Dzo kpo yi emenuwo dzi

Dzo kpo yi emenuawo dzi

 NUSƆSRƆ̃ 3

Mawu Gbɔe Nya Nyui La Tso Vavã?

Mawu Gbɔe Nya Nyui La Tso Vavã?

1. Ame kae nye Biblia la Ŋlɔla?

Woŋlɔ nya nyui si nye be amewo anɔ agbe tegbee le anyigba dzi la ɖe Biblia me. (Psalmo 37:29) Agbalẽ suesue 66 ye le Biblia me. Ŋutsu nuteƒewɔla 40 ye Mawu zã woŋlɔe. Mose ye ŋlɔ agbalẽ atɔ̃ gbãtɔawo anɔ abe ƒe 3,500 aɖewoe nye esi va yi ene. Apostolo Yohanes ye ŋlɔ agbalẽ mamlɛtɔ ƒe 1,900 kple edzivɔwoe nye esi. Ame ka ƒe susuwoe Biblia ŋlɔlawo ŋlɔ? Mawu to eƒe gbɔgbɔ kɔkɔe la dzi ƒo nu kple Biblia ŋlɔlawo. (2 Samuel 23:2) Mawu ƒe susuwoe woŋlɔ, ke menye woawo ŋutɔwo tɔwoe o. Eya ta Yehowae nye Biblia la Ŋlɔla.​—Xlẽ 2 Timoteo 3:16; 2 Petro 1:20, 21.

Kpɔ video si nye Ame Ka Tɔe Biblia Nye?

2. Aleke míawɔ aka ɖe edzi be Biblia me nyawo nye nyateƒe?

Míenya be Mawu gbɔe Biblia tso, elabena egblɔ nu siwo ava dzɔ le etsɔme la ɖi tsitotsito. Amegbetɔ aɖeke mate ŋu awɔ esia o. (Yosua 23:14) Mawu Ŋusẽkatãtɔ la ɖeɖe koe ate ŋu anya nu si ava dzɔ ɖe ameƒomea dzi le etsɔme.​—Xlẽ Yesaya 42:9; 46:10.

Míakpɔ mɔ be agbalẽ si tso Mawu gbɔ la nanɔ etɔxɛe, eye nenemae wòle hã. Woma Biblia ɖekaɖeka miliɔn akpe geɖe le gbegbɔgblɔ gbogbo aɖewo me. Togbɔ be Biblia li tso blema ke hã la, ewɔ ɖeka kple dzɔdzɔmeŋutinunya si ŋu kakaɖedzi le. Tsɔ kpe ɖe eŋu la, ame 40 siwo ŋlɔe la ƒe nyawo metsi tsitre ɖe wo nɔewo tɔwo ŋu o. * Azɔ hã, Mawu vavã la gbɔ koe lɔlɔ̃ si ŋu woƒo nu tsoe le Biblia me la ate ŋu atso, eye ŋusẽ gakpɔtɔ le emenyawo ŋu wotrɔa amewo ƒe agbenɔnɔ wòɖɔa ʋu wu. Nyateƒenya siawo na ame miliɔn geɖe ka ɖe edzi be Mawu ƒe Nyae Biblia la nye.​—Xlẽ 1 Tesalonikatɔwo 2:13.

Kpɔ video si nye Aleke Míawɔ Aka Ðe Edzi Be Biblia Me Nyawo Nye Nyateƒe?

 3. Nu ka ŋue Biblia ƒo nu tsoe?

Nya nyui si nye be tameɖoɖo nyui aɖe le Mawu si na ameƒomea la ŋu koŋue Biblia ƒo nu tsoe. Ŋɔŋlɔawo ƒo nu tso ale si amegbetɔ wɔ bu mɔnukpɔkpɔ si su esi be wòayi edzi anɔ paradisoa me le anyigba dzi le amegbetɔ ƒe ŋutinya ƒe gɔmedzedzea me kple ale si woagagbugbɔ aɖo paradiso anyi mlɔeba la ŋu.​—Xlẽ Nyaɖeɖefia 21:4, 5.

Sewo, gɔmeɖosewo kple aɖaŋuɖoɖowo hã le Mawu ƒe Nya la me. Tsɔ kpe ɖe eŋu la, woŋlɔ ale si Mawu wɔ nu kple ameƒomea ɖe Biblia me. Enye ŋutinya si ɖe Mawu ƒe nɔnɔme nyoameŋuwo fia. Eya ta Biblia ate ŋu akpe ɖe ŋuwò nànya Mawu. Eɖe ale si nàwɔ anye exɔlɔ̃ la me.​—Xlẽ Psalmo 19:8, 12; Yakobo 2:23; 4:8.

4. Aleke nàwɔ ase Biblia me nyawo gɔme?

Agbalẽ gbadza sia akpe ɖe ŋuwò nàse Biblia me nyawo gɔme abe ale si ko Yesu wɔe ene. Ehea amewo ƒe susu yia mawunyakpukpui vovovowo dzi heɖea wo me “bene woase Ŋɔŋlɔawo gɔme.”​—Xlẽ Luka 24:27, 45.

Nu siwo wɔa dɔ ɖe ame dzi wu dometɔ ɖekae nye nya nyui si tso Mawu gbɔ. Ke hã, ame aɖewo mekpɔa dzidzɔ ɖe eŋu o, eye esese kua dzi na ame aɖewo gɔ̃ hã. Gake dzi megaɖe le ƒowò o. Mɔkpɔkpɔ si le asiwò be nàva nɔ agbe tegbee la nɔ te ɖe ale si nàdze agbagba anya Mawui la dzi.​—Xlẽ Yohanes 17:3.

 

^ mm. 3 Kpɔ agbalẽ gbadza si nye Agbalẽ si Nyo na Amesiame.