Dzo kpo yi emenuwo dzi

Dzo kpo yi emenuawo dzi

 TA 4

‘Ŋusẽ Gã Le Yehowa Si’

‘Ŋusẽ Gã Le Yehowa Si’

1, 2. Nu wɔnuku kawo teƒee Eliya kpɔ va yi, gake nu wɔdɔɖeamedzi kawoe wòkpɔ esime wònɔ agado me le Xoreb-to dzi?

ELIYA kpɔ nu wɔnukuwo teƒe kpɔ. Ekpɔ eteƒe akpaviãwo tsɔ nuɖuɖu vɛ nɛ zi eve gbesiagbe esime wòsi va be. Ekpɔ eteƒe be wɔze kple amigoe aɖe meɖi gbɔlo o le dɔŋɔli didi aɖe. Ekpɔe kpɔ gɔ̃ hã be dzo ge tso dziƒo le eƒe gbedodoɖa ŋuɖoɖo me. (Fiawo I, ta 17, 18) Ke hã Eliya mekpɔ nusi gbɔna dzɔdzɔ ge fifia ya tɔgbe aɖeke teƒe kpɔ o.

2 Esi wòbɔbɔ ɖe agado aɖe nu le Xoreb-to dzi la, ekpɔ nu wɔdɔɖeamedzi vovovowo. Gbã la, ya ƒo. Anye be eɖi hoo ŋutɔ, elabena enu sẽ ale gbegbe be towo me fe eye agakpewo gbã gudugudu. Emegbe anyigba ʋuʋu sesĩe, ale be wòɖe ŋusẽ triakɔ siwo xaxa ɖe anyigba tume la ɖe go. Emegbe dzo bi. Esi wòbi to nutoa me va yina la, anye be Eliya se eƒe dzoxɔxɔ sẽŋu la.—Fiawo I, 19:8-12.

“Kpɔ ɖa, Yehowa va tso me yi”

3. Mawu ƒe nɔnɔme ka ƒe kpeɖodzi teƒee Eliya kpɔ, eye afikae míate ŋu akpɔ nɔnɔme sia ke ƒe kpeɖodziwo le?

3 Nu ɖeka aɖe dze le nu vovovo siwo Eliya kpɔ la katã ŋu—wonye Yehowa Mawu ƒe ŋusẽ gã la ƒe ɖeɖefiawo. Gake mehiã be míakpɔ nukunu aɖe teƒe hafi adze sii be ŋusẽ le Mawu si o. Edze ƒã míekpɔna bɔbɔe. Biblia gblɔ na mí be nuwɔwɔwo ɖoa kpe Yehowa ƒe “ŋusẽ mavɔmavɔ kple mawunyenye” dzi. (Romatɔwo 1:20) Wò ya bu alesi dzi kea dzo mia eye dziɖegbe ʋuʋua amee le ahom me, alesi tsitsetse gãwo kɔna ɖe anyi bababa le atsyɔ̃ɖoɖo mee, kple alesi gbegbe dziŋgɔli gbahoo la yɔ fũ kple ɣletiviwo nukutɔe la ŋu kpɔ! Ðe mèkpɔa Mawu ƒe ŋusẽ le nukpɔkpɔ siawo me oa? Ke hã ame ʋɛ aɖewo koe lɔ̃ ɖe edzi ŋutɔŋutɔ egbea be ŋusẽ le Mawu si. Eye amesiwo si nukpɔsusu nyui le le eŋuti la gale ʋɛ wu kura. Gake Mawu ƒe nɔnɔme sia gɔmesese ana míakpɔ susu geɖe siwo ta wòle be míate ɖe Yehowa ŋu  ɖo. Le agbalẽa ƒe akpa sia la, míasrɔ̃ nu tsitotsito tso Yehowa ƒe ŋusẽ si ɖeke mesɔ kplii o ŋu.

