Dzo kpo yi emenuwo dzi

Dzo kpo yi emenuawo dzi

 TA 9

“Mana Dzi Si To Mɔ Ðeka Wo”

“Mana Dzi Si To Mɔ Ðeka Wo”

EZEKIEL 11:19

NYA VEVITƆ: Gbugbɔgaɖɔɖo kple ale si woƒo nu tso eŋu le Ezekiel ƒe nyagblɔɖiawo me

1-3. Aleke Babilontɔwo ɖu fewu le Yehowa subɔlawo ŋu, eye nu ka tae?

TSƆE be yenye Yudatɔ wɔnuteƒe le Babilon. Mia detɔwo le aboyo me abe ƒe blaatɔ̃ alo esi wu ema ene. Abe ale si nèwɔna le Sabat ŋkeke dzi ene la, èyina be yeado go Yehowa subɔla bubuwo ne yewoade ta agu nɛ. Esi nèle zɔzɔm to amehawo dome la, èto gbedoxɔ kple trɔ̃xɔ gãgã siwo mele xexlẽme o la ŋu. Ame gbogbo aɖewo lɔ hoo yi teƒe mawo le vɔ sam eye wole hawo dzim tsɔ le trɔ̃ vovovo siwo dometɔ ɖekae nye Marduk la subɔm.

2 Esi nèdzo le amehawo gbɔ vɔ la, èva wɔ ɖeka kple ƒuƒoƒo sue si nye hawòti tadeagulawo. * Miedi teƒe aɖe si ɖoɖoezizi le, ɖewohĩ le dua ƒe tɔʋu aɖe to, be yewoado gbe ɖa, adzi kafukafuhawo eye yewoadzro Mawu ƒe Nyaa me ɖekae. Esi miele gbe dom ɖa la, miese tɔdziʋu siwo le tɔgoa ŋu la ŋkɔ. Wò dzi dze eme be tomefafa le afi sia. Mèdi kura be nutoa me tɔ aɖeke nanya be yewole teƒe sia ale be woava gblẽ kpekpea me abe ale si wowɔnɛ zi geɖe ene o. Nu ka tae wowɔa nu sia?

 3 Wonya Babilon be eɖu aʋa geɖe dzi eye dua me tɔwo gblɔna be yewoƒe mawuwoe kpena ɖe yewo ŋu yewoɖua aʋa dzi. Le Babilontɔwo gome la, ale si wotsrɔ̃ Yerusalem gbidii la na wobui be yewoƒe mawu Marduk sesẽ wu Yehowa! Eya ta woɖua fewu le wò Mawu kple mia deviwo ŋu. Ɣeaɖewoɣia woɖua fewu gblɔna be: “Midzi Zion ha na mí”! (Ps. 137:3) Psalmo geɖe ƒo nu tso ale si Zion ɖu Yehowa ƒe futɔwo dzi ŋu. Ðewohĩ Babilontɔwo hea susu yia psalmo mawo dzi tsɔ ɖua fewu le wo ŋu. Gake psalmo bubuwo ƒo nu tso Babilontɔwo ŋu. Le kpɔɖeŋu me, wo dometɔ ɖeka gblɔ be: “Wona Yerusalem zu glikpo. . . . Fewuɖunu kple alɔmeɖenu na ame siwo ƒo xlã mí.”—Ps. 79:1, 3, 4.

4, 5. Mɔkpɔkpɔ ka ŋue Ezekiel ƒe nyagblɔɖia ƒo nu tsoe, eye nu ka mee míadzro le ta sia me? (Kpɔ foto si le nyati sia ƒe gɔmedzedze.)

4 Yudatɔ xɔsegbela aɖewo hã li siwo ɖua fewu le ŋuwò le esi nèxɔ Yehowa kple eƒe nyagblɔɖilawo dzi se ta. Togbɔ be woɖua fewu alea hã la, tadedeagu dzadzɛa nana wò kple wò ƒomea ƒe dzi dzea eme. Dzidzɔe wònyena be miado gbe ɖa adzi ha ɖekae. Mawu ƒe Nyaa xexlẽ hã vivia mia nu. (Ps. 94:19; Rom. 15:4) Tsɔe be gbe ɖekaa, hawòti tadeagula aɖe tsɔ nu tɔxɛ aɖe, si nye Ezekiel ƒe nyagblɔɖi si woŋlɔ ɖe agbalẽxatsaxatsa me va kpekpea. Ne èse nu tso ŋugbe si Yehowa do be yeana yeƒe amewo natrɔ ayi wo de ŋu nya la, edzɔa dzi na wò. Wò dzi dzea eme ne wole nyagblɔɖi ma xlẽm sesĩe, esia nana wò susu yia mɔkpɔkpɔ dodzidzɔname si nye be gbe ɖekaa wò kple wò ƒomea miatrɔ ayi aƒe eye miakpe asi ɖe eŋu woagbugbɔ aɖɔ nuwo ɖo dzi!

5 Ŋugbedodo siwo ku ɖe ale si woagbugbɔ aɖɔ nuwo ɖo ŋu sɔŋ ye le Ezekiel ƒe nyagblɔɖia me. Na míadzro nya vevi ma si na mɔkpɔkpɔ ame la me. Mɔ ka nue ŋugbedodo mawo va eme na aboyomeawo le? Nu kae nyagblɔɖi mawo fia na mí egbea? Le wo dometɔ aɖewo gome la, míaƒo nu tso ale si woava eme le etsɔme la hã ŋu.

