Dzo kpo yi emenuwo dzi

Dzo kpo yi emenuawo dzi

 TA 16

‘Wɔ Nu Si Le Dzɔdzɔe’ Le Zɔzɔ Kple Mawu Me

‘Wɔ Nu Si Le Dzɔdzɔe’ Le Zɔzɔ Kple Mawu Me

1-3. (a) Nukata míenyi fe le Yehowa ŋu? (b) Nuka dim míaƒe Agbeɖela lɔ̃ame la le tso mía si?

TSƆE be nèle tɔdziʋu aɖe si le nyɔnyrɔm me. Le ɣeyiɣi si me tututu nèsusui be afisi wòɖo fifia ya mɔkpɔkpɔ aɖeke megali o la, kasia ameɖela aɖe va do eye wòɖe wò yi dedienɔƒee. Aleke gbegbe wò dzi adze emee nye si esime ɖewòla la ɖe wò tso afɔkua me eye wògblɔ na wò azɔ be: “Fifia èle dedie”! Ðe màse le ɖokuiwò me be yenyi fe le amea ŋu oa? Ne míagblɔe tututu la, ènyi wò agbe ƒe fe le eŋu.

2 Le mɔ aɖewo nu la, esia nye kpɔɖeŋu na nusi Yehowa wɔ na mí. Nyateƒee, míenyi fe le eŋu. Eyae wɔ tafe ƒe ɖoɖoa si ʋu mɔ na mí be woaɖe mí atso nuvɔ̃ kple ku ƒe fuwɔame si me. Míesenɛ le mía ɖokui me be míele dedie elabena míenyae be zi alesi míeyi edzi tsɔ vɔsa xɔasi ma dzixɔse de dɔwɔwɔ me ko la, wotsɔa míaƒe nuvɔ̃wo kea mí, eye kakaɖedzi li be etsɔme mavɔ aɖe li na mí. (Yohanes I, 1:7; 4:9) Abe alesi míekpɔe le Ta 14 lia me ene la, tafea nye Yehowa ƒe lɔlɔ̃ kple dzɔdzɔenyenye ƒe kpeɖodzi gã aɖe. Aleke wòle be míawɔ nu ɖe eŋui?

3 Esɔ be míabu nusi míaƒe Agbeɖela ŋutɔ di tso mía si ŋu. Yehowa gblɔ to nyagblɔɖila Mixa dzi be: “Amegbetɔ, egblɔ nusi nyo la na wò; nusi ko dim Yehowa le tso asiwò la, enye be, nawɔ nusi le eteƒe [nusi le dzɔdzɔe, NW], nalɔ̃ dɔmenyowɔwɔ, eye nabɔbɔ ɖokuiwò ɖe anyi ahazɔ le wò Mawu ŋku me.” (Mixa 6:8) De dzesii be nusiwo dim Yehowa le tso mía si dometɔ ɖekae nye be ‘míawɔ nusi le eteƒe.’ Aleke míate ŋu awɔe?

“Nyateƒe la ƒe Dzɔdzɔenyenye” Yome Titi

4. Aleke míewɔ nya be Yehowa di be míanɔ agbe ɖe yeƒe dzidzenu dzɔdzɔewo nu?

4 Yehowa di tso mía si be míanɔ agbe ɖe yeƒe dzidzenuwo le nyui kple vɔ̃ ŋu la nu. Esi eƒe dzidzenuwo le dzɔdzɔe eye  wonyo ta la, ne míenɔ agbe ɖe wo nu la, ekema míele dzɔdzɔenyenye yome tim. Yesaya 1:17 gblɔ be: “Misrɔ̃ nu nyui wɔwɔ, miti nya dzɔdzɔe yome.” Mawu ƒe Nya la xlɔ̃ nu mí be ‘míadi dzɔdzɔenyenye.’ (Zefanya 2:3) Egade dzi ƒo na mí hã be ‘míado amenyenye yeye si wowɔ le Mawu ƒe nɔnɔme nu, le nyateƒe la ƒe dzɔdzɔenyenye me.’ (Efesotɔwo 4:24) Nyateƒe la ƒe dzɔdzɔenyenye—nudzɔdzɔewɔwɔ ŋutɔŋutɔ—tsria ŋutasesẽ, makɔmakɔnyenye, kple agbegbegblẽnɔnɔ, elabena wotsi tre ɖe nusi le kɔkɔe ŋu.—Psalmo 11:5; Efesotɔwo 5:3-5.