Yehowa ƒe Nɔnɔme Vevi Aɖee Wònye

4, 5. (a) Ƒomedodo kae le Yehowa ƒe ŋkɔ kple eƒe ŋusẽ dome? (b) Nukata wòsɔ be Yehowa tia nyitsu tsɔ wɔ kpɔɖeŋu na eƒe ŋusẽ?

4 Yehowa ƒe ŋusẽ tɔgbe aɖeke meli o. Yeremya 10:6 gblɔ be: “Yehowa, ame aɖeke mede nuwò o, èlolo, eye wò ŋusẽ na wò ŋkɔ lolo.” De dzesii be ƒomedodo le ŋusẽ kple Yehowa ƒe ŋkɔ dome. Ðo ŋku edzi be edze ƒãa be ŋkɔ sia gɔmee nye “Enaa Wòvaa Eme.” Nu kae na Yehowa tea ŋu wɔa nu sia nu si wòdi be yeawɔ ale be wòva zua nusianu si dze eŋu? Ðekae nye ŋusẽ. Ẽ, seɖoƒe meli na Yehowa ƒe nuwɔwɔŋutete o, eye seɖoƒe meli na eƒe lɔlɔ̃nu wɔwɔ o. Ŋusẽ sia nye eƒe nɔnɔme veviawo dometɔ ɖeka.

5 Esi wònye be míate ŋu ase ŋusẽ si gbegbe le Yehowa si gɔme o ta la, ewɔa kpɔɖeŋuwo be woakpe ɖe mía ŋu. Abe alesi míekpɔe ene la, etsɔ nyitsu wɔ kpɔɖeŋu na eƒe ŋusẽ. (Xezekiel 1:4-10) Kpɔɖeŋua sɔ ŋutɔ, elabena nyitsu kura gɔ̃ hã nye lã klitsu sẽŋu aɖe. Ne amesiwo nɔ Palestina le Biblia ƒe ɣeyiɣiwo me do go lã si sesẽ wui kpɔ hã la, ke mebɔ o. Gake wonya nyitsu ƒomevi aɖe si ɖi vɔvɔ̃ wu ya—eyae nye gbenyitsu alo tò ƒomevi aɖe, si woyɔna le Eŋlisigbe me be aurochs, si tɔgbe megali o ɣeyiɣi didi aɖee nye esia. (Hiob 39:9-12) Roma Fiagã Julius Caesar gblɔ kpɔ be nyitsu siawo ƒe lolome de sɔsɔ ge kple atiglinyiwo. Eŋlɔ be: “Woƒe ŋusẽ tri akɔ, eye woƒua du eteƒe mekɔ o.” Kpɔ alesi ne ètsi tre ɖe lã sia xa nàkpɔ ɖokuiwò sue ahabui be yele beli ɖa!

6. Nukatae wònye Yehowa koe woyɔna be “Ŋusẽkatãtɔ”?

6 Nenema ke amegbetɔ ƒe lolome kple ŋusẽ meɖi naneke kura o ne wotsɔe sɔ kple Mawu ŋusẽtɔ, Yehowa. Ðeko dukɔ sesẽwo gɔ̃ hã le nɛ abe ʋuʋudedi ko le nudanu ŋu ene. (Yesaya 40:15) Nuwɔwɔ aɖeke mele abe Yehowa ene o, seɖoƒe  mele Yehowa ƒe ŋusẽ ŋu o, elabena eya ɖeka koe woyɔna be “Ŋusẽkatãtɔ.” * (Nyaɖeɖefia 15:3) Yehowa ƒe “alɔkame sesẽ” eye “ŋusẽ geɖe” le esi. (Yesaya 40:26) Eyama gbɔe ŋusẽ gbogbo aɖe si mevɔna gbeɖegbeɖe o tsona. Mexɔa ŋusẽ tsoa ame alo nu bubu aɖeke gbɔ o, elabena ‘Mawu tɔe nye ŋusẽ.’ (Psalmo 62:12) Gake nuka dzie Yehowa zãa eƒe ŋusẽ tonɛ?

