Dzo kpo yi emenuwo dzi

Dzo kpo yi emenuawo dzi

 TA 20

‘Mima Anyigba La Wòazu Miaƒe Domenyinu’

‘Mima Anyigba La Wòazu Miaƒe Domenyinu’

EZEKIEL 45:1

NYA VEVITƆ: Anyigba si woma kple nu si wòfia

1, 2. (a) Mɔfiame kae Yehowa na Ezekiel? (b) Biabia kawo mee míadzro?

ÐEKO Ezekiel kpɔ ŋutega aɖe si ana wòaɖo ŋku nane si dzɔ ƒe 900 aɖewo va yi le Mose kple Yosua ƒe ŋkekea me la dzi koe nye ema. Ɣemaɣi la, Yehowa ɖɔ Ŋugbedodonyigbaa ƒe liƒowo na Mose eye emegbe wògblɔ ale si woama anyigbaa na Israel-toawo la na Yosua. (4 Mose 34:1-15; Yos. 13:7; 22:4, 9) Gake fifia le ƒe 593 D.Y. me la, Yehowa gblɔ na Ezekiel kple etɔ aboyomeawo be woama Ŋugbedodonyigbaa na Israel-toawo ake!—Eze. 45:1; 47:14; 48:29.

2 Gbedeasi kae le ŋutega sia me na Ezekiel kple etɔ aboyomeawo? Mɔ ka nue ŋutega sia ade dzi ƒo na Mawu ƒe amewo le egbea? Ðe wòava eme le mɔ si lolo wu nu le etsɔmea?

Ŋutega Si Na Kakaɖedzi Ame Le Mɔ Vevi Ene Nu

3, 4. (a) Kakaɖedzi ene kawoe ŋutega mamlɛtɔ si Ezekiel kpɔ la na aboyomeawo? (b) Le ta sia me la, kakaɖedzinya ka ŋue míaƒo nu tsoe?

3 Ŋutega mamlɛtɔ si Ezekiel kpɔ la nye esi woŋlɔ ɖe eƒe agbalẽa ƒe ta asieke sɔŋ me. (Eze. 40:1–48:35) Eku ɖe nya dedziƒoname ene aɖewo siwo ana kakaɖedzi aboyomeawo tso Israel dukɔ si wogbugbɔ ɖo te la ŋu. Kakaɖedzinya mawoe  nye kawo? Gbãtɔ, woagbugbɔ tadedeagu dzadzɛa aɖo anyi le Mawu ƒe gbedoxɔa me. Evelia, nunɔla kple kplɔla wɔnuteƒewo axɔ ŋgɔ le dukɔ si wogaɖo te la me. Etɔ̃lia, woana anyigba ame siwo katã trɔ gbɔ va Israel-nyigba dzi la wòazu woƒe domenyinu. Eye enelia, Yehowa aganɔ kpli wo eye wòanɔ wo dome.

4 Woƒo nu tso kakaɖedzinya eve gbãtɔawo kple ale si woava emee ŋu le agbalẽ sia ƒe Ta 13 kple 14 lia me. Woawoe nye ale si woagbugbɔ tadedeagu dzadzɛa aɖo anyi kple ale si nunɔla kple kplɔla wɔnuteƒewo axɔ ŋgɔe. Le ta sia me la, míaƒo nu tso kakaɖedzinya etɔ̃lia si ku ɖe ale si wodo ŋugbe be woana anyigba wo wòazu woƒe domenyinu la ŋu. Le ta si akplɔe ɖo me la, míaƒo nu tso ŋugbe si wodo be Yehowa anɔ wo dome hã ŋu.—Eze. 47:13-21; 48:1-7, 23-29.

“Matsɔ Anyigba Sia Ana . . . Mi Wòazu Miaƒe Domenyinu”

5, 6. (a) Le ŋutega si Ezekiel kpɔ me la, anyigba kae woava ma? (Kpɔ foto si le nyati sia ƒe gɔmedzedze.) (b) Taɖodzinu kae le ŋutega si ku ɖe ale si woama anyigbaa ŋu la ŋu?

5 Xlẽ Ezekiel 47:14. Yehowa na Ezekiel kpɔ anyigba si ava nɔ abe “Eden bɔ” ene la ƒe akpa sue aɖe le ŋutega me la. (Eze. 36:35) Emegbe Yehowa gblɔ be: “Esiae nye anyigba si miama na Israel-to wuieveawo wòazu wo tɔ.” (Eze. 47:13) “Anyigba” si woava ma la nye Israel-nyigba si wogbugbɔ ɖo te si dzi aboyomeawo atrɔ ava nɔ. Emegbe le Ezekiel 47:15-21 la, Yehowa yi edzi ɖɔ anyigba bliboa ƒe liƒowo tsitotsito.

