Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Te Ðe Yehowa Ŋu

 TA 23

“Etre Mí Lɔlɔ̃”

“Etre Mí Lɔlɔ̃”

1-3. Nusiwo na Yesu ƒe ku to vovo na bubuawo katã le ŋutinya me ƒe ɖewo ɖe?

LE ADAME ƒe ŋkeke aɖe dzi anɔ ƒe 2,000 kloe enye si va yi la, wodrɔ̃ ʋɔnu ame maɖifɔ aɖe, wobu fɔe togbɔ be mewɔ nu vlo aɖeke o hã, eye eyome wowɔ funyafunyae ʋuu wòku. Menye emae nye ŋutasẽnu kple amewuwu manɔsenu gbãtɔ le ŋutinya me o; eye nublanuitɔe la, menye emae nye mamlɛtɔ hã o. Ke hã ku ma to vovo kura na bubuawo katã.

2 Esi ŋutsu ma nɔ fu kpem henɔ veve sem helĩhelĩ le eƒe gaƒoƒo mamlɛwo me la, dziƒo ŋutɔŋutɔ gɔ̃ hã ɖee fia be nudzɔdzɔ vevi aɖee wònye. Viviti do ɖe anyigba la dzi enumake, togbɔ be ŋdɔkutsu mee wònye hã. Abe alesi ŋutinyaŋlɔla aɖe gblɔe ene la, “ɣe la do viviti.” (Luka 23:44, 45) Eye do ŋgɔ teti hafi ŋutsua nagbɔ eƒe gbɔgbɔ mamlɛ la, egblɔ nya siawo siwo womaŋlɔ be akpɔ o, be: “Wowu nu vɔ!” Nyateƒee, to eƒe agbe tsɔtsɔ ɖo anyi me la, ewu nu vevi aɖe nu. Eƒe vɔsa lae nye lɔlɔ̃ gãtɔ kekeake si amegbetɔ aɖe ɖe fia kpɔ.—Yohanes 15:13; 19:30.

3 Ðikekemanɔmee la, ŋutsu mae nye Yesu Kristo. Eƒe fukpekpe kple ku le ŋkeke dziŋɔ ma, Nisan 14, ƒe 33 M.Ŋ. dzi, nye nusi ŋu wonya nu le nyuie. Gake zi geɖe woŋea aɖaba ƒua nyateƒenya vevi aɖe ya dzi. Togbɔ be Yesu kpe fu ŋutɔ hã la, ame bubu aɖe kpe fu wu kura. Le nyateƒe me la, ame bubu aɖe sa vɔ si lolo wu le ŋkeke ma dzi—enye lɔlɔ̃ ɖeɖe fia gãtɔ kekeake si woɖe fia kpɔ le xexeame katã. Eyae nye ka? Ŋuɖoɖoa sɔ nyuie be wòakplɔ mí ayi nyati vevitɔ kekeake dzi: Yehowa ƒe lɔlɔ̃.

Lɔlɔ̃ Ðeɖe Fia Gãtɔ Kekeake

4. Aleke wòdzɔe be Roma-srafo aɖe va kpɔe dze sii be menye ame gbɔloe Yesu nye o, eye aleke asrafoa ƒo nya tae?

4 Viviti si do ɖe anyigba dzi do ŋgɔ teti na Yesu ƒe ku kple  anyigbaʋuʋu gã si teƒe wokpɔ le eƒe ku megbe teti nye nusiwo wɔ nuku na Roma-ʋafia si kpɔ egbɔ be wowu Yesu. Egblɔ be: “Nyateƒe, Mawuvie nye esia!” (Mateo 27:54) Edze ƒã be menye ame gbɔlo aɖee Yesu nye o. Asrafo ma kpe asi ɖe eŋu wowu Mawu Dziƒoʋĩtɔ la ƒe Tenuvi! Aleke tututue Fofo la lɔ̃ Vi siae?