Alesi Yehowa Zãa Eƒe Ŋusẽe

7. Nukae nye Yehowa ƒe gbɔgbɔ kɔkɔe la, eye nukae dze le gbegbɔgblɔ gbãtɔ siwo me woŋlɔ Biblia ɖo me nya siwo wozã nɛ me?

7 Gbɔgbɔ kɔkɔe tsoa Yehowa gbɔ fũ, mavɔmavɔe. Enye Mawu ƒe ŋusẽ si wòzãna le dɔwɔwɔ me. Le nyateƒe me la, woyɔe le Mose I, 1:2 le New World Translation me be Mawu ƒe “dɔwɔŋusẽ.” Le teƒe bubuwo la, woate ŋu aɖe Hebri kple Hela gbe me nya siwo wozã na “gbɔgbɔ” gɔme be “yaƒoƒo,” “ŋɔtimegbɔgbɔ,” “ya ʋuduʋudu.” Nyagɔmeɖegbalẽŋlɔlawo gblɔ be gɔmesese si dze le gbegbɔgblɔ gbãtɔ siwo me woŋlɔ Biblia ɖo me nya siwo wozã mee nye ŋusẽ makpɔmakpɔ aɖe ƒe dɔwɔwɔ. Míate ŋu akpɔ Mawu ƒe gbɔgbɔ la kple ŋku o, abe alesi míate ŋu akpɔ yaƒoƒo o ene, gake eƒe nuwɔwɔwo nye nu ŋutɔŋutɔwo eye ŋku kpɔa wo.

8. Aleke woyɔ Mawu ƒe gbɔgbɔa le kpɔɖeŋunyagbɔgblɔ me le Biblia mee, eye nukatae nusiwo wotsɔe sɔ kplii la sɔ?

8 Naneke meli si ŋu Mawu ƒe gbɔgbɔ kɔkɔea mete ŋu trɔna ɖo o. Yehowa ate ŋu azãe atsɔ awɔ nusianu si wòɖo ɖe tame. Eyata esɔ ŋutɔ be le Biblia me la, woyɔ Mawu ƒe gbɔgbɔa le kpɔɖeŋunyagbɔgblɔ me be eƒe “asibide,” eƒe “asi sesẽ,” alo eƒe “abɔ, si wodo ɖe dzi.” (Luka 11:20; Mose V, 5:15; Psalmo 8:4) Abe alesi amegbetɔ ate ŋu azã eƒe asi atsɔ awɔ dɔ siwo bia ŋusẽ alo esiwo bia beléle tɔxɛ ene la, nenema ke Mawu ate ŋu azã eƒe gbɔgbɔa atsɔ awɔ eƒe tameɖoɖo ɖesiaɖe dzii—eɖanye atɔm siwo le sue ale gbegbe loo, alo Ƒudzĩa me mama loo, alo nana be ƒe alafa gbãtɔ me Kristotɔwo nado gbe bubuwo o.

9. Aleke gbegbe Yehowa ƒe dziɖuŋusẽ keke tae?

 9 Yehowa gazãa eƒe ŋusẽ le Xexeame Katã ƒe Dziɖulagã nyenye me. Àte ŋu akpɔe ɖa le susu me be nuwɔwɔ nyanu siwo ŋu ŋutete le miliɔn teƒe miliɔn nanewo le tewò, eye wole klalo be yewoawɔ wò gbe dzia? Dziɖuŋusẽ mae le Yehowa si wòzãna. Esubɔla amegbetɔ, siwo wotsɔna sɔna kple aʋakɔ zi geɖe le Ŋɔŋlɔawo me la le esi. (Psalmo 68:12; 110:3) Gake amegbetɔ nye nuwɔwɔ beli, ne wotsɔe sɔ kple mawudɔla. Kpɔe ɖa ko, be esi Asiria-ʋakɔa va dze Mawu ƒe amewo dzi la, mawudɔla ɖeka hɔ̃ koe wu asrafo mawo dometɔ 185,000 le zã ɖeka me! (Fiawo II, 19:35) ‘Ŋusẽ triakɔ’ le mawudɔlawo si.—Psalmo 103:19, 20.

