Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nya Nyui Si Tso Mawu Gbɔ!

 NUSƆSRƆ̃ 15

Nu Ka Tae Wòle Be Nàyi Nusɔsrɔ̃a Dzi?

Nu Ka Tae Wòle Be Nàyi Nusɔsrɔ̃a Dzi?

1. Aleke Biblia sɔsrɔ̃ dzi yiyi aɖe vi na wòe?

Ðikeke mele eme o be Biblia me nufiafia vevi mawo sɔsrɔ̃ na wò lɔlɔ̃ na Yehowa me gasẽ ɖe edzi. Ehiã be nànɔ lɔlɔ̃ ma tum ɖo ɣesiaɣi. (1 Petro 2:2) Be agbe mavɔ ƒe mɔkpɔkpɔa nasu asiwò la, anɔ te ɖe ale si nàyi edzi anɔ tetem ɖe Mawu ŋu to eƒe Nya la sɔsrɔ̃ me dzi.Xlẽ Yohanes 17:3; Yuda 21.

Ne wò sidzedze Mawu dzi ɖe edzi la, wò xɔse agasẽ ɖe edzi. Xɔse ana wò nu nadze Mawu ŋu. (Hebritɔwo 11:1, 6) Aʋã wò nàtrɔ dzi me, eye wòana nàwɔ tɔtrɔ siwo aɖe vi na wò le agbenɔnɔ me.Xlẽ Dɔwɔwɔwo 3:19.

2. Aleke nàwɔ Mawu ŋuti sidzedze si su asiwò la naɖe vi na ame bubuwo?

Àte ŋu ava nɔ ƒomedodo tɔxɛ me kple Yehowa

Àdi godoo be yeagblɔ nu siwo srɔ̃m yele la na ame bubuwo—nya nyuiwo gbɔgblɔ na ame bubuwo dzɔa dzi na mí katã. Ne èyi Biblia sɔsrɔ̃ dzi la, àva srɔ̃ ale si nàzã Biblia atsɔ aɖe ale si nèxɔ Yehowa kple nya nyuia dzi see la me na amewo.Xlẽ Romatɔwo 10:13-15.

Ame akpa gãtɔ dzea egɔme kple nya nyuia gbɔgblɔ na wo xɔlɔ̃wo kple woƒe ƒometɔwo. Ðɔ ŋu ɖo. Mègada woƒe subɔsubɔhawo ɖe anyi o, ke boŋ ƒo nu tso Mawu ƒe ŋugbedodowo ŋu na wo. Ðo ŋku edzi be zi geɖe la, wò nuwɔwɔ ɖe amewo ŋu nyuie wɔa dɔ ɖe wo dzi wu wò nyagbɔgblɔwo.Xlẽ Timoteo 2:24, 25.

3. Ƒomedodo kae ate ŋu ava nɔ mia kple Mawu dome?

Mawu ƒe Nya la sɔsrɔ̃ akpe ɖe ŋuwò nàwɔ ŋgɔyiyi le mawusubɔsubɔ me. Eye mlɔeba ƒomedodo tɔxɛ aɖe ava nɔ mia kple Yehowa dome. Le nyateƒe me la, àte ŋu azu Mawu tɔ ahanye eƒe ƒomea me tɔ.Xlẽ 2 Korintotɔwo 6:18.

 4. Aleke nàwɔ anɔ ŋgɔyiyi wɔm?

Àte ŋu ayi edzi anɔ ŋgɔyiyi wɔm le mawusubɔsubɔ me ne èyi Mawu ƒe Nya la sɔsrɔ̃ dzi. (Hebritɔwo 5:13, 14) Bia tso Yehowa Ðasefo aɖe si be wòazã agbalẽ si nye Nuka Tututue Nye Biblia ƒe Nufiafia? atsɔ asrɔ̃ Biblia kpli wò. Zi geɖe ale si nèyi edzi le Mawu ƒe Nya srɔ̃m la, zi geɖe ma kee nàkpɔ dzidzedze le agbe me.Xlẽ Psalmo 1:1-3; 73:27, 28.

Yehowa, Mawu dzidzɔtɔ la, gbɔe nya nyui la tso. Àte ŋu ate ɖe eŋu kplikplikpli ne ètena ɖe eƒe amewo ŋu kplikplikpli. (Hebritɔwo 10:24, 25) Ne èyi agbagba si dzem nèle be yeadze Yehowa ŋu dzi la, wò asi asu agbe vavã, si nye agbe mavɔ, la dzi. Le nyateƒe me la, tete ɖe Mawu ŋue nye nu nyuitɔ kekeake si nàte ŋu awɔ.Xlẽ 1 Timoteo 1:11; 6:19.