5, 6. (a) Nukata menye agbae wònye be míawɔ nu wòasɔ ɖe Yehowa ƒe dzidzenuwo nu o? (b) Aleke Biblia ɖee fiae be nudzɔdzɔewɔwɔ yome titi nye nusi míayi edzi anɔ wɔwɔm ɖaa?

5 Agbae wònye be míanɔ agbe ɖe Yehowa ƒe dzidzenu dzɔdzɔewo nua? Kura o. Dzi si te ɖe Yehowa ŋu megbea eƒe didiwo dzi wɔwɔ o. Esi míelɔ̃ mía Mawu kple eƒe nɔnɔme nyuiawo katã ta la, míedi be míanɔ agbe le mɔ si dzea eŋu nu. (Yohanes I, 5:3) Ðo ŋku edzi be Yehowa ‘lɔ̃a nu dzɔdzɔe wɔwɔ.’ (Psalmo 11:7) Ne míedi be míasrɔ̃ Mawu ƒe nudzɔdzɔewɔwɔ ŋutɔŋutɔ la, ke ele be míalɔ̃ nusiwo Yehowa lɔ̃na eye míalé fu nusiwo wòléa fui.—Psalmo 97:10.

6 Mele bɔbɔe be amegbetɔ madeblibowo nati dzɔdzɔenyenye alo nudzɔdzɔewɔwɔ yome o. Ehiã be míaɖe amenyenye xoxoa kple eƒe nuwɔna vɔ̃ɖiwo ɖa eye míado yeyea. Biblia gblɔ be amenyenye yeyea nye ‘esi wowɔna yeye’ to sidzedze vavãtɔ me. (Kolosetɔwo 3:9, 10) Nya siwo nye “esi wowɔna yeye” la fia be amenyenye yeyea dodo nye nuwɔna si anɔ edzi yim ɖaa, esi bia veviedodonu. Aleke ke míedzea agbagba be míawɔ nu nyui o, ete ŋu dzɔna ɣeaɖewoɣi be míaƒe nuvɔ̃menyenye nawɔe be míawɔ vodada le míaƒe tamesusu, nyagbɔgblɔ, alo nuwɔna me.—Romatɔwo 7:14-20; Yakobo 3:2.

7. Aleke wòle be míabu kplamatsedonuwo le míaƒe agbagbadzedze be míati nudzɔdzɔewɔwɔ yomee?

7 Aleke wòle be míabu nusiwo ado kplamatse mí le míaƒe agbagbadzedze be míati nudzɔdzɔewɔwɔ yome lae? Nyateƒee wònye be míadi be míabu nuvɔ̃ gã siwo míewɔ la nu tsɛe o. Le ɣeyiɣi ma ke me la, mele be míana ta gbeɖe, ahabui be míaƒe  gbɔdzɔgbɔdzɔwo na be míegadze asubɔ Yehowa o. Mía Mawu amenuvela la wɔ ɖoɖo be yeagbugbɔ axɔ nuvɔ̃wɔla siwo trɔ dzime. Bu apostolo Yohanes ƒe nya siawo siwo naa kakaɖedzi ame la ŋu kpɔ: “Meŋlɔ nusiawo ɖo ɖe mi, bene miagawɔ nuvɔ̃ o.” Gake eyome egblɔ kpee wòsɔ be: “[Ke hã] ne ame aɖe wɔ nuvɔ̃ [le blibomademade si ƒe dome míenyi ta] la, nyaxɔɖakɔla le mía si le Fofoa gbɔ, eyae nye Yesu Kristo, dzɔdzɔetɔ la.” (Yohanes I, 2:1) Ẽ, Yehowa tsɔ Yesu ƒe tafevɔsa na ale be míate ŋu asubɔ Eyama wòadze eŋu togbɔ be míenye nuvɔ̃mewo hã. Ðe esia meʋã mí míedi be míawɔ míaƒe ŋutete ɖesiaɖe adze Yehowa ŋu oa?