“Woakplɔ Wo Adzoe, Woaɖe Aboyo Wo”

6. Aleke Mawu xlɔ̃ nu eƒe dukɔ dzeaglã la enuenu?

6 Yehowa to Ezekiel dzi gblɔ ale si wòahe to na eƒe amewo le woƒe aglãdzedze ta eme kɔ nyuie. Yehowa gblɔ be, “Woakplɔ wo adzoe, woaɖe aboyo wo.” (Eze. 12:11) Abe ale si míekpɔe le agbalẽ sia ƒe Ta 6 lia me enea, Ezekiel wɔ ale si woadrɔ̃ ʋɔnu wo la fia. Gake menye esiae nye zi gbãtɔ si woxlɔ̃ nu wo o. Anɔ abe ƒe akpe ɖeka ene do ŋgɔ le Mose ŋɔli la, Yehowa xlɔ̃ nu eƒe amewo be ne woyi edzi sẽ to la, woakplɔ wo ayi aboyo me. (5 Mose 28:36, 37) Nyagblɔɖilawo abe Yesaya kple Yeremiya ene hã xlɔ̃ nu wo alea.—Yes. 39:5-7; Yer. 20:3-6.

7. Mɔ kawo nue Yehowa he to na eƒe amewo le?

 7 Gake nublanuitɔea, wodo toku nuxlɔ̃amenya mawo. Esi ɣeyiɣiawo va nɔ yiyim la, Yehowa ƒe amewo ƒe aglãdzedze, trɔ̃subɔsubɔ, nuteƒemawɔmawɔ kple ale si kplɔlawo ƒe nuwɔna na nu fitifiti wɔwɔ va bɔ la na Yehowa ƒe dzi gbã. Eya ta ena dɔ to, eye esia nye vɔ̃ gã kple ŋukpe elabe woƒe anyigba nye “afi si notsi kple anyitsi [nɔ] sisim le” kpɔ. (Eze. 20:6, 7) Eye abe ale si Yehowa gblɔe do ŋgɔ xoxoxo ene la, ena woɖe aboyo eƒe ame siwo dze aglã la tsɔ he to na wo. Le ƒe 607 D.Y. me la, Nebukadnezar si tso Babilon tu nu kpli wo mlɔeba esi wòtsrɔ̃ Yerusalem kple gbedoxɔa. Woɖe aboyo Yudatɔ akpe geɖe siwo tsi agbe la yi Babilon. Afi mae woɖu fewu le wo ŋu le eye wotsi tsitre ɖe wo ŋu abe ale si wòdze le ta sia ƒe gɔmedzedze ene.

8, 9. Aleke Mawu xlɔ̃ nu Kristo hamea tso xɔsegbegbe ŋu?

8 Ðe nu si dzɔ ɖe ame siwo yi aboyo me le Babilon dzi la tɔgbi dzɔ ɖe Kristo hamea hã dzia? Edzɔ ɖe wo dzi! Abe ale si woxlɔ̃ nu Yudatɔ siwo nɔ anyi le blema ene la, woxlɔ̃ nu Kristo yomedzelawo hã do ŋgɔ. Le Yesu ƒe subɔsubɔdɔa ƒe gɔmedzedze la, egblɔ be: “Mikpɔ nyuie le aʋatsonyagblɔɖila siwo vaa mia gbɔ le alẽgbalẽ me, evɔ le ememe la, wonye amegãxi nyanyrawo la ŋuti.” (Mat. 7:15) Ƒe aɖewo megbe la gbɔgbɔ ʋã apostolo Paulo wòna nuxlɔ̃ame sia tɔgbi be: “Menya be le nye dzodzo megbe la, amegãxi nyanyrawo age ɖe mia dome, eye womawɔ nu ɖe alẽha la ŋu le lɔlɔ̃ me o, eye le miawo ŋutɔwo mia dome la, ame aɖewo atso agblɔ nya totrowo be yewoahe nusrɔ̃lawo ne woadze yewo yome.”—Dɔw. 20:29, 30.

9 Wofia ale si Kristotɔwo awɔ ade dzesi ame gblẽku mawo ne woaƒo asa na wo. Wona mɔfiame Kristotɔ hamemetsitsiwo be woaɖe xɔsegbela mawo le haa me. (1 Tim. 1:19; 2 Tim. 2:16-19; 2 Pet. 2:1-3; 2 Yoh. 10) Ke hã abe Israel kple Yuda vi siwo nɔ anyi le blema ene la, Kristotɔ geɖe do toku nuxlɔ̃ame vevi siawo vivivi. Kaka ƒe alafa gbãtɔ nawu enu la, xɔsegbegbe va xɔ aƒe ɖe hamea me. Yohanes si nye apostolo mamlɛtɔ si nɔ agbe le ƒe alafa gbãtɔ Kristotɔwo Ŋɔli ƒe nuwuwu lɔƒo la de dzesii be xɔsegbegbe kple aglãdzedze ɖo hamea me. Yohanes koe ganye mɔxenu na xɔsegbegbe. (2 Tes. 2:6-8; 1 Yoh. 2:18) Nu kae va dzɔ le Yohanes ƒe ku megbe?

10, 11. Aleke lo si Yesu do ku ɖe lu kple gbe vɔ̃ɖiawo ŋu la va eme tso ƒe alafa evelia K.Ŋ. heyi?

10 Le Yohanes ƒe ku megbe la, lo si Yesu do ku ɖe gbe vɔ̃ɖiawo ŋu la te emevava. (Xlẽ Mateo 13:24-30.) Abe ale si Yesu kpɔe do ŋgɔ ene la, Satana va wu “gbe vɔ̃ɖi” alo alakpa Kristotɔwo ɖe hamea me eye nuwo te gbegblẽ kabakaba le hamea me. Ale si trɔ̃subɔsubɔ, trɔ̃subɔlawo ƒe azãwo kple nuwɔnawo, alakpanufiafia siwo dzɔ tso xexemenunyala mavɔ̃mawuwo kple Satana ƒe habɔbɔwo gbɔ siwo va ge ɖe hame si Yehowa  ƒe Via ɖo me la, anya gbã dzi na Yehowa ale gbegbe! Afɔ kae Yehowa ɖe? Abe ale si wòtu nu kple Israel-vi mawɔnuteƒeawo ene la, eɖe mɔ wokplɔ eƒe amewo yi aboyo me. Tso ƒe alafa evelia K.Ŋ. lɔƒo la, Kristotɔ siwo le abe lu ene la va bu ɖe alakpa Kristotɔwo dome. Le mɔ aɖe nu la, Kristotɔ vavãwo yi Babilon Gã la, si nye alakpasubɔsubɔha siwo katã le xexea me la, ƒe aboyo me, evɔ alakpa Kristotɔwo ya va de Babilon Gã la dzi. Esi alakpa Kristotɔwo nɔ ta kekem la, Kristodukɔa do ta ɖa.

