƒe gogloƒe’ akea? Kura o; eyata Mixa ƒe nyawo le fiafiam be ne Yehowa tsɔ míaƒe nuvɔ̃wo ke la, eɖea wo ɖa tegbee.

13. Nukae Yesu ƒe nya siwo nye “Tsɔ míaƒe fewo ke mí” la fia?

 13 Yesu zã alesi fetɔwo kple fenyilawo dome nɔna tsɔ wɔ alesi Yehowa tsɔ kenae ƒe kpɔɖeŋui. Yesu de dzi ƒo na mí be míado gbe ɖa be: “Tsɔ míaƒe fewo ke mí.” (Mateo 6:12, NW) Eyata Yesu tsɔ nuvɔ̃wo sɔ kple fenyinyi. (Luka 11:4) Ne míewɔ nuvɔ̃ la, míeva zua “fenyilawo” le Yehowa ŋu. Numekugbalẽ aɖe gblɔ be Helagbe me dɔwɔnya si gɔme woɖe be ‘tsɔ ke’ ate ŋu afia be: “Woadzudzɔ felilĩ, woaɖe asi le eŋu, eye womagabiae ake o.” Le gɔmesese aɖe nu la, ne Yehowa tsɔ nuvɔ̃ ke la, etea fli ɖe fe si wòate ŋu abu na mí míaxe hafi la me. Esia ate ŋu afa akɔ na nuvɔ̃wɔla siwo trɔ dzime ŋutɔ. Yehowa mabia be woaxe fe si me wòte fli ɖo gbeɖe o!—Psalmo 32:1, 2.

14. Nukae vaa susu me na mí le nyagbɔgblɔ “woatutu miaƒe nuvɔ̃wo” ɖa ŋu?

14 Wogaƒo nu le Yehowa ƒe tsɔtsɔke ŋu yi ŋgɔe le Dɔwɔwɔwo 3:19 be: ‘Eyata mitrɔ le miaƒe dzi me, eye migbugbɔ, be woatutu miaƒe nuvɔ̃wo.’ Nyagbɔgblɔ woatutu nye alesi woɖe Helagbe me dɔwɔnya aɖe si ate ŋu afia be “woatutu nu ɖa, . . . woate fli ɖe nu me alo woagblẽ nu dome” la gɔmee. Agbalẽnyala aɖewo gblɔ be susu si dze le emee nye be woatutu asinuŋɔŋlɔ ɖa. Aleke esia anya wɔe? Nuŋlɔtsi si wolɔ̃a zazã wu le blemaɣeyiɣiwo mee nye dzɔble alo aka, aŋe si woɖe tso atimitsi me, si wotsaka kple tsi. Ne ame aɖe tsɔ nuŋlɔtsi sia ŋlɔ nu vɔ teti la, ate ŋu atsɔ akutsa si wode tsi me atutu nuŋɔŋlɔa ɖa. Esia ɖe alesi Yehowa ƒe nublanuikpɔkpɔ le la fia nyuie wònya se. Ne etsɔ míaƒe nuvɔ̃wo ke mí la, ɖeko wònɔna abe ɖe wòtsɔ akutsa tutu wo ɖae ene.

Yehowa di be míanya be ‘yelɔ̃a tsɔtsɔke’

15. Nukae Yehowa di be míanya tso ye ŋu?

15 Ne míede ŋugble le nya vovovo siawo siwo tsia susu me na ame ŋu la, ɖe eme mekɔ ƒã be Yehowa di be míanya be yelɔ̃ faa be yeatsɔ míaƒe nuvɔ̃wo ake mí zi alesi yekpɔ be míetrɔ dzime vavã ko oa? Mele be míavɔ̃ be abu fɔ mí ɖe nuvɔ̃ mawo ta emegbe o. Esia dze le nu bubu aɖe si Biblia ɖe fia ku ɖe Yehowa ƒe nublanuikpɔkpɔ gã la ŋu me: Ne etsɔ ke la, eŋlɔnɛ be.

