TA SIA ƑE TAÐODZINU

Abe ale si Yesu gblɔe ɖi ene la, wotsɔa nya ɖe eƒe amewo ŋu le ʋɔnu ɖe gbeƒãɖeɖedɔa ta

1, 2. (a) Aleke subɔsubɔhakplɔlawo tso ɖe gbeƒãɖeɖedɔa ŋui, gake nu kae apostoloawo wɔ? (b) Esi wode se na apostoloawo be woagaɖe gbeƒã azɔ o la, nu ka tae womewɔ ɖe edzi o?

ƑE 33 M.Ŋ. ƒe Pentekoste dzie woɖo Kristo hame gbãtɔ anyi le Yerusalem. Kwasiɖa ʋɛ aɖewo ko le ema megbe la, Satana va dze wo dzi. Ekpɔe be ɣeyiɣi ma sɔ na ye nyuie ŋutɔ, elabena hamea metsi haɖe o. Edi be yeabu mo nɛ hafi wòava yi tsitsi ge ahasẽ ŋu. Eya ta eto mɔ aɖe dzi na subɔsubɔhakplɔlawo ɖo asi Fiaɖuƒegbeƒãɖeɖedɔa dzi enumake. Gake apostoloawo yi edzi ɖe gbeƒã dzinɔameƒotɔe, si wɔe be ŋutsu kple nyɔnu geɖewo va “xɔ Aƒetɔ la dzi se.”—Dɔw. 4:18, 33; 5:14.

Apostoloawo kpɔ dzidzɔ “elabena wobui be yewodze be woado vlo yewo le eƒe ŋkɔ la ta”

2 Esia ku dzi na tsitretsiɖeŋulawo eye wogatso ɖe wo ŋu ake helé apostoloawo katã de gaxɔ me. Gake le zã me la, Yehowa dɔ mawudɔla aɖe wòva ʋu gaxɔa ƒe ʋɔtruwo na wo, eye kaka ŋu nake la, woawoe nye ema gale gbeƒã ɖem! Wogalé wo ake hekplɔ wo yi dziɖulawo ŋkume, eye wotso wo nu be woda se si wode be woagaɖe gbeƒã azɔ o la dzi. Apostoloawo ɖo eŋu dzinɔameƒotɔe be: “Ele be míaɖo to Mawu abe dziɖula ene wu amewo.” Esia na dziɖulawo do dɔmedzoe vevie hedi be “yewoawu” apostoloawo. Gake le ɣeyiɣi vevi ma me la, Sefiala Gamaliel si ŋu wodea bubui ŋutɔ la de nu nyaa me hexlɔ̃ nu dziɖulawo be: “Mikpɔ mia ɖokui dzi nyuie . . . Migade nu ame siawo ƒe nya me o, ke boŋ miɖe asi le wo ŋu.” Nukutɔe la, dziɖulawo wɔ ɖe eƒe aɖaŋuɖoɖoa dzi, eye woɖe asi le apostoloawo ŋu. Nu kae nuteƒewɔla siawo wɔ? Vɔvɔ̃manɔmee la, “woyi edzi nɔ nu fiam henɔ nya nyui la gblɔm le Kristo la, si nye Yesu, ŋu madzudzɔmadzudzɔe.”—Dɔw. 5:17-21, 27-42; Lod. 21:1, 30.

3, 4. (a) Tso gbe aɖe gbe ke la, mɔ ka dzie Satana tona dzea Mawu ƒe amewo dzi? (b) Nu kawo mee míadzro le ta sia kple eve siwo kplɔe ɖo me?

3 Senya ma si wotsɔ ɖe apostoloawo ŋu le ƒe 33 M.Ŋ. mee nye dziɖulawo ƒe tsitretsiɖeŋu gbãtɔ ɖe Kristo hamea ŋu, gake mese ɖe ema ko dzi o. (Dɔw. 4:5-8; 16:20; 17:6, 7) Le míaƒe ɣeyiɣia hã me la, Satana gakpɔtɔ le dzo ƒlɔm ɖe ame siwo tsi tsitre ɖe tadedeagu vavãtɔ ŋu la te be woaƒoe ɖe dziɖulawo nu woaɖo asi míaƒe gbeƒãɖeɖedɔa dzi. Tsitretsiɖeŋulawo tsɔ nya vovovowo ɖe Mawu ƒe amewo ŋu. Esiawo dometɔ ɖekae nye be míedea zitɔtɔ amewo dome alo be míenye dzredilawo. Bubue nye be míenye ame siwo dzea aglã ɖe dziɖuɖu ŋu. Wogagblɔna hã be asitsadɔe míaƒe gbeƒãɖeɖedɔa nye. Ne mía nɔviwo kpɔe be esɔ la, wotsɔa  nya siawo yia ʋɔnui heɖenɛ fiana be nutsotso siawo dometɔ aɖeke menye nyateƒe o. Nu kawoe do tso nya siwo wotsɔ yi ʋɔnu va yi la me? Aleke nyametsotso siwo ʋɔnudrɔ̃ƒewo wɔ ƒe aɖewo va yi la le vi ɖem na wò egbeae? Mina míadzro ʋɔnudrɔ̃nya siawo dometɔ ʋɛ aɖewo me ne míakpɔ ale si esia kpe ɖe mía ŋu le “nya nyui la ta ʋiʋli kple eɖoɖo anyi le se nu” me la ɖa.—Flp. 1:7.

4 Míadzro ale si míeʋli gome si le mía si be míaɖe gbeƒã nya nyuia tae la me le ta sia me. Le ta eve siwo akplɔ esia ɖo me la, míadzro ale si míeʋli míaƒe akpaɖekedzimademade kple ale si wòle vevie be míanɔ agbe ɖe Fiaɖuƒea ƒe dzidzenuwo nu ta le ʋɔnui hã me.

Dzredilawoe Wonyea, Alo Mawu Fiaɖuƒea Taʋlila Wɔnuteƒewoe?

5. Nu ka tae wolé Fiaɖuƒegbeƒãɖela geɖewo le ƒe 1930-awo ƒe nuwuwu lɔƒo, eye afɔ kae ame siwo nɔ ŋgɔ xɔm le habɔbɔa me la nɔ ɖoɖo wɔm be yewoaɖe?