Nyanyui la Kple Mawu ƒe Ʋɔnu Dzɔdzɔe Dɔdrɔ̃

8, 9. Aleke gbeƒãɖeɖe nyanyuia ɖea Yehowa ƒe ʋɔnu dzɔdzɔe dɔdrɔ̃ fianae?

8 Míate ŋu awɔ nu dzɔdzɔe—le nyateƒe me la, míate ŋu asrɔ̃ Mawu ƒe ʋɔnu dzɔdzɔe dɔdrɔ̃—to gomekpɔkpɔ bliboe le Mawu ƒe Fiaɖuƒe ŋuti nyanyuia gbɔgblɔ me. Ðekawɔwɔ kae le Yehowa ƒe ʋɔnu dzɔdzɔe dɔdrɔ̃ kpakple nyanyuia dome?

9 Yehowa mahe xexe vɔ̃ɖi sia ava nuwuwui nenye be mena woxlɔ̃ nu amewo do ŋgɔ o. Le Yesu ƒe nyagblɔɖi si ku ɖe nusiwo adzɔ le nuwuɣia ŋu me la, egblɔ be: “Ele be woaɖe gbeƒã nyanyui la afia dukɔwo katã gbãgbiagbã.” (Marko 13:10; Mateo 24:3) Nya “gbãgbiagbã” si wòzã fia be nudzɔdzɔ bubuwo akplɔ xexeame katã ƒe gbeƒãɖeɖedɔa ɖo. Nudzɔdzɔ siawo ƒe ɖee nye xaxa gã si wogblɔ ɖi, si ahe tsɔtsrɔ̃ ava ame vɔ̃ɖiwo dzi eye wòata mɔ na dzɔdzɔenyenye xexeme yeyea. (Mateo 24:14, 21, 22) Le nyateƒe me, ame aɖeke tɔ madzɔ kura be wòatsɔ nya ɖe Yehowa ŋu be ewɔ nu madzɔmadzɔ ɖe ame vɔ̃ɖiwo ŋu o. Esi wòna wole nu xlɔ̃m amewo ta la, ele mɔnukpɔkpɔ geɖe nam amesiawo be woatrɔ tso woƒe mɔwo dzi bene woagatsrɔ̃ o.—Yona 3:1-10.

Míeɖea Mawu ƒe dzɔdzɔenyenye fiana ne míegblɔa nya nyuia na amewo ameŋkumemakpɔmakpɔtɔe

10, 11. Mɔ ka nue míesrɔ̃a Mawu ƒe ʋɔnu dzɔdzɔe dɔdrɔ̃ le le nyanyuia gbɔgblɔ me?

10 Mɔ ka nue míesrɔ̃a Mawu ƒe ʋɔnu dzɔdzɔe dɔdrɔ̃ le le nyanyuia  gbɔgblɔ me? Gbã la, ɖeko wòsɔ be míawɔ nusi míate ŋui atsɔ akpe ɖe amewo ŋu be woakpɔ xɔxɔ. Gabu kpɔɖeŋu si nye be woɖe wò tso tɔdziʋu si le nyɔnyrɔm me ŋu kpɔ. Fifia esi nèle dedie le ameɖeʋua me la, àdi be yeakpe ɖe ame bubu siwo gale nyɔnyrɔm le tsia me ŋu godoo. Nenema ke agba le mía dzii be míakpe ɖe amesiwo kpɔtɔ le ʋiʋlim le xexe vɔ̃ɖi sia ƒe “tsiwo” me ŋu. Ele eme baa be ame geɖe gbea míaƒe gbedasia ya. Gake zi alesi Yehowa ƒe dzigbɔgbɔ blewu la nu meyi o ko la, enye agba le mía dzi be míana mɔnukpɔkpɔ wo be ‘woava dzimetɔtrɔ gbɔ’ ne woadze na xɔxɔ.—Petro II, 3:9.

