Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Te Ðe Yehowa Ŋu

 TA 9

“Kristo, Si Nye Mawu Ƒe Ŋusẽ”

“Kristo, Si Nye Mawu Ƒe Ŋusẽ”

1-3. (a) Ŋɔdzinu kae dzɔ ɖe nusrɔ̃lawo dzi le Galilea-ƒua dzi, eye nukae Yesu wɔ? (b) Nukatae wòsɔ be woyɔ Yesu be ‘Kristo, Mawu ƒe ŋusẽ’?

ŊƆDZI lé nusrɔ̃lawo. Wonɔ Galilea-ƒua tsom kasia ahom sesẽ aɖe tu va kpe wo. Ðikeke mele eme o be ahom tu kpe wo le ƒua dzi kpɔ—elabena ŋutsu siawo dometɔ aɖewo nye tɔƒodela bibiwo. * (Mateo 4:18, 19) Gake esia ya nye “ahom sesẽ aɖe” si nyama ƒua enumake wòdze agbo. Ŋutsuawo dze agbagba kutrikukutɔe be yewoaku ʋua, gake ahom la nu sẽ wu wo. Ƒutsotsoeawo nɔ “ŋeŋem ɖe ʋu la me,” eye tsia nɔ kɔkɔm ɖe eme wònɔ ʋua yɔm. Togbɔ be wotɔtɔ ale gbegbe hã la, Yesu ya yi alɔ̃ me ʋĩ le ʋua gɔme esi nufiafia amehawo le ŋkekea me te ɖeɖi eŋu ta. Nusrɔ̃laawo kpɔ be yewoƒe agbe ɖo afɔku me, eye wonyɔe heɖe kuku nɛ be: “Aƒetɔ, ɖe mí, míele tsɔtsrɔ̃m!”—Marko 4:35-38; Mateo 8:23-25.

2 Yesu mevɔ̃ o. Etsɔ kakaɖedzi blibo blu ɖe yaƒoƒoa kple atsiaƒua ta be: “Zi ɖoɖoe, dze [akɔ] anyi!” Enumake la, yaƒoƒoa kple atsiaƒua se eƒe gbe—ahom la dzudzɔ tutu, atsiaƒua dze akɔ anyi, eye “ɖoɖoe gã aɖe zi.” Vɔvɔ̃ ƒomevi aɖe ɖo nusrɔ̃lawo azɔ. Wodo dalĩ na wo nɔewo bena: “Ameka gɔ̃e nye esia?” Ẽ, ameka gɔ̃e ate ŋu ablu ɖe ya kple atsiaƒu ta abe alesi wonyrana ɖe ɖevi masetonu dzi ene?—Marko 4:39-41; Mateo 8:26, 27.

3 Gake menye amegbetɔ dzro koe Yesu nye o. Yehowa zã eƒe ŋusẽ tsɔ kpe ɖe eŋu eye wògaɖee fia to eyama dzi hã le mɔ wɔnukuwo nu. Esɔ be gbɔgbɔ ʋã apostolo Paulo wòyɔe  be “Kristo, si nye Mawu ƒe ŋusẽ.” (Korintotɔwo I, 1:24) Mɔ kawo nue Mawu ƒe ŋusẽ dze le Yesu me le? Eye dɔ kae alesi Yesu zãa ŋusẽe awɔ ɖe míaƒe agbenɔnɔ dzi?

Mawu ƒe Tenuvi la ƒe Ŋusẽ

4, 5. (a) Dɔwɔŋusẽ kple aƒetɔnyenye ŋusẽ ka gbegbee Yehowa na eƒe Tenuvi la? (b) Nusi hiã kae wona Vi sia bene wòakpɔ egbɔ be Fofoa ƒe tameɖoɖo ku ɖe nuwo wɔwɔ ŋu nava eme?

4 Bu ŋusẽ si nɔ Yesu si hafi wòva zu amegbetɔ ŋu kpɔ. Yehowa zã eya ŋutɔ ƒe “ŋusẽ mavɔmavɔ” la esime wòwɔ eƒe Tenuvi la, amesi wova yɔ be Yesu Kristo. (Romatɔwo 1:20; Kolosetɔwo 1:15) Le ema megbe la, Yehowa tsɔ dɔwɔŋusẽ triakɔ kple aƒetɔnyenye ƒe ŋusẽ gã aɖe na Via, eye wòde dɔ asi nɛ be wòatsɔ akpɔ egbɔe be Yeƒe tameɖoɖo ku ɖe nuwo wɔwɔ ŋu nava eme. Biblia gblɔ le Vi la ŋu be: “Wowɔ nuwo katã to eyama dzi, eye eya manɔmee la womewɔa naneke, si wowɔna o.”—Yohanes 1:3.