11 Le ɣeyiɣi siwo me Kristodukɔa kpɔ ŋusẽ me la, Kristotɔ wɔnuteƒe aɖewo siwo nye “lu” siwo le Yesu ƒe lododoa me la, kpɔtɔ nɔ anyi. Abe Yudatɔ siwo ŋu woƒo nu tsoe le Ezekiel 6:9 ene la, woɖo ŋku Mawu vavã la dzi. Wo dometɔ aɖewo tsi tsitre ɖe Kristodukɔa ƒe alakpanufiafiawo ŋu. Gake woɖu fewu le wo ŋu eye woti wo yome. Ðe Yehowa aɖe asi le eƒe amewo ŋu kura be alakpasubɔsubɔ naɖu wo dzia? Ao! Abe ale si Yehowa he to na Israel-vi siwo nɔ anyi le blema ene la, nenema kee wòhe to na Kristotɔ vavãwo ale si dze eye mewɔe wògbɔ eme o. (Yer. 46:28) Azɔ hã, Yehowa na mɔkpɔkpɔ eƒe amewo. Na míagatrɔ ɖe Yudatɔ siwo woɖe aboyoe yi blema Babilon la  ŋu ne míakpɔ ale si Yehowa ka ɖe edzi na wo be woana ablɔɖe woe la ɖa.

Ƒe alafa geɖee nye esia si Babilon Gã la ti Kristotɔ vavãwo yome (Kpɔ Memama 10, 11)

“Nye Dziku Nu Atso”

12, 13. Nu ka tae dziku si Yehowa do ɖe eƒe ame siwo woɖe aboyoe le Ezekiel ƒe ɣeyiɣia me ŋu la nu afa mlɔeba?

12 Yehowa do dziku ɖe eƒe amewo ŋu, gake eka ɖe edzi na wo be dziku si yedo ɖe wo ŋu le dzɔdzɔenyenye me la manɔ anyi ɖaa o. Le kpɔɖeŋu me, egblɔ be: “Nye dziku nu atso, eye nye dɔmedzoe ɖe wo ŋu nu abɔbɔ, eye nye dzi afa. Eye ne meɖe nye dɔmedzoe ɖe wo ŋu vɔ la, ekema woadze sii be, nye Yehowa ye ƒo nu hebia ɖokuitsɔtsɔna blibo.” (Eze. 5:13) Nu ka tae Yehowa ƒe dziku nu afa mlɔeba?

13 Wokplɔ Yudatɔ wɔnuteƒe aɖewo kpe ɖe ame mawɔnuteƒe siwo woɖe aboyoe la ŋu. Azɔ hã, Mawu gblɔ to Ezekiel dzi be yeƒe ame aɖewo atrɔ dzi me esi wokpɔtɔ le aboyo me. Yudatɔ mawo siwo trɔ dzi me la, aɖo ŋku ŋukpenanu siwo wowɔ tsɔ dze aglã ɖe woƒe Mawua ŋu la dzi eye woaɖe kuku na Yehowa be wòatsɔe ake yewo ne wòave yewo nu. (Eze. 6:8-10; 12:16) Ezekiel, nyagblɔɖila Daniel kple exɔlɔ̃ etɔ̃awo le nuteƒewɔlaawo dome. Le nyateƒe me la, Daniel nɔ agbe didi eye wòkpɔ eteƒe esime woɖe aboyo wo kple esime wotrɔ gbɔ. Gbe  si wòdo ɖa tso dzi me ku ɖe Israel-viwo ƒe dzimetɔtrɔ ŋu la dze le Daniel ta 9 lia me. Ðikeke mele eme o be nya siwo wògblɔ la ɖe ale si aboyome gbogbo siwo nɔ mɔ kpɔm be Yehowa natsɔ yewoƒe nu vɔ̃ ake yewo eye wòagayra yewo la nɔ sesem le wo ɖokuiwo me la fia. Eya ta bu ale si dzi adzɔ wo ne wobu ŋugbe siwo Mawu to Ezekiel dzi do na wo ŋu kpɔ!

14. Nu ka tae Yehowa ana eƒe amewo natrɔ agbɔ va wo de?

14 Gake susu vevi bubu aɖe tae Yehowa ɖoe be woaɖe asi le yeƒe amewo ŋu ne woagbugbɔ nuwo aɖɔ ɖo. Woƒe aboyomenɔnɔ ɣeyiɣi didi la awu enu, menye le esi wodze nɛ ta o, ke boŋ ɣeyiɣia gade na Yehowa be wòakɔ eya ŋutɔ ƒe ŋkɔ ŋu le dukɔwo ŋkume. (Eze. 36:22) Babilontɔ mawo adze sii kɔtɛ be yewoƒe mawu, siwo nye gbɔgbɔ vɔ̃wo abe Marduk ene, megogo Aƒetɔ Dziɖulagã Yehowa, le mɔ aɖeke nu kura o! Na míade ŋugble tso ŋugbedodo atɔ̃ siwo Yehowa ƒe gbɔgbɔ ʋã Ezekiel wògblɔ na etɔ aboyomeawo la ŋu. Gbãa, na míaƒo nu tso nu si ŋugbedodo mawo dometɔ ɖe sia ɖe fia na nuteƒewɔla mawo ŋu. Emegbe míaƒo nu tso ale si ŋugbedodo mawo va eme le mɔ si lolo wu nu la ŋu.

15. Ŋugbe kae Yehowa do ku ɖe tadedeagu dzadzɛa ŋu?