 “Nyemagaɖo Ŋu Woƒe Nuvɔ̃wo Azɔ O”

16, 17. Esi Biblia gblɔ be Yehowa ŋlɔa míaƒe nuvɔ̃wo be la, nuka fiamee wòle, eye nukata nèɖo eŋu nenema?

16 Yehowa do ŋugbe le amesiwo le nubabla yeyea me ŋu be: “Matsɔ woƒe vodadawo ake wo, eye nyemagaɖo ŋu woƒe nuvɔ̃wo azɔ o.” (Yeremya 31:34) Ðe wòfia be ne Yehowa tsɔ nuvɔ̃ ke la, megate ŋu ɖoa ŋku edzi oa? Menye nenemae kura o. Biblia ƒo nu tso ame geɖe siwo ƒe nuvɔ̃wo Yehowa tsɔ ke wo ŋu, eye Dawid hã le eme. (Samuel II, 11:1-17; 12:13) Edze ƒã be vodada siwo wowɔ la gale nyanya na Yehowa. Wodzra nuŋlɔɖi si ku ɖe woƒe nuvɔ̃wo, kple woƒe dzimetɔtrɔ kpakple Mawu ƒe tsɔtsɔke ŋu ɖo ɖi ɖe mía ta. (Romatɔwo 15:4) Ekema nukae Biblia wɔnɛ esi wògblɔ be Yehowa ‘megaɖoa ŋu’ amesiwo wòtsɔ kena ƒe nuvɔ̃wo o?

 17 Hebrigbe me dɔwɔnya si gɔme woɖe be ‘maɖo ŋui’ la fia nusi yi ŋgɔ wu ŋkuɖoɖo nusi dzɔ va yi dzi ko. Theological Wordbook of the Old Testament gblɔ be “egafia afɔɖeɖe si sɔ wɔwɔ.” Eyata le gɔmesese sia nu la, be ‘woaɖo ŋku’ nuvɔ̃ ‘dzi’ fia be woaɖe afɔ ɖe nuvɔ̃wɔla ŋu. (Hosea 9:9) Gake esi Mawu gblɔ be “nyemagaɖo ŋu woƒe nuvɔ̃wo azɔ o” la, ele kakaɖedzi nam mí be ne yenya tsɔ ke nuvɔ̃wɔla si trɔ dzime ko la, yemawɔ nu ɖe eŋu ɖe nuvɔ̃ mawo ta le etsɔme o. (Xezekiel 18:21, 22) Eyata Yehowa ŋlɔna be le gɔmesese sia nu be megahea míaƒe nuvɔ̃wo ɖe go enuenu be yeatsɔ atso mía nu alo ahe to na míi edziedzi o. Ðe mefaa akɔ na mí ŋutɔ be míanya be mía Mawu tsɔa vodadawo kena faa eye wòŋlɔa wo be oa?

Ke Wo Me Tsonuawo Ðe?

18. Nukata tsɔtsɔke mefia be woakpɔ nuvɔ̃wɔla si trɔ dzime ta tso nu gbegblẽ si wòwɔ me tsonuwo katã me o?

18 Ðe alesi Yehowa tsɔ kena faa fia be eɖea nuvɔ̃wɔla si trɔ dzime tsoa nusiwo katã ado tso nu gbegblẽ si wòwɔ me la mea? Kura o. Míate ŋu awɔ nuvɔ̃ agbe eƒe tohehe xɔxɔ o. Paulo ŋlɔ bena: “Nusi ke ame ƒãna la, esia ke wòaŋe.” (Galatiatɔwo 6:7) Míaƒe nuwɔnawo ate ŋu ahe kuxi aɖewo ava mía dzii. Mefia be ne Yehowa tsɔ ke mí vɔ la, egahea fukpekpe aɖewo vaa mía dzi o. Ne kuxiwo do mo ɖa la, mele be Kristotɔ nabu be, ‘Ðewohĩ Yehowae le to hem nam ɖe nye tsã nuvɔ̃wo ta’ o. (Yakobo 1:13) Gake Yehowa maɖe mí atso nusiwo míaƒe nugbegblẽwɔwɔ he vɛ la katã me o. Srɔ̃gbegbe, gbɔmeyafufɔfɔ, nulɔdɔ xɔxɔ, kakaɖedzi alo bubu kloleameŋu—nusiawo katã ate ŋu anye nuvɔ̃ me tsonu wɔnublanui siwo nu míate ŋu asi le o. Ðo ŋku edzi be togbɔ be Yehowa tsɔ Dawid ƒe nuvɔ̃ siwo wòwɔ ɖe Bat-Seba kple Uriya ŋu kee hã la, mekpɔ Dawid ta tso afɔku gã siwo kplɔe ɖo me o.—Samuel II, 12:9-12.

