Dzo kpo yi emenuwo dzi

Dzo kpo yi emenuawo dzi

 TA 14

Mawu Fiaɖuƒeae Míewɔa Nuteƒe Na, Míenɔa Dziɖuɖu Bubu Aɖeke Ƒe Akpa Dzi O

Mawu Fiaɖuƒeae Míewɔa Nuteƒe Na, Míenɔa Dziɖuɖu Bubu Aɖeke Ƒe Akpa Dzi O

TA SIA ƑE TAÐODZINU

Le nuteƒewɔwɔ na Fiaɖuƒea ta la, Mawu ƒe amewo ɖoe kplikpaa be yewomanye xexea ƒe akpa aɖeke o

1, 2. (a) Gɔmeɖose ka nue Yesu yomedzelawo nɔa agbe ɖo va se ɖe egbea? (b) Agbagba kawoe futɔwo dze be yewoaɖu mía dzii, gake nu kae do tso eme?

GBE ɖeka esi Yesu nɔ tsitre ɖe Pilato, si nye Yuda dukɔa ƒe ʋɔnudrɔ̃la gãtɔ kekeake ŋkume la, ehe susu yi gɔmeɖose vevi aɖe dzi, si nu eyomedzela vavãwo nɔa agbe ɖo va se ɖe egbea. Egblɔ be: “Nye Fiaɖuƒe menye xexe sia ƒe akpa aɖeke o. Ne ɖe nye Fiaɖuƒe nye xexe sia ƒe akpa aɖe la, anye ne nye dɔlawo wɔ avu, bene woagatsɔm ade asi na Yudatɔwo o. Gake abe ale si wòle ene la, nye Fiaɖuƒe metso afi sia o.” (Yoh. 18:36) Futɔwo ƒe alɔ de dzi esi Pilato ɖe mɔ wowu Yesu, gake mexɔ ɣeyiɣi aɖeke hafi woƒe alɔ ɖiɖi o; elabena wofɔ Yesu ɖe tsitre. Emegbe Roma Fiaɖuƒe sesẽa ƒe Fiagã vovovowo dze agbagba be yewoabu mo na Kristo yomedzelawo, gake ɖeko woƒe agbagbadzedzeawo tɔ kpe. Kristotɔwo yi edzi ɖe gbeƒã Fiaɖuƒegbedeasia wòɖo afi sia afi si amewo le ɣemaɣi.—Kol. 1:23.

2 Le Fiaɖuƒea ɖoɖo anyi le ƒe 1914 me megbe la, dukɔwo ƒe aʋakɔ sesẽtɔ kekeake aɖewo tee kpɔ be yewoatsrɔ̃ Mawu ƒe amewo gbidii. Gake wo dometɔ aɖeke mete ŋu ɖu mía dzi o. Dziɖuɖu kple dunyaheha vovovowo dze agbagba be yewoazi mía dzi míanɔ yewoƒe akpa dzi le woƒe aʋawɔwɔwo me. Gake womete ŋu de mama mía me o. Egbea, Mawu Fiaɖuƒea teviwo le dukɔ sia dukɔ kloe me. Togbɔ be ele alea hã la, míenye xexea me katã ƒe nɔviwo ƒe habɔbɔ si wɔ ɖeka vavã, eye míedea akpa aɖeke dzi kurakura le xexea ƒe dunyahenyawo me o. Ðekawɔwɔ si le mía dome la nye kpeɖodzi sẽŋu be Mawu Fiaɖuƒea le dzi ɖum vavã eye be míaƒe Fia Yesu Kristo yi edzi le mɔ fiam eteviwo, le asi trɔm le wo ŋu, hele wo ta kpɔm. Mina míadzro ale si wòle esia wɔmee la me, eye ado ŋusẽ míaƒe xɔse ŋutɔ be míakpɔ ale si wòkpe ɖe mía ŋu míeɖu dzi le senya vevi aɖewo me esi míeɖoe kplikpaa be míanye “xexea ƒe akpa aɖeke o.”—Yoh. 17:14.

Nya Vevi Aɖe Fɔ Ðe Te

3, 4. (a) Nu kawoe dzɔ esi woɖo Fiaɖuƒea anyi teti? (b) Ðe Mawu ƒe amewo se akpaɖekedzimademade ƒe nyaa gɔme nyuie tso gɔmedzedzea? Ðe eme.

3 Esi woɖo Fiaɖuƒea anyi teti ko la, aʋa dzɔ le dziƒo eye wotsɔ Satana ƒu gbe ɖe anyigba dzi. (Mixlẽ Nyaɖeɖefia 12:7-10, 12.)  Aʋa dzɔ le anyigba dzi hã, eye esia do Mawu ƒe amewo ƒe nuteƒewɔwɔ kpɔ. Woɖoe kplikpaa be yewoasrɔ̃ kpɔɖeŋu si Yesu ɖo ɖi ale be yewomanye xexea ƒe akpa aɖeke o. Gake womese nu si wòfia be woagade akpa aɖeke dzi le dunyahenyawo me o la gɔme tututu gbã o.