10. (a) Nukatae woyɔa Ŋusẽkatãtɔ la be aʋakɔwo ƒe Yehowa ɖo? (b) Amekae nye Yehowa ƒe nuwɔwɔwo katã dometɔ sesẽtɔ kekeake?

10 Mawudɔla nenie li? Nyagblɔɖila Daniel kpɔ dziƒo ƒe ŋutega aɖe si me wòkpɔ gbɔgbɔ me nuwɔwɔ siwo wu miliɔn 100 le be wole Yehowa ƒe fiazikpuia ŋgɔ, gake naneke meli si fia be mawudɔla siwo wowɔ katãe nye ema wòkpɔ o. (Daniel 7:10) Eyata ate ŋu anye be mawudɔla alafa miliɔn geɖe ye li. Eyatae woyɔa Mawu be aʋakɔwo ƒe Yehowa ɖo. Dzesideŋkɔ sia fia ŋusẽ gã ƒe ɖoƒe si wòle, si nye mawudɔla sesẽwo ƒe ha gã si le ɖoɖo nu la ƒe Aʋafia. Etsɔ ame ɖeka, si nye eƒe Tenuvi, amesi nye “nuwɔwɔwo katã ƒe ŋgɔgbevi” la, ɖo gbɔgbɔ me nuwɔwɔ siawo katã nu. (Kolosetɔwo 1:15) Esi Yesu nye mawudɔla gãtɔ—si nye mawudɔlawo, serafiwo, kple kerubiwo katã ƒe tatɔ—ta la, eyae nye Yehowa ƒe nuwɔwɔwo katã ƒe sesẽtɔ kekeake.

11, 12. (a) Mɔ kawo nue Mawu ƒe nya la sẽa ŋu le? (b) Ðase kae Yesu ɖi le nusiwo gbegbe Yehowa ƒe ŋusẽ te ŋu wɔna ŋu?

11 Yehowa gazãa eƒe ŋusẽ le mɔ bubu nu. Hebritɔwo 4:12 gblɔ be: “Mawu ƒe nya la le agbe, eye wòsẽa ŋu.” Èdze si ŋusẽ si gbegbe le Mawu ƒe nya, alo gbedasi si tso gbɔgbɔ me, si ta wokpɔ wòle Biblia me fifia la ŋua? Ate ŋu ado ŋusẽ mí, atu míaƒe xɔse ɖo, eye wòakpe ɖe mía ŋu míawɔ tɔtrɔ blibowo le mía ɖokui me. Apostolo Paulo xlɔ̃ nu haxɔsetɔwo le  amesiwo nɔa agbe ƒaƒãwo ŋu. Egblɔ kpee be: “Nenem mia dome ame aɖewo nɔ tsã.” (Korintotɔwo I, 6:9-11) Ẽ, “Mawu ƒe nya” kpɔ ŋusẽ ɖe wo dzi eye wòkpe ɖe wo ŋu wowɔ tɔtrɔ.

12 Yehowa ƒe ŋusẽ tri akɔ ŋutɔ eye alesi wòzãnɛ wɔa dɔ ale gbegbe be naneke mate ŋu axe mɔ nɛ o. Yesu gblɔ be: “Mawu gbɔ la woate ŋu awɔ nusianu.” (Mateo 19:26) Tameɖoɖo kawo ŋue Yehowa zãa eƒe ŋusẽ ɖo?

Ŋusẽ Zazã si Wotsɔa Tameɖoɖo Fiaa Mɔe

13, 14. (a) Nukatae míate ŋu agblɔ be Yehowa menye ŋusẽtsoƒe dzro aɖe ko si si amenyenye mele o? (b) Mɔ kawo nue Yehowa zãa eƒe ŋusẽ le?