19-21. (a) Aleke se si woŋlɔ ɖe Mose III, 5:20-26 ɖe vi na amesi dzi wodze agɔ le kple agɔdzela la siaae? (b) Ne nuvɔ̃ si míewɔ gblẽ nu le ame bubuwo ŋu la, nukae wòdzɔa dzi na Yehowa be míawɔ?

19 Nu bubuwo agate ŋu ado go tso míaƒe nuvɔ̃wo me,  vevietɔ ne míaƒe nuwɔnaa gblẽ nu le ame bubuwo hã ŋu. Le kpɔɖeŋu me, de ŋugble le nuŋlɔɖi si le Mose III, ta 5 ŋu kpɔ. Le afisia la, Mose ƒe Sea ƒo nu tso nudzɔdzɔ si me ame aɖe ada vo gã aɖe si nye be wòxɔ nɔvia Israel-vi ƒe nuwo to adzodada, akpasesẽnuxɔxɔ, alo ametafatafa me ŋu. Emegbe nuvɔ̃wɔla la gbe be yemeɖi fɔ o, eye wòdo dzi ka aʋatso ta nu ɖe edzi gɔ̃ hã. Enye ame ɖeka ƒe nya tsɔtsɔ ɖe nɔvia ŋu si dzi nɔvia melɔ̃ ɖo o. Gake vodala la ƒe dzitsinya va ɖe fu nɛ emegbe eye wòʋu eƒe nuvɔ̃ me. Hafi Mawu natsɔ akee la, ele be wòagawɔ nu etɔ̃ bubu akpee: aɖo nusiwo wòtsɔ la teƒe, axe nua ƒe home ƒe akpa 20 le alafa me alo akpa atɔ̃lia akpee na amesi wòda adzoe, eye wòana agbo woatsɔ asa nuvɔ̃vɔe. Azɔ sea gblɔ be: “Nunɔla la alé avu nɛ le Yehowa ƒe ŋku me, eye woatsɔ nusianu, si wòwɔ heɖi fɔ la, akee.”—Mose III, 5:20-26.

20 Se sia nye nublanuikpɔkpɔ ƒe ɖoɖo si Mawu wɔ. Eɖe vi na amesi dzi wodze agɔ le, amesi ƒe nunɔamesiwo wotrɔ vɛ si ɖikeke mele eme o be ana eƒe dzi nadze eme esime vodalaa va lɔ̃ ɖe eƒe nuvɔ̃ dzi mlɔeba. Le ɣeyiɣi ma ke me la, sea ɖe vi na amesi ƒe dzitsinya ʋãe emegbe wòlɔ̃ ɖe edzi be yeɖi fɔ eye wòɖɔ nu gbegblẽ si wòwɔ ɖo. Le nyateƒe me la, ne ɖe wògbe esia wɔwɔ la, makpɔ tsɔtsɔke aɖeke tso Mawu gbɔ o.