5. Aleke woate ŋu awɔ ɣeyiɣi gbogbo si Yehowa kple Via tsɔ nɔ anyi ɖekae le dziƒo ƒe kpɔɖeŋui?

5 Biblia yɔ Yesu be enye “nuwɔwɔwo katã ƒe ŋgɔgbevi.” (Kolosetɔwo 1:15) Bu eŋu kpɔ ko—Yehowa ƒe Vi la nɔ anyi xoxoxo do ŋgɔ hafi wowɔ xexeame godoo si míekpɔna la. Ekema ɣeyiɣi didi ka koŋue Fofo la kple Vi la nɔ anyi ɖekae? Dzɔdzɔmeŋutinunyala aɖewo bui be xexeame godoo xɔ ƒe biliɔn 13. Ðe nàte ŋu akpɔ ɣeyiɣi ma ƒe didime gɔ̃ hã le susu mea? Be woakpe ɖe amewo ŋu woakpɔ ƒe si xexeame godoo xɔ le susu me le alesi dzɔdzɔmeŋutinunyalawo susui be exɔ nu la, ɣletinyigbawo ŋuti nusrɔ̃ƒe aɖe wɔ fli legbe aɖe si didi meta 110 ɖe gli ŋu tsɔ tsi tre ɖi na ɣeyiɣiwo. Ne wokplɔ tsaɖilawo wole flia ŋu tom le glia ŋu la, afɔ ɖeka ɖesiaɖe si woaɖe la tsia tre ɖi na ƒe siwo ade miliɔn 75 le xexeame godoo ƒe anyinɔnɔ me. Le ɣeyiɣiflia ƒe nuwuwu la, wote fli lɛ aɖe tsɔ tso eme, si ƒe titrime le abe amegbetɔ ƒe ɖa kui ɖeka ƒe titrime ko ene, eye fli lɛ mae le tsitre ɖi na ƒe siwo katã amegbetɔƒomea ƒe ŋutinya xɔ! Ne akɔntabubu ma de gɔ̃ hã la, ɣeyiɣi ƒe fli blibo ma katã medidi de Yehowa ƒe Vi la ƒe agbenɔƒe nu o! Nukawo wɔm wònɔ le ƒe gbogbo manyaxlẽ mawo me?

6. (a) Nuka wɔmee Yehowa ƒe Vi la nɔ le eƒe agbenɔnɔ do ŋgɔ na amegbetɔzuzu me? (b) Ðekawɔwɔ ka ƒomevie le Yehowa kple Via dome?

6 Enye dzidzɔ na Via be yeanye ye Fofo ƒe “dɔnunɔla.” (Lododowo 8:30) Biblia gblɔ be: “Eya [Vi la] manɔmee la womewɔa naneke, si wowɔna o.” (Yohanes 1:3) Eyata Yehowa kple Via wɔ dɔ ɖekae le nu bubuwo katã wɔwɔ me. Ɣeyiɣi dodzidzɔname kawo gbegbee nye si wotsɔ nɔ anyi ɖekae! Ame geɖe alɔ̃ ɖe edzi be lɔlɔ̃ si nɔa dzila kple via dome la me sẽna ŋutɔ nukutɔe. Esia nye nyateƒe, elabena lɔlɔ̃ ‘nye ɖekawɔwɔ ƒe nublanu blibo.’ (Kolosetɔwo 3:14) Ekema mía dometɔ kae ate ŋu ase ɖekawɔwɔ si  gbegbe le wo dome ɣeyiɣi gbogbo mawo la gɔme vie gɔ̃ hã? Eme kɔ ƒã be lɔlɔ̃ ƒe nublanu sesẽtɔ kekeake si ƒo ɖesiaɖe ta ye le Yehowa Mawu kple Via dome.