5 Alesi gbegbe dɔ si wode asi nɛ la loloe ƒe akpa sue aɖe ŋutɔ koe míate ŋu akpɔ le susu me. Wò ya bu ŋusẽ si gbegbe hiã bene woawɔ mawudɔla sẽŋu miliɔn geɖe, dziƒonutome si ŋku kpɔna kple eme ɣletivihatsotso biliɔn nanewo, kpakple anyigba kple edzi nu gbagbe hamehame gbogboawo ŋu kpɔ. Bene Tenuvi la nate ŋu awɔ dɔ siawo la, wona ŋusẽ si tri akɔ wu ɖesiaɖe le xexeame lae—eyae nye Mawu ƒe gbɔgbɔ kɔkɔe la. Vi sia kpɔ dzidzɔ geɖe ŋutɔ le Dɔnunɔla, amesi Yehowa zã le nu bubuwo katã wɔwɔ me, la nyenye me.—Lododowo 8:22-31.

6. Le Yesu ƒe ku le anyigba dzi kple eƒe tsitretsitsi megbe la, dɔwɔŋusẽ kple aƒetɔnyenye ŋusẽ kawoe wonae?

6 Ðe woagate ŋu ana dɔwɔŋusẽ kple aƒetɔnyenye ŋusẽ siwo lolo wu ema Tenuvi la? Le Yesu ƒe ku le anyigba dzi kple eƒe tsitretsitsi megbe la, egblɔ be: “Wotsɔ ŋusẽ katã, si le dziƒo kple anyigba dzi la, de asi nam.” (Mateo 28:18) Ẽ, wotsɔ ŋutete kple gomenɔamesi na Yesu be wòazã ŋusẽ le xexeame katã. Esi wònye “Fiawo dzi Fia kple aƒetɔwo dzi Aƒetɔ” ta la,  wona ŋusẽe be ‘wòaɖe amegãnyenye kple ŋusẽ kple dziɖuɖu’ siwo katã tsia tre ɖe Fofoa ƒe dziɖuɖu ŋu—esiwo ŋku kpɔna kple esiwo ŋku mekpɔna o siaa—ɖa. (Nyaɖeɖefia 19:16; Korintotɔwo I, 15:24-26) ‘Naneke mesusɔ ɖi, si Mawu metsɔ de Yesu te o’—efia be Yehowa ŋutɔ koe mele eme o.—Hebritɔwo 2:8; Korintotɔwo I, 15:27.

7. Nukatae míate ŋu aka ɖe edzi be Yesu mazã ŋusẽ si Yehowa nae la le mɔ gbegblẽ nu gbeɖe o?

7 Ðe wòle be míatsi dzi be ɖewohĩ Yesu azã eƒe ŋusẽa madzemadzea? Kura o! Yesu lɔ̃ Fofoa ŋutɔŋutɔ eye mawɔ naneke gbeɖe si madze eŋu o. (Yohanes 8:29; 14:31) Yesu nya nyuie be Yehowa mezãa eƒe ŋusẽ si ƒo ɖesiaɖe ta ɖe mɔ gbegblẽ nu gbeɖe o. Yesu ŋutɔ kpɔ alesi Yehowa dia mɔnukpɔkpɔwo be “yeaɖe yeƒe ŋusẽ afia ɖe amesiwo ku ɖe eŋu kple woƒe dzi blibo la ta.” (Kronika II, 16:9, NW) Le nyateƒe me la, alesi Yesu Fofo lɔ̃ ameƒomeae la, nenema ke Yesu hã lɔ̃ ameƒomeae, eyata míate ŋu aka ɖe edzi be Yesu azã eƒe ŋusẽ ɣesiaɣi atsɔ awɔ nyui na amewo. (Yohanes 13:1) Yesu ɖo kpɔɖeŋu si ŋu kpɔtsɔtsɔ mele o ɖi le go sia me. Mina míade ŋugble le ŋusẽ si nɔ esi esime wònɔ anyigba dzi kple alesi eƒe dzi ʋãe wòzãe ŋu kpɔ.

