Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Te Ðe Yehowa Ŋu

 TA 7

Ametakpɔŋusẽ—‘Mawu Nye Sitsoƒe na Mí’

Ametakpɔŋusẽ—‘Mawu Nye Sitsoƒe na Mí’

1, 2. Afɔku ka mee Israel-viwo ɖo esi woɖo Sinai nutoa me le ƒe 1513 D.M.Ŋ. me, eye dzideƒonya kae Yehowa gblɔ na wo?

ISRAEL-VIWO ɖo afɔku me esime woɖo Sinai nutoa me le ƒe 1513 D.M.Ŋ. me ƒe gɔmedzedze lɔƒo. Mɔzɔzɔ dziŋɔ aɖe nɔ wo ŋgɔ, enye mɔzɔzɔ to “afisi da vɔ̃wo kple dziɖegbewo le.” (Mose V, 8:15) Ŋɔdzi nɔ anyi hã be dukɔ siwo nye woƒe futɔwo ava dze wo dzi. Yehowae kplɔ eƒe amewo wova ɖo nɔnɔme sia me. Abe woƒe Mawu ene la, ɖe wòate ŋu akpɔ wo ta?

2 Nya siwo Yehowa gblɔ la de dzi ƒo na wo ŋutɔ, be: “Mia ŋutɔwo miekpɔ nusi mewɔ Egiptetɔwo, kple alesi metsɔ mi ɖe hɔ̃ ƒe aʋalawo dzi, eye mekplɔ mi va gbɔnyee.” (Mose II, 19:4) Yehowa ɖo ŋku edzi na eƒe amewo be yee ɖe wo tso Egiptetɔwo si me, eye yezã hɔ̃wo, le kpɔɖeŋunyagbɔgblɔ nu, be wokɔ wo yi dedienɔƒee. Gake susu bubu aɖewo li siwo ta wòsɔ be wotsɔ “hɔ̃ ƒe aʋalawo” wɔ Mawu ƒe ametakpɔkpɔ ƒe kpɔɖeŋui.

3. Nukatae wòsɔ be wozã “hɔ̃ ƒe aʋalawo” tsɔ wɔ Mawu ƒe ametakpɔkpɔ ƒe kpɔɖeŋui?

3 Menye agbasasa le yame koe hɔ̃ zãa eƒe aʋala keke sesẽawo na o. Ne xexeame xɔ dzo la, hɔ̃ vinɔ kekea eƒe aʋalawo—siwo te ŋu didina meta 2 kple edzivɔ—wòzua abe xexi ene, ale wòkpɔa via fẽwo ta tso ŋdɔkutsu dzatsɛ la nu. Ɣebubuɣiwo la, etsɔa eƒe aʋalawo tsyɔa viawo dzi wòxea vuvɔ na wo. Abe alesi hɔ̃ kpɔa viawo tae ene la, nenemae Yehowa kpɔ Israel-dukɔ yeye si meli ke haɖe o la tae. Fifia esi eƒe amewo va ɖo gbedadaƒo la, woakpɔtɔ abe ɖe eƒe kpɔɖeŋuʋala sesẽawo ƒe vɔvɔli te nenye be woyi edzi wɔ nuteƒe ko. (Mose V, 32:9-11; Psalmo 36:8) Gake ɖe wòasɔ be mí amesiwo li egbea hã míakpɔ mɔ be Mawu nakpɔ mía ta?

 Mawu ƒe Ametakpɔkpɔ ƒe Ŋugbedodo

4, 5. Nukata míate ŋu aka ɖe ŋugbe si Mawu do be yeakpɔ mía ta la dzi bliboe?

4 Yehowa ate ŋu akpɔ esubɔlawo ta vavã. Eyae nye “Mawu ŋusẽkatãtɔ”—eye dzesideŋkɔ sia fia be ŋusẽ si dzi womate ŋu akpe o ye le esi. (Mose I, 17:1) Ne Yehowa ɖe eƒe ŋusẽ ɖe go la, naneke mate ŋu axe mɔ nɛ o, abe alesi naneke mate ŋu atɔ te ƒutsotsoe o ene. Esi wòte ŋu wɔa nusianu si le ɖekawɔwɔ me kple eƒe lɔlɔ̃nu ta la, míate ŋu abia be, ‘Ðe wònye Yehowa ƒe lɔlɔ̃nu be yeazã yeƒe ŋusẽ atsɔ akpɔ yeƒe amewo taa?’