15 ŊUGBEDODO 1. Trɔ̃subɔsubɔ alo nuwɔna nyɔŋu siwo dzɔ tso alakpasubɔsubɔ me aɖeke maganɔ anyi o. (Xlẽ Ezekiel 11:18; 12:24.) Abe ale si míeƒo nu tso eŋu le agbalẽ sia ƒe Ta 5 lia me ene la, wotsɔ alakpasubɔsubɔ nuwɔnawo abe trɔ̃subɔsubɔ ene ƒo ɖi Yerusalem kple gbedoxɔa. Esia na ameawo va nɔ nu gbegblẽwo wɔm hetrɔ megbe de Yehowa. Yehowa to Ezekiel dzi gblɔ ɖi be aboyomeawo anɔ mɔ kpɔm be ɣeyiɣi aɖe ava si yewoagatsɔ tadedeagu dzadzɛ si naneke meƒo ɖii o la ana Mawu. Yayra bubu siwo katã ku ɖe ale si woagbugbɔ aɖɔ nuwo ɖo ŋu la nɔ te ɖe nya vevi sia dzi, eyae nye: ɖoɖo si Mawu wɔ be woagbugbɔ tadedeagu dzadzɛa aɖo anyi.

16. Ŋugbe kae Yehowa do na eƒe amewo ku ɖe wo denyigbaa ŋu?

 16 ŊUGBEDODO 2. Woatrɔ ayi wo de. Yehowa gblɔ na aboyomeawo be: “Matsɔ Israel-nyigba la ana mi.” (Eze. 11:17) Ŋugbedodo sia le etɔxɛ elabe Babilontɔ siwo nɔ alɔme ɖem le Mawu ƒe ame siwo woɖe aboyoe ŋu la, mena mɔkpɔkpɔ aɖeke wo be yewoaɖe asi le wo ŋu woatrɔ ayi wo denyigba si wolɔ̃ la dzi o. (Yes. 14:4, 17) Azɔ hã, ne ame siwo atrɔ ayi la yi edzi wɔ nuteƒe la, woƒe anyigbaa awɔ nu, eye esia ana woakpɔ nu aɖu eye dɔ hã anɔ wo si woawɔ. Ale si dɔwuame kple fukpekpe na woɖu ŋukpe la azu gbe aɖe gbe nya.—Xlẽ Ezekiel 36:30.

17. Aleke Yehowa abu vɔ siwo woasa nɛ lae?

17 ŊUGBEDODO 3. Woagatsɔ nunanawo vɛ be woatsɔ asa vɔ le Yehowa ƒe vɔsamlekpuia dzi. Abe ale si míekpɔe le agbalẽ sia ƒe Ta 2 lia me enea, le Sea me la, vɔsawo kple nunanawo nye tadedeagu dzadzɛa ƒe akpa vevi aɖe. Ne aboyome siwo trɔ gbɔ la yi edzi ɖo to eye wosubɔ Yehowa ɖeɖe ko la, woƒe vɔsawo adze eŋu. Ekema woalé avu ɖe woƒe nu vɔ̃wo ta eye woawo kple Mawu dome anɔ kplikplikpli. Yehowa do ŋugbe be: ‘Israel ƒe aƒe blibo la asubɔm le anyigba la dzi, miaƒe nu adze ŋunye le afi ma, eye mabia miaƒe nudzɔdzɔwo kple miaƒe vɔsanu gbãtɔ, siwo anye miaƒe nu kɔkɔewo katã la, le afi ma.’ (Eze. 20:40) Woagbugbɔ tadedeagu dzadzɛa aɖo anyi eye esia anye yayra na Mawu ƒe amewo.

18. Aleke Yehowa akplɔ eƒe amewoe?

18 ŊUGBEDODO 4. Woaɖe kplɔla vɔ̃ɖiwo ɖa. Esi kplɔla vɔ̃ɖiwo nɔ Mawu ƒe amewo nu tae wowɔ vodadawo ɖo. Yehowa do ŋugbe be yeaɖe wo ɖa. Edo ŋugbe ku ɖe kplɔla vɔ̃ɖi mawo ŋu be: “Mana woadzudzɔ nye alẽawo kpɔkplɔ, . . . Maɖe nye alẽwo le nu me na wo.” Gake Yehowa ka ɖe edzi na eƒe ame siwo nye nuteƒewɔlawo ya be: “Malé be na nye alẽwo.” (Eze. 34:10, 12) Aleke wòawɔe? Aɖo ame siwo nye nuteƒewɔlawo woƒe kplɔlawoe.

19. Ŋugbe kae Yehowa do ku ɖe ɖekawɔwɔ ŋu?

 19 ŊUGBEDODO 5. Yehowa subɔlawo awɔ ɖeka. Bu ale si wòate ɖe mawusubɔla wɔnuteƒewo dzi esi wokpɔ be ɖekawɔwɔ menɔ Mawu ƒe amewo dome do ŋgɔ hafi wova ɖe aboyo wo o ŋu kpɔ. Esi aʋatsonyagblɔɖilawo kple kplɔla vɔ̃ɖiwo kpɔ ŋusẽ ɖe wo dzi ta la, wodze aglã ɖe nyagblɔɖila siwo nɔ Yehowa teƒe la ŋu eye esia de mama wo dome. Eya ta nu si do dzidzɔ na wo le gbugbɔgaɖɔɖo ƒe ŋugbe si wodo na wo to Ezekiel dzi la ƒe akpa vevi aɖee nye esi gblɔ be: “Mana dzi si to mɔ ɖeka wo, eye made gbɔgbɔ yeye wo me.” (Eze. 11:19) Ne Yudatɔ aboyome siwo trɔ gbɔ la yi edzi na wo kple Yehowa Mawu dome le nyuie eye ɖekawɔwɔ le wo kple wo nɔviwo dome la, futɔ aɖeke mate ŋu aɖu wo dzi o. Ekema dukɔ bliboa ƒe nuwɔna agahe kafukafu vɛ na Yehowa, ke menye be wòado vloe o.

20, 21. Mɔ kawo nue ŋugbe siwo Mawu do na aboyomeawo la va eme le?