4 Le kpɔɖeŋu me, Ƒe Akpe Ðeka Dziɖuɖua Gogo gbalẽa ƒe Babla Adelia, * si wota le ƒe 1904 me la de dzi ƒo na Kristotɔwo be woagakpɔ gome le aʋawɔwɔ me o. Ke hã, wogblɔ le eme be ne wozi Kristotɔ dzi be wòawɔ asrafodɔ la, ele be wòadze agbagba ana woadae ɖe ɖoƒe si mabia be wòayi aʋa o. Ne wogbe heɖoe ɖe aʋagbedzi la, ke ele be wòakpɔ egbɔ be yemawu ame o. Nɔviŋutsu Herbert Senior, si nɔ Britain eye wòxɔ nyɔnyrɔ le ƒe 1905 me la gblɔ tso ale si nɔnɔmea nɔ ɣemaɣi ŋu be: “Mɔfiame ma na nɔvi geɖewo tɔtɔ henɔ biabiam be ɖe wòasɔ be ame nalɔ̃ awɔ asrafodɔ ne menya yi aʋagbedzi o ko evɔa?”

5. Numekɔkɔ kae wodze nana le Gbetakpɔxɔ me tso September 1, 1915 ƒe tataa dzi?

5 Gake September 1, 1915 ƒe Gbetakpɔxɔ dze numekɔkɔ yeyewo nana tso nya sia ŋu. Egblɔ tso mɔfiame si wona le agbalẽ si míeyɔ va yi me la ŋu be: “Ðe afɔ ma ɖeɖe mafia be Kristotɔ va zu akpa aɖe dzi dela oa?” Ke ne wodo ŋɔdzi na Kristotɔ be woada tui ne egbe be yemawɔ asrafodɔ o ɖe? Nyatia ɖe nu me be: “Ne woda tu ame le esi wòɖoe be yeawɔ nuteƒe na Ŋutifafa Fia la hegbe be yemada le eƒe se dzi o ta, kple woada tu ame le aʋagbedzi le esi wòɖo to anyigba dzi fiawo hele aʋa wɔm na wo ta, si anye dada le nu si míaƒe Fia si le dziƒo fia mí dzi la, ekae nyo wu? Edze ƒãa be míadi be míatia gbãtɔ, elabena enyo sãsãsã wu be míaku le nuteƒewɔwɔ na míaƒe Fia si le Dziƒo la ta.” Gake le numeɖeɖe nyui sia megbe la, nyatia ƒo eta be: “Menye se wònye dem míele ya o. Susudodoɖa koe.”

6. Nu kae nèsrɔ̃ tso kpɔɖeŋu nyui si Nɔviŋutsu Herbert Senior ɖo me?

6 Nɔvi aɖewo se egɔme enumake be masɔ be yewoakpɔ gome le aʋawɔwɔ me o, eye wole klalo be yewoadze ŋgɔ emetsonu ɖe sia ɖe. Herbet Senior si ƒe nya míegblɔ va yi la gblɔ be: “Le nyea gonyeme la, vovototo aɖeke mele aʋawɔnuwo ɖeɖe le meli me [si nye asrafodɔ si mabia be woayi aʋa o] kple aʋawɔnu mawo zazã le aʋagbedzi dome o.” (Luka 16:10) Wolé Nɔviŋutsu Herbet Senior de gaxɔ me le esi eƒe dzitsinya meɖe mɔ nɛ be wòawɔ asrafodɔ o ta. Eya kple nɔviŋutsu ene bubuwo le ame 16 siwo nɔ Richmond gaxɔ me le Britain hena ɣeyiɣi aɖe le esi woƒe dzitsinya meɖe mɔ na wo be woawɔ asrafodɔ o ta la dome. Ame 11 susɔeawo nye subɔsubɔha bubuwo me tɔwo. Wova yɔ gamenɔla siawo emegbe be Richmondtɔ Wuiadeawo. Eva dzɔ be wokplɔ Herbert kple etɔ susɔeawo yi aʋagbedzi le France le adza me. Esi wogbe godoo be yewomawɔ aʋa o ta la, woɖe gbe be woada tu wo. Wokplɔ wo yi afi si asrafoawo ada tu wo le, gake wova tso nya me be womagawu wo o. Woɖoe be woade wo gaxɔ me ƒe ewo boŋ.