5 Kpuie ko la, míaɖo eŋu be, ẽ! Yehowa ka ɖe edzi na mí be yeakpɔ yeƒe amewo ta. Psalmo 46:2 gblɔ be: “Yehowa enye sitsoƒe kple ŋusẽ na mí, xɔnametɔ ŋutɔ wònye le xaxawo me.” Esi Mawu ‘mate ŋu aka aʋatso o’ ta la, míate ŋu aka ɖe ŋugbe si wòdo be yeakpɔ mía ta la dzi bliboe. (Tito 1:2) Mina míade ŋugble le kpɔɖeŋunyagbɔgblɔ siwo míate ŋu akpɔ le susu me, siwo Yehowa zã tsɔ gblɔ alesi wòkpɔa ame ta beléletɔe dometɔ aɖewo ŋu kpɔ.

6, 7. (a) Takpɔkpɔ kae Biblia ƒe ɣeyiɣiwo me alẽkplɔla naa eƒe alẽwo? (b) Aleke Biblia wɔ alesi Yehowa di tso dzi me be yeakpɔ yeƒe alẽwo ta ahalé be na wo ƒe kpɔɖeŋui?

6 Yehowa nye Alẽkplɔla, eye “eƒe dukɔ kple alẽwo le eƒe lãnyiƒe míenye.” (Psalmo 23:1; 100:3) Lã ʋɛ aɖewo koe nye wɔnamanɔŋutɔwo de alẽwo nu. Ele na alẽkplɔla siwo nɔ anyi le Biblia ƒe ɣeyiɣiwo me be dzi nanɔ wo ƒo bene woate ŋu akpɔ woƒe alẽwo ta tso dzatawo, amegãxiwo, kple sisiblisiwo, kpakple fiafitɔwo si me. (Samuel I, 17:34, 35; Yohanes 10:12, 13) Gake ɣeyiɣi aɖewo nɔ anyi si me alẽawo ta kpɔkpɔ biaa beléle ŋuɖɔɖɔɖotɔe. Ne alẽ dzi vi ɖe afisi didi tso woƒe kpo gbɔ la, alẽkplɔla si léa be na eƒe alẽwo dzɔa alẽnɔa ŋu le wɔnamanɔŋu ƒe ɣeyiɣi siawo me eye wòkɔa alẽvi masẽmasẽa yia woƒe kpo mee.

‘Akɔ wo ɖe akɔnu’

 7 Esi Yehowa tsɔ eɖokui sɔ kple alẽkplɔla la, ena kakaɖedzi mí be etso yeƒe dzi me be yeakpɔ mía ta. (Xezekiel 34:11-16) Gaɖo ŋku alesi woɖɔ Yehowae le Yesaya 40:11, si me míedzro le agbalẽ sia ƒe Ta 2 lia me dzi, be: “Anyi eƒe alẽhawo abe alẽkplɔvi ene, alé alẽviawo ɖe abɔ dome, eye wòakɔ wo ɖe akɔnu.” Aleke alẽvia wɔna va ɖoa alẽkplɔla la ƒe “akɔnu”—si nye eƒe awu ʋlaya me? Ðewohĩ alẽae te ɖe alẽkplɔla la ŋu, eye anye be etiti eɖokui ɖe eƒe afɔ ŋu gɔ̃ hã. Gake alẽkplɔla lae abɔbɔ akɔ alẽvia, eye wòakɔe ada ɖe eƒe akɔnu, si nye dedienɔƒe. Belélename ƒe kpɔɖeŋu nyui kae nye si, si le fiafiam be Alẽkplɔla Gã la le klalo be yeakpɔ mía ta!

8. (a) Amekawo tae Mawu do ŋugbe be yeakpɔ, eye aleke esia dze le Lododowo 18:10? (b) Nukae sitsoƒe kpɔkpɔ le Mawu ƒe ŋkɔ me bia?

