Be nànye Mawu xɔlɔ̃ la, ele be nàsrɔ̃ nu tso eŋu. Ðe xɔ̃wòwo nya wò ŋkɔ hezãnɛa? Wonyae eye wozãnɛ. Mawu hã di be nànya yeƒe ŋkɔ eye nàzãe. Mawu ƒe ŋkɔe nye Yehowa. (Psalmo 83:19; Mateo 6:9) Ele hã be nàsrɔ̃ nusiwo wòlɔ̃ kple nusiwo wòtsri. Ehiã be nànya amesiwo nye exɔlɔ̃wo kple amesiwo nye eƒe futɔwo. Exɔa ɣeyiɣi hafi nànya ame aɖe nyuie. Biblia gblɔ be nunya le eme be nàɖo ɣeyiɣi ɖi hena nusɔsrɔ̃ tso Yehowa ŋu.—Efesotɔwo 5:15, 16.

Mawu xɔlɔ̃wo wɔa nusi dzea eŋu. Bu xɔ̃wòwo ŋu kpɔ. Ne mèwɔa nu ɖe wo ŋu nyuie o eye nèwɔa nusiwo wolé fui la, woayi edzi anye xɔ̃wòwoa? Le nyateƒe me la, womagadze xɔ̃ wò o! Le mɔ ma ke nu la, ne èdi be yeanye Mawu xɔlɔ̃ la, ehiã be nàwɔ nusi dzea eŋu.—Yohanes 4:24.

Menye subɔsubɔhawo katã dzie wotona dzea xɔ̃ Mawu o. Yesu, amesi nye Mawu xɔlɔ̃ si te ɖe eŋu wu amesiame la ƒo nu tso mɔ eve ŋu. Mɔawo dometɔ ɖeka keke eye amewo le edzi fũ. Mɔ ma ɖo ta tsɔtsrɔ̃ me. Mɔ evelia le biie eye amesiwo zɔa edzi mesɔ gbɔ o. Mɔ ma kplɔa ame yia agbe mavɔ me. Esia fia be ne èdi be yeanye Mawu xɔlɔ̃ la, ele be nàsrɔ̃ mɔ nyuitɔ si dzi wotona subɔnɛ.—Mateo 7:13, 14.