7. Esi Yesu xɔ nyɔnyrɔ la, aleke Yehowa ɖe eƒe seselelãme ɖe Via ŋu gblɔe?

7 Togbɔ be ele nenema hã la, Yehowa dɔ Via ɖo ɖe anyigba dzi be woadzii vidzĩ si nye amegbetɔ. Esia wɔwɔ fia be Yehowa nana hadede kplikplikpli kple Via lɔlɔ̃a le dziƒo nato eŋu ƒe bla nanewo. Etsɔ ɖetsɔleme vevie nɔ ekpɔm tso dziƒo esime Yesu nɔ tsitsim ʋuu va zu ŋutsu si de blibo. Esi Yesu xɔ anɔ ƒe 30 la, exɔ nyɔnyrɔ. Mehiã be míasusu alesi Yehowa se le eɖokui me tso eŋu agblɔ o. Fofo la ŋutɔ ƒo nu tẽ tso dziƒo tsɔ ɖee gblɔ be: “Amesia enye vinye, si gbɔ nyemelɔ̃a nu lena o la, si dzea ŋunye!” (Mateo 3:17) Esi Fofoa kpɔe be Yesu wɔ nusiwo katã ƒe nya wogblɔ ɖi le eŋu, be wòwɔ nusiwo katã wobia tso esi nuteƒewɔwɔtɔe la, anye dzidzɔ nɛ ale gbegbe!—Yohanes 5:36; 17:4.

8, 9. (a) Nukawo mee Yesu to le Nisan 14, ƒe 33 M.Ŋ. me, eye dɔ kae wòwɔ ɖe Fofoa si le dziƒo dzi? (b) Nukata Yehowa ɖe mɔ be Via nakpe fu ahaku?

8 Gake aleke Yehowa se le eɖokui me le Nisan 14, ƒe 33 M.Ŋ. me? Aleke wòse le eɖokui me esi wofia Yesu yomemɔ eye ameha nuvlowɔlawo va lée le zã me? Esi Yesu xɔlɔ̃wo gblẽe ɖi eye wòto ʋɔnudɔdrɔ̃ manɔsenu aɖe me? Esi woɖu fewu le eŋu, woɖe ta ɖe eŋu, eye woƒoe kple kɔ? Esi woƒoe kple atam eye eƒe dzime vuvu ʋayaʋaya? Esi woƒo gatagbadzɛwo ɖe eƒe asi kple afɔ heklãe wònɔ ati ŋu, esime amewo nɔ fewu ɖum le eŋu? Aleke Fofoa se le eɖokui me esi Via lɔlɔ̃a do ɣli yɔe le vevesese helĩhelĩ me? Aleke Yehowa se le eɖokui me esi Yesu gbɔ eƒe gbɔgbɔ mamlɛtɔ, eye zi gbãtɔ tso nuwɔwɔwo katã ƒe gɔmedzedze la, Via lɔlɔ̃a megava li o?—Mateo 26:14-16, 46, 47, 56, 59, 67; 27:38-44, 46; Yohanes 19:1.

‘Mawu tsɔ eya ŋutɔ ƒe Tenuvi la na’

9 Manya gblɔ na mí o. Esi seselelãme le Yehowa si ta la, veve si gbegbe wòase ɖe Via ƒe fukpekpe kple ku ta la nye esi míate ŋu akpɔ nya siwo míatsɔ agblɔe o. Gake esi míate ŋu agblɔ enye susu si ta Yehowa ɖe mɔ nu ma dzɔ. Nukata Fofo la tsɔ eɖokui de vevesese ma gbegbe me ɖo? Yehowa ɖe nu wɔnuku aɖe  fia mí le Yohanes 3:16—Biblia ƒe kpukpui si le vevie ale gbegbe be woyɔnɛ be Nyanyui sue. Wogblɔ le afima be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.” Eyata nusi ʋã Yehowa enye si: lɔlɔ̃. Yehowa ƒe nunana—Via dɔdɔ ɖa be wòava kpe fu ahaku ɖe mía ta—nye lɔlɔ̃ ɖeɖe fia gãtɔ kekeake.