“Ŋusẽtɔ le . . . Nyagbɔgblɔ Me”

8. Le amisisi na Yesu megbe la, nukae wona ŋusẽe be wòawɔ, eye aleke wòzã eƒe ŋusẽ lae?

8 Edze ƒã be Yesu mewɔ nukunu aɖeke esime wònye ŋutsuvi dzaa si nɔ tsitsim le Nazaret o. Gake nuwo trɔ esi wonyrɔe ɖe tsi me le ƒe 29 M.Ŋ. me, esime wòxɔ abe ƒe 30 ene. (Luka 3:21-23) Biblia gblɔ na mí be: “Mawu si ami nɛ kple gbɔgbɔ kɔkɔe kpakple ŋusẽ, eye wòɖi tsa le anyigba la dzi hele nu nyui wɔm eye wòle gbe dam le amesiwo katã Abosam te ɖe anyi la ŋu.” (Dɔwɔwɔwo 10:38, NW) Le “nu nyui wɔm”—ɖe nyagbɔgblɔ sia mefia be Yesu zã eƒe ŋusẽ ɖe mɔ nyuitɔ nu oa? Esi wosi ami nɛ vɔ la, eva zu “nyagblɔɖila ŋusẽtɔ le nuwɔwɔ kple nyagbɔgblɔ me.”—Luka 24:19.

9-11. (a) Afikae Yesu fia nu le zi geɖe, eye kuxi kae dze ŋgɔe? (b) Nukatae alesi Yesu fiaa nui la wɔ nuku na amehawo?

 9 Aleke Yesu nye ŋusẽtɔ le nyagbɔgblɔ mee? Gaglãgbe ye wòfia nu le zi geɖe—le tawo to kple towo dzi, le ablɔwo kple asiwo me. (Marko 6:53-56; Luka 5:1-3; 13:26) Eƒe nyaselawo ate ŋu atrɔ adzo faa ne eƒe nyawo melé dzi na wo o. Ɣemaɣi si wometo agbalẽtata vɛ haɖe o la, ele be nyasela siwo tsɔ ɖe le eƒe nyawo me nalé nyaawo ɖe woƒe susu kple dzi me. Eyata ele be Yesu ƒe nufiafia nalé dzi na ame le go sia go me, egɔme nanya se keŋ, eye woate ŋu aɖo ŋku wo dzi bɔbɔe. Gake kuxi sia medo kplamatsɛ Yesu o. Le kpɔɖeŋu me, bu eƒe Todzimawunya la ŋu kpɔ.

10 Gbeɖeka ŋdi le ƒe 31 M.Ŋ. ƒe gɔmedzedze lɔƒo la, ameha aɖe va ƒo ƒu ɖe togbɛ aɖe dzi le Galilea-ƒua gbɔ. Wo dometɔ aɖewo tso Yudea kple Yerusalem, si gbɔ didi anye kilometa 100 va ɖo 110. Wo dometɔ bubuwo tso Tiro kple Zidon siwo le dziehe gome la ƒe ƒuta nutowo me. Dɔnɔ geɖe te ɖe Yesu ŋu be yewoaka asi eŋu, eye wòda gbe le wo ŋu. Esi ame aɖeke meganɔ wo dome si nɔ dɔ sesẽ aɖeke lém o la, ete nufiafia wo. (Luka 6:17-19) Ɣeyiɣi aɖe megbe esi wòwu eƒe nyawo nu la, nya siwo ameawo se na woƒe nu ku ale gbegbe. Nukatae?

11 Le ƒe aɖewo megbe la, ame aɖe si ɖo to se mawunya ma ŋlɔ bena: “Kuvia ɖo amehawo le eƒe nufiafia la ŋuti; elabena ele nu fiam wo abe amesi si ŋusẽ le ene.” (Mateo 7:28, 29) Yesu ƒo nu kple ŋusẽ; eye wote ŋu see le wo ɖokui me. Eƒo nu ɖe Mawu nu eye Mawu ƒe Nya la nye ŋusẽ si wòtsɔ ɖo kpe eƒe nufiafia dzii. (Yohanes 7:16) Yesu ƒe nyawo me kɔ, eƒe nuxlɔ̃amewo wɔa dɔ ɖe ame dzi, eye womate ŋu ake ɖi le eƒe numeɖeɖewo ŋu o. Eƒe nyawo ɖoa nusi ŋu wòle nu ƒom le ƒe ke gbɔ eye wòdea dzi gbɔ na nyaselawo. Efia alesi woawɔ ake ɖe dzidzɔkpɔkpɔ ŋu, alesi woado gbe ɖa, alesi woadi Mawu ƒe Fiaɖuƒea, kple alesi woawɔ ɖoɖo ɖe etsɔme si li ke ŋu la wo. (Mateo 5:3–7:27) Eƒe nyawo ʋã dzi na amesiwo nyateƒe kple  dzɔdzɔenyenye ƒe dɔ nɔ wuwum. Amesiawo lɔ̃ faa be ‘yewoagbe nu le yewo ɖokui gbɔ’ ahagblẽ nusianu ɖi ava dze eyome. (Mateo 16:24; Luka 5:10, 11) Ŋusẽ si le Yesu ƒe nyawo ŋu la ŋuti ɖaseɖiɖi nyui kae nye si!