“Eme kɔ nam nyuie be ele be Mawu ƒe amewo nanɔ ŋutifafa me kple ame sia ame, le aʋawɔɣiwo gɔ̃ hã.”—Simon Kraker (Kpɔ memama 7)

7. Hafi Xexemeʋa Evelia nadze egɔme la, nu ka gɔmee Mawu ƒe amewo va se?

 7 Kaka Xexemeʋa Evelia nadze egɔme la, Yehowa ƒe amewo katã va se nu si akpaɖekedzimademade kple Yesu ƒe kpɔɖeŋua sɔsrɔ̃ bia tso wo si la gɔme nyuie. (Mat. 26:51-53; Yoh. 17:14-16; 1 Pet. 2:21) Le kpɔɖeŋu me, wota nyati vevi aɖe ɖe November 1, 1939 ƒe Gbetakpɔxɔ me, si ƒe tanyae nye “Akpaɖekedzimademade.” Wogblɔ le eme be: “Se si nu wòle be Yehowa ƒe ame siwo le nubabla me kplii nanɔ agbe ɖo azɔe nye be mele be woakpɔ gome le dukɔwo ƒe aʋawɔwɔwo me le mɔ aɖeke nu kura o.” Nɔviŋutsu Simon Kraker, si va subɔ le míaƒe dɔwɔƒegãa le Brooklyn emegbe la gblɔ tso nyati ma ŋu be: “Ena eme kɔ nam nyuie be ele be Mawu ƒe amewo nanɔ ŋutifafa me kple ame sia ame, le aʋawɔɣiwo gɔ̃ hã.” Gbɔgbɔmenuɖuɖu ma va ɖe ɣeyiɣi nyuitɔ dzi ŋutɔ, elabena edzra Mawu ƒe amewo ɖo wote ŋu nɔ te ɖe nuteƒewɔwɔ na Fiaɖuƒea ƒe dodokpɔ sesẽ si va wo dzi le Xexemeʋa Evelia wɔɣi la nu.

Yometiti Siwo Le Abe “Tɔsisi” Ene Va Wo Dzi

8, 9. Aleke apostolo Yohanes ƒe nyagblɔɖia va emee?

8 Apostolo Yohanes gblɔe ɖi be ne woɖo Fiaɖuƒea anyi le ƒe 1914 me megbe la, ʋɔ driba la, si nye Satana Abosam, atu kpɔɖeŋutsi aɖe tso eƒe nu me be wòazu tɔsisi alé ame siwo le  Mawu Fiaɖuƒea ƒe akpa dzi. * (Mixlẽ Nyaɖeɖefia 12:9, 15.) Aleke nyagblɔɖi sia va emee? Tso ƒe 1920 me heyi la, yometiti sesẽ geɖe va Mawu ƒe amewo dzi. Le kpɔɖeŋu me, wolé Nɔviŋutsu Kraker kple nɔvi bubu siwo nɔ Dziehe Amerika le Xexemeʋa Evelia wɔɣi la de gaxɔ me le woƒe nuteƒewɔwɔ na Mawu Fiaɖuƒea ta. Le aʋaa wɔɣi la, ne woma ame siwo katã wode gaxɔ me le Amerika le esi wogbe be yewomayi aʋa o le woƒe subɔsubɔ ta ɖe akpa etɔ̃ la, akpa eve le etɔ̃a me nye Yehowa Ðasefowo.

9 Abosam kple eƒe agbasiviwo ƒe taɖodzinue nye be xexea ƒe afi ka kee Fiaɖuƒea teviwo le o, yewoagblẽ woƒe nuteƒewɔwɔ me. Futɔwo he wo yi ʋɔnudrɔ̃lawo kple ame siwo kpɔa asiɖeɖeleameŋu le gaxɔ me nyawo gbɔ la ŋkume le Afrika, Europa, kple Amerika dukɔwo me. Esi woɖoe kplikpaa be yewomade akpa aɖeke dzi o ta la, woƒoa wo, wɔa nu vevi wo, alo léa wo dea gaxɔ me. Wowɔ fu Mawu ƒe amewo vevie le Germany le esi wogbe be yewomado Hitler ɖe dzi alo ayi aʋa o ta. Ðasefo siwo wolé de gaxɔ me le Nazi dziɖuɖua te la ade 6,000, eye wo dometɔ 1,600 kple edzivɔ, siwo nye Germanytɔwo kple esiwo menye Germanytɔwo o siaa, ku le ame siwo nɔ ŋuta sẽm le wo ŋu la si me. Ke hã, Abosam mete ŋu gblẽ nu le Mawu ƒe amewo ŋu ɖikaa o.—Marko 8:34, 35.