Mawu ƒe Lɔlɔ̃ Gɔmeɖeɖe

10. Nukae amegbetɔwo hiã, eye nukae dzɔ ɖe gɔmesese si le nya “lɔlɔ̃” ŋu dzi?

10 Nya sia si nye “lɔlɔ̃” la gɔme ɖe? Woɖɔ lɔlɔ̃ be eyae nye nuhiahiã vevitɔ kekeake na amegbetɔwo. Tso vidzĩme vaseɖe ku me la, amewo ʋlina vevie tia lɔlɔ̃ yome, agbe dzea edzi na wo ne wokpɔe hese eƒe vivi, eye amewo ɖia ku hekuna gɔ̃ hã le esi womekpɔe o ta. Ke hã ewɔ nuku be enye nusi gɔmeɖeɖe sesẽna. Ele eme baa be amewo ƒoa nu geɖe tso lɔlɔ̃ ŋu ya. Woŋlɔ agbalẽ gbogbo aɖe, hadzidziwo, kple hakpanyawo tso eŋu fũ. Ke hã zi geɖe womeɖea gɔmesese si le lɔlɔ̃ ŋu la me le wo me o. Nusi wowɔ boŋ enye be wozã nyaa wògbɔ eme ale gbegbe be gɔmesese si tututu le eŋu la zu dze bu ɖe ama me.

11, 12. (a) Afikae míate ŋu asrɔ̃ nu geɖe tso lɔlɔ̃ ŋu le, eye nukatae wònye afimae? (b) Lɔlɔ̃ kawo ƒomevie woyɔ le blema Helagbe me, eye nya kae wozã na “lɔlɔ̃” zi geɖe wu le Kristotɔwo ƒe Hela Ŋɔŋlɔawo me? (Kpɔ etenuŋɔŋlɔa hã.) (d) Nukae nye a·gaʹpe?

11 Gake Biblia ya fia nu tso lɔlɔ̃ ŋu eme kɔ ƒã. Vine ƒe Expository Dictionary of New Testament Words gblɔ be: “Nusi lɔlɔ̃ ʋãa amewo wowɔna me koe míekpɔnɛ lena.” Biblia ƒe nuŋlɔɖi siwo ku ɖe Yehowa ƒe nuwɔnawo ŋu fiaa nu geɖe mí tso eƒe lɔlɔ̃ ŋu—si nye numalɔ̃malɔ̃leamegbɔ ƒe seselelãme nyui si le esi na eƒe nuwɔwɔwo. Le kpɔɖeŋu me, nukae agate ŋu aɖe nɔnɔme sia afia nyuie wu Yehowa ŋutɔ ƒe lɔlɔ̃ ɖeɖe fia gãtɔ kekeake si ŋu míeƒo nu tsoe va yi? Le ta siwo kplɔe ɖo me la, míakpɔ Yehowa ƒe lɔlɔ̃ ɖeɖe fia ƒe kpɔɖeŋu ŋutɔŋutɔ bubu geɖewo. Hekpe ɖe eŋu la, míagase nuwo gɔme nyuie wu ne míenya nu tso nya siwo wozã na “lɔlɔ̃” le gbe siwo me woŋlɔ Biblia ɖo gbã la ŋu.  Le blema Helagbe me la, nya vovovo enee li wozãna na “lɔlɔ̃.” * Wo dometɔ si wozã zi geɖe wu le Kristotɔwo ƒe Hela Ŋɔŋlɔawo me enye a·gaʹpe. Biblia gɔmeɖegbalẽ aɖe yɔe be enye “nya si ava susu me na ame si me ŋusẽ le wu bubu ɖesiaɖe si wozã na lɔlɔ̃.” Nukatae?

12 A·gaʹpe nye lɔlɔ̃ si gɔmeɖose fiaa mɔe. Eyata ede ŋgɔ wu seselelãme si anɔ ame me na ame bubu aɖe ko. Enye esi keke ta wu, esi me wozãa ameŋububu geɖe le wu, eye etsoa lɔlɔ̃nu faa me. Ƒo wo katã ta la, ɖokuitɔdidi aɖeke kura mele a·gaʹpe me o. Le kpɔɖeŋu me, gaxlẽ Yohanes 3:16 ake. Nukae nye “xexeame” si Mawu lɔ̃ ale gbegbe be wòtsɔ ye ŋutɔ ƒe Tenuvi na ɖe eta? Eyae nye ameƒomea me tɔ siwo ate ŋu akpɔ ɖeɖe ƒe xexeame. Ame geɖe siwo le nuvɔ̃gbe nɔm hã le eme. Ðe Yehowa lɔ̃a amesiawo dometɔ ɖesiaɖe wònye exɔlɔ̃ kplikplikpli, abe alesi wòlɔ̃ nuteƒewɔla Abraham enea? (Yakobo 2:23) Ao, gake Yehowa keke eƒe dɔmenyo la ɖe enu na amewo katã, togbɔ be esia bia tso esi be wòatsɔ nu vevi aɖe asa vɔe hã. Edi be amewo katã natrɔ dzime eye woatrɔ tso woƒe mɔwo dzi. (Petro II, 3:9) Ame geɖe le esia wɔm. Amesiawoe wòxɔna dzidzɔtɔe be woanye ye xɔlɔ̃wo.

