Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nya Nyui Si Tso Mawu Gbɔ!

 NUSƆSRƆ̃ 8

Nu Ka Tae Mawu Ðe Mɔ Vɔ̃ɖinyenye Kple Fukpekpe Li Ðo?

Nu Ka Tae Mawu Ðe Mɔ Vɔ̃ɖinyenye Kple Fukpekpe Li Ðo?

1. Aleke vɔ̃ɖinyenye dze egɔmee?

Ɣeyiɣi didi si Mawu ɖe mɔ na amegbetɔwo woɖu dzi la na wòdze ƒãa be womate ŋu akpɔ ameƒomea ƒe kuxiwo gbɔ o

Esime Satana da alakpa gbãtɔe vɔ̃ɖinyenye dze egɔme le anyigba dzi. Mawudɔla debliboe Satana nye le gɔmedzedzea me, gake “meli ke ɖe nyateƒe la me o.” (Yohanes 8:44) Edi be woatsɔ tadedeagu si Mawu ɖeɖe ko dze na la na ye. Satana ble nyɔnu gbãtɔ Xawa nu wòɖo toe le esi teƒe be wòaɖo to Mawu. Adam wɔ ɖeka kple Xawa wogbe toɖoɖo Mawu. Adam ƒe nuwɔna sia he fukpekpe kple ku vae.Xlẽ 1 Mose 3:1-6, 19.

Esi Satana doe ɖe Xawa gbɔ be wòagbe toɖoɖo Mawu la, tsitretsitsi ɖe Mawu ƒe dziɖulanyenye alo eƒe ɖoƒe abe Dziƒoʋĩtɔ la ene ŋu gɔmee ma wòdze. Ameƒomea me tɔ akpa gãtɔ wɔ ɖeka kple Satana, eye wogbe be Mawu naganye yewoƒe Dziɖula o. Ale wɔ Satana va zu “xexea dzi ɖula.”Xlẽ Yohanes 14:30; 1 Yohanes 5:19.

2. Ðe kpɔtsɔtsɔ nɔ Mawu ƒe nuwɔwɔwo ŋua?

Nu siwo katã Mawu wɔ la de blibo. Ŋutete nɔ amegbetɔ kple mawudɔla siwo Mawu wɔ la ŋu be woawɔ eƒe nudidiwo dzi bliboe. (5 Mose 32:4, 5) Mawu na ablɔɖe mí be míatiae nenye be míawɔ nyui alo vɔ̃. Ablɔɖe sia naa mɔnukpɔkpɔ mí be míaɖee afia be míelɔ̃ Mawu.Xlẽ Yakobo 1:13-15; 1 Yohanes 5:3.

3. Nu ka tae Mawu ɖe mɔ fukpekpe li va se ɖe fifia?

Yehowa ɖe mɔ ɖe aglãdzedze ɖe eƒe dziɖulanyenye ŋu hena ɣeyiɣi aɖe. Nu ka tae? Be wòaɖee afia be dziɖuɖu si me Mawu ƒe asi mele o la maɖe vi na amewo o. (Nyagblɔla 7:29; 8:9) Nu siwo dzɔ le amegbetɔwo ƒe ŋutinya me ƒe 6,000 aɖewoe nye esi la ɖo kpe nya sia ƒe nyateƒenyenye dzi. Amegbetɔwo ƒe dziɖuɖuwo  mete ŋu ɖe aʋawɔwɔ, nu vlo wɔwɔ, nu madzɔmadzɔ wɔwɔ, kple dɔléle ɖa o.Xlẽ Yeremiya 10:23; Romatɔwo 9:17.

Mawu ƒe dziɖuɖu hea viɖe geɖe vanae na ame siwo le eƒe akpa dzi, ke mele nenema le amegbetɔwo ƒe dziɖuɖuwo ya gome o. (Yesaya 48:17, 18) Eteƒe madidi o, Yehowa aɖe amegbetɔwo ƒe dziɖuɖuwo katã ɖa. Ame siwo abɔbɔ wo ɖokui ɖe Mawu ƒe dziɖuɖu te la koe anɔ anyigba dzi.—Yesaya 11:9.Xlẽ Daniel 2:44.

4. Mɔnukpɔkpɔ kae su mía si le Mawu ƒe dzigbɔɖi ta?

Satana gblɔ be amegbetɔ aɖeke maɖo to Yehowa nuteƒewɔwɔtɔe o. Àdi be yeaɖee afia be alakpae eƒe nya ma nyea? Àte ŋui! Mawu ƒe dzigbɔɖia na mɔnukpɔkpɔ mí be míaɖee afia nenye be míedi Mawu ƒe dziɖuɖu loo alo amegbetɔwo tɔ. Ale si míenɔa agbee ye aɖe ame si dzi míele la afia.Xlẽ Hiob 1:8-12; Lododowo 27:11.

5. Aleke míatiae be Mawu nanye míaƒe Dziɖula?

Míaƒe nuwɔnawoe aɖee afia nenye be míedi be Mawu nanye míaƒe Dziɖula

Míate ŋu atiae be Mawu nanye míaƒe Dziɖula ne míedi tadedeagu vavãtɔ ƒe mɔ eye míenɔ agbe ɖe eƒe mɔfiame siwo wotu ɖe Mawu ƒe Nya, Biblia, dzi la nu. (Yohanes 4:23) Míate ŋu aɖee afia be míedi kura be Satana nanye míaƒe dziɖula o ne míeƒo asa na dunyahehe kple aʋawɔwɔ, abe ale si Yesu wɔe ene.Xlẽ Yohanes 17:14.

Satana zãa eƒe ŋusẽa tsɔ doa agbe gbegblẽ nɔnɔ kple nuwɔna siwo gblẽa nu le ame ŋu ɖe ŋgɔ. Ne míeƒo asa na nuwɔna mawo la, ɖewohĩ mía xɔlɔ̃wo kple ƒometɔwo aɖu fewu le mía ŋu alo woatsi tsitre ɖe mía ŋu. (1 Petro 4:3, 4) Gake ehiã be míawɔ nyametsotso. Ðe míade ha kple ame siwo lɔ̃ Mawua? Ðe míaɖo to eƒe se siwo me nunya kple lɔlɔ̃ le la? Ne míewɔ esiawo la, míaɖee afia be Satana ka aʋatso esi wògblɔ be ame aɖeke maɖo to Mawu ƒe sedede ne edziwɔwɔ sesẽ o.Xlẽ 1 Korintotɔwo 6:9, 10; 15:33.

Mawu ƒe lɔlɔ̃ na ameƒomea na kakaɖedzi mí be vɔ̃ɖinyenye kple fukpekpe nu ayi. Ame siwo ɖenɛ fiana be yewoxɔ nya sia dzi se la anɔ agbe tegbee le anyigba dzi.Xlẽ Yohanes 3:16.