6 Taɖodzinu kae le ŋutega si ku ɖe ale si woama anyigbaa ŋu la ŋu? Ale si woɖɔ anyigbaa ƒe liƒowo ƒe dzidzeme tsitotsito na Ezekiel kple etɔ aboyomeawo na woka ɖe edzi be woagaɖo yewo denyigba lɔlɔ̃a te godoo. Bu ale si kakaɖedzinya mawo siwo tso Yehowa gbɔ siwo me kɔ nyuie la ade dzi ƒo na aboyomeawo ŋu kpɔ! Ðe woma anyigbaa na Mawu ƒe ame siwo nɔ anyi le blema wòzu woƒe domenyinu nyateƒea? Ɛ̃, womae na wo.

7. (a) Nu kae te dzɔdzɔ tso ƒe 537 D.Y. me, eye nu ka dzie wòɖoa ŋkui na mí? (b) Biabia ka ŋue míade ŋugble le gbã?

7 Le ƒe 537 D.Y., si nye ƒe 56 tso esime Ezekiel kpɔ ŋutegaa megbe la, aboyome akpe geɖe te tɔtrɔ gbɔ va Israel-nyigba dzi be yewoaxɔe wòazu yewo tɔ. Nu ɖedzesi mawo siwo dzɔ ɣeyiɣi didi aɖe va yi la, ɖoa ŋku nane si sɔ kplii si le dzɔdzɔm le Mawu ƒe amewo dome egbea dzi na mí. Le mɔ aɖe nu la, woma anyigba na woawo hã. Le mɔ ka nu? Yehowa na esubɔlawo yi gbɔgbɔmenyigba aɖe dzi be woaxɔe wòazu wo tɔ. Ne nyaa le alea la, ke ale si wogbugbɔ ɖo Ŋugbedodonyigbaa te le blema la ate ŋu afia nu vevi aɖewo mí tso ale si wogbugbɔ ɖo Mawu ƒe amewo ƒe gbɔgbɔmenyigba te egbea hã ŋu. Gake hafi míaƒo nu tso nufiame siwo le eme na mí ŋu la, gbãa na míade ŋugble tso nyabiase sia ŋu, “Nu ka  tae míate ŋu aƒo nya ta be gbɔgbɔmenyigba aɖe li egbea nyateƒe?”

8. (a) Dukɔ kae Yehowa tsɔ ɖo dzɔdzɔme Israel teƒe? (b) Nu kae nye gbɔgbɔmenyigba, alo paradiso la? (d) Ɣekaɣie esia dzɔ, eye ame kawoe va le anyigba sia dzi?

8 Le ŋutega aɖe si Ezekiel kpɔ do ŋgɔ me la, Yehowa ɖee fia be nyagblɔɖi siwo ku ɖe ale si woagbugbɔ Israel aɖo te ŋu la, ava eme le mɔ si lolo wu nu ne ye “subɔla David,” si le tsitre ɖi na Yesu Kristo, dze fiaɖuɖu gɔme. (Eze. 37:24) Esia dzɔ le ƒe 1914 K.Ŋ. Kaka ɣemaɣi naɖo la, gbɔgbɔme Israel si nye Kristotɔ siwo wotsɔ gbɔgbɔ si ami na la, va xɔ ɖe dzɔdzɔme Israel si nye Mawu ƒe amewo teƒe. (Xlẽ Mateo 21:43; 1 Petro 2:9.) Ke hã, menye ɖeko Yehowa na gbɔgbɔmedukɔ aɖe va xɔ ɖe dzɔdzɔme Israel teƒe ko evɔ o, ke boŋ gbɔgbɔmenyigba, alo paradiso aɖe hã va xɔ ɖe Israel-nyigba ŋutɔŋutɔ la hã teƒe. (Yes. 66:8) Abe ale si míekpɔe le agbalẽ sia ƒe Ta 17 lia me ene la, gbɔgbɔmenyigba mae nye gbɔgbɔmenɔnɔme si me míenɔa dedie le si me amesiamina susueawo subɔa  Yehowa le tso ƒe 1919 me. (Kpɔ aɖaka si nye 9B, “Nu Ka Tae Wònye Ƒe 1919?”) Esi ɣeyiɣiawo va nɔ yiyim la, ame siwo le mɔ kpɔm be yewoava nɔ agbe le anyigba dzi siwo nye ‘alẽ bubuawo,’ hã te anyigba ma dzi vava. (Yoh. 10:16) Togbɔ be gbɔgbɔmeparadisoa yi edzi le ta kekem egbea hã la, míakpɔ eƒe yayra siwo lolo wu le Armagedon megbe.