13 Yehowa ƒe gbɔgbɔa sẽ ŋu sasasã wu ŋutilãmeŋusẽ ɖesiaɖe; eye Yehowa menye ŋusẽ dzro aɖe ko si si amenyenye mele o, menye ŋusẽtsoƒe aɖe ko wònye o. Enye Mawu si si amenyenye le eye ezãa eƒe ŋusẽ ɖe ɖoɖo blibo nu. Gake nukae ʋãnɛ hafi wòzãnɛ?

14 Abe alesi míava kpɔe ene la, Mawu zãa eƒe ŋusẽ tsɔ wɔa nui, etsɔnɛ tsrɔ̃a nui, etsɔnɛ kpɔa ame tae, eye wògatsɔnɛ ɖɔa nu ɖoe hã—kpuie ko la, etsɔnɛ wɔa nusianu si sɔ ɖe eƒe tameɖoɖo debliboawo nu. (Yesaya 46:10) Le go aɖewo me la, Yehowa zãa eƒe ŋusẽ tsɔ ɖea eƒe amenyenye kple eƒe dzidzenuwo ƒe akpa veviwo fiana. Ƒo wo katã ta la, ezãa eƒe ŋusẽ be yeƒe lɔlɔ̃nu nava eme—be wòaʋli yeƒe dziɖulanyenye ta ahakɔ yeƒe ŋkɔ kɔkɔea ŋu to Mesia Fiaɖuƒea dzi. Naneke mate ŋu ado kplamatse tameɖoɖo sia me vava gbeɖe o.

15. Tameɖoɖo si ku ɖe Yehowa subɔlawo ŋu ka ŋue wòzãa eƒe ŋusẽ ɖo, eye aleke wòɖee fia le Eliya gomee?

15 Yehowa gazãa eƒe ŋusẽ wòɖea vi na mí ame ɖekaɖekawo. Se nya si Kronika II, 16:9 (NW) gblɔ ɖa, be: “Yehowa ya la, eƒe ŋkuwo le tsatsam le anyigba blibo la dzi be yeaɖe yeƒe ŋusẽ afia ɖe amesiwo ku ɖe eŋu kple woƒe dzi blibo la nu.” Nusi teƒe Eliya kpɔ, si míegblɔ le ta sia ƒe gɔmedzedze, nye eƒe kpɔɖeŋu ɖeka. Nukatae Yehowa ɖe eƒe ŋusẽ triakɔ ma  gbegbe fia? Nya lae nye be Fianyɔnu vɔ̃ɖi Izebel ka atam be yeana woawu Eliya. Nyagblɔɖila la nɔ sisim ɖe eƒe agbe ta. Esee le eɖokui me be yetsi asi, enɔ vɔvɔ̃m, eye dzi ɖe le eƒo—abe ɖe dɔ sesẽ siwo katã wòwɔ la zu dzodzro ene. Be Yehowa nafa akɔ na ŋutsu sia si tɔtɔ la, ehe Eliya ƒe susu yi ŋusẽ si gbegbe le esi la dzi. Yaƒoƒoa, anyigbaʋuʋua, kple dzobibia ɖee fia be Amesi tri akɔ wu amesiame le xexeame katã la li kple Eliya. Esi Mawu ŋusẽkatãtɔ la le eƒe akpa dzi la, Izebel ƒe nukae atso dzika ƒo nɛ?—Fiawo I, 19:1-12. *