20 Ðe ŋugbedodo atɔ̃ mawo va eme ɖe Yudatɔ siwo trɔ gbɔ tso aboyo me la dzia? Anyo be míaɖo ŋku nya siwo nuteƒewɔla Yosua si nɔ anyi le blema gblɔ la dzi. Egblɔ be: “Nya ɖeka pɛ hã medo kpo emevava le ŋugbe nyui siwo katã Yehowa mia  Mawu do na mi la me o. Wo katã va eme na mi. Wo dometɔ ɖeka pɛ hã medo kpo emevava o.” (Yos. 23:14) Abe ale si wònɔ le Yosua ŋɔli ene la, nenemae wòanɔ le aboyome siwo trɔ gbɔ va wo denyigba dzi la hã gome.

21 Yudatɔawo dzudzɔ trɔ̃subɔsubɔ eye wodzudzɔ alakpasubɔsubɔ ƒe nuwɔna nyɔŋu bubu siwo na wotrɔ megbe de Yehowa la wɔwɔ. Togbɔ be edze abe manya wɔ o hã, wotrɔ gbɔ va wo denyigba dzi, wode agble ɖe edzi eye agbea vivi wo nu le afi ma. Nu gbãtɔ siwo wowɔ ƒe ɖee nye be woɖi Yehowa ƒe vɔsamlekpuia le Yerusalem eye wosa vɔ siwo dzea eŋu la le edzi. (Ezra 3:2-6) Yehowa ɖo kplɔla siwo vɔ̃a Mawu la wo nu eye esia nye yayra na wo. Kplɔla siawo dometɔ aɖewoe nye nuteƒewɔla Ezra si nye nunɔla kple nugbugbɔgaŋlɔla, nutodziɖula Nehemiya kple Zerubabel, Nunɔlagã Yosua kpakple Hagai, Zakariya kple Malaki siwo nye nyagblɔɖila siwo ƒo dzi le. Esi dukɔa yi edzi ɖo to Yehowa ƒe mɔfiamewo la, ɖekawɔwɔ si tɔgbi womekpɔ kpɔ o hena ɣeyiɣi didi aɖe la va nɔ wo dome.—Yes. 61:1-4; xlẽ Yeremiya 3:15.

22. Aleke míewɔ nya be nya- gblɔɖi siwo ku ɖe gbugbɔgaɖɔɖoa ŋu si va eme zi gbãtɔ la nye nu siwo ava va la ƒe sue aɖe ko?

 22 Ðikeke mele eme o be ale si ŋugbe siwo Yehowa do ku ɖe gbugbɔgaɖɔɖoa ŋu va eme zi gbãtɔ la de dzi ƒo ale gbegbe! Ke hã nu siwo ava va la ƒe sue aɖe koe nye ema va eme. Aleke míewɔ nya? Ne ameawo yi edzi ɖo to Yehowa eye wowɔ ɖe eƒe mɔfiamewo dzi ko hafi ŋugbedodo siawo ava eme na wo. Ke hã Yudatɔwo gava dze aglã emegbe eye womeɖo to Yehowa o. Gake abe ale si Yosua gblɔe ene la Yehowa ƒe ŋugbedodowo vaa eme ɣesiaɣi. Eya ta ŋugbedodoawo agava eme le mɔ si lolo wu nu eye woanɔ anyi ɖaa. Na míakpɔ ale si wova emee ɖa.

“Miaƒe Nu Adze Ŋunye”

23, 24. Ɣekaɣie “ɣeyiɣi si me woaɖɔ nuwo katã ɖo” la dze egɔme, eye aleke wòdze egɔmee?

23 Esi míesrɔ̃a Biblia ta la, míenya be nuɖoanyi vɔ̃ɖi sia ɖo eƒe ŋkeke mamlɛawo me tso ƒe 1914 me. Gake ŋkeke siwo me míele la mena dzi ɖe le mí Yehowa subɔlawo ƒo o. Le nyateƒe me la, Biblia ɖee fia be nu ɖedzesi aɖe dzɔ tso ƒe 1914 ƒe gɔmedzedze, esiae nye “ɣeyiɣi si me woaɖɔ nuwo katã ɖo.” (Dɔw. 3:21) Aleke míewɔ nya? Enyo, nu kae dzɔ le dziƒo le ƒe 1914 me? Woɖo Yesu Kristo zi dzi wòzu Mesia Fia la! Mɔ ka nue nudzɔdzɔ sia ɖee fia le be wodze nuwo gbugbɔgaɖɔɖoa gɔme? Ðo ŋku edzi be Yehowa do ŋugbe na Fia David be eƒe ƒomea anye fiaƒome ɖaa. (1 Kron. 17:11-14) Gake fia siwo tso David ƒe ƒomea me la nu tso esime Babilontɔwo va tsrɔ̃ Yerusalem le ƒe 607 D.Y. me.

24 Yesu si nye “Amegbetɔvi” la, nye David ƒe dzidzimevi, eya ta eyae va zu domenyila si dze le se nu be wòazu fia le David ƒe fiaƒomea me. (Mat. 1:1; 16:13-16; Luka 1:32, 33) Le ƒe 1914 me esi Yehowa tsɔ Yesu ɖo zi dzi le dziƒo la, “ɣeyiɣi si me woaɖɔ nuwo katã ɖo” la dze egɔme! Azɔ mɔ ʋu na Yehowa be wòato Fia deblibo ma dzi be wòayi nuwo gbugbɔgaɖɔɖodɔa dzi.

25, 26. (a) Ɣekaɣie aboyo si me Mawu ƒe amewo nɔ le Babilon Gã la me ƒe geɖe la wu enu, eye aleke míewɔ nya? (Kpɔ aɖaka si nye “Nu Ka Tae Wònye Ƒe 1919?”) (b) Nyagblɔɖi kae te emevava tso ƒe 1919 dzi heyi?