‘Ŋusẽtɔ le Nuwɔwɔ Me’

12, 13. Gɔmesese ka nue Yesu nye ‘ŋusẽtɔ le nuwɔwɔ me’ le, eye nukunu hamehame kawoe wòwɔ?

12 Yesu nye ‘ŋusẽtɔ le nuwɔwɔ me’ hã. (Luka 24:19) Nyanyuigbalẽawo ka nya ta tso nukunu siwo wòwɔ la dometɔ siwo wu 30 koŋ ŋu—siwo katã wòwɔ le ‘Yehowa ƒe ŋusẽ me.’ * (Luka 5:17) Yesu ƒe nukunuawo kpɔ ŋusẽ ɖe ame akpe geɖe ƒe agbe dzi. Nukunuawo dometɔ eve pɛ ko—esiwo me wòna nuɖuɖu ŋutsu 5,000 kple emegbe ŋutsu 4,000, “nyɔnuwo kple ɖeviwo mele eme o”—lɔ ameha siwo ɖewohĩ ade ame 20,000 ne wotsɔ wo katã ƒo ƒui la ɖe eme!—Mateo 14:13-21; 15:32-38.

“Wokpɔ Yesu wòle ƒua dzi zɔm”

13 Yesu wɔ nukunu hamehamewo. Ekpɔ ŋusẽ ɖe gbɔgbɔ vɔ̃wo dzi, henya wo do goe bɔbɔe. (Luka 9:37-43) Ekpɔ ŋusẽ ɖe dzɔdzɔmenuwo hã dzi, hetrɔ tsi wòzu wein. (Yohanes 2:1-11) Ezɔ Galilea-ƒu si dzi ya ƒona sesĩe le hã dzi, wòwɔ nuku na eƒe nusrɔ̃lawo ŋutɔ. (Yohanes 6:18, 19) Ekpɔ ŋusẽ ɖe dɔléle dzi, eye wòda nuwɔamewo, dɔlémafɔewo, kple dɔ vɔ̃ɖi wuamewo hã. (Marko 3:1-5; Yohanes 4:46-54) Eda dɔ siawo le mɔ vovovowo nu. Yesu nɔ adzɔge da gbe le ame aɖewo ŋu, eye wòka asi ame bubuwo ya ŋu ŋutɔŋutɔ. (Mateo 8:2, 3, 5-13) Eda dɔ na ame aɖewo enumake, eye wòdae na ame bubuwo vivivi.—Marko 8:22-25; Luka 8:43, 44.

14. Nɔnɔme kawo mee Yesu ɖee fia le be yekpɔ ŋusẽ axɔ ame tso ku me?

14 Eɖe dzesi ŋutɔ be ŋusẽ le Yesu si be wòaxɔ ame tso ku me.  Le nudzɔdzɔ etɔ̃ siwo woŋlɔ ɖi me la, efɔ ame kukuwo ɖe tsitre, esime wògbɔ agbe nyɔnuvi ƒe 12 vi aɖe na edzilawo, egbɔ agbe tenuvi aɖe na dadaa si nye ahosi, eye wògbɔ agbe nɔviŋutsu aɖe si wolɔ̃ vevie na nɔvianyɔnuwo. (Luka 7:11-15; 8:49-56; Yohanes 11:38-44) Naneke mesẽ nɛ akpa o. Efɔ nyɔnuvi ƒe 12 vi la tso kuba dzi esi wòku eteƒe medidi o. Efɔ ahosia ƒe viŋutsuvia esime wònɔ nusi dzi wokɔe ɖo yina ɖiɖi ge la dzi, eye ɖikeke mele eme o be gbesigbe wòku lae wòfɔe. Eye efɔ Lazaro tso kpeto si me woɖii ɖo me le eƒe ku ŋkeke ene megbe.

