Dzo kpo yi emenuwo dzi

Dzo kpo yi emenuawo dzi

 TA 1

‘Kpɔ Ða, Mía Mawu Enye Si’

‘Kpɔ Ða, Mía Mawu Enye Si’

1, 2. (a) Nya kawoe nàdi be yeabia Mawu? (b) Nya kae Mose bia Mawu?

ÀTE ŋu akpɔ alesi wòanɔ ɖa le susu me be yele dze ɖom kple Mawua? Eŋu bubu alea ɖeɖe dzaa dea vɔvɔ̃ ame me—be xexeame katã ƒe Dziɖulagã enye ma le nu ƒom kpli wò! Ètɔ sẽ gbɔ, gake ète kpɔ ƒo nu. Eɖo to wò, eɖo nya ŋu na wò, eye ena mɔ wò gɔ̃ hã be nàbia nya sia nya si dze ŋuwò lae faa. Azɔ nya kae nàbia?

2 Ɣeyiɣi didi aɖee nye si va yi la, ŋutsu aɖe nɔ nɔnɔme sia tututu me. Eŋkɔe nye Mose. Gake nya si wòbia Mawu awɔ nuku na wò. Mebia nya le eɖokui, eƒe etsɔme, alo fu si kpem ameƒomea le gɔ̃ hã ŋu o. Mawu ƒe ŋkɔ boŋue wòbia. Esi wònye be Mose nya Mawu ƒe ŋkɔ xoxo ta la, ɖewohĩ eƒe biabiaa awɔ yaa na wò. Ekema gɔmesese deto aɖe anya nɔ eƒe biabiaa ŋu. Le nyateƒe me la, nya vevitɔ kekeake si Mose ate ŋu abia enye ma. Ŋuɖoɖoa ka mí katã. Ate ŋu ana nàɖe afɔ vevi si ate wò ɖe Mawu ŋu kplikplikpli. Le mɔ ka nu? Mina míadzro dzeɖoɖo vevi ma me.

3, 4. Nukawoe dzɔ hafi Mose kple Mawu ɖo dze, eye nya kawoe dze le dzeɖoɖoa me?

3 Ƒe 80 ye Mose xɔ ɣemaɣi. Edzo le wo detɔ Israel-vi siwo nye kluviwo le Egipte gbɔ yi va nɔ aboyo me ƒe 40. Gbeɖeka esi wònɔ toa ƒe lãhawo kplɔm la, ekpɔ nu wɔnuku aɖe. Ŋuve aɖe nɔ bibim gake menɔ fiafiãm o. Bibim ko wònɔ henɔ keklẽm le toa ŋu abe mɔfiakaɖi aɖe ene. Mose ɖe zɔ yi ŋgɔ be yeakpɔe nyuie. Aleke gbegbe wòadzo haha enye esi esi wòse gbe aɖe ƒo nu nɛ tso dzoa me! Mawu to eƒe dɔla nyanuɖela aɖe dzi ale be woa kple Mose woɖo dze geɖe. Eye abe alesi ɖewohĩ nènya ene la,  afimae Mawu dɔ Mose si menɔ lɔlɔ̃m gbã o le be wòadzo le tomefafa si me wònɔ me atrɔ ayi Egipte ava ɖe Israel-viwo tso kluvinyenye me.—Mose II, 3:1-12.

4 Ɣeyiɣi ma mee Mose ate ŋu abia Mawu nya sia nya si dzroe hafi. Gake se nya si wòbiae ɖa, be: “Ne meva Israel-viwo gbɔ, eye megblɔ na wo be: mia fofowo ƒe Mawu dɔm ɖo ɖe mia gbɔ, eye woabiam bena: eŋkɔ ɖee hã la, aleke maɖo ŋu na woe?”—Mose II, 3:13.

5, 6. (a) Nyateƒenya vevi si me kɔ kae Mose ƒe biabiaa fia mí? (b) Nusi dze fɔbubu kae wowɔ ɖe Mawu ƒe ŋkɔ ŋu? (d) Nukatae wòle vevie nenema gbegbe be Mawu ɖe eƒe ŋkɔ fia ameƒomea?