 25 Nu gbãtɔ siwo Kristo wɔ esi wòzu Fia la dometɔ ɖekae nye be eya kple Fofoa wova lé ŋku ɖe ɖoɖo si wowɔ ɖe tadedeagu dzadzɛa ŋu le anyigba dzi la ŋu. (Mal. 3:1-5) Abe ale si Yesu gblɔe ɖi le lododo si ku ɖe lu kple gbe vɔ̃ɖiawo ŋu me ene la, esesẽ be woakpɔ vovototo si le luawo kple gbe vɔ̃ɖiawo, siwo nye Kristotɔ amesiamina vavãwo kple alakpatɔawo dome, eye esia nɔ anyi ɣeyiɣi didi aɖe. * Gake fifia nuŋeɣia ɖo le ƒe 1914 me, eye vovototoa dze ƒãa. Ƒe geɖe do ŋgɔ na ƒe 1914 la, Biblia Nusrɔ̃vi wɔnuteƒewo nɔ nu klom le Kristodukɔa ƒe vodada gãwo dzi eye wonɔ wo ɖokuiwo ɖem ɖa le habɔbɔ mawɔnuteƒe ma ŋu vivivi. Ɣeyiɣia de na Yehowa be wòagbugbɔ wo aɖo te bliboe. Esi “nuŋeɣia ɖo,” ƒe ʋɛ aɖewo megbe, le ƒe 1919 ƒe gɔmedzedze la, Mawu ƒe amewo do le Babilon Gã la me keŋkeŋ. (Mat. 13:30) Woƒe aboyome nɔnɔa wu enu!

26 Ezekiel ƒe nyagblɔɖi siwo ku ɖe gbugbɔgaɖɔɖoa ŋu la te emevava le mɔ si lolo kura wu ɖe sia ɖe si Mawu ƒe amewo kpɔ kpɔ la nu le blema. Azɔ na míagaƒo nu tso ale si ŋugbedodo atɔ̃ siwo ŋu míeƒo nu tsoe va yi la va eme le mɔ si lolo wu nu ŋu.

27. Mɔ ka nue Mawu kɔ eƒe amewo ŋu tso trɔ̃subɔsubɔ me le?

27 ŊUGBEDODO 1. Trɔ̃subɔsubɔ alo nuwɔna nyɔŋu siwo dzɔ tso alakpasubɔsubɔ me aɖeke maganɔ anyi o. Le ƒe alafa 19 lia ƒe nuwuwu kple ƒe alafa 20 lia ƒe gɔmedzedze la, Kristotɔ wɔnuteƒewo kpea ta ɖekae eye wonɔ asi ɖem le nuwɔna siwo dzɔ tso alakpasubɔsubɔ me la ŋu. Wogbe nu le nufiafia siwo nye mawuɖekaetɔ̃, luʋɔ makumaku kple dzomavɔ gbɔ be wonye nufiafia siwo metso Ŋɔŋlɔawo me o, alakpasubɔsubɔ mee wodzɔ tso. Woklo nu le nɔnɔmewɔwɔ siwo wozãna le mawusubɔsubɔ me la dzi be wonye trɔ̃subɔsubɔ. Vivivi la, Mawu  ƒe amewo va kpɔe be atitsoga zazã le subɔsubɔ me hã nye trɔ̃subɔsubɔ.—Eze. 14:6.

28. Mɔ ka nue Yehowa ƒe amewo trɔ va woƒe anyigba dzi le?

28 ŊUGBEDODO 2. Mawu ƒe amewo trɔ yi gbɔgbɔmenyigba aɖe dzi. Esi Kristotɔ wɔnuteƒeawo ɖe asi le Babilontɔwo ƒe nufiafiawo ŋu la, wokpɔe be yewova le gbɔgbɔmenyigba aɖe si sɔ nyuie la dzi, si fia be wova le nɔnɔme aɖe si me womagakpe fu alo gbɔgbɔmedɔ nawu wo le azɔ o la me. (Xlẽ Ezekiel 34:13, 14.) Abe ale si míagava kpɔe le agbalẽ sia ƒe Ta 19 lia me ene la, Yehowa tsɔ gbɔgbɔmenuɖuɖu gbogbo aɖewo yra anyigba ma.—Eze. 11:17.

29. Aleke wogatrɔ susu ɖe gbeƒãɖeɖedɔa ŋu geɖe wu le ƒe 1919 me?

29 ŊUGBEDODO 3. Woagatsɔ nunanawo vɛ be woatsɔ asa vɔ le Yehowa ƒe vɔsamlekpuia dzi. Le ƒe alafa gbãtɔ Kristotɔwo Ŋɔli ke la, wofia Kristotɔwo be menye lãwo ŋutɔŋutɔe  woatsɔ ava sa vɔe na Mawu o, ke boŋ nunana siwo xɔ asi wu, si nye nya siwo wogblɔna tsɔ kafua Yehowa kple ale si woɖea gbeƒã tso eŋu na ame bubuwo. (Heb. 13:15) Esime wonɔ aboyo me ƒe alafa geɖe la, ɖoɖo aɖeke menɔ anyi be woasa vɔ siawo tɔgbi o. Ke hã kaka woƒe aboyomenɔɣia nawu enu la, Mawu ƒe amewo nɔ kafukafuvɔ mawo sam xoxo. Woƒe ŋku biã ɖe gbeƒãɖeɖe ŋu eye wokafua Mawu dzidzɔtɔe le woƒe kpekpewo me. Tso ƒe 1919 dzi la, “kluvi nuteƒewɔla kple aɖaŋudzela” la va trɔ susu ɖe gbeƒãɖeɖedɔa ŋu wu eye wowɔ ɖoɖo ɖe eŋu nyuie. (Mat. 24:45-47) Esia na ame gbogbo aɖewo siwo le dzidzim ɖe edzi la va le Yehowa ƒe ŋkɔ kɔkɔea kafum si na eƒe vɔsamlekpuia dzi yɔ gbagba!