Ŋusẽ Zazã Ðokuitɔmadimaditɔe, Ŋuɖɔɖɔɖotɔe, Kple Ameŋububutɔe

15, 16. Kpeɖodzi kae li si fia be Yesu zã eƒe ŋusẽ ɖokuitɔmadimadii?

15 Àte ŋu akpɔ alesi woate ŋu azã ŋusẽ si wona Yesu la le mɔ gbegblẽ nu ne ɖe wòanye dziɖula madeblibo aɖe sie wotsɔe de la le susu mea? Gake nuvɔ̃ menɔ Yesu ya ŋu o. (Petro I, 2:22) Egbe be yemalɔ̃ be ɖokuitɔdidi, ɖoƒegãdidi, kple ŋukeklẽ si ʋãa amegbetɔ madeblibowo wozãa woƒe ŋusẽ tsɔ tafaa ame bubuwo la nage ɖe ye me o.

16 Yesu zã eƒe ŋusẽ ɖokuitɔmadimaditɔe, mezãe na eya ŋutɔ ƒe viɖe gbeɖe o. Esi dɔ wui la, egbe kpewo tɔtrɔ wòazu abolo na eɖokui. (Mateo 4:1-4) Nu ʋɛ siwo nɔ esi la ɖo kpe edzi be mezã eƒe ŋusẽ tsɔ kpɔ ŋutilãmenuwoe o. (Mateo 8:20) Kpeɖodzi bubuwo gali siwo fia be ɖokuitɔmadimadie ʋãe wòwɔ eƒe ŋusẽdɔwo. Etsɔa nanewo saa vɔe le nukunuwo wɔwɔ me. Ne eda gbe le dɔnɔwo ŋu la, ŋusẽ dona le eme. Enyana ne ŋusẽ do le eme alea, nenye be ame ɖeka ko ŋue wòda gbe le gɔ̃ hã. (Marko 5:25-34) Ke hã eɖe mɔ amehawo ka asi eŋu, eye wohaya. (Luka 6:19) Ðokuitɔmadimadi ka gbegbee nye si!

17. Aleke Yesu ɖee fia be yeɖɔa ŋu ɖo le ŋusẽ zazã mee?

17 Yesu ɖɔa ŋu ɖo le ŋusẽ zazã me. Medzɔ kpɔ gbeɖe be ewɔ ŋusẽdɔwo bene amewo nakpɔ dzro ko alo wòazu nukpɔkpɔ  hoo ta ko o. (Mateo 4:5-7) Melɔ̃ be yeawɔ dzesiwo bene yeana Herodes nakpɔ nusiwo dim wòle be yeanya ɖe susu gbegblẽwo ta la o. (Luka 23:8, 9) Le esi teƒe be Yesu nawɔ nu amewo nanya ŋusẽ si gbegbe le esi la, egblɔnɛ na amesiwo wòda dɔ na be woagagblɔe na ame aɖeke o. (Marko 5:43; 7:36) Medi be amewo nanɔ te ɖe nyatakaka siwo ŋu woɖe ami ɖo gblɔ na wo dzi aƒo nya ta le ye ŋu o.—Mateo 12:15-19.

18-20. (a) Nukae kpɔ ŋusẽ ɖe alesi Yesu zãa eƒe ŋusẽe dzi? (b) Aleke nèse le ɖokuiwò me le mɔ si dzi Yesu to da gbe le tokunɔ aɖe ŋui la ŋu?

18 Yesu, ŋusẽtɔ sia, to vovo kura na dziɖula siwo zãa woƒe ŋusẽ dzimesesẽtɔe amewo ƒe nuhiahiãwo kple fukpekpewo ŋu mabumabui. Yesu tsɔ ɖe le eme na amewo. Fukpelawo kpɔkpɔ ɖeɖe dzaa wɔa dɔ ɖe edzi ale gbegbe be wòdina vevie be yeana gbɔdzɔe wo tso woƒe fukpekpewo me. (Mateo 14:14) Ebua woƒe seselelãme kple nuhiahiãwo ŋu, eye eƒe ɖetsɔtsɔ le amewo me dɔmenyotɔe alea kpɔ ŋusẽ ɖe alesi wòzã eƒe ŋusẽe dzi. Míate ŋu akpɔ esia ƒe kpɔɖeŋu wɔdɔɖeamedzi aɖe le Marko 7:31-37.