5 Nu gbãtɔ si biabia ma fia mí enye be ŋkɔ le Mawu si. Mele be míatsɔ nyateƒenya sia nu tsɛe o. Ke hã ame geɖe bunɛ nu tsɛe. Woɖe Mawu ƒe ŋkɔ ɖa le Biblia gɔmeɖeɖe gbogbo aɖewo me hetsɔ dzesideŋkɔ siwo nye “Aƒetɔ” kple “Mawu” ɖo eteƒe. Nusia nye nu wɔnublanui si dze fɔbubu wu ɖesiaɖe si wowɔ le mawusubɔsubɔ me kpɔ. Wò ya kpɔe ɖa ko be ne èdo go ame aɖe zi gbãtɔ ɖe, nukae nye nu gbãtɔ si nàwɔ? Ðe menye eƒe ŋkɔe nàbiae oa? Nenemae wòle le sidzedze Mawu hã gome. Menye ŋkɔmanɔsitɔ aɖe alo ame saɖeaga aɖe si míate ŋu adze sii alo ase eƒe nɔnɔmewo gɔme o ye wònye o. Togbɔ be ŋku mate ŋu akpɔe o hã la, enye amesi li, eye ŋkɔ le esi—si nye Yehowa.

6 Gakpe ɖe eŋu la, ne Mawu ɖe eƒe ŋkɔ fia la, mɔnukpɔkpɔ tɔxɛ dodzidzɔname aɖee le ŋgɔ. Ele mía kpem be míadze si ye. Edi be míawɔ tiatia nyuitɔ kekeake si míate ŋui le agbe me—si nye be míate ɖe ye ŋu. Gake Yehowa wɔ nusiwo yi ŋgɔ wu eƒe ŋkɔ ko yɔyɔ na mí. Efia nu mí tso ame si tɔ ŋkɔa hã ŋu.

Nusi Mawu ƒe Ŋkɔ Fia

7. (a) Aleke woɖea Mawu ƒe ŋkɔa gɔmee? (b) Nuka tututue Mose di be yeanya esi wòbia Mawu Eƒe ŋkɔ?

7 Yehowa ŋutɔe tia eƒe ŋkɔ si ŋu gɔmesese tɔxɛ le. Woɖea “Yehowa” gɔme be “Enaa Wòvaa Eme.” Enye ame si  le etɔxɛ le xexea me godoo, elabena eyae na nuwo katã va li, eye wònaa eƒe tameɖoɖowo katã vaa eme. Esia dea mawuvɔvɔ̃ ame me. Ke ɖe gɔmesese bubu aɖe gale Mawu ƒe ŋkɔa ŋua? Edze ƒãa be Mose di be yeanya nu geɖe. Nya lae nye be, enya be Yehowae nye Wɔla la, eye enya Mawu ƒe ŋkɔ. Mawu ƒe ŋkɔa menye nu yeye o. Amewo nɔ ezãm ƒe alafa geɖe xoxo. Ðikeke mele eme o be esi Mose bia Mawu ƒe ŋkɔ la, amesi tɔ ŋkɔa ta biam wònɔ. Efia be enɔ biabiam be: ‘Nukae magblɔ na wò dukɔ Israel tso ŋuwò si atu alesi woxɔ dziwò see la ɖo, eye wòana woase egɔme be àva ɖe yewo nyateƒe?’

8, 9. (a) Aleke Yehowa ɖo Mose ƒe biabiaa ŋui, eye nukae gblẽ le alesi woɖea Eƒe ŋuɖoɖoa gɔme zi geɖe ŋu? (b) Nyagbɔgblɔ si nye “Mava nye amesi mava nye” gɔme ɖe?