30. Nu kae Yesu wɔ tsɔ kpɔ ale si eƒe amewo hiã alẽkplɔla nyuiwo gbɔ?

30 ŊUGBEDODO 4. Woaɖe kplɔla vɔ̃ɖiwo ɖa. Kristo na ablɔɖe Mawu ƒe amewo tso Kristodukɔa ƒe kplɔla gblẽku ɖokuitɔdilawo si me. Woɖe kplɔla siwo wɔa nu abe kplɔla mawɔnuteƒe mawo ene la ɖa le ɖoƒe si wonɔ le Kristo hamea me. (Eze. 20:38) Yesu si nye Alẽkplɔla Nyui la kpɔ egbɔ be wolé be na yeƒe alẽawo nyuie. Le ƒe 1919 me la, eɖo kluvi nuteƒewɔla kple aɖaŋudzelaa. Kristotɔ amesiamina wɔnuteƒewo ƒe ƒuƒoƒo sue sia xɔ ŋgɔ, na gbɔgbɔmenuɖuɖu Mawu ƒe amewo, si wɔe be wolé be na Mawu ƒe amewo nyuie. Emegbe wona hehe hamemetsitsiwo be woalé be na “Mawu ƒe alẽha” la. (1 Pet. 5:1, 2) Zi geɖe la, wozãa nya siwo woŋlɔ ɖe Ezekiel 34:15, 16, si tso Mawu ƒe gbɔgbɔ me la tsɔ ɖoa ŋku dzidzenu si Yehowa Mawu kple Yesu Kristo ɖo la dzi na Kristotɔ hamemetsitsiwo.

31. Aleke Yehowa na nyagblɔɖi si le Ezekiel 11:19 la va emee?

31 ŊUGBEDODO 5. Yehowa subɔlawo awɔ ɖeka. Esi ƒeawo va nɔ yiyim la, Kristodukɔa ma ɖe sɔlemeha vovovowo, ƒuƒoƒowo kple kɔmama akpe geɖewo me, eye ɖekawɔwɔ mele wo dome o. To vovo na wo la, Yehowa to esubɔla siwo wògbugbɔ ɖo te la dzi wɔ nukunu aɖe. Ŋugbe si wòto Ezekiel dzi do be: “Mana dzi si to mɔ ɖeka wo” la va eme wòwɔ nuku. (Eze. 11:19) Le xexea me godoo la, ame gbogbo aɖewo siwo nye gbe vovovo dolawo, siwo nye ha vovovo me tɔwo, siwo ƒe ganyawo le vovovo eye wotso teƒe vovovowo la va nye Kristo yomedzelawo. Ke hã, wofiaa nyateƒe ɖeka wo katã eye wowɔa dɔ ɖekae le ɖekawɔwɔ me wòwɔ nuku. Le zã mamlɛtɔ si Yesu nɔ anyigba dzi me la, edo gbe ɖa vevie be ye yomedzelawo nawɔ ɖeka. (Xlẽ Yohanes 17:11, 20-23.) Egbea, Yehowa ɖo gbedodoɖa ma ŋu le mɔ si lolo wu sãsãsã nu.

32. Aleke gbugbɔgaɖɔɖo ŋuti nyagblɔɖi siwo va eme la nana nèsena le ɖokuiwò me? (Kpɔ aɖaka si nye “Nyagblɔɖi Siwo Ku Ðe Aboyomeyiyi Kple Gbugbɔgaɖɔɖoa Ŋu” la hã.)

32 Ðe dzi medzɔa wò be yele agbe le ɣeyiɣi sia si me wogbugbɔ le nuwo ɖɔm ɖo la me oa? Míele ale si Ezekiel ƒe nyagblɔɖiawo le eme vam le míaƒe subɔsubɔ ƒe akpa sia akpa egbea  la kpɔm. Míate ŋu aka ɖe edzi be fifia, Yehowa kpɔa ŋudzedze ɖe eƒe amewo ŋu abe ale si wògblɔe to Ezekiel dzi ene be: “Miaƒe nu adze ŋunye.” (Eze. 20:41) Kpɔ mɔnukpɔkpɔ si gbegbe su asiwò be nèle ame siwo wɔ ɖeka, siwo wonyina nyuie le gbɔgbɔ me, ame siwo kafua Yehowa le xexea me godoo, siwo wona ablɔɖee tso gbɔgbɔmeboyo si me wonɔ ƒe alafa geɖe dome la ɖa! Ke hã, Ezekiel ƒe nyagblɔɖi siwo ku ɖe gbugbɔgaɖɔɖoa ŋu la agava eme le mɔ si lolo wu nu.

Azu “Abe Eden Bɔ Ene”

33-35. (a) Aleke Yudatɔ aboyomeawo se nyagblɔɖi si le Ezekiel 36:35 gɔmee? (b) Nu kae nyagblɔɖi ma fia na Yehowa ƒe amewo egbea? (Kpɔ aɖaka si nye “Ɣeyiɣi Si Me Woaɖɔ Nuwo Katã Ðo” la hã.)

33 Abe ale si míekpɔe va yi ene la, “ɣeyiɣi si me woaɖɔ nuwo katã ɖo” la dze egɔme esi wogaɖo David ƒe fiaƒomea te le ƒe 1914 me esime woɖo Yesu fiae. (Eze. 37:24) Emegbe Yehowa na ŋusẽ Kristo be wòagbugbɔ tadedeagu dzadzɛa si nɔ gbɔgbɔmeboyo me ƒe alafa geɖe la aɖo anyi le eƒe amewo dome. Ke ɖe nu siwo Kristo gbugbɔ nɔ ɖɔɖɔm ɖo la se ɖe ema ko dzia? Kura o! Dɔ ma aga yi edzi le mɔ ɖedzesi aɖe nu le etsɔme, eye Ezekiel ƒe nyagblɔɖiawo ƒo nu tso esia ŋu tsitotsito na mí.

34 Le kpɔɖeŋu me, de ŋugble le nya siawo siwo tso gbɔgbɔ me la ŋu kpɔ: “Amewo agblɔ be, ‘Anyigba si nye gbegbe tsã la, zu abe Eden bɔ ene.’” (Eze. 36:35) Nu kae ŋugbedodo mawo fia na Ezekiel kple etɔ aboyomeawo? Edze ƒãa be womenɔ mɔ kpɔm be ŋugbedodo sia nava eme ŋutɔŋutɔ o, womenɔ mɔ kpɔm be anyigba si woaɖɔ ɖo la nava zu abe abɔ gbãtɔ alo Paradiso, si Yehowa ŋutɔ tso la ene o! (1 Mose 2:8) Ke boŋ wose egɔme be ɖe Yehowa le kakaɖedzi nam yewo be yewoƒe anyigba si woɖɔ ɖo la anya kpɔ eye wòawɔ nu.