8 Ametakpɔkpɔ si ƒe ŋugbe Mawu do la nɔ te ɖe nanewo dzi—amesiwo tena ɖe eŋu ɖeɖe dzaa tae wòakpɔ. Lododowo 18:10 gblɔ be: “Yehowa ƒe ŋkɔ enye mɔ̃ sesẽ; afima ame dzɔdzɔe la sina yina, eye wònɔa dedie.” Le Biblia ƒe ɣeyiɣiwo me la, wotua xɔ tsralawo ɖe gbedadaƒo wonyea sitsoƒe. Gake ekpo ɖe amesi ɖo afɔku me gbɔ be wòasi ayi xɔ tsralaa me bene wòanɔ dedie. Nenemae wòle le bebeƒe kpɔkpɔ le Mawu ƒe ŋkɔa me hã gome. Ebia nusi yi ŋgɔ wu Mawu ƒe ŋkɔa yɔyɔ enuenu ko; menye gbesae Mawu ƒe ŋkɔa nye o. Ke boŋ Amesi tɔ ŋkɔae wòle be míanya ahaɖo ŋu ɖe eŋu eye míanɔ agbe ɖe eƒe dzidzenu dzɔdzɔeawo nu. Aleke gbegbe Yehowa ƒe dɔme nyoe nye si be wòna kakaɖedzi mí be ne míetrɔ ɖe ye ŋu le xɔse me la, yeanye sitsoƒe na mí!

“Mía Mawu . . . Ate Ŋu Aɖe Mí”

9. Aleke Yehowa wɔ nusi yi ŋgɔ wu ametakpɔkpɔ ƒe ŋugbe dodo ko?

9 Menye ɖeko Yehowa do ametakpɔkpɔ ƒe ŋugbe na mí ko evɔ o. Eɖee fia ŋutɔŋutɔ le Biblia ƒe ɣeyiɣiwo me nukutɔe be yeate ŋu akpɔ yeƒe amewo ta. Le Israel-viwo ƒe ŋutinya katã me la, Yehowa ƒe “asi” sesẽ la xea mɔ na futɔ sesẽwo zi geɖe. (Mose II, 7:4) Gake Yehowa zãa eƒe ametakpɔŋusẽ ɖe ame ɖekaɖekawo hã nu.

10, 11. Biblia me kpɔɖeŋu kawoe fia be Yehowa zã eƒe ametakpɔŋusẽ ɖe ame ɖekaɖekawo ŋu?

 10 Esime Hebri ɖekakpui etɔ̃—Sadrax, Mesax, kple Abed-Nego—gbe be yewomade ta agu na Fia Nebukadnezar ƒe sikalegba o la, fia la do dɔmedzoe heliheli eye wòdo ŋɔdzi na wo be yeatsɔ wo aƒu gbe ɖe kpodzo si me wodo dzo ɖo wògbɔ eme la me. Nebukadnezar, si nye fia sesẽtɔ kekeake le anyigba dzi ɣemaɣi, ɖe alɔme gblɔ be: “Mawu kae ate ŋu aɖe mi tso asinye me?” (Daniel 3:15) Ðekakpui etɔ̃awo ka ɖe ŋusẽ si le woƒe Mawu si be wòakpɔ wo ta dzi bliboe, gake womewɔ nu ɖokuidodoɖedzitɔe be akpɔ yewo ta godoo o. Eyata woɖo eŋu be: “Mía Mawu, si subɔm míele la, ate ŋu aɖe mí.” (Daniel 3:17) Le nyateƒe me la, kpodzo bibi ma si me wodo dzo ɖo enu sẽ zi gbɔ zi adre wu alesi wònɔ gbã la menye naneke na woƒe Mawu ŋusẽkatãtɔ la o. Ekpɔ wo ta vavã, eye ezi fia la dzi wòʋu eme be: “Mawu bubu aɖeke meli ate ŋu aɖe ame abe eya ene o.”—Daniel 3:29.