8 Yehowa ɖe eƒe amenyenye ƒe akpa wɔdɔɖeamedzi aɖe si do ƒome kple gɔmesese si le eƒe ŋkɔa ŋu la fia tsɔ kɔ nya sia me. Egblɔ na Mose be: “Mava nye amesi mava nye.” (Mose II, 3:14, NW) Biblia gɔmeɖeɖe geɖe ƒe akpa sia xlẽ be: “Amesi menye, eyae menye.” Gake nya sia ƒe gɔmeɖeɖe nyuitɔwo ɖee fia be menye ɖe Mawu nɔ kpe ɖom edzi be yeli dzro ko o. Ke boŋ ɖe Yehowa nɔ nu fiam Mose—kple mí katã—be ‘Yeava nye,’ alo yeatiae be yeanye nu sia nu si hiã be yeana Yeƒe ŋugbedodowo nava eme. Woɖe kpukpui sia gɔme le J. B. Rotherham ƒe gɔmeɖeɖea me tẽ be: “Mava Nye nusianu si dze ŋunye.” Ame aɖe si bi ɖe Hebrigbe si wotsɔ ŋlɔ Biblia me ɖe nyagbe sia me ale: “Nɔnɔme alo hiahiã ka ke wònye o . . . , Mawu ‘ava nye’ egbɔkpɔnu si hiã.”

9 Nukae nya ma fia na Israel-viwo? Kplamatsedonu ka ke nɔ wo ŋgɔ o, nɔnɔme sesẽ ka ke mee wonɔ o, Yehowa ava nye nusianu si hiã be wòaɖe wo tso kluvinyenye me akplɔ wo ayi Ŋugbedodonyigbaa dzi. Ðikeke mele eme o be ŋkɔa nyɔ ŋuɖoɖo ɖe Mawu ŋu ɖe wo me. Ate ŋu anyɔ ŋuɖoɖo ɖe Mawu ŋu ɖe míawo hã me egbea. (Psalmo 9:11) Nukatae?

10, 11. Aleke Yehowa ƒe ŋkɔa fia mí be míakpɔe be enye Vifofo nyuitɔ kekeake si te ŋu trɔna ɖe nɔnɔmewo ŋu wu amesiame? Wɔ kpɔɖeŋu.

 10 Le kpɔɖeŋu me: Dzilawo nya alesi wòle be woatrɔ ɖe nɔnɔmewo ŋu le wo viwo dzi kpɔkpɔ me. Le ŋkeke ɖeka me la, ete ŋu va hiãna be dzila nanye dɔnɔdzikpɔla, nuɖala, nufiala, tohela, ʋɔnudrɔ̃la, kple dɔ bubu geɖe wɔla. Dɔ vovovo siwo hiãna be woawɔ la wua tsɔtsɔ na wo dometɔ geɖe. Wodzea si alesi gbegbe wo viwo xɔ wo dzi se bliboe, amesiwo mekea ɖi gbeɖe o be Papa alo Dada ate ŋu atsi vevesesea nu, adzra masɔmasɔwo katã ɖo, adzra fefenu gbegblẽ ɖesiaɖe ɖo, eye aɖo biabia ɖesiaɖe si ava yewoƒe susu si dina be yeanya nusianu me la ŋu. Dzila aɖewo ŋutɔwo ƒe gbɔdzɔgbɔdzɔwo ɖea fu na wo wobunɛ be yewomedze o eye wotɔtɔna ɣeaɖewoɣi. Wobunɛ be yewomesu te kura awɔ dɔ siawo dometɔ geɖe o.

11 Yehowa hã nye dzila lɔ̃ame. Togbɔ be medaa eya ŋutɔ ƒe dzidzenu debliboawo dzi o hã la, naneke meli si mate ŋu ava nye bene wòalé be na via siwo le anyigba dzi le mɔ nyuitɔ kekeake nu o. Eyata eƒe ŋkɔ, Yehowa, le mía fiam be míakpɔe be enye Vifofo nyuitɔ kekeake. (Yakobo 1:17) Eteƒe medidi o Mose kple Israel-vi wɔnuteƒewo katã va kpɔe be Yehowa nye amesi eƒe ŋkɔa fia vavã. Woƒe nu ku esi wokpɔ eteƒe eyama va nye Aʋafia matsiaʋa, dzɔdzɔmenuwo katã ƒe Aƒetɔ, Senala si ɖeke mesɔ kplii o, Ʋɔnudrɔ̃la, Xɔtuɖaŋunyala, nuɖuɖu kple tsi Nala, awu kple afɔkpa Takpɔla—kple bubu geɖe.