11 To nyanyuia gbɔgblɔ na amesiwo katã míedoa goe me la, míesrɔ̃a ʋɔnu dzɔdzɔe dɔdrɔ̃ le mɔ vevi bubu aɖe hã nu: Eyae nye ameŋkumemakpɔmakpɔ. Ðo ŋku edzi be “Mawu mekpɔa ame ŋku me o, hafi boŋ le dukɔ sia dukɔ me, amesi ke vɔ̃nɛ, eye wòwɔa nu dzɔdzɔe la, eya dzea eŋu.” (Dɔwɔwɔwo 10:34, 35) Ne míedi be míasrɔ̃ Eƒe dzɔdzɔenyenye la, ke mele be míado ŋgɔ abu susu aɖe ɖe amewo ŋu o. Ke boŋ míagblɔ nyanyuia na ameƒomeviwo katã, metsɔ le eme teƒe si wotso, ɖoƒe si wole, alo aleke ke woƒe ganyawo le o. Míetoa esia me naa mɔnukpɔkpɔ amesiwo katã adi be yewoaɖo to la be woase nyanyuia ahawɔ ɖe edzi.—Romatɔwo 10:11-13.

Alesi Míewɔa Nu Ðe Amewo Ŋui

12, 13. (a) Nukatae mele be míayɔ ɖe ʋɔnudɔdrɔ̃ amewo ŋu o? (b) Gɔmesese kae le Yesu ƒe nuxlɔ̃ame si nye ‘midzudzɔ ʋɔnudɔdrɔ̃’ kple ‘midzudzɔ fɔbubu’ ŋu? (Kpɔ etenuŋɔŋlɔa hã.)

12 Míagate ŋu aɖe nudzɔdzɔewɔwɔ afia ne míewɔa nu ɖe amewo ŋu abe alesi Yehowa wɔa nu ɖe mía ŋutɔwo mía ŋui ene. Ele bɔbɔe ŋutɔ be míanɔ ʋɔnu drɔ̃m amewo, eye anɔ ɖeklemi ɖem woƒe vodadawo ahanɔ nya tsɔm ɖe woƒe tamesusuwo ŋu. Gake mía dometɔ kae adi be Yehowa nake ŋku ɖe yeƒe tamesusuwo kple vodadawo me nublanuimakpɔmakpɔtɔe? Menye aleae Yehowa wɔa nu ɖe mía ŋui o. Hakpala la de dzesii be: “Yehowa, ne èbe, yealé vodadawo ɖi la, Aƒetɔ, ameka anɔ te ma?” (Psalmo 130:3) Ðe medzɔa dzi na mí be mía Mawu dɔmenyotɔ la meɖoe be yeake ŋku ɖe míaƒe vodada  suesuewo me oa? (Psalmo 103:8-10) Ekema aleke wòle be míawɔ nu ɖe amewo ŋui?

13 Ne míese alesi nublanuikpɔkpɔ dze le Mawu ƒe ʋɔnu dzɔdzɔe dɔdrɔ̃ mee gɔme la, awɔe be míayɔ ɖe ʋɔnudɔdrɔ̃ amewo ŋu le nya siwo meka mí alo le nya suesuewo me o. Le Yesu ƒe todzimawunya la me la, exlɔ̃ nu be: “Midzudzɔ ʋɔnudɔdrɔ̃ ne woagadrɔ̃ ʋɔnu mi o.” (Mateo 7:1, NW) Le Luka ƒe nuŋlɔɖia me la, Yesu gblɔ kpee be: “Midzudzɔ fɔbubu ne woagabu fɔ mi o.” * (Luka 6:37, NW) Yesu ɖee fia be yenya be amegbetɔ madeblibowo dina be yewoadrɔ̃ ʋɔnu amewo. Ele be eƒe nyaselawo dometɔ ɖesiaɖe si ƒe nɔnɔme enye be yeadrɔ̃ ʋɔnu sesẽ amewo la nadzudzɔ.

