Dzo kpo yi emenuwo dzi

Dzo kpo yi emenu bubu dzi

Yehowa Ɖasefowo

Eʋegbe

Àdi Be Yeanya Nyateƒe Laa?

Àdi Be Yeanya Nyateƒe Laa?

NYATEƑE ku ɖe nu ka ŋu? Ku ɖe biabia vevitɔ siwo le amegbetɔwo si la ŋu. Ðewohĩ èbia ɖokuiwò kpɔ be:

  • Ðe Mawu tsɔa ɖe le eme na mí vavãa?

  • Aʋawɔwɔ kple fukpekpe nu ava yi gbe aɖe gbea?

  • Nu kae dzɔna ɖe ame siwo ku la dzi?

  • Ðe mɔkpɔkpɔ aɖe gali na kukuawoa?

  • Aleke wòle be mado gbe ɖa hafi Mawu nasee?

  • Aleke mawɔ akpɔ dzidzɔ le agbe me?

Afi kae nèsusu be yeate ŋu akpɔ biabia siawo ƒe ŋuɖoɖowo le? Ne èyi agbalẽdzraɖoƒewo alo agbalẽdzraƒewo la, àke ɖe agbalẽ gbogbo aɖewo, siwo me wobe ŋuɖoɖoawo le la ŋu. Gake zi geɖe la, àkpɔe be ŋuɖoɖoawo tsi tsitre ɖe wo nɔewo ŋu. Ate ŋu adze abe ɖe susu le ŋuɖoɖoawo dometɔ aɖewo me fifia ene, gake le ɣeyiɣi aɖe megbe la, ŋuɖoɖoawo megawɔa dɔ o, alo wotrɔna kura.

Gake agbalẽ aɖe li, si ƒe ŋuɖoɖowo ŋu kakaɖedzi le. Enye nyateƒegbalẽ. Yesu Kristo do gbe ɖa na Mawu gblɔ be: “Wò nya la nye nyateƒe.” (Yohanes 17:17) Nya mae míeyɔna egbea be Biblia Kɔkɔe la. Ne èʋu axa siwo kplɔe ɖo la, àkpɔ ale si Biblia ɖo biabia siwo le etame ŋui eme kɔ, eye wònye nyateƒea ŋutɔŋutɔ.

 Ðe Mawu Tsɔa Ðe Le Eme Na Mí Vavãa?

NU SI TA AMEWO BIAA NYA SIA: Egbea, xexea me yɔ fũu kple ŋutasesẽ kpakple nu madzɔmadzɔ wɔwɔ. Subɔsubɔha geɖe fiaa nu be Mawu ŋutɔe di be míanɔ fu siawo kpem.

NU SI BIBLIA LA FIA: Menye Mawue nana nu vɔ̃ɖiwo dzɔna gbeɖe o. Hiob 34:10 gblɔ be: “Nede megbe xaa be, Mawu nawɔ nu vɔ̃ɖi, eye ŋusẽkatãtɔ nawɔ nu madzɔmadzɔ.” Mawu ɖo tame nyui aɖe ɖe amegbetɔwo ŋu. Esia tae Yesu fia mí be míado gbe ɖa be: “Mía Fofo si le dziƒowo, wò . . . fiaɖuƒe nava. Wò lɔlɔ̃nu nava eme le dziƒo, kple anyigba dzi hã.” (Mateo 6:9, 10) Mawu tsɔ ɖe le eme na mí ale gbegbe be, ewɔ afɔɖeɖe ɖe sia ɖe be yeana yeƒe tameɖoɖo la nava eme.—Yohanes 3:16.

Kpɔ 1 Mose 1:26-28; Yakobo 1:13; kple 1 Petro 5:6, 7 hã.

Aʋawɔwɔ Kple Fukpekpe Nu Ava Yi Gbe Aɖe Gbea?

NU SI TA AMEWO BIAA NYA SIA: Aʋawɔwɔ yi edzi le ame gbogbo aɖewo ƒe agbe ɖem ɖa. Amegbetɔ ƒe fukpekpe ɖea fu na mí katã.