5 Le ƒe 1930-awo ƒe nuwuwu lɔƒo la, United States ƒe dugã kple nuto geɖe dziɖulawo dze agbagba be yewoazi Yehowa Ðasefowo dzi woaxɔ mɔɖegbalẽ alo mɔɖeɖe le setɔwo gbɔ hafi awɔ woƒe gbeƒãɖeɖedɔa. Gake mía nɔviwo meyi ɖaxɔ mɔɖegbalẽ aɖeke o. Wonya be ne yewoxɔ mɔɖegbalẽ hã la, woagate ŋu ate fli ɖe eme, eye woxɔe se hã be dziɖuɖu aɖeke mekpɔ mɔ abia be Kristotɔwo naxɔ mɔɖeɖe tso yewo gbɔ hafi awɔ ɖe Yesu ƒe se si wòde be woaɖe gbeƒã Fiaɖuƒea la dzi o. (Marko 13:10) Esia wɔe be wolé Fiaɖuƒegbeƒãɖela alafa geɖewo. Eya ta ame siwo nɔ ŋgɔ xɔm le habɔbɔa me la nɔ ɖoɖo wɔm be yewoatsɔ nyaa ayi ʋɔnui. Wodi be yewoaɖee afia be Dziɖuɖua le subɔsubɔblɔɖe xɔm le Ðasefowo si madzemadzee. Eva dzɔ be le ƒe 1938 me la, nudzɔdzɔ aɖe fɔ ʋɔnudrɔ̃nya vevi aɖe ɖe te, si me tsonuawo aɖe vi na Yehowa ƒe amewo ɖaa. Nu kae dzɔ?

6, 7. Nu kae dzɔ ɖe Cantwell ƒomea dzi?

6 Le Braɖa ŋdi, April 26, 1938 dzi la, Newton Cantwell, si xɔ ƒe 60, kple srɔ̃a Esther kpakple wo viŋutsu etɔ̃ siwo nye Henry, Russell, kple Jesse woyi gbeƒã ɖe ge le du si nye New Haven, si le Connecticut la me. Wo ame atɔ̃awo katã wonye mɔɖela veviwo. Le nyateƒe me la, wonya be ate ŋu adzɔ be yewomagbɔ va aƒe me gbe ma gbe o. Nu ka tae? Kpovitɔwo lé wo zi geɖe va yi, eya ta ele susu me na wo be woagate ŋu alé yewo ake. Gake ema meɖe dzi le Cantwell ƒomea ƒo be woagaɖe gbeƒã Fiaɖuƒegbedeasia o. Ʋu evee wotsɔ yi New Haven dua me. Newton ku ƒomea ƒe ʋu si me agbaƒomɔ̃wo kple Biblia srɔ̃gbalẽwo le taŋ, eye Henry si xɔ ƒe 22 hã ku ʋu evelia, si tame nyasemɔ̃ le. Abe ale si wòle susu me na wo xoxo ene la, mede gaƒoƒo aɖeke hafi kpovitɔwo va do ɖe wo dzi o.

7 Wolé Russell si xɔ ƒe 18 gbã, emegbe wolé Newton kple srɔ̃a Esther hã. Jesse si xɔ ƒe 16 ya nɔ adzɔge vie, eya ta enɔ ekpɔm esime kpovitɔwo kplɔ edzilawo kple nɔviaŋutsua dzoe. Henry nɔ gbeƒã ɖem le dua ƒe akpa bubu, eya ta Jesse ɖeka koe tsi afi ma. Ke hã, etsɔ eƒe agbaƒomɔ̃a heyi gbeƒãɖeɖedɔa dzi. Katolikotɔ eve aɖewo lɔ̃ be Jesse naƒo Nɔviŋutsu Rutherford ƒe nuƒo si ƒe tanyae  nye “Futɔwo” la le agbaƒomɔ̃a dzi na yewo. Gake esi ŋutsuawo nɔ to ɖom nuƒoa la, wodo dɔmedzoe vevie eye wodi be yewoaƒo Jesse. Jesse wɔ nu tufafatɔe hedzo le wo gbɔ kpoo, gake eteƒe medidi hafi kpovitɔwo va lée o. Alea wòdzɔe be Jesse hã va do ɖe gaxɔ me. Kpovitɔawo metsɔ nya aɖeke ɖe Nɔvinyɔnu Cantwell ŋu o, gake wotsɔ nya ɖe Nɔviŋutsu Cantwell kple viawo ya ŋu. Ke hã, woɖe mɔ woda megbe na wo gbe ma gbe woɖe asi le wo ŋu kple susu be woava drɔ̃ nyaa emegbe.

8. Nu ka tae wobu fɔ Jesse Cantwell le ʋɔnu be enye dzredila?

8 Ɣleti ʋɛ aɖewo megbe, le September 1938 me la, wohe Cantwell ƒomea yi ʋɔnu, le New Haven. Wobu fɔ Newton, Russell, kple Jesse be wole nu dzɔm le amewo si evɔ womexɔ mɔɖegbalẽ hafi o. Wotsɔ nyaa yi Connecticut Ʋɔnudrɔ̃ƒe Kɔkɔtɔ wogbugbɔ drɔ̃e, gake wogabu fɔ Jesse ya be ele zitɔtɔ dem amewo me, alo be ele dzre dim le amewo ŋu. Nu ka tae? Katolikotɔ eve siwo ɖo to nuƒo si wolé ɖe mɔ̃a dzi la va ɖi ɖase le ʋɔnudrɔ̃ƒea be wodo nu ɖe yewoƒe subɔsubɔhaa gbɔ le nuƒoa me eye be esia nye dzredidi le yewo ŋu. Be woaɖee afia be fɔbubu sia mele eteƒe o la, nɔvi siwo le ŋgɔ xɔm le habɔbɔa me la bia be Amerika ƒe Ʋɔnudrɔ̃ƒe Kɔkɔtɔ, si nye ʋɔnudrɔ̃ƒe kɔkɔtɔ kekeake le dukɔa me la, nagbugbɔ nyaa adrɔ̃ na yewo.

9, 10. (a) Afia kae Amerika Ʋɔnudrɔ̃ƒe Kɔkɔtɔ tso le nya si wotsɔ ɖe Cantwell ƒomea ŋu me? (b) Aleke afiatsotso ma le vi ɖem na mí egbeae?

