NU SI TA WÒLE VEVIE

Ne wò kple dziwòlawo dome le nyuie la, agbea anɔ bɔbɔe na wò wu.

NU KAE NÀWƆ?

Kpɔ nudzɔdzɔ sia ɖa le susu me: Kuɖa fiẽ mee. Geoff si xɔ ƒe 17 la wɔ eƒe aƒemedɔwo vɔ, fifia ate ŋu aɖi ɖe eme azɔ! Enɔ anyi ɖe zikpui me bɔkɔɔ, eye wòsi television le kpɔkpɔm.

Ɣemaɣi tututu la, Papa va tɔ ɖe ʋɔtrua nu heɖo adã.

“Geoffrey! Nu ka tae nèle ɣeyiɣi gblẽm le afi sia le television kpɔm evɔ wòhiã be nàkpe ɖe nɔviwò ŋu wòawɔ eƒe sukudɔdeasiwo hafi? Mesea nu o!”

Geoff te gbe be; “Egadzɔ ake.”

Papa bi ɖe ŋgɔ hebia be “Ðekakpui, èbe aleke?”

Geoff gbɔ fũu hetro ŋku gblɔ be, “Papa, nyemegblɔ nya aɖeke o.”

Fifia dzi ku Papa vevie eye wògblɔ kple adã be, “Mègaƒo nu nam kple gbe ma o!”

Ne wòe nye Geoff ɖe, nu kae nàwɔ be nàƒo asa na nɔnɔme sia?

TƆ NÀBU EŊU KPƆ!

Dzeɖoɖo kple dziwòlawo le abe ʋukuku ene. Ne èdo go mɔxenu aɖe le mɔ dzi la, àte ŋu adze to mɔ bubu.

 LE KPƆÐEŊU ME:

Nyɔnuvi aɖe si ŋkɔe nye Leah gblɔ be: “Esesẽna nam ŋutɔ be maɖo dze kple tɔnye. Ɣeaɖewoɣi ne mele nya aɖe gblɔm nɛ la, enɔa anyi sẽe ko gblɔna be, ‘Ðe nèle nya aɖe gblɔm nama?’”

LEAH ATE ŊU AWƆ NU ETƆ̃ YA TETI.

  1. A. Ado ɣli ɖe tɔa ta.

    Leah ado ɣli agblɔ be, “Nya vevi aɖe gblɔm mele na wò la! Ðo tom!”

  2. B. Adzudzɔ nuƒoƒo na tɔa.

    Leah atiae ko be yemagaƒo nu tso yeƒe kuxia ŋu na ye tɔ o.

  3. D. Alala ɣeyiɣi nyuitɔ hafi wòagaƒo nu tso nya la ŋu.

    Leah atiae be yeaƒo nu na tɔa ŋkume-kple-ŋkume alo aŋlɔ agbalẽ nɛ tso eƒe kuxia ŋu.

Mɔnu siawo dometɔ kae nàkafu na Leah?

BU EŊU KPƆ: Leah tɔa ƒe susu mele egbɔ o—eya ta mede dzesii gɔ̃ hã be ete ɖe edzi o. Eya ta ne Leah wɔ nu gbãtɔ la, tɔa mase nu si tae wòle ɣli dom ɖe eta la gɔme o. Anɔ eme godoo be ne Leah wɔ nu sia la, tɔa maɖo toe o, eye esia anye bubumademade tɔa ŋu hã. (Efesotɔwo 6:2) Eya ta nu sia wɔwɔ made wo dometɔ aɖeke dzi o.

Ne mɔxenu aɖe le mɔ dzi la, mefia be mɔa ƒe seƒee nye ema o, eya ta àte ŋu ato mɔ aɖe dzi ana wò kple dziwòlawo dome nanɔ nyuie

Togbɔ be nu evelia wɔwɔ le bɔbɔe wu hã la, maɖe vi nɛ o. Nu ka tae? Elabena ele be Leah nagblɔ eƒe kuxia na tɔa hafi wòate ŋu akpe ɖe eŋu wòakpɔ kuxia gbɔ ale si dze, gake hafi tɔa nate ŋu akpe ɖe eŋu la, ele be wòanya nu tso nɔnɔme si me tom Leah le la ŋu. Ne Leah zi kpi la, ke tɔa mate ŋu awɔ nu siawo dometɔ aɖeke o.

Gake ne Leah wɔ nu etɔ̃lia ya la, ke meɖe mɔ mɔxenu ma zu mɔ ƒe seƒe nɛ o. Eya ta eɖoe be yeagadzro nya la me kple ye tɔa ɣebubuɣi. Ne Leah tiae be yeaŋlɔ agbalẽ na tɔa la, eƒe dzi adze eme enumake.

Agbalẽa ŋɔŋlɔ akpe ɖe eŋu hã be wòaŋlɔ nya siwo tututu wòdi be yeagblɔ la eme nakɔ nyuie. Ne Leah tɔ xlẽ agbalẽa la, ase eƒe kuxia gɔme nyuie wu. Eya ta nu etɔ̃lia wɔwɔ aɖe vi na Leah kple tɔa siaa. Leah ɖaɖo dze kple tɔa ŋkume-kple-ŋkume alo ŋlɔ agbalẽ nɛ o, ewɔ ɖe Biblia ƒe aɖaŋuɖoɖo si nye be “míati nu siwo hea ŋutifafa vanɛ” yome la dzi.—Romatɔwo 14:19.

Nu bubu kawoe Leah ate ŋu awɔ?

Bu wo dometɔ ɖeka ŋu eye nàŋlɔe ɖi. Eye nàŋlɔ nu si ate ŋu ado tso nuwɔna ma me ɖi.

MÈGAGBLƆ NYA SIWO GƆME DZIWÒLAWO ASE BUBUI O

Ðo ŋku edzi be menye ɣesiaɣie dziwòlawo sea nya siwo nègblɔna gɔme abe ale si tututu nègblɔ woe ene o.

LE KPƆÐEŊU ME:

Dziwòlawo be nàgblɔ nu si tae mèle dzidzɔ kpɔm o la na yewo, eye nègblɔ be: “Nyemedi be maƒo nu tso eŋu o.”

Dziwòlawo ya se egɔme be: “Nyemeka ɖe mia dzi agblɔ nye nyawo na mi o. Magblɔ nye nyawo na xɔ̃nyewo boŋ.”

Tsɔe be èle nɔnɔme sesẽ aɖe me tom eye dziwòlawo di be yewoakpe ɖe ŋuwò, gake nègblɔ na wo be: “Migatsi dzi o. Nye ŋutɔ mate ŋu akpɔ egbɔ.”

  • Aleke dziwòlawo ase egɔmee?

  • Aleke nàɖo nyaa ŋu wòanyo wu?