NU SI BIBLIA LA FIA: Mawu gblɔe ɖi be, ɣeyiɣi aɖe ava esime yeana ŋutifafa nanɔ anyigba la katã dzi. Le eƒe Fiaɖuƒe, si nye dziƒodziɖuɖu, te la, amewo ‘magasrɔ̃ aʋawɔwɔ azɔ o.’ Ke boŋ “woatsɔ woƒe yiwo atu kodziwoe.” (Yesaya 2:4) Mawu aɖe nu madzɔmadzɔ wɔwɔ kple fukpekpe ɖe sia ɖe ɖa. Biblia la do ŋugbe be: “[Mawu atutu] aɖatsi sia aɖatsi ɖa le woƒe ŋkume, eye ku maganɔ anyi o, eye konyifafa kple ɣlidodo kple vevesese hã maganɔ anyi o. Nu siwo nɔ anyi tsã [siwo dometɔ aɖewoe nye nu madzɔmadzɔ wɔwɔ kple fukpekpe siwo li egbea] la nu va yi.”—Nyaɖeɖefia 21:3, 4.

Kpɔ Psalmo 37:10, 11; 46:10; kple Mixa 4:1-4 hã.

Nu Kae Dzɔna Ðe Ame Siwo Ku La Dzi?

NU SI TA AMEWO BIAA NYA SIA: Subɔsubɔha siwo le xexea me la dometɔ akpa gãtɔ fiaa nu be, nane le ame me, si yia edzi nɔa agbe le ku megbe. Wo dometɔ aɖewo gblɔna be kukuawo ate ŋu awɔ nuvevi agbagbeawo, alo be Mawu hea to na ame vɔ̃ɖiwo hewɔa fu wo tegbee le dzo mavɔ aɖe me.

NU SI BIBLIA LA FIA: Ne ame ku ko la, meganɔa afi aɖeke o. Nyagblɔla 9:5 gblɔ be: “Kukuawo menya naneke o.” Esi kukuawo mate ŋu anya nu, ase nu le lã me, alo anya naneke si le dzɔdzɔm o ta la, womate ŋu awɔ nuvevi agbagbeawo o; womate ŋu akpe ɖe wo ŋu hã o.—Psalmo 146:3, 4.

Kpɔ 1 Mose 3:19 kple Nyagblɔla 9:6, 10 hã.

 Ðe Mɔkpɔkpɔ Aɖe Gali Na Kukuawoa?

NU SI TA AMEWO BIAA NYA SIA: Míedi be míanɔ agbe, eye míedi be mía kple míaƒe ame veviwo míase agbe ƒe vivi. Eya ta esɔ le dzɔdzɔme nu be míedina vevie be míagakpɔ míaƒe ame vevi siwo ku la ake.

NU SI BIBLIA LA FIA: Woafɔ ame siwo ku la dometɔ akpa gãtɔ ɖe tsitre. Yesu do ŋugbe be, “ame siwo katã le ŋkuɖodziyɔdowo me la, . . . woado go.” (Yohanes 5:28, 29) Abe ale si Mawu ɖoe le gɔmedzedzea me ene la, mɔnukpɔkpɔ asu ame siwo woafɔ ɖe tsitre la si be woanɔ paradiso me le anyigba dzi. (Luka 23:43) Ŋugbedodo sia si ava eme kpuie la awɔe be toɖolawo anɔ agbe tegbee le lãmesẽ blibo me. Biblia gblɔ be: “Ame dzɔdzɔewo anyi anyigba la dome, eye woanɔ edzi tegbee.”—Psalmo 37:29.

Kpɔ Hiob 14:14, 15; Luka 7:11-17; kple Dɔwɔwɔwo 24:15 hã.

Aleke Wòle Be Mado Gbe Ða Hafi Mawu Nasee?

NU SI TA AMEWO BIAA NYA SIA: Subɔsubɔha ɖe sia ɖe kloe me tɔwo doa gbe ɖa. Gake ewɔna na ame geɖe be womeɖoa yewoƒe gbedodoɖawo ŋu o.

NU SI BIBLIA LA FIA: Yesu fia mí be míaganɔ nya ɖeka tɔgbi gblɔm le míaƒe gbedodoɖawo me o. Egblɔ be: “Ne miele gbe dom ɖa la, miganɔ nya ɖeka mawo ke gbɔgblɔ dzi . . . o.” (Mateo 6:7) Ne míedi be Mawu nase míaƒe gbedodoɖawo la, ekema ele be míado gbe ɖa le ale si wòdi nu. Hafi míate ŋu awɔ ema la, ehiã be míasrɔ̃ nu si nye Mawu ƒe lɔlɔ̃nu, eye míado gbe ɖa wòawɔ ɖeka kple eƒe lɔlɔ̃nua. Yohanes Ƒe Agbalẽ Gbãtɔ 5:14 ɖe eme be: “Nu sia nu si míabia wòawɔ ɖeka kple [Mawu ƒe] lɔlɔ̃nu la, aɖo to mí.”