Woama Anyigba La Sɔsɔe Le Ðoɖo Aɖe Koŋ Nu

9. Mɔfiame kae Yehowa na tsitotsito ku ɖe ale si woama anyigbae ŋu?

9 Xlẽ Ezekiel 48:1, 28. Esi wokpɔ anyigba bliboa ƒe liƒowo vɔ la, Yehowa gblɔ ale si woamae la tsitotsito. Egblɔ be woama anyigbaa na to 12-awo sɔsɔe le ɖoɖo aɖe koŋ nu, tso dziehe va se ɖe anyiehe, eye woadze egɔme tso Dan ƒe to si le dziehe kekeake la dzi wòava wu enu ɖe Gad ƒe to si le anyieheliƒo dzi la dzi. Anyigba si to 12-awo dometɔ ɖe sia ɖe xɔ dze egɔme tso anyigbaa ƒe ɣedzeƒeliƒo dzi eye wòmlɔ anyi lɔbɔɔ va wu enu ɖe Ƒu Gã la, alo Mediterranea Ƒu si le ɣetoɖoƒekpa dzi la nu.—Eze. 47:20.

10. Kakaɖedzi kae ŋutegaa ƒe akpa sia anya na aboyome- awo?

10 Kakaɖedzi kae ŋutegaa ƒe akpa sia anya na aboyomeawo? Ale si Ezekiel ɖɔ anyigba si woama tsitotsitoe la anya na aboyomeawo kpɔe be anyigba la mama anɔ ɖoɖo nyui nu. Azɔ hã, ale si woma anyigba pɛpɛpɛ na to 12-awo katã la ɖo kpe edzi be aboyome siwo trɔ gbɔ la dometɔ ɖe sia ɖe axɔ anyigba aɖe wòanye eƒe domenyinu le anyigba si wogaɖo te la dzi. Ame aɖeke matrɔ agbɔ ava zu ame si si anyigba alo aƒe aɖeke mele o.

11. Nu kawoe míate ŋu asrɔ̃ tso ŋutega sia si nye nyagblɔɖi si ku ɖe anyigbaa mama ŋu la me? (Kpɔ aɖaka si nye “Ale Si Woma Anyigba Lae.”)

11 Nu kawoe míate ŋu asrɔ̃ tso ŋutega sia me egbea si ado ŋusẽ mí? Menye nunɔlawo, Lewi viwo alo amegãwo koe woana teƒee le Ŋugbedodonyigba si wogaɖo te la dzi o, ke boŋ woana teƒe to 12-awo me tɔ bubuawo katã hã. (Eze. 45:4, 5, 7, 8) Nenema kee egbea hã, menye amesiamina susɔeawo kple “ameha gã” me tɔ siwo le ŋgɔ xɔm koe woana teƒee le gbɔgbɔmeparadisoa me o, ke boŋ woana teƒe ameha gã la me tɔ susɔeawo hã. * (Nyaɖ. 7:9) Ne edze abe ɖoƒe si míele le habɔbɔa me le tsɛ ene gɔ̃ hã la, míele teƒe si le dedie eye dɔ vevi aɖe le mía si míawɔ le gbɔgbɔmenyigba sia dzi. Nya siawo faa akɔ na mí ŋutɔ!

Dɔ ka kee míewɔna le Mawu ƒe habɔbɔa me o, Yehowa dea asixɔxɔ míaƒe agbagbadzedzewo ŋu (Kpɔ Memama 11)

Nu Vevi Eve Aɖewo Siwo To Vovo—Nu Kae Wofia Na Mi?

12, 13. Mɔfiame siwo le tẽe kae Yehowa na ku ɖe ale si woama anyigbaa na toawo ŋu?

12 Mɔfiame siwo Yehowa na ku ɖe ale si woama anyigbaa ŋu la anya wɔ nuku na Ezekiel elabe woto vovo tso esiwo Mawu na Mose va yi la gbɔ. Na míade ŋugble tso wo dometɔ eve ŋu kpɔ. Gbãtɔ ku ɖe anyigbaa ŋu, eye evelia ku ɖe edzinɔlawo ŋu.

 13 Gbã, anyigba la. Wogblɔ na Mose be wòana to siwo lolo la ƒe anyigba nalolo wu to siwo melolo o la tɔ. (4 Mose 26:52-54) Gake le ŋutega si Ezekiel kpɔ me la, Yehowa na mɔfiamewoe be wòama anyigba na toawo ‘sɔsɔe ame sia ame axɔ eƒe gome [“ame sia ame tɔ asɔ kple nɔvia tɔ” etenuŋɔŋlɔ].’ (Eze. 47:14) Eya ta ele be didime si atso dzieheliƒo dzi va se ɖe anyieheliƒo dzi le domenyinu si to 12-awo dometɔ ɖe sia ɖe axɔ la nasɔ. Esia fia be Ŋugbedodonyigbaa si wɔa nu nyuie la ate ŋu aɖe vi na Israel-viwo katã sɔsɔe to ka ke mee woɖale o.