9 Tso March 29, 1940 dzi la, Ʋɔnudrɔ̃lagã Charles E. Hughes kple ʋɔnudrɔ̃la enyi bubuwo woɖo to se Nɔviŋutsu Hayden Convington, si nye Yehowa Ðasefowo ƒe lɔya la ƒe  numeɖeɖewo. * Esi Connecticut lɔyaa hã va nɔ nu me ɖem henɔ agbagba dzem be yeaɖo kpe edzi be Ðasefowo nye dzredilawo la, ʋɔnudrɔ̃lawo dometɔ ɖeka biae be: “Ðe menye nyateƒe be gbedeasi si Kristo Yesu ɖe gbeƒãe la mevivi amewo nu le eƒe ɣeyiɣia me oa?” Lɔyaa ɖo eŋu be: “Ɛ̃, nyateƒee, eye ne maɖo ŋku edzi nyuia, Biblia gblɔ nu si amewo tu kplii le eƒe gbeƒãɖeɖedɔa ta hã.” Aleke gbegbe lɔyaa ƒe nya siawo ɖe ha wo ɖokuiwoe nye esi! Le manyamanya me la, etsɔ Ðasefowo sɔ kple Yesu, eye wòtsɔ dukɔa sɔ kple ame siwo bu fɔ Yesu madzemadzee. Le May 20, 1940 dzi la, ʋɔnudrɔ̃lawo katã tsɔ nu sɔsɔe tso afia na Ðasefowo be woƒe nya dzɔ.

Hayden Covington (ŋgɔgbe, le domedomea), Glen How (miame), kple nɔvi bubuwo le dodom le ʋɔnudrɔ̃ƒe aɖe esi woɖu dzi le senya aɖe me megbe

10 Nu kae ɖe dzesi le Ʋɔnudrɔ̃ƒea ƒe afiatsotso sia ŋu? Ena subɔsubɔblɔɖe geɖe va su dukɔa me viwo si, eye nutodziɖula alo dziɖuɖumegã aɖeke megakpɔ mɔ awɔ se be yeatsɔ axe mɔ ɖe amewo ƒe subɔsubɔblɔɖe nu o. Ʋɔnudrɔ̃lawo kpɔe hã be Jesse ƒe nuwɔna aɖeke meɖee fia “be ele . . . dzre dim alo le zitɔtɔ dem amewo me o.” Eya ta afiatsotsoa ɖo kpe edzi eme kɔ ƒãa be Yehowa Ðasefowo menye dzredilawo o. Aʋadziɖuɖu gã ka gbegbee nye esi Mawu ƒe amewo kpɔ! Aleke afiatsotso sia gakpɔtɔ le vi ɖem na mí egbeae? Lɔya aɖe si nye Ðasefo gblɔ be: “Subɔsubɔ faa ƒe ablɔɖe si su mía si la na be míeɖea gbeƒã míaƒe mɔkpɔkpɔa na amewo le míaƒe nutoa me esi míegavɔ̃na be woava lé mí madzemadzee o.”

Aglãdzelawoe Wonyea, Alo Nyateƒea Ƒe Gbeƒãɖelawoe?

Trakt si nye Quebec Ƒe Fuléle Mawu Kple Kristo Kpakple Ablɔɖe Nye Canada Katã Ƒe Ŋukpe

11. Traktmamadɔ tɔxɛ kae mía nɔviwo wɔ le Canada, eye nu ka tae?

11 Le ƒe 1940-awo me la, Yehowa Ðasefo siwo le Canada hã do go tsitretsiɖeŋu sesẽwo. Eya ta le ƒe 1946 me la, be mía nɔviwo nana amewo nanya ale si gbegbe dziɖuɖua le woƒe subɔsubɔblɔɖe tem ɖe toe la, wota trakt aɖe si ƒe tanyae nye Quebec Ƒe Fuléle Mawu Kple Kristo Kpakple Ablɔɖe Nye Canada Katã Ƒe Ŋukpe (si le yevugbe me), eye wowɔ ɖoɖo be nɔviwo natsɔ ŋkeke 16 sɔŋ amae le dukɔa me. Enye axa ene ƒe trakt aɖe si klo nu le ale si subɔsubɔhakplɔlawo de dzo amewo me wowɔ anyra ɖe mía nɔviwo ŋu, ale si kpovitɔwo sẽ ŋuta le wo ŋu, kple ale si nu vlo wɔhawo va dzea wo dzi le Quebec nutoa me la dzi keŋkeŋ. Trakt la gblɔ kpee be: “Va se ɖe fifia, wogakpɔtɔ le Yehowa Ðasefowo lém madzemadzee. Yehowa Ðasefowo ƒe nya siwo wotsɔ yi ʋɔnu le Greater Montreal dugãa me la ade 800 sɔŋ.”

12. (a) Aleke tsitretsiɖeŋulawo wɔ nu ɖe traktmama- dɔa ŋui? (b) Nya kae wotsɔ ɖe mía nɔviawo ŋu? (Kpɔ etenuŋɔŋlɔa hã.)

12 Le adaŋudede kple Roma Katoliko Papatenɔla Villeneuve megbe la, Quebec dziɖuɖumegãwo ƒe tatɔ Maurice Duplessis ho “aʋa si me nublanuikpɔkpɔ mele o” ɖe Ðasefowo ŋu le trakt sia mama ta. Eteƒe medidi o, Ðasefowo ƒe nya siwo yi ʋɔnu la dzi ɖe edzi zi gbɔ zi eve, tso 800 va ɖo 1,600 sɔŋ. Nɔvinyɔnu mɔɖela aɖe gblɔ be: “Zi ale si nu kpovitɔwo lé mí la sɔ gbɔ ale gbegbe be míagate ŋu axlẽe o.” Wotsɔ nya ɖe Ðasefo siwo wolé wole trakt-awo mam la ŋu be wole “aglãdzenya kple ameŋugblẽnya vɔ̃ɖi” kakam. *