11 Yehowa gaɖe eƒe ametakpɔŋusẽ fia wòɖe dzesi ŋutɔ esi wòtrɔ eƒe Tenuvi ƒe agbe tso dziƒo va de Yuda ɖetugbi nɔaƒe Maria ƒe vidzidɔ me. Mawudɔla aɖe gblɔ na Maria be ‘afɔ fu adzi ŋutsuvi.’ Mawudɔla la ɖe eme be: “Gbɔgbɔ kɔkɔe ava dziwò, eye dziƒoʋĩtɔ ƒe ŋusẽ ado vɔvɔli ɖe dziwò.” (Luka 1:31, 35) Edze abe ɖe Mawu ƒe Vi la meɖo wɔnamanɔŋu ƒe nɔnɔme sia tɔgbe me alea kpɔ gbeɖe o ene. Ðe dadaa si nye amegbetɔ ƒe nuvɔ̃menyenye kple blibomademade aɖe ɖe fugboea ŋua? Ðe Satana ate ŋu awɔ nuvevi Ðevia alo awui hafi woava dziia? Nusiawo madzɔ akpɔ gbeɖe o! Míagblɔe ko be Yehowa tɔ kpɔ ɖe Maria ŋu tsɔ kpɔ eta ale be naneke—blibomademade aɖeke, nugblẽleameŋula aɖeke, amegbetɔ, alo gbɔgbɔ vɔ̃ amewula aɖeke—mate ŋu agblẽ nu le fugboe si nɔ tsitsim la ŋu o, tso esime wofɔ eƒe fu kaka tsɔ yii. Yehowa yi edzi kpɔ Yesu ta le eƒe ɖevime. (Mateo 2:1-15) Ame aɖeke mete ŋu dze Mawu ƒe Vi lɔlɔ̃a dzi o vaseɖe eƒe ɣeyiɣi ɖoɖi dzi ko hafi.

12. Nukatae Yehowa kpɔ ame ɖekaɖeka aɖewo ta nukutɔe le Biblia ƒe ɣeyiɣiwo me?

 12 Nukatae Yehowa kpɔ ame ɖekaɖeka aɖewo ta nukutɔe? Le nudzɔdzɔawo dometɔ geɖe me la, Yehowa kpɔ ameawo ta kple susu be yeakpɔ nu bubu aɖe si le vevie kura wu ta: eyae nye eƒe tameɖoɖo me vava. Le kpɔɖeŋu me, vidzĩ Yesu ƒe agbetsitsi nɔ vevie na Mawu ƒe tameɖoɖo me vava, si ava ɖe vi na ameƒomea katã mlɔeba. Ametakpɔŋusẽ ɖeɖe fia geɖeawo ŋuti nuŋlɔɖiwo nye Ŋɔŋlɔ siwo tso gbɔgbɔ me la ƒe akpa aɖe, eye “[woŋlɔ wo] le míaƒe nufiafia ta, bene míatsɔ ŋɔŋlɔawo ƒe dzidodo kple akɔfafa akpɔ mɔkpɔkpɔ.” (Romatɔwo 15:4) Ẽ, kpɔɖeŋu siawo doa ŋusẽ mí le mía Mawu ŋusẽkatãtɔ la dzixɔxɔse me. Gake ametakpɔkpɔ kae míate ŋu akpɔ mɔ na tso Mawu gbɔ egbea?

Nusi Mawu ƒe Ametakpɔkpɔ Mefia O

13. Ðe wònye dzizizi na Yehowa be wòawɔ nukunu ɖe mía ta? Ðe eme.

13 Ŋugbe si Mawu do be yeakpɔ ame ta mefia be enye dzizizi na Yehowa be wòawɔ nukunuwo le mía ta o. Kpao, mía Mawu medo ŋugbe be míanɔ agbe kuxi manɔmee le nuɖoanyi xoxo sia me o. Yehowa subɔla wɔnuteƒe geɖe dze ŋgɔ fukpekpewo, siwo ƒe ɖewoe nye koɖoɖo, aʋawɔwɔ, dɔléle, kple ku. Yesu gblɔ na eƒe nusrɔ̃lawo kɔte be woate ŋu awu wo dometɔ aɖewo ɖe woƒe xɔse ta. Susu ma tae Yesu te gbe ɖe alesi wòle vevie be woado dzi vaseɖe nuwuwui dzi ɖo. (Mateo 24:9, 13) Ne ɖe Yehowa anɔ eƒe ŋusẽ zãm atsɔ anɔ amewo ɖem nukutɔe le nya sia nya me la, anye ne Satana akpɔ nya atsɔ aɖe alɔme le Yehowa ŋu eye wòanɔ te ɖe edzi ake ɖi le subɔsubɔdɔ si wɔm míele na mía Mawu la ƒe nuvãnyenye ŋu.—Hiob 1:9, 10.