14. Susu kawo tae wòle be ‘míadzudzɔ ʋɔnudɔdrɔ̃’ amewo?

14 Nukata wòle be ‘míadzudzɔ ʋɔnudɔdrɔ̃’ amewo? Nusiwo tae dometɔ ɖekae nye be ŋusẽ si wona mí la se ɖe afi aɖe ko. Nusrɔ̃la Yakobo ɖo ŋku edzi na mí be: “Ame ɖeka koe nye sedela kple ʋɔnudrɔ̃la”—eyae nye Yehowa. Eyata Yakobo bia nya sia tẽ be: “Ke wò la, ameka nènye hele ʋɔnu drɔ̃m hawòvi mahã?” (Yakobo 4:12; Romatɔwo 14:1-4) Gakpe ɖe eŋu la, míaƒe nuvɔ̃menyenye ate ŋu awɔe be míadrɔ̃ ʋɔnu madzɔmadzɔ bɔbɔe. Míaƒe nɔnɔme kple tamesusu geɖe—siwo dometɔ aɖewoe nye nazãbubu, bubumademade mía ŋu, ŋuʋaʋã, kple mía ɖokui bubu ame dzɔdzɔewoe—ate ŋu akpɔ ŋusẽ ɖe alesi míebua mía haviwoe dzi. Gbɔdzɔgbɔdzɔ bubu geɖewo le mía ŋu, eye ele be ŋugbledede le esiawo ŋu nawɔe be míatsri vodada didi le amewo ŋu kabakaba. Míate ŋu anya nusi le amewo ƒe dzi me o; eye míate ŋu anya nɔnɔme bubu siwo katã kpɔ ŋusẽ ɖe amewo dzi o. Ekema amekawoe míenye be míanɔ susu vɔ̃ bum ɖe mía haxɔsetɔwo ŋu alo aƒo nu atsi tre ɖe  agbagba si dzem wole le Mawu subɔsubɔ me ŋu? Aleke gbegbe wòanyo wui enye si be míasrɔ̃ Yehowa ƒe nɔnɔme to nɔnɔme nyui siwo le mía nɔviŋutsuwo kple nɔvinyɔnuwo ŋu kpɔkpɔ tsɔ wu ŋku keke ɖe woƒe gbɔdzɔgbɔdzɔwo me!

15. Nyagbɔgblɔ kple nuwɔna kawo ŋue womeɖe mɔ ɖo le Mawu subɔlawo dome o, eye nukatae?

15 Ke míaƒe ƒomea me tɔwo hã ɖe? Nublanuitɔe la, le egbexexeame la, teƒe si wòle be wòanye ŋutifafa kple dedienɔƒe boŋue va zu afisi wodrɔ̃a ŋutasẽʋɔnuwo le—eyae nye le aƒeme. Míesea nu tso ŋutasẽla siwo nye srɔ̃ŋutsuwo, srɔ̃nyɔnuwo, alo dzilawo, amesiwo “bua fɔ” woƒe ƒomea me tɔwo to wo dzudzu kple wo ƒoƒo me ɣesiaɣi la ŋu. Gake womeɖe mɔ ɖe nya tɔamewo gbɔgblɔ, dzugbewo, kple ŋutasẽnuwo wɔwɔ ŋu le Mawu ƒe amewo dome o. (Efesotɔwo 4:29, 31; 5:33; 6:4) Yesu ƒe nuxlɔ̃ame be ‘midzudzɔ ʋɔnudɔdrɔ̃’ kple ‘midzudzɔ fɔbubu’ kpɔtɔ wɔa dɔ ne aƒemee míele gɔ̃ hã. Ðo ŋku edzi be  nudzɔdzɔewɔwɔ bia be míawɔ nu ɖe amewo ŋu abe alesi Yehowa wɔnɛ ɖe mía ŋutɔwo mía ŋu ene. Eye mía Mawu mewɔa nu ɖe mía ŋu dzikutɔe alo ŋutasesẽtɔe gbeɖe o. Ke boŋ eyama “yɔ fũ kple dɔmetɔtrɔ” ɖe amesiwo lɔ̃nɛ ŋu. (Yakobo 5:11) Kpɔɖeŋu nyui kae nye si wòle be míasrɔ̃!