13. Ame kawo ŋue aglãdzedze ɖe dziɖuɖu ŋu ƒe nya gbãtɔ si wodrɔ̃ la ku ɖo, eye nyametsotso kae ʋɔnudrɔ̃ƒea wɔ?

 13 Le ƒe 1947 me la, wodrɔ̃ aglãdzedze ɖe dziɖuɖu ŋu ƒe nya gbãtɔ le ʋɔnu. Eku ɖe Nɔviŋutsu Aimé Boucher kple vianyɔnu eve siwo nye Gisèle, si xɔ ƒe 18 kple Lucille, si xɔ ƒe 11 la ŋu. Wokpɔ gome le traktmamadɔa me le teƒe si te ɖe woƒe aƒe ŋu le Quebec ƒe anyiehe tonutowo me, gake woƒe nuwɔna aɖeke meɖee fia be wonye aglãdzela sedzidalawo o. Nɔviŋutsu Boucher nye ame fatu kple ɖokuibɔbɔla si media nya o, ke boŋ eléa fɔ ɖe dɔ ŋu wɔna le eƒe agble sue si te ɖe woƒe aƒea ŋu la me, eye wòdoa sɔ si ŋu agbatsɔkeke le la yia dua me ɣeaɖewoɣi. Ke hã, eƒe ƒomea hã le ame siwo ŋu wowɔ nu madzɔmadzɔ siwo ŋu woƒo nu tsoe le trakt la me ɖo la dome. Togbɔ be kpeɖodziwo ɖee fia le nyaa drɔ̃ɣi be Boucher ƒomea meɖi fɔ o hã la, ʋɔnudrɔ̃laa, si lé fu Ðasefowo la, gbe lɔlɔ̃ ɖe edzi. Ke boŋ ede ame siwo tsɔ nya ɖe Boucher ƒomea ŋu la dzi be aglãdzenyawo le trakt si womaa me, eya ta ele be yeabu fɔ wo. Nu si ʋɔnudrɔ̃laa ƒe nya siawo fia koe nye be: Agɔdzedzee wònye be woato nyateƒe! Ebu fɔ Aimé kple Gisèle be wokaka aglãdzenya kple ameŋugblẽnya vɔ̃ɖi, eye wotu Lucille ɖevi sue la hã ɖe gaxɔ me ŋkeke eve sɔŋ. Nɔviawo bia be Canada ƒe Ʋɔnudrɔ̃ƒe Kɔkɔtɔ nagbugbɔ nyaa adrɔ̃ na yewo, eye wolɔ̃ ɖe edzi.

14. Aleke Quebec nɔviawo wɔ nu le yometiti ƒe ɣeyiɣiawo me?

14 Le ɣeyiɣi mawo me la, togbɔ be wogakpɔtɔ dzea mía nɔviŋutsu kple nɔvinyɔnuwo dzi le Quebec hã la, woyi edzi tsɔ dzinɔameƒo ɖe gbeƒã Fiaɖuƒegbedeasia, eye nu nyui geɖewo do tso eme. Le ƒe ene megbe, tso esime wodze trakt la mama le ƒe 1946 me la, Ðasefo siwo le Quebec ƒe xexlẽme dzi ɖe edzi tso 300 va ɖo 1,000 sɔŋ! *

15, 16. (a) Nyametsotso kae Canada Ʋɔnudrɔ̃ƒe Kɔkɔtɔ wɔ le nya si wotsɔ ɖe Boucher ƒomea ŋu me? (b) Aleke nyametsotso sia ɖe vi na mía nɔviwo kple ame bubuwo siaa?

15 Le June 1950 me la, Canada Ʋɔnudrɔ̃ƒe Kɔkɔtɔa ƒe ʋɔnudrɔ̃la asiekeawo katã nɔ anyi ɖe Aimé Boucher ƒe nyaa ŋu. Ɣleti ade megbe, le December 18, 1950 dzi la, Ʋɔnudrɔ̃ƒea tso afia be Ðasefowo tɔ dzɔ. Nu ka tae? Nɔviŋutsu Glen How, si nye Ðasefoawo ƒe lɔya la ɖe nu me be Ʋɔnudrɔ̃ƒea lɔ̃ ɖe numeɖeɖe siwo yewona la dzi be, “be woadze aglã ɖe dziɖuɖu ŋu” bia be woaƒlɔ dzo ɖe amewo te be woawɔ ʋunyaʋunya alo atso ɖe dziɖuɖua ŋu. Gake “dzodede amewo me nenema ƒe nya aɖeke menɔ trakt la me o, eya ta emenyawo nye nuƒoƒo faa ƒe ablɔɖe si ŋu se ɖe mɔ ɖo.” Nɔviŋutsu How gblɔ kpee be: “Mekpɔ Yehowa ƒe asi le nya sia me, eyae na míeɖu aʋaa dzi.” *

16 Ɛ̃, aʋadziɖuɖu gã aɖee Ʋɔnudrɔ̃ƒe Kɔkɔtɔa ƒe nyametsotso sia nye na Mawu Fiaɖuƒea vavã. Nyametsotso vevi sia na wote fli ɖe aglãdzedze ŋuti nya 122 bubu siwo katã wotsɔ ɖe Quebec nɔviawo ŋu le ʋɔnu la me! Nyametsotso sia na hã be ablɔɖe su Canada kple Commonwealth dukɔwo me viwo si azɔ be woaƒo nu faa ne wokpɔe be dziɖuɖua ɖe afɔ aɖe si mesɔ o. Azɔ hã, aʋadziɖuɖu sia ŋe kɔ le nugbe si Quebec Sɔlemehaa kple dziɖuɖua woƒo takpli ɖo be yewoate Yehowa Ðasefowo ƒe subɔsubɔblɔɖe ɖe to la nu. *

 Asitsalawoe Wonyea, Alo Mawu Fiaɖuƒea Ƒe Gbeƒãɖela Dovevienuwoe?

17. Se kae dziɖuɖu aɖewo dina be yewoatsɔ akplɔ míaƒe gbeƒãɖeɖedɔa?

17 Abe Kristotɔ gbãtɔwo ene la, Yehowa subɔla siwo li egbea hã ‘metsɔa Mawu ƒe nya la tsaa asi o.’ (Mixlẽ 2 Korintotɔwo 2:17.) Ke hã, dziɖuɖu aɖewo dina be yewoatsɔ se siwo ku ɖe asitsatsa ŋu la akplɔ míaƒe subɔsubɔdɔa hã. Mina míadzro nya siwo wotsɔ ɖe Yehowa Ðasefowo ŋu le ʋɔnu be asitsadɔe míaƒe gbeƒãɖeɖedɔa nye la dometɔ eve me kpɔ.

18, 19. Nu kae dziɖuɖumegãwo wɔ le Denmark be yewoatsɔ axe mɔ ɖe gbeƒãɖeɖedɔa nu?