“Anyigba” No “Tɔsisi La”

10. Nu kae “anyigba la” le tsitre ɖi na, eye aleke wòxɔ na Mawu ƒe amewoe?

10 Apostolo Yohanes ƒe nyagblɔɖia ɖee fia be “anyigba,” si le tsitre ɖi na ŋusẽtɔ siwo ase nu gɔme na Mawu ƒe amewo le nuɖoanyi sia me la, ano yometiti ƒe “tɔsisi la” ahato edzi axɔ na wo. Aleke nyagblɔɖia ƒe akpa sia va emee? Le ƒe siwo kplɔ Xexemeʋa Evelia ɖo me la, “anyigba la” xɔ na Mesia Fiaɖuƒea ƒe akpadzinɔla wɔnuteƒewo enuenu. (Mixlẽ Nyaɖeɖefia 12:16.) Le kpɔɖeŋu me, ʋɔnudrɔ̃ƒe xɔŋkɔwo ʋli Yehowa Ðasefowo ƒe gomenɔamesiwo ta esi wogbe be yewomawɔ asrafodɔ alo akpɔ gome le dulɔ̃lɔ nuwɔnawo me o. Mina míadzro ʋɔnudrɔ̃nya vevi siwo fɔ ɖe te esi Mawu ƒe amewo gbe be yewomawɔ asrafodɔ o, kple ale si Yehowa kpe ɖe wo ŋu woɖu dzi le nya siawo mee la me gbã.—Ps. 68:21.

11, 12. Nya kawoe wotsɔ ɖe Nɔviŋutsu Sicurella kple Thlimmenos ŋu, eye nu kawoe va do tso eme?

11 United States. Anthony Sicurella dzilawo nye Ðasefowo, eye wo ame adee wodzi. Exɔ nyɔnyrɔ esi wòxɔ ƒe 15. Se le dukɔa me be ame nawɔ asrafodɔ hena ɣeyiɣi aɖe, eya ta esi wòxɔ ƒe 21 la, eyi ɖade eƒe ŋkɔ agbalẽ me le ame siwo xɔa ame ɖe asrafodɔ me gbɔ be mawusubɔlae yenye eya ta yemalɔ̃ awɔ asrafodɔ o. Le ƒe 1950 me, si nye ƒe eve megbe la, etrɔ yi be woagbugbɔ yeƒe ŋkɔ ade agbalẽ me be yeƒe dzitsinya maɖe mɔ na ye be yeawɔ asrafodɔ o. Togbɔ be Dukɔa Ƒe Hlɔ̃nyamekuƒea ƒe numekukuwo ɖee fia be nya aɖeke meku ɖe mía nɔvia ŋu o hã la, dɔwɔƒe si kpɔa senyawo gbɔ la gbe be womawɔ ɖe eƒe biabiaa dzi o. Wodrɔ̃ nyaa le ʋɔnudrɔ̃ƒe ʋuu, gake wobu fɔ Nɔviŋutsu  Sicurella. Esi nyaa va ɖo Amerika ƒe Ʋɔnudrɔ̃ƒe Kɔkɔtɔ la, wote fli ɖe ʋɔnudrɔ̃ƒe gbãtɔ ƒe nyametsotsoa me hetso afia be Nɔviŋutsu Sicurella tɔ dzɔ. Amerika dukɔmevi bubu siwo ƒe dzitsinya meɖe mɔ na wo be woawɔ asrafodɔ o la va nɔa te ɖe afiatsotso sia dzi ʋlia wo ɖokuiwo ta le ʋɔnu.

12 Greece. Le ƒe 1983 me la, wobu fɔ Iakovos Thlimmenos be enye aglãdzela le esi wògbe be yemawɔ asrafodɔ hena ɣeyiɣi aɖe o ta, eye wodee gaxɔ me. Esi wova ɖe asi le eŋu eye emegbe wòyi dɔ di ge abe gadzikpɔla ene la, wogbe be womate ŋu ana dɔe o, elabena wobui be enye nu vlo wɔla le esi wòyi gaxɔ me kpɔ ta. Esi wòtsɔ nyaa yi Greece ƒe ʋɔnudrɔ̃ƒewo la, wobu fɔe. Eya ta egatsɔe yi Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒe (Europa Ʋɔnudrɔ̃ƒe gã). Le ƒe 2000 me la, Europa Ʋɔnudrɔ̃ƒea ƒe Nyagbugbɔgadrɔ̃kɔmiti Gãtɔ, si me ʋɔnudrɔ̃la 17 le la, tso afia be etɔ dzɔ, eye esia na womegatsɔa nya sia tɔgbi ɖe dukɔmevi aɖeke ŋu o. Do ŋgɔ na afiatsotso sia la, wobua mía nɔvi 3,500 kple edzivɔ siwo wode gaxɔ me kpɔ le Greece le woƒe akpaɖekedzimademade ta la be wonye nu vlo wɔlawo. Gake tso esime ʋɔnudrɔ̃ƒea tso afia la, Greece dziɖuɖua de se aɖe si wɔe be womegabua nɔvi siawo be wonye nu vlo wɔlawo o. Azɔ hã, nudzɔdzɔ sia na wogava te gbe ɖe se aɖe si wode ƒe ʋɛ aɖewo do ŋgɔ tsɔ na ablɔɖe Greece dukɔmeviwo be woatia dɔ bubu ɖe asrafodɔ teƒe la dzi esi wova trɔ asi le Greece dukɔa ƒe sewo ŋu.