21 Togbɔ be míegale Mose ƒe Sea te o hã la, Se ma na míesea alesi Yehowa bua nuwo ŋui, kple alesi wòbua tsɔtsɔkee gɔme nyuie wu. (Kolosetɔwo 2:13, 14) Ne míaƒe nuvɔ̃wo gblẽ nu le ame bubuwo ŋu la, edzea Mawu ŋu ne míewɔ nusi míate ŋui tsɔ ɖɔ nu gbegblẽa ɖoe. (Mateo 5:23, 24) Esia abia be míalɔ̃ ɖe nuvɔ̃ si míewɔ dzi, míalɔ̃ be míeɖi fɔ, eye míaɖe kuku na amesi dzi míedze agɔ le gɔ̃ hã. Ekema míate ŋu anɔ te ɖe Yesu ƒe vɔsaa dzi aɖe kuku na Yehowa bene míakpɔ dzidzeme si tsoa dzitsinya dzadzɛ ƒe amesinɔnɔ me kple kakaɖedzi be Mawu tsɔe ke mí.—Hebritɔwo 10:21, 22.

22. Tohehe kae ate ŋu akpe ɖe Yehowa ƒe tsɔtsɔke ŋu?

22 Ðewohĩ Yehowa atsɔ tohehe aɖe akpe ɖe tsɔtsɔke si wòana  mí ŋu, abe alesi dzila lɔ̃ame ɖesiaɖe awɔ ene. (Lododowo 3:11, 12) Ðewohĩ ahiã be Kristotɔ si trɔ dzime naɖe asi le subɔsubɔ mɔnukpɔkpɔ si le esi abe hamemegã, subɔsubɔdɔwɔla, alo ɣeyiɣiawo katã ƒe nyanyuigblɔla ene ŋu. Ate ŋu avee ŋutɔ be mɔnukpɔkpɔ siwo xɔ asi nɛ la nage le ye si va de asi na ɣeyiɣi aɖe. Gake tohehe ma mefia be Yehowa metsɔe kee o. Ele be míaɖo ŋku edzi be ɖe tohehe si tso Yehowa gbɔ ɖoa kpe edzi be elɔ̃a mí boŋ. Exɔxɔ kple eŋudɔwɔwɔ aɖe vi nyuitɔ kekeake na mí.—Hebritɔwo 12:5-11.

23. Nukata mele be míabui akpɔ be Yehowa makpɔ nublanui na mí gbeɖe o, eye nukata wòle be míasrɔ̃ eƒe tsɔtsɔke?

23 Aleke gbegbe wòfaa akɔ na míi enye si be míanya be mía Mawu nye amesi ‘lɔ̃a tsɔtsɔke’! Eɖanye vodada kawoe míewɔ o, ne míetrɔ dzime vavã la, mele be wòawɔ na mí gbeɖe be Yehowa makpɔ nublanui na mí o. Ne míetrɔ dzime ŋutɔŋutɔ, ɖɔ nuwɔna gbegblẽa ɖo, eye míenɔ te ɖe Yesu ƒe ʋu si wòkɔ ɖi dzi do gbe ɖa vevie bia tsɔtsɔke la, míate ŋu aka ɖe edzi bliboe be Yehowa atsɔ ake mí. (Yohanes I, 1:9) Mina míasrɔ̃ eƒe tsɔtsɔke le míaƒe nuwɔwɔ ɖe mía nɔewo ŋu me. Ne èbu eŋu kpɔ la, ne Yehowa, amesi mewɔa nuvɔ̃ o, ate ŋu atsɔ míaƒe nuvɔ̃wo ake mí lɔlɔ̃tɔe alea la, ɖe mele be mí amegbetɔ nuvɔ̃mewo míawɔ nusianu si míate ŋui atsɔ ake mía nɔewo faa oa?

^ mm. 4 Wozãa Hebrigbe me nya si gɔme woɖe be “míaƒe wɔwɔme” la na anyinu siwo zemela mena hã.—Yesaya 29:16.

^ mm. 10 Agbalẽnyala aɖe gblɔ be amadede si biã abe nyagadzĩ ene “nye amadede si ɖina ɖe nu me, alo tsia eme tegbee. Eɖanye zãmu, alo tsidzadza, alo nunyanyã o, ɖeke mate ŋu aɖee ɖa o.”