18 Denmark. Le October 1, 1932 dzi la, dziɖuɖua de se be ame aɖeke mekpɔ mɔ adzra agbalẽ aɖeke ne mexɔ nudzadzra ŋuti mɔɖegbalẽ hafi o. Mía nɔviwo kpɔe be nya ma meku ɖe yewo ŋu o, eya ta womeyi ɖaxɔ mɔɖegbalẽ aɖeke o. Le ŋufɔke la, gbeƒãɖela atɔ̃ aɖewo yi ɖaɖe gbeƒã le Roskilde dua me, afi si didi tso fiadua, si nye Copenhagen, gbɔ abe kilometa 30 ene le ɣetoɖoƒe gome. Esi wokpã le gbeadzi la, wodi wo dometɔ ɖeka si ŋkɔe nye August Lehmann do kpoe. Kpovitɔwoe lée be ele nu dzram mɔɖegbalẽ maxɔmaxɔe.

19 Le December 19, 1932 dzi la, wohe August Lehmann yi ʋɔnu. Elɔ̃ ɖe edzi be yema Biblia srɔ̃gbalẽwo na amewo ya, gake menye asi tsam yele o. Ʋɔnudrɔ̃ƒea da asi ɖe eƒe numeɖeɖea dzi hegblɔ be: “Ame si ŋu wotsɔ nyaa ɖo la . . . ŋutɔ wɔa dɔ hekpɔa eɖokui dzi; mekpɔa viɖe aɖeke tso ga si wòxɔna ɖe agbalẽawo ta la me o, eye menye emae nye eƒe taɖodzinu hã o, ke boŋ ezãa eya ŋutɔ ƒe ga le dɔ sia wɔwɔ me.” Ʋɔnudrɔ̃ƒea tso afia dzɔdzɔe na Ðasefoawo hegblɔ be womate ŋu abu Lehmann ƒe gbeƒãɖeɖedɔa “be enye asitsadɔ o.” Gake Mawu ƒe amewo ƒe futɔwo ɖoe kplikpaa be yewoaxe mɔ ɖe gbeƒãɖeɖedɔa nu le dukɔa me kokoko. (Ps. 94:20) Eya ta lɔya si wotsɔ ɖe Ðasefoawo ŋu la tsɔ nyaa yi dukɔa ƒe Ʋɔnudrɔ̃ƒe Kɔkɔtɔ be woagbugbɔ adrɔ̃e. Nu kae nɔviawo wɔ?

20. Nyametsotso kae Denmark ƒe Ʋɔnudrɔ̃ƒe Kɔkɔtɔ wɔ, eye aleke mía nɔviwo wɔ nui?

20 Le kwasiɖa si do ŋgɔ na Ʋɔnudrɔ̃ƒe Kɔkɔtɔa ƒe nyadrɔ̃gbea me la, Ðasefoawo dzi woƒe gbeƒãɖeɖedɔa ɖe edzi le Denmark dukɔ bliboa me. Le Braɖa, October 3, 1933 dzi la, Ʋɔnudrɔ̃ƒe Kɔkɔtɔa tso nyaa me. Elɔ̃ ɖe afia si ʋɔnudrɔ̃ƒe gbãtɔ tso la dzi hegblɔ be August Lehmann meda se aɖeke dzi o. Afiatsotso sia na ablɔɖe Ðasefoawo be woayi edzi aɖe gbeƒã eye ame aɖeke mekpɔ mɔ axe mɔ na wo o. Eya ta nɔviawo gade dzo gbeƒãɖeɖedɔa me ɖe edzi tsɔ da akpe na Yehowa ɖe aʋadziɖuɖu sia ta. Tso esime Ʋɔnudrɔ̃ƒea wɔ nyametsotso ma la, Denmark dziɖuɖua megatee kpɔ be yeaxe mɔ ɖe mía nɔvi siwo le afi ma ƒe gbeƒãɖeɖedɔa nu o.

Ðasefo siwo tsɔ dzinɔameƒo nɔ gbeƒã ɖem le Denmark le ƒe 1930-awo me

21, 22. Nyametsotso kae Amerika ƒe Ʋɔnudrɔ̃ƒe Kɔkɔtɔ wɔ le nya si wotsɔ ɖe Nɔviŋutsu Murdock ŋu me?

21 United States. Le Kwasiɖagbe, February 25, 1940 dzi la, wolé mɔɖela aɖe si ŋkɔe nye Robert Murdock, Jr. kple Ðasefo adre bubuwo esi wonɔ gbeƒã ɖem le du si nye Jeannete, si te ɖe Pittsburgh ŋu, le Pennsylvania, la me. Wobu fɔ wo be wole agbalẽ dzram na amewo evɔ womexɔ mɔɖegbalẽ hafi o. Mía nɔviwo  bia be Amerika ƒe Ʋɔnudrɔ̃ƒe Kɔkɔtɔ nagbugbɔ nyaa adrɔ̃ na yewo eye wolɔ̃ ɖe edzi.

22 Le May 3, 1943 dzi la, Ʋɔnudrɔ̃ƒe Kɔkɔtɔa tso afia be Ðasefowo ƒe nya dzɔ. Ʋɔnudrɔ̃ƒea gblɔ be mesɔ be woabia tso Ðasefowo si be woaxɔ mɔɖegbalẽ hafi awɔ woƒe dɔa o, elabena esia anye “gome si le wo si le Dukɔa Ƒe Se nu la tete ɖe to.” Ʋɔnudrɔ̃ƒea te fli ɖe se si dziɖuɖumegãwo wɔ la me hegblɔ be “sea le mɔ xem ɖe subɔsubɔ kple agbalẽtata ƒe ablɔɖe nu.” Esi Ʋɔnudrɔ̃la William O. Douglas nɔ Ʋɔnudrɔ̃ƒea ƒe nyametsotsoa gblɔm la, egblɔ tso Yehowa Ðasefowo ƒe dɔa ŋu be: “Menye mawunyagbɔgblɔ koe wònye o, eye menye mawunyagbalẽwo mama hã koe wònye o. Woƒe dɔa lɔ nu evea siaa ɖe eme.” Egblɔ kpee be: “Ele be dukplɔse si ɖe mɔ ɖe subɔsubɔwɔnawo kple mawunyagbɔgblɔ le sɔlemexɔwo me ŋu la ke naɖe mɔ ɖe subɔsubɔdɔ sia hã ŋu.”