“Hafi mage ɖe ʋɔnudrɔ̃ƒea la, medo gbe ɖa na Yehowa vevie, eye mekpɔe be Yehowa kpe ɖe ŋunye meɖe dzi ɖi.”—Ivailo Stefanov (Kpɔ memama 13)

13, 14. Nu kawoe míate ŋu asrɔ̃ tso Ivailo Stefanov kple Vahan Bayatyan ƒe nya siwo wodrɔ̃ le ʋɔnudrɔ̃ƒe me?

13 Bulgaria. Le ƒe 1994 me la, woyɔ Ivailo Stefanov, si xɔ ƒe 19 la be wòava wɔ asrafodɔ hena ɣeyiɣi aɖe. Egbe be yemate ŋu awɔ asrafodɔ alo dɔ bubu siwo do ƒome kplii o. Wodrɔ̃ nyaa le ʋɔnu hebu fɔe be wòanɔ gaxɔ me ƒe ɖeka kple afã, gake enɔ te ɖe gome si le esi be wòagbe asrafodɔ wɔwɔ le eƒe dzitsinya ta la dzi bia be woagbugbɔ nyaa adrɔ̃ na ye. Eƒe nyaa va do ɖe Europa Ʋɔnudrɔ̃ƒe gã la. Ʋɔnudrɔ̃ƒea medze nyaa dɔdrɔ̃ gɔme hafi Bulgaria dziɖuɖua trɔ susu o. Dziɖuɖua tso nya me be yeaɖe asi le Nɔviŋutsu Stefanov kple Bulgaria dukɔmevi ɖe sia ɖe si lɔ̃ faa be yeawɔ dɔ bubu ɖe asrafodɔ teƒe la ŋu le gaxɔ me. *

14 Armenia. Le ƒe 2001 me la, Vahan Bayatyan xɔ ƒe si dukɔa ƒe se bia be ne ame nya xɔe ko la, wòawɔ asrafodɔ hena ɣeyiɣi aɖe. * Gake egbe be yeƒe dzitsinya maɖe mɔ na ye yeawɔ asrafodɔ o, eye ʋɔnudrɔ̃ƒe siwo katã wòtsɔ nyaa yi le dukɔa me la bu fɔe. Eya ta le September 2002 me la, wodee gaxɔ me be wòanɔ afi ma ƒe eve kple afã, gake le ɣleti ewo kple afã megbe la, woɖe asi le eŋu. Le ɣeyiɣi ma me la, etsɔ nyaa yi Europa Ʋɔnudrɔ̃ƒe gãa, eye wolɔ̃ be yewoagbugbɔ adrɔ̃e. Gake le October 27, 2009 dzi la, woawo hã wobu fɔe. Esia na wòdze abe ɖe wɔna aɖeke megale mía nɔvi siwo katã le kuxi sia me tom le Armenia la ŋu o ene. Ke hã, wobia be Europa Ʋɔnudrɔ̃ƒea ƒe Nyagbugbɔgadrɔ̃kɔmiti Gãtɔ nagbugbɔ adzro nyaa me, eye wolɔ̃.  Le July 7, 2011 dzi la, Nyagbugbɔgadrɔ̃kɔmiti Gãtɔa tso afia be Vahan Bayatyan tɔ dzɔ. Esiae nye zi gbãtɔ si Europa Ʋɔnudrɔ̃ƒea lɔ̃ ɖe edzi be ele be woanɔ te ɖe se si ɖe mɔ ɖe ame ƒe susu, dzitsinya, kple subɔsubɔ ŋu dɔwɔwɔ ƒe ablɔɖe ŋu la dzi adzudzɔ nya tsɔtsɔ ɖe ame siwo ƒe dzitsinya meɖe mɔ na wo be woawɔ asrafodɔ o ŋu. Afiatsotso sia wɔe be ablɔɖe va su Yehowa Ðasefowo kple ame miliɔn geɖe siwo le dukɔ siwo katã Europa Ʋɔnudrɔ̃ƒea drɔ̃a nya na me la si azɔ be woanɔ te ɖe woƒe dzitsinya dzi agbe be yewomawɔ asrafodɔ o. *