14. Kpɔɖeŋu kawoe fia be Yehowa mekpɔa esubɔlawo katã ta le mɔ ɖeka tɔgbe nu o?

14 Le Biblia ƒe ɣeyiɣiwo me gɔ̃ hã la, Yehowa mezã eƒe ametakpɔŋusẽ tsɔ xe mɔ be esubɔlawo meku kukpo o. Le kpɔɖeŋu  me, Herodes wu apostolo Yakobo le ƒe 44 M.Ŋ. me; ke hã ɣeyiɣi kpui aɖe le nudzɔdzɔ ma megbe la, eɖe Petro “tso Herodes si me.” (Dɔwɔwɔwo 12:1-11) Eye Yohanes, si nye Yakobo nɔviŋutsu, nɔ agbe wòdidi wu Petro kple Yakobo. Edze ƒã be míate ŋu akpɔ mɔ be Mawu nakpɔ esubɔlawo katã ta le mɔ ɖeka tɔgbe nu o. Gakpe ɖe eŋu la, “azãgbe kple nuɖiɖeame” ɖia kpe mí katã. (Nyagblɔla 9:11) Ekema aleke Yehowa kpɔa mía ta egbeae?

Yehowa Kpɔa Ame Ta le Ŋutilã Me

15, 16. (a) Kpeɖodzi kae li si fia be Yehowa kpɔa esubɔlawo ƒe ƒuƒoƒoa ta le ŋutilã me? (b) Nukata míate ŋu aka ɖe edzi be Yehowa akpɔ esubɔlawo ta fifia kple le “xaxa gã” la me?

15 Gbã la, bu ametakpɔkpɔ le ŋutilã me ŋu kpɔ. Míate ŋu akpɔ mɔ be woakpɔ mí Yehowa subɔlawo ƒe ƒuƒoƒoa ta. Ne manye nenema o la, míate ŋu adze Satana si me bɔbɔe. Bu nya sia ŋu kpɔ: Naneke madzɔ dzi na Satana, “xexe sia me fia,” wu be yeabu mo na tadedeagu vavãtɔ o. (Yohanes 12:31; Nyaɖeɖefia 12:17) Xexe sia me dziɖuɖu sesẽtɔ kekeakewo dometɔ aɖewo xe mɔ ɖe míaƒe gbeƒãɖeɖedɔa nu eye wote kpɔ be yewoaɖe mí ɖa kura. Ke hã Yehowa ƒe amewo kpɔtɔ li ke sesĩe eye wole gbeƒãɖeɖe dzi madzudzɔmadzudzɔe! Nukatae dukɔ sesẽwo mete ŋu tɔ te Kristotɔwo ƒe ha sue sia si me tɔwo mede bubuawo nu o eye wòdze abe wɔna mele wo ŋu o ene la ƒe dɔwɔwɔ o? Le esi Yehowa tsɔ eƒe kpɔɖeŋuʋala sesẽawo tsyɔ mía dzi tae!—Psalmo 17:7, 8.

16 Ke ametakpɔkpɔ le ŋutilã me le “xaxa gã” si gbɔna me hã ɖe? Mele be míavɔ̃ Mawu ƒe ʋɔnudɔdrɔ̃ me tsonuwo o. Nya lae nye be, “Aƒetɔ la nya alesi wòaɖe mawumemewo atso tetekpɔwo me, eye wòadzra ame madzɔmadzɔwo ɖo hena ʋɔnudrɔ̃gbe, bene woatu fe vɔ̃ na wo.” (Nyaɖeɖefia 7:14; Petro II, 2:9) Gake hafi ɣeyiɣi ma naɖo la, míate ŋu aka ɖe nu eve aɖewo dzi ɣesiaɣi. Gbã, Yehowa maɖe  mɔ gbeɖe be woatsrɔ̃ esubɔla wɔnuteƒewo ɖa le anyigba dzi o. Evelia, atsɔ agbe mavɔ nɔnɔ le dzɔdzɔenyenye xexe yeye me aɖo eteƒe na nuteƒewɔlawo—ne ehiã la, to tsitretsitsia dzi. Le amesiwo aku gome la, teƒe aɖeke megale dedie wu woƒe Mawu ƒe susu me nɔnɔ o.—Yohanes 5:28, 29.