12. Aleke Farao ƒe nɔnɔme ɖe Yehowa ŋu to vovo tso Mose tɔ gbɔe?

12 Mawu to mɔ sia nu ɖe eƒe ŋkɔ fia, eɖe nu wɔdɔɖeamedziwo fia le ame si tɔ ŋkɔa ŋu, eye wòɖee fia gɔ̃ hã be nya si yegblɔna tso ye ɖokui ŋu la le eteƒe. Ðikeke mele eme o be Mawu di be míadze si ye. Aleke míawɔ nui? Mose di be yeadze si Mawu. Didi sẽŋu ma trɔ Mose ƒe  agbenɔnɔ eye ewɔe be wòte ɖe Fofoa si le dziƒo ŋu kplikplikpli. (Mose IV, 12:6-8; Hebritɔwo 11:27) Ewɔ nublanui be Mose ŋɔlimetɔ ʋɛ aɖewo ko sie didi ma tɔgbe nɔ. Esi Mose yɔ Yehowa ƒe ŋkɔ na Farao la, Egipte-fia dadala la da gbe ɖo ɖa be: “Ameka nye Yehowa?” (Mose II, 5:2) Farao medi be yeasrɔ̃ nu geɖe tso Yehowa ŋu o. Ke boŋ egbe Israel ƒe Mawu la fewuɖuɖutɔe be mele vevie o alo be mele ɖeke me o. Nukpɔsusu ma bɔ ŋutɔ egbea. Mena amewo dzea si nyateƒenya vevitɔwo dometɔ ɖeka o—be Yehowae nye Aƒetɔ Dziɖulagã.

Yehowa Aƒetɔ Dziɖulagã

13, 14. (a) Nukatae woyɔ dzesideŋkɔ geɖe na Yehowa le Biblia me, eye wo dometɔ aɖewo ɖe? (Kpɔ aɖaka si nye “ Yehowa Ƒe Dzesideŋkɔ Aɖewo” si le axa 14.) (b) Nukatae wònye Yehowa ɖeka koliae dze woayɔ be “Aƒetɔ Dziɖulagã”?

13 Yehowa te ŋu trɔna ɖe nɔnɔmewo ŋu ale gbegbe be esɔ be woyɔ dzesideŋkɔ vovovowo nɛ le Ŋɔŋlɔawo me. Dzesideŋkɔ siawo mele tasɔsɔ me kple eƒe ŋkɔa ŋutɔŋutɔ o; ke boŋ wofia nu bubu geɖe mí tso nusi eƒe ŋkɔa tsi tre ɖi na ŋu. Le kpɔɖeŋu me, woyɔe be: “Yehowa Aƒetɔ Dziɖulagã.” (Samuel II, 7:22, NW) Dzesideŋkɔ gã ma si dze zi alafa geɖe le Biblia me na míenya Yehowa ƒe ɖoƒe. Eya ɖeka koe kpɔ mɔ anye xexeame katã Dziɖula. Kpɔ nusitae ɖa.

14 Yehowa ɖeka koliae nye Wɔla. Nyaɖeɖefia 4:11 gblɔ be: “Mía Aƒetɔ kple mía Mawu, wòe dze be, naxɔ ŋutikɔkɔe kple bubu kple ŋusẽ; elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.” Bubudeameŋunya mawo mate ŋu ayi na ame bubu aɖeke o. Yehowae na nusianu si le xexeame katã va li! Ðikeke aɖeke mele eŋu o be Yehowa dze na bubu, ŋusẽ, kple ŋutikɔkɔe si kpe ɖe Aƒetɔ Dziɖulagã kple nuwo katã Wɔla nyenye ŋu.