23. Nu ka tae senya siwo me míeɖu dzi le le ƒe 1943 me la gakpɔtɔ le vevie na mí egbea?

23 Ʋɔnudrɔ̃ƒe Kɔkɔtɔa ƒe afiatsotso sia nye dziɖuɖu ɖedzesi aɖe si Mawu ƒe amewo kpɔ le senyawo me. Eɖo kpe edzi be nya nyui gbeƒãɖelawoe míenye vavã, ke menye asitsalawo o. Le ƒe 1943 ƒe ŋkeke vevi sia dzi la, menye nya si wotsɔ ɖe Nɔviŋutsu Murdock ŋu me koe Yehowa Ðasefowo ɖu dzi le o, ke boŋ woɖu dzi le nya 13 siwo Ʋɔnudrɔ̃ƒe Kɔkɔtɔa drɔ̃ na wo  gbe ma gbe la dometɔ 12 me. Afiatsotso siawo va zu nu si koŋ dzi míenɔa te ɖo ɖua dzi le senya bubu siwo míaƒe futɔwo gatsɔna ɖe mía ŋu le egbeŋkekeawo me be yewoatsɔ ate gome si le mía si be míaɖe gbeƒã Fiaɖuƒegbedeasia le dutoƒo kple tso aƒe me yi aƒe me ɖe to la me.

“Ele Be Míaɖo To Mawu Abe Dziɖula Ene Wu Amewo”

24. Nu kawoe míewɔna ne dziɖuɖu aɖe ɖo asi míaƒe dɔa dzi?

24 Abe Yehowa subɔlawo ene la, ne dziɖuɖuwo na ablɔɖe mí le se nu be míaɖe gbeƒã Fiaɖuƒegbedeasia la, míekpɔa ŋudzedze ɖe eŋu ŋutɔ. Gake ne dziɖuɖu aɖe ɖo asi míaƒe gbeƒãɖeɖedɔa dzi hã la, ɖeko míetrɔa asi le míaƒe gbeƒãɖemɔnuwo ŋu hetoa mɔ sia mɔ dzi yia dɔa dzi. Abe ale si apostoloawo wɔe ene la, “ele be míaɖo to Mawu abe dziɖula ene wu amewo.” (Dɔw. 5:29; Mat. 28:19, 20) Le ɣeyiɣi ma ke me la, míetsɔa nyaa yia ʋɔnu be woadrɔ̃ na mí ale be míawɔ gbeƒãɖeɖedɔa le ablɔɖe me. Mina míadzro esia ƒe kpɔɖeŋu eve me kpɔ.

25, 26. Aleke wòdzɔe be Ðasefowo ƒe nya va do ɖe Nicaragua ƒe Ʋɔnudrɔ̃ƒe Kɔkɔtɔ, eye aleke nuwo va yii?

25 Nicaragua. Le November 19, 1952 dzi la, Donovan Munsterman, si nye dutanyanyuigblɔla kple alɔdzedzikpɔla le Nicaragua la yi ɖe dɔwɔƒe si kpɔa amedzrowo kple mɔzɔzɔ nyawo gbɔ le Managua, si nye fiadua, me. Wobia tso esi be wòayi aɖakpɔ dɔwɔƒea ƒe tatɔ Arnoldo García. Esi wòyi la, dɔwɔƒea ƒe tatɔa na wònya be woɖo asi Yehowa Ðasefowo dzi le Nicaragua “be womegakpɔ mɔ aɖe gbeƒã woƒe dzixɔsewo alo akpɔ gome le woƒe subɔsubɔwɔna aɖeke me o.” Esi Donovan biae be nu ka tae hã la, Aƒetɔ Garcia gblɔ nɛ be Ðasefowo mexɔ mɔɖeɖe le dziɖuɖua ƒe dudɔnunɔla si kpɔa subɔsubɔnyawo gbɔ la gbɔ hafi le woƒe subɔsubɔdɔa wɔm o, eye be wotso wo nu be wonye kɔmiunisttɔwo. Ame kawoe tso wo nu? Roma Katolikohaa ƒe osɔfowoe.

Nicaragua nɔviwo, le ɣeyiɣi si me woɖo asi dɔa dzi

 26 Enumake Nɔviŋutsu Munsterman tsɔ nyaa yi na dudɔnunɔla si kpɔa subɔsubɔnyawo gbɔ la kple dukplɔlaa, si ŋkɔe nye Anastasio Somoza García kple susu be woaɖe mɔxenua ɖa, gake mekpɔ ta nɛ o. Eya ta nɔviawo trɔ asi le mɔ siwo dzi wotona kpɔa gome le subɔsubɔwɔnawo me ŋu. Wotu Fiaɖuƒe Akpatawo hekpena le ƒuƒoƒo suewo me eye wodzudzɔ ɖaseɖiɖi le ablɔwo dzi, gake woyi edzi nɔ gbeƒã ɖem Fiaɖuƒegbedeasia. Le ɣeyiɣi ma ke me la, wotsɔ nyaa yi Nicaragua ƒe Ʋɔnudrɔ̃ƒe Kɔkɔtɔ kple susu be wòana woaɖe mɔxeɖenua ɖa. Nyadzɔdzɔgbalẽ geɖewo ɖe gbeƒã mɔxeɖenua kple ale si nɔviawo tsɔ nyaa yi ʋɔnui eye Ʋɔnudrɔ̃ƒea lɔ̃ be yeadrɔ̃e. Aleke nuwo va yii? Le June 19, 1953 dzi la, Ʋɔnudrɔ̃ƒea ƒe ʋɔnudrɔ̃lawo katã tsɔ nu sɔsɔe tso afia dzɔdzɔe na Ðasefoawo. Ʋɔnudrɔ̃ƒea gblɔ be mɔxexe ɖe míaƒe dɔa nu nye dukplɔse si na nuƒoƒo faa, dzitsinya, kple subɔsubɔdzixɔsewo ƒe ablɔɖe dukɔmeviwo la dzi dada. Ebia tso Nicaragua dziɖuɖua si hã be wòaɖe mɔ na Ðasefoawo woawɔ woƒe subɔsubɔdɔa le ablɔɖe me abe tsã ene.

27. Nu ka tae Ʋɔnudrɔ̃ƒea ƒe nyametsotsoa wɔ nuku na Nicaraguatɔwo, eye nu kawo gbɔe mía nɔviwo kpɔe be yewoƒe aʋadziɖuɖua tso?