Hamemegã Siwo Subɔna ‘Ðe Ʋɔnu Dzɔdzɔe Dɔdrɔ̃ Nu’

16, 17. (a) Nukae Yehowa bia tso hamemegãwo si? (b) Nukae wòle be woawɔ ne nuvɔ̃wɔla gbe dzimetɔtrɔ ŋutɔŋutɔ, eye nukatae?

16 Agba le mí katã mía dzi be míawɔ nu dzɔdzɔe, gake le Kristo-hamea me la, hamemegãwo koŋ dzie agba le wu le go sia me. De dzesi nya si wogblɔ le “amegãwo,” alo hamemegãwo, ŋu le Yesaya ƒe nyagblɔɖia me: “Kpɔ ɖa, fia aɖu fia ɖe dzɔdzɔenyenye nu, eye amegãwo aɖu dzi ɖe ʋɔnudɔdrɔ̃ nu.” (Yesaya 32:1) Ẽ, Yehowa kpɔa mɔ be hamemegãwo nasubɔ ɖe ʋɔnu dzɔdzɔe dɔdrɔ̃ nu. Aleke woate ŋu awɔ esiae?

17 Ŋutsu siawo siwo dze le gbɔgbɔ me la nya nyuie be ʋɔnu dzɔdzɔe dɔdrɔ̃, alo nudzɔdzɔewɔwɔ, bia be woana hamea nanɔ dzadzɛ. Ɣeaɖewoɣi la, eva hiãna be hamemegãwo nadrɔ̃ ʋɔnu le nugbegblẽwɔwɔ siwo nye ŋkubiãnya ŋu. Le esia wɔwɔ me la, woɖoa ŋku edzi be Mawu ƒe ʋɔnu dzɔdzɔe dɔdrɔ̃ bia be woakpɔ nublanui ne susu aɖe li si ta woakpɔe ɖo. Le esia ta wodzea agbagba be yewoana nuvɔ̃wɔla la natrɔ va dzimetɔtrɔ gbɔ. Gake ne nuvɔ̃wɔla la gbe dzimetɔtrɔ vavã ɖeɖe fia, togbɔ be wodze agbagba be yewoakpe ɖe eŋu hã ɖe? Le ʋɔnu dzɔdzɔe dɔdrɔ̃ si de blibo me la, Yehowa ƒe Nya la bia be woawɔ afɔɖeɖe sẽŋu aɖe: “Miɖe ame vɔ̃ɖi la ɖa le mia ŋutɔ mia dome!” Esia fia be woaɖee le hamea me. (Korintotɔwo I, 5:11-13; Yohanes II, 9-11) Etena ɖe hamemegãwo dzi be wòva hiãna be woawɔ afɔɖeɖe ma, gake wonya be ema wɔwɔ le vevie bene woakpɔ hamea ƒe dzadzɛnyenye le agbenɔnɔ kple gbɔgbɔ me gome ta. Le ema me gɔ̃ hã la, wokpɔa mɔ be nuvɔ̃wɔla la ava nyɔ le eɖokui me eye wòagbugbɔ atrɔ ava hamea me.—Luka 15:17, 18.