Kpɔ Psalmo 65:3; Yohanes 14:6, 14; kple 1 Yohanes 3:22 hã.

Aleke Mawɔ Akpɔ Dzidzɔ Le Agbe Me?

NU SI TA AMEWO BIAA NYA SIA: Ame geɖe susuna be ga, ŋkɔxɔxɔ, ɖekadzedze alo tugbedzedze ye ana yewoakpɔ dzidzɔ. Eya ta wonɔa nu siawo yome—gake nublanuitɔe la, woƒe asi metea ŋu sua dzidzɔ si dim wole la dzi o.

NU SI BIBLIA LA FIA: Yesu na míenya nu si tututu nana wokpɔa dzidzɔ esime wògblɔ be: “Dzidzɔtɔwoe nye ame siwo nyae be gbɔgbɔmenuwo hiã yewo.” (Mateo 5:3) Ne míedze agbagba kpɔ nu si hiã mí wu—si nye nyateƒe si ku ɖe Mawu kple tame si wòɖo ɖe mía ŋu ŋuti—la gbɔ ko hafi míate ŋu akpɔ dzidzɔ vavãtɔ. Bibliae fia nyateƒe ma mí. Nyateƒe ma nyanya ate ŋu akpe ɖe mía ŋu míanya nu si le vevie ŋutɔŋutɔ kple nu si mele vevie o. Ne míenɔa te ɖe Biblia me nyateƒea dzi hafi wɔa nyametsotsowo, eye míenɔa agbe ɖe enu la, ana míakpɔ dzidzɔ geɖe wu le agbe me.—Luka 11:28.

Kpɔ Lododowo 3:5, 6, 13-18 kple 1 Timoteo 6:9, 10 hã.

 Biabiawo dometɔ ade ƒe ŋuɖoɖo si le Biblia me la me koe míedzro le afi sia. Èdi be yeanya geɖe kpeea? Ne èle ame siwo “nyae be gbɔgbɔmenuwo hiã yewo” dome la, ekema àdii godoo. Ðewohĩ ànɔ nya bubu siawo biam ɖokuiwò, be: ‘Ne Mawu tsɔa ɖe le eme na mí ɖe, ekema nu ka tae wòɖe mɔ ɖe vɔ̃ɖivɔ̃ɖi kple fukpekpe sia gbegbe ŋu va se ɖe fifia? Aleke mawɔ be nye ƒomea me tɔwo nakpɔ dzidzɔ geɖe wu?’ Biblia ɖo nya siawo kple bubu geɖewo ŋu tsitotsito wòdea dzi gbɔ na ame.

Ke hã, egbea ame geɖe medina be yewoaxlẽ Biblia o. Wobunɛ be enye agbalẽ gã, eye egɔmesese sesẽna. Àdi be woakpe ɖe ye ŋu yeakpɔ nyabiase siwo le ye si la ƒe ŋuɖoɖowo le Biblia mea? Yehowa Ðasefowo ate ŋu akpe ɖe ŋuwò le mɔ eve aɖewo nu.

Gbãtɔe nye agbalẽ si nye Nu Kae Biblia Fia Mí? Wotrɔ asi le eŋu be wòakpe ɖe ame siwo mevona o ŋu be woadzro ŋuɖoɖo siwo me kɔ, siwo le Biblia me le agbe me nyabiase vevitɔwo ŋu la me. Mɔ eveliae nye be, woawɔ ɖoɖo be yewoasrɔ̃ Biblia kpli wò femaxee. Yehowa Ðasefo siwo le miaƒe nutoa me la dometɔ aɖe, si nya Biblia nyuie la, ava gbɔwò le aƒewò me alo le teƒe bubu aɖe si sɔ na wò, eye wòazã ɣeyiɣi ʋɛ aɖe kwasiɖa sia kwasiɖa atsɔ adzro Biblia me kpli wò femaxee. Ðoɖo sia ɖe vi na ame miliɔn geɖewo le xexea me godoo. Wo dometɔ geɖe va ƒo nya ta be: “Meke ɖe nyateƒea ŋu!”

Nu xɔasi bubu aɖeke megali wu esia o. Biblia me nyateƒea nyanya nana míevona tso aʋatsodzixɔsewo, subɔsubɔhawo ƒe nufiafia siwo tɔtɔa ame, kple vɔvɔ̃ manyatelenuwo me. Enana mɔkpɔkpɔ sua mía si, míenyaa nu si tae míele agbe, eye míekpɔa dzidzɔ. Yesu gblɔ be: “Miadze si nyateƒe la, eye nyateƒe la ana ablɔɖe mi.”—Yohanes 8:32.