27 Ewɔ nuku na Nicaraguatɔwo ŋutɔ be Ʋɔnudrɔ̃ƒe Kɔkɔtɔa ʋli Ðasefoawo ta. Va se ɖe ɣemaɣi la, subɔsubɔhakplɔlawo ƒe ŋusẽkpɔɖeamedzi nu sẽ ale gbegbe be Ʋɔnudrɔ̃ƒea medina be yeawɔ nyametsotso atsi tre ɖe wo ŋu o. Azɔ hã, dziɖuɖumegãwo kpɔ ŋusẽ le dukɔa me ale gbegbe be ne wowɔ nyametsotso aɖe la, Ʋɔnudrɔ̃ƒea mete ŋu tea fli ɖe eme o. Eya ta mía nɔviawo ka ɖe edzi be yewoƒe Fia la ƒe kpekpeɖeŋu kple ale si yewomedzudzɔ gbeƒãɖeɖedɔa o tae yewoɖu dzi le nya sia me ɖo.—Dɔw. 1:8.

28, 29. Aleke nɔnɔmeawo va trɔ kpata le Zaire le ƒe 1980-awo ƒe domedome lɔƒo?

28 Zaire. Le ƒe 1980-awo ƒe domedome lɔƒo la, Ðasefo 35,000 lɔƒoe nɔ Zaire, si nye Congo-Kinshasa fifia. Le dzidziɖedzi nyui si kpɔm wole le Fiaɖuƒea ƒe dɔwo me ta la, wodze alɔdzedɔwɔƒe yeye tutu gɔme. Le December 1985 me la, wowɔ dukɔwo dome takpekpe le fiadua, si nye Kinshasa, ƒe bɔlƒoƒe gãtɔ eye ame 32,000 sɔŋ tso xexea ƒe akpa vovovowo va yɔ bɔlƒoƒea taŋ. Gake eteƒe medidi o, nɔnɔmeawo te tɔtrɔ na Yehowa subɔlawo. Aleke wòdzɔe?

29 Nɔviŋutsu Marcel Filteau, si hã to yometiti si va nɔviwo dzi le Duplessis ƒe dziɖuɖua te le Quebec (Canada) me la, nɔ subɔsubɔm le Zaire abe dutanyanyuigblɔla ene ɣemaɣi. Eɖe nu si dzɔ la me ale: “Le March 12, 1986 dzi la, wona lɛta nɔvi siwo le ŋgɔ xɔm la be Yehowa Ðasefowo ƒe habɔbɔa mele se nu le Zaire o, eya ta woɖo asi wo dzi.” Dukɔa ƒe dukplɔla Mobutu Sese Seko ye de asi lɛtaa te.

30. Nyametsotso vevi kae dze ŋgɔ Alɔdzekɔmitia, eye nya ta kae wova ƒo?

30 Le ŋkeke si kplɔe ɖo dzi la, woɖe gbeƒã le dukɔa ƒe radio dzi be: “Míegale Yehowa Ðasefowo ƒe ŋkɔ se ge le [Zaire] akpɔ gbeɖe o.” Yometiti dze egɔme enumake. Wogbã Fiaɖuƒe Akpatawo, eye woda dzo mía nɔviwo, lé wo, ƒo wo, de wo gaxɔ me. Wolé ɖeviwo gɔ̃ hã de gaxɔ me. Le October 12, 1988 dzi la, dziɖuɖua  ɖo asi habɔbɔa ƒe nunɔamesiwo dzi, eye asrafowo va xɔ alɔdzedɔwɔƒea hele eŋu dzɔm. Nɔvi siwo nɔ ŋgɔ xɔm la ŋlɔ lɛta bia be yewoakpɔ Dukplɔla Mobutu ahaɖe nu me nɛ, gake womede nu eme na wo o. Eya ta nyametsotso vevi aɖe dze ŋgɔ Alɔdzekɔmitia: ‘Ðe woatsɔ nyaa ayi Ʋɔnudrɔ̃ƒea, alo ɖe woalala?’ Timothy Holmes, si nye dutanyanyuigblɔla kple Alɔdzekɔmitia ƒe ɖoɖowo gbɔ kpɔla ɣemaɣi la gblɔ be: “Míetrɔ ɖe Yehowa ŋu hebia nunya kple mɔfiame.” Le gbedodoɖa kple numedzodzro geɖe megbe la, kɔmitia va kpɔe be masɔ be yewoatsɔ nyaa ayi ʋɔnu ɣemaɣi o. Ke boŋ wotrɔ susu ɖe ale si woawɔ akpɔ nɔviawo ƒe nuhiahiãwo gbɔ kple mɔ siwo dzi woato ayi gbeƒãɖeɖedɔa dzii ŋu.

“Le yometiti ƒe ɣeyiɣi mawo me la, míekpɔ ale si Yehowa de asi nyawo mee”

31, 32. Nyametsotso ɖedzesi kae Zaire ƒe Ʋɔnudrɔ̃ƒe Kɔkɔtɔ wɔ, eye aleke esia wɔ dɔ ɖe mía nɔviwo dzi?

31 Ƒe geɖewo va yi. Ðasefoawo yometiti dzi ɖe kpɔtɔ vie, eye amewo va le ɖe tsɔm le amegbetɔwo ƒe gomenɔamesi nyawo me le dukɔa me. Alɔdzekɔmitia kpɔe be ɣeyiɣia de azɔ be yewoatsɔ nyaa ayi Zaire ƒe Ʋɔnudrɔ̃ƒe Kɔkɔtɔ. Nukutɔe la, Ʋɔnudrɔ̃ƒea lɔ̃ be yeadrɔ̃ nyaa. Eva dzɔ be, le January 8, 1993 dzi, si nye ƒe adre tso esime woɖo asi mía dzi la, Ʋɔnudrɔ̃ƒea tso afia be afɔ si dziɖuɖua ɖe ɖe Ðasefowo ŋu la mele se nu o, eye woɖe mɔxeɖenua ɖa. Wò ya bu nu si esia fia ŋu kpɔ! Ʋɔnudrɔ̃lawo tsɔ woƒe agbe de afɔku me hete fli ɖe nyametsotso si dukɔa ƒe dukplɔla wɔ la me. Nɔviŋutsu Holmes gblɔ be: “Le yometiti ƒe ɣeyiɣi mawo me la, míekpɔ ale si Yehowa de asi nyawo mee.” (Dan. 2:21) Aʋadziɖuɖu sia do ŋusẽ nɔviawo ƒe xɔse. Wokpɔe be Fia Yesu fia mɔ eƒe amewo wonya ɣeyiɣi si me woaɖe afɔ aɖe kple ale si woaɖee.