18. Nukae nɔa susu me na hamemegãwo ne wole nu xlɔ̃m amewo tso Biblia me?

 18 Be woasubɔ ɖe ʋɔnu dzɔdzɔe dɔdrɔ̃ nu bia hã be woana nuxlɔ̃ame siwo wotu ɖe Biblia dzi ne ehiã. Ele eme baa be hamemegãwo media vodada le ame ŋu ya o. Eye womedina be ɣesiaɣi ko yewoanɔ mɔnukpɔkpɔwo dim anɔ amewo ɖɔm ɖo hã o. Gake ate ŋu adzɔ be ‘vodada naɖi ɖe’ haxɔsetɔ aɖe. Ŋkuɖoɖo edzi be ŋutasesẽ alo vevemasemaseɖeamenu mele Mawu ƒe ʋɔnu dzɔdzɔe dɔdrɔ̃ me o la aʋã hamemegãwo be “[woaɖɔ] nenem me sia ɖo le dɔmefafa ƒe gbɔgbɔ la me.” (Galatiatɔwo 6:1) Eyata hamemegãwo manyra ɖe vodala la agblɔ nya tɔamewo ɖe eŋu o. Ke boŋ nuxlɔ̃ame si woana lɔlɔ̃tɔe la ade dzi ƒo na amesi le exɔm. Ne wole mo kam na ame tẽ—wole nusiwo ado tso eme ne wowɔ afɔɖeɖe gbegblẽ aɖe gblɔm tẽ—gɔ̃ hã la, enɔa susu me na hamemegãwo be haxɔsetɔ si da vo la nye alẽ si le Yehowa ƒe alẽha la me. * (Luka 15:7) Ne edze ƒã be lɔlɔ̃e nye nusi ʋã ame be woaxlɔ̃ nu alo aka mo na ame eye wowɔe lɔlɔ̃tɔe la, anɔ bɔbɔe wu be wòaɖɔ vodala la ɖo.

19. Nyametsotso kawoe wòhiãna be hamemegãwo nawɔ, eye nuka dzie wòle be woanɔ te ɖo le nyametsotso mawo wɔwɔ me?

19 Zi geɖe la, ehiãna be hamemegãwo nawɔ nyametsotso siwo ku ɖe wo nɔvi haxɔsetɔwo ŋu. Le kpɔɖeŋu me, hamemegãwo kpena enuenu ɣeaɖewoɣi be woabu nɔviŋutsu siwo le hamea me ŋu be wodze woakafu wo woanye hamemegãwo alo subɔsubɔdɔwɔlawo hã. Hamemegãwo nya alesi wòle vevie be woagakpɔ ame ŋkume o. Wonaa Mawu ƒe nudidi siwo dzi woanɔ te ɖo la fiaa mɔ wo le nyametsotso wɔwɔ me, ke menye woa ŋutɔwo ƒe seselelãmewo dzie wonɔa te ɖo o. Le esia me la, ‘womenaa ame aɖewo ƒe nu nyoa wo ŋu wu ame bubuwo o, eye womeléa go ɖeka me wu bubu o.’—Timoteo I, 5:21.

20, 21. (a) Ameka ƒomeviwoe hamemegãwo dzea agbagba be yewoanye, eye nukatae? (b) Nukae hamemegãwo ate ŋu awɔ atsɔ akpe ɖe ‘blanuilélawo’ ŋu?

 20 Hamemegãwo gaɖea Mawu ƒe ʋɔnu dzɔdzɔe dɔdrɔ̃ fiana le mɔ bubuwo hã nu. Esi Yesaya gblɔe ɖi be hamemegãwo asubɔ ɖe ‘ʋɔnu dzɔdzɔe dɔdrɔ̃ nu’ megbe la, eyi edzi be: “Amesiame anɔ abe sitsoƒe tso ya nu, bebeƒe tso tsidzadza nu, tɔʋu le gbegbe kple agakpe gã nyadri ƒe vɔvɔli le kuɖiɖinyigba dzi ene.” (Yesaya 32:2) Eyata hamemegãwo ʋlina be yewoanye akɔfafa kple gbɔɖeme tsoƒe na woƒe haxɔsetɔwo.