17. Aleke Yehowa kpɔa mía ta to eƒe Nya la dzii?

17 Fifi laa kura gɔ̃ hã la, Yehowa kpɔa mía ta to eƒe “nya” si le agbe, si sẽ ŋu be wòte ŋu ʋãa amewo woɖɔa woƒe dzi ɖo hetrɔa woƒe agbenɔnɔ la dzi. (Hebritɔwo 4:12) To eƒe dzidzenuwo dzi wɔwɔ me la, akpɔ mía ta tso ŋutilã me nuveviwɔame me le nanewo me. Yesaya 48:17 gblɔ be: “Nye Yehowa . . . enye amesi fia nusi nyo na wò la wò.” Ðikeke mele eme o be agbenɔnɔ ɖe Mawu ƒe Nya la nu ate ŋu ade míaƒe lãmesẽ dzi eye míaƒe agbe nadidi ɖe edzi. Le kpɔɖeŋu me, le esi míetsɔa Biblia ƒe nuxlɔ̃ame be míatsri ahasiwɔwɔ kple be míagaƒo ɖi mía ɖokui o wɔa dɔe ta la, míetsria nuwɔna makɔmakɔwo kple agbe baɖa nɔnɔ siwo gblẽa ame mavɔ̃mawu geɖe ƒe agbe dome. (Dɔwɔwɔwo 15:29; Korintotɔwo II, 7:1) Míedaa akpe geɖe ŋutɔ ɖe alesi Mawu ƒe Nya la kpɔa mía tae la ta!

Yehowa Kpɔa Mía Ta le Gbɔgbɔ Me

18. Aleke Yehowa kpɔa mía ta le gbɔgbɔ mee?

18 Vevietɔe nye be Yehowa kpɔa mía ta le gbɔgbɔ me. Le alesi mía Mawu si lɔ̃a mí la tsɔa nusiwo hiã bene míate ŋu ado dzi le dodokpɔwo me kple nusiwo adzɔ mía kplii dome ƒomedodo ŋu blaa akpa na míi ta la, ekpɔa mía ta tso gbɔgbɔ me nuveviwɔame me. Yehowa toa nusiawo dzi léa míaƒe agbe ɖe te, menye hena ƒe vɛ aɖewo ko o ke boŋ yi ɖe mavɔmavɔ me hã. Bu ɖoɖo siwo Mawu wɔ be wòatsɔ akpɔ mía ta le gbɔgbɔ me dometɔ aɖewo ŋu kpɔ.

19. Aleke Yehowa ƒe ŋusẽ ate ŋu ana míakpe akɔ kple dodokpɔ ɖesiaɖe si míado goe?

19 Yehowae nye ‘Gbedodoɖasela la.’ (Psalmo 65:3) Ne agbe me nuteɖeamedziwo wɔ abe ɖe wowu tsɔtsɔ na mí ene la,  míaƒe dzimenyawo gbɔgblɔ nɛ ate ŋu ana míakpɔ gbɔdzɔe geɖe. (Filipitɔwo 4:6, 7) Ðewohĩ maɖe míaƒe dodokpɔawo ɖa nukutɔe ya o, gake le gbe si míedo ɖa tso dzime ŋu ɖoɖo me la, ate ŋu ana nunya si hiã bene míatsɔ akpɔ wo gbɔe la mí. (Yakobo 1:5, 6) Gakpe ɖe eŋu la, Yehowa naa gbɔgbɔ kɔkɔe amesiwo bianɛ. (Luka 11:13) Gbɔgbɔ sẽŋu ma ate ŋu akpe ɖe mía ŋu míakpe akɔ kple dodokpɔ alo kuxi ɖesiaɖe si míado goe. Ate ŋu ana ‘ŋusẽ si gbɔ dzɔdzɔmetɔ ŋu’ la mí bene míado dzi vaseɖe esime Yehowa naɖe kuxi siwo katã doa nuxaxa na ame ɖa le xexe yeye si tu aƒe alea gbegbe la me.—Korintotɔwo II, 4:7.