16. Nukatae míate ŋu akpɔ akɔfafa ne míede ŋugble le Yehowa ƒe ŋusẽ gã la ŋu?

16 Togbɔ be fifia meganye Yehowa ƒe nukunuwo wɔɣi o hã la, alesi Yehowa le metrɔ tso Eliya ŋɔli o. (Korintotɔwo I, 13:8) Egadi vevie egbea hã abe tsã ene be yeazã yeƒe ŋusẽ ɖe amesiwo lɔ̃nɛ la ta. Nyateƒee wònye be ele teƒe kɔkɔ aɖe ŋutɔ le gbɔgbɔ me nutome, gake mele adzɔge ʋĩ tso mía gbɔ o. Seɖoƒe meli na eƒe ŋusẽ o, eyata enɔƒe ƒe didime menye kuxi kura o. Ke boŋ “Yehowa tsɔ ɖe amesiwo katã yɔnɛ . . . la gbɔ.” (Psalmo 145:18) Gbeɖeka esi nyagblɔɖila Daniel nɔ biabiam be Yehowa nakpe ɖe ye ŋu la, mawudɔla aɖe va do hafi wòwu gbedodoɖaa nu gɔ̃ hã! (Daniel 9:20-23) Naneke mate ŋu axe mɔ na Yehowa be wòado kpo kpekpeɖeŋu nana amesiwo lɔ̃nɛ kple ŋusẽ dodo wo o.—Psalmo 118:6.

Ðe Womate Ŋu Ate Ðe Mawu Ŋu O le Eƒe Ŋusẽ Ta?

17. Gɔmesese ka nue Yehowa ƒe ŋusẽ na vɔvɔ̃ ɖoa mí le, gake vɔvɔ̃ ka ƒomevie meɖoa mí le eta o?

17 Ðe wòle be míavɔ̃ na Mawu le eƒe ŋusẽ ta? Ele be míaɖo  eŋu be ẽ kple ao. Míagblɔ be ẽ, elabena eƒe ŋusẽ sia nye susu vevi si ta wòle be mawuvɔvɔ̃ nanɔ mía me, esi nye vɔvɔ̃ kple bubu deto si me míedzro kpuie le ta si do ŋgɔ me. Biblia gblɔ na mí be vɔvɔ̃ sia enye “nunya ƒe gɔmetoto.” (Psalmo 111:10) Gake míagaɖo eŋu be ao hã, elabena mele be Mawu ƒe ŋusẽ nawɔe be ŋɔdzi nalé mí alo míagbe tete ɖe eŋu o.

18. (a) Nukatae ame geɖe mekana ɖe ŋusẽtɔwo dzi o? (b) Aleke míewɔ nya be ŋusẽ si le Yehowa si mate ŋu agblẽe gbeɖe o?

18 “Ŋusẽ te ŋu naa wowɔa nu gbegblẽ; ŋusẽ kpɔkpɔ ɖe nusianu dzi naa wowɔa nu gbegblẽ megbemakpɔmakpɔe.” Esiawo nye nya siwo Englandtɔ ŋutinyaŋlɔla Lord Acton ŋlɔ le ƒe 1887 me. Amewo lɔ̃a eƒe nya siawo gbɔgblɔ, ɖewohĩ le esi wo dometɔ geɖe kpɔe be enye nyateƒe matrɔmatrɔ ta. Amegbetɔ madeblibowo zãa ŋusẽ ɖe mɔ gbegblẽ nu, abe alesi wòdze zi gbɔ zi geɖe le ŋutinya mee ene. (Nyagblɔla 4:1; 8:9) Ewɔe be ame geɖe mekana ɖe ŋusẽtɔwo dzi o eye wometena ɖe wo ŋu o. Evɔ Yehowa ya, ŋusẽ gãtɔ kekeake ye le esi. Ðe esia naa wòwɔa nu gbegblẽ le mɔ aɖe nua? Kura o! Abe alesi míekpɔe ene la, ele kɔkɔe, eye naneke kura mate ŋu agblẽ eƒe nɔnɔme o. Yehowa mele abe ŋutsu kple nyɔnu madeblibo siwo si ŋusẽ le le xexe gblẽku sia me la ene o. Mezã eƒe ŋusẽ ɖe mɔ gbegblẽ nu kpɔ o, eye mazãe nenema hã akpɔ gbeɖe o.