13, 14. Nukae fia be numalɔ̃malɔ̃leamegbɔ nɔa a·gaʹpe me zi geɖe?

13 Gake nukpɔsusu masɔmasɔ le ame aɖewo si le a·gaʹpe ŋu. Wobu be efia vivimadomadoɖeameŋu, agbalẽmenunya ƒe lɔlɔ̃ ƒomevi aɖe. Nyateƒeae nye be vividodoɖeameŋu ƒe numalɔ̃malɔ̃leamegbɔ nɔa a·gaʹpe me zi geɖe. Le kpɔɖeŋu me, Yohanes zã a·gaʹpe ƒomevi aɖe esi wòŋlɔ be, “Fofo la lɔ̃a Via.” Ðe numalɔ̃malɔ̃leamegbɔ mele lɔlɔ̃ ma me oa? De dzesii be Yesu zã phi·leʹo  ƒomevi aɖe esi wògblɔ be, “Fofo la melɔ̃a nu le Vi la gbɔ o.” (Yohanes 3:35; 5:20, NW) Yehowa ƒe lɔlɔ̃ nye esi me numalɔ̃malɔ̃leamegbɔ nɔna zi geɖe. Gake seselelãme dzro ko mekpɔa ŋusẽ ɖe eƒe lɔlɔ̃ dzi o. Enɔa te ɖe eƒe gɔmeɖose siwo me nunya le eye wole dzɔdzɔe dzi ɣesiaɣi.

14 Abe alesi míekpɔe ene la, Yehowa ƒe nɔnɔmewo katã nyo ale gbegbe, wode blibo, eye woléa dzi na ame vevie. Gake eƒe lɔlɔ̃ ye nye esi wɔa dɔ ɖe ame dzi wu. Nu bubu aɖeke megahea mí ɖe Yehowa ŋu vevie nenema de enu o. Edzɔa dzi na mí be lɔlɔ̃ hãe nye eƒe nɔnɔme vevitɔ. Aleke míewɔ nya?

“Mawu Enye Lɔlɔ̃”

15. Nya kae Biblia gblɔ tso Yehowa ƒe nɔnɔme si nye lɔlɔ̃ ŋu, eye mɔ ka nue nya ma to vovo na bubuwo le? (Kpɔ etenuŋɔŋlɔa hã.)

15 Biblia ƒo nu tso lɔlɔ̃ ŋu le mɔ aɖe si megblɔ nenema tso Yehowa ƒe nɔnɔme vevitɔ bubuawo ŋu gbeɖe o la nu. Ŋɔŋlɔawo megblɔ be Mawu enye ŋusẽ alo Mawu enye dzɔdzɔenyenye alo be Mawu enye nunya gɔ̃ hã kpɔ o. Nɔnɔme mawo katã le esi, egbɔe woƒe gãtɔ kekeake dzɔ tso, eye ame aɖeke megogoe kura le nɔnɔme etɔ̃ mawo katã me o. Gake ku ɖe eƒe nɔnɔme enelia ya ŋu la, wogblɔ nya si de to wu tso eŋu, be: “Mawu enye lɔlɔ̃.” * (Yohanes I, 4:8) Nukae ema fia?

16-18. (a) Nukata Biblia gblɔ be “Mawu enye lɔlɔ̃”? (b) Le nuwɔwɔ siwo katã le anyigba dzi dome la, nukata wòsɔ be amegbetɔe wotsɔ wɔ Yehowa ƒe nɔnɔme vevitɔ si nye lɔlɔ̃ ƒe kpɔɖeŋui?