Woɖe asi le Armenia nɔviawo ŋu le gaxɔ me esi Europa Amegbetɔ Ƒe Gomenɔamesiwo Ŋuti Ʋɔnudrɔ̃ƒea tso afia dzɔdzɔe na wo

Nuwɔna Siwo Doa Dulɔlɔ̃ Ðe Ŋgɔ Ŋu Nyawo

15. Nu ka tae Yehowa ƒe amewo mekpɔa gome le dulɔlɔ̃ nuwɔnawo me o?

15 Menye gbegbe be yewomawɔ asrafodɔ o dzi koe Yehowa ƒe amewo tona wɔa nuteƒe na Mesia Fiaɖuƒea o, ke boŋ wogbena bubutɔe hã be yewomakpɔ gome le nuwɔna siwo doa dulɔlɔ̃ ɖe ŋgɔ me o. Vevietɔ tso Xexemeʋa Evelia wɔɣi la, dulɔlɔ̃ ƒe gbɔgbɔ sẽŋu aɖe ge ɖe amewo me le xexea me katã. Dukɔ geɖewo bia tso woƒe dukɔmeviwo si be woaka atam be yewoawɔ  nuteƒe na dukɔa to nuteƒewɔwɔ ƒe atamkanya gbɔgblɔ, dukɔa ƒe ha dzidzi, alo gbedodo na dukɔa ƒe aflaga dzi. Ke hã, Yehowa ɖeɖe koe eƒe amewo wɔa nuteƒe na. (2 Mose 20:4, 5) Esia wɔe be wotiaa mía yome kutɔkutɔe. Gake le go sia hã me la, Yehowa na “anyigba” no yometiti ƒe tɔsisia. Mina míadzro nya sia ŋuti ʋɔnudrɔ̃nya vevi siwo me Yehowa to Kristo dzi kpe ɖe mía ŋu míeɖu dzi le la dometɔ ʋɛ aɖewo me kpɔ.—Ps. 3:9.

16, 17. Nya kae fɔ ɖe te ku ɖe Lillian kple William Gobitas ŋu, eye nu kae nèsrɔ̃ tso eme?

16 United States. Le ƒe 1940 me la, Amerika Ʋɔnudrɔ̃ƒe Kɔkɔtɔ ƒe ʋɔnudrɔ̃la 9-awo dometɔ 8 bu fɔ Yehowa Ðasefowo le nya aɖe si fɔ ɖe te ku ɖe Lillian kple William Gobitas ŋu la me. * Wonɔ suku dem le Minersville nutoa ƒe suku aɖe me. Esi Lillian Gobitas, si xɔ ƒe 12, kple nɔviaŋutsu William, si xɔ ƒe 10, di be yewoawɔ nuteƒe na Yehowa ta la, wogbe be yewomado gbe na aflaga alo agblɔ nuteƒewɔwɔ na dukɔa ƒe atamkanya o. Eya ta wonyã wo le sukua. Esi Ʋɔnudrɔ̃ƒe Kɔkɔtɔ drɔ̃ nyaa la, etso nya me be afɔ si sukua ɖe la sɔ, elabena akpɔ “dukɔa ƒe ɖekawɔwɔ” ta. Nyametsotso sia na wote mía nɔviwo yometiti vevie. Wonyã Ðasefo vi geɖewo le suku, wonyã Ðasefo tsitsiwo hã le dɔme, eye amehawo va dze Ðasefowo dzi zi geɖe hewɔ nu vevi wo. Amerikatɔwo ƒe agbalẽ aɖe si ƒo nu tso subɔsubɔblɔɖe ŋu la ka nya ta be: “Ale si woti Ðasefowo yome tso ƒe 1941 va se ɖe 1943 me lae nye amewo yometiti ɖe woƒe subɔsubɔ ta vɔ̃ɖitɔ kekeake si yi edzi le Amerika le ƒe alafa blavelia me.”—The Lustre of Our Country.

17 Gake míaƒe futɔawo ƒe aʋadziɖuɖu sia menɔ anyi eteƒe didi o. Le ƒe 1943 me la, Ʋɔnudrɔ̃ƒe Kɔkɔtɔa gadrɔ̃ nya bubu si de esi ŋu míeƒo nu tsoe fifia ɖi ge. Enye West Virginia Sukutatɔwo kple Barnette dome nya. Le nya sia ya gome la, Ʋɔnudrɔ̃ƒe Kɔkɔtɔa tso afia be Yehowa Ðasefowo tɔ dzɔ. Le ŋutinya katã me la, emae nye zi gbãtɔ si Amerika Ʋɔnudrɔ̃ƒe Kɔkɔtɔa ƒe nyametsotso le nya ɖeka tɔgbi ŋu trɔ le ɣeyiɣi kpui aɖe ko me. Le afiatsotso sia megbe la, Yehowa ƒe amewo yometiti le Amerika dzi ɖe kpɔtɔ kura. Ewɔe hã be wova le bubu dem Amerika dukɔmeviwo katã ƒe gomenɔamesiwo ŋu geɖe wu.

