Dzo kpo yi emenuwo dzi

Dzo kpo yi emenuawo dzi

 NYABIASE 1

Ame Kae Menye?

Ame Kae Menye?

NU SI TA WÒLE VEVIE

Ne ènya ɖokuiwò kple nu siwo dzi nèxɔ se la, akpe ɖe ŋuwò nàtso nya me nyuie ne woƒo nya ɖe nuwò.

NU KAE NÀWƆ?

Kpɔ nudzɔdzɔ sia ɖa le susu me: Karen va ɖo kplɔ̃ɖoƒea miniti ewo aɖewo koe nye ema, eye wòse ame nyanyɛ aɖe ƒe gbe le emegbe.

“Nu ka tae nèle tsitre ɖe afi sia ko?”

Karen trɔ kpɔ amea, eye wòkpɔe be ye xɔlɔ̃ Jessica ye. Jessica lé ahatukpa eve siwo le ʋuʋu la ɖe asi. Ekpɔe be aha sesẽe le eme. Jessica do atukpa ɖeka ɖe Karen gbɔ gblɔ be, “Ètsi aɖu agbe vie ɖe!”

Karen di be yeagbe, gake xɔlɔ̃ae Jessica nye. Karen medi be yeƒe nu nati ye xɔlɔ̃a o. Gakpe ɖe eŋu la, nyɔnuvi nyui aɖee Jessica nye. Eya ta ne Jessica noa aha la, ke efia be ahanono megblẽ ale o. Karen gblɔ na eɖokui be: ‘Aha koe, menye gbekui ye o.’

Ne wòe nye Karen ɖe, nu kae nàwɔ?

TƆ NÀBU EŊU KPƆ!

Hafi nàte ŋu atso nya me nyuie le nɔnɔme sia me la, ele be nànya ɖokuiwò nyuie. Be nànya ɖokuiwò nyuie fia be nànya ame si nènye nyuie kple nu siwo dzi nèxɔ se. Esia awɔe be wò ŋutɔ nàkpɔ ŋusẽ ɖe wò nuwɔnawo dzi, eye màɖe mɔ ame bubuwo nanɔ ŋusẽ kpɔm ɖe dziwò o.—1 Korintotɔwo 9:26, 27.

Aleke nàwɔ nɔnɔme nyui sia nasu asiwò? Nyabiase siwo gbɔna la ŋu ɖoɖo akpe ɖe ŋuwò.

 1 NU KAWO MEE MESẼ ŊU LE?

Ne ènya wò ŋutetewo kple wò nɔnɔme nyuiwo nyuie la, kakaɖedzi geɖe wu anɔ asiwò.

BIBLIA ME KPƆÐEŊU: Apostolo Paulo ŋlɔ bena: “Ne nyemebi le nuƒoƒo me o hã la, nyemele nenema le sidzedze ya me o.” (2 Korintotɔwo 11:6) Esi Paulo nya Ŋɔŋlɔawo nyuie ta la, ete ŋu tɔ afɔ to sesĩe esi amewo tsɔ nya ɖe eŋu. Meɖe mɔ nya manyomanyo siwo gblɔm wonɔ tso eŋu la na be megaka ɖe eɖokui dzi o.—2 Korintotɔwo 10:10; 11:5.

DZRO ÐOKUIWÒ ME: Ŋlɔ ŋutete alo aɖaŋu aɖe si le asiwò la ɖe ete.

Azɔ ŋlɔ nɔnɔme nyui aɖe si le asiwò hã ɖe ete. (Le kpɔɖeŋu me, ɖe nètsɔa ɖe le eme na amea? nyoa dɔmea? nye ame si dzi woate ŋu aka ɖoa? ame si nɔa game dzia?)

2 NU KAWO MEE MEGBƆDZƆ LE?

Abe ale si ko deku vovo ɖeka gblẽa detsi ene la, wò agbenɔnɔ ate ŋu agblẽ kpata nenye be èɖe mɔ wò gbɔdzɔgbɔdzɔwo kpɔ ŋusẽ ɖe wò agbe dzi.