15. Nukatae woyɔa Yehowa be ‘Fia mavɔmavɔtɔ’?

15 Dzesideŋkɔ bubu si wozãna na Yehowa ɖeɖeko enye ‘Fia mavɔmavɔtɔ.’ (Timoteo I, 1:17; Nyaɖeɖefia 15:3) Ŋkɔ  sia gɔme ɖe? Asesẽ na míaƒe susu si seɖoƒe li na be wòase egɔme, gake Yehowa nye mavɔmavɔtɔ le mɔ eve nu—le ɣeyiɣi si va yi kple esi gbɔna me. Psalmo 90:2 gblɔ be: “Wòe nye Mawu tso mavɔ me yi mavɔ me.” Eyata gɔmedzedze mele Yehowa si o; enɔ anyi ɣeawokatãɣi. Esɔ be woyɔe be “Amesi Li tso Blema Ʋĩ Ke”—enɔ anyi ɣeyiɣi mavɔ hafi ame alo nu bubu ɖesiaɖe si le xexeame va dzɔ! (Daniel 7:9, 13, 22, NW) Ameka tɔe adzɔ be wòatɔ gbe eƒe dzedze be wòanye Aƒetɔ Dziɖulagã?

16, 17. (a) Nukatae míate ŋu akpɔ Yehowa o, eye nukata mele be wòawɔ nuku na mí o? (b) Gɔmesese ka nue Yehowa nye amesi li ŋutɔŋutɔ wu nusianu si míate ŋu akpɔ ahaka asi eŋu le?

16 Ke hã ame aɖewo tɔa gbe eƒe gomenɔamesia, abe alesi Farao wɔe ene. Kuxia ƒe akpa aɖee nye be amegbetɔ madeblibowo ɖoa ŋu ɖe nusiwo woƒe ŋku kpɔna ko ŋu akpa. Míate ŋu akpɔ Aƒetɔ Dziɖulagã la o. Gbɔgbɔmemee wònye, eye amegbetɔ mate ŋu akpɔe kple ŋku o. (Yohanes 4:24) Azɔ hã ne ɖe amegbetɔ ŋutilã kple ʋu atsi tre ɖe Yehowa Mawu ŋkume tẽ la, kunyae wòanye. Yehowa ŋutɔ gblɔ na Mose be: “Màte ŋu akpɔ nye ŋku me o, elabena ame aɖeke makpɔm aganɔ agbe o.”—Mose II, 33:20; Yohanes 1:18.

17 Mele be nya ma nawɔ nuku na mí o. Yehowa ƒe ŋutikɔkɔe ƒe akpa aɖe ko Mose kpɔ, eye edze ƒã be etsɔe to mawudɔla aɖe si wòdɔ dzi. Nukae do tso eme? Mose ƒe “mo de asi keklẽ me” hena ɣeyiɣi aɖe le ema megbe. Israel-viwo vɔ̃ be yewoakpɔ Mose gɔ̃ hã ƒe mo tẽ. (Mose II, 33:21-23; 34:5-7, 29, 30) Ekema ɖikeke mele eme o be amegbetɔ dzro aɖeke mate ŋu atsɔ ŋku akpɔ Aƒetɔ Dziɖulagã la ŋutɔ le eƒe ŋutikɔkɔe katã me o! Ðe nya sia fia be menye amesi li ŋutɔŋutɔ o esi mele abe nusi míate ŋu akpɔ ahaka asi eŋu ene o ta? Ao, nu geɖe li míekpɔna kple ŋku o evɔ míelɔ̃ ɖikekemanɔmee be woli—le kpɔɖeŋu me, yaƒoƒo, gbeɖiɖiŋusẽ, kple ame ƒe tamesusu.  Gakpe ɖe eŋu la, Yehowa li ɖaa, metrɔna ne ɣeyiɣi va le yiyim o, ne eganye ƒe biliɔn geɖe hã! Le gɔmesese ma nu la, enye amesi li ŋutɔŋutɔ wu nusianu si ŋu míate ŋu aka asii alo akpɔ, elabena xexemenu siwo míekpɔna ate ŋu ado xoxo ahanyunyɔ. (Mateo 6:19) Gake ɖe wòle be míabui be enye Nuwɔŋusẽ Gbãtɔ si womate ŋu anya gobi ale o, be enye ŋusẽ gbɔlo aɖe ko si menye ame oa? Mina míakpɔe ɖa.

