Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nya Nyui Si Tso Mawu Gbɔ!

 NUSƆSRƆ̃ 7

Nu Kae Nye Mawu Fiaɖuƒe La?

Nu Kae Nye Mawu Fiaɖuƒe La?

1. Nu kae nye Mawu Fiaɖuƒe la?

Nu ka ta Yesu nye Fia si dze?—MARKO 1:40-42.

Mawu Fiaɖuƒea nye dziɖuɖu si woɖo anyi le dziƒo. Ava xɔ ɖe dziɖuɖu bubuwo katã teƒe, eye wòana woawɔ Mawu ƒe lɔlɔ̃nu le dziƒo kple anyigba dzi. Mawu Fiaɖuƒe ŋuti nyaa nye nya nyui. Míehiã na dziɖuɖu nyui, eye eteƒe madidi o Mawu Fiaɖuƒea akpɔ hiahiã ma gbɔ. Ana ame siwo katã le anyigba dzi la nawɔ ɖeka.Xlẽ Daniel 2:44; Mateo 6:9, 10; 24:14.

Fia nɔa fiaɖuƒe ɖe sia ɖe nu. Yehowa tia Via Yesu be wòanye Eƒe Fiaɖuƒea ƒe Fia.Xlẽ Nyaɖeɖefia 11:15.

2. Nu ka tae Yesu nye Fia si dze?

Mawu ƒe Viae nye Fia si dze, elabena eƒe dɔme nyo, eye wòléa nya dzɔdzɔe me ɖe asi goŋgoŋ. (Yohanes 1:14) Azɔ hã ŋusẽ geɖe le esi be wòakpe ɖe amewo ŋu, elabena aɖu anyigba la dzi tso dziƒo. Esi wofɔ Yesu ɖe tsitre megbe la, eyi dziƒo ɖalala le Yehowa ƒe ɖusime. (Hebritɔwo 10:12, 13) Mlɔeba la, Mawu na ŋusẽe be wòadze dziɖuɖu gɔme.Xlẽ Daniel 7:13, 14.

3. Ame kawoe aɖu fia kple Yesu?

Amewo ƒe ƒuƒoƒo aɖe si woyɔ be “ame kɔkɔewo” aɖu fia kple Yesu le dziƒo. (Daniel 7:27) Yesu ƒe apostolo wɔnuteƒeawoe nye ame kɔkɔe siawo ƒe gbãtɔwo. Yehowa yi edzi le ŋutsu kple nyɔnu nuteƒewɔlawo tiam be woanye ame kɔkɔeawo va de asi na egbe. Ne wofɔ wo ɖe tsitre la, wonaa gbɔgbɔŋutilã wo, abe ale si wònɔ le Yesu gome ene.Xlẽ Yohanes 14:1-3; 1 Korintotɔwo 15:42-44.

 Ame nenie ayi dziƒo? Yesu yɔ ƒuƒoƒo si ayi dziƒo la be “alẽha sue.” (Luka 12:32) Mlɔeba woƒe xexlẽme bliboa anye ame 144,000. Eye woakpe ɖe Yesu ŋu woaɖu fia ɖe anyigba la dzi.Xlẽ Nyaɖeɖefia 14:1.

4. Nu kawoe dzɔ esime Yesu dze dziɖuɖu gɔme?

Mawu Fiaɖuƒea dze dziɖuɖu gɔme le ƒe 1914 me. * Afɔ gbãtɔ si Yesu ɖe abe Fia ene lae nye be etsɔ Satana kple eƒe gbɔgbɔ vɔ̃wo ƒu gbe ɖe anyigba dzi. Satana do dziku vevie eye wòhe fukpekpewo va anyigba blibo la katã dzi. (Nyaɖeɖefia 12:7-10, 12) Tso ekema dzi la, ameƒomea ƒe kuxiwo do gã ɖe edzi ale gbegbe. Aʋawɔwɔwo, dɔwuame, dɔvɔ̃ kple anyigbaʋuʋu siwo teƒe kpɔm míele la katã nye “dzesi” be eteƒe madidi o Fiaɖuƒea akpɔ anyigba la dzi nyawo gbɔ bliboe.Xlẽ Luka 21:7, 10, 11, 31.

5. Nu kawoe Mawu Fiaɖuƒea le wɔwɔm?

To xexea me katã ƒe gbeƒãɖeɖedɔa dzi la, Mawu Fiaɖuƒea le ameha gã aɖe si tso dukɔwo katã me la nu ƒom ƒu fifia gɔ̃ hã. Ame fafa miliɔn geɖewo le Yesu teviwo zum. Mawu Fiaɖuƒea akpɔ wo ta ne ele fifinuɖoanyi vɔ̃ɖi sia tsrɔ̃m ɖa le anyigba dzi. Eya ta ame siwo katã di be yewoakpɔ gome le Mawu Fiaɖuƒea me la nasrɔ̃ ale si woanye Yesu tevi ɖotowo.Xlẽ Nyaɖeɖefia 7:9, 14, 16, 17.

Le ƒe 1,000 me la, Mawu Fiaɖuƒea ana tame si Mawu ɖo ɖe ameƒomea ŋu le gɔmedzedzea me la nava eme. Anyigba blibo la katã azu paradiso. Mlɔeba Yesu agbugbɔ Fiaɖuƒea ade asi na Fofoa. (1 Korintotɔwo 15:24-26) Èdze si ame aɖe si nàdi be yeagblɔ Mawu Fiaɖuƒea ŋu nya na?Xlẽ Psalmo 37:10, 11, 29.

 

^ mm. 6 Ne èdi be yeaxlẽ nu geɖe tso Biblia me nyagblɔɖi siwo ku ɖe ƒe 1914 ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe axa 215-218.