35 Nu kae ŋugbedodo mawo fia na mí egbea? Míele mɔ kpɔm be woava eme ŋutɔŋutɔ fifia le xexe vɔ̃ɖi sia si dzi ɖum Satana Abosam le la me o. Ke boŋ míese egɔme be, wova eme le gbɔgbɔmegɔmesese nu egbea. Mí Yehowa subɔlawo míele anyigba aɖe si wogbugbɔ ɖɔ ɖo le gbɔgbɔ me la dzi, si nye nɔnɔme alo teƒe si míesubɔna le kutrikukutɔe eye míetsɔa subɔsubɔ kɔkɔea ɖoa nɔƒe vevitɔ le míaƒe agbe me. Nuwo le nyonyom ɖe edzi le gbɔgbɔmenyigba sia dzi si na wòva le paradiso ɖim geɖe wu. Ke nu kae míakpɔ mɔ na le etsɔme?

36, 37. Ŋugbedodo kawoe ava eme le etsɔme le Paradiso me?

36 Le Armagedon-ʋa gã la megbe la, Yesu akeke eƒe nuwo gbugbɔgaɖɔɖodɔa ɖe enu wòaxɔ anyigba katã dzi. Le eƒe Ƒe Akpe Ðeka Dziɖuɖua me la, afia mɔ amegbetɔwo ale be woatrɔ anyigbaa wòazu Eden-bɔ, paradiso si axɔ xexea me katã abe ale si Yehowa dii ene! (Luka 23:43) Ekema amegbetɔwo katã awɔ ɖeka le anyigba dzi eye woalé be na anyigbaa hã.  Afɔku alo ŋɔdzinu aɖeke maganɔ teƒe aɖeke o. Bu ɣeyiɣi si me ŋugbedodo sia gɔ̃ hã ava eme la ŋu kpɔ. Egblɔ be: “Mabla ŋutifafa ƒe nu kpli wo, eye maɖe lã wɔadãwo ɖa le anyigba la dzi, ale be woanɔ dedie le gbegbe, eye woatsi avewo me adɔ.”—Eze. 34:25.

37 Àte ŋu akpɔ esia le susu mea? Àte ŋu ayi anyigbaa gbahoo sia ƒe afi sia afi evɔ màvɔ̃ na naneke o. Lã aɖeke mawɔ nu vevi wò o. Afɔku aɖeke magblẽ wò tomefafa me o. Wò ɖeka àte ŋu azɔ ayi ave dodowo me alé ŋku ɖe ale si wonya kpɔe ŋu, eye àte ŋu atsi afi ma adɔ gɔ̃ hã evɔ ànɔ dedie, àkpɔ be yeɖi ɖe eme nyuie eye nu vevi aɖeke mewɔ ye o!

Bu ɣeyiɣi si me amewo ate ŋu ‘atsi avewo me adɔ’ ŋu kpɔ (Kpɔ Memama 36, 37)

38. Aleke nàse le ɖokuiwò me ne ŋugbedodo si le Ezekiel 28:26 la va eme?

38 Nyagblɔɖi bubu sia hã ava eme be: “Woanɔ dedie le [anyigba la dzi], woatu xɔwo ahade waingblewo, eye ne medrɔ̃ ʋɔnu ame siwo katã ƒo xlã wo siwo do vlo wo la, ekema woanɔ anyi aɖe dzi ɖi; ne woadze sii be, nyee nye Yehowa, woƒe Mawu.” (Eze. 28:26) Ne wotsrɔ̃ Yehowa ƒe futɔwo katã vɔ la, míanɔ ŋutifafa kple dedienɔnɔ me le anyigba bliboa katã dzi. Míalé be na anyigbaa, míasu te alé be na mía ɖokuiwo kple míaƒe ame veviwo hã, míatso aƒe nyuiwo anɔ wo me eye míade waingblewo.

39. Nu ka tae nàte ŋu aka ɖe edzi be nyagblɔɖi siwo ŋu Ezekiel ƒo nu tsoe ku ɖe Paradisoa ŋu la ava eme?

39 Ðe ŋugbedodo siawo ɖi drɔ̃eƒenyawo na wòa? Ekema ɖo ŋku nu siwo katã teƒe kpɔm nèle xoxo le ɣeyiɣi sia si me ‘wole nuwo katã ɖɔm ɖo’ la dzi. Togbɔ be Satana tsi tsitre ɖe esia ŋu dzikutɔe hã, wona ŋusẽ Yesu be wòagbugbɔ tadedeagu dzadzɛa aɖo anyi le ɣeyiɣi sesẽ sia me. Kpeɖodzi sẽŋu ka gbegbee nye esi be ŋugbe siwo katã Mawu do to Ezekiel dzi la ava eme!

^ mm. 2 Yudatɔ siwo nɔ aboyo me la dometɔ geɖe nɔ teƒe siwo nɔ adzɔge vie tso Babilon dua gbɔ. Le kpɔɖeŋu me, Ezekiel nɔ Yudatɔ siwo nɔ Kebar-tɔsisia to la dome. (Eze. 3:15) Ke hã Yudatɔ ʋɛ aɖewo nɔ dua ŋutɔ me. Ame siawo dometɔ aɖewoe nye “fia ƒe dzidzimeviwo kple bubumewo ƒe vi aɖewo.”—Dan. 1:3, 6; 2 Fia. 24:15.

^ mm. 25 Le kpɔɖeŋu me, míate ŋu agblɔ Ðɔɖɔɖowɔla siwo nɔ anyi le ƒe alafa 16 lia me siwo nye Kristotɔ amesiaminawo la kã o.