14. Aleke mɔfiame siwo Yehowa na ku ɖe amedzroviwo ŋu la to vovo kura na esi dze le Mose ƒe Sea me?

14 Evelia anyigba la dzi nɔlawo. Mose ƒe Sea kpɔ amedzroviwo ta eye wòɖe mɔ na wo be woasubɔ Yehowa gake womana anyigba wo o. (3 Mose 19:33, 34) Ke hã, nya si Yehowa gblɔ na Ezekiel la to vovo kura na esi wògblɔ va yi le Sea me. Yehowa gblɔ nɛ be: “To si me amedzrovia le la, eya mee miana domenyinui ɖo.” Yehowa to sedede sia dzi te fli ɖe vovototo gã si le “Israel vidzidziwo” kple amedzrovi siwo le anyigbaa dzi dome la me. (Eze. 47:22, 23) Ezekiel kpɔ le ŋutegaa me be, ame siwo le anyigba si wogaɖo te dzi la katã sɔ eye wowɔ ɖeka le Mawu subɔm.—3 Mose 25:23.

15. Nyateƒenya si ku ɖe Yehowa ŋu ka dzie eƒe mɔfiame siwo wòna ku ɖe anyigbaa kple edzinɔlawo ŋu ɖo kpee?

 15 Mɔfiame ɖedzesi eve siawo siwo wona Ezekiel ku ɖe anyigbaa kple edzinɔlawo ŋu la, anya na kakaɖedzi aboyomeawo. Wonya be Yehowa ana anyigba yewo sɔsɔe metsɔ le eme be yewonye Israel vidzidziwo alo amedzrovi siwo va le Yehowa subɔm o. (Ezra 8:20; Neh. 3:26; 7:6, 25; Yes. 56:3, 8) Azɔ hã, mɔfiame siawo de dzi ƒo na wo eye woɖo kpe edzi be Yehowa subɔla ɖe sia ɖe xɔ asi nɛ. (Xlẽ Hagai 2:7.) Egbea la, míeɖale mɔ kpɔm be míayi dziƒo alo anɔ agbe le anyigba dzi o, míawo hã míedea asixɔxɔ nyateƒenya ma ŋu.

16, 17. (a) Vi kae ŋugbledede tso mɔfiame si wona ku ɖe anyigbaa kple edzinɔlawo ŋu tsitotsito la aɖe na mí? (b) Le ta si akplɔe ɖo me la, nu ka mee míadzro?

16 Vi kae ŋugbledede tso mɔfiame tsitotsito si wona ku ɖe anyigbaa kple edzinɔlawo ŋu aɖe na mí? Woɖoa ŋku edzi na mí be ele be míabu ame sia ame sɔsɔe ahawɔ ɖeka, eye ele be nu siawo naɖe dzesi le mía nɔviwo ƒe xexea me katã ƒe habɔbɔa me egbea. Yehowa mekpɔa ame ŋkume o. Ele be míabia mía ɖokuiwo be: ‘Ðe mesrɔ̃a Yehowa ƒe ameŋkumemakpɔmakpɔa? Ðe mewɔa nu ɖe nɔviwo ŋu bubutɔe tso dzi me, metsɔ le eme be amea nye yevu alo ameyibɔ, alo nɔnɔme ka ke mee wòle oa?’ (Rom. 12:10) Edzɔa dzi na mí be Yehowa na mɔnukpɔkpɔa mí katã sɔsɔe be míava gbɔgbɔmeparadisoa me, afi si míetsɔa subɔsubɔ kɔkɔe si tso dzi blibo me la naa mía Fofo si le dziƒo la le si nana wòyraa mí.—Gal. 3:26-29; Nyaɖ. 7:9.

Ðe míesrɔ̃a Yehowa ƒe ameŋkumemakpɔmakpɔ eye míedea bubu amewo ŋu tso dzi mea? (Kpɔ Memama 15, 16)

17 Azɔ na míade ŋugble tso kakaɖedzinya enelia si ŋu woƒo nu tsoe le ŋutega mamlɛtɔ si Ezekiel kpɔ ƒe akpa mamlɛa ŋu, si nye ŋugbe si Yehowa do be yeanɔ kple aboyomeawo ŋu kpɔ. Nu kawoe míate ŋu asrɔ̃ tso ŋugbedodo ma me? Míakpɔ ŋuɖoɖoawo le ta si akplɔe ɖo me.

^ mm. 11 Ne èdi be yeanya teƒe tɔxɛ si wona nunɔlawo kple amegãwo kpakple dɔ si Yehowa de asi na wo le gbɔgbɔmenyigbaa dzi la, kpɔ agbalẽ sia ƒe Ta 14 lia.