19 Le nudzɔdzɔ sia me la, ameha gbogbo aɖe va Yesu gbɔ eye wokplɔ ame geɖe siwo ƒe lãme gblẽ vɛ wòda gbe le wo katã ŋu. (Mateo 15:29, 30) Gake Yesu tia ŋutsu aɖe le wo dome heɖe ameŋububu fiae etɔxɛe. Ŋutsu sia nye tokunɔ eye mete ŋu ƒoa nu nyuie hã o. Anɔ eme be Yesu kpɔ alesi gbegbe ŋutsu sia tsi dzi alo alesi gbegbe ŋu nɔ ekpemee. Yesu bu ŋutsua ƒe nɔnɔmea ŋu eye wòɖee ɖe aga—tso amehawo gbɔ—yi afisi womakpɔe o. Eyome Yesu wɔ dzesi aɖewo tsɔ ɖe nusi wɔ ge wògbɔna la fia ŋutsua. “Etsɔ eƒe asibidewo ƒo ɖe eƒe towo me, eye esi wòɖe ta la, eka asi eƒe aɖe ŋu.” *  (Marko 7:33, NW) Le ema megbe la, Yesu fɔ ta dzi kpɔ dziƒo eye wòɖe hũ si fia gbedodoɖa. Nuwɔna siawo afia ŋutsua be, ‘Nusi wɔ ge megbɔna na wò la tso Mawu ƒe ŋusẽ me.’ Mlɔeba la, Yesu gblɔ be: ‘Ʋu!’ (Marko 7:34) Enumake ŋutsua ƒe to ʋu, eye wòte ŋu ƒo nu nyuie.

20 Aleke gbegbe wòwɔa dɔ ɖe ame dzii enye si be ne Yesu le ŋusẽ si Mawu nae zãm tsɔ le dɔ dam na amesiwo le fu kpem hã la, ebua woƒe seselelãme ŋu dɔmenyotɔe! Ðe esia mede dzi ƒo na mí be míanya be Yehowa tsɔ Mesia Fiaɖuƒea de asi na Dziɖula sia si tsɔa ɖe le eme na ame hebua ame ŋu alea gbegbe oa?

Nusiwo Gbɔna ƒe Dzesi

21, 22. (a) Nuka ƒe dzesie Yesu ƒe nukunuwo nye? (b) Le esi Yesu kpɔ ŋusẽ ɖe dzɔdzɔmeŋusẽwo dzi ta la, nukae míate ŋu akpɔ mɔ na le eƒe Fiaɖuƒedziɖuɖua te?

21 Ŋusẽdɔ siwo Yesu wɔ le anyigba dzi la nye yayra siwo gawɔ nuku wu kura siwo gbɔna le eƒe fiaɖuɖua te la ƒe vɔvɔli ko. Le Mawu ƒe xexe yeyea me la, Yesu agawɔ nukunuwo ake—gake azɔ ya awɔe le anyigba bliboa dzi! Bu nu dodzidzɔname siwo le ŋgɔ gbɔna la dometɔ aɖewo ŋu kpɔ.

22 Yesu aɖɔ anyigba dzi nu gbagbewo kple wo nɔƒewo ɖo be nuwo nada asɔ pɛpɛpɛ. Ðo ŋku edzi be eto ahomya nu tsitsi me ɖee fia be yekpɔ ŋusẽ ɖe dzɔdzɔmeŋusẽwo dzi. Ekema kakaɖedzi li be le Kristo ƒe Fiaɖuƒedziɖuɖua te la, magahiã be ameƒomea navɔ̃ be ya sesẽ ʋuduʋuduwo, anyigbaʋuʋuwo, dzotowo, alo dzɔdzɔmefɔku bubu aɖeke agblẽ nu le yewo ŋu o. Esi Yesue nye Dɔnunɔla si Yehowa zã le anyigba la kple edzi nu gbagbewo katã wɔwɔ me ta la, ese anyigba la ƒe wɔwɔme gɔme bliboe. Enya alesi wòatrɔ asi le anyigbadzinuwo ŋu wòasɔ nyuie. Le eƒe dziɖuɖu te la, woatrɔ anyigba blibo sia katã wòazu Paradiso.—Luka 23:43.