Mawu si Si Amenyenye Le

18. Ŋutega kae wona Xezekiel kpɔ, eye nukawoe mo ene siwo le “nu gbagbe” siwo gogo Yehowa si la tsi tre ɖi na?

18 Togbɔ be míate ŋu akpɔ Mawu o hã la, nya lédzinamewo le Biblia me siwo akpe ɖe mía ŋu míakpɔ alesi dziƒo le. Xezekiel ƒe ta gbãtɔ nye kpɔɖeŋu ɖeka. Wona Xezekiel kpɔ Yehowa ƒe dziƒohabɔbɔ ƒe ŋutega, eye ekpɔe wònye dziƒotasiaɖam gã aɖe. Nusi wɔ dɔ ɖe ame dzi vevietɔe nye alesi woɖɔ gbɔgbɔ me nuwɔwɔ sẽŋu siwo ƒo xlã Yehowa. (Xezekiel 1:4-10) “Nu gbagbe” siawo do ƒome kplikplikpli kple Yehowa, eye woƒe dzedzeme ɖe nu vevi aɖe fia mí tso Mawu si subɔm míele ŋu. Mo ene le wo dometɔ ɖesiaɖe si—wonye nyitsu, dzata, hɔ̃, kple amegbetɔ ƒe mo. Edze ƒã be wotsi tre ɖi na Yehowa ƒe amenyenye ƒe nɔnɔme ɖedzesi eneawo.—Nyaɖeɖefia 4:6-8, 10.

19. Nɔnɔme kae (a) nyitsu ƒe mo (b) dzata ƒe mo (d) hɔ̃ ƒe mo (ɖ) amegbetɔ ƒe mo, tsi tre ɖi na?

19 Le Biblia me la, nyitsu tsia tre ɖi na ŋusẽ zi geɖe, eye esɔ nenema, elabena enye lã sẽŋu klitsu aɖe. Ke dzata ya tsia tre ɖi na dzɔdzɔenyenye zi geɖe, elabena ʋɔnu dzɔdzɔe dɔdrɔ̃ nyateƒetɔ bia dzinɔameƒo, eye wonya nɔnɔme sia le dzatawo ŋu. Wonya hɔ̃wo nyuie be woƒe ŋku ɖa, ale be wote ŋu kpɔa nu nyaŋuiwo gɔ̃ hã le adzɔge ʋĩ. Eyata hɔ̃ ƒe mo la tsi tre ɖi na Mawu ƒe nunya deŋgɔ la wòsɔ. Ke amegbetɔ ƒe mo ya ɖe? Nya lae nye be amegbetɔ  si wowɔ ɖe Mawu ƒe nɔnɔme nu koe te ŋu ɖea Mawu ƒe nɔnɔme si ƒo ɖesiaɖe ta fiana—si nye lɔlɔ̃. (Mose I, 1:26) Wotea gbe ɖe Yehowa ƒe amenyenye ƒe akpa siawo—ŋusẽ, dzɔdzɔenyenye, nunya, kple lɔlɔ̃—dzi enuenu le Ŋɔŋlɔawo me ale gbegbe be woate ŋu ayɔ wo be Mawu ƒe nɔnɔme veviwo.

20. Ðe wòle be míatsi dzi be ɖewohĩ Yehowa ƒe amenyenye trɔa, eye nukatae nèɖo eŋu nenema?