BIBLIA ME KPƆÐEŊU: Apostolo Paulo nya eƒe gbɔdzɔgbɔdzɔwo nyuie. Eŋlɔ bena: “Mekpɔa dzidzɔ le Mawu ƒe se la ŋu ŋutɔ le ame si menye le ememe la gome, ke mekpɔ se bubu aɖe le menye, si le aʋa wɔm kple se si le nye susu me, eye wòléam aboyoe yina na nu vɔ̃ ƒe se.”—Romatɔwo 7:22, 23.

DZRO ÐOKUIWÒ ME: Gbɔdzɔgbɔdzɔ kawo dzie wòhiã be nàɖu?

 3 TAÐODZINU KAWOE LE ASINYE?

Ðe nàɖo taksi ahabia tso ʋukula si be wòaku ʋua anɔ xlã ƒom teƒe aɖe ʋuu kaka ami navɔ le ʋua mea? Esia anye movinuwɔwɔ kple ga dome gbegblẽ!

Nufiame kae le eme? Ne taɖodzinuwo le asiwò la, ànya afi si nèɖo tae le agbe me, eye mànɔ togodoe dom anɔ dagbadagbam ɖe yame o. Ne èɖo teƒe aɖe ɖe susu me be yeayi la, àɖe afɔ siwo akpe ɖe ŋuwò be nàɖo teƒea.

BIBLIA ME KPƆÐEŊU: Apostolo Paulo ŋlɔ bena: “Ale si mele dua ƒum la, nyemele eƒum ɖewoɖewoe o.” (1 Korintotɔwo 9:26) Esi apostolo Paulo nanɔ yiyim le agbe me ko taɖodzinu aɖeke manɔmee teƒe la, eɖo taɖodzinuwo na eɖokui eye wòwɔ nu siwo ana wòaɖo wo gbɔ.—Filipitɔwo 3:12-14.

DZRO ÐOKUIWÒ ME: Ŋlɔ taɖodzinu etɔ̃ siwo gbɔ nèdi be yeaɖo le ƒe si gbɔna me.

4 NU KAWO DZIE MEXƆ SE?

Ne ènya ame si nènye nyuie kple nu siwo dzi nèxɔ se la, ke èsɔ kple ati aɖe si ƒo ke ɖe to sesĩe si ate ŋu anɔ te ɖe ahom sesẽwo nu

Ne mèxɔ naneke koŋ dzi se o la, àtsi vedomesi le agbe me. Abe ale si agama trɔnae ene la, ànɔ wò nɔnɔme trɔm be wòawɔ ɖeka kple hawòtiwo tɔ, eye esia anye dzesi be mènya ame si tɔgbi nèdi be yeanye o.

Gake nenye be èwɔa nu siwo wɔ ɖeka kple nu siwo dzi nèxɔ se la, ke efia be èle agbe nɔm ɖe ame si ƒomevi nèdi be yeanye la nu, nu ka kee ame bubuwo ɖagblɔ o.

BIBLIA ME KPƆÐEŊU: Daniel “ɖoe le eƒe dzi me” be yeawɔ ɖe Mawu ƒe sewo dzi togbɔ be wokplɔe dzo le eƒe ƒometɔwo gbɔ gɔ̃ hã; anɔ eme be ɖekakpuivi dzaa koe wònye ɣemaɣi. (Daniel 1:8) Esi Daniel wɔ esia la, ewɔ ɖe tame si wòɖo la dzi. Daniel nɔ agbe ɖe nu siwo dzi wòxɔ se la nu.

DZRO ÐOKUIWÒ ME: Nu kawo dzie nèxɔ se? Le kpɔɖeŋu me: Ðe nèxɔ Mawu dzi sea? Ne èxɔ edzi se la, nu ka tae? Nu kawoe ɖo kpe edzi na be Mawu li?

Ðe nèka ɖe edzi be se siwo nu Mawu be míanɔ agbe ɖo la aɖe vi na wòa? Ne èɖo eŋu be ɛ̃ la, nu ka tae?

Ame ka ƒomevie nàdi be yeanye? Àdi be yeanɔ abe aŋgba ƒuƒu si ya ƒona yia afi sia afi loo alo abe ati si nɔa te ɖe ahom sesẽwo nu la enea? Do ŋusẽ nu nàzu ame si tɔgbi nèɖoe be yeanye, ekema ànɔ abe ati ma ene. Eye esia akpe ɖe ŋuwò nàɖo nyabiase si nye Ame kae menye? la ŋu.