18, 19. Nu kae Pablo Barros gblɔ be eyae kpe ɖe ye ŋu yenɔ te sesĩe, eye aleke Yehowa subɔla bubuwo ate ŋu asrɔ̃ eƒe kpɔɖeŋuae?

18 Argentina. Le ƒe 1976 me la, wonyã Pablo Barros si xɔ ƒe enyi, kple nɔviaŋutsu Hugo, si xɔ ƒe adre, la le suku le esi wogbe be yewomado gbe na aflaga o ta. Hafi woava nyã wo la, gbe ɖeka, nyɔnu si nye sukua dzikpɔla la tu kɔ ta na Pablo hetu asii ɖo ɖa. Esi wokpã le suku gbe ma gbe la, ena ɖevi eveawo tsi sukua abe gaƒoƒo ɖeka ene henɔ agbagba dzem be yeazi wo dzi woakpɔ gome le dulɔlɔ̃ nuwɔnawo me. Pablo gblɔ tso nu si gbegbe me woto gbe ma gbe ŋu be: “Ne menye Yehowa ƒe kpekpeɖeŋu ye o la, nyemate ŋu anɔ te ɖe nyaƒoɖeamenua nu ahalé nuteƒewɔwɔ me ɖe asi o.”

19 Esi nyaa va ɖo ʋɔnu la, ʋɔnudrɔ̃laa da asi ɖe edzi be esɔ be woanyã Pablo kple Hugo le sukua. Gake nɔviwo tsɔ nyaa  yi Argentina ƒe Ʋɔnudrɔ̃ƒe Kɔkɔtɔ be woagbugbɔ adrɔ̃. Le ƒe 1979 me la, Ʋɔnudrɔ̃ƒe Kɔkɔtɔa te fli ɖe ʋɔnudrɔ̃ƒe gbãtɔ ƒe nyametsotsoa me hegblɔ be: “Ðeviawo nyanyã le suku nye tohehe si tsi tsitre ɖe dukɔa ƒe se si na gomenɔamesi dukɔmeviwo be woade suku (Se 14 lia), kple esi gblɔ be agba le Dukɔa dzi be wòakpɔ egbɔ be ame sia ame de gɔmedzesuku la ŋu (Se 5 lia).” Ðasefo vi siwo ade 1,000 kloe ye afiatsotso sia ɖe vi na. Le wo dometɔ aɖewo gome la, ewɔe be womenyã wo le suku o, eye le bubuawo abe Pablo kple Hugo ene gome la, ena wogagbugbɔ xɔ wo.

Ðevi Ðasefo geɖewo lé nuteƒewɔwɔ me ɖe asi le nɔnɔme siwo do woƒe xɔse kpɔ me

20, 21. Aleke Roel kple Emily Embralinag ŋu nyaa do ŋusẽ wò xɔsee?

20 Philippines. Le ƒe 1990 me la, wonyã Emily Embralinag, * si xɔ ƒe 10, kple nɔviaŋutsu Roel, si xɔ ƒe 9, kpakple Ðasefo vi bubu siwo ade 66 la le suku le esi wogbe be yewomado gbe na aflaga o ta. Leonardo, si nye Roel kple Emily fofo la dze agbagba be yeaɖe nu me na sukutatɔawo, gake wogbe koe. Esi nyaa va le gã dom ɖe edzi la, Leonardo tsɔ nyaa yi Ʋɔnudrɔ̃ƒe Kɔkɔtɔ. Gake ga mele Leonardo si woatsɔ lɔya o. Ƒomea do gbe  ɖa vevie na Yehowa be wòakpe ɖe yewo ŋu. Amewo nɔ nya vlowo kple fewuɖunyawo gblɔm le ɖeviawo ŋu. Esi Leonardo menya naneke tso senyawo ŋu o ta la, ese le eɖokui me be asesẽ be yeaɖu dzi le nya sia me.

21 Eva dzɔ be Felino Ganal, si nye Yehowa Ðasefo kple lɔya si wɔ dɔ le senyawo ŋuti dɔwɔƒe xɔŋkɔ aɖe kpɔ le dukɔa me la, va nɔ ƒomea teƒe le ʋɔnudrɔ̃ƒea. Nɔviŋutsu Ganal nɔ dɔ wɔm le eɖokui si hafi nyaa dzɔ, eya ta enɔ bɔbɔe nɛ be wòakpe ɖe ƒomea ŋu. Esi nyaa va ɖo Ʋɔnudrɔ̃ƒea la, ʋɔnudrɔ̃lawo katã tsɔ nu sɔsɔe tso afia be Ðasefoawo tɔ dzɔ, eye wogblɔ be mele se nu be woanyã ɖeviawo le suku o. Ɛ̃, egayi ɖe ame siwo di be yewoagblẽ Mawu ƒe amewo ƒe nuteƒewɔwɔ me la dzi ake.