19, 20. (a) Nɔnɔme bubu kawoe Yehowa zãa eƒe ŋusẽ aduadu kplii, eye nukatae nya sia na dzi gaɖo mía ƒo ɖe edzi? (b) Aleke nàte ŋu awɔ Yehowa ƒe ɖokuidziɖuɖu ƒe kpɔɖeŋui, eye nukatae wòlé dzi na wò?

19 Ðo ŋku edzi be menye ŋusẽ koe nye nɔnɔme si le Yehowa si o. Nusiwo míava srɔ̃ tso eƒe dzɔdzɔenyenye, nunya, kple lɔlɔ̃ ŋu la le ŋgɔ. Gake mele be míabui be ɖe Yehowa le kpaɖii le nɔnɔmeawo ɖeɖe fia me, abe ke nɔnɔmeawo dometɔ ɖeka koe wòɖena fiana le ɣeyiɣi ɖeka me ene o. Ke boŋ míava kpɔe le ta siwo gbɔna me be Yehowa zãa eƒe ŋusẽ le ɖekawɔwɔ me kple eƒe dzɔdzɔenyenye, eƒe nunya,  kple eƒe lɔlɔ̃ ɣesiaɣi. Bu nɔnɔme bubu si Mawu ɖena fiana ŋu kpɔ, esi mebɔ kura le xexemedziɖulawo dome o—eyae nye ɖokuidziɖuɖu.

20 Tsɔe be nèdo go ŋutsu dzɔtsu aɖe si sesẽ ale gbegbe be vɔvɔ̃ koe ɖo wò. Gake nèva kpɔe emegbe be ewɔ abe ame fatue wònye ene. Ɣesiaɣi la, ele klalo hedina vevie be yeazã yeƒe ŋusẽa atsɔ akpe ɖe amewo ŋu ahakpɔ wo ta, vevietɔ amesiwo mate ŋu aʋli wo ɖokui ta o kple ame beliwo. Mezãa eƒe ŋusẽa ɖe mɔ gbegblẽ nu gbeɖe o. Èkpɔe be wogblẽ eŋu dzodzro, ke hã ekpɔtɔ léa nu dzɔdzɔe wɔwɔ me ɖe asi goŋgoŋ eye wòfa tu, ewɔa nu bubutɔe, eye kura gɔ̃ hã wònyoa dɔme. Fifia nèbia ɖokuiwò be ɖe ye hã yeate ŋu afa tu ahaɖu ye ɖokui dzi nenema hã, vevietɔ ne ɖe ŋusẽ le ye hã ye si nenema gbegbe! Ne èva le si dzem ŋutsua la, ɖe màsee le ɖokuiwò me be yeate ɖe eŋu oa? Susu deŋgɔwo wu emawoe le mía si siwo ta wòle be míate ɖe Yehowa, ŋusẽkatãtɔ la, ŋu. Bu nyagbe blibo si dzi wotu ta sia ƒe tanya ɖo ŋu kpɔ: ‘Yehowa gbɔa dzi ɖi blewu, eye ŋusẽ gã le esi.’ (Naxum 1:3) Yehowa metsia klokloklo zãa eƒe ŋusẽ ɖe amewo ŋu o, mezãnɛ ɖe ame vɔ̃ɖiwo gɔ̃ hã ŋu nenema o. Efa tu eye wònye dɔmenyotɔ. Eɖee fia be ‘yegbɔa dzi ɖi blewu’ togbɔ be wowɔa nusi doa dziku nɛ hã.—Psalmo 78:37-41.