16 Ne wogblɔ be “Mawu enye lɔlɔ̃” la, menye ɖe wòfia be esɔ kple nu bubu aɖe, abe woagblɔ be “Mawu sɔ kple lɔlɔ̃” ene o. Masɔ be míatrɔ nya ma agblɔ, be “lɔlɔ̃ enye Mawu,” o. Yehowa  de ŋgɔ boo wu nusi nye nɔnɔme aɖe ko. Enye amesi si seselelãme vovovowo kple nɔnɔme vovovowo le, hekpe ɖe lɔlɔ̃ ŋu. Gake lɔlɔ̃ deto yɔ Yehowa fũ. Numekugbalẽ aɖe gblɔ tso kpukpui sia ŋu be: “Mawu ƒe amenyenye, alo eƒe nɔnɔme bliboa enye lɔlɔ̃.” Ne míagblɔe gbadzaa la, míate ŋu abu eŋu ale: Yehowa ƒe ŋusẽ ye nana wòwɔa nu. Eƒe dzɔdzɔenyenye kple eƒe nunya ye fiaa mɔ alesi wòwɔa nui. Gake Yehowa ƒe lɔlɔ̃ ye ʋãnɛ wòwɔa nu. Eye eƒe lɔlɔ̃ dzena ɣesiaɣi le alesi wòzãa eƒe nɔnɔme bubuawoe me.

17 Wona míenya zi geɖe be Yehowa ƒe amenyenye blibo lae nye lɔlɔ̃. Eyata ne míedi be míasrɔ̃ nu tso lɔlɔ̃ si gɔmeɖose fiaa mɔe ŋu la, ke Yehowa ŋue wòle be míasrɔ̃ nu tsoe. Nyateƒee, míekpɔa nɔnɔme nyoameŋu sia le amegbetɔwo hã me. Gake nukatae wòle wo me? Le nuwo wɔɣi la, Yehowa gblɔ nya siawo siwo edze ƒã be Viae wònɔ egblɔm na, be: ‘Na míawɔ ame ɖe míaƒe nɔnɔme nu, wòaɖi mí.’ (Mose I, 1:26) Le nuwɔwɔ siwo katã le anyigba sia dzi dome la, ŋutsuwo kple nyɔnuwo koe ate ŋu atiae be yewoaɖe lɔlɔ̃ afia, eye wotoa esia me srɔ̃a wo Fofo si le dziƒo. Ðo ŋku edzi be Yehowa zã lã vovovowo tsɔ wɔ eƒe nɔnɔme vevitɔwo ƒe kpɔɖeŋui. Gake amegbetɔ, si nye nuwɔwɔ si de ŋgɔ wu ɖesiaɖe le anyigba dzi, ye Yehowa tia wònye Eƒe nɔnɔme vevitɔ kekeake, si nye lɔlɔ̃, ƒe kpɔɖeŋu.—Xezekiel 1:10.

18 Ne míeɖe lɔlɔ̃ si me ɖokuitɔdidi mele o, si nɔ te ɖe gɔmeɖose dzi fia la, ke Yehowa ƒe nɔnɔme vevitɔ enye ma míele ɖeɖem fia. Ðeko wòle abe alesi apostolo Yohanes ŋlɔe ene be: “Míawo ya míelɔ̃e, elabena etre mí lɔlɔ̃.” (Yohanes I, 4:19, NW) Gake mɔ kawo nue Yehowa tre mí lɔlɔ̃ le?