20 Ðe wòle be míatsi dzi be ɖewohĩ tso esime woɖɔ Mawu le Biblia me ƒe akpe geɖe enye si va yi la, anye be etrɔa? Ao, Mawu ƒe amenyenye metrɔna o. Egblɔ na mí be: “Nye Yehowa nyemetrɔ o.” (Maleaxi 3:6) Le esi teƒe be Yehowa nanɔ anyi sẽ ko nane naʋãe wòatrɔ la, eɖo kpe edzi to alesi wòwɔa nu ɖe nɔnɔme ɖesiaɖe nui be yenye Vifofo nyui. Eɖea eƒe nɔnɔme siwo sɔ ɖe ɣeyiɣia nu wu fiana. Le nɔnɔme eneawo dome la, esi ƒo wo tae nye lɔlɔ̃. Edzena le nusianu si Mawu wɔna me. Ewɔa eƒe ŋusẽ, dzɔdzɔenyenye, kple nunya ŋudɔ le lɔlɔ̃ me. Le nyateƒe me la, Biblia gblɔ nya tɔxɛ aɖe le Mawu kple nɔnɔme sia ŋu. Egblɔ be “Mawu enye lɔlɔ̃.” (Yohanes I, 4:8) De dzesii be megblɔ be lɔlɔ̃ le Mawu si alo be Mawu lɔ̃a ame o. Ke boŋ  ebe Mawue nye lɔlɔ̃. Lɔlɔ̃, si nye eƒe amenyenye ye ʋãnɛ le nusianu si wòwɔna me.

‘Kpɔ Ða, Mía Mawu Enye Si!’

21. Aleke míase le mía ɖokui me ne míeva le si dzem Yehowa ƒe nɔnɔmewo ɖe edzi?

21 Èkpɔ eteƒe be ɖevi sue aɖe fia asi fofoa na exɔlɔ̃wo eye wòtsɔ dzidzɔ kple dada gblɔe faa be, “Fofonyee ma” kpɔa? Mawu subɔlawo tɔ dzɔ le go sia go me be woase le wo ɖokui me nenema ɖe Yehowa ŋu. Biblia gblɔ ɣeyiɣi aɖe ɖi si me nuteƒewɔlawo agblɔ le be: ‘Kpɔ ɖa, mía Mawu enye si.’ (Yesaya 25:8, 9) Zi geɖe alesi nèva le Yehowa ƒe nɔnɔmewo gɔme sem ɖe edzii la, zi nenemae nàse le ɖokuiwò me be Fofo nyuitɔ kekeake si ɖeke mesɔ kplii o le ye si.

22, 23. Aleke Biblia ɖe míaƒe Dziƒofofo la fiae, eye aleke míewɔ nya be edi be míate ɖe ye ŋu?

22 Fofo sia menye vivimadoɖeameŋula, ame saɖeaga, alo amesi megogoa ame o—eto vovo na nusiwo subɔsubɔ ƒe zazɛ̃nyahela kple xexemenunyafiala aɖewo fiana. Asesẽ na mí be míate ɖe Mawu vivimadoɖeameŋula ŋu, eye Biblia meɖe míaƒe Dziƒofofoa fia nenema o. Ke boŋ eyɔe be ‘Mawu dzidzɔtɔ.’ (Timoteo I, 1:11) Seselelãme sẽŋu kple esi me ɖetsɔleme le siaa ye le esi. ‘Eɖua dzi nɛ’ ne eƒe nuwɔwɔ nyanuwo da mɔfiame siwo wòna wo be eme nanyo na wo la dzi. (Mose I, 6:6; Psalmo 78:41) Gake ne míedze nunya hewɔ nu ɖe eƒe Nya nu pɛpɛpɛ la, ‘edoa dzidzɔ na eƒe dzi.’—Lododowo 27:11.

23 Mía Fofoa di be míate ɖe ye ŋu. Wode dzi ƒo na mí le eƒe Nya la me be ‘míatsa asi adii be míakpɔe hã, eye le nyateƒe me la, mele adzɔge tso mía dome amesiame gbɔ kura o.’ (Dɔwɔwɔwo 17:27) Gake aleke wòanya wɔe be amegbetɔ dzrowo nate ɖe xexeame katã ƒe Aƒetɔ Dziɖulagã la ŋu?