21. Nukatae Yehowa medina be yeazi amewo dzi woawɔ yeƒe lɔlɔ̃nu o, eye nukae nya sia fia mí le eŋu?

 21 Gabu Yehowa ƒe ɖokuidziɖuɖu ŋu le mɔ bubu nu kpɔ. Ne ɖe ŋusẽ gbogbo si seɖoƒe meli na o le asiwò la, èbu be ɣeaɖewoɣi la, adzro wò be nàzi amewo dzi woawɔ nu alesi nèdia? Togbɔ be ŋusẽ sia gbegbe le Yehowa si hã la, mezia amewo dzi be woasubɔ ye o. Togbɔ be Mawu subɔsubɔ dzi koe míato akpɔ agbe mavɔ hã la, Yehowa mezia mía dzi be míasubɔ ye o. Ke boŋ edea bubu mía dometɔ ɖesiaɖe ŋu dɔmenyotɔe eye wòna ablɔɖe mí be míawɔ tiatia. Exlɔ̃a nu mí le nyametsotso gbegblẽwo me tsonuwo ŋu eye wògblɔa nyametsotso nyuiwo ƒe viɖewo na mí. Gake egblẽ tiatiawɔwɔa ŋutɔ ɖe mía si me. (Mose V, 30:19, 20) Kpuie ko la, Yehowa medi subɔsubɔ si woawɔ dzizizitɔe alo le eƒe ŋusẽ triakɔ la ƒe ŋɔdziléame ta o. Amesiwo alɔ̃ faa asubɔe ye wòdina.—Korintotɔwo II, 9:7.

22, 23. (a) Nukae fia be edzɔa dzi na Yehowa be yeana ŋusẽ ame bubuwo? (b) Nuka mee míadzro le ta si kplɔe ɖo me?

22 Mina míakpɔ susu mamlɛtɔ si ta mele be ŋɔdzi nalé mí le Mawu Ŋusẽkatãtɔ la ŋu o ɖa. Amegbetɔ siwo nye ŋusẽtɔwo vɔ̃na be yewoana ŋusẽ ame bubuwo. Ke edzɔa dzi na Yehowa ya be yeana ŋusẽ ye subɔla wɔnuteƒewo. Etsɔ ŋusẽ geɖe na ame bubuwo, abe Via ene. (Mateo 28:18) Yehowa ganaa ŋusẽ esubɔlawo le mɔ bubu nu. Biblia ɖe eme be: “Yehowa, tɔwòe nye gãnyenye kple ŋusẽ, ŋutikɔkɔe, bubu kple kafukafu, elabena nusianu, si le dziƒo kple anyigba la, tɔwòe. . . . Gãnyenye kple ŋusẽ le asiwò me, eye gbɔwò wòtsona be, ame aɖe nazu gã, eye wòakpɔ ŋusẽ.”—Kronika I, 29:11, 12.

23 Ẽ, adzɔ dzi na Yehowa be wòado ŋusẽ wò. Enaa ‘ŋusẽ si gbɔ dzɔdzɔmetɔ ŋu’ gɔ̃ hã amesiwo dina be yewoasubɔe. (Korintotɔwo II, 4:7) Ðe medzro wò be nàte ɖe Mawu ŋusẽtɔ sia si zãa eƒe ŋusẽ ɖe dzidzenu dzɔdzɔewo nu dɔmenyotɔe la ŋu oa? Míalé ŋku ɖe alesi Yehowa zãa eƒe ŋusẽ le nuwo wɔwɔ me ŋu le ta si kplɔe ɖo me.

^ mm. 6 Le nyaa ŋutɔŋutɔ nu la, Helagbe me nya si gɔme woɖe be “Ŋusẽkatãtɔ” fia “Amesiame Dzi Ðula; Amesi Si Ŋusẽwo Katã Le.”

^ mm. 15 Biblia gblɔ be “Yehowa mele ya la . . . , anyigbaʋuʋu la . . . , [kple] dzo la [me] o.” To vovo na alesi mawu siwo wobe wonye dzɔdzɔmeŋusẽwo ƒe mawuwo le xotutuwo me la subɔlawo nɔa wo dim le dzɔdzɔmenuwo mee la, Yehowa subɔlawo ya medinɛ le nu mawo me o. Elolo akpa be wòanɔ nusi eya ŋutɔ wɔ me.—Fiawo I, 8:27.