Yehowa Wɔ Afɔɖeɖea le Eɖokui Si

19. Nukata woate ŋu agblɔ be lɔlɔ̃ ye wɔ akpa vevitɔ le Yehowa ƒe nuwo wɔwɔ me?

19 Menye nu yeyee lɔlɔ̃ nye o. Ne míagblɔe la, nukae ʋã Yehowa hafi wòdze nuwo wɔwɔ gɔme? Menye ɖe wòtsi akogo eye wòhiã zɔhɛ tae o. Yehowa de bliboe le nusianu me, eye naneke  meli si wòahiã si ame bubu aɖe gbɔe wòate ŋu akpɔe le o. Gake eƒe lɔlɔ̃, si nye nɔnɔme si ʋãnɛ wòwɔa nu, ye ʋãe wòdi be nuwɔwɔ nyanu bubu siwo akpɔ ŋudzedze ɖe nunana sia ŋu hã nase vivi le anyinɔnɔ me kpli ye. “Amesi nye Mawu ƒe nuwɔwɔwo ƒe gɔmedzedze” lae nye eƒe Tenuvi la. (Nyaɖeɖefia 3:14) Le eya yome Yehowa zã eƒe Dɔnunɔla sia le nu bubuawo katã wɔwɔ me, si gɔme wodze tso mawudɔlawo dzi. (Hiob 38:4, 7; Kolosetɔwo 1:16) Esi wona ablɔɖe, nunya, kple seselelãme gbɔgbɔ me nuwɔwɔ sẽŋu siawo ta la, mɔnukpɔkpɔ li na wo be woa ŋutɔwo hã woaɖe kukuɖeameŋu lɔlɔ̃tɔe afia—wòanɔ wo nɔewo dome, eye ƒo wo katã ta la, woana wòanɔ woa kple Yehowa Mawu dome. (Korintotɔwo II, 3:17) Eyata ele be woawo hã woalɔ̃e, elabena etre wo lɔlɔ̃.

20, 21. Nɔnɔme ka mee Adam kple Xawa nɔ wònye kpeɖodzi be Yehowa lɔ̃ wo, gake aleke wowɔ nui?

20 Aleae wòle le amegbetɔwo hã gome. Lɔlɔ̃ sɔŋ ye ƒo xlã Adam kple Xawa tso gɔmedzedzea me. Afisiafi si woakpɔ le woƒe Paradisoƒea me le Eden la, wokpɔa wo Fofo ƒe lɔlɔ̃ na wo ƒe kpeɖodziwo fũ. De dzesi nya si Biblia gblɔ: “Tete Yehowa Mawu tso abɔ ɖe Eden le ɣedzeƒe, eye wòtsɔ ame, si wòmè la, ɖo afima.” (Mose I, 2:8) Èyi modzakaɖebɔ aɖe si dze ani ŋutɔŋutɔ ale gbegbe me kpɔa? Nukae do dzidzɔ na wò wu? Kekeli dzeani si le keklẽm to ati siwo ƒe aŋgba do vɔvɔli me yea? Seƒoƒowo ƒe amadede dzeani vovovoawoea? Kpetometsi aɖe ƒe sisi si nya sena, xeviwo ƒe xɔxlɔ̃, kple nudzodzoewo ƒe xɔxlɔ̃ siwo katã tsaka le ɖiɖim abe hadzidzi vivi aɖe ene yea? Ke atiawo, atikutsetseawo, kple seƒoƒoawo ƒe ʋeʋẽ lilili hã ɖe? Aleke ke wòɖale o, abɔ aɖeke meli egbea si gogo Eden-bɔa kura o. Nukatae?

21 Yehowa ŋutɔe tso abɔ ma! Anye abɔ si dze ani ale gbegbe be míate ŋu aɖɔe wòade edeƒe tututu o. Ati ɖesiaɖe si hiã be abɔa nadze ani alo bene woakpɔ atikutsetse viviwo la nɔ anyi. Tsi nɔ sisim to abɔa me nyuie, abɔa lolo nyuie, eye eme yɔ fũ kple lã dodzidzɔname vovovowo. Nusianu si hiã, hekpe ɖe dɔwɔwɔ si me dzidzeme le kpakple hadede deblibo ŋu, nɔ anyi na Adam kple Xawa ale be woƒe agbenɔnɔ nayɔ fũ kple dzidzɔ  blibo. Yehowa ye tre wo lɔlɔ̃, eye gɔmesese ɖesiaɖe li si ta wòle be woawo hã nalɔ̃e ɖo. Gake wodo kpo esia wɔwɔ. Le esi woatso lɔlɔ̃ blibo me aɖo to wo Fofo si le dziƒo teƒe la, wotsɔ ɖokuitɔdidi dze aglã ɖe eŋu boŋ.—Mose I, ta 2.