Congo nɔviwo le dzidzɔ kpɔm ɖe mɔnukpɔkpɔ si su wo si be woasubɔ Yehowa le ablɔɖe me la ta

 32 Esi woɖe mɔxeɖenua ɖa la, mɔɖeɖe li azɔ be alɔdzedɔwɔƒea nakplɔ dutanyanyuigblɔlawo va dukɔa me, atu alɔdzedɔwɔƒe yeye, ahaxɔ Biblia srɔ̃gbalẽwo tso duta. * Dzidzɔ ka gbegbee nye esi wònyena na Mawu subɔlawo le xexea me godoo ne wokpɔ ale si Yehowa le eƒe amewo ta kpɔm le gbɔgbɔ me la teƒe!—Yes. 52:10.

“Yehowa Ye Nye Nye Kpeɖeŋutɔ”

33. Nu kawoe míesrɔ̃ tso ʋɔnudrɔ̃nya ʋɛ siwo me míedzro la me?

33 Ʋɔnudrɔ̃nya ʋɛ siwo me míedzro la ɖo kpe edzi be Yesu le wɔwɔm ɖe ŋugbe si wòdo la dzi be: “Mana [nya] kple nunya mi, eye ame siwo katã tsi tsitre ɖe mia ŋu la mate ŋu anɔ te ɖe enu alo agblɔ nya bubu aɖeke atsi tsitre ɖe eŋu o.” (Mixlẽ Luka 21:12-15.) Edze ƒãa be ɣeaɖewoɣi la, Yehowa zãa egbegbe Gamalielwo tsɔ kpɔa eƒe amewo ta alo ʋãa ʋɔnudrɔ̃lawo kple lɔyawo wotsɔa dzinɔameƒo ʋlia dzɔdzɔenyenye ta. Ɛ̃, Yehowa na míaƒe futɔwo ƒe lãnuwo nu tsi kpo. (Mixlẽ Yesaya 54:17.) Tsitretsiɖeŋulawo mate ŋu atɔ te Mawu ƒe dɔa o.

34. Nu ka tae senya siwo me míeɖu dzi le la ɖe dzesi? Eye nu ka dzie esia ɖo kpee? (Kpɔ aɖaka si nye “ Ʋɔnudrɔ̃ƒewo Ƒe Afiatsotso Vevi Siwo Do Fiaɖuƒegbeƒãɖeɖedɔa Ðe Ŋgɔ” hã.)

34 Nu ka tae senya siwo me míeɖu dzi le la wɔ nuku ŋutɔ? Bu eŋu kpɔ: Yehowa Ðasefowo menye subɔsubɔha xɔŋkɔ aɖeke alo esi ŋu amewo dea bubui o. Míedaa akɔ o, míedaa megbe na dunyahehawo o, eye míedzea agbagba be míakpɔ ŋusẽ ɖe dunyahelawo ƒe nyametsotsowo dzi o. Azɔ hã, wote ŋu bua mía dometɔ siwo ƒe nyawo yia ʋɔnudrɔ̃ƒewo la zi geɖe be míenye “ame manyagbalẽwo kple ame tsɛwo.” (Dɔw. 4:13) Eya ta ne míagblɔe la, naneke meɖe dzesi le mía ŋu si aʋã ʋɔnudrɔ̃lawo be woatso afia dzɔdzɔe na mí ahabu fɔ subɔsubɔhakplɔla kple dunyahela xɔŋkɔ siwo tsia tsitre ɖe mía ŋu o. Ke hã, ʋɔnudrɔ̃ƒewo tsoa afia dzɔdzɔe na mí enuenu! Senya siwo me míeɖu dzi le la ɖo kpe edzi be “Mawu ŋkumee” míele zɔzɔm le ‘le ɖekawɔwɔ me kple Kristo’ vavã. (2 Kor. 2:17) Eya ta míegblɔna abe apostolo Paulo ene be: “Yehowa ye nye nye kpeɖeŋutɔ; nyemavɔ̃ o.”—Heb. 13:6.

^ mm. 9 Cantwell ƒomea kple Connecticut dziɖuɖumegãwo dome nya siae nye nya 43 siwo me Nɔviŋutsu Hayden Covington ʋli Ðasefowo ta le le Amerika Ʋɔnudrɔ̃ƒe Kɔkɔtɔa la dometɔ gbãtɔ. Eku le ƒe 1978 me. Srɔ̃a Dorothy subɔ nuteƒewɔwɔtɔe va se ɖe esime wòku le ƒe 2015 me, esime wòxɔ ƒe 92.

^ mm. 12 Se aɖe si wode le ƒe 1606 me dzie wonɔ te ɖo tsɔ nya ɖe nɔviawo ŋu. Sea gblɔ be ʋɔnudrɔ̃lawo ate ŋu abu fɔ ame ne wokpɔe be amea ƒe nyawo tsi tsitre ɖe dziɖuɖua ŋu—ne nya si amea gblɔ la nye nyateƒe gɔ̃ hã.

^ mm. 14 Le ƒe 1950 me la, ɣeyiɣiawo katã ƒe subɔla 164 sɔŋ ye nɔ Quebec. Wo dometɔ 63 nye dutanyanyuigblɔla siwo lɔ̃ faa be yewoava subɔ le afi ma le Gilead Sukua dede megbe, togbɔ be wonya be yewoato yometiti sesẽwo me hã.

^ mm. 15 Nɔviŋutsu W. Glen How nye Ðasefowo ƒe lɔya si tsɔ dzinɔameƒo kple aɖaŋudzedze ʋli Yehowa Ðasefowo ta le ʋɔnu le Canada kple dukɔ bubuwo me tso ƒe 1943 me va se ɖe ƒe 2003 me.

^ mm. 16 Nya sia ŋuti numeɖeɖe geɖewo dze le May 8, 2000 ƒe Nyɔ! ƒe nyati si nye “Aʋa La Menye Mia Tɔ O, Ke Mawu Tɔe” me, axa 18-24. (Yevugbe me tɔ nye April 22, 2000.)

^ mm. 32 Asrafowo va dzo le alɔdzedɔwɔƒea mlɔeba; gake nɔviawo tu alɔdzedɔwɔƒe yeyea ɖe teƒe bubu.