20. Aleke Yehowa ƒe ametakpɔŋusẽ ate ŋu ato mía hati tadeagulawo dzii?

20 Yehowa te ŋu ɖea eƒe ametakpɔŋusẽ fiana to mía hati tadeagulawo dzi ɣeaɖewoɣi. Yehowa ƒo eƒe amewo nu ƒu wonye xexeame godoo ƒe ‘nɔviwo ƒe habɔbɔ.’ (Petro I, 2:17; Yohanes 6:44) Le lɔlɔ̃ si le nɔviwo ƒe habɔbɔ sia me ta la, míekpɔa kpeɖodzi gbagbe siwo fia be ŋusẽ le Mawu ƒe gbɔgbɔ kɔkɔea si wòʋãa amewo wowɔa nu nyui. Gbɔgbɔa tsea ku le mía me—wonye nɔnɔme xɔasi lédziname siwo dometɔ aɖewoe nye lɔlɔ̃, dɔmenyonyo, kple dɔmekɔkɔ.  (Galatiatɔwo 5:22, 23) Eyata ne míeɖo xaxa me eye haxɔsetɔ aɖe see le eɖokui me ɖo aɖaŋu si akpe ɖe mía ŋu alo gblɔ dzideƒonamenya siwo hiã mí vevie ŋutɔ na mí la, míate ŋu ada akpe na Yehowa ɖe eƒe ametakpɔkpɔ belélenametɔe alea ta.

21. (a) Gbɔgbɔmenuɖuɖu si vana ɖe ɣeyiɣi nyuitɔ dzi kae Yehowa nana to “dɔla nuteƒewɔla kple aɖaŋudzela” la dzi? (b) Viɖe kae wò ŋutɔ nèkpɔ tso nusiwo Yehowa naa mí be woakpɔ mía ta le gbɔgbɔ me la me?

21 Yehowa ganaa nu bubu aɖe hã mí be wòakpɔ mía ta: eyae nye gbɔgbɔmenuɖuɖu si vana ɖe ɣeyiɣi dzi. Be Yehowa nakpe ɖe mía ŋu míaxɔ ŋusẽ tso eƒe Nya la me la, ede dɔ asi na “dɔla nuteƒewɔla kple aɖaŋudzela” la be wòama gbɔgbɔmenuɖuɖu na mí. Dɔla nuteƒewɔla la toa agbalẽwo abe Gbetakpɔxɔ kple Nyɔ! magazinewo ene, kpakple kpekpewo, takpekpe suewo kple gãwo, dzi naa ‘nuɖuɖu mí le ɣeyiɣi nyuitɔ dzi’—wonye nusiwo míehiã, le ɣeyiɣi siwo dzi míehiã wo me. (Mateo 24:45) Èse nya aɖe le Kristotɔwo ƒe kpekpe aɖe me—nyaŋuɖoɖo loo, nuƒo loo, alo le gbedodoɖa gɔ̃ hã me—si na ŋusẽ kple dzideƒo si tututu nèhiã la wò kpɔa? Ðe míaƒe magazineawo me nyati aɖe wɔ dɔ ɖe wò agbe dzi kpɔa? Ðo ŋku edzi be Yehowae naa nusiawo katã mí bene woakpɔ mía ta le gbɔgbɔ me.

22. Mɔ ka nue Yehowa zãa eƒe ŋusẽ le ɣesiaɣi, eye nukatae eƒe nuwɔwɔ alea va ɖea vi na mí le mɔ nyuitɔ kekeake nu?

22 Yehowa nye akpoxɔnu “na amesiwo katã sii tso” nyateƒe. (Psalmo 18:31) Míese egɔme be mezãa eƒe ŋusẽ tsɔ kpɔa mía ta tso dzɔgbevɔ̃ewo katã me fifia o. Gake ezãa eƒe ametakpɔŋusẽ ɣesiaɣi tsɔ kpɔa egbɔ be yeƒe tameɖoɖowo va eme. Eƒe nuwɔwɔ alea va ɖea vi na eƒe amewo le mɔ nyuitɔ kekeake nu mlɔeba. Ne míete ɖe Yehowa ŋu eye míekpɔtɔ le eƒe lɔlɔ̃ me la, ana agbe deblibo si nuwuwu meli na o mí. Esi mɔkpɔkpɔ sia le susu me na mí la, míate ŋu abu fukpekpe ɖesiaɖe le nuɖoanyi sia me be enye ‘ɣeyiɣi kpui aɖe ko ƒe nu si mesesẽ o’ nyateƒe.—Korintotɔwo II, 4:17.