22. Aleke alesi Yehowa kpɔ aglãdzedzea gbɔe le Eden la ɖee fiae be nuteƒewɔwɔ ƒe lɔlɔ̃ ye le eme?

22 Aleke gbegbe ema ave Yehowae nye si! Gake ɖe aglãdzedze ma na be lɔlɔ̃ bu ɖa le eƒe dzi si me lɔlɔ̃ yɔ fũ la me eye dziku va xɔ ɖe eteƒea? Kura o! “Eƒe amenuveve [alo, “nuteƒewɔwɔ ƒe lɔlɔ̃,” NW ƒe etenuŋɔŋlɔ] li tegbee.” (Psalmo 136:1) Le esia ta eɖo tame enumake be yeawɔ ɖoɖo lɔlɔ̃tɔe aɖe Adam kple Xawa ƒe dzidzimeviwo dometɔ ɖesiaɖe si si dzi ƒe nɔnɔme nyui le. Abe alesi míekpɔe ene la, ɖoɖo mawo ƒe akpa aɖee nye Via lɔlɔ̃a ƒe tafevɔsa la, si bia nu geɖe ŋutɔ tso Fofo la si.—Yohanes I, 4:10.

23. Susu siwo ta Yehowa nye ‘dzidzɔ Mawu la’ dometɔ ɖeka ɖe, eye biabia vevi ka ŋue woaɖo le ta si kplɔe ɖo me?

23 Ẽ, Yehowa tso le eɖokui si faa ɖe lɔlɔ̃ fia ameƒomea tso gɔmedzedzea me ke. “Etre mí lɔlɔ̃” le mɔ vovovo siwo míate ŋu axlẽ o nu. Lɔlɔ̃ hea nuwɔwɔ aduadu kple dzidzɔ vɛ, eyata mewɔ nuku be woyɔ Yehowa be enye ‘dzidzɔ Mawu la’ o. (Timoteo I, 1:11) Gake biabia vevi aɖe fɔ ɖe te. Ðe Yehowa lɔ̃ mí ame ɖekaɖekawo ŋutɔŋutɔa? Ta si kplɔe ɖo aɖo nya sia ŋu.

^ mm. 11 Wozã dɔwɔnya si nye phi·leʹo, si gɔmee nye “numalɔ̃malɔ̃leamegbɔ, vividodoɖeameŋu, alo be ame ƒe nu nadzɔ dzi na ame (abe alesi woase le ame ɖokui me na xɔlɔ̃ kplikplikpli alo ame nɔvi ene)” zi geɖe le Kristotɔwo ƒe Hela Ŋɔŋlɔawo me. Wozã nya si nye stor·geʹ, alo lɔlɔ̃ si nɔa ƒometɔ kplikplikpliwo dome, ƒomevi aɖe le Timoteo II, 3:3 tsɔ ɖee fia be lɔlɔ̃ sia ƒomevi mabɔ kura le ŋkeke mamlɛawo me o. Womezã eʹros, alo gbɔdɔdɔ ƒe lɔlɔ̃ si nɔa ŋutsu kple nyɔnu dome, le Kristotɔwo ƒe Hela Ŋɔŋlɔawo me o, gake woƒo nu tso lɔlɔ̃ ma ƒomevi ŋu le Biblia me.—Lododowo 5:15-20.

^ mm. 15 Wogblɔ nya bubu aɖewo le Ŋɔŋlɔawo me le mɔ sia tɔgbe nu. Le kpɔɖeŋu me, “Mawu enye kekeli” kple “Mawu . . . nye dzo, si fiãa nu.” (Yohanes I, 1:5; Hebritɔwo 12:29) Gake ele be míase nya siawo gɔme be wonye nane tsɔtsɔ aɖɔ nu bubu aɖee ko, elabena ɖe wotsɔ Yehowa le sɔsɔm kple nusiwo míate ŋu akpɔ. Yehowa le abe kekeli ene, le susua nu be ele kɔkɔe eye wòle dzɔdzɔe. “Viviti,” alo makɔmakɔnyenye, aɖeke kura mele eyama me o. Eye woagate ŋu atsɔe asɔ kple dzo le eƒe tsɔtsrɔ̃ŋusẽ zazã me.