Míaƒe Akpaɖekedzimademade Na Be Míewɔ Ðeka

22, 23. (a) Nu ka tae míete ŋu ɖu dzi le ʋɔnudrɔ̃nya vevi geɖewo me? (b) Nu ka dzie ɖekawɔwɔ kple ŋutifafa si le mía dome le xexea me godoo la ɖo kpee?

22 Nu ka tae Yehowa ƒe amewo te ŋu ɖu dzi le senya vevi geɖewo me? Dunyahelawo melɔ̃a míaƒe nya o. Ke hã, tso dukɔ me yi dukɔ me la, ʋɔnudrɔ̃la siwo metea nya dzɔdzɔe ɖe to o la kpɔa mía ta tso ame siwo tsia tsitre ɖe mía ŋu vevie la si me le ʋɔnudrɔ̃ƒe geɖewo, eye afiatsotso mawo va zua nu si dzi wonɔa te ɖo kpɔa dukɔmeviwo ƒe gomenɔamesiwo ta le se nu. Ðikeke mele eme o be Kristoe kpe ɖe mía ŋu míeɖu dzi le nya siawo katã me. (Mixlẽ Nyaɖeɖefia 6:2.) Nu ka tae míeʋlia mía ɖokui ta le ʋɔnu? Menye míaƒe taɖodzinue nye be míana woawɔ tɔtrɔ le senyawo me o. Ke boŋ míaƒe didie nye be míayi edzi asubɔ míaƒe Fia Yesu Kristo kplamatsɛdonuwo manɔmee.—Dɔw. 4:29.

23 Le xexe sia si me dunyahehe de dzre kple mama amewo me eye fuléle xɔ aƒe ɖe afi sia afi me la, Yesu Kristo, míaƒe Fia si le dzi ɖum la le yayram ɖe agbagba siwo dzem eyomedzelawo le le xexea me godoo be yewoaganye xexea ƒe akpa aɖeke o la dzi. Satana mete ŋu de mama mía dome alo ɖu mía dzi o. Ame miliɔn geɖe siwo gbe be ‘yewomagasrɔ̃ aʋawɔwɔ azɔ o’ la le Fiaɖuƒea ƒe akpa dzi fifia. Ðekawɔwɔ kple ŋutifafa si le nɔviwo ƒe habɔbɔ bliboa me le xexea me godoo la wɔ nuku ŋutɔ, eye wònye kpeɖodzi sẽŋu be Mawu Fiaɖuƒea le dzi ɖum vavã!—Yes. 2:4.

^ mm. 4 Woyɔa babla sia be Nuwɔwɔ Yeye La. Wova yɔ Ƒe Akpe Ðeka Dziɖuɖua Gogo gbalẽa ƒe bablawo katã emegbe be Nusɔsrɔ̃ Le Ŋɔŋlɔawo Me.

^ mm. 8 Ne èdi numeɖeɖe geɖe tso nyagblɔɖi sia ŋu la, kpɔ agbalẽ si nye Nyaɖeɖefia—Etaƒoƒo Keŋkeŋ la Ðo Vɔ!, ta 27, axa 184-186.

^ mm. 13 Esia ƒoe ɖe Bulgaria dziɖuɖua nu hã be wòawɔ ɖoɖo ɖe dɔ bubu si medo ƒome kple asrafodɔ o ŋu na dukɔmevi siwo katã ƒe dzitsinya meɖe mɔ na wo be woawɔ asrafodɔ o.

^ mm. 14 Àte ŋu akpɔ nya sia ŋuti numeɖeɖe bubuwo le November 1, 2012 ƒe Gbetakpɔxɔ me, axa 29-31.

^ mm. 14 Ðekakpui Ðasefo 450 sɔŋ ye Armenia dziɖuɖua lé de gaxɔ me kpɔ le Armenia tso ƒe 1993 va se ɖe ƒe 2013 me. Woɖe asi le nɔviŋutsu siawo dometɔ mamlɛtɔwo ŋu le November 2013 me.

^ mm. 16 Ale si woŋlɔ ŋkɔa le ʋɔnudrɔ̃ƒea ƒe nuŋlɔɖiwo mee nye Gobitis, gake vodadae wònye wowɔ.

^ mm. 20 Ale si woŋlɔ ŋkɔa le ʋɔnudrɔ̃ƒea ƒe nuŋlɔɖiwo mee nye Ebralinag, gake vodadae wònye wowɔ.