21 Egbea le kuxi gbogbo siwo ɖea dzi le ame ƒo ta la, ame geɖe hiã dzideƒoname. Hamemegãwo, nukae miate ŋu awɔ atsɔ akpe ɖe ‘blanuiléla’ siawo ŋu? (Tesalonikatɔwo I, 5:14) Miɖo to wo veveseseɖeamenutɔe. (Yakobo 1:19) Ðewohĩ ehiã be woagblɔ “nuxaxa” si le dzi me na wo la na ame aɖe si dzi woka ɖo. (Lododowo 12:25) Mika ɖe edzi na wo be wohiã vevie,  asixɔxɔ le wo ŋu, eye wonye lɔlɔ̃tɔwo—ẽ, na Yehowa kple na wo nɔviŋutsu kple nɔvinyɔnuwo siaa. (Petro I, 1:22; 5:6, 7) Hekpe ɖe eŋu la, miate ŋu ado gbe ɖa kple amesiawo alo ayɔ wo ŋkɔ le miaƒe gbedodoɖawo me. Be woasee hamemegãwo nado gbe ɖa ɖe wo ta ate ŋu afa akɔ na wo ale gbegbe. (Yakobo 5:14, 15) Dzɔdzɔenyenye Mawu la magbe dzesidede miaƒe agbagbadzedze lɔlɔ̃tɔe be miakpe ɖe blanuiléla siawo ŋu o.

Hamemetsitsiwo ɖea Yehowa ƒe dzɔdzɔenyenye fiana ne wodea dzi ƒo na ame siwo lé blanui

22. Mɔ kawo nue míate ŋu asrɔ̃ Yehowa ƒe dzɔdzɔenyenye le, eye nukae ado tso eme na mí?

22 Nyateƒee, míetena ɖe Yehowa ŋu kplikplikpli wu to eƒe dzɔdzɔenyenye sɔsrɔ̃ me! Ne míenɔa agbe ɖe eƒe dzidzenu dzɔdzɔewo nu, ne míegblɔa nyanyui si naa agbexɔxɔ la na amewo, eye ne míeɖoe be míalé ŋku ɖe amewo ƒe nɔnɔme nyuiwo ŋu tsɔ wu be míanɔ ŋku kem ɖe woƒe gbɔdzɔgbɔdzɔwo me la, míesrɔ̃a Mawu ƒe ʋɔnu dzɔdzɔe dɔdrɔ̃. Hamemegãwo, ne miekpɔ hamea ƒe dzadzɛnyenye ta, ne miena nuxlɔ̃ame tuameɖo siwo tso Ŋɔŋlɔawo me, ne miewɔ nyametsotsowo ameŋkumemakpɔmakpɔtɔe, eye ne miedea dzi ƒo na blanuilélawo la, ekema miele Mawu ƒe ʋɔnu dzɔdzɔe dɔdrɔ̃ srɔ̃m. Aleke gbegbe wòado dzidzɔ na Yehowae nye si be wòabɔbɔ akpɔe tso dziƒo be yeƒe amewo le agbagba ɖesiaɖe si woate ŋui dzem be ‘yewoawɔ nusi le dzɔdzɔe’ le zɔzɔ kple woƒe Mawu me!

^ mm. 13 Biblia gɔmeɖeɖe aɖewo gblɔ be “migadrɔ̃ ʋɔnu o” eye “migabu fɔ o.” Gɔmeɖeɖe mawo fia be “migadze egɔme mianɔ ʋɔnu drɔ̃m o” eye “migadze egɔme mianɔ fɔ bum o.” Gake le afisia la, Biblia ŋlɔlawo zã dɔwɔnya siwo nye sedede nyagbenametɔ le fifi nuwɔɣi (si le edzi yim). Eyata nuwɔna siwo ŋu nya gblɔm wonɔ la nye nuwɔna si kpɔtɔ nɔ edzi yim gake ele be woadzudzɔ wo.

^ mm. 18 Biblia gblɔ le Timoteo II, 4:2 be ɣeaɖewoɣi ele be hamemegãwo ‘naka mo, woagbe nya, eye woaxlɔ̃ nu.’ Helagbe me nya si gɔme woɖe be “xlɔ̃ nu” (pa·ra·ka·leʹo) ate ŋu afia be ‘woade dzi ƒo.’ Nya aɖe si do ƒome kplii le Helagbe me, pa·raʹkle·tos, ate ŋu afia ametaʋlila le ʋɔnunyawo me. Le esia ta ne hamemegãwo le mo kam vevie hã la, ele be woakpe ɖe amesiwo hiã kpekpeɖeŋu le gbɔgbɔ me ŋu.