23. Aleke Yesu si nye Fia akpɔ ameƒomea ƒe nuhiahiãwo gbɔe?

23 Ke ameƒomea ƒe nuhiahiãwo ya ɖe? Alesi Yesu te ŋu zã  nuɖuɖu sue aɖe ko tsɔ nyi ame akpe geɖe woɖu ɖi ƒo nyuie la na kakaɖedzi mí be dɔwuame manɔ eƒe dziɖuɖua te o. Nyateƒee, ne nuɖuɖu bɔ, eye womae nyuie la, dɔwuame nu ayi tegbee. (Psalmo 72:16) Ŋusẽ si wòkpɔ ɖe lãmegbegblẽ kple dɔlélewo dzi fia be ada dɔ na dɔnɔwo, ŋkuagbãtɔwo, tokunɔwo, amesiwo ƒe ŋutinuwo lã, nuwɔametɔwo, kple xɔdrɔ̃wo—ada dɔ na wo bliboe eye dɔléleawo nu ayi tegbee. (Yesaya 33:24; 35:5, 6) Ŋutete si le esi be wòafɔ ame kukuwo ɖe tsitre la nye kpeɖodzi be Dziƒofia sia kpɔ ŋusẽ be wòafɔ ame miliɔn gbogbo manyaxlẽ siwo wònye dzidzɔ na Fofoa be yeaɖo ŋku wo dzi la ɖe tsitre.—Yohanes 5:28, 29.

24. Ne míede ŋugble le Yesu ƒe ŋusẽ ŋu la, nukae wòle be wòanɔ susu me na mí, eye nukatae?

24 Esi míele ŋugble dem le Yesu ƒe ŋusẽ ŋu la, mina wòanɔ susu me na mí be Vi la srɔ̃a Fofoa bliboe. (Yohanes 14:9) Alesi Yesu zã eƒe ŋusẽe na míekpɔ alesi Yehowa zãa eƒe ŋusẽe la nyuie. Le kpɔɖeŋu me, bu ameŋububumɔ si nu Yesu da gbe le anyidzela aɖe ŋu la ŋu kpɔ. Yesu ƒe dɔme trɔ ɖe eŋu wòka asi ŋutsua ŋu hegblɔ be: “Melɔ̃.” (Marko 1:40-42) To nudzɔdzɔwo abe esia ene dzi la, Yehowa le egblɔm be, ‘Aleae mezãa nye ŋusẽe nye si!’ Ðe meʋã wò be nàkafu mía Mawu ŋusẽkatãtɔ la ahada akpe be ezãa eƒe ŋusẽ lɔlɔ̃tɔe alea oa?

^ mm. 1 Ebɔ be ahomwo te ŋu tuna le Galilea-ƒua dzi le vome. Le alesi ƒua le anyime (anɔ meta 200 wu atsiaƒu gã la ƒe sɔsɔme) ta la, yame xɔa dzo le afima wu nutoa ƒe akpa bubuwo, eye esia te ŋu naa yame ƒe nɔnɔme trɔna kpata. Ya sesẽwo ƒona tsoa Xermon-to si le dziehe gome dzi vaa Yordan-balia me. Ne nɔnɔmewo dze akɔ anyi vie la, eteƒe medidina hafi wògadzea agbo o.

^ mm. 12 Gakpe ɖe eŋu la, ɣeaɖewoɣi Nyanyuigbalẽawo ƒoa nukunu geɖe nu ƒu yɔna abe ɖeka ene. Le kpɔɖeŋu me, ɣeaɖeɣi la, “du blibo katã” va egbɔ, eye wòda gbe le dɔnɔ ‘geɖe’ ŋu.—Marko 1:32-34.

^ mm. 19 Taɖeɖe nye nuwɔna alo dzesi si fia be wole gbe dam, esi nye nusi dzi Yudatɔwo kple Trɔ̃subɔdukɔwo me tɔwo siaa da asi ɖo, eye nuŋlɔɖiwo le rabiwo ƒe agbalẽwo me si fia be wozãa ta le dɔdada me. Anye be ɖeko Yesu ɖe ta be yeana ŋutsua nanya be dɔe yedi be yeada nɛ. Nuka ke wòɖanye o, menye ɖe Yesu nɔ eƒe ta zãm abe ɖe dɔdaŋusẽ aɖe le eme ene o.